EUR-Lex Access to European Union law
This document is an excerpt from the EUR-Lex website
Document 52015PC0099
Recommendation for a COUNCIL RECOMMENDATION On broad guidelines for the economic policies of the Member States and of the Union
Rakkomandazzjoni għal RAKKOMANDAZZJONI TAL-KUNSILL dwar linji gwida ġenerali għall-politiki ekonomiċi tal-Istati Membri u tal-Unjoni
Rakkomandazzjoni għal RAKKOMANDAZZJONI TAL-KUNSILL dwar linji gwida ġenerali għall-politiki ekonomiċi tal-Istati Membri u tal-Unjoni
/* COM/2015/099 final */
Rakkomandazzjoni għal RAKKOMANDAZZJONI TAL-KUNSILL dwar linji gwida ġenerali għall-politiki ekonomiċi tal-Istati Membri u tal-Unjoni /* COM/2015/099 final - 2015/
MEMORANDUM TA’ SPJEGAZZJONI It-Trattat dwar il-Funzjonament
tal-UE jistipula li l-Istati Membri għandhom iqisu l-politiki
ekonomiċi tagħhom u l-promozzjoni tal-impjiegi bħala
kwistjonijiet ta' interess komuni u għandhom jikkoordinawhom l-azzjoni
tagħhom fi ħdan il-Kunsill. F'żewġ artikoli distinti, dan
jistipula li l-Kunsill għandu jadotta linji gwida ġenerali
għall-politika ekonomika (l-Artikolu 121) u linji gwida
għall-impjiegi (l-Artikolu 148), filwaqt li jagħmilha ċara
li dawn il-linji gwida tal-aħħar iridu jkunu konsistenti mal-linji
gwida ta' qabel. B'din il-bażi ġuridika, il-linji gwida
għall-politiki tal-impjiegi u ekonomiċi qed jiġu
ppreżentati bħala żewġ strumenti legali separati daqskemm
intrinsikament interrelatati: ·
Rakkomandazzjoni tal-Kunsill dwar linji gwida
ġenerali għall-politika ekonomika tal-Istati Membri u tal-Unjoni –
Parti I tal-Linji Gwida Integrati; ·
Deċiżjoni tal-Kunsill dwar linji gwida
għall-politiki tal-Istati Membri dwar l-impjiegi – Parti II tal-Linji
Gwida Integrati. Il-linji gwida ġew
adottati għall-ewwel darba fl-2010 bħala "Pakkett Integrat"
li fuqu ssejset l-istrateġija Ewropa 2020. Fl-2010 ġie
deċiż ukoll li l-biċċa l-kbira tal-linji gwida integrati
għandhom jibqgħu stabbli sal-2014. Filwaqt li linji gwida
ġenerali għall-politika ekonomika jibqgħu jgħoddu għal
kull żmien, il-linji gwida għall-impjiegi jeħtiġilhom
jitfasslu kull sena. Minbarra li jixhdu l-ambitu u
d-direzzjoni għal koordinazzjoni tal-politika tal-Istati Membri, il-linji
gwida jipprovdu wkoll il-bażi għal rakkomandazzjonijiet
speċifiċi għal kull pajjiż fl-oqsma rispettivi. Il-ġabra ta' "linji
gwida integrati" li hemm bħalissa jirfdu l-istrateġija
Ewropa 2020 fil-kuntest tal-metodu l-ġdid biex titfassal politika
ekonomika mibnija fuq l-investiment, ir-riforma strutturali u r-responsabbiltà
fiskali kif jistabbilixxi l-Istħarriġ Annwali 2015 tal-Kummissjoni
