17.12.2011   

MT

Il-Ġurnal Uffiċjali tal-Unjoni Ewropea

L 335/107

(1)

Id-Deċiżjoni tal-Kummissjoni 2006/923/KE (2) approvat kontribuzzjoni finanzjarja mill-Unjoni għal programm ta’ miżuri introdott mill-Portugall li għandu l-għan li fl-2006 u l-2007 jikkontrolla l-firxa tal-Bursaphelenchus xylophilus (Steiner et Buhrer) Nickle et al. (nematodu tal-injam tal-arżnu) milli jinfirex lejn Stati Membri oħra. Il-miżuri kienu jikkonsistu mill-ħolqien ta’ settur li jkun ħieles mis-siġar kollha li jospitaw il-vettur tan-nematodu tal-injam tal-arżnu, minn issa’l quddiem imsejjaħ “il-faxxa ta’ konteniment fitosanitarju” (clear cut belt).

(2)

Il-kontribuzzjoni finanzjarja mogħtija mid-Deċiżjoni 2006/923/KE kienet imsejsa fuq il-programm għal aktar azzjonijiet għan-nematodu tal-injam tal-arżnu (minn issa’l quddiem: PWN) u l-istima tal-baġit li tirreferi għal dan il-programm kif imressaq mill-Portugall lill-Kummissjoni fit-28 ta’ Lulju 2006.

(3)

Il-ħlasijiet finali lill-Portugall konnessi mal-azzjonijiet stipulati fid-Deċiżjoni 2006/923/KE saru f’Ġunju 2008.

(4)

Il-Portugall għarraf lill-Kummissjoni fit-28 ta’ Settembru 2007 u ressaq dokumenti ġustifikattivi fit-30 ta’ Ġunju 2009 li wrew li n-nefqa relatata mal-ħolqien ta’ faxxa ta’ konteniment fitosanitarju kienet taqbeż sew l-istima mressqa f’Lulju 2006. F’dan ir-rigward huwa ressaq talba oħra għal kontribuzzjoni finanzjarja mill-Unjoni għal nefqa addizzjonali ta’ EUR 10 230 256,59. Is-sottostima inizjali kienet minħabba diversi fatturi, inkluża sottostima ta’ għadd ta’ siġar kbar li jospitaw in-nematodu tal-injam tal-arżnu, il-perċentwal żgħir ta’ sigar li jospitaw in-nematodu tal-injam tal-arżnu maqtugħa mis-sidien tagħhom u n-noninklużjoni tal-ispejjeż li se jsiru għall-qtugħ tas-siġar żgħar li jospitaw dan in-nematodu msemmi.

(5)

F’Lulju 2010, il-Kummissjoni wettqet verifika dwar it-tagħrif ikkomunikat mill-Portugall fit-30 ta’ Ġunju 2009. Wara l-eżami tad-dokumenti ġustifikattivi kollha għat-talba addizzjonali, ir-rapport ta’ verifika kkonkluda li seta’ jiġi vvalidat ammont eliġibbli ta’ EUR 5 314 851,15 ta’ fatturi mħallsa (inklużi l-ispejjeż ta’ koordinazzjoni)

(6)

Billi l-miżuri inklużi fil-talba addizzjonali huma tal-istess natura u jimmiraw lejn l-istess skop bħall-miżuri tad-Deċiżjoni 2006/923/KE, huwa xieraq li tiġi allokata l-istess rata ta’ kontribuzzjoni finanzjarja tal-Unjoni bħal fid-deċiżjoni, jiġifieri rata ta’ 75 %.

(7)

Skont l-Artikolu 3(2)(a) tar-Regolament tal-Kunsill (KE) Nru 1290/2005 tal-21 ta’ Ġunju 2005 dwar il-finanzjament tal-politika agrikola komuni (3), il-miżuri għas-saħħa tal-pjanti huma ffinanzjati mill-Fond Agrikolu Ewropew ta’ Garanzija. Għall-finijiet ta’ kontroll finanzjarju ta’ dawn il-miżuri, għandhom japplikaw l-Artikoli 9, 36 u 37 tar-Regolament imsemmi hawn fuq.

(8)

Skont l-Artikolu 75 tar-Regolament tal-Kunsill (KE, Euratom) Nru 1605/2002 tal-25 ta’ Ġunju 2002 rigward ir-Regolament Finanzjarju applikabbli għall-baġit ġenerali tal-Komunitajiet Ewropej (4) u l-Artikolu 90(1) tar-Regolament tal-Kummissjoni (KE, Euratom) Nru 2342/2002 tat-23 ta’ Diċembru 2002 li jippreskrivi regoli dettaljati għall-implimentazzjoni tar-Regolament tal-Kunsill (KE, Euratom) Nru 1605/2002 fuq ir-Regolament Finanzjarju li jgħodd għall-baġit ġenerali tal-Komunitajiet Ewropej (5), l-impenn tan-nefqa mill-baġit tal-Unjoni għandu jkun ippreċedut minn deċiżjoni ta’ finanzjament adottata mill-istituzzjoni li għaliha jkunu ġew iddelegati l-poteri, filwaqt li jiġu stipulati l-elementi essenzjali tal-azzjoni li tinvolvi n-nefqa.

(9)

Id-deċiżjoni preżenti tikkostitwixxi deċiżjoni ta’ finanzjament għan-nefqa mressqa fit-talbiet ta’ kofinanzjament ippreżentati mill-Istati Membri.

(10)

Il-miżuri previsti f’din id-Deċiżjoni huma skont l-opinjoni tal-Kumitat Permanenti dwar is-Saħħa tal-Pjanti,