52011PC0077

[pic] | IL-KUMMISSJONI EWROPEA |

Brussel 22.2.2011

KUMM(2011) 77 finali

2008/0028 (COD)

KOMUNIKAZZJONI MILL-KUMMISSJONI LILL-PARLAMENT EWROPEW

skont l-Artikolu 294(6) tat-Trattat tal-Funzjonament tal-Unjoni Ewropea dwar il-pożizzjoni tal-Kunsill fl-ewwel qari dwar l-adozzjoni ta' Regolament tal-Parlament Ewropew u tal-Kunsill dwar id-dispożizzjoni ta' tagħrif dwar l-ikel lill-konsumaturi

2008/0028 (COD)

KOMUNIKAZZJONI MILL-KUMMISSJONI LILL-PARLAMENT EWROPEW

skont l-Artikolu 294(6) tat-Trattat tal-Funzjonament tal-Unjoni Ewropea dwar il-pożizzjoni tal-Kunsill fl-ewwel qari dwar l-adozzjoni ta' Regolament tal-Parlament Ewropew u tal-Kunsill dwar id-dispożizzjoni ta' tagħrif dwar l-ikel lill-konsumaturi

1. SFOND

Data tat-trażmissjoni tal-proposta lill-PE u lill-Kunsill (id-dokument COM(2008) 40 finali - 2008/0028 (COD)): | l-1 ta’ Frar 2008 |

Data tal-opinjoni tal-Kumitat Ekonomiku u Soċjali Ewropew: | it-18 ta’ Settembru 2008 |

Data tal-opinjoni tal-Parlament Ewropew, l-ewwel qari: | is-16 ta’ Ġunju 2010 |

Data tat-trażmissjoni tal-proposta emendata: | [*] |

Data tal-qbil politiku: | is-7 ta’ Diċembru 2010 |

Data tal-adozzjoni tal-pożizzjoni tal-Kunsill: | il-21 ta’ Frar 2011 |

* Meta ġew ikkunsidrati l-iżviluppi fil-Kunsill wara l-ewwel qari tal-Parlament Ewropew, il-Kummissjoni ma ppreparatx proposta għall-emenda iżda esprimiet l-opinjonijiet tagħha dwar l-emendi tal-Parlament fil-"Komunikazzjoni tal-Kummissjoni dwar l-azzjoni li ttieħdet dwar l-opinjonijiet u r-riżoluzzjonijiet adottati mill-Parlament fis-sessjoni parzjali ta' Ġunju 2010" (id-dokument SP(2010)6136 ) mibgħut lill-Parlament Ewropew fid-29 ta' Settembru 2010.

2. L-GĦAN TAL-PROPOSTA TAL-KUMMISSJONI

Il-proposta tikkonsolida u taġġorna żewġ oqsma tal-leġiżlazzjoni importanti dwar it-tikkettjar, it-tikkettjar tal-ikel ġenerali u dak b’tagħrif nutrittiv rispettivament koperti bid-Direttivi 2000/13/KE[1] u 90/496/KEE[2]. Il-proposta tfassal mill-ġdid sitt Direttivi oħra dwar it-tikkettjar ta' ċerti kategoriji ta' ikel. L-għanijiet ta’ din il-proposta huma:

- Biex tissimplifika l-leġiżlazzjoni dwar it-tikkettjar tal-ikel billi jinħoloq strument uniku għall-prinċipji u r-rekwiżiti tal-ħtiġijiet tat-tikkettjar orizzontali dwar tikkettjar ġenerali u dak b’tagħrif nutrittiv;

- Biex ikunu inklużi dispożizzjonijiet speċifiċi dwar ir-responsabbiltajiet fil-katina tal-ikel fejn tidħol il-preżenza u l-eżattezza tal-infomazzjoni dwar l-ikel;

- Biex ikunu stabbiliti kriterji miżurabbli għal ċertu aspett ta' leġġibilità fit-tikkettjar tal-ikel;

- Biex ikunu kkjarifikati regoli li japplikaw dwar it-tikkettjar tal-pajjiż tal-oriġini jew il-post ta' provenjenza;

- Biex ikun introdott tikkettjar mandatorju dwar tagħrif nutrittiv fil-kamp viżiv prinċipali tal-maġġoranza tal-ikel ipproċessat;

- Biex tkun stabbilita sistema ta' governanza għal ċerti aspetti ta' tikkettjar volontarju tal-ikel bis-saħħa tal-approvazzjoni mill-Istati Membri.

3. KUMMENTI DWAR IL-POŻIZZJONI TAL-KUNSILL

3.1. Kummenti ġenerali

Il-Parlament Ewropew (PE) adotta l-pożizzjoni tiegħu fl-ewwel qari fis-16 ta' Ġunju 2010. Il-Kummissjoni aċċettat kompletament, parzjalment jew fil-prinċipju 113-il emenda minn 247 adottati fl-ewwel qari peress li qieset li dawn l-emendi kkjarifikaw jew tejbu l-proposta tal-Kummissjoni u kienu konsistenti mal-għan ġenerali tal-proposta.

Waqt li l-pożizzjoni tal-Kunsill fl-ewwel qari adottata fil-21 ta' Frar 2011 tissodisfa sewwa l-għanijiet tal-proposta oriġinali tal-Kummissjoni, din tiddevja fir-rigward ta' ċerti kwistjonijiet. Il-Kummissjoni ma kinitx kontra l-qbil politiku dwar it-test biex il-proċess legali jkun jista’ javvanza. Madankollu, il-Kummissjoni, fid-dikjarazzjoni mehmuża indikat lill-Kunsill li l-emendi tal-PE li l-Kummissjoni kienet indikat li setgħet taċċetta mhumiex koperti mit-test tal-Presidenza, partikolarment ir-rekwiżit għal ċertu tagħrif nutrittiv fuq quddiem tal-pakkett.

