(1)

Le Treoir 2002/65/CE ó Pharlaimint na hEorpa agus ón gComhairle (3) leagtar síos rialacha ar leibhéal an Aontais a bhaineann le cianmhargú seirbhísí airgeadais do thomhaltóirí. An tráth céanna, leagtar síos i dTreoir 2011/83/AE ó Pharlaimint na hEorpa agus ón gComhairle (4), i measc rialacha eile, rialacha is infheidhme maidir le cianchonarthaí i ndáil le díol earraí agus soláthar seirbhísí a thugtar i gcrích idir trádálaí agus tomhaltóir.

(2)

Foráiltear le hAirteagal 169(1) agus le hAirteagal 169(2), pointe (a), den Chonradh ar Fheidhmiú an Aontais Eorpaigh (CFAE) go bhfuil an tAontas le rannchuidiú le hardleibhéal cosanta do thomhaltóirí a bhaint amach trí na bearta a ghlactar de bhun Airteagal 114 de. Le hAirteagal 38 de Chairt um Chearta Bunúsacha an Aontais Eorpaigh (‘an Chairt’) foráiltear go bhfuil ardleibhéal cosanta do thomhaltóirí le háirithiú le beartais de chuid an Aontais.

(3)

Faoi chuimsiú an mhargaidh inmheánaigh, chun saoirse rogha a chosaint, tá gá le hardleibhéal cosanta do thomhaltóirí i réimse na gconarthaí seirbhísí airgeadais a thugtar i gcrích go cianda d’fhonn iontaoibh agus muinín na dtomhaltóirí sa chiandíol a fheabhsú.

(4)

Is trí chomhchuibhiú iomlán is fearr is féidir an t-ardleibhéal céanna cosanta do thomhaltóirí a áirithiú ar fud an mhargaidh inmheánaigh. Tá gá le comhchuibhiú iomlán chun a áirithiú go mbeidh leasanna na dtomhaltóirí uile san Aontas cosanta ar ardleibhéal agus ar leibhéal coibhéiseach agus chun margadh inmheánach dea-fheidhmiúil a chruthú. Dá bhrí sin, níor cheart a cheadú do na Ballstáit forálacha ina gcuid reachtaíochta náisiúnta a choinneáil ar bun ná a thabhairt isteach seachas iad siúd a leagtar síos sa Treoir seo, i ndáil le gnéithe a chumhdaítear leis an Treoir seo, mura bhforáiltear dá mhalairt sa Treoir seo. I gcás nach ann d’aon fhoráil chomhchuibhithe den sórt sin, ba cheart na Ballstáit a bheith saor i gcónaí chun forálacha a choinneáil ar bun nó a thabhairt isteach ina gcuid reachtaíochta náisiúnta.

(5)

Bhí Treoir 2002/65/CE faoi réir athbhreithnithe difriúla. Léirigh na hathbhreithnithe sin go bhfuil forluí suntasach sa reachtaíocht sin le Treoir 2002/65/CE mar thoradh ar reachtaíocht earnáilsonrach de chuid an Aontais a thabhairt isteach de réir a chéile agus go ndearnadh leis an digitiú roinnt gnéithe nach dtugtar aghaidh orthu go hiomlán leis an Treoir sin a mhéadú.

(6)

Rannchuidigh an digitiú le forbairtí margaidh nár tuaradh tráth a glacadh Treoir 2002/65/CE. Go deimhin, tá athruithe suntasacha tagtha ar mhargadh na seirbhísí airgeadais de bharr na bhforbairtí tapa teicneolaíocha atá déanta ó shin. Cé gur glacadh go leor gníomhartha dlí earnáilsonracha ar leibhéal an Aontais, tá forbairt agus éagsúlú suntasach déanta ar sheirbhísí airgeadais a chuirtear ar fáil do thomhaltóirí. Tá táirgí nua tagtha chun cinn, go háirithe sa timpeallacht ar líne, agus tá forbairt leanúnach ag teacht ar a n-úsáid, go minic ar bhealach tapa neamhthuartha. I ndáil leis sin, tá cur i bhfeidhm cothrománach Threoir 2002/65/CE ábhartha i gcónaí. Mar thoradh ar an Treoir sin a chur i bhfeidhm maidir le seirbhísí airgeadais do thomhaltóirí nach bhfuil á rialú ag reachtaíocht earnáilsonrach de chuid an Aontais, tá feidhm ag sraith rialacha comhchuibhithe maidir le leas tomhaltóirí agus trádálaithe. Cuidíonn an ghné ‘líontán sábhála’ sin le hardleibhéal cosanta a áirithiú do thomhaltóirí agus cothrom iomaíochta á áirithiú idir trádálaithe an tráth céanna.

(7)

Chun aghaidh a thabhairt ar an bhfíric go bhfuil forluí suntasach sa reachtaíocht sin le Treoir 2002/65/CE mar thoradh ar reachtaíocht earnáilsonrach de chuid an Aontais a thabhairt isteach de réir a chéile agus go ndearnadh leis an digitiú roinnt gnéithe nach dtugtar aghaidh orthu go hiomlán leis an Treoir sin a mhéadú, lena n-áirítear conas agus cathain ba cheart faisnéis a sholáthar don tomhaltóir, is gá athbhreithniú a dhéanamh ar na rialacha is infheidhme maidir le conarthaí seirbhísí airgeadais a thugtar i gcrích go cianda idir tomhaltóir agus trádálaí, agus ag an am céanna cur i bhfeidhm na gné ‘líontán sábhála’ a áirithiú maidir le seirbhísí airgeadais nach gcumhdaítear le reachtaíocht earnáilsonrach de chuid an Aontais, nó a eisiatar ó raon feidhme ghníomhartha an Aontais lena rialaítear seirbhísí airgeadais.

(8)

Chun leibhéal comhsheasmhach cosanta do thomhaltóirí ar fud an Aontais a áirithiú agus chun dibhéirseachtaí a chuireann isteach ar thabhairt i gcrích conarthaí seirbhísí airgeadais laistigh den mhargadh inmheánach a chosc, ní mór rialacha a bheith ann chun deimhneacht dhlíthiúil agus trédhearcacht a sholáthar do thrádálaithe, lena n-áirítear micrifhiontair agus fiontair bheaga agus mheánmhéide, agus chun cearta agus oibleagáidí atá in-fhorfheidhmithe de réir dlí a sholáthar do thomhaltóirí i ngach Ballstát. Moltar do na Ballstáit riachtanais shonracha na micrifhiontar agus na bhfiontar beag agus meánmhéide a chur san áireamh agus na rialacha lena dtrasuitear an Treoir seo á gcur i bhfeidhm. Ba cheart coincheap na micrifhiontar, na bhfiontar beag agus meánmhéide a thuiscint mar a shainmhínítear é in Airteagal 2 den Iarscríbhinn a ghabhann le Moladh 2003/361/CE ón gCoimisiún (5).

