(1)

Id-Direttiva 96/23/KE tirrikjedi li l-pajjiżi terzi li minnhom l-Istati Membri huma awtorizzati jimportaw l-annimali u l-prodotti tal-annimali koperti minn dik id-Direttiva, jippreżentaw pjanijiet ta’ monitoraġġ tar-residwi li jipprovdu l-garanziji meħtieġa (“il-pjanijiet”). Il-pjanijiet għandhom ikopru mill-inqas il-gruppi tar-residwi u tas-sustanzi elenkati fl-Anness I tad-Direttiva 96/23/KE.

(2)

Id-Deċiżjoni tal-Kummissjoni 2011/163/UE (2) tapprova l-pjanijiet sottomessi minn ċerti pajjiżi terzi dwar l-annimali u l-prodotti tal-annimali, li huma elenkati fl-Anness ta’ dik id-Deċiżjoni.

(3)

Ċerti pajjiżi terzi li jużaw biss materja prima mill-Istati Membri jew minn pajjiżi terzi oħrajn li jkunu approvati għall-importazzjoni ta’ tali materja prima lejn l-Unjoni, f’konformità mal-Artikolu 2, tad-Deċiżjoni 2011/163/UE għall-produzzjoni ta’ prodotti maħsuba għall-esportazzjoni lejn l-Unjoni. Għal raġunijiet ta’ ċarezza, l-entrati għal dawk il-pajjiżi jenħtieġ li jiġu mmarkati b“Δ”, li jfisser kummerċ triangolari għall-ispeċi jew komodità rilevanti fit-tabella tal-Anness tad-Deċiżjoni 2011/163/UE.

(4)

Pajjiżi terzi li ma ppreżentawx pjan għall-bovini, ovini/kaprini, porċini, ekwini jew pollam, iżda li jitolbu li jimmanifatturaw prodotti komposti destinati biex jiġu esportati lejn l-Unjoni billi jużaw prodotti tal-annimali pproċessati minn dawk l-ispeċi, jenħtieġ li, wara talba, jitħallew jippreparaw tali prodotti komposti bil-kundizzjoni li jakkwistaw dawk il-prodotti tal-annimali pproċessati jew minn Stat Membru jew minn pajjiż terz approvat soġġett għall-konformità mar-rekwiżiti tas-saħħa tal-annimali u tas-saħħa pubblika stabbiliti fir-Regolamenti Delegati tal-Kummissjoni (UE) 2019/625 (3) u (UE) 2020/692 (4) u r-Regolamenti ta’ Implimentazzjoni tal-Kummissjoni (UE) 2020/2235 (5) u (UE) 2021/404 (6). Għal raġunijiet ta’ ċarezza, l-entrati għal dawk il-pajjiżi jenħtieġ li jiġu mmarkati b’“O” fil-kolonna għall-ispeċi tal-annimali relevanti mitluba biss fit-tabella tal-Anness tad-Deċiżjoni 2011/163/UE.

(5)

Il-pajjiżi terzi li jkunu ppreżentaw pjan jew għall-prodotti tal-akkwakultura, għall-ħalib jew għall-bajd, u li jitolbu li jimmanifatturaw prodotti komposti, jenħtieġ li jitħallew li jħejju prodotti komposti destinati għall-esportazzjoni lejn l-Unjoni li jkun fihom tali prodotti proċessati, billi jużaw kwalunkwe wieħed minn dawk il-prodotti proċessati, sakemm il-prodotti proċessati li għalihom ma ppreżentawx pjan jinkisbu minn Stati Membri jew minn pajjiżi terzi approvati. Għal raġunijiet ta’ ċarezza, l-entrati għal dawk il-pajjiżi jenħtieġ li jiġu mmarkati b’“O” għal li jifdal minn dawk il-kategoriji fit-tabella tal-Anness tad-Deċiżjoni 2011/163/UE.

(6)

L-elenkar ta’ pajjiżi terzi għall-molluski huwa meħtieġ minħabba l-bidla fir-rekwiżiti taċ-ċertifikazzjoni għall-molluski mrobbija. Bħalissa, ma hemm l-ebda rekwiżit skont id-Direttiva 96/23/KE, biex pajjiżi terzi jissottomettu lill-Kummissjoni pjanijiet għall-molluski. L-uniku monitoraġġ tar-residwi rilevanti għall-produzzjoni tal-molluski mrobbija fir-rigward tal-kontaminanti jsir skont ir-Regolament ta’ Implimentazzjoni tal-Kummissjoni (UE) 2019/627 (7), u l-pajjiżi terzi li jissodisfaw dawk il-kundizzjonijiet huma elenkati fl-Anness VIII tar-Regolament ta’ Implimentazzjoni tal-Kummissjoni (UE) 2021/405 (8). Billi dawk il-pajjiżi terzi jissodisfaw ir-rekwiżiti tal-Artikoli 56 sa 59 tar-Regolament ta’ Implimentazzjoni (UE) 2019/627 inkluż dwar il-monitoraġġ tar-residwi, għaldaqstant għal raġunijiet ta’ ċarezza, dawk il-pajjiżi jenħtieġ li jiġu mmarkati b’“M” fil-kolonna “Akkwakultura” fit-tabella tal-Anness tad-Deċiżjoni 2011/163/UE, li tfisser “molluski”.

