27.7.2012   

MT

Il-Ġurnal Uffiċjali tal-Unjoni Ewropea

C 225/127

—

huwa sodisfatt li l-FSE ser iżomm il-karatteristika partikolari tiegħu ta’ fond strutturali, u li ser jibqa' element, stabbilit fis-sod, tal-politika ta’ koeżjoni tal-UE, pjuttost milli jinbidel f'politika Ewropea settorjali;

—

għad għandu xi dubji, madankollu, dwar kemm iż-żieda modesta fir-riżorsi disponibbli għall-FSE ser tkun biżżejjed biex tappoġġja l-għanijiet ambizzjużi stabbiliti għalih;

—

jitlob li tinstab minnufih bażi legali iktar adatta barra l-FSE biex tiġi indirizzata l-kwistjoni tal-għajnuna f'ikel għall-persuni l-aktar fi bżonn;

—

jinsab imħasseb li l-“allinjament komplet” tal-FSE mal-għanijiet tal-Istrateġija Ewropa 2020 jista' jikkostrinġi l-missjoni li għandu jaqdi fil-qafas tal-politika ta’ koeżjoni, kif previst fit-Trattat (cf. reġjuni rurali, dawk għaddejjin minn tibdil industrijali, reġjuni insulari, transkonfinali u muntanjużi);

—

jiddispjaċih li l-proposta ma tagħmilx referenza għall-promozzjoni tal-flessigurtà fis-suq tax-xogħol, u josserva li l-flessigurtà hija koperta minn wieħed mil-linji gwida integrati tal-Istrateġija Ewropa 2020 (linja gwida 7);

—

japprova l-allokazzjoni tal-inqas 20 % tar-riżorsi kollha tal-FSE f'kull Stat Membru sabiex jintlaħaq l-għan tematiku tal-“promozzjoni tal-inklużjoni soċjali u l-ġlieda kontra l-faqar”;

—

filwaqt li japprova l-konċentrazzjoni tematika, ma jaqbilx mal-mod ta’ ħidma u l-proċedura li għażlet il-Kummissjoni biex jintlaħaq dan l-għan, u jirrakkomanda, minflok, iżjed flessibilità;

—

huwa diżappuntant li l-Artikolu 6 tal-Proposta għal Regolament dwar “L-involviment tal-imsieħba”, kif ukoll il-premessa (9), ma jagħmlu l-ebda referenza għall-awtoritajiet lokali; jirreferu biss għall-imsieħba soċjali u l-NGOs;

—

huwa mistagħġeb kif il-proposta tal-Kummissjoni ma tipprevedix kooperazzjoni transkonfinali u interrreġjonali flimkien mal-kooperazzjoni transnazzjonali;

—

jilqa' b'sodisfazzjon ir-referenza għall-bżonn ta’ “mobilizzazzjoni tal-partijiet interessati reġjonali u lokali” biex tiġi implimentata l-Istrateġija Ewropa 2020, u l-possibbiltà li jintużaw il-patti territorjali biex jintlaħaq dan l-għan, iżda jkun favur l-espansjoni tal-użu tagħha għal fondi oħrajn;

Relatur

Konstantinos SIMITSIS (EL/PSE), Sindku tal-Belt ta’ Kavala

Dokument ta’ referenza

Proposta għal Regolament tal-Parlament Ewropew u tal-Kunsill dwar il-Fond Soċjali Ewropew u li jħassar ir-Regolament (KE) Nru 1081/2006

COM(2011) 607 final – 2011/0268 (COD)

1.

huwa sodisfatt li l-Fond Soċjali Ewropew (FSE), li huwa strument indispensabbli biex jappoġġja l-impjieg, jippromovi l-inklużjoni soċjali u jiġġieled il-faqar, ser iżomm il-karatteristika partikolari tiegħu ta’ fond strutturali, u li ser jibqa' element, stabbilit fis-sod, tal-politika ta’ koeżjoni tal-UE, pjuttost milli jinbidel f'politika Ewropea settorjali, saħansitra wara l-2013;

2.

japprova ż-żamma, ir-riorganizzazzjoni u t-tisħiħ tal-għanijiet tematiċi fundamentali tal-operazzjonijiet fil-qafas tal-FSE, li jinqasmu bejn erba' kategoriji, kull waħda minnhom b'numru ta’ prijoritajiet ta’ investiment;

3.

jilqa' b'sodisfazzjon partikolari l-fatt li nxteħet dawl fuq “l-inklużjoni u l-ġlieda kontra l-faqar”, billi din il-kwistjoni saret għan tematiku fundamentali tal-azzjoni tal-FSE, fid-dawl tal-fatt li l-protezzjoni soċjali issa hija kkunsidrata bħala assolutament kruċjali f'sitwazzjoni ta’ kriżi ekonomika severa li tolqot għadd kbir ta’ ċittadini Ewropej;

4.

jilqa' b'sodisfazzjon il-proposta li s-somma allokata għall-FSE tiżdied b'mod modest, li b'hekk tilħaq l-EUR 84 biljun u tiġi tirrappreżenta 25 % tal-baġit globali tal-politika ta’ koeżjoni għall-perjodu ta’ programmazzjoni 2014-2020, meta mqabbel ma’ madwar EUR 75 biljun u 23 % għall-perjodu attwali ta’ programmazzjoni;