dwar it-Tkabbir. Fl-istess waqt, il-linji gwida integrati għandhom
jgħinu biex jinkiseb tkabbir intelliġenti, sostenibbli u inklużiv
u biex jintlaħqu l-miri tas-Semestru Ewropew tal-koordinazzjoni
tal-politika ekonomika. Il-Linji Gwida Integrati huma: Linja gwida 1: Inkattru l-investiment Linja gwida 2: Inżidu
t-tkabbir bit-twettiq tar-riformi strutturali Linja gwida 3: Inxejnu l-ostakli
ewlenin għat-tkabbir u l-impjiegi fil-livell tal-UE Linja gwida 4: Intejbu
s-sostenibbiltà u x-xejra favorevoli għat-tkabbir tal-finanzi
pubbliċi Linja gwida 5: Inżidu
d-domanda għax-xogħol Linja gwida 6: Insaħħu
l-provvista tax-xogħol u l-ħiliet Linja gwida 7: Intejbu
l-funzjonament tas-swieq tax-xogħol Linja gwida 8: Niżguraw
l-imparzjalità, nitħabtu kontra l-faqar u nippromwovu l-opportunitajiet
indaqs Rakkomandazzjoni għal RAKKOMANDAZZJONI TAL-KUNSILL dwar linji gwida ġenerali
għall-politiki ekonomiċi tal-Istati Membri u tal-Unjoni IL-KUNSILL TAL-UNJONI EWROPEA, Wara li kkunsidra t-Trattat dwar
il-Funzjonament tal-Unjoni Ewropea, u b'mod partikolari l-Artikolu 121(2)
tiegħu, Wara li kkunsidra r-rakkomandazzjoni
mill-Kummissjoni Ewropea, Wara li kkunsidra l-konklużjonijiet
tal-Kunsill Ewropew, Billi: (1) L-Istati Membri għandhom iqisu
l-politiki ekonomiċi tagħhom bħala kwistjoni ta' interess komuni
u jikkoordinawhom fi ħdan il-Kunsill. Il-linji gwida għall-impjiegi u
l-linji gwida ġenerali għall-politika ekonomika għandu
jadottahom il-Kunsill biex jiggwida l-politiki tal-Istati Membri. (2) Skont id-dispożizzjonijiet
tat-Trattat, l-Unjoni Ewropea żviluppat u implimentat strumenti ta'
koordinazzjoni tal-politika għall-politika fiskali u politiki
makrostrutturali. Is-Semestru Ewropew jiġbor flimkien strumenti differenti
f'qafas ġenerali għal sorveljanza ekonomika u baġitarja
multilaterali integrata. Permezz ta' simplifikazzjoni u tisħiħ
tas-Semestru Ewropew kif jistipula l-Istħarriġ Annwali 2015
tal-Kummissjoni dwar it-Tkabbir, se jkompli jitjieb l-operat tiegħu. (3) Il-kriżi finanzjarja u ekonomika
wriet u enfasizzat dgħjufijiet importanti fl-ekonomija tal-Unjoni u
l-Istati Membri tagħha. Il-kriżi ħarġet fid-dieher ukoll
l-interdipendenza mill-qrib tal-ekonomiji tal-Istati Membri u s-swieq
tal-impjiegi. Issa fi żmienna għandna l-isfida l-kbira li l-Unjoni
toħloq tkabbir u impjiegi sodi, sostenibbli u inklużivi. Għal
dan il-għan hemm bżonn azzjoni politika kkoordinata u ambizzjuża,
kemm fil-livell tal-UE u kif ukoll fil-livell nazzjonali, li tkun konformi
mad-dispożizzjonijiet tat-Trattat u l-governanza ekonomika tal-Unjoni.
