5.7.2006   

MT

Il-Ġurnal Uffiċjali ta' l-Unjoni Ewropea

210

(1)

Skond id-Direttiva 91/414/KEE, l-awtorizzazzjonijiet ta’ ċerti prodotti tal-ħarsien tal-pjanti biex jintużaw fuq ħxejjex partikolari jaqgħu taħt ir-responsabbiltà ta’ l-Istati Membri. Dawn l-awtorizzazzjonijiet iridu jkunu bbażati fuq il-valutazzjoni ta’ l-effetti fuq is-saħħa tal-bniedem u l-annimali kif ukoll fuq l-ambjent. L-elementi li jeħtieġ jitqiesu fit-tali valutazzjonijiet jinkludu l-espożizzjoni ta’ l-operatur u ta’ dawk li jkunu viċin, l-impatt tagħhom fuq l-ambjent ta’ l-art, ta’ l-ilma u ta’ l-ajru, kif ukoll l-impatt tagħhom fuq il-bnedmin u l-annimali bil-konsum tar-residwi fuq il-ħxejjex ittrattati.

(2)

L-ogħla livelli ta’ residwi (MRL) jirriflettu l-użu ta’ l-inqas kwantitajiet ta’ pestiċidi biex jinkiseb il-ħarsien effettiv tal-pjanti. Dawn ikunu applikati b’tali mod li l-għadd ta’ residwi jkun l-anqas possibbli, u għalhekk ikunu aċċettabbli tossikoloġikament, l-aktar f’termini tal-proċess mistenni fit-teħid ta’ l-ikel.

(3)

L-ogħla livelli ta’ residwi (MRL) għall-pestiċidi għandhom jibqgħu jiġu riveduti. Dawn jistgħu jinbidlu biex jitqiesu użi, tagħrif jew data ġodda.

(4)

L-ogħla livelli ta’ residwi (MRL) ġew iffissati skond l-iktar limitu baxx tad-determinazzjoni analitika, fejn l-użi awtorizzati tal-prodotti tal-ħarsien tal-pjanti ma wasslux biex ikun hemm livelli ta’ residwi ta’ pestiċida kbar fuq jew fil-prodott ta’ l-ikel, jew fejn ma kien hemm l-ebda użu awtorizzat, jew fejn l-użi li kienu ġew awtorizzati mill-Istati Membri ma kienux ġew appoġġjati bid-data meħtieġa, jew fejn l-użi ta’ dawn f’pajjiżi terzi, li fihom kienu nstabu residwi fuq jew fil-prodotti ta’ l-ikel li jistgħu jidħlu biex jitpoġġew fis-suq tal-Komunità, ma kienux ġew appoġġjati b’din id-data meħtieġa.

(5)

It-tagħrif fuq użi ġodda jew mibdula ta’ ċerti pestiċidi li huma koperti bid-Direttiva 90/642/KEE ġie nnotifikat lill-Kummissjoni. Dan jikkonċerna il-bifenthrin, li għalih l-ogħla livelli ta’ residwi (MRL) kienu ġew stabbiliti bid-Direttiva tal-Kummissjoni 2002/79/KE, (3) u l-famoxadone, li għalih l-ogħla livelli ta’ residwi (MRL) kienu ġew stabbiliti bid-Direttiva tal-Kummissjoni 2003/60/KE. (4)

(6)

L-espożizzjoni tal-konsumaturi tul ħajjithom kollha għal dawn il-pestiċidi bil-konsum ta’ prodotti ta’ l-ikel li jista’ jkun fihom residwi ta’ dawn il-pestiċidi, ġiet eżaminata skond il-proċeduri u l-prattiċi li jintużaw fil-Komunità Ewropea, waqt li tqiesu wkoll il-linji ta’ gwida ppubblikati mill-Organizzazzjoni Dinjija tas-Saħħa. (5) Kien ikkalkulat li l-ogħla livelli ta’ residwi (MRL) ikkonċernati se jiżguraw li l-livelli aċċettabbli tal-proċess tat-teħid ta’ kuljum mhux se jinqabżu.

(7)

Fil-każ tal-famoxadone, li għaliha teżisti doża ta’ referenza akuta (ARfD), l-espożizzjoni akuta tal-konsumaturi għal dawn il-pestiċidi, bil-konsum ta’ kull wieħed mill-prodotti ta’ l-ikel li jista’ jkun fihom residwi ta’ dawn il-pestiċidi, ġiet eżaminata skond il-proċeduri u l-prattiċi li jintużaw fil-Komunità Ewropea, waqt li tqiesu l-linji ta’ gwida ppubblikati mill-Organizzazzjoni Dinjija tas-Saħħa. L-opinjonijiet tal-Kumitat Xjentifiku għall-Pjanti, l-aktar il-pariri u r-rakkomandazzjonijiet dwar il-ħarsien tal-konsumaturi mill-prodotti ta’ l-ikel li jkunu ġew ittrattati bil-pestiċidi, ġew ikkunsidrati wkoll. Il-valutazzjoni tal-proċess tat-teħid tal-famoxadone turi li, bit-twaqqif ta’ l-ogħla livell tar-residwu (MRL) ikkonċernat, l-ARfD mhux se jkun aktar milli suppost. Fil-każ tal-bifenthrin, il-valutazzjoni tat-tagħrif disponibbli wriet li l-ebda ARfD ma huwa meħtieġ, u għalhekk ma hija meħtieġa l-ebda valutazzjoni għall-perjodu ta’ żmien qasir.

(8)

Għalhekk, ikun xieraq li jiġu ffissati livelli massimi ġodda għar-residwi ta’ dawk il-pestiċidi.

(9)

Id-Direttiva 90/642/KEE għandha, għalhekk, tiġi emendata kif xieraq.

(10)

It-twaqqif jew il-modifikazzjoni fuq livell ta’ Komunità ta’ l-ogħla livelli ta’ residwi (MRL) temporanji ma jwaqqfux lill-Istati Membri milli dawn jistabbilixxu livelli massimi ta’ residwi (MRL) temporanji għall-famoxadone skond l-Artikolu 4(1)(f) tad-Direttiva 91/414/KEE u l-Anness VI miġjub fiha. Qed jitqies wkoll li perjodu ta’ erba’ snin huwa biżżejjed biex ikunu jistgħu jitħallew aktar użi tas-sustanza attiva kkonċernata. L-ogħla livelli ta’ residwi (MRL) temporanji għandhom isiru definittivi.

(11)

Il-miżuri li hemm f’din id-Direttiva jaqblu ma’ l-opinjoni tal-Kumitat Permanenti fuq il-Katina ta’ l-Ikel u s-Saħħa ta’ l-Annimali,