(7)

Ċerti pajjiżi talbu li jesportaw lejn l-Unjoni prodotti komposti li fihom prodotti pproċessati minn molluski li joriġinaw jew mill-Istati Membri inkella minn pajjiżi terzi approvati elenkati fl-Anness VIII tar-Regolament ta’ Implimentazzjoni (UE) 2021/405. Pajjiżi mmarkati b’“X” fit-tabella tal-Anness tad-Deċiżjoni 2011/163/UE għal mill-inqas waħda mill-komoditajiet li ġejjin: bovini, ovini/kaprini, ekwini, porċini, pollam, akkwakultura, ħalib, bajd jew kaċċa, ipprovdew l-garanziji suffiċjenti b’rabta mas-sistemi uffiċjali ta’ kontroll attwali tagħhom. Għaldaqstant, jenħtieġ li dawk il-pajjiżi kollha jiġu mmarkati b’“P” fil-kolonna “Akkwakultura” ta’ dik it-tabella li tippermettilhom li jużaw prodotti proċessati minn molluski li joriġinaw jew minn Stati Membri inkella minn pajjiżi terzi approvati għall-produzzjoni u l-esportazzjoni ta’ prodotti komposti li fihom prodotti proċessati minn molluski.

(8)

Fit-tabella tal-Anness tad-Deċiżjoni 2011/163/UE, il-kategorija “Prodotti tal-akkwakultura” hija maqsuma f’erba’ subkategoriji, sabiex dawn is-subkategoriji jiġu allinjati ma’ dawk koperti mill-mudelli taċ-ċertifikati għad-dħul fl-Unjoni stabbiliti fir-Regolament ta’ Implimentazzjoni tal-Kummissjoni (UE) 2020/2235 (9), u l-listi korrispondenti ta’ pajjiżi terzi awtorizzati għad-dħul fl-Unjoni ta’ prodotti bħal dawn stabbiliti fir-Regolament ta’ Implimentazzjoni (UE) 2021/405.

(9)

L-esperjenza reċenti wriet li tali sottokategorizzazzjoni tal-prodotti tal-akkwakultura ma tipprovdix iċ-ċarezza meħtieġa għall-persunal ta’ kontroll fil-postijiet ta’ kontroll fuq il-fruntiera tal-Unjoni. Għalhekk, huwa xieraq li nerġgħu lura għal kolonna waħda għall-“Akkwakultura” fit-tabella tal-Anness tad-Deċiżjoni 2011/163/UE.

(10)

L-Awstralja, il-Bangladesh, il-Brażil, il-Kanada, iċ-Ċina, il-Kolombja, il-Costa Rica, l-Ekwador, il-Honduras, l-Indoneżja, l-Indja, il-Korea t’Isfel, is-Sri Lanka, il-Madagaskar, il-Malażja, il-Myanmar/Burma, il-Messiku, il-Panama, il-Perù, il-Filippini, l-Arabja Sawdija, it-Tajlandja, Tajwan, l-Istati Uniti u l-Vjetnam ressqu pjanijiet, li jkopru l-prodotti tal-akkwakultura. Il-pjanijiet jipprovdu biżżejjed garanziji u għaldaqstant jenħtieġ li jiġu approvati.

(11)

L-Albanija, l-Armenja, l-Arġentina, il-Bożnija-Ħerzegovina, il-Belarussja, l-Iżvizzera, iċ-Ċilì, il-Gżejjer Falkland, il-Gżejjer Faeroe, ir-Renju Unit, Isle of Man, l-Iżrael, il-Ġappun, il-Kenja, il-Marokk, il-Moldova, il-Montenegro, il-Maċedonja ta’ Fuq, Mauritius, New Zealand, is-Serbja, Singapore, it-Tuneżija, it-Turkija, l-Ukrajna, u l-Urugwaj ressqu pjanijiet, li jkopru biss il-ħut tal-pinen. Il-pjanijiet jipprovdu biżżejjed garanziji u għaldaqstant jenħtieġ li jiġu approvati, b’kamp ta’ applikazzjoni limitat għall-ħut bil-pinen.