(9)

Le Treoir 2011/83/AE, ar an gcaoi chéanna le Treoir 2002/65/CE, déantar foráil do cheart chun faisnéise réamhchonarthaí agus ceart chun tarraingt siar le haghaidh conarthaí áirithe tomhaltóra a thugtar i gcrích go cianda. Tá an chomhlántacht idir an dá threoir sin teoranta, áfach, ós rud é nach gcumhdaítear le Treoir 2011/83/AE seirbhísí airgeadais a shainmhínítear sa Treoir sin mar sheirbhísí de chineál baincéireachta, creidmheasa, árachais, pinsin phearsanta, infheistíochta nó íocaíochta. Sa chomhthéacs sin, ba cheart cuntas coigiltis tithíochta agus comhaontú creidmheasa tomhaltóra a mheas mar sheirbhísí airgeadais. Níor cheart díol earraí mar mhiotail lómhara, diamaint, fíon nó uisce beatha a mheas mar sheirbhís airgeadais per se.

(10)

Trí raon feidhme Threoir 2011/83/AE a leathnú chun conarthaí seirbhísí airgeadais a thugtar i gcrích go cianda a chumhdach, ba cheart an chomhlántacht is gá a áirithiú. Mar sin féin, de bharr chineál sonrach na seirbhísí airgeadais do thomhaltóirí, go háirithe mar gheall ar a gcastacht, níl sé iomchuí feidhm a bheith ag forálacha uile Threoir 2011/83/AE maidir le seirbhísí airgeadais do thomhaltóirí a thugtar i gcrích go cianda. Trí chaibidil thiomnaithe a chur isteach i dTreoir 2011/83/AE, ina mbeadh rialacha nach bhfuil infheidhme ach amháin maidir le conarthaí seirbhísí airgeadais do thomhaltóirí a thugtar i gcrích go cianda, is féidir an tsoiléireacht agus an deimhneacht dhlíthiúil is gá a áirithiú.

(11)

Ní chumhdaítear leis an Treoir seo conarthaí seirbhísí airgeadais a thugtar i gcrích ar bhealach éigin eile seachas go cianda. Dá bhrí sin, is féidir leis na Ballstáit a chinneadh, i gcomhréir le dlí an Aontais, cé na rialacha is infheidhme maidir le conarthaí den sórt sin, lena n-áirítear trí na ceanglais a leagtar amach sa Treoir seo a chur i bhfeidhm maidir le conarthaí nach n-áirítear laistigh dá raon feidhme.

(12)

Cé nár cheart feidhm a bheith ag forálacha uile Threoir 2011/83/AE maidir le conarthaí seirbhísí airgeadais a thugtar i gcrích go cianda mar gheall ar chineál sonrach na seirbhísí sin, ba cheart feidhm a bheith ag roinnt forálacha i dTreoir 2011/83/AE, mar shampla sainmhínithe ábhartha agus na rialacha maidir le híocaíochtaí breise, forfheidhmiú, díol gan iarraidh agus tuairisciú, maidir le conarthaí seirbhísí airgeadais a thugtar i gcrích go cianda. Áirithítear le cur i bhfeidhm na bhforálacha sin comhlántacht idir na cineálacha éagsúla conarthaí a thugtar i gcrích go cianda.

(13)

Maidir le pionóis, ba cheart do na Ballstáit na rialacha a bhaineann leis na pionóis is infheidhme maidir le sáruithe ar fhorálacha a gcuid reachtaíochta náisiúnta arna nglacadh de bhun na Treorach seo a leagan síos agus ba cheart dóibh gach beart is gá a dhéanamh lena áirithiú go gcuirfear chun feidhme iad. Ba cheart na pionóis dá bhforáiltear a bheith éifeachtach, comhréireach agus athchomhairleach, i gcomhréir le hAirteagal 24(1) de Threoir 2011/83/AE. Ba cheart forálacha sonracha a áireamh sa Treoir seo freisin maidir le pionóis a fhorchur i gcomhréir le hAirteagal 21 de Rialachán (AE) 2017/2394 ó Pharlaimint na hEorpa agus ón gComhairle (6) maidir le cianchonarthaí a thugtar i gcrích idir trádálaí agus tomhaltóir chun seirbhísí airgeadais a sholáthar. Na forálacha eile a bhaineann le pionóis a leagtar amach in Airteagal 24(2) go (5) de Threoir 2011/83/AE, níl feidhm acu maidir le cianchonarthaí a thugtar i gcrích idir trádálaí agus tomhaltóir chun seirbhísí airgeadais a sholáthar.

(14)

Na rialacha sin de Threoir 2002/65/CE atá fós ábhartha agus riachtanach, ba cheart iad a chur i gcaibidil ar leith i dTreoir 2011/83/AE, go háirithe rialacha a bhaineann leis an gceart chun faisnéise réamhchonarthaí agus an ceart chun tarraingt siar, agus rialacha lena n-áirithítear cothroime ar líne nuair a thugtar conarthaí seirbhíse airgeadais i gcrích go cianda.

(15)

Ós rud é gur trí mhodh leictreonach is minice a thugtar conarthaí seirbhísí airgeadais i gcrích, ba cheart rialacha maidir le cothroime ar líne a áirithiú agus seirbhísí airgeadais á gconrú go cianda bheith ag rannchuidiú leis na spriocanna a leagtar síos in Airteagal 114 CFAE agus in Airteagal 38 den Chairt a bhaint amach. Leis an riail maidir le mínithe leordhóthanacha, ba cheart trédhearcacht bhreise a áirithiú agus an ceart a thabhairt don tomhaltóir idirghabháil dhaonna a iarraidh nuair a idirghníomhaíonn sé nó sí leis an trádálaí trí chomhéadain lán-uathoibrithe ar líne, ar nós botaí comhrá, uathchomhairle, uirlisí idirghníomhacha nó meáin chomhchosúla.

(16)

Mar sin féin, tá seirbhísí áirithe airgeadais do thomhaltóirí á rialú ag gníomhartha sonracha de chuid an Aontais, a leanann d’fheidhm a bheith acu maidir leis na seirbhísí airgeadais sin. Ní leasaítear leis an Treoir seo gníomhartha earnála de chuid an Aontais atá ann cheana. I gcás ina bhfuil rialacha i ngníomhartha eile de chuid an Aontais lena rialaítear seirbhísí airgeadais sonracha maidir le faisnéis réamhchonarthach, maidir leis an gceart chun tarraingt siar nó maidir le mínithe leordhóthanacha, agus gan beann ar an oiread mionsonraí atá sna rialacha sin, ba cheart a shoiléiriú, chun deimhneacht dhlíthiúil a áirithiú agus chun a áirithiú nach ann do dhúbailt ná forluí, nach mbeadh feidhm maidir leis na seirbhísí airgeadais sonracha sin do thomhaltóirí ach ag na forálacha faoi seach de na gníomhartha eile sin de chuid an Aontais mura bhforáiltear dá mhalairt sna gníomhartha sin, lena n-áirítear rogha shainráite a bheith ag na Ballstáit cur i bhfeidhm na rialacha sonracha sin a eisiamh. Sa chomhthéacs sin, aon uair a leagtar síos i ngníomh sonrach de chuid an Aontais rialacha lena dtugtar deis do na Ballstáit gan an gníomh sonrach sin de chuid Aontais a chur i bhfeidhm ach, ina ionad sin, tagairt a dhéanamh do chur i bhfeidhm gnímh shonraigh eile de chuid an Aontais, mar a dhéantar in Airteagal 3(3), pointe (a), de Threoir 2014/17/AE ó Pharlaimint na hEorpa agus ón gComhairle (7), mar shampla, ba cheart forlámhas a bheith ag rialacha an ghnímh shonraigh sin de chuid Aontais, agus níor cheart feidhm a bheith ag an Treoir seo. Ar an gcaoi chéanna, sna cásanna sin ina ndéantar foráil sa ghníomh sonrach de chuid an Aontais do rialacha a bhaineann le socruithe leordhóthanacha eile chun a áirithiú go bhfaighidh tomhaltóirí faisnéis thráthúil ag an gcéim réamhchonarthach, mar a dhéantar in Airteagal 3(5) de Threoir 2014/17/AE, mar shampla, ba cheart forlámhas a bheith ag na rialacha a leagtar síos sa ghníomh sonrach sin de chuid an Aontais agus níor cheart feidhm a bheith ag an Treoir seo.

