EUR-Lex Access to European Union law
This document is an excerpt from the EUR-Lex website
Document 52012SC0073
COMMISSION STAFF WORKING PAPER EXECUTIVE SUMMARY OF THE IMPACT ASSESSMENT
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT
/* SEG/2012/073 final */
DOKUMENT TA’ ĦIDMA TAL-PERSUNAL TAL-KUMMISSJONI SOMMARJU EŻEKUTTIV TAL-VALUTAZZJONI TAL-IMPATT /* SEG/2012/073 final */
DOKUMENT TA’ ĦIDMA TAL-PERSUNAL
TAL-KUMMISSJONI SOMMARJU EŻEKUTTIV TAL-VALUTAZZJONI
TAL-IMPATT Li jakkumpanja d-dokument Ir-Regolament tal-Parlament Ewropew u
tal-Kunsill dwar il-protezzjoni ta' individwi fir-rigward tal-ipproċessar
ta’ dejta personali u dwar il-moviment liberu ta’ dik id-dejta
u
Id-Direttiva tal-Parlament Ewropew u tal-Kunsill dwar il-protezzjoni ta’
individwi fir-rigward tal-ipproċessar ta’ dejta personali
mill-awtoritajiet kompetenti għall-finijiet ta’ prevenzjoni,
investigazzjoni, sejbien jew prosekuzzjoni ta’ reati kriminali jew
l-eżekuzzjoni ta’ pieni kriminali, u l-moviment liberu ta’ dik id-dejta
1.
Introduzzjoni
Sa mill-adozzjoni,
fl-1995, tal-qafas legali ta' bħalissa tal-UE dwar il-protezzjoni
tad-dejta, seħħew żviluppi rapidi fit-teknoloġija u
fin-negozju li ħolqu sfidi ġodda għall-protezzjoni tad-dejta
personali. Id-daqs tal-kondiviżjoni u tal-ġbir tad-dejta żdied
b'mod drammattiku. It-teknoloġija tippermetti kemm lill-kumpaniji privati
kif ukoll lill-awtoritajiet pubbliċi biex jużaw dejta personali fuq
skala mingħajr preċedent biex iwettqu l-attivitajiet tagħhom.
In-nies qegħdin dejjem aktar jagħmlu disponibbli l-informazzjoni
personali tagħhom pubblikament u globalment, mingħajr ma jkunu jafu
kompletament ir-riskji involuti. Il-bini
tal-fiduċja fl-ambjent onlajn huwa importanti ħafna
għall-iżvilupp ekonomiku. In-nuqqas ta' fiduċja
jġiegħel lill-konsumaturi joqgħdu lura milli jixtru onlajn u
milli jadottaw servizzi ġodda, inklużi servizzi pubbliċi
tal-e-government. Jekk dan in-nuqqas ta' fiduċja ma jiġix indirizzat,
se jibqa' jnaqqas ir-ritmu tal-iżvilupp tal-użi innovattivi
tat-teknoloġiji l-ġodda, se jaġixxi bħala xkiel
għat-tkabbir ekonomiku u se jimblokka s-settur pubbliku milli jgawdi
mill-benefiċċji potenzjali tad-diġitizzazzjoni tas-servizzi
tiegħu. Barra minn hekk,
it-Trattat ta' Lisbona waqqaf, permezz tal-Artikolu 16 tat-TFUE, bażi
legali ġdida għal approċċ modernizzat u komprensiv dwar
il-protezzjoni tad-dejta u l-moviment ħieles tad-dejta personali, li
tkopri wkoll il-koperazzjoni tal-pulizija u ġudizzjarja f'materji
kriminali.
2.
Id-Definizzjoni tal-Problema
Il-valutazzjoni
tal-impatt tippreżenta u tanalizza tliet oqsma problematiċi ewlenin:
2.1.
Problema 1: Il-barrieri għan-negozju u
għall-awtoritajiet pubbliċi minħabba l-frammentazzjoni,
l-inċertezza legali u l-infurzar inkonsistenti
Minkejja l-għan tad-Direttiva li
tiżgura livell wieħed fl-UE kollha kemm hi għall-protezzjoni
tad-dejta, xorta jifdal diverġenza konsiderevoli fir-regoli fl-Istati
Membri. Bħala konsegwenza, jista’ jagħti l-każ li l-kontrolluri
tad-dejta jkollhom jittrattaw ma' 27 liġi nazzjonali u rekwiżiti
differenti fl-UE. Ir-riżultat huwa ambjent legali frammentat li ħoloq
inċertezza legali u protezzjoni inugwali għall-individwi. Dan
ħoloq kostijiet bla bżonn u piżijiet amministrattivi (li
jammontaw għal madwar EUR 3 biljun fis-sena
fix-xenarju bażi) għan-negozji u jikkostitwixxi diżinċentiv
għall-intrapriżi, inklużi l-SMEs, li joperaw fis-suq uniku li
jixtiequ li jespandu l-operati tagħhom fil-livell transkonfinali. Barra minn hekk, ir-riżorsi u
s-setgħat tal-awtoritajiet nazzjonali responsabbli għall-protezzjoni
tad-dejta jvarjaw b'mod konsiderevoli bejn l-Istati Membri. F'ċerti
każi dan ifisser li mhumiex kapaċi jeżegwixxu b'mod sodisfaċenti
l-kompiti tagħhom ta' infurzar. Il-koperazzjoni bejn dawn l-awtoritajiet
fil-livell Ewropew – permezz tal-Grupp Konsultattiv eżistenti (Grupp ta'
Ħidma tal-Artikolu 29) – mhux dejjem twassal għal infurzar
konsistenti u għaldaqstant jeħtieġ ukoll li titjieb.
