(1)

Le Rialachán (CE) Uimh. 1831/2003 déantar foráil maidir le húdarú breiseán le húsáid i gcothú ainmhithe agus maidir leis an bhforas agus na nósanna imeachta chun an t-údarú sin a dheonú. Go háirithe, in Airteagal 10(2), i gcomhar le hAirteagal 10(7) den Rialachán sin, tá foráil maidir le nósanna imeachta sonracha i leith athmheastóireacht ar bhreiseáin a formheasadh de bhun Threoir 70/524/CEE ón gComhairle agus Threoir 82/471/CEE (2) ón gComhairle (3).

(2)

Le hAirteagal 10(5) de Rialachán (CE) Uimh. 1831/2003, forchuirtear oibleagáid ar an gCoimisiún Rialachán a ghlacadh lena ndéantar breiseáin bheatha a tharraingt siar ón margadh, breiseáin bheatha nár cuireadh aon fhógra dá dtagraítear in Airteagal 10(1)(a) den Rialachán sin ar fáil ina leith laistigh de thréimhse shonraithe. Tá feidhm ag an oibleagáid chéanna maidir le breiseáin bheatha nár cuireadh iarratais isteach ina leith i gcomhréir le hAirteagal 10(2) agus (7) de Rialachán (CE) Uimh. 1831/2003 roimh an sprioc-am dá bhforáiltear sna forálacha sin, agus maidir le breiseáin bheatha ar cuireadh iarratas isteach ina leith ach a tarraingíodh siar ina dhiaidh sin.

(3)

Dá bhrí sin, ba cheart breiseáin bheatha den sórt sin a tharraingt siar ón margadh. Ós rud é nach ndéantar idirdhealú in Airteagal 10(5) de Rialachán (CE) Uimh. 1831/2003 idir údaruithe a eisíodh le teorainn ama agus údaraithe a eisíodh gan teorainn ama, ar mhaithe le soiléireacht is iomchuí foráil a dhéanamh maidir le breiseáin bheatha a tharraingt siar ón margadh, breiseáin bheatha a bhfuil na tréimhsí údaraithe teoranta a bhaineann leo imithe in éag cheana, is é sin tréimhsí údaraithe de bhun Threoir 70/524/CEE.

(4)

I gcás breiseán beatha ar cuireadh iarratais isteach ina leith le haghaidh speiceas áirithe ainmhithe nó catagóirí áirithe ainmhithe agus le haghaidh na speiceas nó na catagóirí sin amháin, nó i gcás breiseán beatha ar tarraingíodh siar iarratais ina leith le haghaidh speiceas ainmhithe nó catagóirí áirithe ainmhithe agus le haghaidh na speiceas nó na catagóirí sin amháin, níor cheart go mbainfeadh an tarraingt siar ón margadh ach leis na speicis ainmhithe agus na catagóirí ainmhithe nár cuireadh iarratas isteach ina leith nó ar tarraingíodh an t-iarratas siar ina leith.

(5)

Mar thoradh ar tharraingt siar na mbreiseán beatha ón margadh, is iomchuí na forálacha lena ndéantar a n-údarú a aisghairm, i gcás ina mbeidh na forálacha sin fós i bhfeidhm. Dá bhrí sin, ba cheart Rialachán (CE) Uimh. 358/2005 ón gCoimisiún (4) a leasú dá réir. Ina theannta sin, ba cheart Rialachán (CE) Uimh. 880/2004 (5) a aisghairm toisc go bhfuil an dá iontráil san Iarscríbhinn a ghabhann leis le scriosadh, mar gheall ar an mbéite-charaitéin a úsáidtear le haghaidh canáraithe a bheith á tarraingt siar ón margadh, úsáid dá bhforáiltear in Iarscríbhinn I, Caibidil I.A, cuid 2, agus mar gheall ar an gcantacsaintín a úsáidtear le haghaidh éin ornáideacha a bheith údaraithe i Rialachán Cur Chun Feidhme (AE) 2015/1486 ón gCoimisiún (6). Thairis sin, ós amhlaidh a húdaraíodh/ós rud é gur údaraíodh cantacsaintín le Rialachán Cur Chun Feidhme (AE) 2015/1486 agus ós rud é gur tarraingíodh siar an breiseán sin ón margadh i gcás speicis agus úsáidí neamhúdaraithe le Rialachán Cur Chun Feidhme (AE) 2017/1145 ón gCoimisiún (7), is iomchuí Rialachán (CE) Uimh. 775/2008 (8) a aisghairm, Rialachán lenar bunaíodh uasteorainneacha iarmhair le haghaidh cantacsaintín.

(6)

Maidir le breiseáin bheatha nach dtéann a n-údarú in éag go dtí dáta theacht i bhfeidhm an Rialacháin seo, is iomchuí idirthréimhse a cheadú le haghaidh páirtithe leasmhara, idirthréimhse inar féidir stoic a úsáid de na breiseáin lena mbaineann atá ann cheana, chomh maith le réamh-mheascáin, ábhair bheatha agus beatha chumaisc a táirgeadh leis na breiseáin sin, agus seilfré beatha áirithe ina bhfuil na breiseáin lena mbaineann san áireamh.

(7)

Na táirgí a liostaítear in Iarscríbhinn I a bheith á dtarraingt siar ón margadh, ní fhágann sin nach féidir a n-údarú ná nach mbeidh siad faoi réir beart maidir lena stádas i gcomhréir le Rialachán (CE) Uimh. 1831/2003.

(8)

Tá éiginnteacht ann i leith roinnt substaintí, miocrorgánach agus ullmhóidí (dá ngairtear “táirgí”) i dtaobh cé acu an breiseáin bheatha iad faoi raon feidhme Rialachán (CE) Uimh. 1831/2003 nó nach ea. Táirgí áirithe a bheith cuimsithe in dhá áit, is iad sin Clár na mbreiseán beatha dá dtagraítear in Airteagal 17 de Rialachán (CE) Uimh. 1831/2003 agus Catalóg na n-ábhar beatha a bunaíodh i gcomhréir le hAirteagal 24 de Rialachán (CE) Uimh. 767/2009 ó Pharlaimint na hEorpa agus ón gComhairle (9), d’fhéadfadh sé gurb é sin is cúis leis an éiginnteacht. D’fhéadfadh sé go bhfuil an éiginnteacht ag teacht freisin ó amhras nó ceisteanna arna gcur in iúl ag údaráis náisiúnta inniúla atá freagrach as rialuithe oifigiúla nó ag oibreoirí eacnamaíocha maidir le haicmiú táirgí áirithe, agus aird á tabhairt go háirithe ar na treoirlínte a bunaíodh le Moladh 2011/25/AE ón gCoimisiún (10).

(9)

An éiginnteacht sin maidir leis an stádas atá ag táirgí áirithe i ndáil le breiseáin bheatha faoi raon feidhme Rialachán (CE) Uimh. 1831/2003, d’fhéadfadh margaíocht na dtáirgí beatha ar fud an Aontais a bheith i mbaol mar gheall uirthi, ós rud é go bhfuil impleachtaí ag an idirdhealú idir breiseáin bheatha agus táirgí beatha nach iad i leith na gcoinníollacha faoina gcuirtear ar an margadh iad, ag brath ar an reachtaíocht ábhartha is infheidhme.

(10)

Ar mhaithe leis an éiginnteacht a mhaolú i leith an stádais atá ag táirgí áirithe mar bhreiseáin bheatha, is iomchuí bearta ábhartha a ghlacadh faoi Rialachán (CE) Uimh. 1831/2003 chun an stádas sin a shoiléiriú. Bheadh comhsheasmhacht ann i leith láimhseáil na dtáirgí lena mbaineann de bharr na mbeart sin, maidir le hobair na n-údarás inniúil náisiúnta atá freagrach as rialuithe oifigiúla, b’fhusaide an obair sin na bearta sin, agus chabhródh na bearta sin leis na hoibreoirí eacnamaíocha leasmhara gníomhú i gcreat lena ndéanfaí foráil maidir le leibhéal iomchuí deimhneachta dlíthiúla.