3.2. L-emendi tal-Parlament Ewropew aċċettati mill-Kummissjoni u inkorporati kompletament, parzjalment jew fil-prinċipju fil-pożizzjoni tal-Kunsill fl-ewwel qari:

Tikkettjar tal-oriġini – Il-pożizzjoni tal-PE fl-ewwel qari pproponiet it-tikkettjar tal-oriġini mandatorju fuq laħam, tjur, prodotti tal-ħalib, frott u ħaxix frisk, prodotti oħra b'ingredjent uniku, u laħam u ħut meta użati bħala ingredjenti f'ikel ipproċessat (l-emenda 101). Diġà teżisti leġiżlazzjoni dwar it-tikkettjar mandatorju għall-frott u l-ħaxix, iċ-ċanga, l-inbid, iż-żejt taż-żebbuġa, u t-tjur importati, u wara valutazzjonijiet tal-impatt, riċentament tressqet proposta[3] mill-Kummissjoni li għandha l-għan li toħloq bażi legali għall-possibilità ta' tikkettjar obbligatorju tal-post tal-biedja għas-setturi agrikoli kollha. Fil-Komunikazzjoni tagħha dwar l-opinjoni tal-PE, il-Kummissjoni aċċettat parzjalment, soġġetta għal xi tibdil fil-kitba, l-emenda tal-PE għall-estenzjoni tal-każijiet ta' tikkettjar tal-oriġini mandatorju fir-rigward ta' prodotti tal-ikel bażiċi primarji li ma kinux soġġetti għall-ipproċessar sostanzjali/sinifikanti u li huma ġeneralment ikkunsidrati bħala prodotti b'ingredjent uniku soġġetti għad-dħul fis-seħħ ta' miżuri delegati, ibbażati fuq valutazzjonijiet tal-impatt. Il-Kummissjoni indikat ukoll li biex tikkunsidra l-aspettazzjonijiet tal-konsumaturi u r-restrizzjonijiet prattiċi relatati ma' ikel speċifiku, l-applikazzjoni ta' tikkettjar tal-oriġini mandatorju għandu jkun soġġett għad-dħul fis-seħħ ta' miżuri delegati, ibbażati fuq valutazzjonijiet tal-impatt, li jiddeterminaw partikolarment il-mod kif ikun trasmess tagħrif dwar minn fejn ġej l-ikel, għall-ikel kollu jew għal kategoriji speċifiċi ta' ikel.

Il-pożizzjoni tal-Kunsill fl-ewwel qari tapplika tikkettjar tal-oriġini mandatorju fuq laħam mhux ipproċessat tal-majjal (laħam tal-ħanżir), nagħaġ, mogħoż u tjur, soġġetti għall-adozzjoni tar-regoli implimentati fi żmien sentejn mid-dħul fis-seħħ tar-Regolament. Il-Kunsill jipproponi wkoll li l-Kummissjoni fi żmien tliet snin mid-dħul fis-seħħ tar-Regolament għandha tippreżenta rapport dwar it-tikkettjar tal-oriġini mandatorju lill-PE u lill-Kunsill dwar: ħalib; ħalib użat bħala ingredjent fil-prodotti tal-ħalib; laħam użat bħala ingredjent; ikel mhux ipproċessat; prodotti b'ingredjent uniku; u, ingredjenti li jirrappreżentaw iktar minn 50% tal-prodott tal-ikel. Il-Kummissjoni tista' taċċetta l-approċċ ta' tikkettjar mandatorju għal-laħam tal-majjal, tat-tjur, tan-nagħaġ u tal-mogħoż. Madankollu, l-Kummissjoni tikkunsidra li, fid-dawl tat-Trattament tal-Funzjonament tal-Unjoni Ewropea (TFUE), l-applikazzjoni ta' dan ir-rekwiżit għandha ssir permezz ta' atti delegati ġaladarba hemm involuti elementi kważi-leġiżlattivi (pereżempju biex ikun determinat il-livell ġeografiku xieraq). Dawn l-atti delegati għandhom jiġu adottati fil-qafas ta' dispożizzjonijiet speċifiċi tal-Unjoni applikabbli fuq is-setturi tal-laħam tal-majjal, tan-nagħaġ, tal-mogħoż u tat-tjur. It-test legali għandu jiġi adattat skont il-ħtieġa, fid-dawl tat-TFUE. Il-miżuri tal-applikazzjoni ta' dan ir-rekwiżit għandhom jikkunsidraw partikolarment il-ħtieġa li jkun evitat l-imponiment ta' piż amministrattiv eċċessiv u li mhuwiex meħtieġ fuq l-operaturi tan-negozji tal-ikel u l-awtoritajiet tal-infurzar. Dan b'hekk għandu jiżgura li jkun hemm bilanċ bejn il-provvediment ta' tagħrif bżonnjuż għall-konsumaturi waqt li jkun evitat li miżuri bħal dawn idgħajfu l-kompetittività, ifixklu l-kummerċ jew joħolqu nfiq sproporzjonat għan-negozju u għall-konsumatur. Il-Kummissjoni tikkunsidra li r-rapport propost tal-Kunsill dwar l-estensjoni tat-tikkettjar tal-oriġini għal ikel ieħor jirrikonoxxi l-interess tal-PE fit-tikkettjar mandatorju tal-oriġini għal ikel ieħor imma jippermetti approċċ li jista' jikkunsidra l-aspettazzjonijiet tal-konsumaturi u l-limiti prattiċi relatati ma' ikel speċifiku kif indikat fir-risposta tal-Kummissjoni għall-PE, u huwa kompatibbli mal-approċċ użat fil-proposta għall-modifika tar-Regolament (KE) 1234/2007 dwar it-tikkettjar tal-oriġini (COM(2010) 738). Hawnhekk il-Kummissjoni tikkunsidra li l-prinċipju huwa aċċettabbli iżda t-test jista' jitlob abbozzar legali mill-ġdid.