5.

għad għandu xi dubji, madankollu, dwar kemm din iż-żieda modesta fir-riżorsi disponibbli għall-FSE ser tkun biżżejjed biex tappoġġja l-għanijiet ambizzjużi stabbiliti għalih, peress li, fil-fatt, din iż-żieda hija inqas milli tidher peress li l-ammont minimu tar-riżorsi tal-fond jinkludi wkoll EUR 2,5 biljun li jgħaddu mill-baġit tal-politika agrikola komuni għall-għajnuna għall-ikel għall-persuni l-iżjed żvantaġġati;

6.

jesprimi dubju dwar jekk l-għajnuna għall-ikel għall-persuni l-iżjed żvantaġġati, li fil-prinċipju l-KtR qed jappoġġja bil-qawwa, hijiex koperta mill-għanijiet definiti fl-artikolu rilevanti fit-TFUE, jiġifieri l-Artikolu 162. Barra minn hekk, josserva li l-għajnuna għall-ikel għall-iżjed persuni żvantaġġati ma tissemmiex fit-test tal-abbozz ta’ regolament tal-FSE u l-oqsma ta’ intervent (b'mod partikolari, l-Artikolu 3 dwar l-ambitu ta’ applikazzjoni tal-għajnuna). Għalhekk, jitlob li tinstab minnufih bażi legali aktar adatta barra l-FSE biex tiġi indirizzata l-kwistjoni tal-għajnuna f'ikel għall-persuni l-aktar fi bżonn;

7.

jistaqsi lilu nnifsu jekk ikunx utli li jiġu stabbiliti għanijiet iżjed ambizzjużi għar-riżorsi allokati lill-politika ta’ koeżjoni inġenerali u lill-FSE b'mod partikolari, f'dawn iż-żminijiet ta’ kriżi ekonomika severa fl-Ewropa, li qed ikollha riperkussjonijiet soċjali drammatiċi;

8.

jiddispjaċih li għal darb'oħra l-Kummissjoni naqasha l-kuraġġ tadotta l-pożizzjonijiet tal-Kumitat dwar il-valutazzjoni tal-progress miksub, permezz tal-użu ta’ kriterji lil hinn mill-PDG li jkopru parametri ekonomiċi, soċjali u ambjentali;

9.

jitlob lill-Kummissjoni u lill-korpi l-oħra tal-Unjoni Ewropea kompetenti fil-qasam biex jaċċelleraw l-isforzi tagħhom biex tkun tista' tintuza l-iżjed data statistika reċenti għall-perjodu 2009-2011 fil-każ tal-Istati Membri, u tal-2008-2010 fil-każ tar-reġjuni (pjuttost milli dik għall-2007-2009 u 2006-2008, rispettivament), b'mod li tingħata stampa preċiża kemm jista' jkun tas-sitwazzjoni ekonomika estremament negattiva, u li l-FSE jkun jista' jindirizza ż-żieda fil-bżonnijiet li din is-sitwazzjoni ħolqot. Għall-finijiet ta’ ekwità, il-KtR jitlob li l-metodu għall-allokazzjoni tar-riżorsi jiżgura li, fi kwalunkwe każ, anke jekk ir-reġjuni għadhom koperti mill-għanijiet tal-konverġenza, dawn xorta jingħataw iżjed fondi mir-reġjuni tranżitorji;

10.

jopponi kull idea li jiġu stabbiliti klawżoli makroekonomiċi ta’ kundizzjonalità, l-iżjed għall-FSE, għax dan “jippenalizza” l-awtoritajiet reġjonali u, fl-aħħar mill-aħħar, il-benefiċjarji tal-Fond – li skont l-Artikolu 2(3) tal-Proposta għal Regolament huma “nies, inklużi l-gruppi żvantaġġjati bħal pereżempju n-nies li jkunu qiegħda fit-tul, in-nies b'diżabbiltajiet, il-migranti, il-minoritajiet etniċi, il-komunitajiet marġinalizzati u n-nies li qed jiffaċċjaw l-esklużjoni soċjali”, kif ukoll intrapriżi – minħabba d-dewmien li jista' jkun hemm min-naħa tal-gvernijiet ċentrali biex jippromovu r-riformi li impenjaw ruħhom li jagħmlu fil-qafas tal-Programmi Nazzjonali ta’ Riforma;

11.

jinsab imħasseb dwar problemi relatati mal-ksur tal-prinċipji tas-sussidjarjetà u l-proporzjonalità li jistgħu jqumu minħabba ċerti punti tal-proposta tal-Kummissjoni, bħal dawk li pereżempju jirrigwardaw il-konċentrazzjoni tematika, li jillimitaw il-possibbiltajiet li l-operazzjonijiet tal-FSE jiġu adattati għall-bżonnijiet u l-ispeċifiċitajiet ta’ reġjuni individwali;

12.

