Féachtar leis an teachtaireacht soiléiriú a thabhairt ar na rialacha agus na coinníollacha faoinar féidir le Ballstáit an Aontais Eorpaigh (AE) státchabhair a dheonú do chuideachtaí chun gníomhaíochtaí taighde, forbartha agus nuálaíochta (T&F&N) a dhéanamh.

PRÍOMHPHOINTÍ

Tá dhá chuid chomhlántacha sna rialacha a bhaineann le Státchabhair i gcomhair gníomhaíochtaí T&F&N:

Le Rialachán (AE) Uimh. 651/2014, ar a dtugtar an Rialachán Ginearálta Blocdhíolúine (RGBD, féach an achoimre), leagtar amach na coinníollacha faoina bhfuil Státchabhair T&F&N (mar aon le cineálacha eile státchabhrach) díolmhaithe ó fhógra éigeantach a thabhairt ina leith roimh ré don Choimisiún Eorpach (i.e. blocdhíolmhaithe).
Tá rialacha sa chóras maidir le Státchabhair le haghaidh taighde, forbartha agus nuálaíochta (an “creat T&F&N”) don Choimisiún chun measúnú a dhéanamh ar chabhair T&F&N atá neamh–incháilithe maidir leis an blocdhíolúine.

An próiseas maidir le deonú Státchabhrach a luathú

Faoin RGBD, rinneadh méadú suntasach ar na méideanna thíos óna bhfuil chabhair díolmhaithe ó fhógra a thabhairt ina leith le haghaidh chead an Choimisiúin. Mar shampla, is féidir leis na Ballstáit Státchabhair i gcomhair forbairt thurgnamhach suas le €15 mhilliún a dheonú anois in aghaidh an tionscadail agus an tairbhí gan cead a fháil roimh ré ón gCoimisiún, i gcomparáid le €7.5 mhilliún faoi na rialacha roimhe seo.
Leis an gcóras sin tugtar níos mó solúbthachta do na Ballstáit agus luathaítear an próiseas maidir le cabhair T&F&N a chur chun feidhme.

Leathnú díolúintí

Leathnaítear díolúine cabhrach ó fhógra a thabhairt ina leith go:

taighde bhunúsach;
taighde tionsclaíoch;
forbairt thurgnamhach, lena n–áirítear treoirthionscadail agus fréamhshamhlacha;
staidéar féidearthachta;
bonneagair taighde;
cnuasaigh nuálaíochta;
cabhair le haghaidh nuálaíocht próiseas agus eagraíochtúil.

Leibhéil Státchabhrach a d’fhéadfadh a bheith níos airde

Chun cabhrú leis an tionscal easnaimh mhaoinithe a shárú, ceadófar faoin gcreat T&F&N, i gcás bearta a dtugtar fógra ina leith go leithleach, cabhair dar luach suas le 70% de chostais incháilithe mórchuideachtaí agus 90% do chuideachtaí beaga a dhéanann taighde feidhmeach, lena n–áirítear na costais a bhaineann le fréamhshamhaltú agus le taisealbhadh.
Beidh cabhair ardleibhéil ar fáil má tá fíor–easnamh maoinithe ann. Déanfaidh an Coimisiún anailís mhionsonraithe, bunaithe ar na critéir sa chreat, lena ndeimhniú gur gá ard–rátaí dá leithéid a dheonú, chun saobhadh míchuí ar iomaíocht i margadh aonair AE a sheachaint.

Comhcheangal de Státchabhair do T&F&N le acmhainní AE faoi Fhís Eorpach nó le tionscadail ar a bhfuil an lipéad cáilíochta séala barr feabhais

Chun an measúnú maidir le méideanna móra cabhrach a shimpliú i leith tionscadal ar léir gur ar mhaithe le leas coiteann AE atá siad, cuireadh rialacha sonracha leis an RGBD agus glacadh iad faoi Rialachán (AE) 2021/1237 ón gCoimisiún. Baineann siad sin le cabhair:

tionscadail ar bronnadh lipéad cáilíochta séala barr feabhais orthu;
le haghaidh ghníomhaíochtaí Marie Skłodowska-Curie agus ghníomhaíochtaí Chruthúnas Coincheapa na Comhairle Eorpaí um Thaighde;
a bhaineann le tionscadail taighde agus forbartha cómhaoinithe;
le haghaidh cur le chéile (gníomhaíochtaí forbartha institiúidí).

Cur i bhfeidhm

Bhí ar na Ballstáit a áirithiú go raibh a scéimeanna cabhrach reatha T&F&N i gcomhréir leis an gcreat sin faoin 1 Eanáir 2015.

CÚLRA

Tá sé mar aidhm le gníomhaíochtaí T&F&N cur leis an sprioc 3% d’olltáirgeacht intíre AE a chaitheamh ar T&F&N, agus ar an tslí sin:

fás eacnamaíoch cliste agus inbhuanaithe a áirithiú;
saobhadh ar an iomaíocht a eascraíonn as cabhair T&F&N a theorannú.

PRÍOMHDHOICIMÉAD

Teachtaireacht ón gCoimisiún — Creat maidir le Státchabhair le haghaidh taighde agus forbartha agus nuálaíochta (IO C 198 27.6.2014, lgh. 1–29).

DOICIMÉID GHAOLMHARA

Rialachán (AE) Uimh. 651/2014 an 17 Meitheamh 2014 lena sonraítear catagóirí áirithe cabhrach atá comhoiriúnach leis an margadh inmheánach agus Airteagal 107 agus Airteagal 108 den Chonradh á gcur i bhfeidhm (IO L 187, 26.6.2014, lgh. 1–78).

Rinneadh leasuithe comhleanúnacha ar Rialachán (AE) Uimh. 651/2014 a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Teachtaireacht ón gCoimisiún — Critéir maidir le hanailís a dhéanamh ar chomhoiriúnacht le margadh inmheánach na státchabhrach chun cur i gcrích tionscadal tábhachtach ar mhaithe le leas na hEorpa i gcoitinne a chur chun cinn (IO C 188, 20.6.2014, lgh. 4–12).

Nuashonraithe 28.09.2021

Top

All