Ikel sostitut/imitat: L-emenda tal-PE li kienet tipprojbixxi espliċitament prattiċi qarrieqa dwar "ikel ta' imitazzjoni" (l-emenda 78) kienet ikkunsidrata aċċettabbli parzjalment mill-Kummissjoni. L-approċċ tal-Kunsill fl-ewwel qari dwar it-tisħiħ tad-dispożizzjonijiet ġenerali dwar preżentazzjoni qarrieqa hija konformi mal-pożizzjoni tal-Kummissjoni dwar l-emendi tal-PE u tista' tiġi aċċettata. Il-pożizzjoni tal-Kunsill dwar l-inklużjoni fl-Anness ta' rekwiżit li l-komponenti jew l-ingredjenti li jieħdu post dawk li konsumatur jistenna li normalment jintużaw jew ikunu preżenti b'mod naturali għandu jkun indikat b'mod ċar fuq it-tikketta (mhux biss fil-lista tal-ingredjenti) tista' tiġi aċċettata mill-Kummissjoni, fi spirtu ta' kompromess. Madankollu, il-Kummissjoni ma taċċettax li l-isem tal-ikel jew l-ingredjent ikun deskritt bħala eżempju "sostitut ta'" ġobon jew perżut eċċ., jew "imitazzjoni ta' ġobon" jew "imitazzjoni ta' perżut" kif propost fl-emenda 230 tal-PE.

Ittikkettjar ta' nano-ingredjenti: Il-pożizzjoni tal-PE li titlob li ingredjenti mnisslin min-nanoteknoloġija jkunu ttikkettjati b'tali mod (l-emenda 130) kienet aċċettata prinċipalment mill-Kummissjoni. Il-proposta tal-Kunsill biex tkun inkluża kontroreferenza għad-definizzjoni ta' "nanomaterjali maħdumin" u r-rekwiżit biex il-lista tal-ingredjenti tindika li tali ingredjenti huma preżenti, hija aċċettata mill-Kummissjoni. Il-pożizzjoni tal-Kunsill hija konformi mad-diskussjonijiet dwar ir-reviżjoni tar-Regolament (KE) Nru 258/97 dwar l-ikel il-ġdid u l-ingredjenti tal-ikel il-ġdid.

Rekwiżiti ta' informazzjoni mandatorja għal ikel mhux ippakkjat : Il-pożizzjoni tal-PE fl-ewwel qari hija li ikel mhux ippakkjat għandu jkun barra mill-ambitu tar-Regolament (l-emenda 30). Madankollu, il-pożizzjoni tal-PE dwar il-miżuri nazzjonali għal ikel mhux ippakkjat (l-emenda 184), taċċetta l-prinċipju tad-dispożizzjoni ta' informazzjoni dwar il-preżenza ta' ingredjenti li fihom sustanzi li jistgħu jikkawżaw allerġiji u intolleranzi (ingredjenti allerġeniċi). Il-Kunsill aċċetta wkoll dan il-prinċipju billi pprovda informazzjoni dwar ingredjenti allerġeniċi fuq ikel mhux ippakkjat.

Il-pożizzjoni kemm tal-PE kif ukoll tal-Kunsill għandha tibdel il-prinċipju li fuqu hija bbażata id-dispożizzjoni tat-tagħrif mandatorju (minbarra tagħrif dwar l-allerġeni) fejn jidħol ikel mhux ippakkjat. Il-proposta oriġinali tal-Kummissjoni hija konformi mal-qafas legali fis-seħħ li fil-prinċipju jistipula li t-tagħrif mandatorju dwar l-ikel għandu jkun disponibbli għall-ikel kollu fi ħdan l-ambitu tal-leġiżlazzjoni. Iżda, fil-każ ta' ikel mhux ippakkjat, l-Istati Membri jistgħu jiddeċiedu li xi tagħrif ma hemmx għalfejn ikun disponibbli dejjem, sakemm il-konsumatur huwa infurmat biżżejjed. Kemm il-pożizzjoni tal-PE (l-emenda 184) kif ukoll tal-Kunsill għandhom ireġġgħu lura l-approċċ tal-proposta tal-Kummissjoni u jippermettu li l-Istati Membri jitolbu tagħrif dwar id-dettalji mandatorji koperti mir-Regolament, flimkien ma' tagħrif dwar allerġeni. Din il-proposta għall-bidla hija aċċettata billi l-bidla fil-forma tal-Att legali tar-Regolament kienet tfisser li, fl-assenza ta' regoli minn xi Stat Membru, operatur tan-negozju tal-ikel kien ikollu jipprovdi d-dettalji mandatorji, mhux biss tagħrif dwar allerġeni.

Responsabbiltajiet tal-operaturi tan-negozju tal-ikel : Il-pożizzjoni tal-Kunsill dwar ir-responsabbiltajiet tal-operaturi tan-negozju tal-ikel (l-Artikolu 8 tal-proposta oriġinali tal-Kummissjoni) hija konformi mal-prinċipji tal-proposta tal-Kummissjoni. Il-pożizzjoni tal-PE fl-ewwel qari (l-emendi 84, 86, 88, 89 u 326) adattat il-proposta tal-Kummissjoni għall-approċċ li kien ġie adottat fir-Regolament (KE) Nru 767/2009 dwar il-kummerċ tal-għalf u t-tikkettjar. Il-Kummissjoni aċċettat l-emendi tal-PE. Madankollu, minħabba s-sensitività tal-kwistjoni u d-dibattitu kontroversjali fil-Kunsill, il-Kummissjoni tista' taċċetta l-pożizzjoni tal-Kunsill fl-ewwel qari fi spirtu ta’ kompromess.

3.3. L-emendi tal-Parlament Ewropew miċħuda mill-Kummissjoni u inkorporati kompletament, parzjalment jew fil-prinċipju fil-pożizzjoni tal-Kunsill fl-ewwel qari

L-iskemi nazzjonali: Il-pożizzjoni tal-PE fl-ewwel qari ħassret il-Kapitolu VII dwar l-iżvilupp tal-iskemi nazzjonali (l-emenda 301). Il-pożizzjoni tal-Kunsill tinkludi l-istess proposta. Il-Kummissjoni jiddispjaċiha li la l-PE u lanqas il-Kunsill ma kellhom opinjoni komuni mal-Kummissjoni dwar qafas għall-iskambju tal-aħjar prattika għal skemi volontarji ta' tikkettjar.