(17)

Maidir le faisnéis réamhchonarthach, cuimsítear, i ngníomhartha áirithe de chuid an Aontais lena rialaítear seirbhísí airgeadais sonracha, rialacha atá oiriúnaithe do na seirbhísí airgeadais sonracha sin agus atá ceaptha chun a áirithiú go mbeidh tomhaltóirí in ann saintréithe bunriachtanacha an chonartha atá beartaithe a thuiscint. Mar shampla, le Rialachán (AE) 2019/1238 ó Pharlaimint na hEorpa agus ón gComhairle (8), agus Treoracha 2014/92/AE (9), 2014/65/AE (10) agus (AE) 2016/97 (11) ó Pharlaimint na hEorpa agus ón gComhairle déantar foráil d’fhaisnéis réamhchonarthach sa bhunghníomh sonrach de chuid an Aontais agus tugtar de chumhacht don Choimisiún gníomhartha tarmligthe nó gníomhartha cur chun feidhme a ghlacadh freisin. Is iad na ceanglais maidir le faisnéis réamhchonarthach a leagtar síos i ngníomhartha den sórt sin de chuid an Aontais, agus na ceanglais sin amháin, ar cheart feidhm a bheith acu maidir leis na seirbhísí sonracha airgeadais sin do thomhaltóirí, mura bhforáiltear dá mhalairt sna gníomhartha sin. Ba cheart é sin a bheith amhlaidh freisin i gcás ina bhforáiltear leis an ngníomh de chuid an Aontais lena rialaítear seirbhísí airgeadais sonracha rialacha éagsúla nó íosta maidir le faisnéis réamhchonarthach i gcomparáid leis na rialacha a leagtar síos leis an Treoir seo.

(18)

Maidir leis an gceart chun tarraingt siar, i gcás ina dtugtar i ngníomh an Aontais lena rialaítear seirbhísí airgeadais sonracha am do thomhaltóirí impleachtaí an chonartha arna shíniú a mheas, agus gan beann ar a dtugtar air i ngníomh sin an Aontais, is iad na forálacha faoi seach i ngníomh sin an Aontais, agus iad sin amháin, ar cheart feidhm a bheith acu maidir leis na seirbhísí sonracha airgeadais sin do thomhaltóirí, mura bhforáiltear dá mhalairt sa ghníomh sin. Mar shampla, nuair a bhíonn feidhm ag Airteagal 186 de Threoir 2009/138/CE ó Pharlaimint na hEorpa agus ón gComhairle (12), is iad na rialacha a bhaineann leis an ‘tréimhse chealaithe’ a leagtar síos i dTreoir 2009/138/CE a mbíonn feidhm acu agus ní na rialacha maidir leis an gceart chun tarraingt siar a leagtar síos sa Treoir seo agus nuair a bhíonn feidhm ag Airteagal 14(6) de Threoir 2014/17/AE, is iad na rialacha a bhaineann leis an bhféidearthacht rogha a dhéanamh idir an ceart chun tarraingt siar agus an tréimhse mhachnaimh a leagtar síos i dTreoir 2014/17/AE a mbíonn feidhm acu, agus ní na rialacha maidir leis an gceart chun tarraingt siar a leagtar síos sa Treoir seo.

(19)

I gcomhréir le Treoir 2014/17/AE agus Treoir (AE) 2023/2225 ó Pharlaimint na hEorpa agus ón gComhairle (13), is féidir leis na Ballstáit na Treoracha sin a chur i bhfeidhm, i gcomhréir le dlí an Aontais, maidir le réimsí nach gcumhdaítear faoina raon feidhme. Dá bhrí sin, ba cheart a shoiléiriú gur féidir leis na Ballstáit Airteagal 14(6) de Threoir 2014/17/AE a chur i bhfeidhm maidir le comhaontuithe creidmheasa, in ainneoin go bhfuil comhaontuithe den sórt sin díolmhaithe ó raon feidhme na Treorach sin le hAirteagal 3(2) di. Ar an gcaoi chéanna, ba cheart a shoiléiriú gur féidir leis na Ballstáit Airteagail 26 agus 27 de Threoir (AE) 2023/2225 a chur i bhfeidhm maidir le comhaontuithe creidmheasa, in ainneoin go bhfuil comhaontuithe den sórt sin díolmhaithe ó raon feidhme na Treorach sin le hAirteagal 2(2) di.

(20)

Ó thaobh rialacha maidir le mínithe leordhóthanacha de, i ngníomhartha áirithe de chuid an Aontais lena rialaítear seirbhísí sonracha airgeadais, mar shampla Treoracha 2014/17/AE, 2014/65/AE agus (AE) 2016/97, leagtar rialacha síos cheana féin maidir le mínithe leordhóthanacha atá le soláthar ag trádálaithe do thomhaltóirí i ndáil leis an gconradh atá beartaithe. Chun deimhneacht dhlíthiúil a áirithiú, níor cheart feidhm a bheith ag na rialacha maidir le mínithe leordhóthanacha a leagtar amach sa Treoir seo maidir le seirbhísí airgeadais a thagann faoi ghníomhartha de chuid an Aontais lena rialaítear seirbhísí airgeadais sonracha ina bhfuil rialacha maidir le mínithe leordhóthanacha atá le soláthar don tomhaltóir sula dtugtar an conradh i gcrích, gan beann ar a dtugtar air i ngníomh sin an Aontais.

(21)

I gcás ina ndéantar, le gníomhartha de chuid an Aontais lena rialaítear seirbhísí airgeadais sonracha, foráil do rialacha maidir le faisnéis réamhchonarthach ach nach mbunaítear leo rialacha maidir leis an gceart chun tarraingt siar, ba cheart feidhm a bheith ag na forálacha a bhaineann leis an gceart chun tarraingt siar faoin Treoir seo. Mar shampla, i dTreoir 2009/138/CE, leagtar amach rialacha maidir le ceanglais maidir le faisnéis réamhchonarthach ach, i ndáil le hárachas nach árachas saoil é, ní leagtar amach ceart lena dtugtar am don tomhaltóir impleachtaí an chonartha arna shíniú a mheas. Sa chás sin, ba cheart feidhm a bheith ag na rialacha maidir le faisnéis réamhchonarthach a leagtar síos i ngníomh an Aontais lena rialaítear seirbhísí airgeadais sonracha agus ag na rialacha maidir leis an gceart chun tarraingt siar mar a leagtar síos sa Treoir seo iad. I gcás nach bhfuil forálacha maidir le faisnéis faoin gceart chun tarraingt siar i ngníomh de chuid an Aontais lena rialaítear seirbhísí airgeadais sonracha, ba cheart don trádálaí an fhaisnéis sin a sholáthar i gcomhréir leis an Treoir seo chun a áirithiú go mbeidh an tomhaltóir ar an eolas go cuí faoin bhfaisnéis ábhartha.

