(1)

L-Unjoni stabbiliet għaliha nnifisha l-objettiv li żżomm u tiżviluppa spazju ta’ libertà, sigurtà u ġustizzja. Għall-istabbiliment gradwali ta’ dan l-ispazju, l-Unjoni se tadotta miżuri relatati mal-kooperazzjoni ġudizzjarja f’materji kriminali bbażata fuq il-prinċipju ta’ rikonoxximent reċiproku tas-sentenzi u d-deċiżjonijiet ġudizzjarji, li huwa komunement indikat bħala element ewlieni tal-kooperazzjoni ġudizzjarja f’materji kriminali fl-Unjoni mill-Kunsill Ewropew ta’ Tampere tal-15 u s-16 ta’ Ottubru 1999.

(2)

Il-miżuri sabiex tinkiseb u tiġi ppreservata l-evidenza elettronika huma dejjem aktar importanti għall-investigazzjonijiet u prosekuzzjonijiet kriminali fl-Unjoni kollha. Mekkaniżmi effettivi sabiex tinkiseb informazzjoni elettronika huma essenzjali sabiex tiġi miġġielda l-kriminalità, u tali mekkaniżmi jenħtieġ li jkunu soġġetti għal kondizzjonijiet u salvagwardji sabiex tiġi żgurata konformità sħiħa mad-drittijiet fundamentali u l-prinċipji rikonoxxuti fl-Artikolu 6 tat-Trattat dwar l-Unjoni Ewropea (TUE) u fil-Karta tad-Drittijiet Fundamentali tal-Unjoni Ewropea (“il-Karta”), b’mod partikolari l-prinċipji tan-neċessità u tal-proporzjonalità, il-proċess dovut tal-liġi, il-protezzjoni tal-privatezza u tad-data personali u l-kunfidenzjalità tal-komunikazzjonijiet.

(3)

Id-Dikjarazzjoni Konġunta tal-Ministri tal-Ġustizzja u l-Affarijiet Interni u tar-rappreżentanti tal-istituzzjonijiet tal-Unjoni tal-24 ta’ Marzu 2016 dwar l-attakki terroristiċi fi Brussell enfasizzat il-ħtieġa, bħala kwistjoni ta’ prijorità, li tiġi żgurata u miksuba aktar malajr u b’mod aktar effettiv evidenza diġitali u li jiġu identifikati miżuri konkreti sabiex dan isir.

(4)

Il-konklużjonijiet tal-Kunsill tad-9 ta’ Ġunju 2016 enfasizzaw l-importanza dejjem tiżdied tal-evidenza elettronika fil-proċedimenti kriminali, u l-importanza tal-protezzjoni taċ-ċiberspazju mill-abbuż u mill-attivitajiet kriminali għall-benefiċċju tal-ekonomiji u tas-soċjetajiet, u għalhekk il-ħtieġa li l-awtoritajiet tal-infurzar tal-liġi u l-awtoritajiet ġudizzjarji jkollhom għodod effettivi għall-investigazzjoni u l-prosekuzzjoni ta’ atti kriminali relatati maċ-ċiberspazju.

(5)

Fil-komunikazzjoni konġunta tal-Kummissjoni u tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà lill-Parlament Ewropew u lill-Kunsill tat-13 ta’ Settembru 2017 dwar ir-Reżiljenza, Deterrenza u Difiża: Il-Bini ta’ ċibersigurtà b’saħħitha għall-UE, il-Kummissjoni enfasizzat li l-investigazzjoni u l-prosekuzzjoni effettiva tal-kriminalità bl-użu tal-internet hija deterrent ewlieni għall-attakki ċibernetiċi, u li l-qafas proċedurali preżenti jeħtieġ li jiġi adattat aħjar għall-era tal-internet. Il-ħeffa tal-attakki ċibernetiċi tista’ xi kultant tegħleb il-proċeduri attwali, u għalhekk toħloq ħtiġijiet partikolari għal kooperazzjoni rapida bejn il-fruntieri.

(6)

Ir-riżoluzzjoni tal-Parlament Ewropew tat-3 ta’ Ottubru 2017 dwar il-ġlieda kontra ċ-ċiberkriminalità (3) enfasizzat il-ħtieġa li jinstabu mezzi biex tiġi żgurata u miksuba evidenza elettronika b’mod aktar rapidu, kif ukoll l-importanza tal-kooperazzjoni mill-qrib bejn l-awtoritajiet tal-infurzar tal-liġi, il-pajjiżi terzi u l-fornituri tas-servizzi attivi fit-territorju Ewropew, f’konformità mar-Regolament (UE) 2016/679 tal-Parlament Ewropew u tal-Kunsill (4) u d-Direttiva (UE) 2016/680 tal-Parlament Ewropew u tal-Kunsill (5), u l-ftehimiet eżistenti ta’ assistenza legali reċiproka. Dik ir-riżoluzzjoni tal-Parlament Ewropew enfasizzat ukoll li l-qafas legali frammentat ta’ bħalissa jista’ joħloq sfidi għall-fornituri tas-servizzi sabiex jikkonformaw mat-talbiet tal-infurzar tal-liġi u talbet lill-Kummissjoni tippreżenta qafas legali tal-Unjoni għall-evidenza elettronika b’salvagwardji suffiċjenti għad-drittijiet u l-libertajiet ta’ dawk kollha kkonċernati, filwaqt li laqgħet il-ħidma li għaddejja tal-Kummissjoni lejn il-kisba ta’ pjattaforma ta’ kooperazzjoni b’kanal ta’ komunikazzjoni sigur għall-iskambji diġitali tal-Ordnijiet ta’ Investigazzjoni Ewropej (OIE) għall-evidenza elettronika u t-tweġibiet bejn l-awtoritajiet ġudizzjarji tal-Unjoni.

(7)

Is-servizzi bbażati fuq network jistgħu jiġu pprovduti minn kullimkien u ma jirrikjedux infrastruttura, bini jew persunal fiżiċi fil-pajjiż li fih huwa offrut is-servizz rilevanti. Għalhekk, l-evidenza elettronika rilevanti ħafna drabi tinħażen barra mill-Istat investigattiv jew minn fornitur tas-servizzi stabbilit barra minn dak l-Istat, u dan joħloq sfidi fir-rigward tal-ġbir tal-informazzjoni elettronika fil-proċedimenti kriminali.

(8)

Minħabba l-mod kif is-servizzi bbażati fuq in-network huma fornuti, it-talbiet għall-kooperazzjoni ġudizzjarja ħafna drabi jiġu indirizzati lil Stati li jkunu ospitanti għal għadd kbir ta’ fornituri tas-servizzi. Barra minn hekk, l-għadd ta’ talbiet immultiplika minħabba l-fatt li s-servizzi bbażati fuq in-network qed jintużaw dejjem aktar. Id-Direttiva 2014/41/UE tal-Parlament Ewropew u tal-Kunsill (6) tipprevedi l-possibbiltà tal-ħruġ ta’ OIE għall-fini li tinġabar evidenza fi Stat Membru ieħor. Barra minn hekk, il-Konvenzjoni stabbilita mill-Kunsill f’konformità mal-Artikolu 34 tat-Trattat dwar l-Unjoni Ewropea, dwar l-Assistenza Reċiproka f’Materji Kriminali bejn l-Istati Membri tal-Unjoni Ewropea (7) (il-“Konvenzjoni dwar l-Assistenza Reċiproka f’Materji Kriminali”) tipprevedi wkoll il-possibbiltà li tintalab evidenza mingħand Stat Membru ieħor. Madankollu, il-proċeduri u l-kalendarji previsti fid-Direttiva 2014/41/UE li tistabbilixxi l-OIE u fil-Konvenzjoni dwar l-Assistenza Reċiproka f’Materji Kriminali jistgħu ma jkunux xierqa għall-evidenza elettronika, li hija aktar volatili u tista’ titħassar b’mod aktar faċli u malajr. Il-ksib ta’ evidenza elettronika bl-użu tal-kanali ta’ kooperazzjoni ġudizzjarja ħafna drabi jieħu żmien twil u jirriżulta f’sitwazzjonijiet fejn il-ħjilijiet sussegwenti jista’ jkun li ma jibqgħux disponibbli. Barra minn hekk, ma hemm ebda qafas armonizzat għall-kooperazzjoni mal-fornituri tas-servizzi, filwaqt li ċerti fornituri ta’ pajjiżi terzi jaċċettaw talbiet diretti għal data li ma tkunx data ta’ kontenut kif permess mil-liġi nazzjonali applikabbli tagħhom. Konsegwentement, l-Istati Membri qed jibbażaw dejjem aktar fuq il-kanali ta’ kooperazzjoni volontarji diretti mal-fornituri tas-servizzi fejn ikunu disponibbli, u japplikaw għodod, kondizzjonijiet u proċeduri nazzjonali differenti. Għad-data ta’ kontenut, xi Stati Membri ħadu azzjoni unilaterali, filwaqt li oħrajn baqgħu jibbażaw fuq il-kooperazzjoni ġudizzjarja.

(9)

Il-qafas legali frammentat joħloq sfidi għall-awtoritajiet tal-infurzar tal-liġi u għall-awtoritajiet ġudizzjarji, kif ukoll għall-fornituri tas-servizzi li jkunu jixtiequ jikkonformaw mat-talbiet ta’ natura ġuridika għal evidenza elettronika, peress li qed jiffaċċjaw dejjem aktar inċertezza tad-dritt u, potenzjalment, kunflitti tal-liġi. Għalhekk jeħtieġ li jiġu previsti regoli speċifiċi fir-rigward tal-kooperazzjoni ġudizzjarja transfruntiera għall-preservazzjoni u l-produzzjoni ta’ evidenza elettronika, li jindirizzaw in-natura speċifika tal-evidenza elettronika. Tali regoli jenħtieġ li jinkludu obbligu fuq il-fornituri tas-servizzi koperti mill-kamp ta’ applikazzjoni ta’ dan ir-Regolament biex jirrispondu direttament għat-talbiet li jkunu ġejjin mill-awtoritajiet fi Stat Membru ieħor. Għalhekk, dan ir-Regolament se jikkomplementa d-dritt eżistenti tal-Unjoni u jiċċara r-regoli applikabbli għall-awtoritajiet tal-infurzar tal-liġi u l-awtoritajiet ġudizzjarji kif ukoll għall-fornituri tas-servizzi fil-qasam tal-evidenza elettronika, filwaqt li jiżgura konformità sħiħa mad-drittijiet fundamentali.

(10)

Dan ir-Regolament jirrispetta d-drittijiet fundamentali u josserva l-prinċipji rikonoxxuti mill-Artikolu 6 tat-TUE u mill-Karta, mil-liġi internazzjonali u l-ftehimiet internazzjonali li għalihom l-Unjoni jew l-Istati Membri kollha huma parti, inkluża l-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali, kif ukoll dawk li jinsabu fil-kostituzzjonijiet tal-Istati Membri, fl-ambiti rispettivi tagħhom. Dawn id-drittijiet u l-prinċipji jinkludu, b’mod partikolari, id-dritt għal-libertà u s-sigurtà, ir-rispett għall-ħajja privata u għall-ħajja tal-familja, il-protezzjoni tad-data personali, il-libertà ta’ intrapriża, id-dritt għall-proprjetà, id-dritt għal rimedju effettiv u għal proċess ġust, il-preżunzjoni tal-innoċenza u d-dritt tad-difiża, il-prinċipji tal-legalità u tal-proporzjonalità, kif ukoll id-dritt li wieħed ma jiġix ipproċessat jew ikkastigat darbtejn fi proċeduri kriminali għall-istess reat kriminali.

(11)

Ma hemm xejn f’dan ir-Regolament li jenħtieġ li jiġi interpretat bħala li jipprojbixxi ċ-ċaħda ta’ Ordni ta’ Produzzjoni Ewropea minn awtorità tal-infurzar meta jkun hemm raġunijiet sabiex wieħed jemmen, abbażi ta’ elementi oġġettivi, li l-Ordni ta’ Produzzjoni Ewropea tkun inħarġet sabiex persuna tiġi mħarrka jew ikkastigata għal motivi fondati fuq il-ġeneru, ir-razza jew l-oriġini etnika, ir-reliġjon, l-orjentazzjoni sesswali jew l-identità tal-ġeneru, in-nazzjonalità, il-lingwa jew l-opinjonijiet politiċi tagħha, jew li l-pożizzjoni ta’ dik il-persuna tista’ tiġi preġudikata minħabba kwalunkwe waħda minn dawk il-motivi.

(12)

Il-mekkaniżmu tal-Ordni ta’ Produzzjoni Ewropea u tal-Ordni ta’ Preservazzjoni Ewropea għall-evidenza elettronika fi proċedimenti kriminali jibbaża fuq il-prinċipju tal-fiduċja reċiproka bejn l-Istati Membri u fuq il-preżunzjoni tal-konformità mill-Istati Membri mad-dritt tal-Unjoni, mal-istat tad-dritt u, b’mod partikolari, mad-drittijiet fundamentali, li huma elementi essenzjali tal-ispazju tal-libertà, is-sigurtà u l-ġustizzja tal-Unjoni. Tali mekkaniżmu jippermetti lill-awtoritajiet nazzjonali kompetenti jibagħtu ordnijiet bħal dawn direttament lill-fornituri tas-servizzi.

(13)

Ir-rispett għall-ħajja privata u tal-familja u l-protezzjoni ta’ persuni fiżiċi fir-rigward tal-ipproċessar tad-data personali huma drittijiet fundamentali. F’konformità mal-Artikolu 7 u l-Artikolu 8(1) tal-Karta, kull persuna għandha d-dritt għar-rispett tal-ħajja privata u tal-familja tagħha, ta’ darha u tal-kommunikazzjonijiet tagħha u għall-protezzjoni ta’ data personali li tirrigwardaha.

(14)

Meta jimplimentaw dan ir-Regolament, l-Istati Membri jenħtieġ li jiżguraw li d-data personali tiġi protetta u pproċessata f’konformità mar-Regolament (UE) 2016/679 u mad-Direttiva (UE) 2016/680, kif ukoll mad-Direttiva 2002/58/KE tal-Parlament Ewropew u tal-Kunsill (8), inkluż f’każ ta’ użu ulterjuri, trażmissjonijiet u trasferimenti ulterjuri tad-data miksuba.

