Rikors ippreżentat fl-24 ta’ Marzu 2009 — Viasat Broadcasting UK vs Il-Kummissjoni

(Kawża T-114/09)

2009/C 141/93

Lingwa tal-kawża: L-Ingliż

Partijiet

Rikorrenti: Viasat Broadcasting UK Ltd (Londra, ir-Renju Unit) (rappreżentanti: S. Kalsmose-Hjelmborg u M. Honoré, lawyers)

Konvenuta: Il-Kummissjoni tal-Komunitajiet Ewropej

Talbiet tar-rikorrenti

Motivi u argumenti prinċipali

Permezz ta’ dan ir-rikors, ir-rikorrenti qegħda titlob l-annullament tad-deċiżjoni tal-Kummissjoni tal-4 ta’ Awwissu 2008 fil-Każ N 287/2008 (1) li biha l-Kummissjoni approvat, abbażi tal-Artikolu 87(3)(ċ) KE, għajnuna ta’ salvataġġ mogħtija mill-Istat Daniż lil TV 2 Danmark A/S (iktar ’il quddiem “TV 2”).

Ir-rikorrenti ssostni li l-għajnuna mhijiex kompatibbli mal-Artikolu 87(3)(ċ) għaliex tmur kontra l-prinċipju tal-proporzjonalità previst f’din id-dispożizzjoni li tipprovdi li tali għajnuna m’għandhiex “[tfixkel] il-kondizzjonijiet tal-kummerċ sa grad li jkun kuntrarju għall-interess komuni”. L-ewwel nett, b’mod partikolari, ir-rikorrenti ssostni li l-Kummissjoni wettqet żball ta’ liġi meta qieset lil TV 2 bħala “impriża f’diffikultà” skont it-termini tal-Linji Gwida Komunitarji dwar għajnuna mill-Istat għas-salvataġġ u għar-ristrutturar ta’ impriżi f’diffikultà [traduzzjoni mhux uffiċjali] (2). It-tieni nett, ir-rikorrenti ssostni li l-Kummissjoni wettqet żball ta’ liġi meta qieset li l-għajnuna ta’ salvataġġ kienet limitata biss għal dak li huwa neċessarju sabiex TV 2 tibqa’ fin-negozju u li l-għajnuna inkwistjoni ngħatat f’kwatitajiet li ma jippermettux lil TV 2 tinvesti f’attivitajiet oħra jew taġixxi b’mod aggressiv fis-swieq kummerċjali. It-tielet nett, ir-rikorrenti ssostni li l-Kummissjoni wettqet żball ta’ liġi meta naqset milli tieħu inkunsiderazzjoni l-għajnuna mill-Istat li TV 2 rċeviet fil-passat.

(1)  Sommarju tad-deċiżjoni kkontestata ġie ppubblikat fil-Ġurnal Uffiċjali tal-Unjoni Ewropea (ĠU 2009 C 9, p.2) u verżjoni mhux kunfidenzjali tad-deċiżjoni kienet aċċessibbli fis-sit http://ec.europa.eu/community_law/state_aids/

(2)  Linji Gwida Komunitarji dwar l-għajnuna mill-Istat għas-salvataġġ u għar-ristrutturar ta’ impriżi f’diffikultà (ĠU 2004 C 244, p. 2)