(22)

I gcás ina ndéantar, le gníomhartha de chuid an Aontais lena rialaítear seirbhísí airgeadais sonracha, foráil do rialacha maidir le faisnéis réamhchonarthach ach nach mbunaítear leo rialacha maidir leis an gceart chun tarraingt siar, ba cheart feidhm a bheith ag an tréimhse tarraingt siar a leagtar amach sa Treoir seo agus ba cheart di tosú ón lá a thugtar an cianchonradh i gcrích i gcomhréir leis an Treoir seo, nó ón dáta a fhaigheann an tomhaltóir na téarmaí agus na coinníollacha conarthacha agus an fhaisnéis réamhchonarthach i gcomhréir le gníomhartha an Aontais lena rialaítear na seirbhísí airgeadais sonracha sin, má tá an lá sin níos déanaí ná an lá a thugtar an cianchonradh i gcrích. I gcás nach bhfuil, i ngníomh de chuid an Aontais lena rialaítear seirbhísí airgeadais sonracha, forálacha a bhaineann le faisnéis faoin gceart chun tarraingt siar, chun tús a chur leis an tréimhse tarraingt siar, ba cheart don trádálaí, sa bhreis ar na téarmaí agus na coinníollacha conarthacha agus an fhaisnéis réamhchonarthach i gcomhréir leis an ngníomh de chuid an Aontais lena rialaítear na seirbhísí airgeadais sonracha sin, an fhaisnéis faoin gceart chun tarraingt siar a leagtar amach sa Treoir seo a sholáthar freisin.

(23)

Nuair a dhéantar conarthaí maidir le seirbhísí airgeadais do thomhaltóirí a chaibidliú go cianda, úsáidtear modhanna cianchumarsáide mar chuid de scéim ciandíola nó de scéim soláthair seirbhíse gan an trádálaí agus an tomhaltóir beirt a bheith i láthair an tráth céanna. Chun freagairt d’fhorbairt leanúnach na modhanna cumarsáide sin, ba cheart prionsabail a shainiú atá bailí fiú amháin do na modhanna sin nach bhfuil in úsáid fhorleathan go fóill nó nach bhfuil ar eolas go fóill.

(24)

Féadfaidh conradh seirbhíse airgeadais amháin faoina ndéantar oibríochtaí comhleanúnacha nó sraith oibríochtaí ar leithligh den chineál céanna thar thréimhse ama a bheith faoi réir dlí éagsúil sna Ballstáit éagsúla, ach tá sé tábhachtach go gcuirfear na rialacha i bhfeidhm ar an gcaoi chéanna sna Ballstáit ar fad. Chuige sin, is iomchuí foráil a dhéanamh go mbeadh feidhm ag na forálacha lena rialaítear conarthaí seirbhísí airgeadais a thugtar i gcrích go cianda maidir leis an gcéad sraith d’oibríochtaí comhleanúnacha nó d’oibríochtaí ar leithligh den chineál céanna a dhéantar thar thréimhse ama a d’fhéadfaí a mheas mar aon aonad amháin, gan beann ar cé acu atá nó nach bhfuil an oibríocht sin nó an tsraith oibríochtaí sin ina hábhar nó ina n-ábhar do chonradh amháin nó do roinnt conarthaí comhleanúnacha. I gcás nach mbeidh aon chomhaontú tosaigh ann, ba cheart feidhm a bheith ag na forálacha lena rialaítear na conarthaí seirbhísí airgeadais a thugtar i gcrích go cianda maidir le gach oibríocht chomhleanúnach nó gach oibríocht ar leithligh, cé is moite den fhaisnéis réamhchonarthach, nár cheart feidhm a bheith aici ach maidir leis an gcéad oibríocht. Mar shampla, d’fhéadfaí a mheas gur ‘comhaontú seirbhíse tosaigh’ é cuntas bainc a oscailt agus d’fhéadfaí a mheas gur ‘oibríochtaí’ iad cistí a thaisceadh sa chuntas bainc nó a aistarraingt as. Ní ‘oibríocht’ ach conradh breise a bheidh ann i gcás ina gcuirfear eilimintí nua le comhaontú seirbhíse tosaigh, mar shampla an fhéidearthacht ionstraim íocaíochta leictreonaí a úsáid in éineacht le cuntas bainc atá ann cheana.

(25)

Chun raon feidhme chur i bhfeidhm na Treorach seo a theorannú, níor cheart feidhm a bheith ag na rialacha a bhaineann le conarthaí seirbhísí airgeadais do thomhaltóirí a thugtar i gcrích go cianda maidir le seirbhísí a sholáthraítear ar bhonn ócáideach amháin agus lasmuigh de struchtúr tráchtála atá tiomnaithe do chianchonarthaí a thabhairt i gcrích.

(26)

Bíonn deiseanna maithe chun faisnéis a fháil ag gabháil le modhanna cianchumarsáide a úsáid agus níor cheart go mbeadh úsáid na modhanna sin ina cúis le srian nach bhfuil gá leis a bheith ar an bhfaisnéis a sholáthraítear don tomhaltóir. Agus cumarsáid ghuth-theileafónaíochta á húsáid aige, ní fhéadfaidh an trádálaí, má aontaíonn an tomhaltóir go sainráite, ach tacar teoranta faisnéise réamhchonarthaí a sholáthar sula mbeidh an tomhaltóir faoi cheangal ag an gcianchonradh. Ba cheart don trádálaí an fhaisnéis atá fágtha a sholáthar díreach tar éis thabhairt i gcrích an chonartha. Ar mhaithe le trédhearcacht, ba cheart ceanglais a leagan síos maidir le cathain ba cheart an fhaisnéis a sholáthar don tomhaltóir sula dtabharfar an cianchonradh i gcrích agus conas ba cheart don tomhaltóir an fhaisnéis sin a fháil. Ionas go mbeidh siad in ann a gcinntí a dhéanamh agus láneolas acu ar na fíricí, ba cheart do na tomhaltóirí an fhaisnéis réamhchonarthach uile a fháil in am trátha sula dtabharfar an cianchonradh nó aon tairiscint chomhfhreagrach i gcrích agus ní an tráth céanna leis. Déantar sin chun a áirithiú go mbeidh go leor ama ag an tomhaltóir an fhaisnéis réamhchonarthach a léamh agus a thuiscint, tairiscintí a chur i gcomparáid le chéile agus cinneadh eolasach a dhéanamh. I gcás ina soláthrófaí an fhaisnéis níos lú ná lá amháin sula dtabharfar an cianchonradh le haghaidh seirbhísí airgeadais i gcrích, ba cheart é a bheith d’oibleagáid ar an trádálaí a mheabhrú don tomhaltóir, ar mheán marthanach, go bhféadfaí tarraingt siar ón gcianchonradh le haghaidh seirbhís airgeadais. I gcás ina soláthrófaí faisnéis réamhchonarthach níos lú ná lá amháin sula mbeidh an tomhaltóir faoi cheangal ag aon chianchonradh, ba cheart don trádálaí a mheabhrú don tomhaltóir, ar mheán marthanach, idir lá amháin agus 7 lá tar éis thabhairt i gcrích an chonartha, go bhféadfadh sé tarraingt siar ón gcianchonradh.

