EUR-Lex Access to European Union law
This document is an excerpt from the EUR-Lex website
Document 32024L0232
Commission Delegated Directive (EU) 2024/232 of 25 October 2023 amending Directive 2011/65/EU of the European Parliament and of the Council as regards an exemption for cadmium and lead in plastic profiles in electrical and electronic windows and doors containing recovered rigid polyvinyl chloride
Direttiva Delegata tal-Kummissjoni (UE) 2024/232 tal-25 ta’ Ottubru 2023 li temenda d-Direttiva 2011/65/UE tal-Parlament Ewropew u tal-Kunsill fir-rigward ta’ eżenzjoni għall-kadmju u ċ-ċomb fil-profili tal-plastik fit-twieqi u fil-bibien elettriċi u elettroniċi li jkun fihom il-klorur tal-polivinil riġidu rkuprat
Direttiva Delegata tal-Kummissjoni (UE) 2024/232 tal-25 ta’ Ottubru 2023 li temenda d-Direttiva 2011/65/UE tal-Parlament Ewropew u tal-Kunsill fir-rigward ta’ eżenzjoni għall-kadmju u ċ-ċomb fil-profili tal-plastik fit-twieqi u fil-bibien elettriċi u elettroniċi li jkun fihom il-klorur tal-polivinil riġidu rkuprat
C/2023/7088
ĠU L, 2024/232, 10.1.2024, ELI: http://data.europa.eu/eli/dir_del/2024/232/oj (BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
|
Il-Ġurnal Uffiċjali |
MT Serje L |
|
2024/232 |
10.1.2024 |
DIRETTIVA DELEGATA TAL-KUMMISSJONI (UE) 2024/232
tal-25 ta’ Ottubru 2023
li temenda d-Direttiva 2011/65/UE tal-Parlament Ewropew u tal-Kunsill fir-rigward ta’ eżenzjoni għall-kadmju u ċ-ċomb fil-profili tal-plastik fit-twieqi u fil-bibien elettriċi u elettroniċi li jkun fihom il-klorur tal-polivinil riġidu rkuprat
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2011/65/UE tal-Parlament Ewropew u tal-Kunsill tat-8 ta’ Ġunju 2011 dwar ir-restrizzjoni tal-użu ta’ ċerti sustanzi perikolużi fit-tagħmir elettriku u elettroniku (1), u b’mod partikolari l-Artikolu 5(1)(a) tagħha,
Billi:
|
(1) |
L-Artikolu 4(1) tad-Direttiva 2011/65/UE jirrikjedi li l-Istati Membri jiżguraw li t-tagħmir elettriku u elettroniku mqiegħed fis-suq ma jkunx fih is-sustanzi perikolużi elenkati fl-Anness II ta’ dik id-Direttiva. Dik ir-restrizzjoni ma tapplikax għall-applikazzjonijiet elenkati fl-Anness III u IV ta’ dik id-Direttiva. |
|
(2) |
Il-kategoriji tat-tagħmir elettriku u elettroniku li għalihom tapplika d-Direttiva 2011/65/UE huma elenkati fl-Anness I ta’ dik id-Direttiva. |
|
(3) |
Il-kadmju u ċ-ċomb huma sustanzi ristretti elenkati fl-Anness II tad-Direttiva 2011/65/UE. Iċ-ċomb huwa ristrett b’valur massimu ta’ konċentrazzjoni ta’ 0,1 % u l-kadmju b’valur massimu ta’ konċentrazzjoni ta’ 0,01 % skont il-piż f’materjali omoġenji. |
|
(4) |
Fl-14 ta’ Diċembru 2015, il-Kummissjoni rċeviet applikazzjoni li saret f’konformità mal-Artikolu 5(3) tad-Direttiva 2011/65/UE għall-għoti ta’ eżenzjoni għall-kadmju u ċ-ċomb fit-twieqi u fil-bibien elettriċi u elettroniċi li jkun fihom il-klorur tal-polivinil (PVC) irkuprat (“l-eżenzjoni mitluba”). |
|
(5) |
Sar studju ta’ valutazzjoni teknika u xjentifika (2) biex tiġi evalwata l-eżenzjoni mitluba. L-evalwazzjoni kienet tinkludi konsultazzjonijiet mal-partijiet ikkonċernati kif meħtieġ mill-Artikolu 5(7) tad-Direttiva 2011/65/UE. |
|
(6) |