L-emendi tal-PE (l-emendi 155, 156, 298, 299) fl-ewwel qari li bidlu l-kriterji dwar form ta' espressjoni addizzjonali dwar tagħrif nutrittiv flimkien mal-kriterji dwar forom grafiċi ta' preżentazzjoni ġew miċħuda mill-Kummissjoni. Il-Kunsill ippropona wkoll li jgħaqqad il-kriterji għal forom volontarji addizzjonali mal-preżentazzjoni tat-tagħrif nutrittiv (AVS). Barra minn hekk, il-pożizzjoni tal-Kunsill tinkludi l-introduzzjoni ta' dispożizzjonijiet li: jippermettu li l-Istati Membri jippromovu AVS speċifiku fit-territorju tagħhom; jobbligaw lill-Istati Membri biex jiżguraw monitoraġġ tal-AVS tajjeb fis-suq tagħhom; u juru li l-Kummissjoni tista' tiffaċilita l-iskambju ta' tagħrif u l-aħjar prattika fuq l-AVS. Il-pożizzjoni tal-Kunsill tobbliga lill-Kummissjoni biex tadotta l-implimentazzjoni tar-regoli fejn jidħlu l-kriterji fl-Artikolu 34 u biex tirraporta lill-PE u lill-Kunsill fi żmien ħames snin wara l-applikazzjoni tal-Artikolu dwar: l-użu tal-AVS; l-impatt tagħhom; u, l-opportunità tal-armonizzazzjoni tagħhom. Il-Kummissjoni tikkunsidra li l-approċċ propost tal-Kunsill jista' joffri bażi għar-reviżjoni tal-AVS għat-tikkettjar b’tagħrif nutrittiv fil-futur u l-Kummissjoni tista' taċċetta l-proposta tal-Kunsill .

Tagħrif nutrittiv Il-Kummissjoni ma laqgħetx il-pożizzjoni tal-PE għall-espansjoni tal-lista tan-nutrienti mandatorji (l-emenda 144) fejn jidħol it-tikkettjar tat-tagħrif nutrittiv. Il-pożizzjoni tal-Kunsill fl-ewwel qari hija li d-dikjarazzjoni mandatorja għandha tiżdied biex tkun tinkludi l-proteina. Il-Kummissjoni tinsab imħassba dwar l-infiq addizzjonali għall-operaturi ekonomiċi, partikolarment l-intrapriżi żgħar u ta' daqs medju, u tippreferi li jkun hemm lista qasira ta' dettalji mandatorji. Madankollu, billi kemm il-PE kif ukoll il-Kunsill ipproponew l-inklużjoni tal-proteina, li hija l-uniku makronutrient li ma kienx inkluż fil-proposta tal-Kummissjoni, dan jista' jiġi aċċettat.

Informazzjoni dwar in-nutrizzjoni relatata ma' kull porzjon: Il-proposta tal-Kummissjoni introduċiet il-possibiltà li f'ċerti ċirkostanzi t-tagħrif nutrittiv jista' jingħata abbażi ta' kull porzjon biss. Kemm il-pożizzjoni tal-PE (l-emenda 313) kif ukoll dik tal-Kunsill ħassru din il-possibiltà. Il-Kunsill jitlob li t-tagħrif nutrittiv għandu dejjem ikun mogħti abbażi ta' kull 100 g jew 100 ml u li t-tagħrif għal kull porzjon jista' jkun dikjarazzjoni addizzjonali volontarja. Min-naħa l-oħra, il-PE jipproponi li t-tagħrif għandu dejjem ikun mogħti abbażi ta' 100 g jew 100 ml kif ukoll għal kull porzjon. Il-Kummissjoni tikkunsidra li l-proposta tal-PE mhix aċċettabbli billi din se tkun ta' piż akbar għall-industrija. Dwar il-pożizzjoni tal-Kunsill, il-Kummissjoni tista' taċċetta li jekk it-tagħrif nutrittiv ikun fuq l-istess bażi, dan jippermetti li l-konsumaturi jkunu jistgħu jqabblu l-kompożizzjoni tan-nutrienti ta' ikel differenti faċilment.

3.4. Emendi tal-Parlament Ewropew aċċettati mill-Kummissjoni kif inhuma, jew soġġetti għal xi tibdil fil-kitba, imma li mhumiex inkorporati fil-pożizzjoni tal-Kunsill fl-ewwel qari:

Xi emendi fil-pożizzjoni tal-PE fl-ewwel qari, ftit minnhom ta' natura editorjali, ġew aċċettati fil-prinċipju mill-Kummissjoni. Il-kwistjonijiet fejn il-pożizzjonijiet tal-ewwel qari tal-PE u tal-Kunsill ivarjaw b'mod ċar huma diskussi fid-dettall hawn taħt. Hemm imsemmija wkoll ftit mit-tibdiliet li jikkonċernaw oqsma importanti u li jinvolvu l-inklużjoni ta' dispożizzjonijiet ġodda fil-pożizzjoni tal-PE u li ġew aċċettati fil-prinċipju mill-Kummissjoni iżda ma ġewx inklużi fil-pożizzjoni tal-ewwel qari tal-Kunsill.