Billi jwaħħdu miżuri min-naħa tal-provvista u min-naħa
tad-domanda, dawn l-azzjonijiet għandhom jagħtu spinta l-investiment,
iġeddu l-impenn għal riformi strutturali u jħaddmu
r-responsabbiltà fiskali. (4) L-Istati Membri u l-Unjoni għandhom
jindirizzaw ukoll l-impatt soċjali tal-kriżi u jimmiraw li jsawru
soċjetà ta' koeżjoni fejn iċ-ċittadini jkollhom
is-setgħa li jantiċipaw u jamministraw il-bidla, u li jkunu
jistgħu jieħdu sehem b'mod attiv fis-soċjetà u l-ekonomija. Irid
ikun żgurat aċċess u opportunitajiet għal kulħadd
filwaqt li jonqsu l-faqar u l-esklużjoni soċjali, l-aktar billi jkun żgurat
funzjonament effettiv tas-swieq tax-xogħol u s-sistemi tas-sigurtà
soċjali u jitneħħew l-ostakli għall-parteċipazzjoni
fis-suq tax-xogħol. L-Istati Membri għandhom jiżguraw ukoll li
l-ġid tat-tkabbir ekonomiku jitqassam fost iċ-ċittadini kollha u
r-reġjuni kollha. (5) Azzjoni konformi mal-linji gwida tkun
kontribut importanti biex jintlaħqu l-għanijiet tal-istrateġija
Ewropa 2020. Il-linji gwida huma ġabra integrata ta' politiki Ewropej
u nazzjonali li l-Istati Membri u l-Unjoni għandhom jimplimentaw
ħalli r-riformi strutturali kkoordinati jħallu effetti kollaterali
pożittivi, issir taħlita tajba tal-politiki ekonomiċi
ġenerali, u biex il-politiki Ewropej jagħtu kontribut aktar
konsistenti biex jintlaħqu l-għanijiet tal-istrateġija
Ewropa 2020. (6) Għalkemm dawn il-linji gwida huma
indirizzati lill-Istati Membri u lill-Unjoni, dawn għandhom jitwettqu bi
sħubija mal-awtoritajiet nazzjonali, reġjonali u lokali kollha, biex
jitqarrbu l-parlamenti, u kif ukoll mas-sħab soċjali u
r-rappreżentanti tas-soċjetà ċivili. (7) Il-linji gwida ġenerali
għall-politiki ekonomiċi jiggwidaw lill-Istati Membri
fl-implimentazzjoni tar-riformi, u jixhdu l-interdipendenza. Dawn huma konformi
mal-Patt ta' Stabbiltà u Tkabbir. Dawn il-linji gwida għandhom isawru
l-bażi għal rakkomandazzjonijiet speċifiċi
għall-pajjiżi li l-Kunsill jaf jagħti lill-Istati Membri, ADOTTAT DIN IR-RAKKOMANDAZZJONI: (1) Fil-politiki ekonomiċi tagħhom,
l-Istati Membri, u meta rilevanti anki l-Unjoni Ewropea, għandhom iqisu
l-linji gwida stabbiliti fl-Anness. Dawn il-linji gwida għandhom jiffurmaw
parti mill-"Linji Gwida Integrati". Magħmul fi Brussell, Għall-Kunsill Il-President ANNESS Il-linji gwida ġenerali
għall-politiki ekonomiċi tal-Istati Membri u tal-Unjoni
Parti I tal-Linji Gwida Integrati Linja gwida 1: Inkattru l-investiment Hu tassew meħtieġ li jiżdied
il-livell ta' investiment produttiv fl-Ewropa ħalli tingħata spinta
lid-domanda u jitjiebu l-kompetittività u l-potenzjal għal tkabbir fit-tul
fl-Ewropa. L-isforzi għandhom jiffukaw fuq mobilizzazzjoni
tal-finanzjamenti għall-investiment, modi biex il-finanzjamenti
jilħqu l-ekonomija reali u titjib fl-ambjent tal-investiment. Għandu jiġi sfruttat għalkollox
il-potenzjal tal-fondi tal-UE, fosthom il-Fond Ewropew tal-Investiment
Strateġiku u l-fondi strutturali, u tal-fondi nazzjonali biex jiġu
ffinanzjati investimenti li jsaħħu t-tkabbir f'oqsma ewlenin.