Il-kadmju u ċ-ċomb jintużaw fil-materjal tal-PVC irkuprat tal-frejm għas-settijiet ta’ twieqi u ta’ bibien għall-iskop ta’ stabbilizzazzjoni tal-polimeri tal-profili tal-PVC. |
|
(7) |
It-tagħmir elettriku u elettroniku deskritt fl-eżenzjoni mitluba jaqa’ taħt il-kategorija 11 tal-Anness I tad-Direttiva 2011/65/UE. |
|
(8) |
Filwaqt li l-PVC verġni mingħajr ċomb u kadmju huwa disponibbli fis-suq, l-użu tal-PVC irkuprat jeħtieġ ammonti iżgħar ta’ enerġija u ta’ riżorsi naturali (bħal pereżempju l-ilma, il-petroleum u l-melħ naturali) minn dawk li huma meħtieġa għall-użu tal-PVC verġni. Għaldaqstant, it-total tal-impatti negattivi fuq l-ambjent, is-saħħa u s-sikurezza tal-konsumatur ikkawżati mis-sostituzzjoni x’aktarx li jissupera t-total tal-benefiċċji għall-ambjent, għas-saħħa u għas-sikurezza tal-konsumatur. Għalhekk, l-eżenzjoni mitluba tissodisfa mill-inqas waħda mill-kundizzjonijiet rilevanti speċifikati fl-Artikolu 5(1)(a) tad-Direttiva 2011/65/UE. |
|
(9) |
L-eżenzjoni ma ddgħajjifx il-protezzjoni ambjentali u tas-saħħa li jagħti r-Regolament (KE) Nru 1907/2006 tal-Parlament Ewropew u tal-Kunsill (3). Il-kamp ta’ applikazzjoni tal-eżenzjoni huwa limitat għall-entrati attwali ta’ restrizzjoni tal-kadmju u taċ-ċomb skont dak ir-Regolament. B’mod partikolari, il-kamp ta’ applikazzjoni tal-eżenzjoni ġie allinjat mad-deroga għaċ-ċomb fil-PVC irkuprat stabbilita fir-Regolament tal-Kummissjoni (UE) 2023/923 (4). |
|
(10) |
Għalhekk, jixraq li tingħata l-eżenzjoni billi jiddaħħlu l-applikazzjonijiet koperti minn dik l-eżenzjoni fl-Anness III tad-Direttiva 2011/65/UE fir-rigward tat-tagħmir elettriku u elettroniku tal-kategorija 11 tal-Anness I tad-Direttiva 2011/65/UE. |
|
(11) |
Id-data tal-iskadenza tal-eżenzjoni jenħtieġ li tkun limitata għat-28 ta’ Mejju 2028, u sa dakinhar għandha tiġi rieżaminata l-entrata ta’ restrizzjoni 63, il-punt 18, tal-Anness XVII tar-Regolament (KE) Nru 1907/2006. Id-data tal-iskadenza hija konformi mal-ewwel subparagrafu tal-Artikolu 5(2) tad-Direttiva 2011/65/UE. |
|
(12) |
Għaldaqstant, jenħtieġ li d-Direttiva 2011/65/UE tiġi emendata skont dan, |
ADOTTAT DIN ID-DIRETTIVA:
Artikolu 1
L-Anness III tad-Direttiva 2011/65/UE huwa emendat kif stabbilit fl-Anness ta’ din id-Direttiva.
Artikolu 2
1. L-Istati Membri għandhom jadottaw u jippubblikaw, sa mhux iktar tard mill-31 ta’ Lulju 2024, il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma’ din id-Direttiva. Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.
Huma għandhom japplikaw dawk id-dispożizzjonijiet mill-1 ta’ Awwissu 2024.
Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.
2. L-Istati Membri għandhom jikkomunikaw lill-Kummissjoni t-test tad-dispożizzjonijiet prinċipali tad-dritt nazzjonali li jadottaw fil-qasam kopert minn din id-Direttiva.
Artikolu 3
Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Artikolu 4
Din id-Direttiva hija indirizzata lill-Istati Membri.
Magħmul fi Brussell, il-25 ta’ Ottubru 2023.
Għall-Kummissjoni
Il-President
Ursula VON DER LEYEN
(1) ĠU L 174, 1.7.2011, p. 88.
(2) Study to assess 2 RoHS new exemption requests - #1 for cadmium in video cameras designed for use in environments exposed to ionising radiation, #2 for lead and cadmium in PVC profiles of electric windows and doors: final report.