(15)

Id-data personali miksuba taħt dan ir-Regolament jenħtieġ li tiġi pproċessata biss meta dan ikun meħtieġ u b’mod li jkun proporzjonat għall-finijiet tal-prevenzjoni, l-investigazzjoni, l-identifikazzjoni u l-prosekuzzjoni ta’ reati jew l-infurzar ta’ sanzjonijiet kriminali u l-eżerċizzju tad-drittijiet tad-difiża. B’mod partikolari, l-Istati Membri jenħtieġ li jiżguraw li japplikaw politiki u miżuri xierqa fil-qasam tal-protezzjoni tad-data għat-trażmissjoni ta’ data personali mill-awtoritajiet rilevanti lill-fornituri tas-servizzi għall-finijiet ta’ dan ir-Regolament, inklużi miżuri sabiex tiġi żgurata s-sigurtà tad-data. Il-fornituri tas-servizzi jenħtieġ li jiżguraw li l-istess salvagwardji japplikaw għat-trażmissjoni ta’ data personali lill-awtoritajiet rilevanti. Jenħtieġ li persuni awtorizzati biss ikollhom aċċess għal informazzjoni li fiha data personali li tista’ tinkiseb permezz ta’ proċessi ta’ awtentikazzjoni.

(16)

Id-drittijiet proċedurali fi proċedimenti kriminali stabbiliti fid-Direttivi 2010/64/UE (9), 2012/13/EU (10), 2013/48/EU (11), (UE) 2016/343 (12), (UE) 2016/800 (13) u (UE) 2016/1919 (14) tal-Parlament Ewropew u tal-Kunsill jenħtieġ li japplikaw, fil-limiti tal-kamp ta’ applikazzjoni ta’ dawk id-Direttivi, għall-proċedimenti kriminali koperti minn dan ir-Regolament rigward l-Istati Membri marbuta b’dawk id-Direttivi. Is-salvagwardji proċedurali skont il-Karta jenħtieġ li japplikaw ukoll.

(17)

Sabiex jiġi ggarantit ir-rispett sħiħ tad-drittijiet fundamentali, il-valur probatorju tal-evidenza miġbura fl-applikazzjoni ta’ dan ir-Regolament jenħtieġ li jiġi vvalutat waqt proċess mill-awtorità ġudizzjarja kompetenti, f’konformità mal-liġi nazzjonali u f’konformità, b’mod partikolari, mad-dritt għal proċess ġust u d-dritt tad-difiża.

(18)

Dan ir-Regolament jistabbilixxi r-regoli li bihom awtorità ġudizzjarja kompetenti fl-Unjoni tista’, fil-proċedimenti kriminali, inklużi investigazzjonijiet kriminali, jew għall-eżekuzzjoni ta’ sentenza ta’ kustodja jew ordni ta’ detenzjoni wara proċedimenti kriminali f’konformità ma’ dan ir-Regolament, tordna fornitur tas-servizzi li joffri servizzi fl-Unjoni sabiex jipproduċi jew jippreserva evidenza elettronika permezz ta’ Ordni ta’ Produzzjoni Ewropea jew Ordni ta’ Preservazzjoni Ewropea. Dan ir-Regolament jenħtieġ li jkun applikabbli fil-każijiet transfruntiera kollha fejn il-fornitur tas-servizzi jkollu l-istabbiliment deżinjat jew ir-rappreżentant legali tiegħu fi Stat Membru ieħor. Dan ir-Regolament huwa mingħajr preġudizzju għas-setgħat tal-awtoritajiet nazzjonali li jindirizzaw lill-fornituri tas-servizzi stabbiliti jew rappreżentati fit-territorju tagħhom sabiex jikkonformaw ma’ miżuri nazzjonali simili.

(19)

Dan ir-Regolament jenħtieġ li jirregola l-ġbir tad-data maħżuna minn fornitur tas-servizzi fil-mument li jirċievi Ordni ta’ Produzzjoni Ewropea jew Ordni ta’ Preservazzjoni Ewropea biss. Huwa jenħtieġ li ma jistabbilixxix obbligu ġenerali taż-żamma tad-data għall-fornituri tas-servizzi u jenħtieġ li ma jkollux l-effett li jirriżulta f’xi żamma ġenerali u indiskriminata tad-data. Jenħtieġ ukoll li dan ir-Regolament ma jawtorizzax l-interċettazzjoni ta’ data jew il-ksib ta’ data li tinħażen wara l-wasla ta’ Ordni ta’ Produzzjoni Ewropea jew Ordni ta’ Preservazzjoni Ewropea.

(20)

Jenħtieġ li l-applikazzjoni ta’ dan ir-Regolament ma taffettwax l-użu tal-kriptaġġ mill-fornituri tas-servizzi jew mill-utenti tagħhom. Id-data mitluba permezz ta’ Ordni ta’ Produzzjoni Ewropea jew Ordni ta’ Preservazzjoni Ewropea jenħtieġ li tiġi pprovduta jew ippreservata irrispettivament minn jekk tkunx kriptata jew le. Madankollu, jenħtieġ li dan ir-Regolament ma jistabbilixxi l-ebda obbligu għall-fornituri tas-servizzi biex jiddekriptaw id-data.

(21)

F’ħafna każijiet, id-data ma tkunx aktar maħżuna jew ipproċessata mod ieħor fuq l-apparat tal-utent iżda tkun disponibbli fuq infrastruttura bbażata fuq il-cloud li tippermetti l-aċċess minn kullimkien. Biex iħaddmu dawk is-servizzi, il-fornituri tas-servizzi ma għandhomx għalfejn ikunu stabbiliti jew ikollhom is-servers f’ġurisdizzjoni speċifika. Għalhekk, l-applikazzjoni ta’ dan ir-Regolament jenħtieġ li ma tiddependix fuq il-lokalizzazzjoni attwali tal-istabbiliment tal-fornitur tas-servizzi jew tal-faċilità ta’ pproċessar jew ħażna tad-data.

(22)

Dan ir-Regolament huwa mingħajr preġudizzju għas-setgħat investigattivi tal-awtoritajiet fi proċedimenti ċivili jew amministrattivi, inkluż fejn dawn il-proċedimenti jistgħu jwasslu għal sanzjonijiet.

(23)

Billi l-proċedimenti għal assistenza legali reċiproka jistgħu jiġu kkunsidrati bħala proċedimenti kriminali f’konformità mal-liġi nazzjonali applikabbli fl-Istati Membri, jenħtieġ li jiġi ċċarat li Ordni ta’ Produzzjoni Ewropea jew Ordni ta’ Preservazzjoni Ewropea jenħtieġ li ma jinħarġux biex jipprovdu assistenza legali reċiproka lil Stat Membru jew pajjiż terz ieħor. F’każijiet bħal dawn, it-talba għal assistenza legali reċiproka jenħtieġ li tkun indirizzata lill-Istat Membru jew pajjiż terz li jista’ jipprovdi assistenza legali reċiproka skont il-liġi nazzjonali tiegħu.

(24)

Fil-qafas tal-proċedimenti kriminali, l-Ordni ta’ Produzzjoni Ewropea u l-Ordni ta’ Preservazzjoni Ewropea jenħtieġ li jinħarġu biss għal proċedimenti kriminali speċifiċi li jikkonċernaw reat kriminali speċifiku li jkun diġà seħħ, wara evalwazzjoni individwali tal-ħtieġa u tal-proporzjonalità ta’ dawk l-ordnijiet f’kull każ individwali, filwaqt li jitqiesu d-drittijiet tal-persuna suspettata jew akkużata.

(25)

Dan ir-Regolament jenħtieġ li japplika wkoll għal proċedimenti mibdija minn awtorità emittenti biex tiġi lokalizzata persuna kkundannata li tkun ħarbet mill-ġustizzja, sabiex tiġi eżegwita sentenza ta’ kustodja jew ordni ta’ detenzjoni wara proċedimenti kriminali. Madankollu, meta s-sentenza ta’ kustodja jew l-ordni ta’ detenzjoni tkun ġiet imposta b’deċiżjoni in absentia jenħtieġ li ma jkunx possibbli li tinħareġ Ordni ta’ Produzzjoni Ewropea jew Ordni ta’ Preservazzjoni Ewropea peress li l-liġi nazzjonali tal-Istati Membri dwar deċiżjonijiet ġudizzjarji mogħtija in absentia tvarja konsiderevolment madwar l-Unjoni.

(26)

Dan ir-Regolament jenħtieġ li japplika għall-fornituri tas-servizzi li joffru servizzi fl-Unjoni, u jenħtieġ li jkun biss possibbli li l-Ordnijiet previsti f’dan ir-Regolament jinħarġu għal data relatata ma’ servizzi offruti fl-Unjoni. Is-servizzi offruti esklussivament barra mill-Unjoni jenħtieġ li ma jiġux inklużi fil-kamp ta’ applikazzjoni ta’ dan ir-Regolament, anki jekk il-fornitur tas-servizzi jkun stabbilit fl-Unjoni. Għalhekk, jenħtieġ li dan ir-Regolament ma jippermetti l-ebda aċċess għal data għajr data relatata mas-servizzi offruti lill-utent fl-Unjoni minn dawk il-fornituri tas-servizzi.

(27)

Il-fornituri tas-servizzi l-aktar rilevanti għall-ġbir ta’ evidenza fil-proċeduri kriminali huma l-fornituri tas-servizzi tal-komunikazzjonijiet elettroniċi u fornituri speċifiċi tas-servizzi tas-soċjetà tal-informazzjoni li jiffaċilitaw l-interazzjoni bejn l-utenti. Għalhekk, iż-żewġ gruppi jenħtieġ li jkunu koperti minn dan ir-Regolament. Is-servizzi tal-komunikazzjonijiet elettroniċi huma definiti fid-Direttiva (UE) 2018/1972/UE tal-Parlament Ewropew u tal-Kunsill (15). u jinkludu servizzi ta’ komunikazzjonijiet interpersonali bħas-servizzi ta’ vuċi fuq IP, messaġġerija istantanja u s-servizzi ta’ posta elettronika. Jenħtieġ li dan ir-Regolament ikun applikabbli wkoll għal fornituri tas-servizzi tas-soċjetà tal-informazzjoni fis-sens tad-Direttiva (UE) 2015/1535 tal-Parlament Ewropew u tal-Kunsill (16) li ma jikkwalifikawx bħala fornituri tas-servizzi ta’ komunikazzjonijiet elettroniċi, iżda joffru lill-utenti tagħhom il-kapaċità li jikkomunikaw ma’ xulxin jew joffru lill-utenti tagħhom servizzi li jistgħu jintużaw biex jipproċessaw jew jaħżnu data f’isimhom. Dan ikun konformi mat-termini użati fil-Konvenzjoni tal-Kunsill tal-Ewropa dwar iċ-Ċiberkriminalità (ETS Nru 185), magħmula f’Budapest fit-23 ta’ Novembru 2001 (“il-Konvenzjoni ta’ Budapest”). L-ipproċessar tad-data jenħtieġ li jinftiehem f’sens tekniku, jiġifieri l-ħolqien jew il-manipulazzjoni ta’ data, jiġifieri operazzjonijiet tekniċi biex jipproduċu jew ibiddlu d-data permezz tal-qawwa tal-ipproċessar tal-kompjuters. Il-kategoriji tal-fornituri tas-servizzi koperti minn dan ir-Regolament jenħtieġ li jinkludu, pereżempju, il-postijiet tas-suq online li jipprovdu lill-konsumaturi u lin-negozji l-kapaċità li jikkomunikaw ma’ xulxin u servizzi oħrajn ta’ hosting, inkluż fejn is-servizz jingħata permezz tal-cloud computing, kif ukoll pjattaformi tal-logħob online u pjattaformi tal-logħob tal-azzard online. Meta fornitur tas-servizzi tas-soċjetà tal-informazzjoni ma jipprovdix lill-utenti tiegħu l-kapaċità li jikkomunikaw ma’ xulxin iżda biss mal-fornitur tas-servizzi, jew ma jipprovdix il-kapaċità li jaħżen jew jipproċessa b’xi mod ieħor id-data, jew fejn il-ħżin tad-data ma tkunx komponent determinanti, jiġifieri, parti essenzjali, mis-servizz ipprovdut lill-utenti, bħas-servizzi legali, ta’ inġinerija arkitettonika u kontabilistiċi pprovduti online mill-bogħod, jenħtieġ li dan ma jaqax fil-kamp ta’ applikazzjoni tad-definizzjoni ta’ “fornitur ta’ servizz” stabbilita f’dan ir-Regolament, anki jekk is-servizzi pprovduti minn dak il-fornitur tas-servizzi jkunu servizzi tas-soċjetà tal-informazzjoni skont it-tifsira tad-Direttiva (UE) 2015/1535.

(28)

Il-fornituri tas-servizzi ta’ infrastruttura tal-internet relatati mal-assenjazzjoni ta’ ismijiet u numri, bħar-reġistri u r-reġistraturi tal-ismijiet ta’ dominji u l-fornituri tas-servizzi ta’ privatezza u proxy, jew ir-reġistri reġjonali tal-internet għall-indirizzi tal-protokoll tal-internet (“IP”), huma ta’ rilevanza partikolari għall-identifikazzjoni tal-atturi wara siti web malizzjużi jew kompromessi. Huma jkollhom fil-pussess tagħhom data li tista’ tagħmel possibbli l-identifikazzjoni ta’ individwu jew entità wara sit web użat f’attività kriminali, jew il-vittma ta’ attività kriminali.

(29)

Li jiġi determinat jekk fornitur tas-servizzi joffrix servizzi fl-Unjoni jirrikjedi valutazzjoni dwar jekk il-fornitur tas-servizzi jippermettix persuni fiżiċi jew ġuridiċi fi Stat Membru wieħed jew aktar jużaw is-servizzi tiegħu. Madankollu, is-sempliċi aċċessibbiltà ta’ interfaċċa online fl-Unjoni, bħal pereżempju l-aċċessibbiltà ta’ sit web jew ta’ indirizz tal-posta elettronika jew ta’ dettalji oħra ta’ kuntatt ta’ fornitur tas-servizzi jew ta’ intermedjarju, waħedha, jenħtieġ li titqies suffiċjenti biex jiġi determinat li fornitur tas-servizz joffri servizzi fl-Unjoni fis-sens ta’ dan ir-Regolament.

