(1)

Is-semikondutturi huma ċentrali għal kwalunkwe apparat diġitali u għat-tranżizzjoni diġitali tal-Unjoni: mill-ismartphones u l-karozzi, sal-applikazzjonijiet u l-infrastrutturi kritiċi fl-oqsma tas-saħħa, tal-enerġija, tal-komunikazzjonijiet u tal-awtomatizzazzjoni u l-biċċa l-kbira tas-setturi industrijali l-oħrajn. Peress li s-semikondutturi huma ċentrali għall-ekonomija diġitali, huma faċilitaturi b’saħħithom għat-tranżizzjoni lejn is-sostenibbiltà u t-tranżizzjoni ekoloġika, u b’hekk jikkontribwixxu għall-objettivi tal-komunikazzjoni tal-Kummissjoni tal-11 ta’ Diċembru 2019 dwar ‘Il-Patt Ekoloġiku Ewropew’. Filwaqt li s-semikondutturi huma essenzjali għall-funzjonament tal-ekonomija tal-lum u s-soċjetà kif ukoll id-difiża u s-sigurtà, l-Unjoni rat tfixkil bla preċedent fil-provvista tagħhom, u l-konsegwenzi ta’ dan huma sinifikanti. It-tfixkil attwali kixef vulnerabbiltajiet fit-tul f’dan ir-rigward, b’mod partikolari dipendenza qawwija fuq pajjiżi terzi f’dak li jikkonċerna l-manifattura u d-disinn taċ-ċipep. L-Istati Membri huma primarjament responsabbli għaż-żamma ta’ bażi industrijali, kompetittiva u sostenibbli b’saħħitha fl-Unjoni li tippromwovi l-innovazzjoni f’firxa sħiħa ta’ ċipep.

(2)

Jenħtieġ li jiġi stabbilit qafas għaż-żieda tar-reżiljenza tal-Unjoni fil-qasam tat-teknoloġiji tas-semikondutturi, li jsaħħaħ l-ekosistema tas-semikondutturi tal-Unjoni billi jnaqqas id-dipendenzi, isaħħaħ is-sovranità diġitali, jistimula l-investiment, isaħħaħ il-kapaċitajiet, is-sigurtà, l-adattabbiltà u r-reżiljenza tal-katina tal-provvista tas-semikondutturi tal-Unjoni, u jżid il-kooperazzjoni fost l-Istati Membri, il-Kummissjoni u s-sħab strateġiċi internazzjonali.

(3)

Dan il-qafas għandu żewġ objettivi ġenerali. L-ewwel objettiv huwa li jiġu żgurati l-kondizzjonijiet meħtieġa għall-kompetittività u għall-kapaċità ta’ innovazzjoni tal-Unjoni, li jiġi żgurat l-aġġustament tal-industrija għal bidliet strutturali minħabba ċikli rapidi ta’ innovazzjoni u l-ħtieġa għal sostenibbiltà, u li tissaħħaħ l-ekosistema fl-Unjoni kollha tas-semikondutturi b’ġabra ta’ għarfien, għarfien espert, riżorsi u b’punti tajbin komuni. It-tieni objettiv, li huwa separat minn u li jikkumplimenta lill-ewwel wieħed, huwa li jittejjeb il-funzjonament tas-suq intern permezz tal-istabbiliment ta’ qafas legali uniformi tal-Unjoni għaż-żieda tar-reżiljenza fit-tul tal-Unjoni u l-kapaċità tagħha li tinnova u tipprovdi sigurtà tal-provvista fil-qasam tat-teknoloġiji tas-semikondutturi bil-ħsieb li tiżdied ir-robustezza sabiex tiġġieled kontra t-tfixkil.

(4)

Jeħtieġ jittieħdu miżuri biex tinbena l-kapaċità u tissaħħaħ l-ekosistema tas-semikondutturi tal-Unjoni f’konformità mal-Artikolu 173(3) tat-Trattat dwar il-Funzjonament tal-Unjoni Ewropea (TFUE). Jenħtieġ li dawk il-miżuri ma jinvolvux l-armonizzazzjoni tal-liġijiet u r-regolamenti nazzjonali. F’dan ir-rigward, l-Unjoni jenħtieġ li ssaħħaħ il-kompetittività u r-reżiljenza tal-bażi teknoloġika u industrijali tas-semikondutturi, filwaqt li ssaħħaħ il-kapaċità tal-innovazzjoni tal-ekosistema tas-semikondutturi tagħha madwar l-Unjoni, tnaqqas id-dipendenza fuq għadd limitat ta’ kumpaniji u ta’ ġeografiji ta’ pajjiżi terzi, u ssaħħaħ il-kapaċità tagħha li tiddisinja u tipproduċi, tinkapsula, tuża mill-ġdid u tirriċikla semikondutturi avvanzati. L-Inizjattiva Ċipep għall-Ewropa (l-“Inizjattiva”) stabbilita b’dan ir-Regolament jenħtieġ li tappoġġa dawk l-għanijiet billi tnaqqas id-distakk bejn il-kapaċitajiet avvanzati ta’ riċerka u innovazzjoni tal-Unjoni u l-isfruttament industrijali sostenibbli tagħhom. L-Inizjattiva jenħtieġ li tippromwovi t-tisħiħ tal-kapaċitajiet biex tippermetti l-integrazzjoni tad-disinn, tal-produzzjoni u tas-sistemi fit-teknoloġiji tas-semikondutturi tal-ġenerazzjoni li jmiss, u jenħtieġ li itejjeb il-kollaborazzjoni fost l-atturi ewlenin madwar l-Unjoni, isaħħaħ il-ktajjen tal-provvista u tal-valur tas-semikondutturi tal-Unjoni, filwaqt li taqdi setturi industrijali ewlenin u toħloq swieq ġodda.

(5)

Minħabba l-ubikwità tas-semikondutturi, in-nuqqasijiet reċenti affettwaw b’mod negattiv direttament jew indirettament lin-negozji madwar l-Unjoni u wasslu għal riperkussjonijiet ekonomiċi qawwija. L-impatt ekonomiku u soċjali wassal għal sensibilizzazzjoni akbar tal-pubbliku u tal-operaturi ekonomiċi u għal pressjoni fuq l-Istati Membri sabiex jindirizzaw id-dipendenzi strateġiċi fir-rigward tas-semikondutturi. Fl-istess ħin, is-settur tas-semikondutturi huwa kkaratterizzat minn interdipendenzi tul il-katina tal-valur, fejn l-ebda ġeografija unika ma tiddomina l-istadji kollha tal-katina tal-valur. Din in-natura transfruntiera hija enfasizzata aktar min-natura tal-prodotti tas-semikondutturi bħala faċilitaturi għall-industriji downstream. Filwaqt li l-manifattura tas-semikondutturi tista’ tkun ikkonċentrata f’xi reġjuni, l-industriji tal-utenti huma mifruxa madwar l-Unjoni. F’dan il-kuntest, is-sigurtà tal-provvista tas-semikondutturi u r-reżiljenza tal-ekosistema tas-semikondutturi jistgħu jiġu indirizzati bl-aħjar mod permezz tal-liġi ta’ armonizzazzjoni tal-Unjoni bbażata fuq l-Artikolu 114 TFUE. Huwa meħtieġ qafas regolatorju koerenti uniku li jarmonizza ċerti kondizzjonijiet għall-operaturi biex iwettqu proġetti speċifiċi li jikkontribwixxu għas-sigurtà tal-provvista u r-reżiljenza tal-ekosistema tas-semikondutturi tal-Unjoni. Barra minn hekk, jenħtieġ li jiġi stabbilit mekkaniżmu koordinat għall-monitoraġġ, l-immappjar strateġiku, il-prevenzjoni tal-kriżijiet u r-rispons għalihom biex jiġu indirizzati n-nuqqasijiet fil-provvista u jiġu pprevenuti l-ostakli għall-unità tas-suq intern, filwaqt li jiġu evitati differenzi fir-rispons fost l-Istati Membri.

(6)

It-tisħiħ tal-infrastruttura kritika u tas-sigurtà tal-Unjoni kif ukoll tat-tmexxija teknoloġika tagħha jirrikjedi kemm ċipep mill-aktar avvanzati u maturi, b’mod partikolari biex setturi strateġiċi jibqgħu validi fil-futur.

(7)

L-ilħuq ta’ dawk l-objettivi jenħtieġ li jkun appoġġat minn mekkaniżmu ta’ governanza. Fil-livell tal-Unjoni, dan ir-Regolament jenħtieġ li jistabbilixxi Bord Ewropew dwar is-Semikondutturi, magħmul minn rappreżentanti tal-Istati Membri u ppresedut mill-Kummissjoni, biex jiffaċilita implimentazzjoni bla xkiel, effettiva u armonizzata ta’ dan ir-Regolament, il-kooperazzjoni u l-iskambju ta’ informazzjoni. Il-Bord Ewropew dwar is-Semikondutturi jenħtieġ li jipprovdi pariri u jassisti lill-Kummissjoni dwar kwistjonijiet speċifiċi, inkluż l-implimentazzjoni konsistenti ta’ dan ir-Regolament, l-iffaċilitar tal-kooperazzjoni fost l-Istati Membri u l-iskambju ta’ informazzjoni dwar kwistjonijiet relatati ma’ dan ir-Regolament. Jenħtieġ ukoll li l-Bord Ewropew dwar is-Semikondutturi jagħti pariri lill-Kummissjoni dwar kooperazzjoni internazzjonali relatata mas-semikondutturi. Il-Bord Ewropew dwar is-Semikondutturi jenħtieġ li jorganizza laqgħat separati għall-kompiti tiegħu skont il-kapitoli differenti ta’ dan ir-Regolament. Il-laqgħat differenti jistgħu jinkludu kompożizzjonijiet differenti tar-rappreżentanti ta’ livell għoli u l-Kummissjoni tista’ tistabbilixxi sottogruppi.

(8)

Minħabba n-natura globalizzata tal-katina tal-provvista tas-semikondutturi, il-kooperazzjoni internazzjonali ma’ pajjiżi terzi hija element importanti biex tinkiseb reżiljenza tal-ekosistema tas-semikondutturi tal-Unjoni. L-azzjonijiet meħuda skont dan ir-Regolament jenħtieġ li jippermettu wkoll lill-Unjoni jkollha rwol aktar b’saħħtu, bħala ċentru ta’ eċċellenza, f’ekosistema ta’ semikondutturi globali u interdipendenti li taħdem aħjar. Għal dak l-għan, jenħtieġ li l-Bord Ewropew dwar is-Semikondutturi jagħti pariri lill-Kummissjoni dwar kwistjonijiet li jikkonċernaw il-koordinazzjoni ta’ dawk l-isforzi u t-tisħiħ tal-kooperazzjoni tul il-katina tal-valur globali tas-semikondutturi bejn l-Unjoni u pajjiżi terzi, filwaqt li jqis, fejn rilevanti, il-fehmiet tal-Alleanza Industrijali dwar il-Proċessuri u t-Teknoloġiji tas-Semikondutturi u ta’ partijiet ikkonċernati oħra.

(9)

F’konformità mal-obbligi internazzjonali u r-rekwiżiti proċedurali applikabbli, l-Unjoni u l-Istati Membri jistgħu jidħlu f’djalogu, inkluż diplomatikament, ma’ sħab strateġiċi internazzjonali li għandhom vantaġġi fl-industrija tas-semikondutturi, bil-ħsieb li jinstabu soluzzjonijiet biex tissaħħaħ is-sigurtà tal-provvista u biex jiġi indirizzat it-tfixkil futur fil-katina tal-provvista tas-semikondutturi, bħal dawk li jirriżultaw minn restrizzjonijiet fuq l-esportazzjoni ta’ pajjiżi terzi, u biex tiġi identifikata d-disponibbiltà tal-materja prima u tal-prodotti intermedji. Dan jista’ jinvolvi, meta jkun xieraq, koordinazzjoni f’fora internazzjonali rilevanti, il-konklużjoni ta’ ftehimiet ta’ investiment u ta’ kummerċ jew sforzi diplomatiċi oħra f’konformità mar-rekwiżiti proċedurali applikabbli jew djalogu mal-partijiet ikkonċernati rilevanti.

(10)

Sabiex tibni fuq l-impenn li jiġu ssodisfati l-ħtiġijiet tal-forza tax-xogħol tul il-katina tal-provvista tas-semikondutturi, jenħtieġ li l-Kummissjoni tiżgura sinerġiji mal-programmi eżistenti tal-Unjoni u jenħtieġ li tappoġġa u tħeġġeġ lill-Istati Membri jistabbilixxu inizjattivi li jikkontribwixxu għall-iskambju tal-għarfien akkademiku, mas-sħab strateġiċi internazzjonali.

(11)

Huwa objettiv ċar tal-Unjoni li tippromwovi l-kooperazzjoni internazzjonali u l-iskambju tal-għarfien abbażi tal-interessi tal-Unjoni, il-benefiċċji reċiproċi, l-impenji internazzjonali, u, sa fejn ikun possibbli, ir-reċiproċità. Madankollu, il-ksur tad-drittijiet tal-proprjetà intellettwali (PI), l-iżvelar mhux awtorizzat ta’ sigrieti kummerċjali, jew il-kxif ta’ teknoloġiji emerġenti sensittivi fis-settur tas-semikondutturi jistgħu jikkompromettu l-interessi tas-sigurtà tal-Unjoni. F’dan l-isfond, il-Kummissjoni qed tesplora proposti konkreti biex issaħħaħ l-oqfsa tal-Unjoni dwar l-investiment u l-kontroll tal-esportazzjoni. Barra minn hekk, jenħtieġ li l-Unjoni u l-Istati Membri jikkooperaw mas-sħab strateġiċi biex tissaħħaħ it-tmexxija teknoloġika u industrijali konġunta f’konformità mar-rekwiżiti proċedurali applikabbli.

(12)

Is-settur tas-semikondutturi huwa kkaratterizzat minn spejjeż għoljin ħafna ta’ żvilupp u innovazzjoni u kostijiet għoljin ħafna għall-bini ta’ faċilitajiet għall-ittestjar u l-validazzjoni tal-ogħla livell ta’ żvilupp tekniku biex tiġi appoġġata l-produzzjoni industrijali. Dan għandu impatt dirett fuq il-kompetittività u l-kapaċità tal-innovazzjoni tal-industrija tal-Unjoni, kif ukoll fuq is-sigurtà tal-provvista u r-reżiljenza tal-ekosistema tas-semikondutturi tal-Unjoni. Fid-dawl tat-tagħlimiet meħuda minn nuqqasijiet reċenti fl-Unjoni u madwar id-dinja u l-evoluzzjoni rapida tal-isfidi tat-teknoloġija u taċ-ċikli ta’ innovazzjoni li jaffettwaw il-katina tal-valur tas-semikondutturi, huwa meħtieġ li jissaħħu l-punti tajbin eżistenti tal-Unjoni, biex b’hekk jiżdiedu l-kompetittività, ir-reżiljenza u l-kapaċità ta’ riċerka u innovazzjoni tagħha billi tiġi stabbilita l-Inizjattiva.

