(1)

Fil-konklużjonijiet tiegħu tal-24 ta’ Frar 2022, il-Kunsill Ewropew ikkundanna l-aggressjoni militari mhux ipprovokata u mhux iġġustifikata tar-Russja kontra l-Ukrajna kif ukoll l-involviment tal-Belarussja f’dik l-aggressjoni. Bħala riżultat tal-aggressjoni, il-Kummissjoni ssospendiet il-ftehimiet ta’ finanzjament għall-programmi ta’ kooperazzjoni bejn l-Unjoni u r-Russja jew il-Belarussja rispettivament, u, fejn rilevanti, l-Istat Membru li jospita l-awtorità maniġerjali tal-programm ikkonċernat. Mill-bidu tal-aggressjoni militari tar-Russja kontra l-Ukrajna, l-Unjoni imponiet serje ta’ sanzjonijiet ġodda kontra r-Russja u l-Belarussja.

(2)

L-aggressjoni militari Russa fixklet l-implimentazzjoni ta’ tlettax-il programm ta’ kooperazzjoni transfruntiera appoġġati mill-Istrument Ewropew ta’ Viċinat (ENI) stabbilit bir-Regolament (UE) Nru 232/2014 tal-Parlament Ewropew u tal-Kunsill (2) bejn disa’ Stati Membri li jospitaw awtorità maniġerjali tal-programm u l-Ukrajna, ir-Repubblika tal-Moldova, ir-Russja u l-Belarussja.

(3)

In-natura frodulenti tal-elezzjonijiet presidenzjali ta’ Awwissu 2020 fil-Belarussja u r-repressjoni vjolenti fuq il-protesti paċifiċi diġà wasslu għar-rikalibrar tal-assistenza tal-Unjoni lill-Belarussja wara l-Konklużjonijiet tal-Kunsill tat-12 ta’ Ottubru 2020.

(4)

B’riżultat tal-aggressjoni militari Russa kontra l-Ukrajna, l-Unjoni u r-reġjuni tal-Lvant tagħha, b’mod partikolari, kif ukoll il-partijiet tal-Punent tal-Ukrajna u r-Repubblika tal-Moldova qegħdin jiffaċċjaw influss sostanzjali ta’ persuni spostati. Dak l-influss jippreżenta sfida addizzjonali għall-Istati Membri u għal pajjiżi oħrajn li jmissu mal-Ukrajna, li tista’ tinfirex aktar lejn Stati Membri oħrajn, speċjalment fi żmien meta l-ekonomiji tagħhom għadhom qegħdin jirkupraw mill-impatt tal-pandemija tal-COVID-19.

(5)

Barra minn hekk, żewġ programmi ta’ kooperazzjoni tranżnazzjonali appoġġati mill-ENI u mill-Fond Ewropew għall-Iżvilupp Reġjonali (FEŻR) taħt ir-Regolament (UE) Nru 1299/2013 tal-Parlament u tal-Kunsill (3), jiġifieri l-Programm Interreg tar-Reġjun tal-Baħar Baltiku bil-parteċipazzjoni tar-Russja, u l-Programm Transnazzjonali tad-Danubju bil-parteċipazzjoni tal-Ukrajna u tar-Repubblika tal-Moldova, ġew imfixkla b’mod konsiderevoli mill-aggressjoni militari Russa kontra l-Ukrajna jew, fir-rigward tar-Repubblika tal-Moldova, mill-flussi ta’ persuni spostati mill-Ukrajna li jirriżultaw direttament minn dik l-aggressjoni.

(6)

Min-notifikazzjonijiet tas-sospensjoni tal-ftehimiet ta’ finanzjament għall-programmi ta’ kooperazzjoni mar-Russja u l-Belarussja, kwalunkwe implimentazzjoni tal-programmi u tal-proġetti ma’ dawk il-pajjiżi huma sospiżi. Huwa neċessarju li jiġu stabbiliti regoli speċifiċi dwar it-tkomplija tal-implimentazzjoni tal-programmi ta’ kooperazzjoni appoġġati mill-ENI u mill-FEŻR, anke fil-każ ta’ terminazzjoni tal-ftehim ta’ finanzjament rispettiv.