(30)

Konnessjoni sostanzjali mal-Unjoni jenħtieġ li tkun ukoll sabiex jiġi determinat jekk fornitur tas-servizzi joffrix servizzi fl-Unjoni. Tali konnessjoni sostanzjali mal-Unjoni jeħtieġ li titqies li teżisti meta l-fornitur tas-servizzi jkollu stabbiliment fl-Unjoni. Fin-nuqqas ta’ stabbiliment bħal dan, il-kriterju ta’ konnessjoni sostanzjali jenħtieġ li jiġi bbażat fuq kriterji fattwali speċifiċi bħall-eżistenza ta’ għadd sinifikanti ta’ utenti fi Stat Membru wieħed jew aktar, jew l-immirar tal-attivitajiet lejn Stat Membru wieħed jew aktar. L-immirar tal-attivitajiet fid-direzzjoni ta’ Stat Membru wieħed jew aktar jenħtieġ li jiġi determinat abbażi taċ-ċirkostanzi kollha rilevanti, inklużi fatturi bħall-użu ta’ lingwa jew munita ġeneralment użata f’dak l-Istat Membru, jew il-possibbiltà li jiġu ordnati prodotti jew servizzi. L-immirar tal-attivitajiet lejn Stat Membru jista’ jiġi determinat ukoll mid-disponibbiltà ta’ applikazzjoni (“app”) fl-app store nazzjonali rilevanti, mill-forniment ta’ reklamar lokali jew reklamar bil-lingwa li ġeneralment tintuża f’dak l-Istat Membru, jew mill-immaniġġjar tar-relazzjonijiet mal-klijenti bħal pereżempju billi jiġi pprovdut servizz lill-klijent bil-lingwa li ġeneralment tintuża f’dak l-Istat Membru. Jenħtieġ ukoll li tiġi kkunsidrata wkoll li teżisti konnessjoni sostanzjali meta fornitur tas-servizzi jidderieġi l-attivitajiet tiegħu lejn Stat Membru wieħed jew aktar kif stabbilit fir-Regolament (UE) Nru 1215/2012 tal-Parlament Ewropew u tal-Kunsill (17). Min-naħa l-oħra, il-forniment ta’ servizz għall-fini tas-sempliċi konformità mal-projbizzjoni li ssir diskriminazzjoni stabbilita fir-Regolament (UE) 2018/302 tal-Parlament Ewropew u tal-Kunsill (18) jenħtieġ li ma jitqiesx, mingħajr raġunijiet addizzjonali, bħala li jkun qiegħed jidderieġi jew jimmira l-attivitajiet lejn territorju partikolari fl-Unjoni. Jenħtieġ li japplikaw l-istess kunsiderazzjonijiet meta jiġi ddeterminat jekk fornitur tas-servizzi joffrix servizzi fi Stat Membru.

(31)

Dan ir-Regolament jenħtieġ li jkopri l-kategoriji ta’ data tad-data dwar l-abbonati, id-data tat-traffiku u d-data ta’ kontenut. Tali kategorizzazzjoni hija konformi mal-liġi ta’ bosta Stati Membri u d-dritt tal-Unjoni, bħad-Direttiva 2002/58/KE u l-ġurisprudenza tal-Qorti tal-Ġustizzja, kif ukoll id-dritt internazzjonali, b’mod partikolari l-Konvenzjoni ta’ Budapest.

(32)

L-indirizzi IP kif ukoll in-numri tal-aċċess u l-informazzjoni relatata jistgħu jikkostitwixxu punt ta’ tluq kruċjali għal investigazzjonijiet kriminali li fihom l-identità ta’ persuna suspettata ma tkunx magħrufa. Dawn huma parti tipika ta’ rekord tal-avvenimenti, magħrufa wkoll bħala log tas-server, li tindika l-bidu u t-tmiem ta’ sessjoni ta’ aċċess tal-utent għal servizz. Din ħafna drabi tkun indirizz IP individwali, kemm jekk ikun statiku kif ukoll dinamiku, jew identifikatur ieħor li jidentifika l-interfaċċa tan-network użata waqt is-sessjoni ta’ aċċess. Informazzjoni relatata dwar il-bidu u t-tmiem ta’ sessjoni ta’ aċċess tal-utent għal servizz, bħall-portijiet sors u l-kronogramma, huwa meħtieġ peress li l-indirizzi IP spiss jiġu kondiviżi fost l-utenti, pereżempju fejn ikun hemm fis-seħħ traduzzjoni tal-indirizz tan-network (CGN) tal-grad tat-trasportaturi jew ekwivalenti tekniċi. Madankollu, skont l-acquis tal-Unjoni, l-indirizzi IP għandhom jitqiesu bħala data personali u jridu jibbenefikaw mill-protezzjoni sħiħa mogħtija mill-acquis tal-Unjoni dwar il-protezzjoni tad-data. Barra minn hekk, f’ċerti ċirkostanzi, l-indirizzi IP jistgħu jitqiesu bħala data tat-traffiku. Barra minn hekk, f’xi Stati Membri, in-numri tal-aċċess u l-informazzjoni relatata jitqiesu bħala data tat-traffiku. Madankollu, għall-fini ta’ investigazzjoni kriminali speċifika, l-awtoritajiet tal-infurzar tal-liġi jista’ jkollhom jitolbu indirizz IP kif ukoll numri tal-aċċess u l-informazzjoni relatat għall-iskop uniku li jidentifikaw l-utent qabel ma d-data dwar l-abbonati relatata ma’ dak l-identifikatur tkun tista’ tintalab mingħand il-fornitur tas-servizzi. F’każijiet bħal dawn, huwa xieraq li jiġi applikat l-istess reġim bħal dak għad-data dwar l-abbonati, kif definit f’dan ir-Regolament.

(33)

Meta l-indirizzi IP, in-numri tal-aċċess u l-informazzjoni relatata ma jintalbux għall-iskop uniku li jiġi identifikat l-utent f’investigazzjoni kriminali speċifika, dawn ġeneralment jiġu mitluba biex jiksbu informazzjoni aktar intrużiva għall-privatezza, bħall-kuntatti u fejn jinsab l-utent. B’hekk, jistgħu jservu biex jiġi stabbilit profil komprensiv ta’ individwu kkonċernat, iżda fl-istess ħin jistgħu jiġu pproċessati u analizzati aktar faċilment mid-data ta’ kontenut, peress li huma ppreżentati f’format strutturat u standardizzat. Għalhekk huwa essenzjali li, f’sitwazzjonijiet bħal dawn, l-indirizzi IP, in-numri tal-aċċess u l-informazzjoni relatata mhux mitluba għall-iskop uniku li jiġi identifikat l-utent f’investigazzjoni kriminali speċifika, jiġu ttrattati bħala data tat-traffiku u jintalbu taħt l-istess reġim għad-data ta’ kontenut, kif definit f’dan ir-Regolament.

(34)

Il-kategoriji kollha tad-data jinkludu data personali u għalhekk huma koperti mis-salvagwardji skont l-acquis dwar il-protezzjoni tad-data tal-Unjoni. Madankollu, l-intensità tal-impatt fuq id-drittijiet fundamentali tvarja bejn il-kategoriji, b’mod partikolari bejn id-data dwar l-abbonati u d-data mitluba għall-iskop uniku li jiġi identifikat l-utent kif definit f’dan ir-Regolament, minn naħa waħda, u d-data tat-traffiku, ħlief għad-data mitluba għall-iskop uniku li jiġi identifikat l-utent kif definit f’dan ir-Regolament, u d-data ta’ kontenut min-naħa l-oħra. Filwaqt li d-data dwar l-abbonati kif ukoll l-indirizzi IP, in-numri ta’ aċċess u l-informazzjoni relatata, meta mitluba għall-iskop uniku li jiġi identifikat l-utent, jistgħu jkunu utli biex jinkisbu l-ewwel ħjilijiet f’investigazzjoni dwar l-identità ta’ persuna suspettata, id-data tat-traffiku, ħlief għal data mitluba għall-iskop uniku li jiġi identifikat l-utent kif definit f’dan ir-Regolament, u d-data ta’ kontenut sikwit ikunu aktar rilevanti bħala materjal probatorju. Għalhekk huwa essenzjali li dawk il-kategoriji kollha ta’ data jkunu koperti minn dan ir-Regolament. Minħabba l-grad li jvarja ta’ ndħil fid-drittijiet fundamentali, jenħtieġ li jiġu imposti salvagwardi u kondizzjonijiet adatti għall-ksib ta’ tali data.

(35)

Sitwazzjonijiet fejn ikun hemm theddida imminenti għall-ħajja, għall-integrità fiżika jew għas-sikurezza ta’ persuna jenħtieġ li jiġu ttrattati bħala każijiet ta’ emerġenza, u jkunu jinvolvu limiti ta’ żmien iqsar għall-fornitur tas-servizzi u għall-awtorità ta’ infurzar. Meta t-tfixkil jew il-qerda ta’ infrastruttura kritika kif definit fid-Direttiva tal-Kunsill 2008/114/KE (19) jimplika tali theddida, inkluż permezz ta’ ħsara serja għall-forniment ta’ provvisti bażiċi lill-popolazzjoni jew għall-eżerċizzju tal-funzjonijiet ewlenin tal-Istat, tali sitwazzjoni jenħtieġ li tiġi ttrattata wkoll bħala każ ta’ emerġenza, f’konformità mad-dritt tal-Unjoni.

(36)

Meta tinħareġ Ordni ta’ Produzzjoni Ewropea jew Ordni ta’ Preservazzjoni Ewropea, jenħtieġ li dejjem ikun hemm awtorità ġudizzjarja involuta fil-proċess ta’ ħruġ jew fil-proċess ta’ validazzjoni tal-ordni. Minħabba n-natura aktar sensittiva tad-data tat-traffiku, ħlief għad-data mitluba għall-iskop uniku li jiġi identifikat l-utent kif definit f’dan ir-Regolament, u tad-data ta’ kontenut, il-ħruġ jew il-validazzjoni ta’ Ordni ta’ Produzzjoni Ewropea biex jinkisbu dawk il-kategoriji tad-data jirrikjedi rieżami minn imħallef. billi d-data dwar l-abbonati u d-data mitluba għall-iskop uniku li jiġi identifikat l-utent kif definit f’dan ir-Regolament huma inqas sensittivi, Ordni ta’ Produzzjoni Ewropea biex tinkiseb tali data tista’ wkoll tinħareġ jew tiġi vvalidata minn prosekutur pubbliku kompetenti. F’konformità mad-dritt għal proċess ġust, kif imħares mill-Karta u mill-Konvenzjoni Ewropea għall-Protezzjoni tad-Drittijiet tal-Bniedem u tal-Libertajiet Fundamentali, il-prosekuturi pubbliċi għandhom jeżerċitaw ir-responsabbiltajiet tagħhom b’mod oġġettiv, billi jieħdu d-deċiżjoni tagħhom fir-rigward tal-ħruġ jew il-validazzjoni ta’ Ordni ta’ Produzzjoni Ewropej jew Ordni ta’ Preservazzjoni Ewropej abbażi biss tal-elementi fattwali fil-fajl tal-każ u filwaqt li jqisu l-evidenza inkriminatorja u li tiskaġuna kollha.

(37)

Sabiex jiġi żgurat li d-drittijiet fundamentali jkunu mħarsa bis-sħiħ, jenħtieġ fil-prinċipju li kwalunkwe validazzjoni ta’ Ordnijiet ta’ Produzzjoni Ewropej jew Ordnijiet ta’ Preservazzjoni Ewropej mill-awtoritajiet ġudizzjarji tinkiseb qabel ma tinħareġ l-ordni kkonċernata. L-eċċezzjonijiet għal dak il-prinċipju jenħtieġ li jsiru biss f’każijiet ta’ emerġenza stabbiliti b’mod validu meta tintalab il-produzzjoni ta’ data dwar l-abbonati jew data mitluba għall-iskop uniku li jiġi identifikat l-utent, kif definit f’dan ir-Regolament, jew il-preservazzjoni tad-data, fejn ma jkunx possibbli li tinkiseb validazzjoni minn qabel mill-awtorità ġudizzjarja fil-ħin, b’mod partikolari minħabba li l-awtorità ta’ validazzjoni ma tkunx tista’ tintlaħaq biex tinkiseb validazzjoni u t-theddida tant tkun imminenti li tkun trid tittieħed azzjoni immedjata. Madankollu, tali eċċezzjonijiet jenħtieġ li jsiru biss meta l-awtorità li toħroġ l-ordni kkonċernata tkun tista’ toħroġ ordni f’każ domestiku simili skont il-liġi nazzjonali mingħajr validazzjoni minn qabel.

(38)

Ordni ta’ Produzzjoni Ewropea jenħtieġ li tinħareġ biss jekk tkun meħtieġa, proporzjonata, adegwata u applikabbli għall-każ inkwistjoni. L-awtorità emittenti jenħtieġ li tqis id-drittijiet tal-persuna suspettata jew akkużata fi proċedimenti relatati ma’ reat kriminali u jenħtieġ li toħroġ Ordni ta’ Produzzjoni Ewropea biss jekk tali ordni setgħet inħarġet taħt l-istess kondizzjonijiet f’każ domestiku simili. Il-valutazzjoni jekk tinħariġx Ordni ta’ Produzzjoni Ewropea jenħtieġ li tikkunsidra jekk tali ordni tkunx limitata għal dak li jkun strettament meħtieġ sabiex jintlaħaq l-għan leġittimu li tinkiseb id-data li tkun rilevanti u neċessarja bħala evidenza f’każ individwali.

(39)

F’każijiet fejn tinħareġ Ordni ta’ Produzzjoni Ewropea biex jinkisbu kategoriji differenti ta’ data, l-awtorità emittenti jenħtieġ li tiżgura li l-kondizzjonijiet u l-proċeduri, bħan-notifika lill-awtorità tal-infurzar, ikunu ssodisfati għal kull waħda minn dawk il-kategoriji ta’ data, rispettivament.