Dikjarazzjoni dwar it-tagħrif nutrittiv fil-kamp viżiv prinċipali (fuq quddiem tal-pakkett): Fil-Komunikazzjoni tal-Kummissjoni dwar il-pożizzjoni tal-PE, il-Kummissjoni esprimiet il-qbil tagħha dwar it-tikkettjar mandatorju dwar it-tagħrif nutrittiv fuq quddiem tal-pakkett (FOP) għal ħames elementi (l-enerġija, ix-xaħam, is-saturati, iz-zokkor u l-melħ) (l-emenda 313) u l-Kummissjoni qablet fil-prinċipju mal-emenda 162 tal-PE li l-applikazzjoni tar-rekwiżit tal-FOP għal ikel li huwa regolat taħt il-qafas ta' ħidma tad-Direttiva 2009/39/KE dwar ikel għal użu ta’ nutriment partikolari hemm bżonn li jkun ikkjarifikat. Id-dikjarazzjoni tal-Kummissjoni (mehmuża) tindika speċifikament li l-Kummissjoni jiddispjaċiha għall-pożizzjoni tal-Kunsill biex jitneħħa r-rekwiżit għal xi tagħrif nutrittiv li għandu jkun ippreżentat fuq il-FOP. Dwar din il-kwistjoni l-Kummissjoni tibqa' temmen li t-tikkettjar tal-FOP jippermetti lill-konsumaturi jaraw iktar it-tagħrif nutrittiv meta jkunu qed jixtru l-ikel u l-Kummissjoni żżomm id-dritt li ssostni l-pożizzjoni tal-PE biex il-ħames elementi nutrittivi jkunu inklużi fuq il-FOP.

Isem tal-operatur tan-negozju tal-ikel: Il-pożizzjoni tal-PE (l-emenda 100) tobbliga, mhux biss l-isem u l-indirizz tal-operatur tan-negozju tal-ikel li l-prodott huwa mibjugħ taħt ismu jew isem in-negozju tiegħu, iżda wkoll l-isem, isem in-negozju jew it-trejdmark tal-manifattur tal-ikel innifsu. Il-Kummissjoni aċċettat l-emenda tal-PE. Madankollu, il-pożizzjoni tal-Kunsill hija li l-isem tal-operaturi tan-negozju tal-ikel għandu jkun dak identifikat bħala responsabbli għat-tikkettjar, jiġifieri l-operatur li taħt ismu jew isem in-negozju tiegħu qed jinbigħ l-ikel jew, jekk dan mhux stabbilit fl-Unjoni Ewropea, l-importatur fis-suq tal-Unjoni Ewropea. Il-Kummissjoni tibqa' tappoġġja l-intenzjoni tal-pożizzjoni tal-PE billi din toffri trasparenza dwar il-manifattur tal-prodott għall-konsumatur.

Data ta' durabilità minima: il-Kummissjoni qablet mal-pożizzjoni tal-PE (l-emenda 61) dwar il-ħtieġa li tkun ikkjarifikata d-distinzjoni bejn id-dati "uża sa" u "l-aħjar qabel". Studju riċenti mmexxi mill-Kummissjoni Ewropea[4] juri li l-ħela tal-ikel jirrappreżenta ammont kbir ħafna ta' skart b'medja ta' madwar 76 kg/persuna/kull sena f'livell domestiku, li minnu 60% jista' jiġi evitat. Ftit minn dan l-iskart li jista' jiġi evitat huwa riżultat ta' miżinterpretazzjoni tas-sistema tat-tikkettjar tad-data.

L-Ambitu tar-Regolament : Il-PE ippropona (l-emenda 39) li r-Regolament ma għandux japplika għas-servizzi tat-trasport tal-catering, bħall-ajruplani u l-ferroviji, li jkunu fuq rotot li mhumiex kompletament fl-UE. Il-Kummissjoni temmen li l-kwistjoni dwar kif għandu japplika r-regolament dwar is-servizzi tat-trasport tal-catering jistħoqqilha iktar konsiderazzjoni.

Fl-istess emenda, il-PE ippropona wkoll li tkun inkluża dispożizzjoni fil-parti tar-Regolament li tiddigrieta, li tirrifletti l-Preambolu 15 tal-proposta tal-Kummissjoni li ċerti attivitajiet huma barra mill-ambitu tar-Regolament. F'dan il-każ, il-Kummissjoni tinnota li l-Kunsill ikkunsidra din il-kwistjoni sew u ddeċieda li ma jinkludix dispożizzjoni fil-parti li tiddigrieta. Il-preambolu joffri gwida għall-ambitu intenzjonat tal-applikazzjoni tar-Regolament u għalhekk il-Kummissjoni ma opponietx il-pożizzjoni tal-Kunsill fl-ewwel qari dwar dan il-punt.

Definizzjoni ta' ingredjent: Il-proposta oriġinali tal-Kummissjoni kienet tinkludi approċċ sempliċi għad-definizzjoni ta' "ingredjent" kif imqabbla mal-leġiżlazzjoni fis-seħħ. Kien innotat li l-approċċ sempliċi propost mill-Kummissjoni għandu impatt fuq l-applikazzjoni ta' testi oħra leġiżlattivi li jagħmlu referenza għal "ingredjent" kif definit fid-Direttiva 2000/13/KE dwar it-tikkettjar ġenerali. Għalhekk, il-Kummissjoni tikkunsidra li d-definizzjoni ta' "ingredjent" mid-Direttiva 2000/13/KE, adattata biex tqis l-emenda 49 tal-PE, għandha tieħu post il-proposta oriġinali tal-Kummissjoni. Il-bidla fl-approċċ jista' jkollha impatt fuq l-abbozzar ta' ftit mill-Artikoli.

It-tikkettjar ta' laħam li jikkonsisti minn biċċiet ta' laħam imħallta: Fl-emendi 276 u 293 il-PE ippropona li meta ikel ikun jikkonsisti minn biċċiet ta' laħam imħallta dan għandu jkun indikat fuq quddiem tal-pakkett jew assoċjat mal-isem tal-ikel. Il-Kummissjoni temmen li din il-proposta tiżgura li l-konsumaturi jkunu infurmati dwar il-karatteristiċi speċifiċi tal-ikel li jkunu qegħdin jixtru. Il-Kummissjoni taċċetta l-intenzjoni tal-emendi fil-prinċipju iżda tikkunsidra li l-abbozzar tad-dispożizzjoni teħtieġ tkun riveduta.