(7)

L-implimentazzjoni tal-programmi ta’ kooperazzjoni appoġġati mill-ENI hija regolata mir-Regolament ta’ Implimentazzjoni tal-Kummissjoni (UE) Nru 897/2014 (4). Madankollu, ir-Regolament ta’ Implimentazzjoni (UE) Nru 897/2014 ma jistax jiġi emendat kif neċessarju, minħabba li l-bażi ġuridika tiegħu, ir-Regolament (UE) Nru 232/2014 ma baqax fis-seħħ mill-31 ta’ Diċembru 2020. Konsegwentement, huwa neċessarju li jiġu stabbiliti dispożizzjonijiet speċifiċi fir-rigward tat-tkomplija tal-implimentazzjoni tal-programmi ta’ kooperazzjoni kkonċernati fi strument legali separat.

(8)

Il-ftehimiet ta’ finanzjament għall-programmi ta’ kooperazzjoni mal-Ukrajna u r-Repubblika tal-Moldova ma humiex sospiżi. Madankollu, l-implimentazzjoni ta’ dawk il-programmi hija affettwata b’mod konsiderevoli mill-aggressjoni militari mhux ipprovokata u mhux iġġustifikata tar-Russja kontra l-Ukrajna u minn fluss sostanzjali ta’ persuni spostati mill-Ukrajna lejn ir-Repubblika tal-Moldova. Sabiex jiġu indirizzati l-isfidi għas-sħab tal-programm, għall-awtoritajiet tal-programm u għas-sħab tal-proġetti, huwa neċessarju li jiġu stabbiliti regoli speċifiċi dwar it-tkomplija tal-implimentazzjoni tal-programmi ta’ kooperazzjoni kkonċernati.

(9)

Bil-ħsieb li jittaffa l-piż fuq il-baġits pubbliċi li jirriżulta mill-ħtieġa li jkun hemm rispons għall-aggressjoni militari mhux ipprovokata u mhux iġġustifikata tar-Russja kontra l-Ukrajna u għal fluss sostanzjali ta’ persuni spostati mill-Ukrajna, ir-regola ta’ kofinanzjament stabbilita fir-Regolament ta’ Implimentazzjoni (UE) Nru 897/2014 jenħtieġ li ma tapplikax għall-kontribuzzjoni tal-Unjoni.

(10)

Il-modifika tar-rata ta’ kofinanzjament jenħtieġ li tirrikjedi biss notifika ta’ tabelli finanzjarji riveduti lill-Kummissjoni u arranġamenti proċedurali oħrajn. Huwa neċessarju li r-regoli dwar l-aġġustamenti u r-reviżjonijiet tal-programmi jiġu ssimplifikati għall-programmi affettwati direttament mill-aggressjoni militari kontra l-Ukrajna jew minn fluss sostanzjali ta’ persuni spostati mill-Ukrajna. Kwalunkwe aġġustamenti konsegwenzjali potenzjali, inkluż għall-valuri fil-mira tal-indikaturi, jenħtieġ li jitħallew bħala parti minn aġġustament sussegwenti tal-programm wara t-tmiem tas-sena kontabilistika.

(11)

In-nefqa għal proġetti li jindirizzaw l-isfidi migratorji bħala riżultat tal-aggressjoni militari Russa kontra l-Ukrajna jenħtieġ li tkun eliġibbli mid-data tal-bidu ta’ dik l-aggressjoni fl-24 ta’ Frar 2022.

(12)