2.2.
Problema 2: Diffikultajiet għall-individwi
biex iżommu l-kontroll tad-dejta personali tagħhom
Minħabba n-nuqqas ta' armonizzazzjoni
fil-leġiżlazzjonijiet nazzjonali dwar il-protezzjoni tad-dejta u
s-setgħat diverġenti tal-awtoritajiet nazzjonali
għall-protezzjoni tad-dejta, huwa aktar diffiċli għall-individwi
biex jeżerċitaw id-drittijiet tagħhom f'ċerti Stati Membri
milli f'oħrajn, b'mod speċjali fil-kuntesti onlajn. L-individwi tilfu wkoll il-kontroll fuq
id-dejta tagħhom stess, minħabba l-volum sostanzjali tad-dejta li
qiegħda tiġi kondiviża kuljum, u l-fatt li bosta drabi mhumiex
kompletament konxji li d-dejta tagħhom qiegħda tinġabar.
Minkejja li ħafna Ewropej iqisu li l-iżvelar tad-dejta personali
qiegħed isir dejjem aktar parti mill-ħajja moderna[1], 72% ta' dawk li jużaw
l-internet fl-Ewropa xorta għadhom imħassbin li qegħdin jintalbu
wisq dejta personali onlajn, u bosta drabi ma jkunux jafu kif
jeżerċitaw id-drittijiet tagħhom onlajn.
2.3.
Problema 3: Lakuni u inkonsistenzi fil-protezzjoni
tad-dejta personali fil-qasam tal-koperazzjoni ġudizzjarja u bejn
il-pulizija fi kwistjonijiet kriminali
Il-kamp ta'
applikazzjoni tad-Direttiva, li hija msejsa fuq il-bażi legali tas-suq
intern, eskluda b'mod speċifiku l-koperazzjoni ġudizzjarja u bejn
il-pulizija fi kwistjonijiet kriminali. Id-Deċiżjoni Qafas adottata
fl-2008 biex jiġi rregolat l-ipproċessar tad-dejta fil-qasam
tal-koperazzjoni ġudizzjarja u bejn il-pulizija fi kwistjonijiet kriminali
tirrifletti l-ispeċifiċitajiet tal-istruttura
"tal-pilastri" tal-UE ta' qabel it-Trattat ta' Lisbona u hija
kkaratterizzata minn kamp ta' applikazzjoni limitat u bosta lakuni
oħrajn, li bosta drabi jwasslu għal inċertezza legali
għall-individwi u għall-awtoritajiet tal-infurzar tal-liġi, kif
ukoll għal diffikultajiet prattiċi ta' implimentazzjoni. Barra minn
hekk, id-Deċiżjoni Qafas tipprovdi għal possibbiltajiet
wesgħin li jkun hemm deroga tal-prinċipji ġenerali
tal-protezzjoni tad-dejta fil-livell nazzjonali, u b'hekk ma jistax ikun hemm
armonizzazzjoni tagħhom. Dan mhux biss jirriskja li jinvalida tali
prinċipji mill-fini propja tagħhom – u b'hekk jolqot b'mod negattiv
id-drittijiet fundamentali tal-individwi fir-rigward tal-protezzjoni tad-dejta
personali tagħhom f'dan il-qasam – iżda jfixkel ukoll l-iskambju bla
xkiel tad-dejta personali bejn l-awtoritajiet nazzjonali relevanti.
3.
Analiżi tas-Sussidjarjetà u
tal-Proporzjonalità
Fid-dawl
tal-problemi deskritti hawn fuq, l-analiżi tas-sussidjarjetà tindika
l-ħtieġa ta' azzjoni fil-livell tal-UE abbażi
tar-raġunijiet li ġejjin: ·
Id-dritt għall-protezzjoni tad-dejta personali
jinsab fl-Artikolu 8 tal-Karta tad-Drittijiet Fundamentali.