(27)

Ba cheart na ceanglais faisnéise a nuachóiriú agus féachaint chuige go seasfaidh siad an aimsir. Dá bhrí sin, ba cheart don trádálaí a uimhir theileafóin a chur in iúl don tomhaltóir, ach freisin a sheoladh ríomhphoist nó mionsonraí faoi mhodhanna eile cumarsáide a fhéadfaidh modhanna éagsúla cumarsáide a chuimsiú, chomh maith leis an bhfaisnéis faoin áit ar cheart gearáin a chur chuici. Is féidir leis na Ballstáit na ceanglais maidir leis an mbeartas láimhseála gearán a chinneadh. Ba cheart tomhaltóirí a chur ar an eolas faoi na costais shonracha bhreise a bhaineann leis an modh cianchumarsáide a úsáid. Baineann roinnt trádálaithe úsáid as cinnteoireacht uathoibrithe chun praghsanna a idirdhealú idir grúpaí tomhaltóirí éagsúla agus i gcásanna áirithe cuirtear praghsanna in oiriúint d’íogaireacht praghsanna aonair na dtomhaltóirí. Ar an gcúis sin, ba cheart tomhaltóirí a chur ar an eolas sula mbeidh siad faoi cheangal ag cianchonradh go ndearnadh praghas na seirbhíse airgeadais a phearsantú ar bhonn cinnteoireacht uathoibrithe.

(28)

Faoi Threoir 2002/65/CE, bhí na Ballstáit in ann forálacha níos déine maidir le ceanglais faisnéise roimh ré a choinneáil nó a thabhairt isteach ar choinníoll go raibh na forálacha sin i gcomhréir le dlí an Aontais. Tá ceanglais níos déine faisnéise coinnithe nó tugtha isteach ag roinnt Ballstát sa chomhthéacs sin. Ba cheart an fhéidearthacht a bheith ann go fóill leibhéal níos airde cosanta a chur ar fáil do thomhaltóirí i ndáil leis na rialacha maidir le faisnéis réamhchonarthach. Ba cheart feidhm a bheith aige sin maidir leis an gcatalóg faisnéise agus maidir leis na bealaí le faisnéis a chur i láthair araon. Le cur i bhfeidhm rialacha níos déine, d’fhéadfaí a áireamh freisin cur i bhfeidhm na gceanglas a leagtar amach i ngníomhartha de chuid an Aontais a bhaineann le seirbhísí airgeadais sonracha maidir le seirbhísí airgeadais nach gcumhdaítear leis na gníomhartha earnála sin de chuid an Aontais.

(29)

D’fhéadfadh seirbhísí airgeadais áirithe tosca comhshaoil nó sóisialta a chomhtháthú ina straitéis infheistíochta. Chun bheith in ann cinneadh eolasach a dhéanamh, ba cheart an tomhaltóir a chur ar an eolas freisin faoi na cuspóirí comhshaoil nó sóisialta ar leith a ndíríonn an tseirbhís airgeadais orthu.

(30)

Ba cheart an fhaisnéis réamhchonarthach uile a sholáthar ar mheán marthanach i bhformáid inléite agus ar bhealach a mbeidh sé éasca don tomhaltóir an fhaisnéis a thuiscint. Ciallaíonn formáid inléite go n-úsáidtear carachtair atá inléite ó thaobh méide de agus dathanna nach laghdaíonn sothuigtheacht na faisnéise, lena n-áirítear nuair is sna dathanna dubh agus bán amháin a chuirtear an doiciméad i láthair nó i gcló nó a ndéantar fótachóip de. Ina theannta sin, ba cheart tuairiscí rófhada agus casta, cló beag agus úsáid iomarcach hipearnasc a sheachaint a mhéid is féidir, toisc gur modhanna iad sin a bhaineann de thuiscint na dtomhaltóirí. Mura féidir an fhaisnéis a sholáthar ar mheán marthanach sula dtabharfar an conradh i gcrích mar gheall ar na meáin a roghnaigh an tomhaltóir, ba cheart í a sholáthar díreach tar éis thabhairt i gcrích an chonartha.

(31)

Ba cheart na ceanglais faisnéise a oiriúnú chun na srianta teicniúla a bhaineann le meáin áirithe a chur san áireamh, mar shampla srianta ar líon na gcarachtar ar scáileáin áirithe teileafón soghluaiste. I gcás scáileáin fón póca, nuair atá inneachar agus cur i láthair an chomhéadain ar líne saincheaptha ag an trádálaí do ghléasanna den sórt sin, ba cheart an fhaisnéis seo a leanas a sholáthar ar an mbealach is túisce agus is feiceálaí: faisnéis a bhaineann le céannacht an trádálaí; príomh-shaintréithe na seirbhíse airgeadais an tomhaltóra; an praghas iomlán atá le híoc ag an tomhaltóir leis an trádálaí ar an tseirbhís airgeadais do thomhaltóirí, lena n-áirítear na cánacha ar fad arna n-íoc tríd an trádálaí nó, nuair nach féidir praghas beacht a shonrú, an bonn le haghaidh an praghas a ríomh a chuirfidh ar chumas an tomhaltóra é a dheimhniú; agus an ceart chun tarraingt siar a bheith ann nó gan bheith ann, lena n-áirítear na coinníollacha, an teorainn ama agus na nósanna imeachta chun an ceart sin a fheidhmiú. D’fhéadfadh an chuid eile den fhaisnéis a bheith srathach. Mar sin féin, ní mór an fhaisnéis ar fad a sholáthar ar mheán marthanach sula dtabharfar an cianchonradh i gcrích.

(32)

Agus faisnéis réamhchonarthach á cur ar fáil trí mhodh leictreonach, ba cheart an faisnéis den sórt sin a chur i láthair ar bhealach soiléir sothuigthe. I ndáil leis sin, d’fhéadfaí an fhaisnéis a aibhsiú, a cheapadh agus a chur i gcomhthéacs go héifeachtach laistigh den scáileán taispeána. Maidir le teicníc an tsrathaithe, trína measfar ceanglais áirithe maidir le faisnéis réamhchonarthach a bheith ina bpríomheilimintí agus, dá bhrí sin, go gcuirtear iad go feiceálach ar an gcéad sraith agus go gcuirtear codanna mionsonraithe eile den fhaisnéis réamhchonarthach i láthair i sraitheanna tionlacain, rinneadh tástáil uirthi agus cruthaíodh go bhfuil sí úsáideach do sheirbhísí airgeadais áirithe. Agus úsáid á baint as teicníc an tsrathaithe de bhun na Treorach seo, ba cheart don trádálaí an méid seo a leanas a sholáthar ar an gcéad sraith den mhodh leictreonach ar a laghad: céannacht agus príomhghnó an trádálaí, príomh-shaintréithe na seirbhíse airgeadais, an praghas iomlán atá le híoc ag an tomhaltóir, fógra go bhféadfadh cánacha nó costais eile a bheith ann agus ceart chun tarraingt siar a bheith ann nó gan é a bheith ann. D’fhéadfaí na ceanglais eile maidir le faisnéis réamhchonarthach a thaispeáint i sraitheanna eile. Nuair a úsáidtear srathú, ba cheart rochtain éasca a bheith ag an tomhaltóir ar an bhfaisnéis go léir. Le húsáid sraitheanna tionlacain níor cheart aird an chustaiméara a tharraingt ó ábhar an doiciméid ná faisnéis bhunriachtanach a cheilt. Ba cheart a bheith in ann gach cuid den fhaisnéis réamhchonarthach a phriontáil in aon doiciméad amháin.