Għalkemm il-ġestjoni tal-proġetti diġà magħżula mill-Kumitat Konġunt ta’ Monitoraġġ hija r-responsabbiltà tal-awtorità maniġerjali, taħt xi programmi ċerti emendi tal-proġetti jridu jiġu approvati mill-Kumitat Konġunt ta’ Monitoraġġ. Sabiex jitħaffef it-tibdil neċessarju, huwa għalhekk neċessarju li jiġi stabbilit li r-responsabbiltà għall-emendar tad-dokumenti li jistabbilixxu l-kundizzjonijiet għall-appoġġ fir-rigward tal-proġetti affettwati minn tfixkil fl-implimentazzjoni tal-programm f’konformità mal-liġi nazzjonali tal-awtorità maniġerjali hija biss tal-awtorità maniġerjali rispettiva, mingħajr l-approvazzjoni minn qabel tal-Kumitat Konġunt ta’ Monitoraġġ. Jenħtieġ li jkun possibbli li tali emendi jkopru wkoll, fost l-oħrajn, is-sostituzzjoni tal-benefiċjarju ewlieni jew kwalunkwe bidla għall-pjan ta’ finanzjament jew tal-iskadenzi għall-eżekuzzjoni. Fir-rigward ta’ proġetti ġodda, l-awtorità maniġerjali jenħtieġ li titħalla b’mod espliċitu tiffirma kuntratti għajr kuntratti għal proġetti infrastrutturali kbar wara l-31 ta’ Diċembru 2022. Madankollu, l-attivitajiet kollha tal-proġetti ffinanzjati mill-programm jenħtieġ li jintemmu sal-31 ta’ Diċembru 2023.

(13)

L-aggressjoni militari Russa kontra l-Ukrajna kkawżat inflazzjoni ogħla minn dak li kien mistenni u żieda mhux mistennija fil-prezzijiet tal-provvista u tal-kostruzzjoni, li flimkien jaffettwaw l-implimentazzjoni ta’ proġetti infrastrutturali kbar fil-programmi kkonċernati. Sabiex tiġi rrimedjata dik is-sitwazzjoni, is-sehem tal-kontribuzzjoni tal-Unjoni allokata għal tali proġetti jenħtieġ li jitħalla jaqbeż il-limitu massimu stabbilit fir-Regolament ta’ Implimentazzjoni (UE) Nru 897/2014, jiġifieri 30 % fl-għeluq tal-programm, sakemm l-eċċess ikun dovut biss għal żieda mhux mistennija fil-prezzijiet tal-provvista u tal-kostruzzjoni.

(14)

Il-verifiki mwettqa mill-awtorità maniġerjali jikkonsistu f’verifiki amministrattivi u fuq il-post tal-proġett. Minħabba tfixkil fl-implimentazzjoni tal-programm, ma setax jibqa’ jkun possibbli li jitwettqu verifiki fuq il-post tal-proġetti fl-Ukrajna. Għalhekk, huwa neċessarju li tiġi prevista l-possibbiltà li jitwettqu biss verifiki amministrattivi. Barra minn hekk, fejn komponent tal-infrastruttura ta’ proġett ikun inqered qabel ma jkunu jistgħu jitwettqu l-verifiki, jenħtieġ li jkun possibbli għal benefiċjarjus li tiġi ddikjarata n-nefqa relatata għall-approvazzjoni tal-kontijiet abbażi ta’ dikjarazzjoni fuq l-unur mill-benefiċjarju li tiddikjara li l-proġett qabel il-qerda tiegħu kien jikkorrispondi mal-kontenut stabbilit f’fatturi jew f’dokumenti ta’ valur probatorju ekwivalenti.

(15)

Skont ir-Regolament ta’ Implimentazzjoni (UE) Nru 897/2014, il-proġetti jistgħu jirċievu kontribuzzjoni finanzjarja jekk jissodisfaw sett ta’ kriterji dettaljati. Minħabba t-tfixkil fl-implimentazzjoni tal-programm, wieħed jew aktar minn dawk il-kriterji, b’mod partikolari r-rekwiżit li l-proġett ikollu impatt ċar ta’ kooperazzjoni transfruntiera jew tranżnazzjonali, jista’ ma jiġix issodisfat fil-bidu tat-tfixkil jew fl-għeluq ta’ proġett partikolari. Barra minn hekk, il-kundizzjoni bażika li jiġu involuti benefiċjarji minn tal-anqas wieħed mill-Istati Membri parteċipanti u mill-anqas wieħed mill-pajjiżi sħab parteċipanti tista’ ma tibqax tiġi rrispettata. Għalhekk huwa neċessarju li jiġi ddeterminat jekk in-nefqa tistax madankollu titqies bħala eliġibbli minkejja l-fatt li xi kundizzjonijiet għall-finanzjament jistgħu ma jibqgħux jiġu ssodisfati minħabba tfixkil fl-implimentazzjoni tal-programm.

