Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Document 52017IR6047

Opinjoni tal-Kumitat Ewropew tar-Reġjuni dwar “Tingħata spinta lill-konnettività tal-broadband fl-Ewropa”

COR 2017/06047

ĠU C 247, 13.7.2018, p. 7–10 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

13.7.2018   

MT

Il-Ġurnal Uffiċjali tal-Unjoni Ewropea

C 247/7

Opinjoni tal-Kumitat Ewropew tar-Reġjuni dwar “Tingħata spinta lill-konnettività tal-broadband fl-Ewropa”

(2018/C 247/02)

Relatur:

Mart Võrklaev (EE/ALDE), Sindku tal-Muniċipalità ta’ Rae

RAKKOMANDAZZJONIJIET TA’ POLITIKA

IL-KUMITAT EWROPEW TAR-REĠJUNI

Kummenti ġenerali

1.

 jirrimarka li skont il-Bank Dinji (1), it-tkabbir mgħaġġel tat-teknoloġiji diġitali wassal għal bidla sinifikanti tas-soċjetà madwar id-dinja u issa l-Internet sar infrastruttura fundamentali, inaqqas l-ispejjeż fir-rigward tal-iskambju ta’ informazzjoni u jġib l-innovazzjoni li tikkontribwixxi għal konnettività aħjar bejn iċ-ċittadini, in-negozji u l-gvernijiet;

2.

 jilqa’ l-ħidma tal-Pjattaforma tal-Broadband flimkien mal-Kummissjoni Ewropea bil-għan li jiġu żgurati kooperazzjoni aħjar, regolamentazzjoni aħjar u l-implimentazzjoni tal-konnettività diġitali fl-Ewropa u, naturalment, il-finanzjament aħjar tagħhom;

3.

 huwa konxju tal-fatt li fl-2015, il-kopertura tal-broadband fiss u d-disponibbiltà fl-UE kienet ta’ 97 % tad-djar, (b’rata medja ta’ użu ta’ 72 %) u li l-firxa ta’ servizzi bbażati fuq teknoloġija wireless kienet saħansitra ogħla. Madankollu, hemm differenzi bejn l-Istati Membri fir-rigward tad-disponibbiltà u l-affordabbiltà ta’ broadband fiss bejn iż-żoni urbani u dawk rurali.

4.

 jirrimarka li skont is-seba’ Rapport ta’ Koeżjoni, ser ikun hemm il-ħtieġa għal aktar investiment, filwaqt li s-servizzi bażiċi tal-broadband ikunu aċċessibbli għad-djar kollha fl-UE, l-aċċess tal-ġenerazzjoni li jmiss (NGA) — li huwa ferm aktar rapidu — huwa disponibbli biss għal 40 % tar-residenti rurali meta kkumparat mad-90 % ta’ dawk urbani;

5.

 jinnota li l-Internet b’veloċità baxxa u b’penetrazzjoni dgħajfa fiż-żoni rurali, u l-problemi speċifiċi f’żoni ta’ popolazzjoni skarsa u fir-reġjuni l-aktar imbiegħda, jistgħu jkunu ta’ xkiel biex jintlaħqu l-għanijiet ambizzjużi tal-UE għall-2020–2025, li skont il-Kummissjoni Ewropea jistgħu jħallu estimu ta’ qligħ ta’ EUR 146,5 biljun lill-UE u fl-istess ħin joħolqu sa 2,4 miljuni impjiegi ġodda;

6.

 jaqbel mal-G20 (2) li l-għan aħħari li jingħeleb id-distakk diġitali huwa li tingħata opportunità ugwali liċ-ċittadini kollha biex jibbenefikaw mill-iżvilupp diġitali, li l-vantaġġi tiegħu jvarjaw minn aktar effiċjenza, permezz ta’ inklużjoni soċjali u ekonomika akbar, għal aktar opportunitajiet għall-parteċipazzjoni f’ekonomija ġdida. Id-distakk diġitali għandu żewġ dimensjonijiet: l-aċċess għal konnettività tajba tal-broadband, u l-motivazzjoni għall-użu tas-servizzi tal-Internet;

7.

 jenfasizza li s-soluzzjoni tal-problema tal-hekk imsejjaħ “last mile” hija importanti għall-iżvilupp tal-UE kollha, u tirrikjedi miżuri flessibbli;

8.