(40)

Minħabba n-natura aktar sensittiva tad-data tat-traffiku, ħlief għad-data mitluba għall-iskop uniku li jiġi identifikat l-utent kif definit f’dan ir-Regolament, u tad-data ta’ kontenut, jenħtieġ li ssir distinzjoni rigward l-għan materjali ta’ dan ir-Regolament. Jenħtieġ li jkun possibbli li tinħareġ Ordni ta’ Produzzjoni Ewropea biex tinkiseb data dwar l-abbonati jew biex tinkiseb data mitluba għall-iskop uniku li jiġi identifikat l-utent, kif definit f’dan ir-Regolament, għal kull reat kriminali; filwaqt li Ordni ta’ Produzzjoni Ewropea biex tinkiseb data tat-traffiku, ħlief għal data mitluba għall-iskop uniku li jiġi identifikat l-utent kif definit f’dan ir-Regolament, jew biex tinkiseb data ta’ kontenut, jenħtieġ li tkun soġġetta għal rekwiżiti aktar stretti biex tiġi riflessa n-natura aktar sensittiva ta’ din id-data. Ir-Regolament jenħtieġ li jipprevedi soll fir-rigward tal-kamp ta’ applikazzjoni li jippermetti approċċ proporzjonat, flimkien ma’ għadd ta’ kondizzjonijiet u salvagwardji ex ante u ex post oħra sabiex jiżguraw ir-rispett għall-proporzjonalità u d-drittijiet tal-persuni affettwati. Fl-istess ħin, jenħtieġ li tali soll ma jillimitax l-effettività ta’ dan ir-Regolament u l-użu tiegħu mill-professjonisti. Jekk jitħalla l-ħruġ ta’ Ordnijiet ta’ Produzzjoni Ewropej fi proċedimenti kriminali biss għar-reati li jġorru minn tal-anqas sentenza ta’ kustodja massima ta’ tliet snin, dan ikun jillimita l-kamp ta’ applikazzjoni ta’ dan ir-Regolament għal reati aktar serji, mingħajr ma jaffettwa eċċessivament il-possibbiltajiet tal-użu tiegħu mill-professjonisti. Dik il-limitazzjoni teskludi mill-kamp ta’ applikazzjoni ta’ dan ir-Regolament għadd sinifikanti ta’ reati li huma kkunsidrati anqas serji mill-Istati Membri, kif espress f’sanzjoni massima aktar baxxa. Dik il-limitazzjoni jkollha l-vantaġġ ukoll li tkun faċilment applikabbli fil-prattika.

(41)

Hemm reati speċifiċi fejn l-evidenza ġeneralment tkun disponibbli esklussivament f’forma elettronika, li għandha natura partikolarment qasira. Dan huwa l-każ għar-reati ċibernetiċi, anki dawk li jistgħu ma jkunux meqjusa bħala serji fihom infushom iżda li jistgħu jikkawżaw ħsara estensiva jew konsiderevoli, b’mod partikolari reati b’impatt individwali baxx iżda bi ħsara ta’ volum għoli u kumplessiv. Għall-biċċa l-kbira tal-każijiet li fihom ir-reat ikun twettaq permezz ta’ sistema tal-informazzjoni, l-applikazzjoni tal-istess soll bħal fil-każ ta’ tipi oħra ta’ reati fil-biċċa l-kbira twassal għal impunità. Dak jiġġustifika l-applikazzjoni ta’ dan ir-Regolament għal tali reati anki meta dawn iġorru sentenza ta’ kustodja massima ta’ anqas minn tliet snin. Barra minn hekk, ir-reati relatati mat-terroriżmu fis-sens tad-Direttiva (UE) 2017/541 tal-Parlament Ewropew u tal-Kunsill (20) kif ukoll ir-reati li jikkonċernaw l-abbuż sesswali u l-isfruttament sesswali tat-tfal fis-sens tad-Direttiva 2011/93/UE tal-Parlament Ewropew u tal-Kunsill (21) jenħtieġ li ma jirrikjedux is-soll minimu ta’ sentenza ta’ kustodja massima ta’ tliet snin.

(42)

Bħala kwistjoni ta’ prinċipju, Ordni ta’ Produzzjoni Ewropea jenħtieġ li tiġi indirizzata lill-fornitur tas-servizzi, li jaġixxi bħala kontrollur. Madankollu, f’xi ċirkostanzi, id-determinazzjoni ta’ jekk fornitur tas-servizzi għandux ir-rwol ta’ kontrollur jew proċessur tista’ tkun partikolarment diffiċli, b’mod partikolari meta diversi fornituri tas-servizzi jkunu involuti fl-ipproċessar tad-data jew meta l-fornituri tas-servizzi jipproċessaw id-data f’isem persuna fiżika. Id-distinzjoni bejn ir-rwoli tal-kontrollur u tal-proċessur fir-rigward ta’ sett partikolari ta’ data teħtieġ mhux biss għarfien speċjalizzat tal-kuntest legali, iżda tista’ tirrikjedi wkoll interpretazzjoni ta’ oqfsa kuntrattwali spiss kumplessi ħafna li f’każ speċifiku jipprovdu allokazzjoni lil diversi fornituri tas-servizzi ta’ kompiti u rwoli differenti fir-rigward ta’ sett partikolari ta’ data. Meta l-fornituri tas-servizzi jipproċessaw id-data f’isem persuna fiżika, f’xi każijiet jista’ jkun diffiċli li jiġi ddeterminat min huwa l-kontrollur, anki meta jkun hemm fornitur tas-servizzi wieħed biss involut. Meta d-data kkonċernata tinħażen jew tiġi pproċessata b’xi mod ieħor minn fornitur tas-servizzi u ma jkun hemm l-ebda ċarezza dwar min huwa l-kontrollur, minkejja sforzi raġonevoli min-naħa tal-awtorità emittenti, jenħtieġ li għalhekk ikun possibbli li tiġi indirizzata Ordni ta’ Produzzjoni Ewropea direttament lil dak il-fornitur tas-servizzi. Barra minn hekk, f’xi każijiet, l-indirizzar tal-kontrollur jista’ jkun ta’ detriment għall-investigazzjoni fil-każ ikkonċernat, pereżempju minħabba li l-kontrollur ikun persuna suspettata jew akkużata jew ikkundannata jew ikun hemm indikazzjonijiet li l-kontrollur jista’ jkun qed jaġixxi fl-interess tal-persuna li hija s-suġġett għall-investigazzjoni. Anki f’dawk il-każijiet, jenħtieġ li jkun possibbli li Ordni ta’ Produzzjoni Ewropea tiġi indirizzata direttament lill-fornitur tas-servizzi li jipproċessa d-data f’isem il-kontrollur. Dak jenħtieġ li ma jaffettwax id-dritt tal-awtorità emittenti li tordna lill-fornitur tas-servizzi jippreserva d-data.

(43)

F’konformità mar-Regolament (UE) 2016/679, il-proċessur li jaħżen jew inkella jipproċessa d-data f’isem il-kontrollur jenħtieġ li jinforma lill-kontrollur dwar il-produzzjoni tad-data sakemm l-awtorità emittenti ma tkunx talbet lill-fornitur tas-servizzi biex iżomm lura milli jinforma lill-kontrollur, sakemm ikun meħtieġ u proporzjonat, sabiex ma jostakolax il-proċedimenti kriminali rilevanti. F’dak il-każ, l-awtorità emittenti jenħtieġ li tindika fil-fajl tal-każ ir-raġunijiet għad-dewmien biex tinforma lill-kontrollur u jenħtieġ li, fiċ-ċertifikat li jakkumpanjah trażmess lid-destinatarju, tiżdied ukoll ġustifikazzjoni qasira.

(44)

Meta d-data tinħażen jew tiġi pproċessata b’xi mod ieħor bħala parti minn infrastruttura pprovduta minn fornitur tas-servizzi lil awtorità pubblika, jenħtieġ li jkun possibbli biss li Ordni ta’ Produzzjoni Ewropea jew Ordni ta’ Preservazzjoni Ewropea tinħareġ meta l-awtorità pubblika li għaliha tkun maħżuna jew ipproċessata b’xi mod ieħor id-data tkun tinsab fl-Istat emittenti.

(45)

F’każijiet fejn id-data protetta minn privileġġ professjonali skont il-liġi tal-Istat emittenti tinħażen jew tiġi pproċessata mod ieħor minn fornitur tas-servizzi bħala parti minn infrastruttura pprovduta lil professjonisti koperti minn privileġġ professjonali (“professjonist privileġġat”), fil-kapaċità kummerċjali tagħhom, jenħtieġ li jkun possibbli li tinħareġ Ordni ta’ Produzzjoni Ewropea biss biex tinkiseb data tat-traffiku, ħlief għal data mitluba għall-iskop uniku li jiġi identifikat l-utent kif definit f’dan ir-Regolament, jew biex tinkiseb data ta’ kontenut meta l-professjonist privileġġat ikun jirrisjedi fl-Istat emittent, u meta l-indirizzar tal-professjonist privileġġat jista’ jkun ta’ detriment għall-investigazzjoni, jew meta l-privileġġi jkunu ġew rinunzjati f’konformità mal-liġi applikabbli.

(46)

Il-prinċipju ta’ ne bis in idem huwa prinċipju fundamentali tal-liġi fl-Unjoni, kif rikonoxxut mill-Karta u żviluppat mill-ġurisprudenza tal-Qorti tal-Ġustizzja tal-Unjoni Ewropea. Meta l-awtorità emittenti jkollha raġunijiet biex temmen li jistgħu jkunu għaddejjin proċedimenti kriminali paralleli fi Stat Membru ieħor, jenħtieġ li hija tikkonsulta lill-awtoritajiet ta’ dak l-Istat Membru b’mod konformi mad-Deċiżjoni Qafas tal-Kunsill 2009/948/ĠAI (22). Fi kwalunkwe każ, Ordni ta’ Produzzjoni Ewropea jew Ordni ta’ Preservazzjoni Ewropea jeħtieġ li ma tinħariġx meta l-awtorità emittenti jkollha raġunijiet biex temmen li dan imur kontra l-prinċipju ne bis in idem.

(47)

L-immunitajiet u l-privileġġi, li jistgħu jirreferu għal kategoriji ta’ persuni, bħal diplomatiċi, jew relazzjonijiet protetti b’mod speċifiku, bħall-privileġġ professjonali legali jew id-dritt tal-ġurnalisti li ma jikxfux is-sorsi tal-informazzjoni tagħhom, huma msemmija fi strumenti oħra ta’ rikonoxximent reċiproku bħal fid-Direttiva 2014/41/UE li tistabbilixxi l-OIE. Il-firxa u l-impatt tal-immunitajiet u tal-privileġġi jvarjaw skont il-liġi nazzjonali applikabbli li jenħtieġ li tiġi kkunsidrata meta tinħareġ Ordni ta’ Produzzjoni Ewropea jew Ordni ta’ Preservazzjoni Ewropea, billi l-awtorità emittenti jenħtieġ li tkun tista’ toħroġ l-ordni biss kieku setgħet tinħareġ taħt l-istess kondizzjonijiet f’sitwazzjoni domestika simili. Ma hemm l-ebda definizzjoni komuni ta’ x’jikkostitwixxi immunità jew privileġġ fid-dritt tal-Unjoni. Id-definizzjoni preċiża ta’ dawk it-termini għalhekk titħalla għal-liġi nazzjonali, u d-definizzjoni tista’ tinkludi protezzjonijiet li japplikaw, pereżempju, għal professjonijiet mediċi u legali, inkluż meta jintużaw pjattaformi speċjalizzati f’dawk il-professjonijiet. Id-definizzjoni preċiża ta’ immunitajiet u privileġġi tista’ tinkludi wkoll regoli dwar id-determinazzjoni u l-limitazzjoni tar-responsabbiltà kriminali relatata mal-libertà tal-istampa u l-libertà ta’ espressjoni f’media oħra.

(48)

Meta l-awtorità emittenti tipprova tikseb data tat-traffiku, ħlief għad-data mitluba għall-iskop uniku li jiġi identifikat l-utent kif definit f’dan ir-Regolament, jew li tikseb data ta’ kontenut, billi toħroġ Ordni ta’ Produzzjoni Ewropea u jkollha raġunijiet raġonevoli biex temmen li d-data mitluba tkun protetta b’immunitajiet jew privileġġi mogħtija mil-liġi tal-Istat tal-infurzar, jew li dik id-data hija soġġetta f’dak l-Istat għal regoli dwar id-determinazzjoni u l-limitazzjoni tar-responsabbiltà kriminali relatata mal-libertà tal-istampa jew il-libertà tal-espressjoni f’media oħra, l-awtorità emittenti jenħtieġ li tkun tista’ tfittex kjarifika qabel toħroġ l-Ordni ta’ Produzzjoni Ewropea, inkluż billi tikkonsulta lill-awtoritajiet kompetenti tal-Istat tal-infurzar, direttament jew inkella permezz tal-Eurojust jew tan-Network Ġudizzjarju Ewropew.

(49)

Jenħtieġ li jkun possibbli li tinħareġ Ordni ta’ Preservazzjoni Ewropea għal kwalunkwe reat kriminali. L-awtorità emittenti jenħtieġ li tqis id-drittijiet tal-persuna suspettata jew akkużata fi proċedimenti relatati ma’ reat kriminali u jenħtieġ li toħroġ Ordni ta’ Preservazzjoni Ewropea biss jekk tali ordni setgħet inħarġet taħt l-istess kondizzjonijiet f’każ domestiku simili u meta tkun meħtieġa, proporzjonata, adegwata u applikabbli għall-każ inkwistjoni. Il-valutazzjoni jekk tinħariġx Ordni ta’ Preservazzjoni Ewropea jenħtieġ li tikkunsidra jekk tali ordni tkunx limitata għal dak li jkun strettament meħtieġ sabiex jintlaħaq l-għan leġittimu li jiġu evitati t-tneħħija, it-tħassir jew il-modifika ta’ data li tkun rilevanti u meħtieġa bħala evidenza f’każ individwali f’sitwazzjonijiet fejn jista’ jkun meħtieġ aktar żmien sabiex tinkiseb il-produzzjoni ta’ dik id-data.

(50)

L-ordnijiet ta’ Produzzjoni Ewropej u l-Ordnijiet ta’ Preservazzjoni Ewropej jenħtieġ li jiġu indirizzati direttament lill-istabbiliment deżinjat jew lir-rappreżentant legali, deżinjat jew maħtur mill-fornitur tas-servizzi skont id-Direttiva (UE) 2023/1544 tal-Parlament Ewropew u tal-Kunsill (23). Eċċezzjonalment, f’każijiet ta’ emerġenza kif definiti f’dan ir-Regolament, meta l-istabbiliment deżinjat jew ir-rappreżentant legali ta’ fornitur tas-servizzi ma jirreaġixxix għaċ-Ċertifikat ta’ Ordni ta’ Produzzjoni Ewropea (EPOC) jew iċ-Ċertifikat ta’ Ordni ta’ Preservazzjoni Ewropea (EPOC-PR) li jakkkumpanjah sal-iskadenzi jew ma jkunx ġie ddeżinjat jew maħtur sal-iskadenzi stabbiliti fid-Direttiva (UE) 2023/1544, jenħtieġ li jkun possibbli li l-EPOC jew l-EPOC-PR jiġu indirizzati lil kwalunkwe stabbiliment jew rappreżentant legali ieħor tal-fornitur tas-servizzi fl-Unjoni minflok ma jiġi mfittex l-infurzar tal-ordni inizjali f’konformità ma’ dan ir-Regolament, jew flimkien magħha. Minħabba dawn ix-xenarji possibbli differenti, fid-dispożizzjonijiet ta’ dan ir-Regolament jintuża t-terminu ġenerali “destinatarju”.