L-Artikolu 16 tat-TFUE huwa l-bażi legali għall-adozzjoni
tar-regoli tal-UE dwar il-protezzjoni tad-dejta ; ·
Id-dejta personali tista' tiġi trasferita lil
hinn mill-fruntieri nazzjonali, kemm dawk interni tal-UE kif ukoll lil
pajjiżi terzi, b'rati li qegħdin jiżdiedu b'mod rapidu. Barra
minn hekk, hemm sfidi prattiċi fir-rigward tal-infurzar
tal-leġiżlazzjoni tal-protezzjoni tad-dejta u ħtieġa
għall-koperazzjoni bejn l-Istati Membri u l-awtoritajiet tagħhom, li
jeħtieġ li tiġi organizzata fil-livell tal-UE biex jiġu
żgurati l-koerenza u l-livell għoli tal-protezzjoni li huma
meħtieġa fl-Unjoni; ·
Fis-sitwazzjoni ta' bħalissa l-Istati Membri
ma jistgħux inaqqsu l-problemi waħedhom. B'mod partikolari, dan huwa
l-każ għal dawk il-problemi li jinqalgħu minħabba
l-frammentazzjoni fil-leġiżlazzjonijiet nazzjonali li jimplimentaw
il-qafas regolatorju tal-UE dwar il-protezzjoni tad-dejta; ·
Filwaqt li huwa possibbli għall-Istati Membri
li jdaħħlu fis-seħħ politiki li jiżguraw li ma
jinkisirx dan id-dritt, dan mhuwiex se jinkiseb b'mod uniformi fin-nuqqas ta'
regoli komuni tal-UE u se joħloq restrizzjonijiet fuq il-flussi
transkonfinali tad-dejta personali. L-azzjonijiet previsti
huma proporzjonati peress li qegħdin fil-kamp ta'
applikazzjoni tal-kompetenzi tal-Unjoni kif definiti fit-Trattat u huma
meħtieġa biex jiżguraw uniformità tal-applikazzjoni
tal-leġiżlazzjoni tal-UE, u biex jiżguraw protezzjoni effettiva
u indaqs tad-drittijiet fundamentali tal-individwi. Azzjoni fil-livell tal-UE
hija essenzjali biex jissokta l-iżgurar tal-kredibbiltà u livell
għoli tal-protezzjoni tad-dejta f'dinja globalizzata, filwaqt li
tinżamm iċ-ċirkolazzjoni bla xkiel tad-dejta. It-tħaddim xieraq
tas-suq intern jitlob li d-dispożizzjonijiet jiżguraw livell indaqs
għall-operaturi ekonomiċi.
4.
L-għanijiet
It-tliet għanijiet prinċipali
tal-politika huma li: ·
tissaħħaħ id-dimensjoni tas-suq
intern tal-protezzjoni tad-dejta, billi titnaqqas
il-frammentazzjoni, tissaħħaħ il-konsistenza u jiġi
simplifikat l-ambjent regolatorju, biex b'hekk jitneħħew
kostijiet bla bżonn u jitnaqqas il-piż amministrattiv; ·
tiżdied l-effikaċja tad-dritt
fundamentali fir-rigward tal-protezzjoni tad-dejta u li l-individwi jikkontrollaw
id-dejta tagħhom; ·
tissaħħaħ il-koerenza tal-qafas
tal-UE dwar il-protezzjoni tad-dejta, inkluż
fil-qasam tal-koperazzjoni tal-pulizija u ġudizzjarja f'materji kriminali,
filwaqt li jitqies bis-sħiħ id-dħul fis-seħħ
tat-Trattat ta' Lisbona.
5.
L-Għażliet ta' Politika
5.1.
Għażla 1: Azzjoni li ma torbotx
Din l-għażla tikkonsisti
primarjament minn Komunikazzjonijiet interpretattivi mill-Kummissjoni,
għodda u finanzjament għall-appoġġ tekniku – kif ukoll inkoraġġiment
ta' standardizzarzzjoni u ta' awtoregolamentazzjoni – biex
tissaħħaħ l-implimentazzjoni prattika tar-regoli eżistenti
mill-kontrolluri tad-dejta u titqajjem is-sensibilizzazzjoni individwali.
Il-Kummissjoni tipproponi biss emendi leġiżlattivi li huma
limitati ħafna biex tikkjarifika l-kunċetti eżistenti
tad-Direttiva u tiffoka fuq kwistjonijiet speċifiċi li ma
jistgħux jiġu indirizzati b'mod effettiv b'xi mod ieħor. Din
l-għażla ta' politika tista' tkun relevanti biss
għall-problemi 1 u 2. Il-bidliet leġiżlattivi limitati
jintroduċu b'mod espliċitu l-prinċipji ta' trasparenza u ta'
minimizzar tad-dejta, kif ukoll bħala bażi legali
għar-"Regoli Korporattivi Vinkolanti" għat-trasferimenti
internazzjonali.
5.2.