(11)

Ionas gur féidir a chinneadh an breiseáin bheatha iad táirgí faoi raon feidhme Rialachán (CE) Uimh. 1831/2003, is iomchuí na treoirlínte maidir le hidirdhealú idir breiseáin bheatha, ábhair bheatha agus táirgí eile a cheadú, treoirlínte a bunaíodh le Moladh 2011/25/AE. Go sonrach, déantar foráil sna treoirlínte sin maidir le roinnt critéar atá le meas go comhuaineach i meastóireacht cás ar chás chun próifíl a chruthú le haghaidh gach táirge sonrach, agus na saintréithe uile a bhaineann leis san áireamh. Sna critéir úsáideacha chun idirdhealú a dhéanamh idir breiseáin bheatha agus ábhair bheatha, cuimsítear an modh táirgthe agus próiseála, an sainmhíniú ceimiceach, an leibhéal caighdeánaithe nó íonaithe, na coinníollacha sábháilteachta, an modh úsáide, agus feidhmiúlacht an táirge lena mbaineann. Ina theannta sin, ar mhaithe leis an gcomhsheasmhacht, is de réir analaí ba cheart táirgí a bhfuil airíonna comhchosúla acu a aicmiú.

(12)

Na táirgí ciotráití sóidiam, ciotráití potaisiam, soirbíotól, mainníotól agus hiodrocsaíd chailciam, áirítear na táirgí sin i gClár na mbreiseán beatha mar tháirgí atá ann cheana agus nár cuireadh iarratais isteach ina leith i gcomhréir le hAirteagal 10(2) de Rialachán (CE) Uimh. 1831/2003 roimh an sprioc-am a leagtar síos san fhoráil sin. Áiríodh na táirgí sin i gCatalóg na n-ábhar beatha freisin le Rialachán (AE) Uimh. 575/2011 ón gCoimisiún (11). Is é ba chonclúid don athscrúdú a rinneadh ar phróifíl na dtáirgí sin maidir leis na critéir a mholtar i Moladh 2011/25/AE, áfach, gur cheart a mheas gur breiseáin bheatha iad faoi raon feidhme Rialachán (CE) Uimh. 1831/2003. Go sonrach, déantar iad a shainmhíniú de réir na bhfeidhmeanna sonracha atá acu dá dtagraítear i gClár na mbreiseán beatha, agus mar gheall gó bhfuil stádas acu mar bhreiseáin bhia tá raon feidhme níos fearr ann i ndáil le bainistiú éifeachtach na dtáirgí sin i dtéarmaí sábháilteachta agus an mhodh úsáide. Ina theannta sin, aicmiú na dtáirgí sin mar bhreiseáin le húsáid i mbia, is rud é a chuirtear san áireamh.

(13)

Is gá na táirgí ciotráití sóidiam, ciotráití potaisiam, soirbíotól, mainníotól agus hiodrocsaíd chailciam a tharraingt siar ón margadh mar gheall ar an stádas mar bhreiseán beatha atá acu, faoi mar a fhoráiltear dó sin le hAirteagal 10(5) de Rialachán(CE) Uimh. 1831/2003. Ba cheart idirthréimhse níos faide a cheadú áfach i leith na mbreiseán beatha sin a tharraingt siar ón margadh chomh maith le beatha a bhfuil na breiseáin sin mar chuid di, ar mhaithe leis an éiginnteacht dhlíthiúil maidir lena n-aicmiú a chur san áireamh, chun go bhféadfaidh páirtithe leasmhara iarratas nua a chur isteach ar údarú na mbreiseán beatha sin faoi na nósanna imeachta a leagtar amach i Rialachán (CE) Uimh. 1831/2003.