(51)

Minħabba n-natura aktar sensittiva ta’ Ordni ta’ Produzzjoni Ewropea biex tinkiseb data tat-traffiku, ħlief għal data mitluba għall-iskop uniku li jiġi identifikat l-utent kif definit f’dan ir-Regolament, jew biex tinkiseb data ta’ kontenut huwa xieraq li jiġi previst mekkaniżmu ta’ notifika applikabbli għall-Ordnijiet ta’ Produzzjoni Ewropej biex jinkisbu dawk il-kategoriji ta’ data. Dak il-mekkaniżmu ta’ notifika jenħtieġ li jinvolvi awtorità tal-infurzar u jikkonsisti fit-trażmissjoni tal-EPOC lil dik l-awtorità fl-istess ħin li l-EPOC jiġi trażmess lid-destinatarju. Madankollu, meta tinħareġ Ordni ta’ Produzzjoni Ewropea biex tinkiseb evidenza elettronika fi proċedimenti kriminali b’rabtiet sostanzjali u b’saħħithom mal-Istat emittenti, jenħtieġ li ma tkun meħtieġa l-ebda notifika lill-awtorità tal-infurzar. Tali rabtiet jenħtieġ li jiġu assunti meta, fil-mument tal-ħruġ tal-Ordni ta’ Produzzjoni Ewropea, l-awtorità emittenti jkollha raġunijiet raġonevoli biex temmen li r-reat twettaq, qed jitwettaq jew x’aktarx li jitwettaq fl-Istat emittenti, u meta l-persuna li d-data tagħha tkun qed tintalab tirrisjedi fl-Istat emittenti.

(52)

Għall-finijiet ta’ dan ir-Regolament, reat jenħtieġ li ma jitqiesx bħala li twettaq, li qed jitwettaq jew li x’aktarx jitwettaq fl-Istat emittenti jekk jitqies hekk f’konformità mal-liġi nazzjonali tal-Istat emittenti. F’xi każijiet, speċjalment fil-qasam taċ-ċiberkriminalità, xi elementi fattwali, bħall-post ta’ residenza tal-vittma, normalment huma indikazzjonijiet importanti li għandhom jiġu kkunsidrati meta jiġi ddeterminat fejn twettaq ir-reat. Pereżempju, id-delitti ta’ ransomware spiss jistgħu jitqiesu li twettqu fejn tirrisjedi l-vittma ta’ tali reat, anki meta l-post eżatt minn fejn ikun tnieda r-ransomware ma jkunx ċert. Kwalunkwe determinazzjoni dwar il-post fejn twettaq ir-reat jenħtieġ li tkun mingħajr preġudizzju għar-regoli dwar il-ġurisdizzjoni fuq ir-reati rilevanti skont il-liġi nazzjonali applikabbli.

(53)

Huwa f’idejn l-awtorità emittenti li tivvaluta, fil-mument tal-ħruġ tal-Ordni ta’ Produzzjoni Ewropea biex tinkiseb data tat-traffiku, ħlief għad-data mitluba għall-iskop uniku li jiġi identifikat l-utent kif definit f’dan ir-Regolament, jew li tinkiseb data ta’ kontenut, u abbażi tal-materjal quddiemha, jekk hemmx raġunijiet raġonevoli biex wieħed jemmen li l-persuna li d-data tagħha tkun qed tintalab tirrisjedi fl-Istat emittenti. F’dan ir-rigward, jistgħu jkunu rilevanti diversi ċirkustanzi oġġettivi li jistgħu jindikaw li l-persuna kkonċernata stabbilixxiet iċ-ċentru abitwali tal-interessi tagħha fi Stat Membru partikolari jew li għandha l-intenzjoni li tagħmel dan. Mill-ħtieġa għal applikazzjoni uniformi tad-dritt tal-Unjoni u mill-prinċipju tal-ugwaljanza jirriżulta li l-kunċett ta’ “residenza” f’dan il-kuntest partikolari jenħtieġ li jingħata interpretazzjoni uniformi fl-Unjoni kollha. Raġunijiet raġonevoli biex wieħed jemmen li persuna tirrisjedi fi Stat emittenti jistgħu jeżistu, b’mod partikolari, meta persuna tkun irreġistrata bħala residenti fi Stat emittenti, kif indikat mill-pussess ta’ karta tal-identità jew permess ta’ residenza jew billi tkun irreġistrata f’reġistru uffiċjali ta’ residenza. Fin-nuqqas ta’ reġistrazzjoni fl-Istat emittenti, ir-residenza tista’ tiġi indikata mill-fatt li persuna tkun uriet l-intenzjoni li tistabbilixxi ruħha f’dak l-Istat Membru jew tkun kisbet, wara perijodu stabbli ta’ preżenza f’dak l-Istat Membru, ċerti rabtiet ma’ dak l-Istat li jkunu ta’ grad simili għal dawk li jirriżultaw mill-istabbiliment ta’ residenza formali f’dak l-Istat Membru. Sabiex jiġi ddeterminat jekk, f’sitwazzjoni speċifika, jeżistux rabtiet suffiċjenti bejn il-persuna kkonċernata u l-Istat emittenti li jagħtu lok għal raġunijiet raġonevoli sabiex wieħed jemmen li l-persuna kkonċernata tirrisjedi f’dan l-Istat, jistgħu jittieħdu inkunsiderazzjoni diversi elementi oġġettivi li jikkaratterizzaw is-sitwazzjoni ta’ din il-persuna, fosthom, b’mod partikolari, it-tul, in-natura u l-kondizzjonijiet tal-preżenza tal-persuna kkonċernata fl-Istat emittenti jew ir-rabtiet familjari jew ekonomiċi li din il-persuna jkollha ma’ dan l-Istat Membru. Vettura rreġistrata, kont bankarju, il-fatt li s-soġġorn tal-persuna fl-Istat emittenti ma kienx interrott jew fatturi oġġettivi oħra jistgħu jkunu ta’ rilevanza sabiex jiġi ddeterminat li hemm raġunijiet raġonevoli biex wieħed jemmen li l-persuna kkonċernata tirrisjedi fl-Istat emittenti. Żjara qasira, vaganza, inkluż f’dar tal-vaganzi, jew soġġorn simili fl-Istat emittenti mingħajr ebda rabta sostanzjali oħra mhijiex biżżejjed biex tiġi stabbilita residenza f’dak l-Istat Membru. F’każijiet fejn, fil-mument tal-ħruġ tal-Ordni ta’ Produzzjoni Ewropea biex tinkiseb data tat-traffiku, ħlief għal data mitluba għall-iskop uniku li jiġi identifikat l-utent kif definit f’dan ir-Regolament, jew biex tinkiseb data ta’ kontenut, l-awtorità emittenti ma jkollhiex raġunijiet raġonevoli biex temmen li l-persuna li d-data tagħha tkun qed tintalab tirrisjedi fl-Istat emittenti, l-awtorità emittenti jenħtieġ li tinnotifika lill-awtorità tal-infurzar.

(54)

Sabiex tkun prevista proċedura rapida, il-mument rilevanti meta għandu jiġi ddeterminat jekk hemmx il-ħtieġa li l-awtorità tal-infurzar tiġi nnotifikata jenħtieġ li jkun il-mument meta tinħareġ l-Ordni ta’ Produzzjoni Ewropea. Kwalunkwe bidla sussegwenti tar-residenza jenħtieġ li ma jkollha ebda impatt fuq il-proċedura. Il-persuna kkonċernata jenħtieġ li tkun tista’ tinvoka d-drittijiet tagħha kif ukoll ir-regoli dwar id-determinazzjoni u l-limitazzjoni tar-responsabbiltà kriminali relatata mal-libertà tal-istampa u l-libertà tal-espressjoni f’media oħra, matul il-proċedimenti kriminali kollha, u l-awtorità tal-infurzar jenħtieġ li tkun tista’ tqajjem raġuni għal rifjut meta, f’sitwazzjonijiet eċċezzjonali, ikun hemm raġunijiet sostanzjali biex wieħed jemmen, abbażi ta’ evidenza speċifika u oġġettiva, li l-eżekuzzjoni tal-ordni, fiċ-ċirkostanzi partikolari tal-każ, tkun tinvolvi ksur ċar ta’ dritt fundamentali rilevanti kif stabbilit fl-Artikolu 6 tat-TUE u fil-Karta. Barra minn hekk, jenħtieġ li jkun possibbli wkoll li jiġu invokati dawk ir-raġunijiet matul il-proċedura għall-eżekuzzjoni.

(55)

Ordni ta’ Produzzjoni Ewropea jenħtieġ li tiġi trażmessa permezz ta’ EPOC, u Ordni ta’ Preservazzjoni Ewropea jenħtieġ li tiġi trażmessa permezz ta’ EPOC-PR. Fejn ikun meħtieġ, l-EPOC jew l-EPOC-PR jenħtieġ li jiġu tradotti f’lingwa uffiċjali tal-Unjoni aċċettata mid-destinatarju. Meta ma tkun ġiet speċifikata l-ebda lingwa mill-fornitur tas-servizzi, l-EPOC jew l-EPOC-PR jenħtieġ li jiġu tradotti f’lingwa uffiċjali tal-Istat Membru fejn ikun jinsab l-istabbiliment deżinjat jew ir-rappreżentant legali tal-fornitur tas-servizzi, jew f’lingwa uffiċjali oħra li l-istabbiliment deżinjat jew ir-rappreżentant legali tal-fornitur tas-servizzi jkunu ddikjaraw li se jaċċettaw. Meta tkun meħtieġa notifika lill-awtorità tal-infurzar skont dan ir-Regolament, l-EPOC li għandu jiġi trażmess lil dik l-awtorità jenħtieġ li jiġi tradott f’lingwa uffiċjali tal-Istat tal-infurzar jew f’lingwa uffiċjali oħra tal-Unjoni aċċettata minn dak l-Istat. F’dak ir-rigward, kull Stat Membru jenħtieġ li jiġi mħeġġeġ jiddikjara, fi kwalunkwe mument, f’dikjarazzjoni bil-miktub ippreżentata lill-Kummissjoni jekk jaċċettax traduzzjonijiet ta’ EPOCs u EPOC-PRs, u b’liema lingwa jew lingwi uffiċjali tal-Unjoni minbarra l-lingwa jew il-lingwi uffiċjali ta’ dak l-Istat Membru, jaċċettahom. Jenħtieġ li l-Kummissjoni tqiegħed tali dikjarazzjonijiet għad-dispożizzjoni tal-Istati Membri kollha u tan-Network Ġudizzjarju Ewropew.

(56)

Meta jkun inħareġ EPOC u ma tkunx meħtieġa notifika lill-awtorità tal-infurzar skont dan ir-Regolament, id-destinatarju jenħtieġ li jiżgura, malli jirċievi l-EPOC, li d-data mitluba tiġi trażmessa direttament lill-awtorità emittenti jew lill-awtoritajiet tal-infurzar tal-liġi kif indikat fl-EPOC sa mhux aktar tard minn 10 ijiem wara li jkun irċieva l-EPOC. Meta tkun meħtieġa notifika lill-awtorità tal-infurzar skont dan ir-Regolament, malli jirċievi l-EPOC, il-fornitur tas-servizzi jenħtieġ li jaġixxi malajr biex jippreserva d-data. Meta l-awtorità tal-infurzar ma tkun invokat l-ebda raġuni għar-rifjut skont dan ir-Regolament fi żmien 10 ijiem wara li tkun irċeviet l-EPOC, id-destinatarju jenħtieġ li jiżgura li d-data mitluba tiġi trażmessa direttament lill-awtorità emittenti jew lill-awtoritajiet tal-infurzar tal-liġi kif indikat fl-EPOC fi tmiem dak il-perjodu ta’ 10 ijiem. Meta l-awtorità tal-infurzar, diġà qabel tmiem il-perjodu ta’ 10 ijiem, tikkonferma lill-awtorità emittenti u lid-destinatarju li mhijiex se tqajjem ebda raġunijiet għal rifjut, jenħtieġ li d-destinatarju jaġixxi malajr kemm jista’ jkun fuq tali konferma u mhux aktar tard minn tmiem dak il-perjodu ta’ 10 ijiem. Il-limiti ta’ żmien iqsar applikabbli f’każijiet ta’ emerġenza kif definiti f’dan ir-Regolament jenħtieġ li jiġu rispettati mid-destinatarju, u, fejn applikabbli, mill-awtorità tal-infurzar. Id-destinatarju, u, fejn applikabbli, l-awtorità tal-infurzar, jenħtieġ li jeżegwixxu l-EPOC malajr kemm jista’ jkun u mhux aktar tard mill-iskadenzi stabbiliti f’dan ir-Regolament, filwaqt li jqisu kemm jista’ jkun l-iskadenzi proċedurali u skadenzi oħra indikati mill-Istat emittenti.

(57)

Meta d-destinatarju jqis, abbażi biss tal-informazzjoni li tinsab fl-EPOC jew fl-EPOC-PR, li l-eżekuzzjoni tal-EPOC jew tal-EPOC-PR tista’ tinterferixxi mal-immunitajiet jew mal-privileġġi, jew mar-regoli dwar id-determinazzjoni jew il-limitazzjoni tar-responsabbiltà kriminali li jirrigwardaw il-libertà tal-istampa jew il-libertà tal-espressjoni f’media oħra, skont il-liġi tal-Istat tal-infurzar, jenħtieġ li d-destinatarju jinforma lill-awtorità emittenti u lill-awtorità tal-infurzar. Fir-rigward tal-EPOCs, meta ma tkun saret l-ebda notifika lill-awtorità tal-infurzar skont dan ir-Regolament, l-awtorità emittenti jenħtieġ li tqis l-informazzjoni li tirċievi mingħand id-destinatarju, u jenħtieġ li tiddeċiedi, fuq inizjattiva tagħha stess jew fuq talba tal-awtorità tal-infurzar, jekk tirtirax, tadattax jew iżżommx l-Ordni ta’ Produzzjoni Ewropea. Meta tkun saret notifika lill-awtorità tal-infurzar skont dan ir-Regolament, jenħtieġ li l-awtorità emittenti tqis l-informazzjoni li tirċievi mingħand id-destinatarju u tiddeċiedi jekk tirtirax, tadattax jew iżżommx l-Ordni ta’ Produzzjoni Ewropea. Jenħtieġ li jkun possibbli wkoll li l-awtorità tal-infurzar tinvoka r-raġunijiet għal rifjut stabbiliti f’dan ir-Regolament.