Tikkettjar ta' laħam bi proteina miżjuda u/jew ilma: Il-Kummissjoni aċċettat il-pożizzjoni tal-PE fil-prinċipju li ċerti prodotti tal-laħam u l-ħut li fihom il-proteina miżjuda u/jew ilma għandhom jindikaw is-sors tal-proteina miżjuda u l-preżenza tal-ilma miżjud fuq it-tikketta (emendi 207 u 226 sa 228). L-emendi tal-PE għat-tikkettjar tal-proteina miżjuda huma konformi mal-interpretazzjoni tal-Kummissjoni tal-leġiżlazzjoni preżenti.

Emendi oħra kienu appoġġjati mill-Kummissjoni, bħal: Tikkettjar ta' "data tal-manifattura" għal prodotti ffriżati: (l-emendi 62, 97, 140, 141), deroga għal mikro intrapriżi (l- emenda 104), tagħrif addizzjonali għall-istruzzjonijiet għall-użu u l-ħażna (l- emenda 142), introduzzjoni tal-kriterji għat-tikkettjar voluntarju "veġetarjan u veġetarju" (l-emenda 175), kisi għaz-zalzett (l-emenda 229). Li kieku dawn ġew ikkunsidrati fit-tieni qari, il-Kummissjoni tkun lesta li tikkunsidra l-inklużjoni tad-dispożizzjonijiet relevanti.

3.5. L-emendi tal-Parlament Ewropew irrifjutati mill-Kummissjoni u mill-Kunsill u mhux inkorporati fil-pożizzjoni tal-Kunsill fl-ewwel qari:

Leġġibilità: Il-pożizzjoni tal-PE dwar il-leġġibilità (l-emendi 53, 334, minn 111 sa 113) li ħassret ir-rekwiżit għad-daqs minimu tat-tipa u li pproponiet li għandhom jiġu stabbiliti kriterji għal-leġġibilità permezz ta' linji gwida ma kinitx aċċettata mill-Kummissjoni. Il-pożizzjoni tal-Kunsill fl-ewwel qari dwar il-leġġibilità iżżomm kriterju miżurabbli fir-Regolament innifsu u tgħin biex tikkjarifika din id-dispożizzjoni billi tinkludi referenza għall-kejl tad-daqs minimu tat-tipa. Il-Kummissjoni tikkunsidra li l-pożizzjoni tal-Kunsill dwar il-kriterji għad-daqs minimu tat-tipa ttejjeb il-proposta oriġinali u hija aċċettabbli.

L-Ambitu tar-Regolament : il-pożizzjoni tal-Kunsill fl-ewwel qari tappoġġja l-proposta tal-Kummissjoni għall-ambitu tar-Regolament biex dan japplika għall-ikel kollu intenzjonat għall-konsumatur finali u l-oġġettiv ġenerali tar-Regolament li jiffoka fuq il-konsumatur. Il-pożizzjoni fl-ewwel qari tal-PE biex tirrestrinġi l-ambitu tar-Regolament għall-ikel ippakkjat u lest għall-konsum (l-emendi 38 u 39) u biex tnaqqas l-importanza tal-konsumatur fir-Regolament (l-emenda 66) ma ġietx aċċettata la mill-Kummissjoni u lanqas mill-Kunsill.

Tagħrif Nutrittiv : il-Kummissjoni ma aċċettatx ħafna dispożizzjonijiet ġodda fil-pożizzjoni tal-PE fl-ewwel qari relatati ma' ċerti aspetti tat-tagħrif nutrittiv. Pereżempju, l-estensjoni tal-lista mandatorja tan-nutrienti biex tinkludi l-proteina, l-fibra u xaħmijiet trans (l-emenda 144) u l-estensjoni tal-lista tan-nutrienti volontarji addizzjonali (l-emenda 145); il-Kummissjoni kkunsidrat ir-repetizzjoni tat-tagħrif dwar l-enerġija f'format speċifiku fuq il-FOP bħala duplikazzjoni tal-informazzjoni (l-emenda 158); ir-rekwiżit biex tkun inkluża dikjarazzjoni dwar il-bażi tal-konsum ta' referenza (l-emenda 151) ma kienx ikkunsidrat li huwa meħtieġ; ħafna mill-eċċezzjonijiet proposti mit-tikkettjar mandatorju b’tagħrif nutrittiv; u, it-taħsir tar-referenza għas-Sistema Internazzjonali ta' unitajiet ta' kejl għall-enerġija (kJ) (l-emendi 246, 248, 319). Il-pożizzjoni tal-Kunsill fl-ewwel qari ma tinkludix dawn it-tibdiliet proposti mill-PE.

Xarbiet alkoħoliċi: Il-pożizzjoni tal-PE biex teżenti x-xorb alkoħoliku kollu mir-rekwiżit li għandu jagħti lista tal-ingredjenti u tikkettjar b’tagħrif nutrittiv u li kienet qed tistenna r-rapport tal-Kummissjoni (l-emendi 145 u 294) ma kinitx aċċettabbli għall-Kummissjoni. Il-pożizzjoni tal-Kunsill tipproponi li l-eżenzjonijiet għar-rekwiżiti biex tkun inkluża lista tal-ingredjenti u dikjarazzjoni tat-tagħrif nutrittiv għandha tkun estiża biex tinkludi xarbiet alkoħoliċi li huma kkunsidrati kompetittivi għal dawk diġà huma eżentati skont il-proposta tal-Kummissjoni. Il-Kummissjoni tista' taċċetta l-approċċ biex tittratta prodotti kompetittivi bl-istess mod. Madankollu, il-Kummissjoni tikkunsidra l-importanza li xarbiet alkoħoliċi mħallta u lesti għax-xorb għandu jkollhom tagħrif dwar l-ingredjenti u l-kompożizzjoni tan-nutrienti.