ifakkar li skont it-Trattati, il-Kummissjoni tintrabat li tirrispetta l-prinċipju tas-sussidjarjetà, li huwa ta’ interess partikolari għall-Kumitat, peress li l-Artikolu 2 tal-Protokoll dwar l-Applikazzjoni tal-Prinċipji ta’ Sussidjarjetà u Proporzjonalità jistipula li l-konsultazzjonijiet li jsiru matul il-proċedura għall-adozzjoni ta’ att leġislattiv għandhom “fejn ikun xieraq, iqisu d-dimensjoni reġjonali u lokali tal-azzjoni maħsuba”. Barra minn hekk, l-Artikolu 5 tal-istess protokoll jistabbilixxi r-rekwiżiti speċifiċi għall-Kummissjoni biex tiġġustifika b'mod adegwat il-proposta tagħha. Peress li din il-proposta tappella biss, bil-mod ġenerali u vag tas-soltu, għall-ħtieġa li l-azzjonijiet tal-FSE jkunu effettivi, bilkemm jista' jingħad li tilħaq dawn l-ispeċifikazzjonijiet;

13.

jiġbed l-attenzjoni għall-fatt li d-dispożizzjonijiet previsti, li huma obbligatorji u jikkonċernaw il-persentaġġi minimi, ir-rati tal-għoti u r-restrizzjonijiet fuq il-konċentrazzjoni tematika u l-kooperazzjoni transnazzjonali joħolqu l-periklu li l-Kummissjoni tittrasforma r-rwol tagħha ta’ msieħba strateġika u konsulent għal dak ta’ kontrollur, f'liema rwol tintalab biss li tivverifika u tiċċertifika li l-programmi tal-Istati Membri u r-reġjuni jikkonformaw mal-kriterji definiti fil-livell Ewropew li jistgħu jkunu inadegwati ferm għall-ħtiġijiet tagħhom;

14.

jaqbel li għandha tinħoloq il-kategorija ġdida tar-reġjuni ta’ tranżizzjoni li l-PDG tagħhom huwa bejn il-75 % u d-90 % tal-medja tal-UE, iżda huwa tal-fehma wkoll li d-dritt li r-reġjuni kollha jgawdu mid-dritt li jibbenefikaw mill-operazzjonijiet tal-FSE, inklużi dawk li, għalkemm mhumiex lura mil-lat tal-medja statistika, xorta waħda sikwit jiffaċċjaw problemi ta’ koeżjoni soċjali minħabba żoni ta’ faqar u sottożvilupp fit-territorju tagħhom;

15.

f'kull każ, huwa tal-fehma li l-metodu l-ġdid għall-klassifikazzjoni tar-reġjuni ma għandux iwassal għal tnaqqis estremament brutali fl-ammont li jirċievu matul il-perjodu ta’ programmazzjoni attwali, u jitlob li tiġi prevista salvagwardja biex jiġi żgurat li r-reġjuni ma jirċevux għajnuna matul il-perjodu 20014-2020 li tkun inqas minn zewġ terzi tal-għajnuna li jkunu rċevew fil-perjodu 2007-2013;

16.

jilqa' b'sodisfazzjon l-inizjattiva li l-ishma fl-FSE jingħataw prijorità, iżda jitlob li jiġu stabbiliti persentaġġi iżjed baxxi b'mod li jkunu iktar proporzjonati u biex l-Istati Membri u r-reġjuni jingħataw il-flessibbiltà li jeħtieġu fl-ippjanar, li għandu jsir l-eqreb possibbli tal-postijiet fejn hemm l-opportunitajiet u l-problemi lokali;

17.

huwa tal-fehma li l-persentaġġi minimi tal-ishma fl-FSE skont il-kategoriji reġjonali għandhom ikunu ta’ natura indikattiva, għax b'hekk jistgħu jkunu adattati għal kull reġjun individwali matul in-negozjati tal-kuntratt ta’ sħubija;

18.

jilqa' b'sodisfazzjon l-intenzjoni tal-UE li tkompli tħabrek biex it-tħaddim tal-fondi strutturali differenti tagħha jkun ikkoordinat u koerenti u, b'mod partikolari, il-komplementarjetà bejn l-operazzjonijiet tal-FEŻR u l-FSE fil-qafas tal-politika ta’ koeżjoni u l-Istrateġija Ewropa 2020, peress li dan l-approċċ jista' jiġġenera sinerġiji sostanzjali;

19.

japprova, minn naħa, l-isforz magħmul biex jiġi promoss is-sehem tal-imsieħba soċjali u tal-NGOs fil-proċeduri relatati mat-tfassil u l-implimentazzjoni tal-FSE;

20.

min-naħa l-oħra, josserva – u jiddispjaċih – li teżisti sfiduċja ġenerali min-naħa tal-Kummissjoni fil-konfront tal-awtoritajiet lokali u reġjonali, li huma, u għandhom jibqgħu, l-atturi prinċipali fit-tfassil u l-implimentazzjoni tal-programmi operattivi;

21.

japprova l-prinċipju gwida fundamentali li l-kompiti u l-azzjoni tal-FSE jintrabtu mal-Istrateġija Ewropa 2020 għal tkabbir intelliġenti, sostenibbli u inklużiv;

22.

jinsab imħasseb madankollu li l-“allinjament komplet” tal-FSE mal-għanijiet tal-Istrateġija Ewropa 2020 jista' jikkostrinġi l-missjoni li għandu jaqdi fil-qafas tal-politika ta’ koeżjoni, kif previst fit-Trattat u, b'mod partikolari, il-kompitu li jappoġġja l-iżjed approċċi ta’ programmar komprensivi u integrati possibbli, filwaqt li jagħti l-attenzjoni meħtieġa lid-dimensjoni territorjali;