(13)

L-Istati Membri huma primarjament responsabbli għas-sostenn ta’ bażi industrijali, kompetittiva, sostenibbli u innovattiva b’saħħitha tal-Unjoni. Madankollu, in-natura u l-iskala tal-isfidi tar-riċerka u l-innovazzjoni fis-semikondutturi jeħtieġu azzjoni li trid tittieħed b’mod kollaborattiv fil-livell tal-Unjoni.

(14)

Sabiex l-Unjoni jkollha l-kapaċitajiet tar-riċerka u l-innovazzjoni tat-teknoloġija tas-semikondutturi meħtieġa biex iżżomm ir-rwol mexxej tagħha fl-investimenti fir-riċerka u fl-industrija mill-aktar avvanzati, u biex tnaqqas id-distakk attwali bejn ir-riċerka u l-iżvilupp (R&Ż) u l-manifattura, l-Unjoni u l-Istati Membri jenħtieġ li jikkoordinaw aħjar l-isforzi tagħhom u jikkoinvestu. L-isfidi attwali tal-ekosistema tas-semikondutturi tal-Unjoni jitolbu l-kisba ta’ kapaċità fuq skala kbira u jeħtieġu sforz kollettiv mill-Istati Membri, bl-Unjoni isservi ta’ appoġġ għall-iżvilupp u l-użu ta’ kapaċità fuq skala kbira. Dak l-iżvilupp kollettiv jinkludi l-għoti ta’ riżorsi finanzjarji f’konformità mal-ambizzjoni tal-Inizjattiva biex jiġu appoġġati l-iżvilupp u d-disponibbiltà mifruxa ta’ kapaċitajiet innovattivi u infrastrutturi diġitali estensivi, inkluż pjattaforma tad-disinn virtwali, linji pilota, inkluż għaċ-ċipep kwantistiċi, u t-tixrid tal-għarfien, ħiliet u kompetenzi għall-benefiċċju tal-ekosistema kollha tas-semikondutturi. Sabiex jinkiseb dan, jenħtieġ li l-Unjoni u l-Istati Membri jqisu l-għanijiet ta’ tranżizzjoni doppja ekoloġika u diġitali. F’dan ir-rigward, l-apparati tas-semikondutturi u l-proċessi tal-manifattura joffru opportunitajiet sinifikanti biex jitnaqqas l-impatt ambjentali, u, b’mod partikolari dak tal-karbonju, tal-industriji, u b’hekk jikkontribwixxu għall-ambizzjonijiet ta’, pereżempju, il-komunikazzjoni tal-Kummissjonital-14 ta’ Lulju 2021 intitolata “Lesti għall-mira ta’ 55 %”: nilħqu l-Mira Klimatika tal-UE għall-2030 fi triqitna lejn in-newtralità klimatika’, il-Faċilità għall-Irkupru u r-Reżiljenza stabbilita bir-Regolament (UE) 2021/241 tal-Parlament Ewropew u tal-Kunsill (4) u l-komunikazzjoni tal-Kummissjoni tat-18 ta’ Mejju 2022 intitolata ‘l-pjan REPowerEU’. Jenħtieġ li l-Inizjattiva, fil-komponenti u fl-azzjonijiet kollha, sa fejn ikun possibbli, tintegra u timmassimizza l-benefiċċji tal-applikazzjoni tat-teknoloġiji tas-semikondutturi bħala xprunaturi b’saħħithom għat-tranżizzjoni lejn is-sostenibbiltà li jistgħu jwasslu għal prodotti ġodda u għal użu aktar effiċjenti, effikaċi, nadif u durabbli tar-riżorsi, inkluż l-enerġija u l-materjali meħtieġa għall-produzzjoni u l-użu taċ-ċiklu tal-ħajja kollu tas-semikondutturi.

(15)

Sabiex tilħaq l-objettiv ġenerali tagħha, u tindirizza kemm l-isfidi min-naħa tal-provvista kif ukoll dawk min-naħa tad-domanda tal-ekosistema tas-semikondutturi attwali, jenħtieġ li l-Inizjattiva tinkludi ħames objettivi operazzjonali. L-ewwel nett, biex tissaħħaħ il-kapaċità tad-disinn tal-Unjoni, jenħtieġ li l-Inizjattiva tappoġġa azzjonijiet favur il-bini ta’ pjattaforma tad-disinn virtwali li hija disponibbli madwar l-Unjoni. Jenħtieġ li l-pjattaforma tad-disinn virtwali tgħaqqad il-komunitajiet tad-djar tad-disinn, tan-negozji ġodda, tal-SMEs u tal-PI u tal-fornituri tal-għodod u l-organizzazzjonijiet tar-riċerka u tat-teknoloġija biex jipprovdu soluzzjonijiet ta’ prototip virtwali bbażati fuq il-kożvilupp tat-teknoloġija.

(16)

It-tieni nett, biex tipprovdi l-bażi għat-tisħiħ tas-sigurtà tal-provvista u l-ekosistema tas-semikondutturi tal-Unjoni, jenħtieġ li l-Inizjattiva tappoġġa t-tisħiħ tal-linji pilota avvanzati eżistenti u l-iżvilupp tagħhom biex jippermettu l-iżvilupp u l-użu ta’ teknoloġiji tas-semikondutturi avvanzati u ta’ teknoloġiji tas-semikondutturi tal-ġenerazzjoni li jmiss. Jenħtieġ li l-linji pilota jipprovdu lill-industrija b’faċilità għall-ittestjar, għall-esperimentazzjoni u għall-validazzjoni tat-teknoloġiji tas-semikondutturi u kunċetti tad-disinn tas-sistema f’livelli ogħla ta’ prontezza teknoloġika ’l fuq mil-livell 3 iżda taħt il-livell 8, filwaqt li tnaqqas kemm jista’ jkun l-impatti ambjentali. L-investimenti mill-Unjoni, flimkien mal-investiment mill-Istati Membri u s-settur privat, fil-linji pilota huma meħtieġa biex tiġi indirizzata l-isfida strutturali eżistenti u l-falliment tas-suq fejn tali faċilitajiet ma jkunux disponibbli fl-Unjoni u dan ifixkel il-potenzjal tal-innovazzjoni u l-kompetittività globali tal-Unjoni.

(17)

It-tielet, sabiex jitħaffef l-iżvilupp innovattiv taċ-ċipep kwantistiċi u tat-teknoloġiji tas-semikondutturi assoċjati, inkluż dawk ibbażati fuq materjal semikonduttur jew integrati mal-fotonika, li jwasslu għall-iżvilupp tas-settur tas-semikondutturi, jenħtieġ li l-Inizjattiva tappoġġa azzjonijiet inkluż dwar il-libreriji tad-disinn għaċ-ċipep kwantistiċi, linji pilota għall-bini ta’ ċipep kwantistiċi u faċilitajiet għall-ittestjar u l-validazzjoni għaċ-ċipep kwantistiċi prodotti mil-linji pilota.

(18)

Ir-raba’, bl-għan li jiġi promoss l-użu ta’ teknoloġiji tas-semikondutturi, sabiex jiġi pprovdut aċċess għad-disinn u għall-faċilitajiet tal-linji pilota, u sabiex jiġu indirizzati l-lakuni fil-ħiliet li jeżistu fl-Unjoni, jenħtieġ li l-Inizjattiva tipprovdi l-possibilità lill-Istati Membri li jistabbilixxu tal-anqas ċentru ta’ kompetenza wieħed dwar is-semikondutturi f’kull Stat Membru, billi jissaħħu ċ-ċentri eżistenti jew jinħolqu faċilitajiet ġodda. L-aċċess għal infrastruttura ffinanzjata pubblikament, bħal faċilitajiet pilota u ta’ ttestjar, u għaċ-ċentri ta’ kompetenza, jenħtieġ li jkun miftuħ għal firxa wiesgħa ta’ utenti u jenħtieġ li jingħata fuq bażi trasparenti u mhux diskriminatorja u fuq termini tas-suq (jew bażi ta’ kost flimkien ma’ marġini raġonevoli) għal impriżi kbar, filwaqt li l-SMEs u l-istituti akkademiċi jistgħu jibbenefikaw minn aċċess preferenzjali jew minn prezzijiet imnaqqsa. Tali aċċess, inkluż għas-sħab internazzjonali tar-riċerka u kummerċjali, jista’ jwassal għal arrikkiment reċiproku usa’ u għal kisbiet fl-għarfien espert u fl-eċċellenza, filwaqt li jikkontribwixxi għall-irkupru tal-kostijiet.

(19)

Il-ħames, il-Kummissjoni jenħtieġ li tistabbilixxi appoġġ dedikat għall-faċilità ta’ investiment tas-semikondutturi,bħala parti mill-attivitajiet ta’ faċilitazzjoni tal-investiment deskritti b’mod kollettiv bħala l-“Fond għaċ-Ċipep”, li jipproponi soluzzjonijiet kemm ta’ ekwità kif ukoll ta’ dejn, inkluż faċilità ta’ taħlit permezz tal-Fond InvestEU stabbilit bir-Regolament (UE) 2021/523 tal-Parlament Ewropew u tal-Kunsill (5), b’kooperazzjoni mill-qrib mal-Grupp tal-Bank Ewropew tal-Investiment u flimkien ma’ sħab ta’ implimentazzjoni oħrajn bħall-banek u l-istituzzjonijiet promozzjonali nazzjonali. Jenħtieġ li l-attivitajiet tal-“Fond għaċ-Ċipep” jappoġġaw l-iżvilupp ta’ ekosistema tas-semikondutturi dinamika u reżiljenti billi jipprovdu opportunitajiet għal disponibbiltà akbar ta’ fondi sabiex jappoġġaw it-tkabbir ta’ negozji ġodda u SMEs kif ukoll investimenti fil-katina tal-valur, fosthom għal kumpaniji oħrajn fil-katina tal-valur tas-semikondutturi. F’dan ir-rigward, jenħtieġ li jiġu pprovduti appoġġ u gwida ċara, b’mod partikolari lill-SMEs, bl-għan li jassistuhomfil-proċess ta’ applikazzjoni. F’dan il-kuntest, il-Kunsill Ewropew tal-Innovazzjoni huwa mistenni li jipprovdi aktar appoġġ dedikat permezz ta’ għotjiet u investimenti ta’ ekwità għal innovaturi b’riskju għoli li joħolqu s-swieq.

(20)

Sabiex jingħelbu l-limitazzjonijiet tal-isforzi frammentati attwali tal-investiment pubbliku u privati, biex tiġi ffaċilitata l-integrazzjoni, l-iskambju ta’ ideat u r-redditu fuq l-investiment fuq il-programmi li għaddejjin u biex tiġi segwita viżjoni strateġika komuni tal-Unjoni dwar is-semikondutturi bħala mezz biex tintlaħaq l-ambizzjoni tal-Unjoni u tal-Istati Membri li jiġi żgurat rwol ewlieni fl-ekonomija diġitali, jenħtieġ li l-Inizjattiva tiffaċilita koordinazzjoni aħjar u sinerġiji aktar mill-qrib bejn il-programmi ta’ finanzjament eżistenti fil-livelli tal-Unjoni u nazzjonali, koordinazzjoni u kollaborazzjoni aħjar mal-industrija u mal-partijiet ikkonċernati ewlenin tas-settur privat u investimenti konġunti addizzjonali mal-Istati Membri. L-implimentazzjoni tal-Inizjattiva hija mfassla biex tiġbor flimkien ir-riżorsi mill-Unjoni, mill-Istati Membri u minn pajjiżi terzi assoċjati mal-programmi eżistenti tal-Unjoni, kif ukoll mis-settur privat. Għalhekk, is-suċċess tal-Inizjattiva jista’ jinbena biss fuq sforz kollettiv tal-Istati Membri u tal-Unjoni biex jiġu appoġġati kemm il-kostijiet kapitali sinifikanti kif ukoll id-disponibbiltà wiesgħa tad-disinn virtwali, l-ittestjar u l-pilotaġġ tar-riżorsi u t-tixrid tal-għarfien, il-ħiliet u l-kompetenzi. Fejn xieraq, fid-dawl tal-ispeċifiċitajiet tal-azzjonijiet ikkonċernati, l-objettivi tal-Inizjattiva, b’mod partikolari l-attivitajiet tal-“Fond għaċ-Ċipep”, jenħtieġ li jiġu appoġġati wkoll permezz ta’ faċilità ta’ taħlit mill-Fond InvestEU.

(21)

Jenħtieġ li l-appoġġ mill-Inizjattiva jintuża biex jiġu indirizzati l-fallimenti tas-suq jew is-sitwazzjonijiet ta’ investiment subottimali b’konsegwenza tal-intensità kapitali għolja, ir-riskju għoli, u l-ambjent kumpless tal-ekosistema tas-semikondutturi b’mod proporzjonat u kosteffettiv, u jenħtieġ li l-azzjonijiet ma jidduplikawx jew jeskludu l-finanzjament privat jew ifixklu l-kompetizzjoni fis-suq intern. Jenħtieġ li l-azzjonijiet ikollhom valur miżjud ċar madwar l-Unjoni kollha.

(22)

L-implimentazzjoni primarja tal-Inizjattiva jenħtieġ li tiġi fdata lill-Impriża Konġunta taċ-Ċipep stabbilita mir-Regolament tal-Kunsill (UE) 2021/2085 (l-“Impriża Konġunta taċ-Ċipep”) (6).

(23)

Jenħtieġ li l-Inizjattiva tibni fuq il-bażi b’saħħitha ta’ għarfien u ttejjeb is-sinerġiji ma’ azzjonijiet attwalment appoġġati mill-Unjoni u mill-Istati Membri permezz ta’ programmi u azzjonijiet fir-riċerka u l-innovazzjoni fis-semikondutturi u fl-iżviluppi ta’ parti mill-katina tal-provvista, b’mod partikolari Orizzont Ewropa - il-Programm Qafas għar-Riċerka u l-Innovazzjoni stabbilit bir-Regolament (UE) 2021/695 tal-Parlament Ewropew u tal-Kunsill (7) (Orizzont Ewropa) u l-Programm Ewropa Diġitali stabbilit bir-Regolament (UE) 2021/694 tal-Parlament Ewropew u tal-Kunsill (8) bl-għan li sal-2030 l-Unjoni tissaħħaħ bħala attur globali fit-teknoloġija tas-semikondutturi u fl-applikazzjonijiet tagħha, b’sehem globali dejjem akbar fil-manifattura, f’konformità mal-komunikazzjoni tal-Kummissjoni tad-9 ta’ Marzu 2021 intitolata ‘Il-Kumpass Diġitali tal-2030: l-approċċ Ewropew għad-Deċennju Diġitali’. Barra minn hekk, l-investimenti privati huma mistennija li jiġu mobilizzati biex jikkumplimentaw il-finanzjament tal-Inizjattiva u b’hekk jikkontribwixxu għall-kisba tal-objettivi tagħha. Filwaqt li tikkumplimenta dawk l-attivitajiet, l-Inizjattiva tikkollabora mill-qrib ma’ partijiet ikkonċernati rilevanti oħrajn, inkluż mal-Alleanza Industrijali dwar il-Proċessuri u t-Teknoloġiji tas-Semikondutturi.

(24)

Sabiex ikunu jistgħu jsiru sinerġiji bejn il-programmi tal-Unjoni u tal-Istati Membri, jenħtieġ li l-programmi ta’ ħidma tal-Impriża Konġunta taċ-Ċipep fil-qafas tal-Inizjattiva, f’konformità mal-Artikolu 17(2), il-punt (k), u l-Artikolu 137, il-punt (aa), tar-Regolament (UE) 2021/2085 jiddifferenzjaw b’mod ċar l-azzjonijiet li jappoġġaw ir-riċerka u l-innovazzjoni fis-semikondutturi minn dawk li jimmiraw li jiżviluppaw partijiet mill-katina tal-provvista, sabiex tiġi żgurata l-parteċipazzjoni xierqa tal-entitajiet pubbliċi u privati.

(25)

Bil-ħsieb li tiġi ffaċilitata l-implimentazzjoni ta’ azzjonijiet speċifiċi li huma appoġġati mill-Inizjattiva, bħall-pjattaforma tad-disinn virtwali jew il-linji pilota, huwa meħtieġ li bħala opzjoni jiġi pprovdut strument legali ġdid, il-konsorzju Ewropew għall-infrastruttura relatata maċ-ċipep (ECIC). L-ECIC jenħtieġ li jkollu personalità ġuridika. Dan ifisser li meta ssir applikazzjoni għal azzjonijiet speċifiċi li jridu jiġu ffinanzjati mill-Inizjattiva, l-ECIC innifsu, u mhux entitajiet individwali li jiffurmaw l-ECIC, jista’ jkun l-applikant. Madankollu, skont l-Artikolu 134(3) tar-Regolament (UE) 2021/2085, s-sejħiet għal proposti tal-programm ta’ ħidma taħt l-Inizjattiva huma miftuħa għal forom legali differenti ta’ kooperazzjoni u għal parteċipanti oħra, u l-għażla tal-proposti għall-finanzjament mhijiex ibbażata fuq forma legali speċifika ta’ kooperazzjoni. Jenħtieġ li l-għan ewlieni tal-ECIC jkun li jħeġġeġ il-kollaborazzjoni effettiva u strutturali bejn l-entitajiet legali, inkluż l-organizzazzjonijiet tar-riċerka u t-teknoloġija, l-industrija u l-Istati Membri. Jenħtieġ li l-ECIC jinvolvi l-parteċipazzjoni ta’ mill-inqas tliet membri, jiġifieri Stati Membri, jew entitajiet ġuridiċi pubbliċi jew privati minn tal-inqas tliet Stati Membri, jew kombinament tagħhom, biex tinkiseb rappreżentanza wiesgħa madwar l-Unjoni. B’personalità ġuridika, ECIC ikollu biżżejjed awtonomija biex jistabbilixxi s-sħubija, il-governanza, il-finanzjament, il-baġit tiegħu, l-arranġamenti għal kontribuzzjonijiet finanzjarji u oħrajn in natura mill-membri tiegħu, u l-koordinazzjoni, il-ġestjoni tal-PI u l-metodi ta’ ħidma. Jenħtieġ li l-membri tal-ECIC ikollhom flessibbiltà sħiħa fid-determinazzjoni tal-liġi applikabbli, is-sede statutorja u d-drittijiet tal-vot. Jenħtieġ li l-għażla ta’ entitajiet legali pubbliċi u privati li jimplimentaw il-pjan ta’ ħidma tal-ECIC tkun ġusta, trasparenti u miftuħa. Sabiex jiġi żgurat aċċess ġust u ugwali għall-parteċipazzjoni, jenħtieġ li kull ECIC ikun miftuħ għal membri ġodda, jiġifieri Stati Membri jew entitajiet ġuridiċi pubbliċi jew privati, matul il-ħajja tiegħu. Jenħtieġ li l-Istati Membri b’mod partikolari jkunu jistgħu jissieħbu f’ECIC fi kwalunkwe ħin jew bħala membri sħaħ jew bħala osservaturi, filwaqt li entitajiet ġuridiċi pubbliċi jew privati oħra jenħtieġ li jkunu jistgħu jissieħbu fi kwalunkwe ħin b’termini ġusti u raġonevoli speċifikati fl-istatuti tal-ECIC. Jenħtieġ li l-Bord tal-Awtoritajiet Pubbliċi tal-Impriża Konġunta taċ-Ċipep ikun jista’ jivverifika kemm ECIC huwa miftuħ u jirrakkomanda li jittieħdu ċerti miżuri ta’ rimedju fejn meħtieġ. Jenħtieġ li l-istabbiliment ta’ ECIC ma jinvolvix l-istabbiliment proprju ta’ korp ġdid tal-Unjoni. Dan jenħtieġ li jindirizza d-distakk fis-sett ta’ għodod tal-Unjoni biex jikkombina l-finanzjament mill-Istati Membri, il-baġit tal-Unjoni u l-investiment privat għall-finijiet tal-implimentazzjoni ta’ azzjonijiet speċifiċi li huma appoġġati mill-Inizjattiva. Jenħtieġ li l-Kummissjoni ma tkunx membru tal-ECIC.

(26)

ECIC li s-sħubija tiegħu ma tinkludix entitajiet privati jrid jiġi rikonoxxut bħala korp internazzjonali skont it-tifsira tal-Artikolu 143(1), il-punt (g), u l-Artikolu 151(1), il-punt (b), tad-Direttiva tal-Kunsill 2006/112/KE (9) u bħala organizzazzjoni internazzjonali skont it-tifsira tal-Artikolu 11(1), il-punt (b), tad-Direttiva tal-Kunsill (UE) 2020/262 (10). ECIC li jinkludi entitajiet privati fost il-membri tiegħu jenħtieġ li ma jiġix rikonoxxut bħala tali korp internazzjonali jew bħala tali organizzazzjoni internazzjonali.

(27)

Ir-R&Ż fl-Unjoni qed issir dejjem aktar esposta għal prattiki mmirati lejn il-miżapproprjazzjoni ta’ informazzjoni kunfidenzjali, sigrieti kummerċjali, u data protetta, bħas-serq tal-PI, it-trasferimenti furzati tat-teknoloġija u l-ispjunaġġ ekonomiku. Sabiex jiġu evitati impatti negattivi fuq l-interessi tal-Unjoni u l-objettivi tal-Inizjattiva, huwa meħtieġ li jiġi adottat approċċ biex jiġi żgurat li l-aċċess għal informazzjoni jew riżultati sensittivi u l-użu tagħhom, inkluż data u għarfien prattiku, sigurtà u trasferiment tas-sjieda tar-riżultati kif ukoll kontenut protett mid-drittijiet tal-PI ġġenerati b’rabta ma’ azzjonijiet appoġġati mill-Inizjattiva jew b’riżultat tagħhom, ikunu protetti. Sabiex tiġi żgurata dik il-protezzjoni, jenħtieġ li kwalunkwe azzjoni appoġġata mill-Inizjattiva u ffinanzjata minn Orizzont Ewropa u l-Programm Ewropa Diġitali ssegwi d-dispożizzjonijiet rilevanti ta’ dawk il-Programmi, bħal dawk dwar il-parteċipazzjoni ta’ entitajiet stabbiliti f’pajjiżi terzi assoċjati mal-programm, ftehimiet ta’ għotja, sjieda u protezzjoni, sigurtà, sfruttament u disseminazzjoni, trasferiment u liċenzjar u drittijiet ta’ aċċess. Huwa possibbli li jiġu stabbiliti dispożizzjonijiet speċifiċi meta jiġu implimentati dawk il-Programmib’mod partikolari fir-rigward tal-limitazzjonijiet għat-trasferimenti u l-liċenzjar f’konformità mal-Artikolu 40(4) tar-Regolament (UE) 2021/695, u l-limitazzjoni tal-parteċipazzjoni ta’ entitajiet ġuridiċi stabbiliti f’pajjiżi terzi assoċjati jew oħrajn speċifikati minħabba raġunijiet ibbażati fuq l-assi strateġiċi, l-interessi, l-awtonomija jew is-sigurtà, f’konformità mal-Artikolu 22(5) tar-Regolament (UE) 2021/695 u l-Artikolu 12(6) tar-Regolament (UE) 2021/694. Barra minn hekk, jenħtieġ li t-trattament ta’ informazzjoni sensittiva, is-sigurtà, il-kunfidenzjalità, il-protezzjoni tas-sigrieti kummerċjali u d-drittijiet tal-PI jkunu rregolati mil-liġi tal-Unjoni, inkluż id-Direttivi (UE) 2016/943 (11) u 2004/48/KE tal-Parlament Ewropew u tal-Kunsill (12), u l-liġi nazzjonali. Huwa possibbli li l-Kummissjoni u l-Istati Membri jipproteġu t-trasferimenti tat-teknoloġija għal raġunijiet relatati mal-interessi tas-sigurtà tal-Unjoni u nazzjonali fir-rigward ta’ investimenti magħmula f’faċilitajiet li jaqgħu fil-kamp ta’ applikazzjoni ta’ dan ir-Regolament f’konformità mar-Regolament (UE) 2019/452 tal-Parlament Ewropew u tal-Kunsill (13).

(28)

Sabiex jiġi ffaċilitat l-aċċess għall-għarfien espert tekniku u tiġi żgurata d-disseminazzjoni tal-għarfien madwar l-Unjoni, kif ukoll l-appoġġ għal diversi inizjattivi ta’ ħiliet, jenħtieġ li jiġi stabbilit network ta’ ċentri ta’ kompetenza. Għal dak l-għan, jenħtieġ li l-Impriża Konġunta taċ-Ċipep tistabbilixxi l-proċedura għall-istabbiliment ta’ ċentri ta’ kompetenza, inkluż il-kriterji tal-għażla, kif ukoll aktar dettalji dwar l-implimentazzjoni tal-kompiti u tal-funzjonijiet imsemmija f’dan ir-Regolament. Jenħtieġ li ċ-ċentri ta’ kompetenza li jiffurmaw in-network jintgħażlu mill-Impriża Konġunta taċ-Ċipep u jenħtieġ li jkollhom awtonomija ġenerali sostanzjali biex jistabbilixxu l-organizzazzjoni, il-kompożizzjoni u l-metodi ta’ ħidma tagħhom. Madankollu, jenħtieġ li l-organizzazzjoni, il-kompożizzjoni u l-metodi ta’ ħidma tagħhom ikunu konformi ma’ dan ir-Regolament u ma’ din l-Inizjattiva u jikkontribwixxu għall-objettivi tagħhom.

(29)

Jenħtieġ li ċ-ċentri ta’ kompetenza jikkontribwixxu għaż-żamma tar-rwol mexxej tal-Unjoni fir-rigward tal-kapaċitajiet ta’ riċerka, żvilupp u innovazzjoni u disinn taċ-ċipep billi jiffukaw fuq il-promozzjoni tar-riċerka, l-iżvilupp u l-innovazzjoni u d-disinn, filwaqt li jiffukaw ukoll fuq il-manifattura. Il-promozzjoni tal-potenzjal u l-ħiliet tal-bniedem permezz tal-edukazzjoni fis-suġġetti tax-xjenza, it-teknoloġija, l-inġinerija u l-matematika (STEM) sal-livell postdottorali hija kruċjali biex jintlaħaq dak l-objettiv. B’mod partikolari, iċ-ċentri ta’ kompetenza jenħtieġ li jipprovdu servizzi lill-partijiet ikkonċernati tas-semikondutturi, inkluż in-negozji ġodda u l-SMEs. Eżempji jinkludu l-faċilitazzjoni tal-aċċess għal-linji pilota u għall-pjattaforma tad-disinn virtwali, l-għoti ta’ taħriġ u l-iżvilupp tal-ħiliet, l-appoġġ biex jinstabu l-investituri, l-użu tal-kompetenzi lokali eżistenti jew l-ilħuq tal-vertikali rilevanti. Jenħtieġ li s-servizzi jiġu pprovduti fuq bażi miftuħa, trasparenti u mhux diskriminatorja. Jenħtieġ li kull ċentru ta’ kompetenza jikkonnettja u jkun parti min-network Ewropew ta’ ċentri ta’ kompetenza fis-semikondutturi u jenħtieġ li jaġixxi bħala punt ta’ aċċess għal nodi oħra tan-network. F’dan ir-rigward, jenħtieġ li jiġu massimizzati s-sinerġiji ma’ strutturi simili eżistenti, bħaċ-Ċentri ta’ Innovazzjoni Diġitali Ewropej stabbilit skont il-Programm Ewropa Diġitali. Pereżempju, l-Istati Membri jistgħu jiddeżinjaw Ċentru Ewropew tal-Innovazzjoni Diġitali eżistenti ffukat fuq is-semikondutturi bħala ċentru ta’ kompetenza għall-finijiet ta’ dan ir-Regolament, dment li ma tinkisirx il-projbizzjoni tal-finanzjament doppju.

(30)

Id-disinn taċ-ċipep huwa kapaċità potenzjali kruċjali għall-implimentazzjoni ta’ kwalunkwe innovazzjoni u funzjonalità f’soluzzjonijiet elettroniċi adattati għal applikazzjonijiet differenti u għall-ħtiġijiet tal-utenti ta’ semikundutturi. Bħala tali, id-disinn huwa fil-qalba tal-katina tal-valur tas-semikondutturi u l-appoġġ għall-espansjoni tal-kapaċitajiet tad-disinn fl-Unjoni huwa ta’ importanza kritika. Biex tirrikonoxxi r-rwol ewlieni taċ-ċentri tad-disinn u l-kontribut tagħhom għall-eċċellenza Ewropea fid-disinn avvanzat taċ-ċipep permezz ta’ offerti ta’ servizz jew it-tisħiħ tal-ħiliet u l-kapaċitajiet tad-disinn fl-Unjoni, jenħtieġ li l-Kummissjoni tkun tista’ tagħti tikketta għal “ċentru tad-disinn ta’ eċċellenza”. Fid-dawl tal-importanza tagħhom biex tkun tista’ ssir ekosistema tas-semikondutturi reżiljenti, jenħtieġ li ċ-ċentri tad-disinn ta’ eċċellenza jitqiesu li huma fl-interess pubbliku. Biex jikkontribwixxu għar-reżiljenza tal-ekosistema tas-semikondutturi tal-Unjoni, jenħtieġ li l-Istati Membri jkunu jistgħu japplikaw miżuri ta’ appoġġ, b’mod proporzjonali, jekk tali ċentri tad-disinn ta’ eċċellenza jkunu SMEs. Dan huwa mingħajr preġudizzju għall-kompetenza tal-Kummissjoni fil-qasam tal-għajnuna mill-Istat skont l-Artikoli 107 u 108 TFUE, fejn rilevanti, u għall-komunikazzjoni tal-Kummissjoni tad-19 ta’ Ottubru 2022 intiolata ‘il-Qafas għall-għajnuna mill-Istat għar-riċerka u l-iżvilupp u l-innovazzjoni’ (Il-‘qafas RŻI tal-għajnuna mill-Istat’). Il-qafas RŻI tal-għajnuna mill-Istat għandu l-għan li jiffaċilita l-attivitajiet ta’ riċerka, żvilupp u innovazzjoni li, minħabba fallimenti tas-suq, ma jseħħux mingħajr appoġġ pubbliku. F’dan ir-rigward, abbażi tal-qafas RŻI tal-għajnuna mill-Istat, l-Istati Membri, soġġett għal ċerti kondizzjonijiet, jistgħu jipprovdu l-inċentivi meħtieġa lill-kumpaniji u lill-komunità tar-riċerka biex iwettqu dawn l-attivitajiet u investimenti importanti f’dan il-qasam. Skont il-qafas RŻI tal-għajnuna mill-Istat, jistgħu jiġu permessi intensitajiet massimi tal-għajnuna sal-livell ta’ 80 % għall-għajnuna għal proġetti ta’ R&Ż ta’ intrapriżi ta’ daqs medju u sa 90 % għal dawk ta’ intrapriżi żgħar. Barra minn hekk, sabiex jiġu massimizzati s-sinerġiji, iċ-ċentri ta’ kompetenza stabbiliti taħt l-Inizjattiva li jiffukaw fuq id-disinn taċ-ċipep tal-ogħla livell ta’ żvilupp tekniku jenħtieġ li jkunu jistgħu japplikaw biex jirċievu t-tikketta ta’ “ċ-ċentru tad-disinn ta’ eċċellenza”. Fl-istess ħin, l-Istati Membri jistgħu jiddeżinjaw ċentru tad-disinn ta’ eċċellenza bħala ċ-ċentru ta’ kompetenza kandidat tagħhom.

(31)

Sabiex jitħeġġeġ l-istabbiliment tal-kapaċitajiet ta’ manifattura u ta’ disinn relatati meħtieġa, u b’hekk tiġi żgurata s-sigurtà tal-provvista u tissaħħaħ ir-reżiljenza tal-ekosistema tas-semikondutturi tal-Unjoni, l-appoġġ pubbliku jista’ jkun xieraq, dment li dan ma jwassalx għal distorsjonijiet fis-suq intern. F’dak ir-rigward, jeħtieġ li jiġu armonizzati ċerti kondizzjonijiet biex l-operaturi jwettqu proġetti speċifiċi fil-livell tal-Unjoni li jikkontribwixxu biex jintlaħqu l-objettivi ta’ dan ir-Regolament u ssir distinzjoni bejn żewġ tipi ta’ faċilitajiet, jiġifieri, il-faċilitajiet ta’ produzzjoni integrata u l-fonderiji miftuħa tal-UE. Il-fattur li jiddistingwi għall-kwalifika bħala wieħed miż-żewġ tipi ta’ faċilità jenħtieġ li jkun il-mudell ta’ negozju. Il-fonderiji miftuħa tal-UE joffru kapaċità ta’ produzzjoni lil impriżi oħra. Il-Faċilitajiet ta’ produzzjoni integrata jipproduċu għall-finijiet kummerċjali tagħhom stess u jistgħu jintegraw passi oħra tal-katina tal-provvista minbarra l-manifattura fil-mudell ta’ negozju tagħhom, bħad-disinn u l-bejgħ tal-prodotti.

(32)

Jenħtieġ li l-faċilitajiet ta’ produzzjoni integrata u l-fonderiji miftuħa tal-UE jipprovdu kapaċitajiet potenzjali fil-manifattura tas-semikondutturi jew fil-produzzjoni ta’ tagħmir jew komponenti ewlenin għal tali tagħmir użat b’mod predominanti fil-manifattura tas-semikondutturi li huma “l-ewwel tat-tip tagħhom” fl-Unjoni u li jikkontribwixxu għas-sigurtà tal-provvista u għar-reżiljenza tal-ekosistema tas-semikondutturi fis-suq intern. Il-fattur kwalifikanti biex tkun faċilità “l-ewwel tat-tip” huwa li jingħata element innovattiv lis-suq intern fir-rigward tal-proċessi ta’ manifattura jew tal-prodott finali, li jista’ jkun ibbażat fuq nodi tat-teknoloġija ġodda jew eżistenti. Elementi innovattivi rilevanti jistgħu jkunu fir-rigward tan-nodu tat-teknoloġija jew tal-materjal tas-substrat, jew approċċi li jwasslu għal titjib fil-qawwa komputazzjonali jew attributi ta’ prestazzjoni oħrajn, effiċjenza fl-użu tal-enerġija, il-livell ta’ sigurtà, sikurezza jew affidabbiltà, kif ukoll l-integrazzjoni ta’ funzjonalitajiet ġodda, bħall-intelliġenza artifiċjali (IA), il-kapaċità tal-memorja jew oħrajn. L-integrazzjoni ta’ proċessi differenti li jwasslu għal kisbiet fl-effiċjenza jew l-awtomazzjoni tal-inkapsulament u l-assemblaġġ huma wkoll eżempji ta’ innovazzjoni. Fir-rigward tal-kisbiet ambjentali, l-elementi ta’ innovazzjoni jinkludu t-tnaqqis b’mod kwantifikabbli tal-ammont ta’ enerġija, ilma jew kimiċi użat, jew it-titjib tar-riċiklabbiltà. Dawk l-elementi ta’ innovazzjoni jistgħu japplikaw kemm għan-nodi tat-teknoloġija maturi kif ukoll għal dawk l-aktar avvanzati. Jenħtieġ li tali innovazzjoni ma tkunx għadha sostantivament preżenti jew ma jkunx hemm impenn li tinbena fl-Unjoni. Pereżempju, innovazzjoni simili fir-R&Ż jew fil-produzzjoni fuq skala żgħira mhux neċessarjament teskludi li sussegwentement tikkwalifika bħala faċilità “l-ewwel tat-tip tagħha”. Kemm l-installazzjoni ta’ faċilità ġdida kif ukoll dik imtejba b’mod sostanzjali tista’ twassal għal kwalifika bħala faċilità “l-ewwel tat-tip tagħha”.

(33)

Meta fonderija miftuħa tal-UE toffri kapaċità ta’ produzzjoni lil impriżi mhux relatati mal-operatur tal-faċilità, il-fonderija miftuħa tal-UE jenħtieġ li tistabbilixxi, timplimenta u żżomm separazzjoni funzjonali adegwata u effikaċi sabiex tipprevjeni l-iskambju ta’ informazzjoni kunfidenzjali bejn il-produzzjoni interna u esterna. Dan jenħtieġ li japplika għal kwalunkwe informazzjoni miksuba fid-disinn u fil-proċessi ta’ manifattura front-end u back-end.

(34)

Sabiex jikkwalifika bħala faċilitajiet ta’ produzzjoni integrata jew fonderiji miftuħa tal-UE, jenħtieġ li l-istabbiliment tal-faċilità jkollu impatt pożittiv ċar b’effetti kollaterali lil hinn mill-impriża jew l-Istat Membru kkonċernat fuq il-katina tal-valur tas-semikondutturi tal-Unjoni fuq terminu medju sa twil bil-ħsieb li jiġu żgurati s-sigurtà tal-provvista u r-reżiljenza tal-ekosistema tas-semikondutturi u li jsir kontribut għat-tranżizzjonijiet doppji ekoloġiċi u diġitali tal-Unjoni. Diversi attivitajiet immirati lejn il-ħolqien ta’ effetti kollaterali pożittivi jistgħu jiġu kkunsidrati għall-fini li jikkwalifikaw bħala faċilitajiet ta’ produzzjoni integrata jew fonderiji miftuħa tal-UE. Eżempji jinkludu l-għoti ta’ aċċess għal faċilitajiet ta’ manifattura bi ħlas tas-suq; l-għoti ta’ kits tal-proċess tad-disinn lil kumpaniji iżgħar tad-disinn jew lill-pjattaforma tad-disinn virtwali; id-disseminazzjoni tar-riżultati mill-attivitajiet tagħhom ta’ R&Ż; l-involviment f’kollaborazzjoni ta’ riċerka ma’ universitajiet u istituti ta’ riċerka Ewropej; il-kooperazzjoni mal-awtoritajiet nazzjonali jew l-istituzzjonijiet edukattivi u vokazzjonali biex jikkontribwixxu għall-iżvilupp tal-ħiliet; il-kontribut għal proġetti ta’ riċerka fl-Unjoni kollha; jew l-offerta ta’ opportunitajiet ta’ appoġġ dedikati għal negozji ġodda u SMEs. L-impatt fuq diversi Stati Membri, inkluż fir-rigward tal-objettivi ta’ koeżjoni, jenħtieġ li jitqies bħala wieħed mill-indikaturi ta’ impatt pożittiv ċar ta’ faċilità ta’ produzzjoni integrata jew ta’ fonderija miftuħa fuq il-katina tal-valur tas-semikondutturi fl-Unjoni.

(35)

Huwa importanti li l-faċilitajiet ta’ produzzjoni integrata u l-fonderiji miftuħa tal-UE ma jkunux soġġetti għal applikazzjoni ekstraterritorjali tal-obbligi tas-servizz pubbliku imposti minn pajjiżi terzi li jistgħu jimminaw il-kapaċità tagħhom li jużaw l-infrastruttura, is-software, is-servizzi, il-faċilitajiet, l-assi, ir-riżorsi, il-PI jew il-kompetenza meħtieġa tagħhom biex jiġi ssodisfat l-obbligu fuq l-ordnijiet klassifikati bħala prijorità skont dan ir-Regolament, li dawn ikollhom jikkommettu għalihom.

(36)

Fid-dawl tal-iżvilupp rapidu tat-teknoloġiji tas-semikondutturi u biex tissaħħaħ il-kompetittività industrijali futura tal-Unjoni, il-faċilitajiet ta’ produzzjoni integrata u l-fonderiji miftuħa tal-UE jenħtieġ li jinvestu f’innovazzjoni kontinwa fl-Unjoni bil-ħsieb li jinkisbu avvanzi konkreti fit-teknoloġija tas-semikondutturi jew fit-tħejjija ta’ teknoloġiji tal-ġenerazzjoni li jmiss. Fid-dawl ta’ dan, jenħtieġ li l-faċilitajiet ta’ produzzjoni integrata u l-fonderiji miftuħa tal-UE jkunu jistgħu jittestjaw u jesperimentaw żviluppi ġodda permezz ta’ aċċess preferenzjali għal-linji pilota stabbiliti mill-Inizjattiva permezz ta’ applikazzjonijiet rapidi għas-servizzi tagħhom. Jenħtieġ li kwalunkwe aċċess preferenzjali bħal dan la jeskludi u lanqas jipprevjeni aċċess effettiv fuq termini ġusti għal-linji pilota minn impriżi interessati oħra, b’mod partikolari negozji ġodda u SMEs.

(37)

Filwaqt li titqies l-importanza ta’ forza tax-xogħol kwalifikata u b’ħiliet speċjalizzati biex jintlaħqu l-objettivi ta’ dan ir-Regolament, jenħtieġ li l-faċilitajiet ta’ produzzjoni integrata u l-fonderiji miftuħa tal-UE jappoġġaw ir-riżerva ta’ talenti tal-Unjoni billi jiżviluppaw u jużaw taħriġ edukattiv u tal-ħiliet u billi jżidu r-riżerva tal-forza tax-xogħol ikkwalifikata u b’ħiliet speċjalizzati.

(38)

Sabiex tippermetti proċedura uniformi u trasparenti biex jinkiseb l-istatus bħala faċilità ta’ produzzjoni integrata jew bħala fonderija miftuħa tal-UE, jenħtieġ li d-deċiżjoni li jingħata l-istatus tiġi adottata mill-Kummissjoni wara l-applikazzjoni minn impriża individwali jew konsorzju ta’ diversi impriżi. Jenħtieġ li l-istatus ikun miftuħ kemm għall-installazzjoni ta’ faċilità tal-manifattura tas-semikondutturi ġdida kif ukoll għall-iskalar sinifikanti jew għat-trasformazzjoni innovattiva ta’ faċilità tal-manifattura tas-semikondutturi eżistenti. Sabiex jittieħed kont tal-importanza ta’ implimentazzjoni koordinata u b’kooperazzjoni tal-faċilità ppjanata, il-Kummissjoni jenħtieġ li tqis fil-valutazzjoni tagħha l-istat ta’ tħejjija ta’ Stat Membru wieħed jew aktar fejn l-applikant ikollu l-ħsieb li jistabbilixxi l-faċilitajiet tiegħu biex jappoġġa l-istabbiliment ta’ tali faċilitajiet. Barra minn hekk, meta tivvaluta l-vijabbiltà tal-pjan ta’ direzzjoni tan-negozju, il-Kummissjoni tista’ tqis ir-rekord ġenerali tal-applikant.

(39)

Fid-dawl tad-drittijiet marbuta mar-rikonoxximent bħala faċilità ta’ produzzjoni integrata jew bħala fonderija miftuħa tal-UE, il-Kummissjoni jenħtieġ li timmonitorja jekk il-faċilitajiet li ngħataw dak l-istatus għadhomx konformi mar-rekwiżiti stabbiliti f’dan ir-Regolament. Jekk dan ma jibqax il-każ, jenħtieġ li l-Kummissjoni jkollha d-dritt li teżamina mill-ġdid u, jekk ikun meħtieġ, tħassar l-istatus u, għaldaqstant, id-drittijiet marbuta ma’ dan l-istatus. Kwalunkwe deċiżjoni dwar it-tħassir tal-istatus jenħtieġ li tittieħed biss wara konsultazzjoni mal-Bord Ewropew dwar is-Semikondutturi u jenħtieġ li tkun motivata kif xieraq. B’mod korrispondenti, l-impriża li topera faċilità ta’ produzzjoni integrata jew fonderija miftuħa tal-UE jenħtieġ li jkollha l-possibbiltà li titlob b’mod proattiv rieżami tat-tul ta’ żmien tal-istatus jew tal-pjanijiet ta’ implimentazzjoni meta ċirkostanzi esterni mhux previsti, bħal disturbi serji b’impatt ekonomiku dirett fuq il-faċilità rikonoxxuta, jista’ jkollhom impatt fuq il-kapaċità tagħha li tikkonforma mal-kriterji. Sabiex jitqies il-fatt li l-biċċa l-kbira tad-drittijiet jingħataw fil-perjodu ta’ stabbiliment, jenħtieġ li l-faċilitajiet jibqgħu soġġetti għall-obbligu li jikkonformaw ma’ ordnijiet ikklassifikati bħala prijorità anke f’każ ta’ revoka tal-istatus għaż-żmien li jifdal sakemm l-istatus ikun skada.

(40)

Fid-dawl tal-importanza tagħhom biex tiġi żgurata s-sigurtà tal-provvista u biex tkun tista’ ssir ekosistema tas-semikondutturi reżiljenti, il-faċilitajiet ta’ produzzjoni integrata u l-fonderiji miftuħa tal-UE jenħtieġ li jitqiesu li huma fl-interess pubbliku. L-iżgurar tas-sigurtà tal-provvista tas-semikondutturi huwa importanti wkoll għad-diġitalizzazzjoni, li tippermetti t-tranżizzjoni ekoloġika ta’ ħafna setturi oħra. Sabiex jattiraw l-investimenti lejn is-settur tas-semikondutturi tal-Unjoni u jikkontribwixxu għas-sigurtà tal-provvista tas-semikondutturi u għar-reżiljenza tal-ekosistema tas-semikondutturi tal-Unjoni, l-Istati Membri jistgħu japplikaw miżuri ta’ appoġġ, inkluż inċentivi, u jipprevedu appoġġ amministrattiv fil-proċeduri nazzjonali għall-għoti tal-permessi għall-faċilitajiet ta’ produzzjoni integrata u l-fonderiji miftuħa tal-UE. Dan huwa mingħajr preġudizzju għall-kompetenza tal-Kummissjoni fil-qasam tal-għajnuna mill-Istat skont l-Artikoli 107 u 108 TFUE, fejn rilevanti. Sabiex tiġi żgurata l-applikazzjoni korretta u effiċjenti tar-regoli dwar l-għajnuna mill-Istat, fil-komunikazzjoni tagħha tat-8 ta’ Frar 2022 intitolata “Att dwar iċ-Ċipep għall-Ewropa”, il-Kummissjoni diġà rrikonoxxiet il-ħtieġa ta’ valutazzjoni każ b’każ rigward l-għajnuna mill-Istat mogħtija lil faċilitajiet avvanzati ta’ produzzjoni tas-semikondutturi bl-għan li tiġi ssalvagwardjata s-sigurtà tal-provvista tal-Unjoni u r-reżiljenza tal-katina tal-provvista filwaqt li jiġu ġġenerati impatti pożittivi sinifikanti fuq l-ekonomija usa’. Barra minn hekk, il-proċeduri għar-rikonoxximent bħala faċilitajiet ta’ produzzjoni integrata jew fonderiji miftuħa tal-UE u għall-awtorizzazzjoni tal-għajnuna mill-Istat, fejn applikabbli, ser jitwettqu b’mod parallel sabiex jitħaffef il-proċess tat-teħid tad-deċiżjonijiet. Jenħtieġ li l-Istati Membri jappoġġaw l-istabbiliment ta’ faċilitajiet ta’ produzzjoni integrata u ta’ fonderiji miftuħa tal-UE f’konformità mal-liġi tal-Unjoni. Meta jipprovdu miżuri ta’ appoġġ għall-faċilitajiet ta’ produzzjoni integrata u l-fonderiji miftuħa tal-UE, jenħtieġ li l-Istati Membri jkunu jistgħu jikkunsidraw l-istabbiliment ta’ rekwiżiti nondiskriminatorji relatati mal-protezzjoni intellettwali u s-sigurtà, inkluż iċ-ċibersigurtà, u l-kunfidenzjalità u jistgħu jirrakkomandaw miżuri ta’ mitigazzjoni biex jindirizzaw riskji speċifiċi relatati mal-interferenza, it-trasferimenti furzati tat-teknoloġija, u s-serq tal-PI minn entitajiet minn pajjiżi terzi.

(41)

Sabiex jinkoraġġixxu l-istabbiliment tal-kapaċitajiet ta’ disinn relatati meħtieġa, l-Istati Membri jistgħu jipprovdu appoġġ għal tali attivitajiet f’konformità mar-regoli dwar l-għajnuna mill-Istat abbażi tal-Artikoli 107 u 108 TFUE, inkluż taħt il-qafas RŻI tal-għajnuna mill-Istat jew ir-Regolament tal-Kummissjoni (UE) Nru 651/2014 (14).

(42)

Huwa meħtieġ li l-faċilitajiet ta’ produzzjoni integrata u l-fonderiji miftuħa tal-UE jiġu stabbiliti mill-aktar fis possibbli, filwaqt li l-piż amministrattiv jinżamm għal minimu. Għal dik ir-raġuni, l-Istati Membri jenħtieġ li jipproċessaw applikazzjonijiet relatati mal-ippjanar, mal-bini u mat-tħaddim ta’ faċilitajiet ta’ produzzjoni integrata u l-fonderiji miftuħa tal-UE bl-aktar mod rapidu possibbli. Jenħtieġ li l-Istati Membri jkunu jistgħu jaħtru awtorità li tiffaċilita u tikkoordina l-proċessi għall-għoti tal-permessi u li tista’ taħtar koordinatur, li jservi bħala punt ta’ kuntatt uniku għall-proġett. Barra minn hekk, fejn meħtieġ għall-għoti ta’ deroga skont id-Direttiva tal-Kunsill 92/43/KEE (15) u d-Direttiva 2000/60/KE tal-Parlament Ewropew u tal-Kunsill (16), l-istabbiliment u t-tħaddim ta’ dawn il-faċilitajiet jistgħu jitqiesu bħala ta’ interess pubbliku prevalenti skont it-tifsira ta’ dawk id-Direttivi, dment li l-kondizzjonijiet l-oħrajn stabbiliti f’dawk id-dispożizzjonijiet jiġu ssodisfati. Dan huwa mingħajr preġudizzju għall-applikabbiltà jew l-implimentazzjoni ta’ liġi ambjentali oħra tal-Unjoni.

(43)

In-negozji innovattivi ta’ teknoloġija avvanzata huma dejjem aktar esposti għal prattiki mmirati lejn il-miżapproprjazzjoni ta’ informazzjoni kunfidenzjali, sigrieti kummerċjali u data protetta, bħas-serq tal-PI, l-ikkupjar mhux awtorizzat, it-trasferimenti furzati tat-teknoloġija, l-ispjunaġġ ekonomiku jew il-ksur tar-rekwiżiti tal-kunfidenzjalità, kemm minn ġewwa u b’mod partikolari minn barra l-Unjoni. Żviluppi reċenti, bħaż-żieda fl-esternalizzazzjoni, ktajjen ta’ valur mondjali itwal, u ż-żieda fl-użu tat-teknoloġija tal-informazzjoni u l-komunikazzjoni jikkontribwixxu biex jiżdied ir-riskju ta’ dawk il-prattiki. Il-ksib, l-użu jew l-iżvelar illegali ta’ informazzjoni kunfidenzjali, sigrieti kummerċjali, u data protetta jikkompromettu l-abbiltà li jinkiseb redditu ta’ min jidħol l-ewwel mill-isforzi relatati mal-innovazzjoni. Sabiex tiġi żgurata l-protezzjoni ta’ informazzjoni kunfidenzjali, sigrieti kummerċjali, u data protetta, jenħtieġ li dan ir-Regolament jiġi implimentat b’mod li jirrispetta bis-sħiħ il-qafas tal-Unjoni u dak internazzjonali tad-data u l-protezzjoni u l-infurzar tal-PI, inkluż id-Direttiva 2001/29/KE tal-Parlament Ewropew u tal-Kunsill (17), id-Direttivi 2004/48/KE u (UE) 2016/943, u d-Direttiva (UE) 2019/790 tal-Parlament Ewropew u tal-Kunsill (18). Biex ikomplu jindirizzaw ir-riskji ewlenin tal-katina tal-provvista, l-Istati Membri jistgħu jagħmlu użu mill-possibbiltà prevista mid-Direttiva (UE) 2022/2555 tal-Parlament Ewropew u tal-Kunsill (19) li jwettqu valutazzjonijiet tar-riskju tas-sigurtà kkoordinati tal-ktajjen tal-provvista kritiċi, kif imwettqa għan-networks 5G skont ir-Rakkomandazzjoni tal-Kummissjoni (UE) 2019/534 (20), bl-għan li jidentifikaw, għal kull settur, it-theddid u l-vulnerabbiltajiet rilevanti u jidentifikaw il-miżuri, il-pjanijiet ta’ mitigazzjoni u l-aħjar prattiki biex jiġu miġġielda d-dipendenzi kritiċi, il-punti uniċi potenzjali ta’ falliment, it-theddid, il-vulnerabbiltajiet u riskji oħra assoċjati mal-katina tal-provvista.

(44)

Is-suq intern jibbenefika ħafna minn standards komuni għal ċipep ekoloġiċi, immanifatturati b’mod sostenibbli, affidabbli u siguri. L-apparati intelliġenti, is-sistemi u l-pjattaformi ta’ konnettività futuri ser ikollhom jiddependu fuq ċipep tas-semikondutturi avvanzati u ser ikollhom jissodisfaw rekwiżiti ekoloġiċi, ta’ fiduċja u ta’ ċibersigurtà li fil-biċċa l-kbira ser jiddependu fuq il-karatteristiċi tat-teknoloġija sottostanti. Għal dak il-għan, l-Unjoni jenħtieġ li tiżviluppa proċeduri ta’ ċertifikazzjoni ta’ referenza u tirrikjedi li l-industrija tiżviluppa b’mod konġunt tali proċeduri għal setturi u teknoloġiji speċifiċi b’impatt soċjali għoli potenzjali.

(45)

Fid-dawl ta’ dan, jenħtieġ li l-Kummissjoni, f’konsultazzjoni mal-Bord Ewropew dwar is-Semikondutturi u bl-involviment dovut tal-partijiet ikkonċernati, tidentifika s-setturi u l-prodotti li jiddependu mit-teknoloġiji tas-semikondutturi jew li jagħmlu użu estensiv minnhom u li jeħtieġu ċipep ekoloġiċi, affidabbli u siguri ċċertifikati. Din l-identifikazzjoni ta’ tali setturi u prodotti tista’ tistimula l-adozzjoni ta’ standards Ewropej u internazzjonali għall-ġestjoni tar-riskju.

(46)

Fid-dawl tal-kumplessitajiet tal-katina tal-provvista tas-semikondutturi u r-riskju ta’ nuqqasijiet futuri, dan ir-Regolament jenħtieġ li jipprevedi strumenti għal approċċ ikkoordinat għall-immappjar strateġiku u l-monitoraġġ tas-settur tas-semikondutturi u għall-indirizzar effettiv tat-tfixkil possibbli tas-suq b’mod proporzjonat.

(47)

Jenħtieġ li l-objettiv ta’ mmappjar strateġiku tas-settur tas-semikondutturi jkun li jipprovdi analiżi tal-punti tajbin u d-dgħufijiet tal-Unjoni fis-setturi globali tas-semikondutturi bil-ħsieb li tiġi pprovduta bażi għal miżuri li jiżguraw is-sigurtà tal-provvista u r-reżiljenza tal-ekosistema tas-semikondutturi tal-Unjoni. Għal dak l-għan, jenħtieġ li l-immappjar strateġiku jidentifika fatturi bħal prodotti ewlenin u infrastrutturi kritiċi fis-suq intern li jiddependu mill-provvista ta’ semikondutturi, l-industriji tal-utenti ewlenin u l-ħtiġijiet attwali u mistennija tagħhom, segmenti ewlenin tal-katina tal-provvista tas-semikondutturi tal-Unjoni, karatteristiċi teknoloġiċi, dipendenzi fuq teknoloġija u fornituri ta’ pajjiżi terzi, u konġestjonijiet tas-settur tas-semikondutturi tal-Unjoni, ħtiġijiet attwali u mistennija għall-ħiliet u aċċess għal forza tax-xogħol kwalifikata u, fejn xieraq, l-impatt potenzjali tal-miżuri tas-sett ta’ għodod ta’ emerġenza. Jenħtieġ li l-immappjar strateġiku jkun ibbażat fuq data disponibbli pubblikament u kummerċjalment u, jekk ikun meħtieġ, fuq data miksuba permezz ta’ talbiet volontarji għal informazzjoni tal-impriżi, f’konsultazzjoni mal-Bord Ewropew dwar is-Semikondutturi.

(48)

Sabiex tipprevedi u tħejji għal tfixkil futur tal-istadji differenti tal-katina tal-valur tas-semikondutturi fl-Unjoni u tal-kummerċ fl-Unjoni, jenħtieġ li l-Kummissjoni, assistita mill-Bord Ewropew dwar is-Semikondutturi u abbażi tal-eżitu tal-immappjar strateġiku, tidentifika u tiżviluppa lista ta’ indikaturi ta’ twissija bikrija. Indikaturi bħal dawn jistgħu jinkludu żidiet atipiċi fil-ħin ta’ tħejjija, id-disponibbiltà ta’ materja prima, prodotti intermedji u kapital uman meħtieġa għall-manifattura tas-semikondutturi, jew tagħmir tal-manifattura xieraq, id-domanda prevista għas-semikondutturi fis-swieq tal-Unjoni u dawk globali, iż-żidiet fil-prezzijiet li jaqbżu l-fluttwazzjonijiet normali fil-prezzijiet, l-effett ta’ inċidenti, attakki, diżastri naturali jew avvenimenti serji oħra, l-effett tal-politiki kummerċjali, it-tariffi, ir-restrizzjonijiet fuq l-esportazzjoni, l-ostakli kummerċjali u miżuri oħra relatati mal-kummerċ, u l-effett tal-għeluq tan-negozju, tad-delokalizzazzjonijiet jew tal-akkwiżizzjonijiet ta’ atturi ewlenin tas-suq. Jenħtieġ li l-attivitajiet ta’ monitoraġġ tal-Kummissjoni jiffukaw fuq dawn l-indikaturi ta’ twissija bikrija.

(49)

Minħabba l-ktajjen tal-valur tas-semikondutturi kumplessi, li qed jevolvu malajr u li huma interkonnessi ma’ diversi atturi, huwa meħtieġ approċċ koordinat għal monitoraġġ biex tiżdied il-kapaċità li jittaffew ir-riskji li jistgħu jaffettwaw b’mod negattiv il-provvista tas-semikondutturi u biex jitjieb il-fehim tad-dinamiċi tal-katina tal-valur tas-semikondutturi. Jenħtieġ li l-Kummissjoni, f’konsultazzjoni mal-Bord Ewropew dwar is-Semikondutturi, timmonitorja l-katina tal-valur tas-semikondutturi b’enfasi fuq l-indikaturi ta’ twissija bikrija u l-identifikazzjoni tal-aħjar prattiki għall-mitigazzjoni tar-riskju u trasparenza ikbar fil-katina tal-valur tas-semikondutturi, b’tali mod li ma jkunx jirrappreżenta piż amministrattiv eċċessiv għall-impriżi, b’mod partikolari l-SMEs.