(14)

Formhór na dtáirgí a liostaítear in Iarscríbhinn II, is táirgí iad a áirítear i gCatalóg na n-ábhar beatha a bunaíodh le Rialachán (AE) Uimh. 68/2013 ón gCoimisiún (12). Sa bhreis air sin, áfach, tá na táirgí uile liostaithe i gClár na mbreiseán beatha nó tá siad faoi réir tarraingt siar ón margadh mar bhreiseáin bheatha faoi Airteagal 10(5) de Rialachán (CE) Uimh. 1831/2003. Ar mhaithe le deimhneacht dhlíthiúil a sholáthar maidir le stádas na dtáirgí sin, rinneadh scrúdú ar phróifíl na dtáirgí i bhfianaise na gcritéar a mholtar i Moladh 2011/25/AE, agus is é ba chonclúid don scrúdú sin gur cheart a mheas nár bhreiseáin bheatha iad a thuilleadh faoi raon feidhme Rialachán (CE) Uimh. 1831/2003.

(15)

Maidir le lipéadú na dtáirgí a liostaítear in Iarscríbhinn II, táirgí a cheadaítear ar an margadh mar bhreiseáin bheatha fós, agus maidir le lipéadú na réamh-mheascán, na n-ábhar beatha agus na beatha chumaisc a bhfuil na táirgí sin mar chuid dóibh, ba cheart foráil a dhéanamh maidir le hidirthréimhse chun go bhféadfaidh oibreoirí gnólachtaí beatha iad féin a oiriúnú. Thairis sin, ba cheart na táirgí sin a scriosadh ó Chlár na mbreiseán beatha.

(16)

Áirítear xilíotól, lachtáit amóiniam agus aicéatáit amóiniam i gCatalóg na n-ábhar beatha a bunaíodh le Rialachán (AE) Uimh. 68/2013 ón gCoimisiún. Cuireadh amhras in iúl áfach, go háirithe amhras na n-údarás inniúil náisiúnta atá freagrach as rialuithe oifigiúla, maidir le stádas dlíthiúil na dtáirgí sin, an rud ba chúis leis an scrúdú a rinneadh ar phróifíl na dtáirgí sin bunaithe ar na critéir a mholtar i Moladh 2011/25/AE. Is éard ba chonclúid don scrúdú sin gur cheart a mheas gur breiseáin bheatha iad na táirgí sin faoi raon feidhme Rialachán (CE) Uimh. 1831/2003. Go sonrach, tá saintréithe xilíotóil an-chosúil le saintréithe manniotóil agus sorbatóil, táirgí a meastar gur breiseáin bheatha iad, agus bheadh comhsheasmhacht ann i leith láimhseáil na dtáirgí comhchosúla sin ach xilíotól a aicmiú mar bhreiseán beatha de réir analaí. Ina theannta sin, cuirtear san áireamh aicmiú xilíotóil mar bhreiseán le húsáid i mbia. Maidir le lachtáit amóiniam agus aicéatáit amóiniam, is substaintí íonaithe iad atá mionsainithe ó thaobh ceimiceán de agus a fheidhmíonn feidhm shonrach, feidhm a shainmhínítear in Airteagal 5(3) de Rialachán (CE) Uimh. 1831/2003. Mar gheall go bhfuil stádas mar bhreiseáin bheatha acu, tá raon feidhme níos fearr ann i ndáil le bainistiú éifeachtach i dtéarmaí sábháilteachta agus an mhodh úsáide. Thairis sin, dá ndéanfaí lachtáit amóiniam agus aicéatáit amóiniam a aicmiú mar bhreiseáin bheatha, bheadh comhsheasmhacht ann i ndáil le táirgí comhchosúla eile a meastar gur breiseáin bheatha iad, próipianáit amóiniam nó formáit amóiniam, cuir i gcás.

(17)

Mar gheall go bhfuil xilíotól, lachtáit amóiniam agus aicéatáit amóiniam aicmithe mar bhreiseáin bheatha faoi raon feidhme Rialachán (CE) Uimh. 1831/2003, is iomchuí foráil a dhéanamh maidir le hidirthréimhse a cheadódh do pháirtithe leasmhara iad féin a oiriúnú do stádas nua na dtáirgí sin, próiseas a chuimseodh iarratas ar údarú a chur isteach agus tuilleadh próiseála a dhéanamh ar na hiarratais sin, faoi na nósanna imeachta a leagtar amach i Rialachán (CE) Uimh. 1831/2003.

(18)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,