23.

huwa tal-fehma li fil-kuntest ta’ allinjament tal-FSE mal-għanijiet tal-Istrateġija Ewropa 2020, il-missjoni prinċipali tiegħu hija li jnaqqas id-diskrepanza fl-iżvilupp tar-reġjuni l-iżjed żvantaġġati li hemm referenza għalihom fl-Artikolu 74 tat-Trattat dwar il-Funzjonament tal-Unjoni Ewropea (reġjuni rurali, dawk għaddejjin minn tibdil industrijali, dawk l-iżjed fit-Tramuntana, reġjuni b'densità ta’ popolazzjoni baxxa ħafna, u reġjuni insulari, transkonfinali u muntanjużi). Il-KtR itenni t-tħassib tiegħu dwar ir-riskju li l-FSE, minn lieva importanti tal-politika ta’ koeżjoni jinbidel fi strument li jaqdi biss l-Istrateġija Ewropa 2020;

24.

barra minn hekk, jiddispjaċih li fl-allinjament tal-FSE mal-objettivi tal-Istrateġija Ewropa 2020, is-sitwazzjoni speċifika u unika tar-reġjuni ultraperiferiċi, rikonoxxuta fl-Artikolu 349 tat-TFUE, ma ġietx ikkunsidrata biżżejjed;

25.

jilqa' b'sodisfazzjon u japprova l-approċċ komprensiv u koerenti tal-Kummissjoni fir-rigward ta’ kif strutturat il-kamp ta’ applikazzjoni tal-appoġġ tal-FSE, li huwa mitlub jappoġġja b'mod dirett erba' għanijiet tematiċi u jappoġġja b'mod indirett erba' oħra, minn fost il-ħdax li huma definiti mill-Artikolu 9 tar-regolament ġenerali dwar il-fondi koperti mill-Qafas Strateġiku Komuni għal tkabbir intelliġenti, sostenibbli u inklużiv. Dawn l-għanijiet tematiċi, min-naħa tagħhom, jinqasmu fi 18-il prijorità ta’ investiment;

26.

jenfasizza li b'dan il-mod, l-FSE ser ikompli jaqdi l-missjoni bażika tiegħu b'konformità mat-Trattat, li hija li “jittejbu l-opportunitajiet ta’ impjieg għall-ħaddiema”, filwaqt li jissodisfa wkoll il-ħtiġijiet soċjali iġġenerati minn sitwazzjoni ekonomika estremament ħażina, permezz tal-“promozzjoni tal-inklużjoni soċjali u tal-ġlieda kontra l-faqar”, liema ħidma ngħatat klassifikazzjoni ogħla – dik ta’ għan tematiku minflok prijorità ta’ investiment;

27.

jiddispjaċih li l-proposta ma tagħmilx referenza għall-promozzjoni tal-flessigurtà fis-suq tax-xogħol, u josserva li l-flessigurtà hija koperta minn wieħed mil-linji gwida integrati tal-Istrateġija Ewropa 2020 (linja gwida 7);

28.

jilqa' b'sodisfazzjon il-fatt li, fi żmien fejn l-investimenti pubbliċi f'dawn is-setturi qed jonqsu, l-FSE jagħti appoġġ speċifiku lill-edukazzjoni, ir-riċerka u l-iżvilupp teknoloġiku u huwa favur li l-FSE jinfetaħ għall-investimenti fil-kapital fiżiku li huma marbuta mal-għanijiet tal-FSE pereżempju l-għan tal-infrastruttura edukattiva;

29.

jitlob li ssir referenza fir-regolament dwar l-FSE għal żoni bi żvantaġġi naturali u demografiċi, li tixbah lir-referenza prevista fl-Artikolu 10 tal-abbozz ta’ regolament dwar il-Fond Ewropew għall-Iżvilupp Reġjonali;

30.

minħabba t-tibdil demografiku kbir f'ħafna Stati Membri li jirrikjedi tibdil komprensiv fl-istrutturi edukattivi, iqis li hemm bżonn li din il-kwistjoni tiġi kkunsidrata meta jiġu stabbiliti l-prijoritajiet tal-investiment. Jemmen li, fil-kuntest ta’ tibdil bħal dan, jistgħu jiġu promossi wkoll, skont l-Artikolu 3(1)(b)(iii), investimenti li jiggarantixxu strutturi edukattivi sostenibbli, inklużi d-domanda tagħhom għal ħaddiema kwalifikati;

31.

josserva b'sodisfazzjon partikolari li għadd ta’ oqsma ta’ azzjoni li jikkostitwixxu prijoritajiet ta’ investiment għandhom rabta diretta mal-kompetenzi tal-awtoritajiet lokali u reġjonali u għalhekk jgħinuhom jaqdu l-missjoni tagħhom. Iżda, fl-istess ħin, din is-sitwazzjoni toħloq urġenza biex dawk l-awtoritajiet jiġu involuti b'mod deċiżiv fit-tħejjija u l-implimentazzjoni tal-programmi operattivi rilevanti;