Għal dan il-għan hemm bżonn li l-ġestjoni tal-fondi tkun
orjentata lejn ir-riżultati u li jintużaw aktar strumenti finanzjarji
innovattivi. Biex il-finanzjamenti jilħqu l-ekonomija
reali jeħtieġ jiżdiedu t-trasparenza u l-għoti
tal-informazzjoni, l-aktar billi jinħolqu ċentru ta' konsulenza dwar
investiment Ewropew fl-awspiċi tal-Bank Ewropew tal-Investiment u sensiela
ta' proġetti trasparenti fil-livell Ewropew kif ukoll fil-livell
nazzjonali. Hemm bżonn ukoll li l-partijiet konċernati jaħdmu id
f'id mill-qrib ħalli jkun żgurat li l-operazzjonijiet isiru bla
intoppi, jittieħed riskju adegwat u jinkiseb l-akbar valur miżjud. Sabiex l-Unjoni tibqa' lok attraenti fejn isir
investiment finanzjarju barrani hemm bżonn stabbiltà makroekonomika u
finanzjarja, kif ukoll prevedibbiltà regolatorja, u ftuħ u trasparenza
fis-settur finanzjarju tagħha. Linja gwida 2: Inżidu t-tkabbir
bit-twettiq tar-riformi strutturali tal-Istati Membri Sabiex jissaħħaħ u
jitwieżen l-irkupru ekonomiku, jissewwew l-iżbilanċi
makroekonomiċi li jkunu ta' ħsara, u jinfetaħ il-potenzjal
tal-ekonomiji tal-Unjoni hemm tassew bżonn li l-Istati Membri jwettqu
r-riformi strutturali b'ambizzjoni kemm fis-swieq tal-prodotti u
tax-xogħol u anki fis-sistemi tas-sigurtà soċjali. Dan jgħin
ukoll biex tinkiseb koeżjoni ekonomika u soċjali. B'riformi li
jsaħħu l-kompetizzjoni, speċjalment fis-settur mhux
kummerċjabbli, funzjonament aħjar tas-swieq tax-xogħol u ambjent
aħjar għan-negozji, tkun qed tingħata għajnuna biex
jingħeleb ix-xkiel għat-tkabbir u għall-investiment u tiżdied
il-kapaċità ta' aġġustament tal-ekonomija. Dawn ir-riformi,
l-Istati Membri għandhom jikkoordinawhom mill-qrib u għandhom iqisu
l-politiki ekonomiċi tagħhom bħala kwistjoni ta' interess komuni
ħalli jiżdiedu kemm jista' jkun l-effetti pożittivi filwaqt li
jixxejnu l-effetti negattivi. Għandhom isiru riformi fis-sistema
soċjali u tas-suq tax-xogħol ħalli jitħeġġu
t-tkabbir u l-impjiegi, filwaqt li jkun żgurat aċċess għal
kulħadd għal servizzi soċjali u benefiċċji li jkunu
ta' kwalità tajba ħafna, affordabbli u sostenibbli. Għandha
tittieħed azzjoni fil-qasam tar-riformi fis-suq tax-xogħol, fosthom
b'mekkaniżmi tal-iffissar tal-pagi, li tkun konformi mal-gwida fid-dettall
li hemm aktar fil-linji gwida għall-impjiegi[1]. B'azzjonijiet fuq
il-migrazzjoni legali l-Unjoni għandha ssir destinazzjoni attraenti
għat-talent u l-ħiliet. Għandhom jissoktaw ir-riformi u aktar
integrazzjoni fis-swieq tal-prodotti ħalli jkun żgurat li
l-konsumaturi u n-negozji tal-Unjoni jkollhom prodotti u servizzi bi prezzijiet
orħos u varjetà usa'. Bi swieq integrati aħjar, il-kumpaniji jkollhom
aċċess għal suq ferm akbar mis-suq domestiku tagħhom, u
b'hekk ikollhom aktar opportunitajiet biex jikbru. Għax jekk is-swieq
tal-prodotti jkunu aktar kompetittivi u integrati aħjar, dawn jgħinu
biex fejn jidħlu x-xokkijiet ekonomiċi, l-aġġustament isir
aktar malajr u tiżdied ir-reżiljenza. Għandhom jitkomplew l-isforzi li
jissimplifikaw l-ambjent regolatorju fejn joperaw l-intrapriżi, fosthom