(58)

Sabiex id-destinatarju jkun jista’ jindirizza problemi formali b’EPOC jew b’EPOC-PR, jeħtieġ li tiġi stabbilita proċedura għall-komunikazzjoni bejn id-destinatarju u l-awtorità emittenti, kif ukoll, meta tkun saret notifika lill-awtorità tal-infurzar skont dan ir-Regolament, bejn id-destinatarju u l-awtorità tal-infurzar, f’każijiet fejn l-EPOC jew l-EPOC-PR ma jkunx komplut jew ikun fih żbalji ovvji jew ma jkunx fih biżżejjed informazzjoni sabiex tiġi eżegwita l-ordni kkonċernata. Barra minn hekk, jekk id-destinatarju ma jipprovdix l-informazzjoni b’mod eżawrjenti u f’waqtu għal kwalunkwe raġuni oħra, pereżempju għax jikkunsidra li jkun hemm kunflitt ma’ obbligu skont il-liġi ta’ pajjiż terz, jew għax jikkunsidra li l-Ordni ta’ Produzzjoni Ewropea jew l-Ordni ta’ Preservazzjoni Ewropea ma tkunx inħarġet skont il-kondizzjonijiet stabbiliti minn dan ir-Regolament, huwa jenħtieġ li jinforma lill-awtorità emittenti, kif ukoll f’każ li tkun saret notifika lill-awtorità tal-infurzar, lill-awtorità tal-infurzar, u jipprovdi l-ġustifikazzjonijiet talli ma eżegwixxiex l-EPOC jew l-EPOC-PR fil-mument opportun. Il-proċedura ta’ komunikazzjoni għalhekk jenħtieġ li tippermetti l-korrezzjoni jew il-kunsiderazzjoni mill-ġdid tal-Ordni ta’ Produzzjoni Ewropea jew tal-Ordni ta’ Preservazzjoni Ewropea mill-awtorità emittenti fi stadju bikri. Sabiex jiggarantixxi d-disponibbiltà tad-data mitluba, id-destinatarju jenħtieġ li jippreserva dik id-data jekk dak id-destinatarju jkun jista’ jidentifika dik id-data.

(59)

Jenħtieġ li d-destinatarju ma jkunx obbligat jikkonforma mal-Ordni ta’ Produzzjoni Ewropea jew mal-Ordni ta’ Preservazzjoni Ewropea fil-każ ta’ impossibbiltà de facto minħabba ċirkostanzi mhux attribwibbli lid-destinatarju jew, jekk ikun differenti, lill-fornitur tas-servizzi fiż-żmien meta tkun waslet l-Ordni ta’ Produzzjoni Ewropea jew l-Ordni ta’ Preservazzjoni Ewropea. Impossibbiltà de facto jenħtieġ li tiġi preżunta jekk il-persuna li d-data tagħha tkun intalbet ma tkunx klijent tal-fornitur tas-servizzi jew ma tistax tiġi identifikata bħala tali anki wara talba għal aktar informazzjoni lill-awtorità emittenti, jew jekk id-data tkun tħassret legalment qabel ma kienet irċevuta l-ordni.

(60)

Malli jirċievi EPOC-PR, id-destinatarju jenħtieġ li jippreserva d-data mitluba għal massimu ta’ 60 jum sakemm l-awtorità emittenti ma tikkonfermax li tkun inħarġet talba sussegwenti għall-produzzjoni, f’liema każ il-preservazzjoni jenħtieġ li titkompla. L-awtorità emittenti jenħtieġ li tkun tista’ testendi t-tul ta’ żmien tal-preservazzjoni bi 30 jum addizzjonali fejn meħtieġ biex tippermetti l-ħruġ ta’ talba sussegwenti għall-produzzjoni, bl-użu tal-formola stabbilita f’dan ir-Regolament. Meta l-awtorità emittenti tikkonferma waqt il-perjodu ta’ preservazzjoni li tkun inħarġet talba sussegwenti għall-produzzjoni, id-destinatarju jenħtieġ li jippreserva d-data għal kemm ikun hemm bżonn biex jipproduċi d-data ladarba jirċievi t-talba sussegwenti għall-produzzjoni. Tali konferma jenħtieġ li tintbagħat lid-destinatarju sal-iskadenza rilevanti, f’lingwa uffiċjali tal-Istat tal-infurzar jew fi kwalunkwe lingwa oħra aċċettata mid-destinatarju, bl-użu tal-formola stabbilita f’dan ir-Regolament. Sabiex il-preservazzjoni ma titħalliex tieqaf, jenħtieġ li jkun biżżejjed li t-talba sussegwenti għall-produzzjoni tkun inħarġet u li l-konferma tkun intbagħtet mill-awtorità emittenti; jenħtieġ li ma jkunx meħtieġ li jitlestew aktar formalitajiet meħtieġa għat-trażmissjoni, bħat-traduzzjoni ta’ dokumenti, f’dak il-mument. Meta l-preservazzjoni ma tkunx aktar meħtieġa, l-awtorità emittenti jenħtieġ li tinforma lid-destinatarju mingħajr dewmien żejjed u l-obbligu tal-preservazzjoni abbażi tal-Ordni ta’ Preservazzjoni Ewropea jenħtieġ li jieqaf.

(61)

Minkejja l-prinċipju tal-fiduċja reċiproka, jenħtieġ li jkun possibbli li l-awtorità tal-infurzar tqajjem raġunijiet għar-rifjut ta’ Ordni ta’ Produzzjoni Ewropea, meta tkun saret notifika lill-awtorità tal-infurzar skont dan ir-Regolament, abbażi tal-lista ta’ raġunijiet għal rifjut prevista f’dan ir-Regolament. Meta notifika lill-awtorità tal-infurzar, jew infurzar, issir f’konformità ma’ dan ir-Regolament, l-Istat tal-infurzar jista’ jipprovdi skont il-liġi nazzjonali li l-eżekuzzjoni ta’ Ordni ta’ Produzzjoni Ewropea tista’ tirrikjedi l-involviment proċedurali ta’ qorti fl-Istat tal-infurzar.

(62)

Meta l-awtorità tal-infurzar tiġi nnotifikata b’Ordni ta’ Produzzjoni Ewropea biex tinkiseb data tat-traffiku, ħlief għad-data mitluba għall-iskop uniku li jiġi identifikat l-utent, kif definit f’dan ir-Regolament, jew biex tinkiseb data ta’ kontenut, jenħtieġ li jkollha d-dritt li tivvaluta l-informazzjoni stabbilita fl-ordni u, fejn xieraq, tirrifjutaha meta, abbażi ta’ analiżi obbligatorja u dovuta tal-informazzjoni li tinsab f’dik l-ordni u b’osservanza tar-regoli applikabbli tad-dritt primarju tal-Unjoni, b’mod partikolari l-Karta, hija tasal għall-konklużjoni li jistgħu jitqajmu raġuni waħda jew aktar għar-rifjut previsti f’dan ir-Regolament. Il-ħtieġa li tiġi rispettata l-indipendenza tal-awtoritajiet ġudizzjarji teħtieġ li jingħata grad ta’ diskrezzjoni lil dawk l-awtoritajiet meta jieħdu deċiżjonijiet dwar ir-raġunijiet għal rifjut.

(63)

Jenħtieġ li jkun possibbli li l-awtorità tal-infurzar, fejn tiġi nnotifikata skont dan ir-Regolament, tirrifjuta Ordni ta’ Produzzjoni Ewropea meta d-data mitluba tkun protetta minn immunitajiet jew privileġġi mogħtija skont il-liġi tal-Istat tal-infurzar li jipprevjenu l-eżekuzzjoni jew l-infurzar tal-Ordni ta’ Produzzjoni Ewropea, jew fejn id-data mitluba tkun koperta minn regoli dwar id-determinazzjoni jew il-limitazzjoni tar-responsabbiltà kriminali relatati mal-libertà tal-istampa jew il-libertà tal-espressjoni f’media oħra, li jipprevjenu l-eżekuzzjoni jew l-infurzar tal-Ordni ta’ Produzzjoni Ewropea.

(64)

Jenħtieġ li jkun possibbli li l-awtorità tal-infurzar tirrifjuta ordni, f’sitwazzjonijiet eċċezzjonali, fejn ikun hemm raġunijiet sostanzjali biex temmen, abbażi ta’ evidenza speċifika u oġġettiva, li l-eżekuzzjoni tal-Ordni ta’ Produzzjoni Ewropea, fiċ-ċirkostanzi partikolari tal-każ, tkun tinvolvi ksur ċar ta’ dritt fundamentali rilevanti kif stabbilit fl-Artikolu 6 tat-TUE u fil-Karta. B’mod partikolari, meta tevalwa dik ir-raġuni għal rifjut, meta l-awtorità tal-infurzar ikollha għad-dispożizzjoni tagħha evidenza jew materjal bħal dak stabbilit fi proposta motivata minn terz tal-Istati Membri, mill-Parlament Ewropew jew mill-Kummissjoni Ewropea, adottata skont l-Artikolu 7(1) tat-TUE, li jindikaw li hemm riskju ċar, jekk l-ordni tiġi eżegwita, ta’ ksur serju tad-dritt fundamentali għal rimedju effettiv u għal proċess ġust skont l-Artikolu 47 tal-Karta, minħabba nuqqasijiet sistemiċi jew ġeneralizzati fir-rigward tal-indipendenza tal-ġudikatura tal-Istat emittenti, l-awtorità tal-infurzar jenħtieġ li tiddetermina b’mod speċifiku u preċiż jekk, b’kunsiderazzjoni tas-sitwazzjoni personali tal-persuna kkonċernata, kif ukoll tan-natura tar-reat li għalih jitwettqu l-proċeduri kriminali, u l-kuntest fattwali li jifforma l-bażi tal-ordni, u fid-dawl tal-informazzjoni pprovduta mill-awtorità emittenti, hemmx raġunijiet sostanzjali biex wieħed jemmen li hemm riskju ta’ ksur tad-dritt ta’ persuna għal smigħ xieraq.

(65)

Jenħtieġ li jkun possibbli li l-awtorità tal-infurzar tirrifjuta ordni meta l-eżekuzzjoni ta’ tali ordni tmur kontra l-prinċipju ta’ ne bis in idem.

(66)

Jenħtieġ li jkun possibbli li l-awtorità tal-infurzar, meta tiġi nnotifikata skont dan ir-Regolament, tirrifjuta Ordni ta’ Produzzjoni Ewropea f’każ li l-imġiba li għaliha tkun inħarġet l-ordni ma tkunx tikkostitwixxi reat fil-liġi tal-Istat tal-infurzar, sakemm dan ma jikkonċernax reat elenkat fil-kategoriji ta’ reati stabbiliti f’anness għal dan ir-Regolament, kif indikat mill-awtorità emittenti fl-EPOC, jekk ikun punibbli fl-Istat emittenti b’sentenza ta’ kustodja jew ordni ta’ detenzjoni għal perjodu massimu ta’ mill-anqas tliet snin.

(67)

Peress li huwa element essenzjali li l-persuna li d-data tagħha tkun qed tintalab tiġi infurmata fir-rigward tad-drittijiet tal-protezzjoni tad-data u tad-drittijiet ta’ difiża, minħabba li dan jippermetti li jsir rieżami effettiv u rimedju ġudizzjarju, f’konformità mal-Artikolu 6 tat-TUE u l-Karta, jenħtieġ li l-awtorità emittenti tinforma lill-persuna li d-data tagħha tkun qed tintalab, mingħajr dewmien żejjed, dwar il-produzzjoni ta’ data abbażi ta’ Ordni ta’ Produzzjoni Ewropea. Madankollu, l-awtorità emittenti jenħtieġ li tkun tista’, f’konformità mal-liġi nazzjonali, tittardja jew tirrestrinġi l-informazzjoni jew tonqos milli tinforma lill-persuna li d-data tagħha tkun qed tintalab, sa fejn, u sakemm jiġu ssodisfati l-kondizzjonijiet tad-Direttiva (UE) 2016/680, f’liema każ l-awtorità emittenti jenħtieġ li tindika fil-fajl tal-każ ir-raġunijiet għad-dewmien, ir-restrizzjoni jew l-ommissjoni u żżid ġustifikazzjoni qasira fl-EPOC. Id-destinatarji u, jekk ikunu differenti, il-fornituri tas-servizzi jenħtieġ li jieħu l-miżuri operazzjonali u tekniċi l-aktar avvanzati meħtieġa sabiex jiżgura l-kunfidenzjalità, is-segretezza u l-integrità tal-EPOC jew tal-EPOC-PR u tad-data prodotta jew ippreservata.

(68)

Jenħtieġ li jkun possibbli li fornitur tas-servizzi jitlob rimborż tal-kostijiet tiegħu biex iwieġeb għal Ordni ta’ Produzzjoni Ewropea jew għal Ordni ta’ Preservazzjoni Ewropea mill-Istat emittenti, jekk dik il-possibbiltà tkun prevista fil-liġi nazzjonali tal-Istat emittenti għal ordnijiet domestiċi f’sitwazzjonijiet simili, f’konformità mal-liġi nazzjonali ta’ dak l-Istat. L-Istati Membri jenħtieġ li jinfurmaw lill-Kummissjoni dwar ir-regoli nazzjonali tagħhom għal rimborż u l-Kummissjoni jenħtieġ li tippubblikahom. Dan ir-Regolament jipprevedi regoli separati applikabbli għar-rimborż tal-kostijiet relatati mas-sistema tal-IT deċentralizzata.

(69)

Mingħajr preġudizzju għal-liġijiet nazzjonali li jipprevedu l-impożizzjoni ta’ sanzjonijiet kriminali, l-Istati Membri jenħtieġ li jistabbilixxu r-regoli dwar is-sanzjonijiet pekunjarji applikabbli għall-ksur ta’ dan ir-Regolament u jenħtieġ li jieħdu l-miżuri kollha neċessarji biex jiżguraw li dawn jiġu implimentati. L-Istati Membri jenħtieġ li jiżguraw li s-sanzjonijiet pekunjarji previsti fil-liġi nazzjonali tagħhom ikunu effettivi, proporzjonati u dissważivi. Jenħtieġ li l-Istati Membri, mingħajr dewmien, jinnotifikaw lill-Kummissjoni b’dawk ir-regoli u dawk il-miżuri u jenħtieġ li jinnotifikawha, mingħajr dewmien, bi kwalunkwe emenda sussegwenti li tolqothom.

