EUR-Lex Access to European Union law
This document is an excerpt from the EUR-Lex website
Document 32018L0740
Commission Delegated Directive (EU) 2018/740 of 1 March 2018 amending, for the purposes of adapting to scientific and technical progress, Annex III to Directive 2011/65/EU of the European Parliament and of the Council as regards an exemption for lead as an alloying element in aluminium (Text with EEA relevance. )
Direttiva Delegata tal-Kummissjoni (UE) 2018/740 tal-1 ta' Marzu 2018 li temenda, għall-finijiet ta' adattament għall-progress xjentifiku u tekniku, l-Anness III tad-Direttiva 2011/65/UE tal-Parlament Ewropew u tal-Kunsill fir-rigward ta' eżenzjoni għaċ-ċomb bħala element ta' lligar fl-aluminju (Test b'rilevanza għaż-ŻEE. )
Direttiva Delegata tal-Kummissjoni (UE) 2018/740 tal-1 ta' Marzu 2018 li temenda, għall-finijiet ta' adattament għall-progress xjentifiku u tekniku, l-Anness III tad-Direttiva 2011/65/UE tal-Parlament Ewropew u tal-Kunsill fir-rigward ta' eżenzjoni għaċ-ċomb bħala element ta' lligar fl-aluminju (Test b'rilevanza għaż-ŻEE. )
C/2018/1092
ĠU L 123, 18.5.2018, p. 106–108
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
|
18.5.2018 |
MT |
Il-Ġurnal Uffiċjali tal-Unjoni Ewropea |
L 123/106 |
DIRETTIVA DELEGATA TAL-KUMMISSJONI (UE) 2018/740
tal-1 ta' Marzu 2018
li temenda, għall-finijiet ta' adattament għall-progress xjentifiku u tekniku, l-Anness III tad-Direttiva 2011/65/UE tal-Parlament Ewropew u tal-Kunsill fir-rigward ta' eżenzjoni għaċ-ċomb bħala element ta' lligar fl-aluminju
(Test b'rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2011/65/UE tal-Parlament Ewropew u tal-Kunsill tat-8 ta' Ġunju 2011 dwar ir-restrizzjoni tal-użu ta' ċerti sustanzi perikolużi fit-tagħmir elettriku u elettroniku (1), u b'mod partikolari l-Artikolu 5(1)(a) tagħha,
Billi:
|
(1) |
Id-Direttiva 2011/65/UE tirrikjedi li l-Istati Membri jiżguraw li t-tagħmir elettriku u elettroniku mqiegħed fis-suq ma jkunx fih iċ-ċomb. |
|
(2) |
Il-punt 6(b) tal-Anness III tad-Direttiva 2011/65/UE eżenta l-użu taċ-ċomb bħala element ta' lligar fl-aluminju li jkun fih sa 0,4 % ċomb skont il-piż sal-21 ta' Lulju 2016. Il-Kummissjoni rċeviet applikazzjoni għat-tiġdid ta' din l-eżenzjoni fir-rigward tal-kategoriji 1 sa 7 u l-kategorija 10 qabel l-21 ta' Jannar 2015, skont l-Artikolu 5(5) tad-Direttiva 2011/65/UE. |
|
(3) |
Iċ-ċomb jiġi miżjud intenzjonalment mal-aluminju biex l-aluminju jkun jista' jinħadem aħjar mill-magni għall-produzzjoni industrijali. Reċentement, tqiegħdu fis-suq ċerti alternattivi mingħajr ċomb. Il-prattikabbiltà u l-affidabbiltà ta' dawn l-alternattivi għadhom mhux ċari. |
|
(4) |
Barra minn hekk, filwaqt li r-riċiklaġġ tar-ruttami tal-aluminju li jkun fih iċ-ċomb huwa ta' vantaġġ għall-ambjent, it-tneħħija ta' dan iċ-ċomb li jkun ġie introdott mhux intenzjonalment mill-fluss tar-riċiklaġġ tal-aluminju għadha mhux teknikament prattikabbli. |
|
(5) |
Il-ligi tal-aluminju fejn iċ-ċomb ma jiddaħħalx intenzjonalment u l-ligi tal-aluminju, fejn iċ-ċomb jiġi miżjud biex jinkisbu ċerti proprjetajiet jenħtieġ li jiġu differenzjati fil-kliem tal-punt 6(b) tal-Anness III tad-Direttiva 2011/65/UE, skont l-Artikolu 5(1)(a) ta' dik id-Direttiva. |