(33)

Is bealach féideartha eile le faisnéis réamhchonarthach a sholáthar trí mhodh leictreonach an cur chuige ‘clár ábhar’ trí úsáid a bhaint as ceannteidil inleathnaithe. Ar an leibhéal is airde, d’fhéadfadh tomhaltóirí teacht ar na príomhthopaicí, agus beidh siad in ann gach ceann díobh a leathnú trí chliceáil air, ionas go dtreorófar na tomhaltóirí chuig cur i láthair níos mionsonraithe den fhaisnéis ábhartha. Ar an gcaoi sin, tá an fhaisnéis ar fad is gá ag an tomhaltóir in aon áit amháin, agus smacht á choinneáil aige ar an méid ar cheart athbhreithniú a dhéanamh air agus cathain a dhéanfar sin. Ba cheart an deis a bheith ag tomhaltóirí an doiciméad faisnéise réamhchonarthach go léir a íoslódáil agus é a shábháil mar dhoiciméad neamhspleách.

(34)

Ba cheart ceart chun tarraingt siar a bheith ag tomhaltóirí gan phionós agus gan aon oibleagáid a bheith orthu údar cuí a thabhairt leis. Nuair nach bhfuil feidhm ag an gceart chun tarraingt siar toisc gur iarr an tomhaltóir go sainráite go gcomhlíonfaí cianchonradh roimh dhul in éag na tréimhse tarraingt siar, ba cheart don trádálaí é sin a chur in iúl don tomhaltóir sula gcuirtear tús le feidhmiú an chonartha.

(35)

Ba cheart an tréimhse tarraingt siar dul in éag 14 lá féilire tar éis an lá a thugtar an cianchonradh i gcrích nó an lá a fhaigheann an tomhaltóir an fhaisnéis réamhchonarthach agus na téarmaí agus coinníollacha conarthacha araon, más déanaí an lá sin ná an dáta a thugtar an cianchonradh i gcrích. Ba cheart síneadh 30 lá féilire a chur leis an tréimhse sin i gcás cianchonarthaí a bhaineann le hoibríochtaí pinsin phearsanta. Chun deimhneacht dhlíthiúil a mhéadú, mura mbeidh an fhaisnéis réamhchonarthach sin agus na téarmaí agus na coinníollacha conarthacha sin faighte ag an tomhaltóir, ba cheart an tréimhse tarraingt siar dul in éag 12 mhí agus 14 lá féilire ar a dhéanaí tar éis thabhairt i gcrích an chianchonartha. Níor cheart an tréimhse tarraingt siar dul in éag murar cuireadh an tomhaltóir ar an eolas, ar mheán marthanach, faoin gceart chun tarraingt siar.

(36)

Chun feidhmiú éifeachtach an chirt chun tarraingt siar a áirithiú, níor cheart an nós imeachta chun an ceart sin a fheidhmiú a bheith níos déine ná an nós imeachta chun an cianchonradh a thabhairt i gcrích.

(37)

De bhreis ar mhodh eile tarraingt siar atá ann cheana, amhail an fhoirm a leagtar síos in Iarscríbhinn I(B) de Threoir 2011/83/AE, i gcás ina dtairgeann an trádálaí an fhéidearthacht cianchonarthaí a thabhairt i gcrích trí chomhéadan ar líne, amhail trí shuíomh gréasáin nó trí fheidhmchlár, ba cheart é a bheith d’oibleagáid ar an trádálaí a chur ar chumas an tomhaltóra tarraingt siar as conradh den sórt sin trí bhíthin feidhme. Ba cheart a áirithiú leis sin gur féidir le tomhaltóirí tarraingt siar as an gconradh chomh héasca agus is féidir leo é a thabhairt i gcrích. Chun an méid sin a bhaint amach, ba cheart don trádálaí feidhm tarraingt siar a sholáthar don tomhaltóir atá éasca don tomhaltóir a aimsiú, atá ar fáil go leanúnach agus atá infheicthe go soiléir le linn na tréimhse tarraingt siar. Ba cheart don tomhaltóir a bheith in ann an fheidhm a aimsiú agus a rochtain ar bhealach éasca simplí. Mar shampla, níor cheart go mbeadh ar an tomhaltóir tabhairt faoi nósanna imeachta chun an fheidhm a aimsiú nó a rochtain, amhail iarratas a íoslódáil murar tugadh an conradh i gcrích tríd an iarratas sin. Chun an próiseas a éascú, d’fhéadfadh an trádálaí, mar shampla, hipearnaisc a sholáthar chun an tomhaltóir a threorú chuig an bhfeidhm tarraingt siar. Ba cheart cead a bheith ag an tomhaltóir an ráiteas tarraingt siar a dhéanamh agus an fhaisnéis a thabhairt nó a dhearbhú atá riachtanach chun an conradh a shainaithint. Mar shampla, ba cheart do thomhaltóir a shainaithin é féin nó í féin cheana, cuir i gcás trí logáil isteach, a bheith in ann tarraingt siar as an gconradh gan é a bheith riachtanach an méid seo a leanas a sholáthar athuair: a chéannacht nó a céannacht ná, i gcás inarb infheidhme, sainaithint an chonartha as ar mian leis nó léi tarraingt siar. Chun feidhmiú neamhbheartaithe an chirt chun tarraingt siar ag an tomhaltóir a sheachaint, ba cheart don trádálaí ceangal a chur ar an tomhaltóir an cinneadh tarraingt siar a dhearbhú ar bhealach a léiríonn gurb é rún an tomhaltóra é sin a dhéanamh. Má d’ordaigh an tomhaltóir earraí nó seirbhísí iomadúla laistigh den chianchonradh céanna, féadfaidh an trádálaí an deis a thabhairt don tomhaltóir tarraingt siar ó chuid den chonradh seachas ón gconradh ina iomláine. Nuair a úsáideann an tomhaltóir an fheidhm chun an ceart chun tarraingt siar a fheidhmiú, ba cheart don trádálaí a chur in iúl don tomhaltóir, ar mheán marthanach gan moill mhíchuí, go bhfuil an tarraingt siar faighte aige. Ba cheart feidhm a bheith ag an oibleagáid sin ní hamháin maidir le cianchonarthaí le haghaidh seirbhísí airgeadais, ach maidir le gach cianchonradh atá faoi réir an chirt chun tarraingt siar faoi Threoir 2011/83/AE. Is é is cuspóir don fheidhm tarraingt siar feasacht tomhaltóirí a mhéadú faoina gceart chun tarraingt siar agus an fhéidearthacht tairbhiú den cheart sin a shimpliú, ós rud é, i gcás ciandíol táirgí nó seirbhísí airgeadais agus neamhairgeadais araon, nach bhfuil an deis ag an tomhaltóir mínithe a fháil i bpearsa, ná foghlaim i bpearsa faoi chineál táirge nó seirbhís a d’fhéadfadh a bheith casta nó fairsing. Dá bhrí sin, chun feabhas a chur ar na deiseanna do thomhaltóirí conarthaí a scor trí bhíthin tarraingt siar, ba cheart an oibleagáid sin a leagan síos ní hamháin do chianchonarthaí le haghaidh seirbhísí airgeadais, ach freisin do chianchonarthaí le haghaidh earraí agus seirbhísí eile i gcás ina bhforáiltear le dlí an Aontais do cheart chun tarraingt siar.