(50)

Sabiex jitnaqqas kemm jista’ jkun il-piż għall-impriżi li jwieġbu għall-monitoraġġ u sabiex jiġi żgurat li l-informazzjoni miksuba tkun tista’ tinġabar b’mod sinifikanti, jenħtieġ li l-Kummissjoni tipprevedi mezzi standardizzati u siguri għal kwalunkwe ġbir ta’ informazzjoni. Jenħtieġ li dawn il-mezzi jiżguraw li kwalunkwe informazzjoni miġbura tiġi ttrattata b’mod kunfidenzjali, filwaqt li jiġu żgurati s-segretezza tan-negozju u ċ-ċibersigurtà.

(51)

Sejbiet rilevanti, inkluż informazzjoni pprovduta mill-partijiet ikkonċernati rilevanti u mill-assoċjazzjonijiet tal-industrija, jenħtieġ li jiġu pprovduti lill-Bord Ewropew dwar is-Semikondutturi biex ikun jista’ jsir skambju regolari ta’ informazzjoni u għall-integrazzjoni tal-informazzjoni f’ħarsa ġenerali ta’ monitoraġġ tal-ktajjen tal-valur tas-semikondutturi.

(52)

Sabiex jippermettu dawk l-attivitajiet ta’ monitoraġġ, jenħtieġ li l-awtoritajiet kompetenti nazzjonali tal-Istati Membri jistabbilixxu lista ta’ kuntatti tal-impriżi rilevanti kollha li joperaw tul il-katina tal-provvista tas-semikondutturi stabbiliti fit-territorju nazzjonali tagħhom. Dik il-lista jenħtieġ li tippermetti l-identifikazzjoni ta’ rispondenti xierqa għal talbiet volontarji għal informazzjoni. Jenħtieġ li ma jkunx meħtieġ li l-lista tkun eżawrjenti. Jenħtieġ li l-lista tiġi ttrattata b’mod li jirrispetta bis-sħiħ ir-regoli ta’ kunfidenzjalità applikabbli.

(53)

Id-disponibbiltà ta’ riżorsi umani, finanzjarji u tekniċi adegwati tippermetti implimentazzjoni effiċjenti tal-kompiti skont dan ir-Regolament u twassal għall-kisba tal-objettivi stabbiliti fih. Għalhekk, mingħajr preġudizzju għall-proċedura baġitarja u għall-awtonomija amministrattiva tagħha, jenħtieġ li l-Kummissjoni tagħmel l-aħjar użu mir-riżorsi biex tiżgura li tkun tista’ twettaq il-kompiti tagħha b’mod effettiv u teżerċita s-setgħat tagħha skont dan ir-Regolament.

(54)

Għadd ta’ impriżi li jipprovdu servizzi jew oġġetti tas-semikondutturi huma preżunti li huma essenzjali għal katina tal-provvista tas-semikondutturi effikaċi fl-ekosistema tas-semikondutturi tal-Unjoni, minħabba l-għadd ta’ impriżi tal-Unjoni li jiddependu fuq il-prodotti tagħhom, is-sehem tagħhom mis-suq tal-Unjoni jew globali, l-importanza tagħhom li jiżguraw livell suffiċjenti ta’ provvista jew l-impatt possibbli tat-tfixkil fil-provvista tal-prodotti jew tas-servizzi tagħhom. Jenħtieġ li l-Istati Membri, f’kooperazzjoni mal-Kummissjoni, jidentifikaw dawk l-atturi ewlenin tas-suq fit-territorji tagħhom.

(55)

Skont l-Artikolu 4 tar-Regolament (UE) 2019/452, fid-determinazzjoni ta’ jekk investiment dirett barrani huwiex probabbli li jaffettwa s-sigurtà jew l-ordni pubbliku, l-Istati Membri u l-Kummissjoni jistgħu jikkunsidraw l-effetti potenzjali tiegħu fuq teknoloġiji kritiċi u oġġetti b’użu doppju kif definiti fl-Artikolu 2, il-punt (1), tar-Regolament tal-Kunsill (KE) Nru 428/2009 (21), inkluż is-semikondutturi.

(56)

Bħala parti mill-monitoraġġ, jenħtieġ li l-Istati Membri jikkunsidraw b’mod speċifiku l-integrità tal-attivitajiet imwettqa minn atturi ewlenin tas-swieq. Kwistjonijiet bħal dawn jistgħu jitressqu għall-attenzjoni tal-Bord Ewropew dwar is-Semikondutturi mill-Istat Membru kkonċernat.

(57)

Sabiex jippermettu l-antiċipazzjoni ta’ nuqqasijiet potenzjali, l-awtoritajiet kompetenti nazzjonali jenħtieġ li javżaw lill-Kummissjoni jekk isiru konxji ta’ riskju ta’ tfixkil serju fil-provvista tas-semikondutturi jew ikollhom informazzjoni konkreta u affidabbli li jista’ jimmaterjalizza kwalunkwe fattur ta’ riskju jew avveniment rilevanti ieħor. Sabiex jiġi żgurat approċċ koordinat, jenħtieġ li l-Kummissjoni, meta ssir taf b’riskju ta’ tfixkil serju fil-provvista tas-semikondutturi jew ikollha informazzjoni konkreta jew affidabbli li jista’ jimmaterjalizza xi fattur ta’ riskju jew avveniment rilevanti ieħor, fuq twissija jew mis-sħab internazzjonali, issejjaħ laqgħa straordinarja tal-Bord Ewropew dwar is-Semikondutturi biex jiġu diskussi s-severità tat-tfixkil u l-bidu possibbli tal-proċedura għall-attivazzjoni tal-fażi tal-kriżi, u jekk ikunx xieraq, meħtieġ u proporzjonat għall-Istati Membri li jwettqu akkwist konġunt koordinat bħala miżura preventiva, kif ukoll biex tidħol fi djalogu mal-partijiet ikkonċernati, bil-ħsieb li jiġu identifikati, imħejjija u possibbilment ikkoordinati tali miżuri preventivi. Jenħtieġ li l-Bord Ewropew dwar is-Semikondutturi u l-Kummissjoni, fi ħdan dak id-djalogu, iqisu l-fehmiet tal-partijiet ikkonċernati tal-katina tal-valur tas-semikondutturi. Jenħtieġ li l-Kummissjoni tikkonsulta u tikkoopera ma’ pajjiżi terzi rilevanti bil-ħsieb li jiġi indirizzat b’mod konġunt tfixkil fil-katina tal-provvista, f’konformità mal-obbligi internazzjonali u mingħajr preġudizzju għar-rekwiżiti proċedurali.

(58)

Il-fażi ta’ kriżi tas-semikondutturi jenħtieġ li tiġi attivata fil-preżenza ta’ evidenza konkreta, serja u affidabbli ta’ tali kriżi. Kriżi tas-semikondutturi sseħħ fejn ikun hemm tfixkil serju fil-provvista tas-semikondutturi jew ostakli serji għall-kummerċ fis-semikondutturi fl-Unjoni li jikkawżaw nuqqasijiet sinifikanti ta’ semikondutturi, prodotti intermedji jew materja prima jew ipproċessata, u tali nuqqasijiet sinifikanti jipprevjenu l-provvista, it-tiswija u l-manutenzjoni ta’ prodotti essenzjali użati minn setturi kritiċi, pereżempju tagħmir mediku u dijanjostiku, sal-punt li dan ikollu effetti detrimentali serji fuq il-funzjonament tas-setturi kritiċi minħabba l-impatt tagħhom fuq is-soċjetà, l-ekonomija u s-sigurtà tal-Unjoni.

(59)

Sabiex jiġi żgurat rispons aġli u effettiv għal tali kriżi tas-semikondutturi, fejn il-Kummissjoni ssir konxja ta’ kriżi potenzjali tas-semikondutturi, jenħtieġ li tivvaluta dwar jekk il-kondizzjonijiet għall-attivazzjoni tal-fażi ta’ kriżi humiex issodisfati. Jekk din il-valutazzjoni tipproduċi evidenza konkreta, serja u affidabbli ta’ kriżi tas-semikondutturi, jenħtieġ li l-Kummissjoni tkun tista’ tippreżenta lill-Kunsill proposta għall-attivazzjoni tal-fażi ta’ kriżi għal perjodu ta’ durata predeterminat ta’ mhux iktar minn 12-il xahar, filwaqt li titqies l-opinjoni tal-Bord Ewropew dwar is-Semikondutturi. Jenħtieġ li l-Kummissjoni tivvaluta l-ħtieġa ta’ estensjoni jew terminazzjoni bikrija tal-fażi ta’ kriżi u tibda tali proċedura, jekk tali ħtieġa tiġi aċċertata, filwaqt li tqis l-opinjoni tal-Bord Ewropew dwar is-Semikondutturi.

(60)

Minħabba n-natura sensittiva tal-attivazzjoni tal-fażi ta’ kriżi u tal-miżuri potenzjali li jistgħu jittieħdu b’reazzjoni għalihom, inkluż l-impatt sinifikanti li tali miżuri jista’ jkollhom fuq l-impriżi privati fl-Unjoni, jenħtieġ li l-Kunsill jingħata s-setgħa li jadotta att ta’ implimentazzjoni fir-rigward tal-attivazzjoni, l-estensjoni u t-tmiem tal-fażi ta’ kriżi fi kriżi tas-semikondutturi.

(61)

Il-kooperazzjoni mill-qrib bejn il-Kummissjoni u l-Istati Membri u l-koordinazzjoni ta’ kull miżura nazzjonali meħuda fir-rigward tal-katina tal-provvista tas-semikondutturi huma indispensabbli tul il-fażi ta’ kriżi bl-għan li jiġi indirizzat it-tfixkil bil-koerenza, bir-reżiljenza u bl-effettività meħtieġa. Għal dak l-għan, jenħtieġ li l-Bord Ewropew dwar is-Semikondutturi jorganizza laqgħat straordinarji kif meħtieġ. Jenħtieġ li kwalunkwe miżura meħuda tkun strettament limitata għall-perjodu ta’ żmien tal-fażi ta’ kriżi.

(62)

Għal rispons rapidu, effiċjenti u kkoordinat min-naħa tal-Unjoni għal kriżi tas-semikondutturi, huwa meħtieġ li tiġi pprovduta informazzjoni f’waqtha u aġġornata lill-Kummissjoni u lill-Istati Membri permezz tal-Bord Ewropew dwar is-Semikundutturi dwar is-sitwazzjoni operazzjonali li qiegħda tiżviluppa kif ukoll biex jiġi żgurat li jkunu jistgħu jittieħdu miżuri effikaċi biex tiġi żgurata l-provvista ta’ semikondutturi lis-setturi kritiċi affettwati. Jenħtieġ li jiġu identifikati u implimentati miżuri xierqa, effikaċi u proporzjonati meta tiġi attivata l-fażi ta’ kriżi, mingħajr preġudizzju għall-possibbiltà ta’ involviment internazzjonali kontinwu mas-sħab rilevanti bl-għan li tiġi mmitigata s-sitwazzjoni ta’ kriżi li tkun qiegħda tevolvi. Fejn xieraq, jenħtieġ li l-Kummissjoni titlob informazzjoni mingħand l-impriżi tul il-katina tal-provvista tas-semikondutturi. Barra minn hekk, jenħtieġ li l-Kummissjoni tkun tista’, fejn meħtieġ u proporzjonat, teżiġi li l-faċilitajiet ta’ produzzjoni integrata u l-fonderiji miftuħa tal-UE jaċċettaw u jipprijoritizzaw ordni tal-produzzjoni ta’ prodotti rilevanti għall-kriżijiet, u taġixxi bħala korp ċentrali għall-akkwisti meta tingħata mandat mill-Istati Membri. Jenħtieġ li l-Kummissjoni tillimita l-miżuri għal ċerti setturi kritiċi. Il-Bord Ewropew dwar is-Semikondutturi jista’ jivvaluta u jagħti pariri wkoll dwar miżuri xierqa u effettivi. Barra minn hekk, il-Bord Ewropew dwar is-Semikondutturi jista’ jagħti pariri dwar il-ħtieġa li jiġu introdotti miżuri ta’ protezzjoni skont ir-Regolament (UE) 2015/479 tal-Parlament Ewropew u tal-Kunsill (22). Jenħtieġ li l-użu tal-miżuri ta’ emerġenza kollha jkun proporzjonat u ristrett għal dak li huwa meħtieġ biex tiġi indirizzata l-kriżi tas-semikondutturi fl-aqwa interess tal-Unjoni. Jenħtieġ li l-Kummissjoni tinforma regolarment lill-Parlament Ewropew u lill-Kunsill dwar il-miżuri meħuda u r-raġunijiet sottostanti. Il-Kummissjoni tista’, wara li tikkonsulta lill-Bord Ewropew dwar is-Semikondutturi, toħroġ gwida ulterjuri dwar l-implimentazzjoni u l-użu tal-miżuri ta’ emerġenza.

(63)

Għadd ta’ setturi huma kritiċi għall-funzjonament xieraq tas-suq intern. Għall-finijiet ta’ dan ir-Regolament, jenħtieġ li dawk is-setturi kritiċi jiġu elenkati f’Anness għal dan ir-Regolament. Jenħtieġ li dik il-lista tkun limitata għas-setturi u s-subsetturi elenkati fl-Anness għad-Direttiva (UE) 2022/2557 tal-Parlament Ewropew u tal-Kunsill (23), fil-verżjoni fis-seħħ fid-19 ta’ Settembru 2023, biż-żieda tas-setturi tad-difiża u s-sigurtà, abbażi tar-rwol importanti tagħhom fl-iżgurar tal-funzjonijiet vitali tas-soċjetà. Jenħtieġ li ċerti miżuri jittieħdu biss bl-għan li tiġi żgurata l-provvista lejn setturi kritiċi. Il-Kummissjoni tista’ tillimita l-miżuri ta’ emerġenza għal uħud minn dawk is-setturi jew għal ċerti partijiet minnhom meta l-kriżi tas-semikondutturi tkun iddisturbat jew tkun qed thedded li tħarbat it-tħaddim tagħhom.