 jiġbed l-attenzjoni għar-rwoli ta’ importanza potenzjali tal-infrastruttura tal-ICT u tal-broadband flimkien mal-bini ta’ kapaċitajiet li jista’ jkollhom fir-ristrutturar ta’ żoni rurali fir-rigward tad-depopolazzjoni u l-emarġinazzjoni ta’ żoni rurali li huma problemi li qed jikbru madwar l-Ewropa;

Problemi ta’ konnettività u soluzzjonijiet possibbli

9.

 huwa tal-fehma li għadd ta’ sfidi importanti jeħtieġ li jiġu indirizzati, bħal pereżempju:

—

il-fatt li l-konnettività b’veloċità għolja ħafna għal infrastrutturi fissi u mobbli madwar l-UE hija limitata;

—

ir-riskju li ma jkunx hemm kapaċità biżżejjed biex jiġu indirizzati l-bidliet rapidi teknoloġiċi u tas-suq bħall-avvanz tal-Internet tal-oġġetti;

—

piżijiet amministrattivi minħabba regolamentazzjoni żejda u nuqqas ta’ koerenza, inklużi r-regoli dwar l-għajnuna mill-Istat;

10.

 jinsab imħasseb dwar il-konnettività f’ċerti żoni, li turi l-importanza tal-kurrikuli skolastiċi u l-programmi ta’ tagħlim elettroniku għall-adulti. Il-broadband ma jirrigwardax biss kwistjonijiet ta’ finanzjament, iżda wkoll id-domanda għall-bini u l-użu tal-infrastruttura. L-istituzzjonijiet pubbliċi kollha, l-iskejjel u l-istituzzjonijiet edukattivi għandhom ikunu mgħammra b’konnessjoni broadband b’veloċità għolja;

11.

 jinnota li f’xi pajjiżi u reġjuni, anki l-għarfien tekniku u n-nuqqas ta’ informazzjoni dwar il-possibbiltajiet ta’ finanzjament għall-infrastruttura tal-broadband kif ukoll l-hekk imsejħa l-aħjar prattiki jistgħu jkunu ta’ problema;

12.

 jilqa’ b’sodisfazzjon it-tnedija taċ-ċentri ta’ eċċellenza tal-broadband kif ukoll il-kooperazzjoni tad-diversi Direttorati Ġenerali tal-Kummissjoni Ewropea sabiex jintlaħaq għan komuni. Dan għandu jiġi rifless ukoll fil-baġit tal-UE li jmiss.

13.

 iqis il-ħtieġa li fl-Istati Membri kollha għandhom jitwaqqfu ċentri ta’ eċċellenza, li flimkien jiffurmaw netwerk komuni, u li r-reġjuni u l-awtoritajiet lokali jikkuntattjaw lil dawn iċ-ċentri, qabel ma jfittxu soluzzjonijiet — il-konsultazzjonijiet għandhom isiru minn qabel u għandhom jiġu mfittxija soluzzjonijiet ottimali abbażi tal-partikolaritajiet nazzjonali u reġjonali;

14.

 jilqa’ l-ħames għodod għaż-żoni rurali tal-UE, li għandhom iwasslu għal progress fir-rigward ta’ kopertura broadband aħjar;

15.

 huwa konxju minn kif qed jiżviluppa l-potenzjal tal-kunċett emerġenti ta’ “raħal intelliġenti” propost bħala parti mid-“Dikjarazzjoni ta’ Cork 2.0 dwar Ħajja Aħjar fiż-Żoni Rurali”. Dan jirrigwarda l-investiment fis-settur tal-ICT sabiex tittejjeb il-kwalità tal-ħajja u jkun garantit l-aċċess għas-servizzi pubbliċi u l-infrastrutturi filwaqt li jridu jiġu kkunsidrati l-karatteristiċi territorjali;

16.

 f’dan ir-rigward, jilqa’ b’sodisfazzjon l-enfasi msaħħa fuq ir-regolazzjoni proporzjonata u l-konkorrenza fl-infrastruttura sabiex jiġi promoss l-investiment li jikkaratterizza d-dispożizzjonijiet ta’ aċċess tan-netwerk u l-enfasi fuq soluzzjonijiet kollaborattivi msejsa fuq is-suq li jippromovu l-implimentazzjoni tal-infrastruttura f’żoni lokali u reġjuni fejn il-każ intraprenditorjali mhuwiex definit b’mod ċar. Huwa importanti li r-regolazzjoni dwar l-aċċess tikkontribwixxi biex tiġi evitata qasma diġitali għal netwerks ta’ kapaċità għolja ħafna u li tissaħħaħ il-koeżjoni territorjali;