(38)

De bhreis ar an bhfaisnéis réamhchonarthach a thabharfaidh an trádálaí dóibh, d’fhéadfadh cúnamh a bheith ag teastáil fós ó thomhaltóirí chun a chinneadh cén tseirbhís airgeadais is iomchuí dá riachtanais agus dá staid airgeadais. Is é an príomhchuspóir atá le míniú leordhóthanach a thabhairt ná a áirithiú go dtuigeann an tomhaltóir an tseirbhís airgeadais a thairgeann an trádálaí sula síníonn sé nó sí an conradh. Chun a áirithiú go gcomhlíonfar an cuspóir sin, ba cheart míniú leordhóthanach a thabhairt go tráthúil lena dtugtar a dhóthain ama don tomhaltóir athbhreithniú a dhéanamh air sula dtabharfar an conradh i gcrích. D’fhéadfadh sé nár leor gan ach an fhaisnéis réamhchonarthach a atáirgeadh agus ba cheart é a sheachaint mar sin. Dá bhrí sin, ba cheart do na Ballstáit a áirithiú, sula dtabharfar conradh seirbhíse airgeadais i gcrích go cianda, go soláthraíonn trádálaithe cúnamh den sórt sin i ndáil leis na seirbhísí airgeadais a thairgeann siad don tomhaltóir, trí mhínithe leordhóthanacha a thabhairt, ar mínithe iad a bhaineann le saintréithe bunriachtanacha an chonartha, lena n-áirítear na seirbhísí coimhdeacha féideartha, agus na héifeachtaí sonracha a fhéadfaidh a bheith ag an gconradh ar an tomhaltóir. Maidir le saintréithe bunriachtanacha an chonartha, ba cheart don trádálaí príomhghnéithe na tairisceana a mhíniú, mar shampla an praghas iomlán atá le híoc ag an tomhaltóir leis an trádálaí agus tuairisc ar phríomh-shaintréithe na seirbhíse airgeadais, agus a tionchar ar an tomhaltóir, lena n-áirítear, i gcás inarb infheidhme, an féidir nó nach féidir na seirbhísí coimhdeacha a fhoirceannadh ar leithligh, agus iarmhairtí foirceanta den sórt sin. Maidir le héifeachtaí sonracha an chonartha atá beartaithe, ba cheart don trádálaí míniú a thabhairt freisin ar na príomhiarmhairtí a bhaineann le neamhchomhlíonadh na n-oibleagáidí conarthacha sin de.

(39)

D’fhéadfadh sé gur de chineálacha éagsúla airgeadais atá na conarthaí a thagann faoi raon feidhme na Treorach seo agus, dá bhrí sin, d’fhéadfadh éagsúlacht mhór a bheith eatarthu. Dá bhrí sin, d’fhéadfadh na Ballstáit an bealach a dtugtar mínithe den sórt sin a oiriúnú do na himthosca ina dtairgtear an tseirbhís airgeadais agus don ghá atá ag an tomhaltóir le cúnamh, agus eolas agus taithí an tomhaltóra ar an tseirbhís airgeadais agus ar a cineál á gcur san áireamh. Chun a áirithiú go bhfaighidh an tomhaltóir mínithe leordhóthanacha, ba cheart do na Ballstáit trádálaithe a spreagadh chun mínithe den sórt sin a thabhairt don tomhaltóir ar bhealach éasca simplí, chun leas an tomhaltóra.

(40)

Tá tábhacht ar leith ag baint leis an oibleagáid maidir le mínithe leordhóthanacha a thabhairt nuair a bheartaíonn tomhaltóirí conradh seirbhíse airgeadais a thabhairt i gcrích go cianda agus nuair a thugann an trádálaí mínithe trí uirlisí lán-uathoibrithe ar líne mar shampla botaí comhrá, uathchomhairle, uirlisí idirghníomhacha nó modhanna comhchosúla. Chun a áirithiú go dtuigeann an tomhaltóir na héifeachtaí a d’fhéadfadh a bheith ag an gconradh ar a staid eacnamaíoch, ba cheart don tomhaltóir a bheith in ann an idirghabháil dhaonna a dhéantar thar ceann an trádálaí a fháil i gcónaí, ag an gcéim réamhchonarthach, saor in aisce, le linn uaireanta gnó an trádálaí. Ba cheart an ceart a bheith ag an tomhaltóir freisin, i gcásanna a bhfuil údar cuí leo agus gan ualach míchuí a chur ar an trádálaí, idirghabháil dhaonna a iarraidh tar éis don chianchonradh a bheith tugtha i gcrích. D’fhéadfaí a áireamh leis sin an ceart chun idirghabhála daonna agus conradh á athnuachan, i gcás deacrachtaí móra a bheith ag an tomhaltóir nó nuair is gá míniú breise a thabhairt a bhaineann leis na téarmaí agus na coinníollacha conarthacha.

(41)

Is éard is patrúin dhorcha ar chomhéadain trádálaithe ar líne ann cleachtais a shaobhann cumas tomhaltóirí a fhaigheann an tseirbhís airgeadais roghanna nó cinntí uathrialacha agus eolasacha a dhéanamh go hábhartha nó a chuireann bac ábhartha ar an gcumas sin, bíodh sin d’aon ghnó nó go hiarbhír. Tá sé sin fíor go háirithe i gcás conarthaí seirbhísí airgeadais a thugtar i gcrích go cianda. Is féidir le trádálaithe cleachtais den sórt sin a úsáid chun a chur ina luí ar na tomhaltóirí ar faighteoirí a seirbhíse iad dul i mbun iompraíocht neamh-inmhianaithe nó cinntí míchuibhiúla a dhéanamh a bhféadfadh iarmhairtí diúltacha a bheith acu dóibh. Ba cheart, dá bhrí sin, toirmeasc a chur ar thrádálaithe meabhlú a dhéanamh ar thomhaltóirí ar faighteoirí a seirbhíse iad ná sonc a thabhairt dóibh agus a neamhspleáchas, a gcinnteoireacht nó a rogha a shaobhadh nó a lagú trí struchtúr, dearadh nó feidhmiúlachtaí comhéadain ar líne nó cuid de. Is féidir a áireamh leis sin roghanna dúshaothraithe dearaidh chun an tomhaltóir a stiúradh i dtreo roghanna nó gníomhaíochtaí a théann chun tairbhe don trádálaí, ach a bhféadfadh sé nach bhfuil siad chun leasa an tomhaltóra, trí roghanna a chur i láthair ar bhealach neamhneodrach, amhail níos mó suntais a tharraingt ar roghanna áirithe trí chomhpháirteanna amhairc, éisteachta nó eile, nuair a iarrtar ar thomhaltóir cinneadh a dhéanamh, ach gan a bheith teoranta dóibh sin amháin. Cé go gcuirtear toirmeasc, le Rialachán (AE) 2022/2065 ó Pharlaimint na hEorpa agus ón gComhairle (14), ar sholáthraithe seirbhíse idirghabhálacha a oibríonn ardáin ar líne patrúin dhorcha a úsáid i ndearadh agus in eagrú a gcomhéadan ar líne, ba cheart, leis an Treoir seo, oibleagáid a chur ar na Ballstáit cosc a chur ar thrádálaithe a thairgeann seirbhísí airgeadais go cianda patrúin den sórt sin a úsáid agus conarthaí á dtabhairt i gcrích acu le haghaidh seirbhísí den sórt sin. Dá bhrí sin, tá forálacha an Rialacháin sin agus na Treorach seo comhlántach, ós rud é go bhfuil feidhm acu maidir le trádálaithe atá ag gníomhú i gcáileanna éagsúla. Ós rud é, mar gheall ar a gcastacht agus a rioscaí tromchúiseacha bunúsacha, go bhféadfadh sé go mbeadh gá le ceanglais mhionsonraithe bhreise maidir le patrúin dhorcha maidir le seirbhísí airgeadais, ba cheart cead a bheith ag na Ballstáit, de mhaolú ar an leibhéal iomlán comhchuibhithe, forálacha níos déine a choimeád nó a thabhairt isteach, ar choinníoll go bhfuil forálacha den sórt sin i gcomhréir le dlí an Aontais. Tá an fhéidearthacht sin i gcomhréir le hAirteagal 3(9) de Threoir 2005/29/CE ó Pharlaimint na hEorpa agus ón gComhairle (15), i ndáil le cleachtais tráchtála éagóracha a bhaineann le seirbhísí airgeadais, lena bhforáiltear gur féidir leis na Ballstáit ceanglais atá níos sriantaí nó níos saintreoraí a fhorchur faoi chuimsiú seirbhísí airgeadais.