Għażla 2: Qafas legali
aġġornat
Il-Kummissjoni tippreżenta proposti
leġiżlattivi biex tarmonizza aktar ir-regoli sostantivi,
tikkjarifika d-dispożizzjonijiet speċifiċi, u tindirizza
inkonsistenzi kkawżati minn approċċi differenti fl-Istati
Membri. Dawn il-proposti jindirizzaw il-problemi 1 u 2 hekk kif
dawn, minn naħa waħda, jiffaċilitaw il-flussi tad-dejta fl-UE
u mill-UE lejn pajjiżi terzi u, min-naħa l-oħra, jikkjarifikaw
u jsaħħu d-drittijiet individwali (pereżempju, id-dritt
għall-aċċess, "id-dritt li jintesew", modalitajiet
aktar ċari għall-kunsens u għan-notifika ta' ksur tad-dejta)
u jsaħħu r-responsabbiltà – u "obbligu ta' rendikont" –
tal-kontrolluri u tal-proċessuri tad-dejta (pereżempju billi
jintroduċu l-obbligu li jinħatru Uffiċjali tal-Protezzjoni
tad-Data - UPD jew iwettqu Valutazzjonijiet tal-Impatt tal-Protezzjoni
tad-Dejta - VIPD). Din l-għażla tistabbilixxi, b'mod
partikolari, "one stop shop" għall-kontrolluri tad-dejta
(jiġifieri, liġi unika u APD (Awtorità tal-Protezzjoni tad-Dejta)
unika responsabbli). Ir-rekwiżiti ġenerali ta' notifika jiġu
simplifikati (jiġifieri "reġistrazzjoni bażika").
Issaħħaħ wkoll l-indipendenza tal-AtPD (Awtoritajiet
tal-Protezzjoni tad-Dejta) u tarmonizza s-setgħat tagħhom. Il-koperazzjoni
u l-assistenza reċiproka bejn l-AtPD tista' tissaħħaħ,
inkluża permezz ta' "mekkaniżmu ġdid ta'
konsistenza" li jinvolvi kemm "Bord Ewropew tal-Protezzjoni
tad-Dejta"- li għadu kemm ġie stabbilit – u l-Kummissjoni. Fir-rigward tal-protezzjoni tad-dejta
fil-qasam tal-koperazzjoni tal-pulizija u ġudizzjarja f'materji kriminali
(problema 3), il-Kummissjoni tippreżenta proposti biex tissostitwixxi
d-Deċiżjoni Qafas bi strument ġdid b'kamp ta' applikazzjoni
estiż u tindirizza l-lakuni u n-nuqqassijiet l-aktar importanti,
sabiex issaħħaħ id-drittijiet tal-individwi u tiffaċilità
l-koperazzjoni bejn l-awtoritajiet tal-infurzar tal-liġi, filwaqt li tqis
l-ispeċifiċitajiet tas-settur tal-infurzar tal-liġi.
5.3.
Għażla 3: Regoli legali
dettaljati fil-livell tal-UE
Din l-għażla tinkludi bosta
mill-elementi tal-Għażla 2 kif ukoll leġiżlazzjoni
tal-UE ħafna aktar dettaljata, inkluża waħda settorjali
(pereżempju, fis-settur tas-saħħa u dak mediku), u struttura
ta' infurzar ċentralizzata fil-livell tal-UE (jiġifieri,
l-istabbiliment ta' Awtorità tal-UE għall-Protezzjoni tad-Dejta). Din tkun
tinvolvi wkoll it-tneħħija tar-rekwiżiti ġenereali ta'
notifika (għajr għal kontroll preċedenti ta' pproċessar
riskjuż), l-istabbiliment ta' skema pan-Ewropea ta’ ċertifikazzjoni
fir-rigward il-proċessi u l-prodotti li jikkonformaw mal-protezzjoni
tad-dejta u d-definizzjoni ta' sanzjonijiet kriminali armonizzati pan-Ewropej
fir-rigward tal-ksur tar-regoli dwar il-protezzjoni tad-dejta. Il-kunsens ikun
definit bħala "r-raġuni ewlenija"
għall-ipproċessar tad-dejta. Fir-rigward tal-koperazzjoni tal-pulizija u
dik ġudizzjarja f'materji kriminali, flimkien mal-miżuri sostantivi
skont l-għażla 2, din tkun tinkludi l-istabbiliment ta' regoli
dettaljati għad-dritt tal-aċċess għall-individwi (dejjem
dirett). Dan ikun jinvolvi wkoll l-emendar tad-dispożizzjonijiet
relevanti tal-istrumenti eżistenti kollha li qabel kienu tat-tielet
pilastru, biex jiġu allineati kollha kemm huma mar-regoli armonizzati
ġodda u estiżi.
6.
Valutazzjoni tal-Impatti
6.1.