(12)

Il-Brunej, il-Beliże, Kuba, il-Gwatemala, il-Mozambique, in-New Caledonia, in-Niġerja, in-Nikaragwa, it-Tanzanija u l-Venezwela ressqu pjanijiet, li jkopru biss il-krustaċji. Il-pjanijiet jipprovdu biżżejjed garanziji u għalhekk jenħtieġ li jiġu approvati, b’kamp ta’ applikazzjoni limitat għall-krustaċji.

(13)

L-Iran issottometta pjan, li jkopri biss il-bajd tal-ħut u l-kavjar u l-krustaċji. Dan il-pjan jipprovdi biżżejjed garanziji u għalhekk jenħtieġ li jiġi approvat, b’kamp ta’ applikazzjoni limitat għall-bajd tal-ħut u l-kavjar u l-krustaċji.

(14)

Andorra, l-Emirati Għarab Magħquda, il-Kolombja, ir-Renju Unit, Hong Kong, il-Marokk, il-Messiku, il-Malażja, Singapore, San Marino, it-Tajlandja, u l-Kosovo ma ppreżentawx pjanijiet għal ċerti speċijiet ta’ annimali u prodotti tal-annimali skont ir-rekwiżiti tal-Artikolu 7 tad-Direttiva 96/23/KE. Madankollu, dawk il-pajjiżi pprovdew garanziji suffiċjenti f’konformità mal-Artikolu 2 tad-Deċiżjoni 2011/163/UE, biex jesportaw prodotti bħal dawn lejn l-Unjoni, li oriġinarjament inkisbu minn Stat Membru jew minn pajjiż terz approvat. Għaldaqstant, dawk il-pajjiżi terzi jenħtieġ li jiġu approvati għall-kummerċ triangolari.

(15)

L-Awstralja, il-Kanada, l-Iżvizzera, iċ-Ċilì, ir-Renju Unit, Guernsey, Greenland, Isle of Man, il-Ġamajka, Jersey, il-Ġappun, il-Korea t’Isfel, il-Marokk, New Zealand, il-Perù, it-Tajlandja, it-Tuneżija, it-Turkija, l-Ukrajna, l-Istati Uniti, l-Urugwaj u l-Vjetnam huma elenkati fl-Anness VIII tar-Regolament ta’ Implimentazzjoni (UE) 2021/405 bħala pajjiżi terzi awtorizzati għad-dħul fl-Unjoni ta’ molluski bivalvi, ekinodermi, tunikati u gastropodi tal-baħar ħajjin, imkessħin, iffriżati jew ipproċessati. Għaldaqstant, dawk il-pajjiżi terzi jenħtieġ li jiġu mmarkati b’“M” fil-kolonna “Akkwakultura” fit-tabella tal-Anness tad-Deċiżjoni 2011/163/UE.

(16)

Andorra, l-Emirati Għarab Magħquda, l-Albanija, l-Armenja, l-Arġentina, il-Bożnija-Ħerzegovina, il-Bangladesh, il-Brunei, il-Brażil, il-Botswana, il-Belarussja, il-Belize, iċ-Ċina, il-Kolombja, il-Costa Rica, Kuba, l-Ekwador, il-Gżejjer Falkland, il-Gżejjer Faeroe, il-Gwatemala, Hong Kong, il-Honduras, l-Indoneżja, l-Iżrael, l-Indja, l-Iran, il-Kenja, is-Sri Lanka, il-Moldova, il-Montenegro, il-Madagascar, il-Maċedonja ta’ Fuq, il-Myanmar, Mauritius, il-Messiku, il-Malażja, il-Mozambique, in-Namibja, in-New Caledonia, in-Niġerja, in-Nikaragwa, il-Panama, il-Filippini, Saint Pierre u Miquelon, il-Paragwaj, is-Serbja, ir-Russja, l-Arabja Sawdija, Singapore, San Marino, Eswatini, it-Tajwan, it-Tanzanija, il-Venezwela u l-Afrika t’Isfel talbu li jesportaw prodotti komposti li fihom prodotti pproċessati derivati minn molluski. Dawk il-pajjiżi pprovdew garanziji f’konformità mal-Artikolu 2 tad-Deċiżjoni 2011/163/UE li se jużaw biss molluski li joriġinaw mill-Istati Membri jew minn pajjiżi terzi approvati elenkati fl-Anness VIII tar-Regolament ta’ Implimentazzjoni (UE) 2021/405 u jenħtieġ li jiġu mmarkati b’“P” fil-kolonna “Akkwakultura” ta’ dik it-tabella.