(42)

Is féidir le tionchairí mar shampla, conarthaí seirbhísí airgeadais a thugtar i gcrích go cianda a mhargú ar na meáin shóisialta. D’fhéadfaí tomhaltóirí a spreagadh chun cinntí a dhéanamh gan machnamh a dhéanamh ar na hiarmhairtí agus na rioscaí atá i gceist agus d’fhéadfaidís seirbhísí airgeadais a cheannach nach gcomhfhreagraíonn dá riachtanais. Ba cheart don Choimisiún measúnú a dhéanamh ar chleachtais mhargaíochta trádálaithe ar na meáin shóisialta a chuireann conarthaí seirbhísí airgeadais a thugtar i gcrích go cianda chun cinn agus ar an ngá a d’fhéadfadh a bheith le gníomhaíocht ina leith sin. Ba cheart é sin a dhéanamh, mar shampla, i bhfianaise chur i bhfeidhm Threoir 2005/29/CE agus reachtaíocht ábhartha eile de chuid an Aontais maidir le cleachtais den sórt sin. Bhí cásanna sna Ballstáit inar chuir cleachtais mhargaíochta tionchairí tomhaltóirí amú trí fhógraíocht a dhéanamh ar ardáin na meán sóisialta faoi tháirgí seirbhísí airgeadais áirithe gan faisnéis a thabhairt faoin riosca caillteanais do thomhaltóirí. Tá forálacha i dTreoir 2005/29/CE chun a áirithiú go gcuirfear toirmeasc ar chleachtais mhíthreoracha a mheabhlódh an gnáth-thomhaltóir nó ar dócha go meabhlóidís iad agus nach féidir faisnéis ábhartha a theastaíonn ón ngnáth-thomhaltóir chun cinneadh idirbhirt eolasach a dhéanamh a fhágáil ar lár. Is féidir a mheas go gcumhdaítear leis na forálacha sin cleachtais mhargaíochta tionchairí ar ardáin na meán sóisialta.

(43)

Ba cheart, dá bhrí sin, Treoir 2011/83/AE a leasú dá réir sin.

(44)

Ba cheart, dá bhrí sin, Treoir 2002/65/CE a aisghairm.

(45)

Ós rud é nach féidir leis na Ballstáit cuspóir na Treorach seo, eadhon rannchuidiú le feidhmiú ceart an mhargaidh inmheánaigh trí ardleibhéal cosanta do thomhaltóírí a thabhairt, a ghnóthú go leordhóthanach agus gur fearr is féidir é a bhaint amach ar leibhéal an Aontais, féadfaidh an tAontas bearta a ghlacadh i gcomhréir le prionsabal na coimhdeachta mar a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Treoir seo thar a bhfuil riachtanach chun an cuspóir sin a ghnóthú.

(46)

I gcomhréir le Dearbhú Comhpháirteach Polaitiúil an 28 Meán Fómhair 2011 ó na Ballstáit agus ón gCoimisiún maidir le doiciméid mhíniúcháin (16), ghlac na Ballstáit mar chúram orthu féin, i gcásanna a bhfuil údar cuí leo, doiciméad amháin nó níos mó a chur leis an bhfógra maidir lena mbearta trasuite, ar doiciméid iad lena mínítear an gaol idir codanna de threoir agus páirteanna comhfhreagracha na n-ionstraimí náisiúnta trasuite. I ndáil leis an Treoir seo, measann an reachtóir go bhfuil údar cuí le doiciméid den sórt sin a tharchur,

(1)

leasaítear Airteagal 3 mar a leanas:

(2)

in Airteagal 6(1), cuirtear an méid seo a leanas in ionad phointe (h):

(3)

cuirtear an tAirteagal seo a leanas isteach:

(4)

cuirtear an Chaibidil seo a leanas isteach:

‘ Caibidil IIIa

Rialacha a bhaineann le conarthaí seirbhísí airgeadais a thugtar i gcrích go cianda

(*1)  Treoir 2014/49/AE ó Pharlaimint na hEorpa agus ón gComhairle an 16 Aibreán 2014 maidir le scéimeanna ráthaithe taiscí (IO L 173, 12.6.2014, lch. 149)."

(*2)  Treoir 97/9/CE ó Pharlaimint na hEorpa agus ón gComhairle an 3 Márta 1997 maidir le scéimeanna cúitimh d’infheisteoirí (IO L 84, 26.3.1997, lch. 22)."

(*3)  Treoir 2014/17/AE ó Pharlaimint na hEorpa agus ón gComhairle an 4 Feabhra 2014 maidir le comhaontuithe creidmheasa le haghaidh tomhaltóirí a bhaineann le réadmhaoin chónaithe agus lena leasaítear Treoracha 2008/48/CE agus 2013/36/AE agus Rialachán (AE) Uimh. 1093/2010 (IO L 60, 28.2.2014, lch. 34)."

(*4)  Treoir (AE) 2023/2225 ó Pharlaimint na hEorpa agus ón gComhairle an 18 Deireadh Fómhair 2023 maidir le comhaontuithe creidmheasa le haghaidh tomhaltóirí agus lena n-aisghairtear Treoir 2008/48/CE (IO L 2023/2225, 30.10.2023, ELI: http://data.europa.eu/eli/dir/2023/2225/oj)."

(*5)  Rialachán (AE) 2022/2065 ó Pharlaimint na hEorpa agus ón gComhairle an 19 Deireadh Fómhair 2022 maidir le Margadh Aonair do Sheirbhísí Digiteacha agus lena leasaítear Treoir 2000/31/CE (an Gníomh um Sheirbhísí Digiteacha) (IO L 277, 27.10.2022, lch. 1).’;"

(5)

in Airteagal 24, cuirtear an mhír seo a leanas leis:

(6)

in Airteagal 29, cuirtear an méid seo a leanas in ionad mhír 1:

(7)

leasaítear Iarscríbhinn I i gcomhréir le hIarscríbhinn I a ghabhann leis an Treoir seo.