Għażla ta' Politika 1: Azzjoni li ma
torbotx
Komunikazzjonijiet Interpretattivi
tal-Kummissjoni fir-rigward tad-dispożizzjonijiet tad-Direttiva ma jkunux
jorbtu u għaldaqstant ikollhom biss impatt limitat fuq it-tnaqqis
tal-inċertezza legali u tal-kostijiet. Aktar awtoregolamentazzjoni
fil-livell tal-UE tista' tgħin biex tipprovdi aktar ċarezza
ġudizzjarja għall-kontrolluri tad-dejta f'setturi
speċifiċi, iżda mhijiex se tkun biżżejjed biex
tinkiseb applikazzjoni effettiva u konsistenti tar-regoli fin-nuqqas ta' qafas
legali tal-UE enfasizzat b'mod ċar u armonizzat. Kampanji ta' sensibilizzazzjoni jgħinu
lin-nies biex ikunu jafu aħjar id-drittijiet
tagħhom dwar il-protezzjoni tad-dejta u jifhmu aħjar il-mezzi
prattiċi biex ikunu jistgħu jeżreċitawhom. Madankollu, dan ma
jkunx biżżejjed għall-individwi biex jasserixxu d-drittijiet
tagħhom fejn tali drittijiet ma jkunux definiti b'mod ċar
fil-liġi. Il-kjarifikazzjonijiet leġiżlattivi li
jirrigwardaw il-prinċipji ta' trasparenza, il-minimizzazzjoni tad-dejta,
l-adegwatezza u l-BCRs jżidu l-armonizzazzjoni u
ċ-ċertezza legali għall-individwi u għan-negozji. Fir-rigward tal-infurzar, il-Komunikazzjonijiet tal-Kummissjoni mhumiex se jegħlbu
l-eżitazzjoni tal-Istati Membri biex ibidlu r-regoli nazzjonali biex
jagħtu aktar indipendenza u setgħat armonizzati lill-AtPD.
It-tisħiħ tal-koordinazzjoni permezz tal-Grupp ta' Ħidma
tal-Artikolu 29 u tal-iskambji bejn l-AtPD ikollhom impatt pożittiv
fuq tisħiħ aktar konsistenti tar-regoli; madankollu, id-diverġenzi
li għad hemm fil-liġijiet nazzjonali u fl-interpretazzjoni
tagħhom jillimitaw l-effett ta' koperazzjoni mtejba bejn l-AtPD. L-impatti finanzjarji u ekonomiċi
mistennija ta' din l-għażla ta' politika huma limitati u l-parti l-kbira tal-problemi identifikati jibqgħu mhux solvuti.
6.2.
Għażla ta' Politika 2: Qafas legali
aġġornat
L-inċertezza
legali għall-kumpaniji privati u
għall-awtoritajiet pubbliċi se titnaqqas b'mod sinifikanti.
Id-dispożizzjonijiet problematiċi se jiġu kkjarifikati u
l-konsistenza se tiżdied minħabba l-marġini mnaqqas
tal-interpretazzjoni, u l-miżuri ta' implimentazzjoni u/jew l-atti
delegati adottati mill-Kummissjoni. Is-sostituzzjoni tan-notifika ġenerali
tal-attivitajiet għall-ipproċessar tad-dejta permezz ta' sistema
ta' 'reġistrazzjoni' armonizzata simplifikata, filwaqt li
jinżammu l-kontrolli preċedenti fir-rigward tad-dejta sensittiva u
tal-ipproċessar riskjuż, se tnaqqas il-piż tal-kontrolluri
tad-dejta minn obbligu implimentat bħalissa b'mod diverġenti.
It-tisħiħ tar-responsabbiltà tal-kontrolluri tad-dejta u
tal-proċessuri tad-dejta permezz tal-introduzzjoni tal-UPD (Uffiċjali
għall-Protezzjoni tad-Data) u tal-VIPD – f'ċerti każijiet u
permezz ta' limiti definiti b'mod ċar u preċiżi - u permezz
tal-introduzzjoni tal-prinċipju tal-protezzjoni tad-dejta se joffru mezzi
eħfef biex tiġi żgurata u tintwera konformità. L-ikkjarifikar u l-issimplifikar tar-regoli
billi tiġi identifikata liġi unika applikabbli fl-UE kollha u
l-istabbiliment ta' "one-stop shop" għas-superviżjoni
tal-protezzjoni tad-dejta se jsaħħu s-suq intern, inkluż permezz tat-tneħħija tad-differenzi
fil-formalitajiet amministrattivi tal-AtPD. Dan se jippermetti għal iffrankar
globali, purament f'termini ta' piż amministrattiv, ta' madwar EUR 2.3 biljun
fis-sena. Il-konsistenza tat-tisħiħ se
tiġi inkuraġġita ukoll
bit-tisħiħ u bl-armonizzar tas-setgħat tal-AtPD u se toħloq
koperazzjoni b'saħħitha u mekkaniżmu ta' għajnuna
reċiproka għal każijiet b'dimensjoni tal-UE, u tarmonizza reati
suġġetti għas-sanzjonijiet amministrattivi. Obbligu armonizzat pan-Ewropew biex ikun
hemm notifika fil-każ tal-ksur tad-dejta se
jipproteġi aħjar lill-individwi, jiżgura konsistenza fis-setturi
kollha kemm huma u jevita żvantaġġi kompetittivi. Id-drittijiet tas-suġġetti
tad-dejta u l-kontroll tal-individwi fuq id-dejta tagħhom
tissaħħaħ b'mod sinifikanti
bl-introduzzjoni ta’ drittijiet ġodda u bit-titjib u bl-ikkjarifikar
ulterjuri ta' dawk eżistenti. It-tfal se jibbenefikaw mill-miżuri li
jindirizzaw b'mod speċifiku l-vulnerabbiltà tagħhom.