(64)

L-għan tat-talbiet għal informazzjoni minn impriżi tul il-katina tal-provvista tas-semikondutturi stabbiliti fl-Unjoni fil-fażi ta’ kriżi huwa li jkunu jistgħu jsiru valutazzjonijiet preċiżi tal-kriżi tas-semikondutturi jew sabiex jiġu identifikati u mħejjija miżuri potenzjali ta’ mitigazzjoni jew ta’ emerġenza fil-livell tal-Unjoni jew nazzjonali. Tali informazzjoni tista’ tinkludi l-kapaċità potenzjali tal-produzzjoni, il-kapaċità tal-produzzjoni u t-tfixkil u l-konġestjonijiet primarji li jkunu għaddejjin. Dawk l-aspetti jistgħu jinkludu l-istokk attwali tipiku u kurrenti ta’ prodotti rilevanti għall-kriżijiet fil-faċilitajiet ta’ produzzjoni li jinsabu fl-Unjoni kif ukoll il-faċilitajiet ta’ produzzjoni li jinsabu f’pajjiżi terzi fejn joperaw dawk l-impriżi li magħhom jikkuntrattaw jew li mingħandhom jixtru l-provvisti; il-ħin medju tipiku u attwali ta’ tħejjija għall-aktar prodotti komuni manifatturati; l-output tal-produzzjoni mistenni għat-tliet xhur ta’ wara għal kull faċilità ta’ produzzjoni tal-Unjoni; jew raġunijiet li jipprevjenu l-kapaċità tal-produzzjoni milli timtela. Jenħtieġ li tali informazzjoni tkun limitata għal dak li huwa meħtieġ għall-valutazzjoni tan-natura tal-kriżi tas-semikondutturi jew tal-miżuri potenzjali ta’ mitigazzjoni jew ta’ emerġenza fil-livell tal-Unjoni jew nazzjonali. It-talbiet għal informazzjoni jenħtieġ li ma jinvolvux il-forniment ta’ informazzjoni li l-iżvelar tagħha jmur kontra l-interessi tas-sigurtà nazzjonali tal-Istati Membri. L-informazzjoni konkreta li għandha tintalab tista’ tiġi żviluppata abbażi ta’ parir minn qabel minn għadd rappreżentattiv ta’ impriżi rilevanti permezz ta’ konsultazzjoni volontarja, f’kooperazzjoni mal-Bord Ewropew dwar is-Semikondutturi. Jenħtieġ li kwalunkwe talba tkun proporzjonata, filwaqt li jitqiesu l-għanijiet leġittimi tal-impriża u l-kost u l-isforz meħtieġa biex id-data ssir disponibbli, kif ukoll jiġu stabbiliti limiti ta’ żmien xierqa għall-għoti tal-informazzjoni mitluba. Jenħtieġ li l-impriżi jkunu meħtieġa jikkonformaw mat-talba u jistgħu jkunu soġġetti għal penali jekk jonqsu milli jikkonformaw jew jipprovdu informazzjoni skorretta. Jenħtieġ li kwalunkwe informazzjoni miksuba tintuża biss għall-finijiet ta’ dan ir-Regolament u tkun soġġetta għal regoli ta’ kunfidenzjalità. Sabiex jiġi żgurat l-involviment sħiħ tal-Istat Membru fejn l-impriża jkollha s-sit tal-produzzjoni tagħha, jenħtieġ li l-Kummissjoni tibgħat mingħajr dewmien kopja tat-talba għal informazzjoni lill-awtorità nazzjonali kompetenti u, jekk l-awtorità kompetenti nazzjonali titlob dan, taqsam l-informazzjoni miksuba mal-awtorità kompetenti nazzjonali permezz ta’ mezzi siguri. Jekk impriża tirċievi talba għal informazzjoni relatata mal-attivitajiet tagħha fil-qasam tas-semikondutturi minn pajjiż terz, din jenħtieġ li tinforma lill-Kummissjoni b’dan biex il-Kummissjoni tkun tista’ tivvaluta jekk talba għal informazzjoni mill-Kummissjoni hix ġustifikata.

(65)

Bħala strument tal-aħħar istanza biex jiġi żgurat li s-setturi kritiċi jkunu jistgħu jkomplu joperaw fi żmien ta’ kriżi u biss meta jkun meħtieġ u proporzjonat għal dak il-għan, il-faċilitajiet ta’ produzzjoni integrata u l-fonderiji miftuħa tal-UE jistgħu jkunu meħtieġa mill-Kummissjoni li jaċċettaw u li jagħtu prijorità lill-ordnijiet ta’ prodotti rilevanti għall-kriżijiet. Il-benefiċjarji potenzjali ta’ ordnijiet ikklassifikati bħala prijorità jenħtieġ li jkunu entitajiet minn setturi kritiċi jew impriżi li jfornu lil setturi kritiċi li l-attivitajiet tagħhom huma mfixkla jew f’riskju ta’ tfixkil minħabba n-nuqqas. Sabiex jiġi żgurat li l-ordnijiet ikklassifikati bħala prijorità jintużaw biss meta jkun meħtieġ, jenħtieġ li dawn ikunu ristretti għall-benefiċjarji li, għalkemm ikunu implimentaw miżuri ta’ mitigazzjoni tar-riskji, ma setgħux jevitaw, pereżempju permezz tal-prattiki tal-akkwist tagħhom, u ma setgħux itaffu l-impatt tan-nuqqas permezz ta’ mezzi oħra, bħall-użu ta’ ħażniet eżistenti. Dak l-obbligu jista’ jiġi estiż ukoll għal faċilitajiet tal-manifattura tas-semikondutturi li jkunu aċċettaw tali possibbiltà fil-kuntest li jirċievu appoġġ pubbliku, jekk tali appoġġ pubbliku jkollu l-għan li jrawwem il-kapaċità li tiżdied il-kapaċità tal-produzzjoni. Id-deċiżjoni dwar ordni kklassifikata bħala prijorità jenħtieġ li tittieħed f’konformità mal-obbligi legali applikabbli kollha tal-Unjoni, filwaqt li jitqiesu ċ-ċirkostanzi tal-każ. Jenħtieġ li l-obbligu għal ordnijiet kklassifikati bħala prijorità jieħu preċedenza fuq kwalunkwe obbligu ta’ prestazzjoni skont il-liġi privata jew pubblika filwaqt li jenħtieġ li jqis ukoll l-għanijiet leġittimi tal-impriżi u l-kost u l-isforz meħtieġa għal kwalunkwe bidla fis-sekwenza tal-produzzjoni. Jenħtieġ li kull ordni kklassifikata bħala prijorità titqiegħed bi prezz ġust u raġonevoli. Il-kalkolu ta’ tali prezz jista’ jitwettaq fuq il-bażi tal-prezzijiet medji tas-suq matul dawn l-aħħar snin, soġġett għall-għoti ta’ raġunijiet għal kwalunkwe żieda, pereżempju billi titqies l-inflazzjoni jew iż-żieda fl-ispejjeż tal-enerġija. L-impriżi jistgħu jkunu soġġetti għal penali jekk jonqsu milli jikkonformaw mal-obbligu għal ordnijiet klassifikati bħala prijorità.

(66)

Għal faċilitajiet li jwettqu ordni klassifikata bħala prijorità, jista’ jkun ta’ benefiċċju għall-Kummissjoni, assistita mill-Bord Ewropew dwar is-Semikondutturi, u għall-Istati Membri li jiskambjaw l-aħjar prattiki dwar l-eżekuzzjoni ta’ dawk l-ordnijiet, inkluż l-aħjar prattiki amministrattivi.

(67)

Jenħtieġ li l-impriża kkonċernata tkun meħtieġa taċċetta u tipprijoritizza ordni klassifikata bħala prijorità. Bil-ħsieb li jiġi żgurat li l-ordnijiet ikklassifikati bħala prijorità jkunu allinjati mal-kapaċitajiet u mal-portafoll tal-produzzjoni tal-faċilità, jenħtieġ li l-Kummissjoni tipprovdi lill-faċilità kkonċernata l-opportunità li tinstema’ dwar il-fattibbiltà u d-dettalji tal-ordni kklassifikata bħala prijorità. Jenħtieġ li l-Kummissjoni ma toħroġx l-ordni kklassifikata bħala prijorità meta l-faċilità ma tkunx tista’ tissodisfa l-ordni anki jekk tingħata prijorità, kemm jekk minħabba kapaċità potenzjali ta’ produzzjoni jew kapaċità ta’ produzzjoni insuffiċjenti jew minħabba raġunijiet tekniċi, jew meta l-prodott ma jiġix fornut jew is-servizz ma jitwettaqx mill-faċilità jew minħabba li dan ipoġġi piż ekonomiku mhux raġonevoli u jinvolvi diffikultà partikolari għall-impriża, inkluż riskju sostanzjali relatat mal-kontinwità tal-operat.

(68)

Sabiex jiġi żgurat qafas trasparenti u ċar għall-implimentazzjoni ta’ ordnijiet ikklassifikati bħala prijorità, jenħtieġ li l-Kummissjoni tingħata s-setgħa li tadotta att ta’ implimentazzjoni li jistabbilixxi l-arranġamenti prattiċi u operazzjonali. Jenħtieġ li dak l-att ta’ implimentazzjoni jkun fih salvagwardji biex jiġi żgurat li l-ordnijiet ikklassifikati bħala prijorità jiġu implimentati f’konformità mal-prinċipji ta’ neċessità u proporzjonalità, bħal mekkaniżmu li jqis l-ordnijiet eżistenti u mekkaniżmu li jiżgura li l-volumi ta’ ordnijiet ikklassifikati bħala prijorità ma jaqbżux dak li huwa meħtieġ.

(69)

Fiċ-ċirkostanza eċċezzjonali li impriża li topera tul il-katina tal-provvista tas-semikondutturi fl-Unjoni tirċievi talba għal ordni klassifikata bħala prijorità minn pajjiż terz, hija jenħtieġ li tinforma lill-Kummissjoni b’tali talba, sabiex din l-informazzjoni tintuża f’valutazzjoni dwar jekk, f’każ li jkun hemm impatt sinifikanti fuq is-sigurtà tal-provvista lejn setturi kritiċi, u r-rekwiżiti l-oħrajn ta’ ħtieġa, proporzjonalità u legalità jiġu ssodisfati fiċ-ċirkostanzi tal-każ, il-Kummissjoni jenħtieġ li wkoll timponi obbligu ta’ ordni kklassifikata bħala prijorità.

(70)

Fid-dawl tal-importanza li tiġi żgurata s-sigurtà tal-provvista għal setturi kritiċi li jwettqu funzjonijiet vitali tas-soċjetà, il-konformità mal-obbligu li titwettaq ordni klassifikata bħala prijorità jenħtieġ li ma tinvolvix responsabbiltà għad-danni lil partijiet terzi għal kwalunkwe ksur tal-obbligi kuntrattwali li jista’ jirriżulta mill-bidliet temporanji meħtieġa tal-proċessi operazzjonali tal-manifattur ikkonċernat, dment li l-ksur tal-obbligi kuntrattwali kien meħtieġ għall-konformità mal-prijoritizzazzjoni ordnata. L-impriżi li potenzjalment jaqgħu fl-ambitu ta’ ordni klassifikata bħala prijorità jenħtieġ li jantiċipaw din il-possibbiltà fil-kundizzjonijiet tal-kuntratti kummerċjali tagħhom. Mingħajr preġudizzju għall-applikabbiltà ta’ dispożizzjonijiet oħrajn, ir-responsabbiltà għal prodotti difettużi, kif previst mid-Direttiva tal-Kunsill 85/374/KEE (24), mhix affettwata minn din l-eżenzjoni ta’ responsabbiltà.

(71)

L-obbligu li tingħata prijorità lill-produzzjoni ta’ ċerti prodotti jirrispetta l-essenza tal-libertà ta’ intrapriża u l-libertà ta’ kuntratt stabbiliti fl-Artikolu 16 tal-Karta tad-Drittijiet Fundamentali tal-Unjoni Ewropea (“il-Karta”) u d-dritt għall-proprjetà stabbilit fl-Artikolu 17 tal-Karta, u ma jaffettwahomx b’mod sproporzjonat. Kwalunkwe limitazzjoni ta’ dawk id-drittijiet f’dan ir-Regolament, f’konformità mal-Artikolu 52(1) tal-Karta, ser tkun prevista mil-liġi, tirrispetta l-essenza ta’ dawk id-drittijiet u l-libertajiet, u tikkonforma mal-prinċipju tal-proporzjonalità.

(72)

Meta tiġi attivata l-fażi ta’ kriżi, żewġ Stati Membri jew aktar jistgħu jagħtu mandat lill-Kummissjoni biex taggrega d-domanda u taġixxi f’isimhom għall-akkwist pubbliku tagħhom fl-interess pubbliku, f’konformità mar-regoli u l-proċeduri eżistenti tal-Unjoni, u b’hekk tingrana l-kapaċità tal-akkwist tagħha. Jenħtieġ li x-xiri komuni jintuża biss biex jiġi indirizzat it-tfixkil fil-katina tal-provvista tas-semikondutturi matul kriżi. Il-mandat jista’ jawtorizza lill-Kummissjoni tidħol fi ftehimiet dwar ix-xiri ta’ prodotti rilevanti għall-kriżijiet għal ċerti setturi kritiċi. Il-Kummissjoni jenħtieġ li, għal kull talba, tivvaluta l-utilità, in-neċessità u l-proporzjonalità f’konsultazzjoni mal-Bord Ewropew dwar is-Semikondutturi. Meta tkun biħsiebha ma ssegwix it-talba, jenħtieġ li tinforma lill-Istati Membri kkonċernati u lill-Bord Ewropew dwar is-Semikondutturi u tagħti r-raġunijiet tagħha. Jenħtieġ li d-dettalji proċedurali jiġu stabbiliti fi ftehim bejn il-Kummissjoni u l-Istati Membri parteċipanti, inkluż raġunijiet għall-użu tal-mekkaniżmu komuni ta’ xiri u r-responsabbiltajiet li għandhom jiġu assunti. Tali ftehim jista’ jinkludi l-għadd ta’ kuntratti li għandhom jiġu konklużi u l-kondizzjonijiet ta’ xiri komuni, bħall-prezzijiet, il-perjodi ta’ żmien għall-konsenja, il-kwantitajiet u l-klawżoli ta’ inklużjoni fakultattiva jew ta’ esklużjoni fakultattiva. Ix-xiri komuni jista’ jirriżulta fl-iffirmar ta’ kuntratt wieħed li jkopri l-ħtiġijiet tal-Istati Membri kollha jew diversi kuntratti li kull wieħed minnhom ikopri l-ħtiġijiet ta’ Stat Membru wieħed jew aktar. Barra minn hekk, l-Istati Membri parteċipanti jenħtieġ li jkunu intitolati jaħtru rappreżentanti biex jipprovdu gwida u pariri matul il-proċeduri ta’ akkwist u fin-negozjar tal-ftehimiet ta’ xiri. Jenħtieġ li t-tħejjija għall-użu, l-użu jew il-bejgħ mill-ġdid ta’ prodotti mixtrija jibqgħu fil-kompetenza tal-Istati Membri parteċipanti.

(73)

Matul kriżi ta’ nuqqas ta’ semikondutturi, jaf ikun meħtieġ li l-Unjoni tqis miżuri protettivi. Il-Bord Ewropew dwar is-Semikondutturi jenħtieġ li jkun jista’ jesprimi l-fehmiet tiegħu li jinforma l-valutazzjoni tal-Kummissjoni dwar jekk is-sitwazzjoni tas-suq tikkostitwixxix nuqqas sinifikanti ta’ prodotti essenzjali skont ir-Regolament (UE) 2015/479.

