(1)

Le Treoir 2014/59/AE arna leasú le Treoir (AE) 2019/879 ó Pharlaimint na hEorpa agus ón gComhairle (2), tugadh isteach coimircí áirithe chun forghníomhú éifeachtach na réiteach a fheabhsú i ndáil le conarthaí airgeadais atá faoi rialú ag dlí tríú tír.

(2)

I gcomhréir le hAirteagal 71a(1) de Threoir 2014/59/AE, ceanglaítear ar institiúidí agus ar eintitis téarmaí a áireamh lena n-aithnítear cumhachtaí um bac réitigh na n-údarás réitigh sna conarthaí airgeadais a dhéanann siad agus atá faoi rialú ag dlí tríú tír.

(3)

Chun éifeachtúlacht an réitigh a fheabhsú, leagtar síos le hAirteagal 68 de Threoir 2014/59/AE nár cheart a mheas go bhfuil bearta coiscthe géarchéime áirithe nó bearta bainistithe géarchéime áirithe ina n-ócáidí forfheidhmithe ná ina n-imeachtaí dócmhainneachta. Thairis sin, leis an airteagal sin, leagtar síos nár cheart leis na bearta sin go mbeadh contrapháirtithe conarthacha i gconarthaí ábhartha i dteideal cearta conarthacha áirithe a fheidhmiú de bharr cur i bhfeidhm beart den sórt sin agus dá bharr sin amháin. Dá bhrí sin, is gá toiliú na bpáirtithe maidir le bheith faoi cheangal na gceanglas sin a áireamh in inneachar na dtéarmaí conarthacha. Ina theannta sin, faoi Airteagail 33a, 69, 70 agus 71 de Threoir 2014/59/AE, féadfaidh na húdaráis réitigh, ar feadh tréimhse theoranta, oibleagáidí conarthacha íocaíochta nó seachadta atá dlite faoi chonradh le hinstitiúid nó le heintiteas faoi réiteach a chur ar fionraí, nó in imthosca áirithe, i gcás institiúid nó eintiteas roimh réiteach, féadfaidh siad teorainn a chur le leasanna urrúis a fhorfheidhmiú agus cearta áirithe na gcontrapháirtithe a chur ar fionraí, mar shampla, an ceart chun clabhsúr a chur ar olloibleagáidí nó iad a ghlanluacháil, íocaíochtaí amach anseo a luathú nó conarthaí airgeadais a fhoirceannadh ar bhealach eile. Ós rud é go bhféadfaí nach mbeadh cumhachtaí na n-údarás réitigh éifeachtach i gcás conarthaí airgeadais atá faoi dhlí tríú tír, ba cheart iad a aithint go sainráite i dtéarmaí na gconarthaí airgeadais.

(4)

Chun éifeachtacht an réitigh a áirithiú agus comhsheasmhacht na gcur chuige arna nglacadh ag na Ballstáit a chur chun cinn, agus chun a áirithiú gur féidir le húdaráis réitigh, institiúidí agus eintitis difríochtaí a chur san áireamh, difríochtaí idir córais dlí nó difríochtaí a eascraíonn as foirm shonraithe nó struchtúr sonraithe an chonartha, is iomchuí an t-inneachar sainordaitheach maidir leis na téarmaí conarthacha a leagan síos. Ba cheart samhlacha gnó éagsúla na n-institiúidí agus na n-eintiteas a chur san áireamh in inneachar na dtéarmaí conarthacha sin. Ós rud é, áfach, nach mbíonn éagsúlacht i gceist de ghnáth i gcomhréir le samhlacha gnó éagsúla na n-institiúidí agus na n-eintiteas maidir le conarthaí airgeadais in idirbhearta idirnáisiúnta, ní gá inneachar éagsúil a chruthú le haghaidh clásail réitigh chonarthacha.

(5)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Baincéireachta Eorpach (ÚBE).

(6)

Tá comhairliúcháin phoiblí oscailte déanta ag ÚBE maidir leis na dréachtchaighdeáin theicniúla rialála ar a bhfuil an Rialachán seo bunaithe, tá anailís déanta aige ar na costais agus ar na tairbhí a d'fhéadfadh a bheith ag baint leo agus d'iarr sé comhairle ón nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 (3) ó Pharlaimint na hEorpa agus ón gComhairle,