L-assoċjazzjonijiet se jkollhom kamp ta' applikazzjoni akbar biex
jappoġġaw lis-suġġetti tat-dejta fl-eżerċizzju
tad-drittijiet tagħhom, inkluż fl-azzjoni quddiem il-qrati. L-applikar tal-prinċipji ġenerali
dwar il-protezzjoni tad-dejta fil-qasam tal-koperazzjoni tal-pulizija u dik
ġudizzjarja f'materji kriminali
jsaħħaħ il-koerenza ġenerali tal-qafas tal-UE dwar
il-protezzjoni tad-dejta, filwaqt li jirrispetta l-ispeċifiċitajiet
inerenti tal-infurzar tal-liġi. Id-drittijiet tal-individwi, b'mod
partikolari, jissaħħu billi jiġi estiż il-kamp ta'
applikazzjoni tar-regoli dwar il-protezzjoni tad-dejta f'dan il-qasam
fir-rigward tal-ipproċessar "domestiku", jiġu stabbiliti
l-kondizzjonijiet għall-iżgurar tad-dritt ta' aċċess u
jiġu pprovduti regoli aktar stretti dwar il-limitazzjoni tal-iskop. F'termini ta' impatt finanzjarju u
ekonomiku, l-obbligu għall-operaturi ekonomiċi l-kbar (li
jħaddmu aktar minn 250 ruħ) biex jinnominaw UPD mhuwiex se
joħloq kostijiet sproporzjonati, peress li l-UPD huma diġà komuni
f'dawn il-kumpaniji. Il-kostijiet tal-konformità jkunu jammontaw għal
EUR 320 miljun fis-sena. L-obbligu jkun ikopri segment minimu
neċessarju tal-kontrolluri tad-dejta, minħabba li l-SMEs jiġu
esklużi, bħala regola, minn dan l-obbligu, sakemm l-attivitajiet
tagħhom tal-ipproċessar tad-dejta ma jinkludux riskji sinifikanti
għall-protezzjoni tad-dejta. L-awtoritajiet u l-korpi pubbliċi
jitħallew jaħtru UPD wieħed għal bosta entitajiet
(pereżempju, biex ikopri bosta fergħat, dipartimenti,
uffiċċji), filwaqt li titqies l-istruttura organizzattiva
tagħhom. Is-simplifikazzjoni tar-regoli
għat-trasferimenti internazzjonali (pereżempju, bl-estensjoni tal-kamp
ta' applikazzjoni tar-"Regoli Korporattivi Vinkolanti") jkollha wkoll
impatt pożittiv fuq il-kompetittività internazzjonali tan-negozji tal-UE. It-tisħiħ tal-indipendenza u
tas-setgħat tal-AtPD, flimkien mal-obbligu għall-Istati Membri li
jipprovdulhom biżżejjed riżorsi, ikunu jinkludu kostijiet
addizzjonali għall-awtoritajiet pubbliċi li bħalissa ma
għandhomx is-setgħat u r-riżorsi xierqa. Il-koperazzjoni l-ġdida u
l-mekkaniżmu ta' assistenza reċiproka bejn l-AtPD tinkludi wkoll
kostijiet addizzjonali għad-AtPD nazzjonali u għall-EDPS.
Pereżempju, il-kompiti addizzjonali tal-KEPD biex jipprovdi
lis-segretarjat tal-Bord tal-UE dwar il-Protezzjoni tad-Dejta - li
jissostitwixxi Grupp ta' Ħidma tal-Artikolu 29 - b'mod partikolari l-involviment
fil-mekkaniżmu ta' konsistenza, x'aktarx se jfissru żieda
tar-riżorsi tiegħu ta' bħalissa bi EUR 3 miljun
oħra kull sena bħala medja għall-ewwel sitt snin, inklużi
l-krediti għal għaxar riżorsi umani addizzjonali.
6.3.
Għażla ta' Politika 3: Regoli legali
dettaljati fil-livell tal-UE
Iż-żieda
ta' aktar dispożizzjonijiet legali dettaljati, inklużi dawk
settorjali, lil hinn mill-miżuri li jinsabu fl-għażla 2,
iwasslu għal tnaqqis massimu ta' diverġenzi bejn l-Istati Membri.
Madankollu, jista' jkun li ma jkunx hemm biżżejjed flessibbiltà
għall-Istati Membri biex iqisu l-ispeċifiċitajiet nazzjonali. It-tneħħija
totali tan-notifiki – għajr fil-każ ta' kontrolli preċedenti –
tista' tissimplifika konsiderevolment l-ambjent regolatorju u tnaqqas
il-piż amministrattiv. L-istabbiliment ta' Aġenzija tal-UE
għall-Protezzjoni tad-Dejta jista' jtejjeb konsiderevolment il-konsistenza
tal-infurzar u jsolvi l-inkonsistenzi għal każijiet b'dimensjoni
ċara tal-UE iżda s-setgħat ta' tali aġenzija tal-UE
jistgħu jkunu lil hinn mil-liġi tal-UE. Madankollu, dan jista' jkun
ta' spiża kbira fuq il-baġit tal-UE. Sanzjonijiet kriminali
armonizzati jsaħħu wkoll tisħiħ konsistenti, iżda
jistgħu jintlaqgħu bl-istess mod b'oppożizzjoni qawwija
mill-Istati Membri. Id-drittijiet tas-suġġetti
tad-dejta, inklużi d-drittijiet tat-tfal, jissaħħu ulterjorment,
pereżempju billi tiġi estiża d-definizzjoni ta' dejta sensittiva
biex tinkludi d-dejta tat-tfal, dejta bijometrika u dejta finanzjarja.