(3) Ir-Regolament (KE) Nru 1907/2006 tal-Parlament Ewropew u tal-Kunsill tat-18 ta’ Diċembru 2006 dwar ir-reġistrazzjoni, il-valutazzjoni, l-awtorizzazzjoni u r-restrizzjoni ta’ sustanzi kimiċi (REACH), li jistabbilixxi Aġenzija Ewropea għas-Sustanzi Kimiċi, li jemenda d-Direttiva 1999/45/KE u li jħassar ir-Regolament (KEE) Nru 793/93 tal-Kunsill u r-Regolament (KE) Nru 1488/94 tal-Kummissjoni kif ukoll id-Direttiva 76/769/KEE tal-Kunsill u d-Direttivi 91/155/KEE, 93/67/KEE, 93/105/KE u 2000/21/KE tal-Kummissjoni (ĠU L 396, 30.12.2006, p. 1).
(4) Ir-Regolament tal-Kummissjoni (UE) 2023/923 tat-3 ta’ Mejju 2023 li jemenda l-Anness XVII tar-Regolament (KE) Nru 1907/2006 tal-Parlament Ewropew u tal-Kunsill rigward iċ-ċomb u l-komposti tiegħu fil-PVC (ĠU L 123, 8.5.2023, p. 1).
ANNESS
Fl-Anness III tad-Direttiva 2011/65/UE, jiżdied il-punt 46 li ġej:
|
“46 |
Il-kadmju u ċ-ċomb fi profili tal-plastik li fihom taħlitiet prodotti mill-iskart tal-klorur tal-polivinil (minn hawn ’il quddiem imsejjaħ ‘PVC riġidu rkuprat’), użati għat-twieqi u l-bibien elettriċi u elettroniċi, fejn il-konċentrazzjoni fil-materjal tal-PVC riġidu rkuprat ma taqbiżx iż–0,1 % ta’ kadmju skont il-piż u l–1,5 % ta’ ċomb skont il-piż. Mit-28 ta’ Mejju 2026, il-PVC riġidu rkuprat mit-twieqi u l-bibien elettriċi u elettroniċi għandu jintuża biss għall-produzzjoni ta’ oġġetti ġodda skont il-kategoriji speċifikati fl-entrata 63, il-punti 18(a) sa (d) tal-Anness XVII tar-Regolament (KE) Nru 1907/2006. Il-fornituri tal-oġġetti tal-PVC li jkun fihom il-PVC riġidu rkuprat f’konċentrazzjoni taċ-ċomb daqs jew iżjed minn 0,1 % skont il-piż tal-materjal tal-PVC għandhom jiżguraw li qabel ma jqiegħdu dawk l-oġġetti fis-suq, dawn ikunu mmarkati b’mod viżibbli, li jinqara u li ma jitħassarx bid-dikjarazzjoni: ‘Fih ≥ 0,1 % ċomb’. Meta l-immarkar ma jkunx jista’ jsir fuq l-oġġett minħabba n-natura tal-oġġett, dan għandu jsir fuq l-imballaġġ tal-oġġett. Il-fornituri tal-oġġetti tal-PVC li fihom il-PVC riġidu rkuprat għandhom jippreżentaw l-evidenza dokumentata lill-awtoritajiet nazzjonali tal-infurzar meta jintalbu, biex jissostanzjaw l-asserzjonijiet dwar l-oriġini rkuprata tal-PVC f’dawk l-oġġetti. Iċ-ċertifikati maħruġa bl-iskemi biex jagħtu prova tat-traċċabbiltà u tal-kontenut riċiklat, bħal pereżempju dawk żviluppati skont l-istandard EN 15343:2007 jew standards ekwivalenti rikonoxxuti, jistgħu jintużaw biex jissostanzjaw dawn l-asserzjonijiet għall-oġġetti prodotti fl-Unjoni. Mal-asserzjonijiet li jsiru dwar l-oriġini rkuprata tal-PVC fl-oġġetti importati għandu jinhemeż ċertifikat li jagħti prova ekwivalenti tat-traċċabbiltà u tal-kontenut riċiklat, maħruġ minn parti terza indipendenti. |
Dan japplika għall-kategorija 11 u jiskadi fit-28 ta’ Mejju 2028.” |
ELI: http://data.europa.eu/eli/dir_del/2024/232/oj
ISSN 1977-074X (electronic edition)