(17)

L-Emirati Għarab Magħquda ressqu pjan għall-għasel lill-Kummissjoni li jkopri reġjun wieħed biss. Dak il-pjan jipprovdi biżżejjed garanziji u għaldaqstant jenħtieġ li jiġi approvat. Entrata għall-Emirati Għarab Magħquda għall-għasel jenħtieġ li tiġi inkluża fit-tabella tal-Anness tad-Deċiżjoni 2011/163/UE, limitata għal dak ir-reġjun.

(18)

Iċ-Ċilì u Greenland huma elenkati fit-tabella tal-Anness tad-Deċiżjoni 2011/163/UE għall-esportazzjoni tagħhom lejn l-Unjoni ta’ laħam tal-ovini u tal-kaprini. Madankollu, iċ-Ċilì u Greenland infurmaw lill-Kummissjoni li m’għadhomx interessati jesportaw il-laħam tal-kaprini lejn l-Unjoni. L-entrati għaċ-Ċilì u Greenland għal-laħam tal-ovini u tal-kaprini f’dik it-tabella jenħtieġ li għalhekk ikunu ristretti għal-laħam tal-ovini.

(19)

Guernsey huwa elenkat fit-tabella tal-Anness tad-Deċiżjoni 2011/163/UE għall-esportazzjoni tiegħu lejn l-Unjoni ta’ laħam u ħalib tal-bovini. Madankollu, Guernsey infurmat lill-Kummissjoni li ma għadhiex interessata li tesporta laħam bovin lejn l-Unjoni. L-annotazzjoni għal Guernsey għal-laħam u l-ħalib bovin f’dik it-tabella jenħtieġ li tkun ristretta għall-ħalib.

(20)

Singapor u t-Tajlandja ma ppreżentawx pjan għall-bajd lill-Kummissjoni. Madankollu, Singapore u t-Tajlandja pprovdew garanziji li se jużaw biss bajd li joriġina, jew minn Stati Membri jew minn pajjiżi terzi awtorizzati għad-dħul fl-Unjoni ta’ prodotti bħal dawn u infurmaw lill-Kummissjoni li t-tali bajd għall-esportazzjoni lejn l-Unjoni mhux se jkun limitat għal prodotti komposti li fihom prodotti tal-bajd ipproċessati. Konsegwentement, l-entrati għal Singapore u għat-Tajlandja għall-bajd jenħtieġ li jiġu mmarkati b’“Δ” fit-tabella tal-Anness tad-Deċiżjoni 2011/163/UE.

(21)

L-Emirati Għarab Magħquda u s-Sri Lanka ma pprovdewx pjanijiet għall-ħalib minn speċi bovini, ovini u kaprini skont ir-rekwiżiti tal-Artikolu 7 tad-Direttiva 96/23/KE. Madankollu, huma pprovdew garanziji li se jużaw biss prodotti tal-ħalib li joriġinaw mill-Istati Membri jew minn pajjiżi terzi approvati għall-produzzjoni ta’ prodotti komposti għall-esportazzjoni lejn l-Unjoni. Konsegwentement, l-entrati għall-Emirati Għarab Magħquda u s-Sri Lanka għall-prodotti tal-ħalib jenħtieġ li jiġu mmarkati b’“O” fit-tabella tal-Anness tad-Deċiżjoni 2011/163/UE inklużi prodotti tal-bajd, peress li dawk il-pajjiżi terzi għandhom mill-inqas “X” jew għall-ħalib tal-ġemel (l-Emirati Għarab Magħquda),jew għall-prodotti tal-akkwakultura (is-Sri Lanka) f’dik it-tabella.

(22)

Il-Malażja ma pprovdietx pjan għall-ħalib u għall-bajd skont ir-rekwiżiti tal-Artikolu 7 tad-Direttiva 96/23/KE. Madankollu, il-Malażja pprovdiet garanziji li se tuża biss ħalib u bajd li joriġinaw mill-Istati Membri jew minn pajjiżi terzi approvati għall-produzzjoni ta’ prodotti komposti għall-esportazzjoni lejn l-Unjoni. Konsegwentement, l-entrata għall-Malażja għall-ħalib u għall-bajd jenħtieġ li tiġi mmarkata b’“O” fit-tabella tal-Anness tad-Deċiżjoni 2011/163/UE.

(23)

Bħalissa Sierra Leone hija elenkata fit-tabella tal-Anness tad-Deċiżjoni 2011/163/UE għall-għasel u l-Uganda għall-prodotti tal-akkwakultura. Peress li dawk il-pajjiżi terzi ma ressqux pjanijiet lill-Kummissjoni għall-prodotti rispettivi, dawk l-entrati jenħtieġ li jitħassru minn dik it-tabella.

(24)

Għalhekk, id-Deċiżjoni 2011/163/UE jenħtieġ li tiġi emendata skont dan.

(25)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,