(16)

Bħala riżultat tat-tfixkil fl-implimentazzjoni tal-programm, ħafna proġetti de facto mhux ser ikollhom sieħeb minn pajjiż sieħeb. Sabiex il-benefiċjarji fl-Istati Membri jkunu jistgħu jiffinalizzaw l-attivitajiet tagħhom, huwa xieraq li ssir deroga eċċezzjonali mill-obbligu li l-proġetti kollha jkollhom mill-anqas benefiċjarju wieħed minn pajjiż sieħeb u li l-attivitajiet kollha jkollhom impatt u benefiċċji transfruntiera jew tranżnazzjonali ġenwini.

(17)

L-obbligi ta’ benefiċjarju ewlieni jkopru l-attivitajiet kollha marbuta mal-implimentazzjoni tal-proġett. Bħala riżultat tat-tfixkil fl-implimentazzjoni tal-proġett, il-benefiċjarji ewlenin jistgħu jitwaqqfu milli jwettqu l-obbligi tagħhom fir-rigward ta’ pajjiż sieħeb. Għalhekk, l-obbligi tal-benefiċjarju ewlieni jenħtieġ li jiġu adattati u, fejn neċessarju, limitati għall-implimentazzjoni tal-proġett fir-rigward tal-Istati Membri. Il-benefiċjarji ewlenin jenħtieġ li jitħallew ukoll jemendaw il-ftehim bil-miktub mas-sħab l-oħrajn tal-proġett u jissospendu ċerti attivitajiet jew il-parteċipazzjoni ta’ ċerti sħab. Fl-aħħar nett, l-obbligu tal-benefiċjarji ewlenin li jittrasferixxu l-pagamenti riċevuti mill-awtorità maniġerjali lil sħab oħrajn jenħtieġ li jitneħħa jew tal-anqas jiġi adattat.

(18)

Sabiex il-programmi affettwati jindirizzaw iċ-ċirkostanzi eċċezzjonali, huwa neċessarju li jiġi permess li l-proġetti li jindirizzaw l-isfidi migratorji jkunu jintgħażlu mingħajr sejħa minn qabel għal proposti f’każijiet eċċezzjonali u debitament sostanzjati.

(19)

Wara s-sospensjoni tal-ftehimiet ta’ finanzjament ma’ pajjiżi sħab, il-pagamenti relatati mal-parteċipazzjoni Russa jew tal-Belarussja ġew sospiżi. Barra minn hekk, fl-Ukrajna l-miżuri straordinarji meħuda mill-Bank Nazzjonali u s-sitwazzjoni tas-sigurtà li tirriżulta mill-aggressjoni militari Russa kontriha jimpedixxu t-trasferiment ta’ flus barra mill-pajjiż. Għalhekk huwa xieraq li jkun permess il-ħlas dirett tal-għotjiet mill-awtorità maniġerjali lill-benefiċjarji tal-proġett fl-Istati Membri u fil-pajjiżi sħab li l-ftehimiet ta’ finanzjament tagħhom ma humiex sospiżi.

(20)

Programmi ta’ kooperazzjoni appoġġati mill-ENI huma meħtieġa jistabbilixxu l-metodu tal-konverżjoni tan-nefqa mġarrba f’munita għajr l-euro. Dak il-metodu japplika matul id-durata kollha tal-programm. Minħabba l-konsegwenzi finanzjarji u ekonomiċi tal-aggressjoni militari Russa kontra l-Ukrajna, hemm fluttwazzjonijiet mhux mistennija tar-rati tal-kambju. Għalhekk huwa neċessarju li tiġi prevista l-possibbiltà li dak il-metodu jinbidel.

(21)

Minħabba tfixkil fl-implimentazzjoni tal-programm, l-awtoritajiet maniġerjali jaf ma jkunux jistgħu jirċievu trasferimenti bankarji minn ċerti pajjiżi sħab, li jirriżulta fl-impossibbiltà li jirkupraw djun minn benefiċjarji tal-proġetti li jinsabu f’tali pajjiżi. Fil-każ ta’ pajjiż sieħeb li jkun ittrasferixxa parti mill-kontribuzzjoni nazzjonali tiegħu lill-awtorità maniġerjali, dawk l-ammonti jenħtieġ li jintużaw sabiex jiġu paċuti dawn id-djun. Fil-każ ta’ pajjiżi sħab oħrajn, l-ordnijiet ta’ rkupru rigward djun irrekuperabbli jenħtieġ li jiġu rrinunzjati jew indirizzati mill-Kummissjoni.