32.

iħeġġeġ lill-Kummissjoni tħaffef il-pass biex jiġi ċċarat il-kontenut ta’ ċerti prijoritajiet ta’ investiment li mhumiex ċari fejn jidħol il-fond, filwaqt li oħrajn għandhom jiġu enfasizzati, u jinħolqu prijoritajiet ġodda f'każ ta’ bżonn, pereżempju fil-każ tal-promozzjoni tad-dimensjoni territorjali tal-azzjoni tal-FSE;

33.

jilqa' b'sodisfazzjon l-obbligu li l-Istati Membri jassiguraw koerenza fl-istrateġija u l-azzjonijiet tagħhom, kif definiti fil-programmi operattivi tagħhom, huma u jindirizzaw l-isfidi fil-Programmi Nazzjonali ta’ Riforma, bil-għan li b'hekk jikkontribwixxu għall-ksib tal-għanijiet prinċipali tal-Istrateġija Ewropa 2020 fil-qasam tal-impjieg, l-edukazzjoni u t-tnaqqis tal-faqar, peress li ambjent makroekonomiku b'saħħtu huwa indispensabbli biex il-politika ta’ koeżjoni tagħti l-aqwa riżultati possibbli;

34.

jerġa' josserva li l-formulazzjoni magħżula (“jiżguraw li l-istrateġija u l-azzjonijiet stabbiliti fl-Programmi Operattivi huma konsistenti u jiffokaw fuq l-indirizzar tal-isfidi identifikati fil-Programmi tar-Riforma Nazzonali”, filwaqt li fir-Regolament fis-seħħ tintuża l-frażi “jikkontribwixxu għal”), tikkonferma r-riskju li l-FSE ma jibqax lieva importanti tal-politika ta’ koeżjoni u minflok jibda jaqdi rwol ta’ għodda għall-użu esklużiv tal-Istrateġija Ewropa 2020 (ara l-punti 21 sa 24 hawn fuq);

35.

jilqa' b'sodisfazzjon id-dispożizzjoni li fil-kuntest tal-ħidma maħsuba biex jiġi kkonċentrat il-finanzjament, tistipula li jiġu allokati tal-inqas 20 % tar-riżorsi kollha tal-FSE f'kull Stat Membru sabiex jintlaħaq l-għan tematiku tal-“promozzjoni tal-inklużjoni soċjali u l-ġlieda kontra l-faqar”;

36.

jistaqsi jekk ir-rata minima ta’ 20 % prevista għal dan l-għan – li għalih ġew allokati EUR 16,8 biljun għall-perjodu kollu – hix ser tkun effettiva, fid-dawl tal-fatt li l-Kummissjoni, fil-proposta tagħha tirrikonoxxi li l-faqar u l-esklużjoni soċjali jheddu madwar wieħed minn kull erba' ċittadini Ewropej, jiġifieri iżjed minn 113-il miljun persuna;

37.

filwaqt li japprova l-konċentrazzjoni tematika, ma jaqbilx mal-mod ta’ ħidma u l-proċedura li għażlet il-Kummissjoni biex jintlaħaq dan l-għan, kif previst fl-Artikolu 4(3) tal-Proposta għal Regolament dwar l-FSE. Meta tistabbilixxi obbligu li r-riżorsi disponibbli jiġu kkonċentrati f'kull programm operattiv għal mhux iżjed minn erbgħa minn fost it-18-il prijorità globalment possibbli; barra minn hekk, tiffissa persentaġġi partikolarment għoljin għal din il-konċentrazzjoni, li jvarjaw minn 80 sa 60 % skont il-kategorija tar-reġjuni kkonċernati, hija qiegħda tmur kontra l-prinċipji tas-sussidjarjetà u l-proporzjonalità, għax dan il-metodu jista' ma jkunx kapaċi jkopri l-bżonnijiet u l-prijoritajiet ta’ kull reġjun;

38.

jirrakkomanda, minflok, proċedura għall-konċentrazzjoni tal-finanzjament b'persentaġġi iżjed baxxi minn dawk proposti mill-Kummissjoni għal din il-konċentrazzjoni tal-ammonti disponibbli f'kull programm operattiv u li jingħata biss valur indikattiv lill-erba' prijoritajiet ta’ investiment; dan jirrappreżenta referenza tal-UE u jista' jiżdied għal sitt prijoritajiet meta jiġu nnegozjati l-programmi operattivi, b'mod li din il-konċentrazzjoni taqdi b'mod adegwat il-ħtiġijiet u l-prijoritajiet ta’ kull reġjun;

39.

fil-prinċipju jaqbel mal-prinċipju dwar l-adozzjoni ta’ sistema ta’ indikaturi komuni tal-produzzjoni u r-riżultati tal-programmi. It-tnedija ta’ din il-ħidma, li diġà ttardjat ħafna, għall-armonizzazzjoni fil-livell Ewropew tar-regoli għall-valutazzjoni tar-riżultati tal-azzjoni tal-FSE ser tikkontribwixxi b'mod konsiderevoli għat-titjib tal-affidabbiltà, il-kwalità u l-viżibbiltà tal-proċeduri ta’ monitoraġġ;

40.

jinsab konvint, madankollu, li fid-dawl tal-fatt li l-armonizzazzjoni tal-indikaturi tal-prestazzjoni tal-programmi għadha f'fażi bikrija u li l-indikaturi komuni li tippreferi l-Kummissjoni għadhom ma ġewx ittestjati, u peress li ċertament huwa iżjed diffiċli li jitkejjel l-impatt ta’ miżuri ffinanzjati permezz tal-FSE minn tipi oħra ta’ azzjoni, dawn l-indikaturi għandhom ikunu indikattivi pjuttost milli obbligatorji, u li fuq kollox m'għandhomx ikunu assoċjati mal-“kundizzjonalità tas-sussidji”.