L-introduzzjoni ta' dritt għal "azzjonijiet kollettivi" tista’
tippermetti l-immassimizzar tad-drittijiet permezz ta' litigazzjoni.
Tisħiħ addizzjonali tad-drittijiet individwali jkun mistenni
mill-armonizzar tal-livelli tas-sanzjonijiet, inklużi dawk kriminali,
fil-livell tal-UE. Emendi espliċiti tal-istrumenti kollha li
jestendu r-regoli ġenerali tal-protezzjoni tad-dejta fir-rigward tal-qasam
tal-koperazzjoni tal-pulizija u dik ġudizzjarja f'materji kriminali
jkollhom impatt pożittiv f'termini ta' konsistenza u ta' koerenza
tar-regoli f'dan il-qasam u tat-tisħiħ tad-drittijiet tal-individwi.
Madankollu, talli approċċ radikali jista' jiltaqa' ma'
reżistenza min-naħa tal-Istati Membri' u jista' jkun politikament
diffiċli biex jinkiseb.
7.
It-Tqabbil tal-Għażliet
L-Għażla ta' Politika 1 twassal għal livelli baxxi ta' kostijiet tal-konformità u dawk
amministrattivi, b'mod speċjali għall-kontrolluri tad-dejta privata,
hekk kif bosta mill-kostijiet addizzjonali jaqgħu fuq l-awtoritajiet
pubbliċi nazzjonali u tal-UE. Fl-istess ħin ikollha biss impatt
pożittiv limitat fuq il-problemi identifikati u fuq l-ilħuq
tal-għanijiet tal-politika. F'termini ta' fattibbiltà politika, minkejja
li l-proposti mhumiex kontroversjali, din l-għażla ta' politika
x'aktarx taffaċċja reżistenza mill-partijiet interessati
bħala riżultat tal-kamp ta' applikazzjoni limitat tagħha u
l-impatt tagħha fuq il-problemi, u titqies bħala li mhijiex
ambizzjuża biżżejjed. L-Għażla ta' Politika 2 twassal għal tnaqqis sinifikanti
tal-frammentazzjoni u tal-inċertezza legali. Wieħed jista’
jistenna li jkollha impatt akbar fl-indirizzar tal-problemi identifikati u
fl-ilħuq tal-għanijiet ta' politika. Il-bilanċ tal-kostijiet
tal-konformità u dawk amministrattivi assoċjati ma' din l-għażla
ta' politika mistennija jkunu raġonevoli fid-dawl tal-benefiċċji
u tal-iffrankar ta' madwar EUR 2.3 biljun f'piż
amministrattiv kull sena – xi ħaġa li se tkun importanti ħafna
għall-intrapriżi. Din l-Għażla se tiżgura infurzar
ġenerali aħjar u aktar konsistenti. It-tneħħija
tan-notifiki favur 'sistema ta' reġistrazzjoni bażika' aktar
sempliċi tissimplifika wkoll l-ambjent regolatorju u tnaqqas il-piż
amministrattiv. Fir-rigward tal-aċċettazzjoni
mill-partijiet interessati, din l-Għażla ġeneralment tintlaqa'
b'mod pożittiv mill-operaturi ekonomiċi u mill-awtoritajiet
pubbliċi peress li tista' tnaqqas b'mod ġenerali l-kostijiet ta'
konformità, b'mod partikolari dawk marbuta mas-sistema ta' frammentazzjoni ta'
bħalissa. It-tisħiħ tad-drittijiet tal-protezzjoni tad-dejta
jintlaqa' tajjeb mill-komunità tal-protezzjoni tad-dejta u b'mod partikolari mill-AtPD.