17.

 iqis bħala neċessarju, fl-interess tal-kompetizzjoni kemm fis-swieq fissi u kemm f’dawk tal-5G, li s-servizzi jiġu separati min-netwerks, fuq l-istess linji tas-settur tal-enerġija (unbundling). Pereżempju, f’għadd ta’ Stati Membri (l-Iżvezja, ir-Renju Unit, eċċ.) saret separazzjoni kompleta bejn is-servizzi ta’ telekomunikazzjoni u dawk tal-operat tan-netwerk. Fil-fehma tal-KtR, in-netwerks tal-fibrottika għandhom jappartjenu lill-kumpanniji tat-telekomunikazzjoni, li l-mudell kummerċjali tagħhom huwa bbażat fuq l-aċċess indaqs għall-fornituri ta’ servizzi kollha. Dan għandu jippermetti lil ħafna fornituri tas-servizzi biex ikunu jistgħu joperaw fis-suq, il-konsumaturi jkunu jistgħu jagħżlu servizzi għall-valur mixtieq u l-iżvilupp fit-tul ta’ dan il-qasam ikun garantit ukoll;

18.

 jikkunsidra li dan għandu jipprovdi opportunitajiet indaqs għal kulħadd fl-iżvilupp tan-netwerks tal-5G: m’għandux ikun hemm dipendenza fuq infrastruttura bażika ta’ kumpaniji ta’ telekomunikazzjoni li jiddominaw is-suq. Għalhekk, l-UE għandha tappoġġja l-iżvilupp ta’ netwerks miftuħa u tmexxi wkoll l-Istati Membri f’din id-direzzjoni, b’tali mod li l-operaturi kollha tan-netwerks eżistenti u dawk ġodda jsiru indipendenti mill-operatur.

19.

 jenfasizza l-importanza ta’ stħarriġ ġeografiku aktar preċiż minn perspettiva tal-analiżi tas-suq dwar l-infrastrutturi eżistenti u ta’ proġetti ppjanati għall-ġejjieni sabiex jiġu identifikati żoni ta’ esklużjoni diġitali. Peress li tendenzjalment dawn iż-żoni jinsabu f’reġjuni żvantaġġati u b’popolazzjoni baxxa, l-effiċjenza tal-fondi pubbliċi ta’ dawn iż-żoni għandha tiżdied permezz ta’ reġistrazzjoni korretta ta’ dawn iż-żoni;

20.

 jitlob dispożizzjonijiet legali fl-Istati Membri sabiex jiġi żgurat li l-infrastruttura eżistenti (netwerks tal-elettriku, piluni, eċċ.) tkun tista’ tintuża bl-aktar mod flessibbli fl-espansjoni tan-netwerk tal-broadband, u b’hekk jiġu ffrankati l-ħin u l-flus meta tiġi provduta l-kopertura ġdida tal-broadband;

21.

 jenfasizza li, fil-perjodu ta’ programmazzjoni attwali, hemm EUR 14 biljun disponibbli mill-fondi SIE għall-ħolqien ta’ infrastruttura tal-broadband;

22.

 jappoġġja l-promozzjoni tat-twettiq tal-broadband permezz tat-tisħiħ tal-politika ta’ koeżjoni, fost l-oħrajn biex jiżgura li din tkun tista’ tindirizza l-fallimenti tas-suq l-aktar severi fiż-żoni rurali sparsament popolati tal-UE. Dan ma jeskludix żieda fl-istrumenti finanzjarji (bħal self finanzjarju) f’kooperazzjoni mal-Bank Ewropew tal-Investiment u banek promozzjonali oħrajn;

23.

 Jappoġġja t-tisħiħ tar-rwol tal-Faċilità Nikkollegaw l-Ewropa (CEF) u l-FEIS fi strumenti finanzjarji ta’ finanzjament u faċilitajiet ta’ taħlit (jiġu kkombinati l-għotjiet ma’ strumenti finanzjarji) biex jindirizza tipi aktar moderati ta’ fallimenti tas-suq, bħalma hu n-nuqqas ta’ finanzjament ta’ ekwità għal proġetti iżgħar f’żoni iktar vijabbli. Tali interventi komplementari jkunu jiżguraw konnettività tal-broadband ta’ kwalità għolja fir-reġjuni kollha tal-UE;

24.