41.

għall-kuntrarju, huwa tal-fehma li l-bżonn li jittejbu l-affidabbiltà, il-kwalità u l-viżibbiltà tal-proċeduri ta’ monitoraġġ jista' jiġi ssodisfat permezz ta’ “indikaturi interni speċifiċi tar-riżultati skont il-programmi” li jiġu nnegozjati bejn l-awtoritajiet nazzjonali u sottonazzjonali, u li għandhom jissejsu, kompletament jew parzjalment, fuq l-indikaturi komuni tal-produzzjoni u tar-riżultati proposti mill-Kummissjoni, filwaqt li jkun hemm il-flessibbiltà meħtieġa meta dawn jiġu adottati;

42.

huwa diżappuntant li d-dispożizzjonijiet tal-Artikolu 6 tal-Proposta għal Regolament dwar “L-involviment tal-imsieħba”, kif ukoll il-premessa (9), ma jagħmlu l-ebda referenza għall-awtoritajiet lokali; jirreferu biss għall-imsieħba soċjali u l-NGOs, li jagħti xhieda wkoll tal-isfiduċja fil-konfront tal-awtoritajiet lokali u reġjonali li ssemmiet hawn fuq;

43.

huwa tal-fehma li huwa inġust li, f'dak li jirrigwarda s-sħubija, l-awtoritajiet lokali u reġjonali jiġu assimilati mal-imsieħba soċjoekonomiċi, peress li bħala rappreżentanti tal-interessi ġenerali tal-komunitajiet li jirrappreżentaw, meta jitqies il-qafas istituzzjonali tal-Istat Membru, huma responsabbli għall-ġestjoni konġunta u l-kofinanzjament tal-proġetti tal-Politika ta’ Koeżjoni;

44.

jiddispjaċih li d-dispożizzjoni inkwistjoni ma tirreferix b'mod espliċitu għall-imsieħba kollha elenkati fl-Artikolu 5 tal-Proposta għal Regolament dwar id-dispożizzjonijiet komuni għall-Fondi Strutturali. Fil-fatt, l-Artikolu 5 ta’ dan ir-Regolament jirrikonoxxi l-awtoritajiet lokali u reġjonali kompetenti bħala msieħba ewlenin tal-awtoritajiet nazzjonali biex jimplimentaw il-programmi tal-Fondi Strutturali tal-UE, fosthom l-FSE, flimkien mal-imsieħba soċjali u l-NGOs. Għalhekk, in-nuqqas ta’ din ir-referenza għandu jissewwa;

45.

jilqa' b'sodisfazzjon il-fatt li r-regolament li qed jiġi analizzat hawnhekk iħeġġeġ il-parteċipazzjoni tal-imsieħba soċjali u l-NGOs, billi jiżgura li jingħatalhom ammont adegwat ta’ fondi tal-FSE għall-attivitajiet tagħhom biex jiżviluppaw il-ħiliet tagħhom fil-qasam tat-tfassil u l-implimentazzjoni ta’ programmi;

46.

madankollu, jaqbel li, min-naħa tagħhom, l-awtoritajiet lokali ż-żgħar, bħall-muniċipalitajiet rurali ż-żgħar, jitħeġġew jieħdu sehem fi u jfittxu miżuri appoġġjati mill-FSE, permezz ta’ attivitajiet adatti għall-iżvilupp tal-kapaċità tagħhom; huwa favur ukoll li l-FSE jagħti appoġġ lill-attivitajiet ta’ netwerking, bil-għan li l-awtoritajiet loklai jkunu jistgħu jaqsmu l-esperjenzi tagħhom fil-livell tal-UE dwar kwistjonijiet ta’ interess komuni, pereżempju l-qgħad fost iż-żgħażagħ, it-tixjiħ tal-popolazzjoni, l-integrazzjoni tar-Roma, eċċ.;

47.

japprova d-dispożizzjonijiet tal-Proposta għal Regolament dwar il-promozzjoni tal-ugwaljanza bejn is-sessi u l-opportunitajiet indaqs, inkluża l-aċċessibbiltà gall-persuni b'diżabbiltà, permezz tal-istandardizzazzjoni tal-prinċipju tan-nondiskriminazzjoni, peress li juru li kien hemm żieda fl-isforzi biex tiġi eliminata kull xorta ta’ diskriminazzjoni, kif previst fl-Artikolu 19 tat-Trattat dwar il-Funzjonament tal-Unjoni Ewropea. Aspett partikolarment pożittiv u indikattiv f'dan ir-rigward huwa l-ħtieġa li l-Istati Membri mhux biss jiżguraw li l-programmi operattivi tagħhom jinkludu “deskrizzjoni dwar kif l-ugwaljanza bejn is-sessi u l-opportunitajiet indaqs huma promossi”, b'konformità mar-Regolament fis-seħħ, imma li l-ugwaljanza bejn is-sessi u l-opportunitajiet indaqs jiġu integrati wkoll fl-atti leġislattivi;