(74)

Jenħtieġ li l-qafas istituzzjonali għall-gruppi ta’ esperti, inkluż ir-regoli dwar it-trasparenza għall-entità u s-sottogruppi tagħha, japplika għall-Bord Ewropew dwar is-Semikondutturi, mingħajr preġudizzju għal dan ir-Regolament. Jenħtieġ li l-Bord Ewropew dwar is-Semikondutturi jipprovdi pariri u jassisti lill-Kummissjoni dwar kwistjonijiet speċifiċi. Dawk il-mistoqsijiet jenħtieġ li jinkludu l-għoti ta’ pariri dwar l-Inizjattiva lill-Bord tal-Awtoritajiet Pubbliċi tal-Impriża Konġunta taċ-Ċipep; l-iskambju ta’ informazzjoni dwar il-funzjonament tal-Faċilitajiet ta’ produzzjoni integrata u l-fonderiji miftuħa tal-UE; id-diskussjoni u t-tħejjija tal-identifikazzjoni ta’ setturi u teknoloġiji speċifiċi b’impatt soċjali għoli potenzjali u b’sinifikat mil-lat ta’ sigurtà li jeħtieġu ċertifikazzjoni għal prodotti fdati u l-indirizzar ta’ monitoraġġ ikkoordinat u rispons għall-kriżijiet. Barra minn hekk, jenħtieġ li l-Bord Ewropew dwar is-Semikondutturi jiżgura l-applikazzjoni konsistenti ta’ dan ir-Regolament, jiffaċilita l-kooperazzjoni bejn l-Istati Membri kif ukoll l-iskambju ta’ informazzjoni dwar kwistjonijiet relatati ma’ dan ir-Regolament. Jenħtieġ li l-Bord Ewropew dwar is-Semikondutturi jiskambja wkoll fehmiet mal-Kummissjoni dwar l-aħjar modi biex jiġu żgurati protezzjoni u infurzar effettivi tad-drittijiet tal-PI, informazzjoni kunfidenzjali u sigrieti kummerċjali bl-involviment dovut tal-partijiet ikkonċernati fir-rigward tas-settur tas-semikondutturi. Jenħtieġ li l-Bord Ewropew dwar is-Semikondutturi jappoġġa lill-Kummissjoni f’kooperazzjoni internazzjonali f’konformità mal-obbligi internazzjonali. Jenħtieġ li jservi bħala forum għal diskussjoni dwar, fost l-oħrajn, kif tissaħħaħ il-kooperazzjoni tul il-katina tal-valur globali tas-semikondutturi mingħajr preġudizzju għall-prerogattivi tal-Parlament Ewropew u tal-Kunsill f’konformità mat-Trattati. Għal dan l-għan, jenħtieġ li l-Bord Ewropew dwar is-Semikondutturi jqis il-fehmiet tal-Alleanza Industrijali dwar il-Proċessuri u t-Teknoloġiji tas-Semikondutturi u ta’ partijiet ikkonċernati oħra. Barra minn hekk, il-Bord Ewropew dwar is-Semikondutturi jenħtieġ li jikkoordina, jikkoopera u jiskambja informazzjoni ma’ strutturi oħrajn tal-Unjoni ta’ rispons għall-kriżijiet u ta’ tħejjija għall-kriżijiet bl-għan li jiġi żgurat approċċ koerenti u kkoordinat tal-Unjoni fir-rigward ta’ miżuri ta’ rispons għall-kriżijiet u ta’ tħejjija għall-kriżijiet, għall-kriżijiet tas-semikondutturi.

(75)

Jenħtieġ li rappreżentant tal-Kummissjoni jippresiedi l-Bord Ewropew dwar is-Semikondutturi. Jenħtieġ li kull Stat Membru jaħtar minn tal-inqas rappreżentant wieħed ta’ livell għoli għall-Bord Ewropew dwar is-Semikondutturi. Dawn jistgħu jaħtru wkoll rappreżentanti differenti b’rabta ma’ kompiti differenti tal-Bord Ewropew dwar is-Semikondutturi, pereżempju, skont liema parti ta’ dan ir-Regolament jiġi diskuss fil-laqgħat tal-Bord Ewropew dwar is-Semikondutturi. Biex jirċievi pariri importanti dwar l-attivitajiet tal-Bord Ewropew dwar is-Semikondutturi u biex jippermetti parteċipazzjoni xierqa tal-partijiet ikkonċernati, il-President jenħtieġ li jkun jista’ jistabbilixxi sottogruppi u jenħtieġ li jkun intitolat jistabbilixxi arranġamenti tax-xogħol billi jistieden esperti u osservaturi biex jieħdu sehem fil-laqgħat fuq bażi ad hoc jew billi jistieden partijiet ikkonċernati, b’mod partikolari organizzazzjonijiet li jirrappreżentaw l-interessi tal-industrija tas-semikondutturi tal-Unjoni bħall-Alleanza Industrijali dwar il-Proċessuri u t-Teknoloġiji tas-Semikondutturi, fis-sottogruppi tiegħu bħala osservaturi.

(76)

Il-Bord Ewropew dwar is-Semikondutturi jenħtieġ li jkollu laqgħat separati għall-kompiti tiegħu fir-rigward tal-Inizjattiva u għall-kompiti tiegħu fir-rigward tas-sigurtà tal-provvista u r-reżiljenza kif ukoll bħala monitoraġġ u rispons għal kriżijiet. Jenħtieġ li l-Istati Membri jagħmlu ħilithom biex jiżguraw kooperazzjoni effikaċi u effiċjenti fil-Bord Ewropew dwar is-Semikondutturi. Jenħtieġ li l-President ikun jista’ jiffaċilita l-iskambji bejn il-Bord Ewropew dwar is-Semikondutturi u korpi, uffiċċji, aġenziji u gruppi konsultattivi u ta’ esperti oħrajn tal-Unjoni. Fid-dawl tal-importanza tal-provvista tas-semikondutturi għal setturi oħra u l-ħtieġa ta’ koordinazzjoni li tirriżulta minnha, jenħtieġ li l-President jiżgura l-parteċipazzjoni ta’ istituzzjonijiet u korpi oħra tal-Unjoni bħala osservaturi fil-laqgħat tal-Bord Ewropew dwar is-Semikondutturi fejn rilevanti u xieraq fir-rigward tal-mekkaniżmu ta’ monitoraġġ u ta’ rispons għall-kriżijiet stabbilit f’dan ir-Regolament. Sabiex ikompli l-ħidma, u jagħmel użu minnha, wara l-implimentazzjoni tar-Rakkomandazzjoni (UE) 2022/210 (25), jenħtieġ li l-Bord Ewropew dwar is-Semikondutturi jwettaq il-kompiti tal-Grupp ta’ Esperti Ewropej dwar is-Semikondutturi. Ladarba l-Bord Ewropew dwar is-Semikondutturi jkun operazzjonali, dan il-grupp ta’ esperti jenħtieġ li ma jibqax jeżisti.

(77)

L-Istati Membri għandhom rwol ewlieni fl-applikazzjoni u fl-infurzar ta’ dan ir-Regolament. F’dan ir-rigward, jenħtieġ li kull Stat Membru jiddeżinja awtorità nazzjonali kompetenti waħda jew aktar responsabbli għall-implimentazzjoni effettiva ta’ dan ir-Regolament u jenħtieġ li jiżgura li dawk l-awtoritajiet jingħataw is-setgħa u jkollhom ir-riżorsi adegwati. L-Istati Membri jistgħu jiddeżinjaw awtorità jew awtoritajiet eżistenti. Sabiex tiżdied l-effiċjenza tal-organizzazzjoni fl-Istati Membri u biex jiġi stabbilit punt ta’ kuntatt uffiċjali għall-pubbliku u kontropartijiet oħrajn fil-livell tal-Unjoni u tal-Istati Membri, inkluż il-Kummissjoni u l-Bord Ewropew dwar is-Semikondutturi, jenħtieġ li kull Stat Membru jiddeżinja, f’xi waħda mill-awtoritajiet li jiddeżinja bħala awtorità kompetenti skont dan ir-Regolament, punt uniku ta’ kuntatt nazzjonali wieħed responsabbli għall-koordinazzjoni ta’ kwistjonijiet relatati ma’ dan ir-Regolament u l-kooperazzjoni transfruntiera mal-awtoritajiet kompetenti ta’ Stati Membri oħra.

(78)

Sabiex tiġi żgurata l-kooperazzjoni ta’ fiduċja u kostruttiva tal-awtoritajiet kompetenti fil-livell tal-Unjoni u dak nazzjonali, jenħtieġ li l-partijiet kollha involuti fl-applikazzjoni ta’ dan ir-Regolament jirrispettaw il-kunfidenzjalità tal-informazzjoni u tad-data li jiksbu huma u jwettqu dmirijiethom biex jipproteġu b’mod partikolari d-drittijiet tal-PI, informazzjoni sensittiva dwar in-negozju u sigrieti kummerċjali. Jenħtieġ li kwalunkwe informazzjoni miksuba fl-applikazzjoni għar-rikonoxximent bħala faċilità ta’ produzzjoni integrata jew fonderija miftuħa tal-UE, fil-kuntest ta’ talbiet għal informazzjoni jew obbligi ta’ notifika skont dan ir-Regolament, tintuża biss għall-finijiet ta’ dan ir-Regolament u jenħtieġ li tkun koperta mill-obbligu tas-segretezza professjonali f’konformità mal-Artikolu 339 TFUE, kif ukoll mar-regoli interni tal-Kummissjoni dwar it-trattament sigur tad-data, b’mod partikolari d-Deċiżjoni tal-Kummissjoni (UE, Euratom) 2015/443 (26). Il-Kummissjoni u l-awtoritajiet nazzjonali kompetenti, l-uffiċjali tagħhom, l-impjegati u persuni oħra li jaħdmu fis-superviżjoni ta’ dawn l-awtoritajiet kif ukoll uffiċjali u impjegati taċ-ċivil ta’ awtoritajiet oħra tal-Istati Membri jenħtieġ li jiżguraw il-kunfidenzjalità tal-informazzjoni miksuba fit-twettiq tal-kompiti u l-attivitajiet tagħhom. Dan jenħtieġ li japplika wkoll għall-Bord Ewropew dwar is-Semikondutturi u għall-Kumitat tas-Semikondutturi stabbiliti b’dan ir-Regolament. Fejn xieraq, jenħtieġ li l-Kummissjoni tkun tista’ tadotta atti ta’ implimentazzjoni biex tispeċifika l-arranġamenti prattiċi għat-trattament tal-informazzjoni kunfidenzjali fil-kuntest tal-ġbir ta’ informazzjoni.

(79)

Jenħtieġ li l-konformità mal-obbligi imposti skont dan ir-Regolament tkun infurzabbli permezz ta’ multi u pagamenti perjodiċi ta’ penali. Għal dak l-għan, jenħtieġ li jiġu stabbiliti livelli xierqa ta’ multi għan-nuqqas ta’ konformità mat-talbiet għal informazzjoni u mal-obbligi ta’ notifika skont dan ir-Regolament, filwaqt li jitqiesu l-livelli differenti ta’ gravità tan-nuqqas ta’ konformità bejn iż-żewġ obbligi u ma’ limiti massimi differenti għall-SMEs. Barra minn hekk, jenħtieġ li jiġu stabbiliti pagamenti perjodiċi ta’ penali għan-nuqqas ta’ konformità mal-obbligu li jiġu aċċettati u mwettqa ordnijiet ikklassifikati bħala prijorità, li jenħtieġ li jkunu proporzjonati u jirriflettu l-livelli tal-prezzijiet fis-suq matul l-aħħar 90 jum, b’limiti massimi differenti għall-SMEs. Jenħtieġ li japplikaw perjodi ta’ limitazzjoni għall-impożizzjonijiet ta’ multi u pagamenti perjodiċi ta’ penali, minbarra l-perjodi ta’ limitazzjoni għall-infurzar tal-penali. Barra minn hekk, jenħtieġ li l-Kummissjoni tagħti lill-impriża jew lill-organizzazzjonijiet rappreżentattivi tal-impriżi kkonċernati d-dritt li jinstemgħu.

(80)

Sabiex jiġu riflessi l-bidla teknoloġika u l-iżviluppi tas-suq, sabiex jiġu żgurati l-implimentazzjoni u l-evalwazzjoni effettivi tal-Inizjattiva u sabiex jiġu stabbiliti regoli dettaljati għat-tikketta taċ-ċentri tad-disinn ta’ eċċellenza, jenħtieġ li tiġi delegata lill-Kummissjoni s-setgħa li tadotta atti skont l-Artikolu 290 tat-TFUE bil-ħsieb li jiġi emendat dan ir-Regolament fir-rigward tal-azzjonijiet appoġġati mill-Inizjattiva b’mod konsistenti mal-objettivi tagħha u fir-rigward tal-indikaturi li jistgħu jitkejlu għall-monitoraġġ tal-implimentazzjoni tal-Inizjattiva u għar-rappurtar dwar il-progress tagħha lejn il-kisba tal-objettivi tagħha, u bil-ħsieb li jiġi ssupplimentat dan ir-Regolament billi jiġu stabbiliti l-proċedura għall-applikazzjonijiet u r-rekwiżiti u l-kundizzjonijiet għall-għoti, il-monitoraġġ u l-irtirar tat-tikketta tad-disinn taċ-ċentri ta’ eċċellenza.. Huwa partikolarment importanti li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell ta’ esperti, u li dawk il-konsultazzjonijiet jitwettqu f’konformità mal-prinċipji stabbiliti fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (27). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(81)

Biex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni fir-rigward tal-għażla tal-ECICs, sabiex jinkisbu l-objettivi tal-Inizjattiva, filwaqt li jiġu stabbiliti l-arranġamenti prattiċi u operazzjonali għall-funzjonament ta’ ordnijiet ikklassifikati bħala prijorità, u jiġu speċifikati l-arranġamenti prattiċi għat-trattament ta’ informazzjoni kunfidenzjali. Dawk is-setgħat jenħtieġ li jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (28).

(82)

Minħabba li l-objettiv ta’ dan ir-Regolament, jiġifieri li jiġi stabbilit qafas għat-tisħiħ tal-ekosistema tas-semikondutturi fil-livell tal-Unjoni, ma jistax jintlaħaq b’mod suffiċjenti mill-Istati Membri u jista’ pjuttost, minħabba l-iskala jew l-effetti tal-azzjoni, jinkiseb aħjar fil-livell tal-Unjoni, l-Unjoni tista’ tadotta miżuri f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jintlaħaq dak l-objettiv.

(83)

Sabiex l-implimentazzjoni ta’ dan ir-Regolament tkun tista’ tibda malajr kemm jista’ jkun, bil-ħsieb li jintlaħqu l-objettivi tiegħu, jenħtieġ li jidħol fis-seħħ b’urġenza,