Fir-rigward tat-tielet għan ġenerali, din l-għażla
tikkontribwixxi biex jintlaħqu l-għanijiet li jiġu żgurati aktar
koerenza u konsistenza tar-regoli dwar il-protezzjoni tad-dejta
fil-qasam tal-koperazzjoni tal-pulizija u dik ġudizzjarja f'materji
kriminali billi tirrevoka u "tilliżbonizza"
d-Deċiżjoni Qafas, u telimina l-lakuni, b'mod partikolari billi
testendi l-kamp ta' applikazzjoni tagħha lill-ipproċessar
"domestiku". L-Għażla ta' Politika 3 tinkludi l-biċċa l-kbira tal-miżuri fl-Għażla
ta' Politika 2, filwaqt li tkun ħafna aktar mifruxa taħt bosta
aspetti. Għaldaqstant, din ikollha impatt għoli u pożittiv
f'termini kemm tat-tnaqqis tal-kostijiet marbuta mal-frammentazzjoni legali u
kemm tat-tisħiħ tad-drittijiet tal-individwi.. Barra minn hekk,
din timmassimizza l-konsistenza u l-koerenza tar-regoli dwar il-protezzjoni
tad-dejta f'dak li kien it-tielet pilastru u tgħolli l-istandards
tal-protezzjoni tad-dejta f'dak il-kuntest. Madankollu, uħud
mill-miżuri inklużi f'din l-għażla jew għandhom kost
tal-konformità għoli b'mod eżaġerat jew x'aktarx li
jiltaqgħu ma' oppożizzjoni qawwija mill-partijiet interessati. Barra minn hekk, l-emendar simultanju tal-istrumenti
kollha li kienu t-tielet pilastru ikun kumpless ħafna u politikament
kontroversjali. L-Alternattiva Ppreferuta: L-Alternattiva Ppreferuta tikkonsisti mill-Għażla 2 flimkien: –
mat-tneħħija tan-notifika tal-obbligi
mill-Għażla 3, u –
ma’ wħud mill-'miżuri li ma' jorbtux'
mill-Għażla 1: l-inkoraġġiment tat-teknoloġiji
għat-titjib tal-privatezza u tal-iskemi ta' ċertifikazzjoni, u
kampanji ta' sensibilizzazzjoni L-Alternattiva Ppreferuta hija l-aktar
waħda li mistennija tilħaq l-għanijiet ta' politika
mingħajr kostijiet tal-konformità eċċessivi, u bi tnaqqis
konsiderevoli tal-piż amministrattiv. Ir-regoli msaħħin dwar
il-protezzjoni tad-dejta huma mistennija jwasslu għal xi kostijiet
addizzjonali għall-konformità, b'mod partikolari għall-kontrolluri li
jkunu qegħdin jagħmlu attivitajiet riskjużi dwar l-ipproċessar
tad-dejta. Madankollu, skema b’saħħitha għall-protezzjoni
tad-dejta tista' toffri vantaġġ kompetittiv għall-ekonomija
tal-UE, hekk kif il-livell ogħla tal-protezzjoni u l-għadd imnaqqas
mistenni tal-inċidenti u tal-ksur tal-protezzjoni tad-dejta jistgħu
jżidu l-fiduċja tal-konsumatur. Li kumpaniji jintalbu jadottaw
standards għoljin ta' protezzjoni tad-dejta jista' jwassal għal
titjib fuq medda twila ta’ żmien għan-negozji Ewropej, li
jistgħu jsiru mexxejja dinjija fit-teknoloġija għat-tisħiħ
tal-privatezza jew inkella soluzzjonijiet ta' privatezza meqjusa fid-disinn, u
b’hekk jattiraw in-negozji, l-impjiegi u l-kapital lejn l-Unjoni Ewropea. Barra minn hekk, rigward negozji li joperaw
fis-suq intern tal-UE, l-armonizzar imsaħħaħ se jagħmel
l-ipproċessar transkonfinali tad-dejta personali aktar sempliċi u
orħos. Dan huwa mistenni jipprovdi inċentivi konsiderevoli għal
tali negozji biex jespandu b'mod transkonfinali u jgawdu
mill-beneriċċji tas-suq intern, b'effetti ta' ġid kemm
għall-konsumaturi kif ukoll għall-ekonomija Ewropea inġenerali. L-Għażla Ppreferuta tinkludi
soluzzjoni bbilanċjata wkoll fir-rigward tal-problema 3,
minħabba li ssaħħaħ id-drittijiet tal-individwi, telimina
l-lakuni u tnaqqas l-inkonsistenzi fir-rigward tal-protezzjoni tad-dejta
fil-qasam tal-koperazzjoni tal-pulizija u dik ġudizzjarja f'materji
kriminali, filwaqt li tiffaċilità l-koperazzjoni fl-infurzar tal-liġi
u tirrispetta l-ispeċifiċitajiet tas-settur u tal-ħtiġijiet
operattivi tagħha.
8.
Il-Monitoraġġ u l-Evalwazzjoni
Il-monitoraġġ u l-evalwazzjoni
tal-impatt tal-alternattiva ppreferuta se jiffokaw fuq elementi
bħall-użu tal-istrumenti l-ġodda introdotti mir-riformi,
is-setgħat u r-riżorsi tal-AtPD nazzjonali, is-sanzjonijiet
maħruġa għall-ksur tal-liġijiet dwar il-protezzjoni
tad-dejta, iż-żmien u l-kostijiet li l-kontrolluri tad-dejta
jiddedikaw għall-konformità, u l-iżvilupp tal-fiduċja
tal-individwi fil-protezzjoni tad-dejta personali tagħhom fl-ambjent
onlajn. [1] Ara l-Eurobarometru Speċjali 359 –
Attitudnijiet dwar il-Protezzjoni tad-Dejta u l-Identità Elettronika fl-Unjoni
Ewropea, Ġunju 2011, p. 23.