(70)

Meta jivvalutaw fil-każ individwali s-sanzjoni pekunjarja xierqa, jenħtieġ li l-awtoritajiet kompetenti jqisu ċ-ċirkostanzi rilevanti kollha, bħan-natura, il-gravità u t-tul ta’ żmien tal-ksur, jekk ikunx twettaq intenzjonalment jew b’negliġenza, jekk il-fornitur tas-servizzi nżammx responsabbli għal ksur preċedenti simili u s-saħħa finanzjarja tal-fornitur tas-servizzi miżmum responsabbli. F’ċirkostanzi eċċezzjonali, dik il-valutazzjoni tista’ twassal lill-awtorità tal-infurzar biex tiddeċiedi li tastjeni milli timponi sanzjonijiet pekunarji. F’dan ir-rigward, jeħtieġ li tingħata attenzjoni partikolari lill-mikrointrapriżi li jonqsu milli jikkonformaw ma’ Ordni ta’ Produzzjoni Ewropea jew Ordni ta’ Preservazzjoni Ewropea f’każ ta’ emerġenza minħabba nuqqas ta’ riżorsi umani barra mill-ħinijiet tax-xogħol normali, jekk id-data tiġi trażmessa mingħajr dewmien żejjed.

(71)

Mingħajr preġudizzju għall-obbligi dwar il-protezzjoni tad-data, jenħtieġ li l-fornituri tas-servizzi ma jinżammux responsabbli fl-Istati Membri għall-ħsara kkawżata lill-utenti tagħhom jew lil partijiet terzi li tirriżulta esklussivament mill-konformità bona fide ma’ EPOC jew ma’ EPOC-PR. Ir-responsabbiltà għall-iżgurar tal-legalità tal-ordni kkonċernata, b’mod partikolari l-ħtieġa u l-proporzjonalità tagħha, jenħtieġ li tkun tal-awtorità emittenti.

(72)

Meta d-destinatarju ma jikkonformax ma’ EPOC sal-iskadenza jew ma’ EPOC-PR, mingħajr ma jipprovdi raġunijiet aċċettabbli għall-awtorità emittenti u, jekk ikun il-każ, meta l-awtorità tal-infurzar ma tkunx invokat xi waħda mir-raġunijiet għal rifjut kif previst f’dan ir-Regolament, jenħtieġ li jkun possibbli li l-awtorità emittenti titlob lill-awtorità tal-infurzar tinforza l-Ordni ta’ Produzzjoni Ewropea jew l-Ordni ta’ Preservazzjoni Ewropea. Għal dak l-għan, jenħtieġ li l-awtorità emittenti tittrasferixxi l-ordni kkonċernata, il-formola rilevanti prevista f’dan ir-Regolament, kif ikkompletata mid-destinatarju, u kwalunkwe dokument rilevanti lill-awtorità tal-infurzar. L-awtorità emittenti jenħtieġ li tittraduċi l-ordni kkonċernata u kwalunkwe dokument li jrid jiġi ttrasferit f’waħda mil-lingwi aċċettati mill-Istat tal-infurzar u jenħtieġ li tinforma lid-destinatarju dwar it-trasferiment. Dak l-Istat jenħtieġ li jinfurza l-ordni kkonċernata skont il-liġi nazzjonali tiegħu.

(73)

Il-proċedura għall-infurzar jenħtieġ li tippermetti lid-destinatarju jinvoka raġunijiet kontra l-infurzar, abbażi ta’ lista ta’ raġunijiet speċifiċi previsti f’dan ir-Regolament, inkluż li l-ordni kkonċernata ma tkunx inħarġet jew ġiet ivvalidata minn awtorità kompetenti kif previst f’dan ir-Regolament, jew meta l-ordni ma tikkonċernax data maħżuna minn jew f’isem il-fornitur tas-servizzi fil-mument tar-riċevuta taċ-ċertifikat rilevanti. Jenħtieġ li l-awtorità tal-infurzar tkun tista’ tirrifjuta li tirrikonoxxi u tinforza Ordni ta’ Produzzjoni Ewropea jew Ordni ta’ Preservazzjoni Ewropea abbażi ta’ dawk l-istess raġunijiet, u wkoll, f’sitwazzjonijiet eċċezzjonali, minħabba l-ksur manifest ta’ dritt fundamentali rilevanti kif stabbilit fl-Artikolu 6 tat-TUE u l-Karta. L-awtorità tal-infurzar jenħtieġ li tikkonsulta mal-awtorità emittenti qabel tiddeċiedi li ma tirrikonoxxix jew li ma tinforzax l-ordni, abbażi ta’ dawk ir-raġunijiet. Meta d-destinatarju ma jikkonformax mal-obbligi tiegħu skont Ordni ta’ Produzzjoni Ewropea jew Ordni ta’ Preservazzjoni Ewropea rikonoxxuta li l-infurzabbiltà tagħha tkun ġiet ikkonfermata mill-awtorità tal-infurzar, dik l-awtorità jenħtieġ li timponi sanzjoni pekunjarja. Dik is-sanzjoni jenħtieġ li tkun proporzjonata, b’mod partikolari fid-dawl ta’ ċirkostanzi speċifiċi bħan-nuqqas ta’ konformità ripetut jew sistemiku.

(74)

Il-konformità ma’ Ordni ta’ Produzzjoni Ewropea tista’ tmur kontra obbligu skont il-liġi applikabbli ta’ pajjiż terz. Biex tiġi żgurata l-korteżija fir-rigward tal-interessi sovrani ta’ pajjiżi terzi, biex jiġi protett l-individwu kkonċernat u biex jiġu indirizzati l-obbligi konfliġġenti fuq il-fornituri tas-servizzi, dan ir-Regolament jipprevedi mekkaniżmu speċifiku għal stħarriġ ġudizzjarju fejn il-konformità ma’ Ordni ta’ Produzzjoni Ewropea timpedixxi lill-fornitur tas-servizzi milli jikkonforma ma’ obbligi legali li jirriżultaw mil-liġi ta’ Stat terz.

(75)

Meta d-destinatarju jqis li Ordni ta’ Produzzjoni Ewropea f’każ speċifiku tinvolvi l-ksur ta’ obbligu legali li jirriżulta mil-liġi ta’ pajjiż terz, jenħtieġ li jinforma lill-awtorità emittenti u lill-awtorità tal-infurzar bir-raġunijiet tiegħu għaliex ma eżegwiex l-ordni permezz ta’ oġġezzjoni motivata, billi juża l-formola pprovduta f’dan ir-Regolament. L-awtorità emittenti jenħtieġ li tirrieżamina l-Ordni ta’ Produzzjoni Ewropea abbażi tal-oġġezzjoni motivata u kwalunkwe input mogħti mill-Istat tal-infurzar, billi tikkunsidra l-istess kriterji li l-qorti kompetenti tal-Istat emittenti tkun trid issegwi. Meta l-awtorità emittenti jkollha l-intenzjoni li żżomm l-ordni, hija jenħtieġ li titlob rieżami mill-qorti kompetenti tal-Istat emittenti, kif notifikat mill-Istat Membru rilevanti, li jenħtieġ li jirrevedi l-ordni.

(76)

Sabiex tistabbilixxi l-eżistenza ta’ obbligu konfliġġenti fiċ-ċirkostanzi speċifiċi tal-każ li jkun qiegħed jiġi eżaminat, il-qorti kompetenti tkun tista’ tibbaża fuq għarfien espert estern xieraq fejn meħtieġ, pereżempju dwar l-interpretazzjoni tal-liġi tal-pajjiż terz ikkonċernat. Għal dak l-għan, il-qorti kompetenti tista’ pereżempju tikkonsulta l-awtorità ċentrali tal-pajjiż terz, b’kont meħud tad-Direttiva (UE) 2016/680. L-informazzjoni jenħtieġ li, b’mod partikolari, tintalab mill-awtorità kompetenti tal-pajjiż terz mill-Istat emittenti meta l-kunflitt jikkonċerna drittijiet fundamentali jew interessi fundamentali oħra tal-pajjiż terz relatati mas-sigurtà u d-difiża nazzjonali.

(77)

Il-kompetenza esperta dwar l-interpretazzjoni tista’ tiġi pprovduta wkoll permezz ta’ opinjonijiet esperti fejn ikunu disponibbli. L-informazzjoni u l-ġurisprudenza dwar l-interpretazzjoni tal-liġi ta’ pajjiż terz u dwar il-proċeduri għall-kunflitt tal-liġi fl-Istati Membri jenħtieġ li jkunu disponibbli fuq pjattaforma ċentrali bħall-proġett SIRIUS jew in-Network Ġudizzjarju Ewropew, bil-ħsieb li jkun possibbli li jinkiseb benefiċċju mill-esperjenza u l-kompetenza esperta dwar l-istess kwistjonijiet jew kwistjonijiet simili. Id-disponibbiltà ta’ tali informazzjoni fuq pjattaforma ċentrali jenħtieġ li ma tipprevjenix konsultazzjoni mġedda mal-istat terz fejn ikun xieraq.

(78)

Meta tivvaluta jekk jeżistux obbligi konfliġġenti, jenħtieġ li l-qorti kompetenti tiddetermina jekk il-liġi tal-pajjiż terz hijiex applikabbli u jekk iva, jekk il-liġi tal-pajjiż terz tipprojbixxix id-divulgazzjoni tad-data kkonċernata. Meta l-qorti kompetenti tistabbilixxi li l-liġi tal-pajjiż terz tipprojbixxi d-divulgazzjoni tad-data kkonċernata, dik il-qorti jenħtieġ li tiddetermina jekk iżżommx jew tirtirax l-Ordni ta’ Produzzjoni Ewropea, billi tiżen għadd ta’ elementi li huma mfassla sabiex jaċċertaw is-saħħa tal-konnessjoni ma’ xi waħda miż-żewġ ġurisdizzjonijiet involuti, l-interessi rispettivi tal-ksib jew tal-prevenzjoni tad-divulgazzjoni tad-data, u l-konsegwenzi possibbli għad-destinatarju jew għall-fornitur tas-servizzi li jikkonforma mal-ordni. Jenħtieġ li jingħataw importanza u piż partikolari lill-protezzjoni tad-drittijiet fundamentali mil-liġi rilevanti tal-pajjiż terz u interessi fundamentali oħrajn, bħall-interessi tas-sigurtà nazzjonali tal-pajjiż terz, kif ukoll il-grad tal-konnessjoni bejn il-kawża kriminali u xi waħda miż-żewġ ġurisdizzjonijiet meta titwettaq il-valutazzjoni. Jekk il-qorti tiddeċiedi li tirtira l-ordni, hija jenħtieġ li tinforma lill-awtorità emittenti u lid-destinatarju. Jekk il-qorti kompetenti tiddeċiedi li l-ordni għandha tinżamm, hija jenħtieġ li tinforma lill-awtorità emittenti u lid-destinatarju, u dak id-destinatarju jenħtieġ li jipproċedi bl-eżekuzzjoni ta’ dik l-ordni. L-awtorità emittenti jenħtieġ li tinforma lill-awtorità tal-infurzar dwar l-eżitu tal-proċedura ta’ rieżami.

(79)

Il-kondizzjonijiet stabbiliti f’dan ir-Regolament għall-eżekuzzjoni ta’ EPOC jenħtieġ li jkunu applikabbli wkoll f’każ ta’ obbligi konfliġġenti li jirriżultaw mil-liġi ta’ pajjiż terz. Għalhekk, matul ir-rieżami ġudizzjarju fejn il-konformità ma’ Ordni ta’ Produzzjoni Ewropea tipprevjeni lill-fornituri tas-servizzi milli jikkonformaw ma’ obbligu legali li jirriżulta mil-liġi ta’ pajjiż terz, id-data mitluba minn dik l-ordni jenħtieġ li tiġi ppreservata. Meta, wara l-istħarriġ ġudizzjarju, il-qorti kompetenti tiddeċiedi li tirtira Ordni ta’ Produzzjoni Ewropea, jenħtieġ li jkun possibbli li tinħareġ Ordni ta’ Preservazzjoni Ewropea biex tippermetti lill-awtorità emittenti tfittex il-produzzjoni tad-data permezz ta’ mezzi oħra, bħall-assistenza legali reċiproka.

(80)

Huwa essenzjali li l-persuni kollha li d-data tagħhom tiġi mitluba f’investigazzjonijiet jew proċedimenti kriminali jkollhom aċċess għal rimedju legali effettiv, f’konformità mal-Artikolu 47 tal-Karta. F’konformità ma’ dak ir-rekwiżit u mingħajr preġudizzju għal rimedji legali ulterjuri disponibbli f’konformità mal-liġi nazzjonali, kwalunkwe persuna li d-data tagħha tkun intalbet permezz ta’ Ordni ta’ Produzzjoni Ewropea jenħtieġ li jkollha d-dritt għal rimedji effettivi kontra dik l-ordni. Meta dik il-persuna tkun persuna suspettata jew akkużata, dik il-persuna jenħtieġ li jkollha d-dritt għal rimedji effettivi matul il-proċedimenti kriminali li fihom id-data qed tintuża bħala evidenza. Id-dritt għal rimedji effettivi jenħtieġ li jiġi eżerċitat quddiem qorti fl-Istat emittenti skont il-liġi nazzjonali tiegħu u jenħtieġ li jinkludi l-possibbiltà li tiġi kkontestata l-legalità tal-miżura, inklużi n-neċessità u l-proporzjonalità tagħha, mingħajr preġudizzju għall-garanziji tad-drittijiet fundamentali fl-Istat tal-infurzar, jew rimedji ulterjuri oħrajn skont il-liġi nazzjonali. Dan ir-Regolament jenħtieġ li ma jillimitax ir-raġunijiet possibbli sabiex tiġi kkontestata l-legalità ta’ ordni. Id-dritt għal rimedji effettivi previst f’dan ir-Regolament jenħtieġ li jkun mingħajr preġudizzju għad-dritt li wieħed ifittex rimedji skont ir-Regolament (UE) 2016/679 u d-Direttiva (UE) 2016/680. Jenħtieġ li tingħata informazzjoni fi żmien dovut dwar il-possibbiltajiet skont il-liġi nazzjonali biex jinstabu rimedji u jenħtieġ li jiġi żgurat li dawn ikunu jistgħu jiġu eżerċitati b’mod effettiv.