48.

jilqa' b'sodisfazzjon kbir l-appoġġ għall-“innovazzjoni soċjali”, peress li diġà żviluppa inizjattivi importanti fil-qasam tal-promozzjoni tal-innovazzjoni soċjali, bħall-Forum dwar l-Innovazzjoni Soċjali f'Mejju 2011, iżda jirrakkomanda li hawnhekk ikun tajjeb li jissemmew b'mod speċifiku l-awtoritajiet lokali u reġjonali li għandhom jingħataw il-possibbiltà li jipparteċipaw, bi sħab mal-Istati Membri, biex jidentifikaw temi għall-innovazzjoni soċjali;

49.

jaqbel li l-kooperazzjoni transnazzjonali għandha titkompla u tissaħħaħ, bil-għan li jiġi promoss it-tagħlim reċiproku u b'hekk tissaħħaħ l-effikaċja tal-politiki appoġġjati mill-FSE;

50.

huwa mistagħġeb kif il-proposta tal-Kummissjoni ma tipprevedix kooperazzjoni interrreġjonali flimkien mal-kooperazzjoni transnazzjonali, kif jagħmel ir-Regolament fis-seħħ, b'mod partikolari meta wieħed iqis il-fatt li wara li tneħħiet l-inizjattiva EQUAL (2000-2006), il-kooperazzjoni transnazzjonali naqset u f'ċerti Stati Membri għabet għalkollox;

51.

jirrifjuta, peress li hija eċċessiva, id-dispożizzjoni restrittiva li skontha l-Istati Membri jistgħu jagħżlu temi għall-kooperazzjoni transnazzjonali minn lista proposta mill-Kummissjoni u approvata mill-Kumitat tal-FSE, u jitlob għalhekk li titħassar;

52.

japprezza b'mod partikolari l-appoġġ li hu previst li jingħata lill-istrateġiji ta’ żvilupp immexxija minn atturi lokali, lill-patti territorjali, lill-inizjattivi lokali għall-impjieg, l-edukazzjoni u l-inklużjoni soċjali u lill-Investimenti Territorjali Integrati (ITI), li huma mezzi importanti biex jiġu indirizzati l-ispeċifiċitajiet tat-territorji, u jitlob li dawn il-miżuri jiġu estiżi għall-Fondi Strutturali u l-oqsma ta’ azzjoni l-oħra;

53.

jilqa' b'sodisfazzjon ir-referenza għall-bżonn ta’ “mobilizzazzjoni tal-partijiet interessati reġjonali u lokali” biex tiġi implimentata l-Istrateġija Ewropa 2020, u l-possibbiltà li jintużaw il-patti territorjali biex jintlaħaq dan l-għan;

54.

ifakkar hawnhekk fil-fehmiet preċedenti tiegħu favur iż-żieda fl-użu tal-patti territorjali biex tiġi implimentata l-Istrateġija Ewropa 2020, u fil-qafas tal-politika ta’ koeżjoni, peress li dawn joffru l-possibbiltà li ssir “għażla (…) biex jiġu formalizzati l-arranġamenti ta’ sħubija f'livell ‘taħt’ il-kuntratti ta’ sħubija”;

55.

japprova b'entużjażmu r-referenza għall-komplementarjetà indispensabbli li għandha teżisti mal-interventi tal-FEŻR meta l-FSE jappoġġja strateġiji ta’ żvilupp urban sostenibbli. Għal ħafna awtoritajiet lokali, ta’ spiss kien diffiċli, tista' tgħid impossibbli, li jiffinanzjaw azzjonijiet integrati ta’ żvilupp urban permezz ta’ taħlita ta’ dawn il-fondi peress li japplikaw regoli amministrattivi differenti ħafna, b'korpi ta’ ġestjoni differenti u bi skadenzi mhux armonizzati;

56.

madankollu, jitlob li din il-miżura tiġi wkoll estiża għall-istrateġiji għall-iżvilupp integrat tar-reġjuni rurali. Fil-fatt, ikun utli ħafna li l-fondi tal-FSE u l-FEŻR jingħaqdu flimkien biex jiġu indirizzati problemi ta’ faqar estrem, fiż-żoni rurali, pereżempju fil-kampijiet tar-Roma fl-Ewropa Ċentrali u tal-Lvant;

57.