|
(6) |
Fil-każ tal-preżenza mhux intenzjonata taċ-ċomb li ġejja mir-riċiklaġġ tar-ruttami tal-aluminju li jkun fih iċ-ċomb, l-imprattikabbiltà tat-tneħħija taċ-ċomb u l-impatt ambjentali aktar baxx tal-aluminju riċiklat jiġġustifikaw l-għotja ta' eżenzjoni sal-21 ta' Lulju 2021 għall-kategoriji 1 sa 7 u għall-kategorija 10. Fir-rigward taċ-ċomb fil-ligi tal-aluminju għall-iskopijiet ta' xogħol bil-magni (machining), jenħtieġ li tingħata eżenzjoni għall-kategoriji 1 sa 7 u għall-kategorija 10 b'tul ta' żmien ta' tliet snin wara l-pubblikazzjoni ta' din id-Direttiva f'Il-Ġurnal Uffiċjali tal-Unjoni Ewropea sabiex l-industrija tkun tista' twettaq il-valutazzjonijiet meħtieġa tal-prestazzjoni tal-alternattivi mingħajr iċ-ċomb disponibbli fis-suq u sabiex tkun tista' taddatta għal-bidliet possibbli. Għal kategoriji oħrajn għajr il-kategoriji 1 sa 7 u l-kategorija 10, l-eżenzjoni attwali tibqa' tgħodd skont il-perjodi ta' validità stabbiliti fit-tieni subparagrafu tal-Artikolu 5(2) tad-Direttiva 2011/65/UE. |
|
(7) |
Għalhekk id-Direttiva 2011/65/UE jenħtieġ li tiġi emendata skont dan, |
ADOTTAT DIN ID-DIRETTIVA:
Artikolu 1
L-Anness III tad-Direttiva 2011/65/UE huwa emendat kif stipulat fl-Anness ta' din id-Direttiva.
Artikolu 2
1. L-Istati Membri għandhom jadottaw u jippubblikaw, sa mhux iktar tard mit-30 ta' Ġunju 2019 il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma' din id-Direttiva. Huma għandhom jikkomunikaw it-test ta' dawk id-dispożizzjonijiet lill-Kummissjoni minnufih.
Dawn għandhom japplikaw dawk id-dispożizzjonijiet mill-1 ta' Lulju 2019.
Meta l-Istati Membri jadottaw dawk id-dispożizzjonijiet, fihom għandu jkun hemm referenza għal din id-Direttiva jew għandhom ikunu akkumpanjati minn dik ir-referenza meta ssir il-pubblikazzjoni uffiċjali tagħhom. Huma l-Istati Membri li għandhom jiddeċiedu kif issir dik ir-referenza.
2. L-Istati Membri għandhom jikkomunikaw lill-Kummissjoni t-test tad-dispożizzjonijiet prinċipali tad-dritt nazzjonali li jadottaw fil-qasam kopert minn din id-Direttiva.
Artikolu 3
Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Artikolu 4
Din id-Direttiva hija indirizzata lill-Istati Membri.
Magħmul fi Brussell, l-1 ta' Marzu 2018.
Għall-Kummissjoni
Il-President
Jean-Claude JUNCKER
(1) ĠU L 174, 1.7.2011, p. 88.
ANNESS
Fl-Anness III tad-Direttiva 2011/65/UE, il-punt 6(b) huwa sostitwit b'dan li ġej:
|
“6(b) |
Iċ-ċomb bħala element ta' lligar f'aluminju li jkun fih sa 0,4 % ċomb skont il-piż. |
Jiskadi fil-:
|
||||||
|
6(b)-I |
Iċ-ċomb bħala element ta' lligar f'aluminju li jkun fih sa 0,4 % ċomb skont il-piż, sakemm jirriżulta mir-riċiklaġġ tar-ruttami tal-aluminju li jkun fih iċ-ċomb |
Jiskadi fil-21 ta' Lulju 2021 għall-kategoriji 1-7 u 10. |
||||||
|
6(b)-II |
Iċ-ċomb bħala element ta' lligar fl-aluminju għal skopijiet ta' xogħol bil-magni (machining) b'kontenut ta' ċomb sa 0,4 % skont il-piż |
Jiskadi fit-18 ta' Mejju 2021 għall-kategoriji 1-7 u l-kategorija 10.” |