 jirrakkomanda li tintuża pjattaforma tal-broadband komuni bħala strument ta’ kooperazzjoni u l-involviment tad-DĠ REGIO fil-ħidma ta’ din il-pjattaforma;

25.

 jappoġġja l-promozzjoni tal-użu tal-Programmi tal-UE u l-iżvilupp ta’ kunċetti ġodda għal sħubiji pubbliċi-privati għal investimenti favur l-investimenti fit-twettiq tal-broadband;

26.

 itenni li fiż-żoni fejn kumpaniji kbar mhumiex interessati jinvestu u fejn il-kumpaniji żgħar isibu diffikultajiet, għandhom jiġu żviluppati mudelli aktar sempliċi li jagħmluha aktar faċli għan-negozji ż-żgħar biex jinvestu u jipprovdu soluzzjonijiet lil dawn iż-żoni b’nuqqas ta’ kopertura, jew il-proġetti għall-iżvilupp tal-broadband jiġu rikonoxxuti bħala servizzi ta’ interess ekonomiku ġenerali (3);

27.

 f’dan ir-rigward, jirrimarka li huwa importanti li jiġu ssemplifikati l-proċeduri, hekk kif it-teknoloġija tiżviluppa aktar malajr mill-attivazzjoni tal-istrutturi relatati;

28.

 huwa tal-fehma li l-pjani tal-iżvilupp li ġenwinament jiffunzjonaw tajjeb għat-twettiq tal-broadband jistgħu jiġu żviluppati biss b’kunsens bejn il-kumpaniji tat-telekomunikazzjoni, il-gvernijiet u l-awtoritajiet lokali u reġjonali, filwaqt li jitqiesu l-interessi tal-Istati, il-bliet u r-reġjuni kollha. F’pajjiżi fejn intlaħaq ftehim bħal dan (l-Isvezja, ir-Renju Unit, eċċ.), it-twettiq tal-broadband diġà huwa aktar avvanzat. Jekk ma jintlaħaq l-ebda ftehim, il-kopertura tal-broadband barra miż-żoni urbani tirriskja li tibqa’ inadegwata;

29.

 Jilqa’ l-inizjattiva eċċellenti tal-Bank Ewropew għall-Investiment biex jistabilixxi fond għat-twettiq tal-broadband u jħeġġeġ l-implimentazzjoni tiegħu mingħajr dewmien; jispera li dan ser jgħin il-finanzjament, b’mod partikolari, ta’ proġetti żgħar u t-tneħħija tal-“white spots”;

30.

 jirreferi għar-rakkomandazzjonijiet tiegħu lill-Grupp ta’ Livell Għoli (HLG) dwar is-semplifikazzjoni wara l-2020, li tenfasizza l-ħtieġa biex l-għajnuna mill-Istat u r-regoli tal-akkwist pubbliku għal fondi SIE ikunu allinjati ma’ dawk għal programmi ġestiti ċentralment. Il-KtR jtenni t-talba tiegħu għal valutazzjoni ta’ jekk hux biss xi wħud min-nefqiet tal-Fondi SIE, jew kollha, jistgħu jkunu eżentati mill-proċeduri ta’ għajnuna għall-Istati wara l-2020. F’dan il-kuntest, il-KtR bi pjaċir jinnota li r-rakkomandazzjonijiet tiegħu dwar il-ħtieġa ta’ definizzjonijiet komuni biex il-fondi jkunu jistgħu jiġu mqabbla u kkombinati ġew adottati mill-HLG (4);

31.

 jinsisti li l-Linji Gwida tal-UE għall-applikazzjoni tar-regoli dwar l-għajnuna mill-Istat għandhom ikunu allineati mal-fondi differenti tal-UE disponibbli għal finanzjament tat-twettiq tal-broadband, b’ħarsa lejn it-twettiq rapidu ta’ netwerks tal-broadband, u jesprimi tħassib dwar in-numru ta’ prereġistrazzjonijiet mhux milqugħa, li ser inaqqsu jew saħansitra jipprevjenu ċ-ċaqliq tal-investimenti, u li għaldaqstant ser ikunu responsabbli mill-iżvilupp kajman tal-konnessjonijiet broadband f’dawn iż-żoni;

32.