jilqa' b'sodisfazzjoni il-miżuri ta’ semplifikazzjoni proposti mill-Kummissjoni u, b'mod iżjed speċifiku, ir-restrizzjoni dwar in-numru ta’ regoli ta’ eleġibbiltà, bil-għan li jiġi ffaċilitat l-aċċess tal-benefiċjarji u l-operazzjonijiet fuq skala żgħira għall-fondi tal-FSE, il-possibbiltà li l-kontributi mhux finanzjarji jkunu eleġibbli, użu iżjed wiesa' tas-sussidji globali, għażliet semplifikati rigward l-ispejjeż u l-ammonti b'rata fissa, inkluża l-introduzzjoni tal-obbligu li jiġu użati għall-inizjattivi fuq skala iżjed żgħira, sa EUR 50 000. Dawn il-miżuri, flimkien ma’ dawk proposti fil-qafas tar-reviżjoni tar-Regolament Finanzjarju tal-UE, ser inaqqsu tassew il-piż amministrattiv għall-benefiċjarji u l-awtoritajiet ta’ ġestjoni, u huma partikolarment milqugħin tajjeb fid-dawl tal-bosta operazzjonijiet żgħar ħafna fis-setturi tal-impjieg u tal-affarijiet soċjali, li jirrappreżentaw investimenti mhux tanġibbli pjuttost milli dawk tanġibbli. Attwalment, il-piż amministrattiv b'riżultat ta’ dawn l-interventi jista' jkun tant sproporzjonat li jġib fix-xejn il-benefiċċji potenzjali għall-awtoritajiet lokali u jiskoraġġixxihom milli jressqu talbiet għal proġetti fil-qafas tal-FSE;

58.

jinsab konvint, madankollu, li hemm iżjed lok għas-semplifikazzjoni jekk jiġu adottati miżuri oħrajn, bħal dawk rakkomandati mill-grupp ad hoc tal-Kumitat tal-FSE dwar il-ġejjieni tal-Fond Soċjali Ewropew. Fost affarijiet oħra, nistgħu nsemmu l-proposta li jiġu adattati r-regoli ta’ finanzjament għal ċerti assijiet prijoritarji, b'mod partikolari l-proġetti iżjed żgħar, u sistema iżjed effettiva għall-ħlas tal-fondi, b'użu iżjed sistematiku tal-prefinanzjament;

59.

huwa favur l-istrumenti finanzjarji innovattivi proposti għall-appoġġ ta’ proġetti mill-FSE, bħall-mekkaniżmi għall-iskambju tar-riskji, l-ekwità u d-dejn, il-fondi ta’ garanzija, fondi ta’ investiment u ta’ self, u jilqa' b'sodisfazzjon ir-referenza speċifika għal “garanziji bbażati fuq il-politiki”, bil-għan li jtejbu l-aċċess tal-korpi pubbliċi u privati għas-swieq tal-kapitali fil-livell nazzjonali u reġjonali;

60.

jitlob lill-Kummissjoni li żżid ma’ din il-firxa ta’ fondi li jistgħu jerġgħu jintużaw (revolving funds) għall-operazzjonijiet ta’ mikrokreditu, il-“bonds soċjali”, miżura innovattiva li kienet diskussa fil-forum tal-KtR dwar l-innovazzjoni soċjali, kif ukoll il-“bonds taċ-ċittadini”, proposta li saret meta kienu qed jitfasslu l-opinjonijiet tiegħu dwar ir-reviżjoni tal-baġit tal-UE u l-qafas finanzjarju multiannwali l-ġdid għal wara l-2013.

1.

Ara l-kumment rigward l-Artikolu 1 dwar it-titlu tal-artikolu.

2.

Sabiex tiġi enfasizzata d-dimensjoni territorjali inerenti għall-politika ta’ koeżjoni, u sabiex tiġi aġġustata l-korrelazzjoni bejn il-problemi u d-disparitajiet reġjonali u l-Istrateġija Ewropa 2020, qed jiġi propost li tiżdied il-kelma “anke” biex jittaffa l-impatt tal-linji gwida u r-rakkomandazzjonijiet dwar il-Programmi Operattivi tal-FSE.

3.

Tidher ħaġa stramba li jiġu inklużi l-“minoritajiet etniċi” fost il-gruppi benefiċjarji. Il-fatt li l-minoritajiet etniċi jiġu identifikati bħala kategorija separata jista' jqajjem kwistjonijiet serji ta’ liġi internazzjonali u nazzjonali f'bosta Stati Membri.

1.

Ara l-punt 48 hawn fuq fil-parti “Rakkomandazzjonijiet ta’ politika”.

2.

Din hija referenza inkroċjata għall-Artikolu 8 tal-Proposta għal Regolament dwar Programm tal-Unjoni Ewropea għall-Bidla u l-Innovazzjoni Soċjali, li hija s-suġġett ta’ opinjoni oħra tal-KtR (CdR 335/2011, relatur: is-Sur Enrico Rossi, (IT/PSE)), adottata fit-3 ta’ Mejju 2012.

1.

Ara l-punti 49 sa 51 hawn fuq fil-parti “Rakkomandazzjonijiet ta’ politika”.

2.

Il-formulazzjoni oriġinali ma kenitx tiżgura l-konformità tal-kooperazzjoni transnazzjonali stabbilita fl-FSE u fil-Kooperazzjoni Territorjali Ewropea.

3.

Hemm tliet dimensjonijiet distinti tal-kooperazzjoni territorjali: kooperazzjoni transkonfinali, transnazzjonali u interreġjonali.

1.

Ara l-punt 57 hawn fuq fil-parti “Rakkomandazzjonijiet ta’ politika”.

2.

Il-formulazzjoni l-ġdida għandha l-għan li tiżgura li l-fondi tal-FSE jitqassmu b'mod flessibbli.