31.10.2013   

MT

Il-Ġurnal Uffiċjali tal-Unjoni Ewropea

L 289/61

(1)

L-Anness II tar-Regolament (KE) Nru 1333/2008 jistabbilixxi lista ta’ addittivi tal-ikel tal-Unjoni approvati għall-użu fl-ikel, u l-kondizzjonijiet tal-użu tagħhom.

(2)

Din il-lista tista’ tiġi aġġornata skont il-proċedura komuni msemmija fl-Artikolu 3(1) tar-Regolament (KE) Nru 1331/2008 tal-Parlament Ewropew u tal-Kunsill tas-16 ta’ Diċembru 2008 li jistabbilixxi proċedura ta’ awtorizzazzjoni komuni għall-addittivi tal-ikel, l-enżimi tal-ikel u l-aromatizzanti tal-ikel (2) kemm fuq inizjattiva tal-Kummissjoni u kemm fuq talba.

(3)

Fis-26 ta’ Awwissu 2010 ġiet sottomoessa talba għall-awtorizzazzjoni tal-użu tal-fosfati tas-sodju (E 339) bħala regolatur tal-aċidità fil-ġlud naturali għaz-zlazet u tpoġġiet għad-dispożizzjoni tal-Istati Membri.

(4)

Il-fosfati tas-sodju (E 339) huma inklużi fil-lista tal-Unjoni ta’ addittivi tal-ikel u dawn jistgħu jintużaw f’ċertu ikel, li ma jinkludix ġlud naturali għaz-zlazet.

(5)

Karatteristiċi mekkaniċi importanti li jnaqqsu l-effikaċja tal-ġlud naturali li jikkawżaw problemi fl-industrija taz-zalzett huma l-okkorrenza tal-ħruġ tal-mili waqt il-proċess u l-kapaċità mnaqqsa tal-ġlud li jinġibdu (aktar twaħħil) fuq it-tubu tal-mili taz-zlazet.

(6)

Ġie pprovat li l-fosfati tas-sodju (E 339), użati bħala regolatur tal-aċidità, huma adattati biex itejbu l-proprjetajiet tal-ġlud naturali li jinġibdu u b’hekk jiffaċilitaw il-mili taz-zlazet u jnaqqsu l-forza massima u t-tensjoni tal-ksur fil-ġlud.

(7)

Il-konsum massimu tollerat ta’ kuljum (MTDI) tal-fosfati stabbiliti mill-Kumitat Xjentifiku tal-Ikel (3) hija 70 mg/kg tal-piż bil-massa. Il-livell massimu propost mill-applikant huwa 12 600 mg/kg ta’ ġlud li jwasslu għal trasferiment massimu tal-fosfati mill-ġlud għaz-zalzett finali ta’ 250 mg/kg. L-ogħla kontribut ta’ fosfati permezz tal-ġlud naturali ttrattati se jkun ta’ 2,1 % MTDI. Għalhekk hu xieraq li jkun permess l-użu ta’ fosfati tas-sodju bħala regolatur tal-aċidità għat-titjib tal-proprjetajiet mekkaniċi tal-ġlud għaz-zalzett.

(8)

Skont l-Artikolu 3(2) tar-Regolament (KE) Nru 1331/2008, il-Kummissjoni għandha titlob l-opinjoni tal-Awtorità Ewropea dwar is-Sigurtà fl-Ikel biex taġġorna l-lista tal-Unjoni tal-addittivi tal-ikel stipulata fl-Anness II tar-Regolament (KE) Nru 1333/2008, ħlief meta l-aġġornament inkwistjoni mhuwiex mistenni jħalli effett fuq is-saħħa tal-bniedem. Billi l-awtorizzazzjoni tal-użu tal-fosfati tas-sodju (E 339) għat-titjib tal-poprjetajiet mekkaniċi tal-ġlud naturali taz-zlazet tikkostitwixxi aġġornament ta’ dik il-lista li mhuwiex mistenni jħalli effett fuq is-saħħa tal-bniedem għar-raġunijiet imsemmija, m’hemmx bżonn tintalab l-opinjoni tal-Awtorità Ewropea dwar is-Sigurtà fl-Ikel.

(9)

Għalhekk, l-Anness II tar-Regolament (KE) Nru 1333/2008 għandu jiġi emendat skont dan.

(10)

Il-miżuri stipulati f’dan ir-Regolament huma konformi mal-opinjoni tal-Kumitat Permanenti dwar il-Katina Alimentari u s-Saħħa tal-Annimali,