l-oħrajn billi tiġi modernizzata l-amministrazzjoni pubblika,
tiżdied it-trasparenza, issir ġlieda kontra l-korruzzjoni,
l-evażjoni tat-taxxa u x-xogħol bla ktieb, jitjiebu l-indipendenza,
il-kwalità u l-effiċjenza tas-sistemi ġudizzjarji, u kif ukoll
permezz ta' infurzar tal-kuntratti u oqfsa ta' insolvenza li jkunu jaħdmu
tajjeb. It-teknoloġiji tal-informazzjoni u
tal-komunikazzjoni u l-ekonomija diġitali huma xprun importanti
għall-produttività, l-innovazzjoni u t-tkabbir fis-setturi kollha
tal-ekonomija. Filwaqt li jitħeġġeġ l-investiment privat
fir-riċerka u l-innovazzjoni għandhom isiru riformi mill-qiegħ
biex jiġu modernizzati s-sistemi tar-riċerka u tal-innovazzjoni,
titjieb il-koperazzjoni bejn l-istituzzjonijiet pubbliċi u s-settur
privat, u jitjiebu l-kundizzjonijiet tal-qafas usa’ ħalli l-kumpaniji
jissaħħu fl-għarfien. Jekk titjieb il-kwalità tal-investimenti
pubbliċi fir-riċerka u l-innovazzjoni, tkompli titjieb il-kwalità
tal-finanzi pubbliċi. Linja gwida 3: Inxejnu l-ostakli ewlenin
għat-tkabbir u l-impjiegi fil-livell tal-Unjoni Sabiex l-Ewropa tibqa' lok attraenti
għan-negozji domestiċi u barranin hemm bżonn li tkompli ssir
integrazzjoni tas-Suq Uniku, tiżdied il-kompetizzjoni u jitjieb l-ambjent
tan-negozju. Filwaqt li biex jitwessa' l-limitu tal-produttività tal-Ewropa
hemm bżonn li jiżdiedu l-innovazzjoni u l-kapital uman u li jkun
żgurat Suq Uniku Diġitali integrat u jaħdem tajjeb. Jekk
in-negozji u l-konsumaturi jużaw aktar it-teknoloġiji
tal-informazzjoni u tal-komunikazzjoni, dan jgħin biex tissawwar Ewropa
diġitali mingħajr fruntieri u tiżdied il-produttività. Għax settur finanzjarju li jaħdem
sew hu kruċjali biex l-ekonomija timxi bla skossi. Fil-qasam tas-swieq
finanzjarji u l-istituzzjonijiet finanzjarji għandhom jitwettqu
għalkollox id-dispożizzjonijiet regolatorji u ta' superviżjoni
msaħħa u l-protezzjoni għall-konsumaturi. Filwaqt li għandhom
jittieħdu miżuri biex fl-Ewropa jinbena suq tat-titolizzazzjoni
b'saħħtu għax dan itejjeb il-kapaċità ta' finanzjament
effettiv tal-banek tal-Unjoni. Għandha ssir ħidma msejsa fuq
il-kisbiet tas-suq uniku għas-servizzi finanzjarji u l-kapital ħalli
tinħoloq Unjoni tas-Swieq tal-Kapitali ġenwina li hija tant
meħtieġa. Li tinħoloq Unjoni tal-Enerġija
b'saħħitha għandu jiżgura enerġija affordabbli, sigura
u sostenibbli lin-negozji u lill-unitajiet domestiċi. Għandu
jitwettaq il-qafas tal-2030 għall-klima u l-enerġija u ssir
it-tranżizzjoni għal ekonomija effiċjenti fir-riżorsi u
b'livell baxx ta' emissjonijiet tal-karbonju, inklużi r-riformi
min-naħa tad-domanda u tal-provvista. F'dan ir-rigward, is-settur
tal-enerġija u tat-trasport jeħtieġ attenzjoni partikolari. Il-leġiżlazzjoni tal-Unjoni għandha
tiffoka fuq dawk il-kwistjonijiet li jistgħu jiġu indirizzati bl-aqwa
mod fil-livell Ewropew, u għandha titfassal b'tali mod li tqis l-impatt
ekonomiku, ambjentali u soċjali tagħhom. Jekk jinħolqu
kundizzjonijiet ekwi bejn il-fruntieri, b'aktar prevedibbiltà regolatorja u