(81)

Jenħtieġ li jiġu żviluppati kanali xierqa biex jiġi żgurat li l-partijiet kollha jkunu jistgħu jikkooperaw b’mod effiċjenti b’mezzi diġitali, permezz ta’ sistema deċentralizzata tat-teknoloġija tal-informazzjoni (IT) li tippermetti l-iskambju elettroniku transfruntier rapidu, dirett, interoperabbli, sostenibbli, affidabbli u sigur ta’ formoli, data u informazzjoni relatati mal-każijiet.

(82)

Sabiex tkun tista’ ssir komunikazzjoni bil-miktub effiċjenti u sigura bejn l-awtoritajiet kompetenti u l-istabbilimenti jew ir-rappreżentanti legali deżinjati tal-fornituri tas-servizzi skont dan ir-Regolament, jenħtieġ li dawk l-istabbilimenti jew ir-rappreżentanti legali deżinjati jiġu pprovduti mezzi elettroniċi ta’ aċċess għas-sistemi tal-IT nazzjonali, parti mis-sistema tal-IT deċentralizzata, imħaddma mill-Istati Membri.

(83)

Is-sistema tal-IT deċentralizzata jenħtieġ li tkun magħmula mis-sistemi tal-IT tal-Istati Membri u l-aġenziji u l-korpi tal-Unjoni, u l-punti ta’ aċċess interoperabbli, li permezz tagħhom dawk is-sistemi tal-IT huma interkonnessi. Il-punti ta’ aċċess tas-sistema tal-IT deċentralizzata jenħtieġ li jkunu bbażati fuq is-sistema e-CODEX, stabbilita bir-Regolament (UE) 2022/850 tal-Parlament Ewropew u tal-Kunsill (24).

(84)

Il-fornituri tas-servizzi li jagħmlu użu minn soluzzjonijiet tal-IT personalizzati għall-finijiet tal-iskambju ta’ informazzjoni u ta’ data relatati ma’ talbiet għal evidenza elettronika jenħtieġ li jiġu pprovduti mezzi awtomatizzati ta’ aċċess għas-sistemi tal-IT deċentralizzati permezz ta’ standard komuni għall-iskambju tad-data.

(85)

Bħala regola, kull komunikazzjoni bil-miktub bejn l-awtoritajiet kompetenti jew bejn l-awtoritajiet kompetenti u l-istabbilimenti jew ir-rappreżentanti legali deżinjati jenħtieġ li titwettaq permezz tas-sistema tal-IT deċentralizzata. Jenħtieġ li jkun biss possibbli li jintużaw mezzi alternattivi meta l-użu tas-sistema tal-IT deċentralizzata ma jkunx possibbli, pereżempju minħabba rekwiżiti forensiċi speċifiċi, minħabba li l-volum tad-data li għandha tiġi ttrasferita jkun imfixkel minn restrizzjonijiet ta’ kapaċità teknika, jew minħabba li stabbiliment ieħor li ma jkunx konness mas-sistema tal-IT deċentralizzata jkun jeħtieġ li jiġi indirizzat f’każ ta’ emerġenza. F’każijiet bħal dawn, it-trażmissjoni jenħtieġ li titwettaq bl-aktar mezzi alternattivi xierqa, filwaqt li titqies il-ħtieġa li jiġi żgurat skambju rapidu, sigur u affidabbli tal-informazzjoni.

(86)

Sabiex jiġi żgurat li s-sistema tal-IT deċentralizzata jkun fiha rekord sħiħ ta’ skambji bil-miktub skont dan ir-Regolament, kwalunkwe trażmissjoni mwettqa b’mezzi alternattivi jenħtieġ li tiġi rreġistrata fis-sistema tal-IT deċentralizzata mingħajr dewmien żejjed.

(87)

L-użu ta’ mekkaniżmi biex tiġi żgurata l-awtentiċità, kif previst fir-Regolament bir-Regolament (UE) Nru 910/2014 tal-Parlament Ewropew u tal-Kunsill (25), jenħtieġ li jiġi kkunsidrat.

(88)

Il-fornituri tas-servizzi, b’mod partikolari l-intrapriżi żgħar u ta’ daqs medju, jenħtieġ li ma jiġux esposti għal kostijiet sproporzjonati fir-rigward tal-istabbiliment u t-tħaddim tas-sistema tal-IT deċentralizzata. Bħala parti mill-ħolqien, il-manutenzjoni u l-iżvilupp tal-implimentazzjoni ta’ referenza, il-Kummissjoni għalhekk għandha wkoll tagħmel disponibbli interfaċċa bbażata fuq il-web li tippermetti lill-fornituri tas-servizzi jikkomunikaw b’mod sigur mal-awtoritajiet mingħajr ma jkollhom jistabbilixxu l-infrastruttura ddedikata tagħhom stess sabiex jaċċessaw is-sistema tal-IT deċentralizzata.

(89)

Jenħtieġ li jkun possibbli li l-Istati Membri jużaw software żviluppat mill-Kummissjoni, jiġifieri s-software ta’ implimentazzjoni ta’ referenza, minflok sistema tal-IT nazzjonali. Dak is-software ta’ implimentazzjoni ta’ referenza għandu jkun ibbażat fuq konfigurazzjoni modulari, li jfisser li s-software jiġi ppakkjat u kkonsenjat b’mod separat mill-komponenti tas-sistema e-CODEX meħtieġa biex is-software jiġi konness mas-sistema tal-IT deċentralizzata. Jenħtieġ li dak l-arranġament jippermetti lill-Istati Membri jużaw mill-ġdid jew itejbu l-infrastruttura tal-komunikazzjoni ġudizzjarja nazzjonali rispettiva eżistenti tagħhom għall-fini tal-użu transfruntier.

(90)

Il-Kummissjoni jenħtieġ li tkun responsabbli għall-ħolqien, il-manutenzjoni u l-iżvilupp tas-software ta’ implimentazzjoni ta’ referenza. Il-Kummissjoni jenħtieġ li tfassal, tiżviluppa u tmantni s-software ta’ implimentazzjoni ta’ referenza f’konformità mar-rekwiżiti u l-prinċipji tal-protezzjoni tad-data stabbiliti fir-Regolament (UE) 2018/1725 tal-Parlament Ewropew u tal-Kunsill (26), fir-Regolament (UE) 2016/679 u fid-Direttiva (UE) 2016/680, b’mod partikolari l-prinċipji tal-protezzjoni tad-data mid-disinn u b’mod awtomatiku kif ukoll livell għoli ta’ ċibersigurtà. Huwa importanti li s-software ta’ implimentazzjoni ta’ referenza jinkludi wkoll miżuri tekniċi xierqa u jagħmilha possibbli li jittieħdu l-miżuri organizzattivi meħtieġa biex jiġi żgurat livell xieraq ta’ sigurtà u interoperabbiltà.

(91)

Sabiex ikunu żgurati kondizzjonijiet uniformi għall-implimentazzjoni ta’ dan ir-Regolament, jenħtieġ li jingħataw setgħat ta’ implimentazzjoni lill-Kummissjoni. Jenħtieġ li dawk is-setgħat ikunu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (27).

(92)

Għall-iskambji tad-data mwettqa permezz tas-sistema tal-IT deċentralizzata jew irreġistrati fis-sistema tal-IT deċentralizzata, jenħtieġ li l-Istati Membri jkunu jistgħu jiġbru statistika biex jissodisfaw l-obbligi tagħhom ta’ monitoraġġ u rapportar skont dan ir-Regolament permezz tal-portali nazzjonali tagħhom.

(93)

Sabiex timmonitorja l-outputs, ir-riżultati u l-impatti ta’ dan ir-Regolament, il-Kummissjoni jenħtieġ li tippubblika rapport annwali dwar is-sena kalendarja preċedenti, abbażi tad-data miksuba mill-Istati Membri. Għal dak l-għan, l-Istati Membri jenħtieġ li jiġbru u jipprovdu lill-Kummissjoni statistika komprensiva dwar aspetti differenti ta’ dan ir-Regolament, skont it-tip ta’ data mitluba, id-destinatarji u jekk kienx każ ta’ emerġenza jew le.

(94)

L-użu ta’ formoli tradotti minn qabel u standardizzati jiffaċilita l-kooperazzjoni u l-iskambju ta’ informazzjoni skont dan ir-Regolament, u b’hekk jippermetti komunikazzjoni iktar ħafifa u iktar effettiva b’mod faċli għall-utent. Tali formoli jnaqqsu l-kostijiet tat-traduzzjoni u jikkontribwixxu għal standard għoli ta’ kwalità tal-komunikazzjoni. Bl-istess mod, il-formoli ta’ risposta jagħmlu possibbli l-iskambju standardizzat tal-informazzjoni, b’mod partikolari fejn il-fornituri tas-servizzi ma jkunux jistgħu jikkonformaw minħabba li l-kont tal-utent ma jkunx jeżisti jew għax ma tkun disponibbli ebda data. Il-formoli previsti f’dan ir-Regolament jiffaċilitaw ukoll il-ġbir tal-istatistika.

(95)

Sabiex tiġi indirizzata b’mod effettiv il-ħtieġa possibbli ta’ titjib fir-rigward tal-kontenut tal-formoli tal-EPOC u tal-EPOC-PR u tal-formoli li jridu jintużaw sabiex tiġi pprovduta l-informazzjoni dwar l-impossibbiltà tal-eżekuzzjoni ta’ EPOC jew ta’ EPOC-PR, għall-konferma tal-ħruġ ta’ talba għall-produzzjoni b’segwitu ta’ Ordni ta’ Preservazzjoni Ewropea u sabiex tiġi estiża l-preservazzjoni tal-evidenza elettronika, is-setgħa li tadotta atti skont l-Artikolu 290 tat-Trattat dwar il-Funzjonament tal-Unjoni Ewropea (TFUE) jenħtieġ li tiġi delegata lill-Kummissjoni fir-rigward tal-emenda għall-formoli previsti f’dan ir-Regolament. Huwa partikolarment importanti li l-Kummissjoni twettaq konsultazzjonijiet xierqa matul ix-xogħol tagħha ta’ tħejjija, ukoll fil-livell ta’ esperti, u li dawk il-konsultazzjonijiet jiġu mwettqa f’konformità mal-prinċipji stipulati fil-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (28). B’mod partikolari, biex tiġi żgurata parteċipazzjoni ugwali fit-tħejjija ta’ atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta’ atti delegati.

(96)

Jenħtieġ li dan ir-Regolament ma jaffettwax strumenti, ftehimiet u arranġamenti tal-Unjoni jew oħrajn internazzjonali dwar il-ġbir ta’ evidenza li jaqa’ fil-kamp ta’ applikazzjoni ta’ dan ir-Regolament. Jenħtieġ li l-awtoritajiet tal-Istati Membri jagħżlu l-għodda l-aktar adatta għall-każ inkwistjoni. F’xi każijiet, huma jistgħu jippreferu jużaw strumenti, ftehimiet u arranġamenti tal-Unjoni u oħrajn internazzjonali meta jitolbu sett ta’ tipi differenti ta’ miżuri investigattivi li ma jkunux limitati għall-produzzjoni ta’ evidenza elettronika minn Stat Membru ieħor. L-Istati Membri jenħtieġ li jinnotifikaw lill-Kummissjoni mhux aktar tard minn tliet snin wara d-dħul fis-seħħ ta’ dan ir-Regolament dwar l-istrumenti, il-ftehimiet u l-arranġamenti eżistenti msemmija f’dan ir-Regolament li huma ser ikomplu japplikaw. L-Istati Membri jenħtieġ li jinnotifikaw ukoll lill-Kummissjoni fi żmien tliet xhur mill-iffirmar ta’ kwalunkwe ftehimiet jew arranġament ġdid kif imsemmi f’dan ir-Regolament.

(97)

Minħabba l-iżviluppi teknoloġiċi, fi ftit snin jistgħu jipprevalu forom ġodda ta’ għodod ta’ komunikazzjoni, jew jistgħu jitfaċċaw lakuni fl-applikazzjoni ta’ dan ir-Regolament. Għalhekk huwa importanti li tiġi prevista evalwazzjoni tal-applikazzjoni tiegħu.

(98)

Il-Kummissjoni jenħtieġ li twettaq evalwazzjoni ta’ dan ir-Regolament li jenħtieġ li jkun ibbażat fuq il-ħames kriterji tal-effiċjenza, l-effettività, ir-rilevanza, il-koerenza u l-valur miżjud tal-UE, u dik l-evalwazzjoni jenħtieġ li tipprovdi l-bażi għall-valutazzjonijiet tal-impatt ta’ miżuri oħra possibbli. Ir-rapport ta’ evalwazzjoni jenħtieġ li jinkludi valutazzjoni tal-applikazzjoni ta’ dan ir-Regolament u tar-riżultati li jkunu nkisbu fir-rigward tal-objettivi tiegħu, kif ukoll valutazzjoni tal-impatt ta’ dan ir-Regolament fuq id-drittijiet fundamentali. Il-Kummissjoni jenħtieġ li tiġbor l-informazzjoni b’mod regolari sabiex tikkontribwixxi għall-evalwazzjoni ta’ dan ir-Regolament.

(99)

Minħabba li l-objettiv ta’ dan ir-Regolament, jiġifieri li jittejbu l-assigurazzjoni u l-ksib ta’ evidenza elettronika minn fruntiera għall-oħra, ma jistax jinkiseb b’mod suffiċjenti mill-Istati Membri iżda jista’ pjuttost, minħabba n-natura transfruntiera tiegħu, jinkiseb aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-TU E. F’konformità mal-prinċipju ta’ proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-objettiv.

(100)

F’konformità mal-Artikolu 3 tal-Protokoll Nru 21 dwar il-pożizzjoni tar-Renju Unit u l-Irlanda fir-rigward tal-ispazju ta’ libertà, sigurtà u ġustizzja, anness mat-TUE u mat-TFUE, l-Irlanda nnotifikat ix-xewqa tagħha li tieħu sehem fl-adozzjoni u fl-applikazzjoni ta’ dan ir-Regolament.

(101)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka ma hijiex qiegħda tieħu sehem fl-adozzjoni ta’ dan ir-Regolament u ma hijiex marbuta bih jew soġġetta għall-applikazzjoni tiegħu.

(102)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1), tar-Regolament (UE) 2018/1725 u ta l-opinjoni tiegħu fis-6 ta’ Novembru 2019 (29),