Tikketti tal-oriġini : Il-proposta tal-Kunsill dwar it-tikketti tal-oriġini żżomm mal-prinċipju tal-proposta tal-Kummissjoni li, meta l-oriġini tal-ikel hija mogħtija u l-pajjiż tal-oriġini tal-ingredjent primarju mhuwiex il-post tal-aħħar bidla sostanzjali fil-prodott sħiħ, għandha tingħata wkoll l-oriġini tal-ingredjent primarju. Il-pożizzjoni tal-PE kienet li titħassar din id-dispożizzjoni (l-emenda 172) li mhijiex aċċettabbli għall-Kummissjoni billi l-intenzjoni hija li tippreveni indikazzjonijiet tal-oriġini qarrieqa.

3.6. Dispożizzjonijiet ġodda introdotti mill-Kunsill

Leġġibilità: kif imsemmi qabel, it-test tal-Kunsill iżomm mal-proposta tal-Kummissjoni għad-daqs minimu tat-tipa li għandu jkun inkluż fir-Regolament imma jinkludi kjarifika importanti dwar kif għandu jkun determinat id-daqs tat-tipa. Il-Kummissjoni tikkunsidra li l-pożizzjoni tal-Kunsill dwar il-kriterji għad-daqs minimu tat-tipa ttejjeb il-proposta oriġinali.

It-tikkettjar ta’ sustanzi li jikkawżaw allerġiji jew intolleranzi : Fl-Artikolu dwar it-tikkettjar ta' ċerti sustanzi li jikkawżaw allerġiji jew intolleranzi, il-pożizzjoni tal-Kunsill tipproponi l-kjarifika tat-test fir-rigward tal-approċċ għat-tikketti ta' prodotti li ma jinkludux lista tal-ingredjenti. Din il-kjarifika hija ġusta u tista' tiġi aċċettata fil-prinċipju billi l-proposta tikkorrispondi mar-regoli fis-seħħ dwar it-tikketti ta' dawn is-sustanzi. Madankollu, kif imsemmi qabel, il-Kummissjoni tixtieq tibdel l-approċċ dwar id-definizzjoni ta' "ingredjent".

Kwantità netta : il-pożizzjoni tal-Kunsill fl-ewwel qari terġa' tintroduċi l-possibiltà li l-Istati Membri jkollhom regoli dwar l-espressjoni tal-kwantità netta għal ikel speċifiku b'mod differenti minn dak stipulat fir-Regolament. Il-Kummissjoni tista' taċċetta din il-proposta li tippermetti, fl-assenza ta' regoli tal-UE dettaljati, iż-żamma tal-approċċ fis-seħħ fl-espressjoni tal-kwalità netta għal kategoriji ta' ikel speċifiku, partikolarment fejn in-natura tal-prodott tista' tvarja minn likwidu għal solidu.

Tikkettjar ta' ikel li fih il-kafeina : ir-regoli implimentati fid-Direttiva tal-Kummissjoni 2002/67/KE tat-18 ta' Lulju 2002 dwar it-tikkettjar ta' prodotti tal-ikel li jkun fihom il-kinina u lill-oġġetti tal-ikel li jkun fihom il-kaffeina (adottati skont id-Direttiva 2000/13/KE) jinkludu regoli speċifiċi għat-tikkettjar ta' ċerti xarbiet li fihom il-kafeina. Il-pożizzjoni tal-Kunsill fl-ewwel qari tipproponi li t-tikketta għandha tindika wkoll li l-prodotti mhumiex adattati għal nisa tqal jew għal tfal żgħar. Il-pożizzjoni tal-Kunsill fl-ewwel qari hija li l-obbligazzjoni għat-tikkettjar speċifiku għandha tkun estiża għal ikel li fih il-kafeina miżjuda għal raġunijiet nutrittivi jew psikoloġiċi. Il-Kummissjoni taċċetta l-prinċipju għall-inklużjoni ta' dikjarazzjonijiet fuq tikketti għal ikel li fih il-kafeina miżjuda għal raġunijiet nutrittivi jew psikoloġiċi, rigward il-konsum ta' tali prodotti minn gruppi ta' nies speċifiċi li huma fl-ambitu tal-konsulenza xjentifika disponibbli[5]

Dispożizzjonijiet finali u perjodi transitorji (l-Artikolu 45, il-preambolu 54): L-emenda 194 tal-PE proposta biex tibdel il-proposta tal-Kummissjoni għal żieda ta' sentejn fil-perjodu tranżitorju għall-mikro intrapriżi (b'inqas minn 10 impjegati) mir-rekwiżit għall-provediment ta' tikkettjar mandatorju b’tagħrif nutrittiv għandu jkun estiż għal negozji b'inqas minn 100 impjegat. Il-Kummissjoni ma aċċettatx l-emenda tal-PE.

Dwar id-data tal-applikazzjoni, minflok applikazzjoni tar-regoli dwar it-tikkettjar b’tagħrif nutrittiv f'żewġ stadji, b'żieda ta' sentejn għall-adattament fil-każ ta' mikro intrapriżi, it-test tal-Kunsill jipproponi li meta jingħata tagħrif nutrittiv dan għandu jaqbel mar-rekwiżiti l-ġodda minn tliet snin wara d-data tad-dħul fis-seħħ tar-Regolament. Madankollu, l-obbligazzjoni li jingħata t-tagħrif nutrittiv ma tibdiex tapplika qabel ħames snin wara d-dħul fis-seħħ.

Il-pożizzjoni tal-Kunsill tinkludi dispożizzjoni ġdida li tindika li għandu jkun hemm perjodu tranżitorju għall-applikazzjoni ta' rekwiżiti ġodda, u li prodotti mpoġġijin fis-suq qabel tmiem il-perjodu tranżitorju jistgħu jibqgħu jinbigħu sakemm jispiċċaw il-ħażniet. Huma jipproponu wkoll li d-data tal-applikazzjoni għandha tkun l-1 ta' April ta' kull sena kalendarja, minbarra fil-każ ta' miżuri urġenti. Il-Kummissjoni tista' taċċetta l-pożizzjoni tal-Kunsill dwar l-applikazzjoni tar-Regolament u l-miżuri tranżitorji.

Eżerċizzju tad-delegazzjoni u delegazzjoni tal-poteri fit-test kollu: L-allinjament tad-delegazzjoni tal-poteri fil-pożizzjoni tal-Kunsill huma kompletament skont l-approċċ tal-Kummissjoni u huma addattati għall-ambitu tad-delegazzjoni tal-poteri proposti. Hemm xi differenzi meta mqabbla mal-approċċ tal-Kummissjoni b'risposta għall-opinjoni tal-PE, madankollu, fil-kuntest tat-test tal-Presidenza d-delegazzjonijiet huma addattati u jistgħu jiġu aċċettati bl-eċċezzjoni tal-poteri proposti ta' implimentazzjoni relatati ma' miżuri assoċjati mat-tikkettjar tal-oriġini tal-laħam.

It-tibdil li ġej li kien introdott mill-Kunsill huwa wkoll aċċettat mill-Kummissjoni:

( L-għażla għall-inklużjoni ta' stqarrija li tispjega li d-dikjarazzjoni tat-tagħrif nutrittiv dwar il-melħ tirreferi għal sodju/melħ li huwa preżenti b'mod naturali. Dan it-tikkettjar volontarju joffri kjarifika;

( Kapitolu dwar miżuri nazzjonali – il-Kunsill emenda l-Artikolu 37 tal-proposta oriġinali tal-Kummissjoni li tikkjarifika l-ambitu tal-Kapitolu;

( L-Anness V – rekwiżit ġdid għat-tikkettjar "iddifrostjat";

( L-Anness VIB – l-obbligazzjoni li jkun indikat jekk żejt jew xaħam idroġenat huwa idroġenat kompletament jew parzjalment;

( L-Anness IX – it-taħsir tal-eżenzjonijiet mid-"data tal-aħjar qabel" għal ċerti prodotti;

( L-Anness XI – bidla fil-kwantità ta' referenza għall-ammont sinifikanti ta' vitamini u minerali;

( Is-simplifikazzjoni tal-Anness li jipprovdi l-ordni tal-preżentazzjoni tal-vitamini u l-minerali (l-Anness XIII tal-proposta oriġinali tal-Kummissjoni) hija aċċettata kif proposta.

3.7. Problemi ewlenin fl-adozzjoni tal-pożizzjoni tal-Kunsill fl-ewwel qari

Il-pożizzjoni adottata mill-Kunsill fl-ewwel qari fiha elementi li joħorġu mill-proposta tal-Kummissjoni. Dawn huma, partikolarment, dwar it-tikkettjar tal-oriġini, l-inklużjoni tal-isem tal-manifattur, u d-definizzjoni ta' ingredjent, kif enfasizzati fuq ċerti aspetti tat-tikkettjar b’tagħrif nutrittiv.

4. KONKLUŻJONI

Il-Kummissjoni għandha l-opinjoni li l-pożizzjoni tal-Kunsill fl-ewwel qari fiha elementi li joħorġu mill-proposta tal-Kummissjoni. Għalkemm għad hemm tħassib, il-Kummissjoni ma kinitx kontra l-pożizzjoni adottata mill-Kunsill permezz ta' maġġoranza kwalifikata, bil-għan li l-proċess leġiżlattiv javvanza.

Fid-dikjarazzjoni mehmuża, il-Kummissjoni indikat lill-Kunsill li jiddispjaċiha partikolarment għad-Deċiżjoni tal-Kunsill biex jitħassar ir-rekwiżit għad-dikjarazzjoni dwar it-tagħrif nutrittiv fuq quddiem tal-pakkett.

ANNESS

Dikjarazzjoni mill-Kummissjoni

Fi spirtu ta' kompromess, il-Kummissjoni mhix se tmur kontra l-vot ta' maġġoranza kwalifikata favur it-test tal-Presidenza għalkemm għad hemm tħassib peress li t-test tal-Presidenza fih xi elementi li joħorġu mill-proposta tal-Kummissjoni u xi elementi legali għandhom jiġu riveduti skont it-Trattat tal-Funzjonament tal-Unjoni Ewropea. Barra minn hekk, il-Kunsill ma kkunsidrax l-opinjoni tal-PE fl-ewwel qari u konsegwentament l-emendi tal-PE li l-Kummissjoni kienet indikat li setgħet taċċetta mhumiex koperti mit-test tal-Presidenza.

Il-Kummissjoni jiddispjaċiha, partikolarment, li l-Kunsill għażel li jħassar id-dikjarazzjoni dwar it-tagħrif nutrittiv "fuq quddiem tal-pakkett". Il-Kummissjoni tikkunsidra li dan se jdgħajjef il-benefiċċji li l-konsumaturi setgħu jieħdu mid-dikjarazzjoni mandatorja dwar it-tagħrif nutrittiv u hija konvinta mill-benefiċċji għall-konsumaturi tat-tikkettjar fuq quddiem tal-pakkett billi dan jippermettilhom li jaraw it-tagħrif nutrittiv mill-ewwel meta jkunu qed jixtru l-ikel.

[1] Id-Direttiva 2000/13/KE tal-Parlament Ewropew u tal-Kunsill tal-20 ta' Marzu 2000 dwar l-approssimazzjoni ta' liġijiet tal-Istati Membri li għandhom x'jaqsmu ma' tikkettjar, preżentazzjoni u riklamar ta' oġġetti tal-ikel (ĠU L 109, 6.5.2000, p. 29).

[2] Id-Direttiva tal-Kunsill 90/496/KEE tal-24 ta' Settembru 1990 dwar l-ittikkettjar tan-nutrizzjoni għall-oġġetti tal-ikel (ĠU L 276, 6.10.1990, p. 40).

[3] COM(2010) 738.

[4] http://ec.europa.eu/environment/eussd/reports.htm

[5] L-Opinjoni tal-Kumitat Xjentifiku għall-Ikel tal-21 ta' Jannar 1999 dwar il-kafeina u sustanzi oħra użati bħala ingredjenti fl-"energy drinks".