f'konformità sħiħa mar-regoli tal-kompetizzjoni, dawn ikomplu
jattiraw l-investiment. Ambjent tan-negozju aħjar u aktar prevedibbli hu
partikolarment importanti għal industriji li jużaw netwerk għax
dawn iħarsu lejn investimenti fit-tul u jagħmlu investimenti inizjali
fuq skala kbira. Għandha tiġi żviluppata aktar id-dimensjoni
esterna tas-suq intern. Linja gwida 4: Intejbu s-sostenibbiltà u
x-xejra favorevoli għat-tkabbir tal-finanzi pubbliċi Għat-tkabbir u l-ħolqien
tal-impjiegi neħtieġu finanzi pubbliċi stabbli. Is-sostenibbiltà
fiskali hija essenzjali biex ikunu żgurati l-fiduċja tal-investituri
u l-ispazju fiskali meħtieġ biex jingħelbu l-iżviluppi mhux
mistennija u jiżdied kemm jista' jkun l-effett pożittiv li
jħallu l-finanzi pubbliċi fuq l-ekonomija. L-Istati Membri
għandhom jiżguraw kontroll fit-tul fuq il-livelli tad-defiċit u
tad-dejn. Il-politiki fiskali għandhom jitmexxew fi ħdan il-qafas
tal-Unjoni bbażat fuq ir-regoli u magħhom għandhom isiru
arranġamenti baġitarji nazzjonali sodi. Il-politiki fiskali
għandhom jirriflettu l-kundizzjonijiet ekonomiċi u r-riskji
tas-sostenibbiltà fil-livell ta' Stat Membru, filwaqt li jkunu jiżguraw li
ssir koordinazzjoni tajba tal-politiki ekonomiċi u qagħda fiskali
koerenti madwar l-Unjoni u ż-żona tal-euro, u meta jkun disponibbli,
iħaddmu l-ispazju fiskali biex jappoġġaw it-tkabbir u
l-investiment. Waqt li jkunu qed ifasslu u jwettqu
l-konsolidazzjoni baġitarja, l-istrateġiji għandhom jagħtu
prijorità lil partiti tan-nefqa li jżidu t-tkabbir f'oqsma
bħall-edukazzjoni, il-ħiliet u l-impjegabbiltà, ir-riċerka u
l-iżvilupp u l-innovazzjoni u l-investiment f'netwerks b'impatti
pożittivi fuq il-produttività, bħal ngħidu aħna l-internet
b'veloċità għolja, l-interkonnessjonijiet tal-enerġija u tat-trasport,
u l-infrastruttura. Ir-riformi fin-nefqa għandhom jimmiraw li jtejbu
l-effiċjenza tal-amministrazzjoni pubblika. Dawn ir-riformi jistgħu
jitħejjew b'mod partikolari b'analiżi tal-infiq bil-ħsieb li
tkun żgurata s-sostenibbiltà fit-tul. Ir-riformi fl-infiq li jippromwovu
allokazzjoni effiċjenti tar-riżorsi biex jiġu
appoġġati t-tkabbir u l-impjiegi filwaqt li tinżamm l-ekwità
għandhom jiġu kumplimentati b'titjib fis-sistemi tad-dħul.
Għandhom tibqa' titħaddem il-bażi għat-taxxa korporattiva
konsolidata komuni. Jekk tonqos it-tassazzjoni fuq ix-xogħol, filwaqt li
tkun żgurata n-newtralità baġitarja li tistrieħ aktar fuq taxxi
fuq il-konsum, taxxi rikorrenti fuq il-proprjetà immobbli u taxxi ambjentali,
dan ikun ta' għajnuna biex jissewwew l-ineffiċjenzi tas-suq u
jitħejjew is-sisien għal rati sostnuti ta' tkabbir u l-ħolqien
tal-impjiegi. L-effiċjenza fis-sistema tat-taxxa tista' titjieb billi
jitwessgħu l-bażijiet tat-taxxa, bħal pereżempju meta
jitneħħew jew jitnaqqsu l-użu u l-ġenerożità
tal-eżenzjonijiet u r-reġimi preferenzjali, u billi
tissaħħaħ l-amministrazzjoni tat-taxxa, tiġi ssimplifikata
s-sistema tat-taxxa u ssir ġlieda kontra l-frodi tat-taxxa u l-ippjanar
aggressiv tat-taxxa. [1] [Insert cross reference to EG]