 jinnota bi pjaċir — kif imsemmi fir-rakkomandazzjonijiet tiegħu lill-HGL dwar is-Semplifikazzjoni — li l-prinċipju ta’ approċċ differenzjat qed jiġi kkunsidrat ukoll. Approċċ bħal dan għandu jippermetti tnaqqis sinifikanti tal-piż amministrattiv u jqis aħjar il-partikolaritajiet tal-implimentazzjoni fir-reġjuni inkwistjoni u b’hekk ikun faċilitat l-approċċ territorjali u jkun promoss l-investiment imfassal apposta għall-espansjoni tal-broadband;

33.

 jissuġġerixxi li jitwettqu konnessjonijiet broadband b’veloċità għolja kemm jista’ jkun malajr, sabiex jinħolqu l-kundizzjonijiet għas-soċjetà tal-gigabits biex timmassimizza l-opportunitajiet tas-suq uniku diġitali u b’hekk tikkontribwixxi għall-iżvilupp tal-Istati Membri kollha f’dan il-qasam. Sabiex jintlaħaq dan il-għan, iridu jiġu segwiti soluzzjonijiet differenti, għaliex il-konnessjoni ta’ kull dar man-netwerk tal-fibrottika tista’ tkun għalja u tinvolvi ħafna ħin, speċjalment f’żoni skarsament popolati;

34.

 huwa tal-fehma, li minbarra l-konnessjonijiet bil-kejbil, ikun utli li f’żoni abitati mifruxin u f’żoni inaċċessibbli wieħed jikkunsidra u jivvaluta l-potenzjal ta’ broadband mobbli, broadband bis-satellita u l-iżvilupp ta’ netwerks pubbliċi tal-Wi-Fi f’żoni u istituzzjonijiet pubbliċi, bħall-inizjattiva WiFi4EU. Jekk jinsabu soluzzjonijiet alternattivi titaffef l-espansjoni tan-netwerks u fl-istess ħin jiġu ffrankati l-flus, iżda huwa importanti li wieħed isegwi approċċ sistematiku u maħsub bir-reqqa biex ikun żgurat li s-soluzzjonijiet jissodisfaw il-ħtiġijiet tal-persuni u t-teknoloġiji jkunu vijabbli fuq perjodu ta’ żmien twil;

35.

 jenfasizza l-importanza li jkunu indirizzati l-problemi tal-ġestjoni tal-ispettru tar-radju b’riżultat tal-iżvilupp mgħaġġel tan-netwerks tal-komunikazzjonijiet tal-5G, minħabba l-fatt li t-teknoloġija tal-5G tirrikjedi netwerks bi prestazzjoni għolja fl-UE kollha. Huwa importanti ħafna li wieħed ifittex approċċ komuni għall-allokazzjoni ta’ liċenzji tal-frekwenzi ogħla (spettru) li se jintużaw fil-futur, inkluż, fejn xieraq, prevedibbiltà regolatorja akbar f’termini ta’ użu kondiviż tal-ispettru u flessibbiltà akbar, biex jirrispondu għad-differenzi fid-domanda għal meded armonizzati tal-ispettru fil-livell nazzjonali jew dak lokali;

36.

 jappoġġja l-miżuri bażiċi tal-Kodiċi tal-Komunikazzjonijiet Elettroniċi, bħal pereżempju l-introduzzjoni ta’ dispożizzjonijiet ġodda biex ikun sostnut l-iżvilupp ta’ netwerks b’veloċità għolja ħafna madwar l-Ewropa, li jippermetti veloċitajiet ta’ gigabits fis-sekonda, biex jitwessa’ l-iskop tal-qafas regolatorju biex jinkludi għodod ġodda ta’ komunikazzjoni; l-hekk imsejħa servizzi “over-the-top”, u l-forniment lill-utenti finali ta’ aċċess funzjonali għall-Internet bi prezz raġonevoli;

37.

 jilqa’ l-kompetizzjoni “European Broadband Awards” tal-Kummissjoni Ewropea, li tikkontribwixxi għal soluzzjonijiet għall-problema ta’ kopertura tal-broadband, u għall-promozzjoni tal-aħjar prattiki.

Brussell, it-22 ta’ Marzu 2018.

Il-President tal-Kumitat Ewropew tar-Reġjuni

Karl-Heinz LAMBERTZ

(1)  “World Development Report 2016: Digital dividends”.

(2)  “L-infrastruttura diġitali: Negħlbu d-Distakk Diġitali fl-Ekonomiji Emerġenti”, Ideat tal-G20, April 2017.

(3)  COR-2016-02880.

(4)  COR-2017-04842-00-00-PAC-TRA (EN).

Top