(22)

F’konformità mar-Regolament (UE) Nru 1299/2013, il-kundizzjonijiet applikabbli ta’ implimentazzjoni tal-programm li jirregolaw il-ġestjoni finanzjarja kif ukoll l-aspetti ta’ programmazzjoni, monitoraġġ, evalwazzjoni u kontroll tal-parteċipazzjoni tal-pajjiżi terzi, permezz ta’ kontribuzzjoni tar-riżorsi tal-ENI għall-programmi ta’ kooperazzjoni tranżnazzjonali, iridu jiġu stabbiliti fil-programm ta’ kooperazzjoni rilevanti u anke, fejn neċessarju, fil-ftehim ta’ finanzjament bejn il-Kummissjoni, il-gvernijiet tal-pajjiżi terzi kkonċernati u l-Istat Membru li jkun qiegħed jospita l-awtorità maniġerjali tal-programm ta’ kooperazzjoni rilevanti. Għalkemm il-kundizzjonijiet applikabbli tal-implimentazzjoni tal-programm li jirregolaw aspetti bħal dawn jistgħu jiġu adattati permezz ta’ aġġustament tal-programm ta’ kooperazzjoni, huwa neċessarju li jiġu previsti xi derogi minn ċerti dispożizzjonijiet tar-Regolament (UE) Nru 1299/2013 sabiex tkun tista’ ssir l-applikazzjoni tad-dispożizzjonijiet stabbiliti għall-programmi ta’ kooperazzjoni appoġġati mill-ENI wkoll għall-Programm Interreg tar-Reġjun tal-Baħar Baltiku u l-Programm Transnazzjonali tad-Danubju.

(23)

Minħabba li l-objettivi ta’ dan ir-Regolament, jiġifieri li jistabbilixxi dispożizzjonijiet speċifiċi rigward l-implimentazzjoni tal-programmi ta’ kooperazzjoni affettwati mill-aggressjoni militari Russa kontra l-Ukrajna, ma jistgħux jinkisbu b’mod suffiċjenti mill-Istati Membri, iżda jistgħu pjuttost, minħabba l-iskala u l-effetti tal-azzjoni proposta, jinkisbu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea (TUE). F’konformità mal-prinċipju tal-proporzjonalità, kif stabbilit f’dak l-Artikolu, dan ir-Regolament ma jmurx lil hinn minn dak li huwa neċessarju sabiex jintlaħqu dawk l-objettivi.

(24)

Il-finanzjament ipprovdut fil-kuntest ta’ dan ir-Regolament irid jikkonforma mal-kundizzjonijiet u l-proċeduri stabbiliti mill-miżuri restrittivi adottati skont l-Artikolu 215 tat-Trattat dwar il-Funzjonament tal-Unjoni Ewropea (TFUE).

(25)

Minħabba l-urġenza sabiex jiġu indirizzati l-isfidi migratorji b’riżultat tal-aggressjoni militari mir-Russja kontra l-Ukrajna u l-kriżi tas-saħħa pubblika li għadha għaddejja li ġejja mill-pandemija tal-COVID-19, ġie meqjus xieraq li tiġi invokata l-eċċezzjoni għall-perjodu ta’ tmien ġimgħat imsemmi fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea, anness mat-TUE, mat-TFUE u mat-Trattat li jistabbilixxi l-Komunità Ewropea għall-Enerġija Atomika.

(26)

Sabiex l-Istati Membri jkunu jistgħu jaġġustaw il-programmi tagħhom fil-ħin sabiex jibbenefikaw mill-applikazzjoni tal-għażla ta’ ebda kofinanzjament għall-kontribuzzjoni tal-Unjoni għas-sena kontabilistika 2021/2022, jenħtieġ li r-Regolament jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea,