31982L0884

Id-Direttiva tal-Kunsill

tat-3 ta' Diċembru 1982

dwar valur ta' limitu rigward iċ-ċomb fl-arja

(82/884/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea, u b'mod partikolari l-Artikolu 235 tiegħu,

Wara li kkunsidra l-proposta mill-Kummissjoni [1],

Wara li kkunsidra l-opinjoni tal-Parlament Ewropew [2],

Wara li kkunsidra l-opinjoni tal-Kunsill Ekonomiku u Soċjali [3],

Billi wieħed mill-kompiti essenzjali tal-Komunità Ekonomika Ewropea huwa li tippromwovi fil-Komunità kollha żvilupp armonjuż ta' l-attivitajiet ekonomiċi u espansjoni kontinwa u bilanċjata, li ma jistgħux jiġu immaġinati fin-nuqqas ta' kampanja sabiex tikkumbatti t-tniġġis u l-irritazzjonijiet jew ta' titjib fil-kwalità tal-ħajja u tal-ħarsien ta' l-ambjent;

Billi l-użu taċ-ċomb qiegħed korrentement jikkawża l-kontaminazzjoni ta' ħafna żoni fl-ambjent;

Billi ċ-ċomb meħud man-nifs jikkontribwixxi sinifikament għat-toqol kollu taċ-ċomb fil-ġisem;

Billi l-ħarsien tas-saħħa tal-bniedem mir-riskji taċ-ċomb jeħtieġ li tiġi mmonitorjata l-espożizzjoni ta' l-individwu għaċ-ċomb fl-arja;

Billi l-ewwel [4] u t-tieni [5] programmi ta' azzjoni tal-Komunitajiet Ewropej dwar l-ambjent jiddikjaraw illi dan l-inkwinant għandu jirċievi l-prijorità fil-konsiderazzjoni; billi l-programmi msemmija jipprovdu għall-kordinament tal-programmi nazzjonali f'dan il-qasam u għall-armonizzazzjoni tal-politiki nazzjonali ġewwa l-Komunità fuq il-bażi ta' pjanifikazzjoni komuni fuq skond fit-tul li timmira li ttejjeb il-kwalità tal-ħajja; billi ġaladarba l-poteri speċifiċi ta' l-azzjoni meħtieġa għal dan il-għan ma ġewx imdaħħla fit-Trattat, huwa meħtieġ illi jissejjaħ l-Artiklu 235 tiegħu;

Billi mhux disponibbli tagħrif xjentifiku u tekniku biżżejjed sabiex jgħin lill-Kunsill jistabbilixxi standards speċifiċi għall-ambjent b'mod ġenerali; billi l-adozzjoni tal-valuri tal-limiti għall-ħarsien tas-saħħa tal-bniedem trid tikkontribwixxi għall-ħarsien ta' l-ambjent ukoll;

Billi huwa mixtieq li jiġi ffissat valur ta' limitu għaċ-ċomb fl-arja;

Billi l-miżuri meħuda skond din id-Direttiva jridu jkunu ekonomikament possibbli u kompatibbli ma' l-iżvilupp ibbilanċjat; billi, bħala konsegwenza ta' dan, għandu jiġi stabbilit limitu taż-żmien biżżejjed sabiex tiġi implimentata; billi jridu jitqiesu wkoll id-dispożizzjonijiet tad-Direttiva tal-Kunsill 78/611/KEE tad-29 ta' Ġunju 1978 dwar it-tqarrib lejn xulxin tal-liġijiet ta' l-Istati Membri li jirrigwardaw il-kontenut taċ-ċomb fil-petrol [6];

Billi huwa mixtieq li tiġi mmonitorjata l-kwalità ta' l-arja f'postijiet fejn in-nies jistgħu jkunu esposti kontinwament u għal-tul taż-żmien u fejn ikun hemm ir-riskju li l-valur ta' limitu jista' ma jiġix osservat;

Billi huwa importanti illi l-Kummissjoni għandha tikseb it-tagħrif rigward il-postijiet użati sabiex jittieħdu l-kampjuni, rigward il-proċeduri tal-għażla u l-analiżi tal-kampjuni wżati sabiex jistabbilixxu l-konċentrazzjoni taċ-ċomb fl-arja, rigward il-postijiet fejn il-valur ta' limitu stabbilit f'din id-Direttiva jkun ġie maqbuż u rigward il-konċentrazzjonijiet imkejla f'dawn il-postijiet kif ukoll rigward il-miżuri meħuda sabiex tiġi evitata tennija ta' din l-okkorrenza;

Billi f'kull sena mit-tieni sena wara l-implimentazzjoni ta' din id-Direttiva, il-Kummissjoni għandha tippubblika rapport fil- qosor dwar l-implimentazzjoni tad-dispożizzjonijiet nazzjonali adottati skond din id-Direttiva;

Billi l-applikazzjoni tal-miżuri meħuda skond din id-Direttiva ma għandhomx iwasslu għal deterjorazzjoni li wieħed jinduna biha fil-kwalità ta' l-arja fejn il-livell tat-tniġġiż miċ-ċomb osservat meta d-Direttiva tiġi implimentata ikun iktar baxx mill-valur ta' limitu ffissat;

Billi, sabiex tiġi implimentata din id-Direttiva, huwa mixtieq li jitħarsu l-karatteristiċi adottati f'dan l-Anness sabiex jingħażel il-metodu dwar kif jittieħdu l-kampjuni; billi sabiex jiġu analizzati l-kampjuni meħuda, huwa mixtiq li jintuża l-metodu ta' referenza adottat fl-Anness jew kull metodu ieħor li dwaru l-Kummissjoni kellha prova minn qabel li jipprovdi riżultati ekwivalenti;

Billi jista' jkun mixtieq iktar żvilupp tal-karatteristiċi li jridu jiġu mħarsa fil-għażla tal-metodu tat-teħid tal-kampjuni u tal-metodu ta' referenza għall-analiżi, iddikjarati fl-Anness ma' din id-Direttiva, fid-dawl tal-progress tekniku u xjentifiku miksub f'dan il-qasam; billi, sabiex tiġi ffaċilitata l-implimentazzjoni tax-xogħol meħtieġ, huwa mixtieq li tiġi pprovvduta proċedura li ddaħħal kooperazzjoni mill-qrib bejn l-Istati Membri u l-Kummissjoni f'Kumitat responsabbli milli jaddatta din id-Direttiva mal-progress xjentifiku u tekniku,

ADOTTA DIN ID-DIRETTIVA:

Artikolu 1

1. Din id-Direttiva għandha tiffissa l-valur ta' limitu għaċ-ċomb fl-arja speċifikament sabiex tipproteġi lill-bnedmin mill-effetti taċ-ċomb fl-ambjent.

2. Din id-Direttiva ma għandiex tapplika għall-espożizzjoni minħabba x-xogħol.

Artikolu 2

1. Għall-għan ta' din id-Direttiva, "valur ta' limitu" ifisser il-konċentrazzjoni taċ-ċomb fl-arja li, bla ħsara għall-kondizzjonijiet stabbiliti minn issa 'l quddiem, ma tridx tinqabeż.

2. Il-valur ta' limitu għandu jkun ta' 2 mikro-grammi Pb/m3 espressi bħala l-konċentrazzjoni medja ta' kull sena.

3. L-Istati Membri jistgħu, f'kull waqt, jiffissaw valur iktar strett minn dak stabbilit f'din id-Direttiva.

Artikolu 3

1. L-Istati Membri għandhom jieħdu l-miżuri meħtieġa sabiex jiżguraw illi sa ħames snin wara n-notifika ta' din id-Direttiva, il-konċentrazzjoni taċ-ċomb fl-arja, imkejla skond l-Artikolu 4, ma tkunx ogħla mill-valur ta' limitu mogħti fl-Artikolu 2.

2. Meta Stat Membru jikkunsidra illi l-valur ta' limitu ffissat fl-Artikolu 2(2) jista' jinqabeż f'ċerti postijiet erba' snin wara n-notifika ta' din id-Direttiva, għandu jgħarraf lill-Kummissjoni b'dan.

3. L-Istati Membri interessati għandhom, fi żmien sentejn mill-implimentazzjoni ta' din id-Direttiva, jibagħtu lill-Kummissjoni pjani dwar it-titjib progressiv fil-kwalità ta' l-arja f'dawn il-postijiet. Dawn il-pjani, imfassla fuq il-bażi tat-tagħrif rilevanti dwar in-natura, l-oriġini u l-iżvilupp tat-tniġġis, għandhom jiddeskrivu b'mod partikolari l-miżuri diġà mittieħda jew previsti u l-proċeduri implimentati jew ippjanati mill-Istati Membri interessati. Il-mira ta' dawn il-miżuri u proċeduri trid tkun li l-konċentrazzjoni taċ-ċomb fl-arja f'dawn il-postijiet titniżżel għal taħt il-valur ta' limitu ffissat fl-Artikolu 2(2) jew sa dan il-livell, malajr kemm jista' jkun u mhux iktar tard minn seba' snin wara n-notifika ta' din id-Direttiva. Dawn il-miżuri u proċeduri jridu jqisu d-dispożizzjonijiet tad-Direttiva 78/611/KEE u r-riżultati mill-applikazzjoni tagħha.

Artikolu 4

L-Istati Membri għandhom jiżguraw illi l-istazzjonijiet tat-teħid tal-kampjuni jkunu stallati u mħaddma f'postijiet fejn individwi jistgħu jkunu esposti kontinwament u għal perjodu twil taż-żmien u fejn jikkunsidraw illi x'aktarx ma jiġux osservati l-Artikoli 1 u 2.

Artikolu 5

1. Għall-għanijiet ta' l-applikazzjoni ta' din id-Direttiva, l-Istati Membri għandhom jipprovdu lill-Kummissjoni fuq it-talba tagħha tagħrif dwar:

- il-lokazzjonijiet użati għat-teħid tal-kampjuni,

- il-proċeduri tat-teħid tal-kampjuni u ta' l-analiżi wżati sabiex tiġi stabbilita l-konċentrazzjoni taċ-ċomb fl-arja.

2. L-Istati Membri għandhom jgħarrfu lill-Kummissjoni mhux iktar tard mill-1 ta' Lulju ta' kull sena, bil-bidu jkun fis-sena kalendarja ta' wara l-implimentazzjoni ta' din id-Direttiva, bil-postijiet li fihom il-valur ta' limitu ffissat fl-Artikolu 2(2) ikun inqabeż fis-sena kalendarja ta' qabel u bil-konċentrazzjonijiet irreġistrati.

3. Għandhom ukoll jinnotifikaw lil-Kummissjoni, mhux iktar tard minn matul is-sena kalendarja ta' wara dik li fiha l-valuri tal-limiti jkunu ġew maqbuża, dwar il-miżuri li jkunu ħadu sabiex jevitaw l-okkorrenza mill-ġdid.

Artikolu 6

Il-Kummissjoni għandha tippubblika kull sena rapport fil-qosor dwar l-applikazzjoni ta' din id-Direttiva, mill-bidu tat-tieni sena wara l-implimentazzjoni tagħha.

Artikolu 7

L-applikazzjoni tal-miżuri meħuda skond din id-Direttiva ma jridux iwasslu għal deterjorament sinifikanti fil-kwalità ta' l-arja meta l-livell tat-tniġġiż miċ-ċomb, fil-waqt ta' l-implimentazzjoni ta' din id-Direttiva, ikun baxx relatat mal-valur ta' limitu fissat fl-Artikolu 2(2).

Artikolu 8

Għall-għanijiet ta' l-applikazzjoni ta' din id-Direttiva, l-Istati Membri għandhom jikkonformaw mal-karatteristiċi stabbiliti fl-Anness fil-għażla tal-metodu tat-teħid tal-kampjuni; sabiex janalizzaw il-kampjuni meħuda, l-Istati Membri għandhom jużaw il-metodu ta' referenza msemmi fl-Anness jew kull metodu ieħor li huma jagħtu prova tiegħu lill-Kummissjoni minn qabel illi jipproduċi riżultati ekwivalenti.

Artikolu 9

Il-proċedura fl-Artikoli 10 u 11 dwar l-addattament ta' din id-Direttiva mal-progress xjentifiku u tekniku għandu jkollha x'taqsam mal-karatteristiċi li jridu jitħarsu fil-għażla tal-metodi tat-teħid tal-kampjuni u tal-metodu ta' referenza riferiti fl-Anness.

Dan l-addattament ma jridx ikollu l-effett dirett jew indirett li jimmodifika l-applikazzjoni tal-valur attwali tal-konċentrazzjoni ffissat fl-Artikolu 2(2).

Artikolu 10

1. Huwa hawnhekk imwaqqaf Kumitat sabiex jaddatta din id-Direttiva mal-progress xjentifiku u tekniku, minn issa l quddiem imsejjaħ "il-Kumitat"; għandu jikkonsisti mir-rappreżentanti ta' l-Istati Membri u bir-rappreżentant tal-Kummissjoni bħala l-President.

2. Il-Kumitat għandu jadotta r-regoli ta' proċedura tiegħu.

Artikolu 11

1. Meta trid tiġi segwita l-proċedura stabbilita f'dan l-Artikolu, il-materja għandha tiġi riferita lill-Kumitat mill-President tiegħu, jew fuq l-inizjattiva tiegħu nnifsu jew fuq it-talba tar-rappreżentant ta' Stat Membru.

2. Ir-rappreżentant tal-Kummissjoni għandu jissottometti lill-Kumitat abbozz tal-miżuri li jridu jittieħdu. Il-Kumitat għandu jagħti l-opinjoni tiegħu dwar l-abbozz fil-limitu taż-żmien stabbilit mill-President tiegħu, filwaqt li jqis l-urġenza tal-materja. L-opinjonijiet għandhom jiġu mogħtija bil-maġġoranza ta' 45 vot, bil-voti ta' l-Istati Membri ppeżati kif ipprovvdut fl-Artikolu 148(2) tat-Trattat. Il-President ma għandux jivvota.

3. Meta l-miżuri previsti jkunu skond l-opinjoni tal-Kumitat, il-Kummissjoni għandha tadottahom.

Meta l-miżuri previsti ma jkunux skond l-opinjoni tal-Kumitat, jew fejn ma tingħatax opinjoni, il-Kummissjoni għandha tissottometti lill-Kunsill mingħajr dewmien proposta dwar il-miżuri li jridu jittieħdu. Il-Kunsill għandu jaġixxi b'maġġoranza kkwalifikata.

Jekk fi żmien tliet xhur minn meta l-proposta tkun ġiet issottomessa lilu, il-Kumitat ma jkunx aġixxa, il-miżuri proposti għandhom jiġu adottati mill-Kummisjoni.

Artikolu 12

1. L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma' din id-Direttiva fi żmien 24 xahar min-notifika tagħha u għandhom jgħarrfu b'dan lill-Kummissjoni minnufih.

2. L-Istati Membri għandhom jibagħtu lill-Kummissjoni t-testi tad-dispożizzjonijiet li huma jadottaw fil-qasam regolat b'din id-Direttiva.

Artikolu 13

Din id-Direttiva hija indirizzata lill-Istati Membri.

Magħmula fi Brussel, fit-3 ta' Diċembru 1982.

Għall-Kunsill

Il-President

Ch. Christensen

[1] ĠU C 154, tas-7.7.1975, p. 29.

[2] ĠU C 28, tad-9.2.1976, p. 31.

[3] ĠU C 50, ta' l-4.3.1976, p. 9.

[4] ĠU C 112, tal-20.12.1973, p. 1.

[5] ĠU C 139, tat-13.6.1977, p. 1.

[6] ĠU L 197, tat-22.7.1978, p. 19.

--------------------------------------------------

L-ANNESS

IL-KARATTERISTIĊI LI JRIDU JITĦARSU FL-GĦAŻLA TA’ METODU GĦAT-TEĦID TAL-KAMPJUNI U TA’ METODU TA’ REFERENZA GĦALL-ANALIŻI DWAR IL-KONĊENTRAZZJONI TAĊ-ĊOMB FL-ARJA

Għandhom jinġabru l-partikoli fl-arja fuq filtru ta’ kampjun sabiex jiġi sossegwentement stabbilit il-kontenut taċ-ċomb.

A. Il-karatteristiċi li jridu jitħarsu fil-għażla tal-metodu tat-teħid tal-kampjuni 1 Il-Filtru

1. Filtru

Il-filtru jrid ikollu effiċjenza ta’ ġbir skond il-veloċità fuq il-wiċċ tiegħu wżata fit-teħid ta’ kampjuni ta’ mhux inqas minn 99 % tal-partikoli kollha ta’ dijametru medju erjodinamiku ta’ 0 73 μm.

2. Effiċjenza tal-mezz li bih jittieħdu l-kampjuni

L-effiċjenza tal-mezz li bih jittieħdu l-kampjuni hija ddefinita bħala l-proporzjon tal-konċentrazzjoni tal-massa tal-partikoli fl-arja, kif miġbura fuq il-filtru, għall-konċentrazzjoni fl-atmosfera. L-effiċjenza tal-mezz li bih jittieħdu l-kampjuni ma tridx tkun inqas mill-valuri mogħtija fit-tabella li ġejja u trid tkun indipendenti mid-direzzjoni tar-riħ.

L-effiċjenżi minimi (%) aċċettabbli ta’ mezz li bih jittieħed il-kampjun

Il-Qawwa tar-riħ (il-velocità): | Id-Daqs tal-partikola (id-dijametru erjodinamiku) |

| |

5 μm | 10 μm |

2ms-1 | 95 | 65 |

4ms-1 | 95 | 60 |

6ms-1 | 85 | 40 |

3. Rata tal-kurrent ta’ l-aspirazzjoni fit-teħid tal-kampjun

Ir-rata tal-kurrent ta’ l-aspirazzjoni fit-teħid tal-kampjun trid tibqa kostanti sa ± 5 % tal-valur nominali matul il-perjodu kollu taż-żmien tat-teħid tal-kampjun.

4. Lokazzjoni

Safejn ikun possibbli, l-istazzjonijiet tat-teħid tal-kampjuni (jew tal-mezz li bih jittieħed il-kampjun) iridu jkunu lokati hekk li jkunu rappreżentattivi taż-żoni fejn irid isir il-kejl.

5. Xogħol

It-teħid tal-kampjuni jrid ikun kontinwu għalkemm huma permessi waqfiet ta’ ftit minuti kuljum jew kull ġimgħa sabiex il-filtri jkunu jistgħu jinbidlu. Valur medju annwali ma għandux jiġi kkunsidrat validu għajr jekk it-teħid tal-kampjuni jkun sar fuq minimu ta’ 10 ġranet tax-xogħol kull xahar, matul l-ewwel ħames snin wara n-notifika ta’ din id-Direttiva u fuq minimu ta’ 15-il jum tax-xogħol wara dan, safejn ikun possibbli, mifruxa b’mod egwali matul il-perjodu taż-żmien taħt kunsiderazzjoni Il-valur medju annwali jiġi kkalkolat billi s-somma tal-valuri validi ta’ kuljum tiġi diviża bin-numru tal-ġranet li fihom ikunu nkisbu valuri validi.

B. Metodu tar-referenza ta’ l-analiżi

Il-metodu tar-referenza ta’ l-analiżi għandu jkun l-ispettrometrija ta’ l-assorbiment atomiku li fiha d-differenza analitika sabiex jiġi stabbilit iċ-ċomb fil-partikoli miġbura trid tkun inqas minn valur li jikkorrespondi ma’ konċentrazzjoni fl-arja ta’ 0 71 μg m-3 ta’ ċomb (5 % tal-valur ta’ limitu ta’ 2 μg m-3). Din id-differenza analitika għandha tinżamm ġewwa l-firxa speċifikata bi frekwenza ta’ kalibrazzjoni xierqa.

--------------------------------------------------