EUR-Lex Access to European Union law
This document is an excerpt from the EUR-Lex website
Document 32006E0419
Council Joint Action 2006/419/CFSP of 12 June 2006 in support of the implementation of the United Nations Security Council Resolution 1540 (2004) and in the framework of the implementation of the EU Strategy against the Proliferation of Weapons of Mass Destruction
Azzjoni Konġunta tal-Kunsill 2006/419/PESK tat- 12 ta’ Ġunju 2006 b'appoġġ għall-implementazzjoni tar-Riżoluzzjoni tal-Kunsill tas-Sigurtà 1540 (2004) tan-Nazzjonijiet Uniti u fil-qafas ta' l-implementazzjoni ta' l-Istrateġija ta' l-UE kontra l-Proliferazzjoni ta' Armi ta' Distruzzjoni Massiva
Azzjoni Konġunta tal-Kunsill 2006/419/PESK tat- 12 ta’ Ġunju 2006 b'appoġġ għall-implementazzjoni tar-Riżoluzzjoni tal-Kunsill tas-Sigurtà 1540 (2004) tan-Nazzjonijiet Uniti u fil-qafas ta' l-implementazzjoni ta' l-Istrateġija ta' l-UE kontra l-Proliferazzjoni ta' Armi ta' Distruzzjoni Massiva
ĠU L 165, 17.6.2006, p. 30–34
(ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV) Dan id-dokument ġie ppubblikat f’edizzjoni(jiet) speċjali
(BG, RO)
ĠU L 294M, 25.10.2006, p. 223–227
(MT)
No longer in force, Date of end of validity: 12/06/2008
25.10.2006 |
MT |
Il-Ġurnal Uffiċjali ta’ l-Unjoni Ewropea |
223 |
AZZJONI KONĠUNTA TAL-KUNSILL 2006/419/PESK
tat-12 ta’ Ġunju 2006
b'appoġġ għall-implementazzjoni tar-Riżoluzzjoni tal-Kunsill tas-Sigurtà 1540 (2004) tan-Nazzjonijiet Uniti u fil-qafas ta' l-implementazzjoni ta' l-Istrateġija ta' l-UE kontra l-Proliferazzjoni ta' Armi ta' Distruzzjoni Massiva
IL-KUNSILL TA' L-UNJONI EWROPEA,
Wara li kkunsidra t-Trattat dwar l-Unjoni Ewropea, u b'mod partikolari l-Artikolu 14 tiegħu,
Billi:
(1) |
Fit-12 ta' Diċembru 2003, il-Kunsill Ewropew adotta l-Istrateġija ta' l-UE kontra l-Proliferazzjoni ta' Armi ta' Distruzzjoni Massiva, li l-Kapitolu III tagħha fih lista ta' miżuri sabiex tiġi miġġielda tali proliferazzjoni li jeħtieġ li jittieħdu kemm fi ħdan l-UE kif ukoll f'pajjiżi terzi. |
(2) |
L-UE qiegħda attivament timplementa din l-Istrateġija u tagħti effett lill-miżuri elenkati fil-Kapitolu III tagħha, b'mod partikolari permezz tar-rilaxx ta' riżorsi finanzjarji b'sostenn għal proġetti speċifiċi mmexxijin minn istituzzjonijiet multilaterali, ta' l-għoti ta' għajnuna u kompetenza teknika lill-Istati li jeħtieġu firxa wiesgħa ta' miżuri ta' non-proliferazzjoni, u permezz tal-promozzjoni tar-rwol tal-Kunsill tas-Sigurtà tan-Nazzjonijiet Uniti (KSNU). |
(3) |
Fit-28 ta' April 2004, il-KSNU unanimament adotta r-Riżoluzzjoni 1540, li hija l-ewwel strument internazzjonali li jindirizza b'manjiera integrata u komprensiva l-armi ta' distruzzjoni massiva, il-mezzi kif jitwasslu u materjali relatati. Din tistabbilixxi obbligi li jorbtu lill-Istati kollha maħsubin sabiex jimpedixxu u jiskoraġġixxu lill-atturi li mhumiex Stati milli jkollhom aċċess għal tali armi u tali materjali relatati magħhom. |
(4) |
Ir-Riżoluzzjoni 1540 (2004) tal-KSNU issejjaħ lill-Istati sabiex jippreżentaw rapport lill-Kumitat tal-Kunsill tas-Sigurtà stabbilit mir-Riżoluzzjoni 1540 (2004) tal-KSNU (minn hawn 'il quddiem il-“Kumitat 1540”) dwar il-passi li ħadu jew li bi ħsiebhom jieħdu sabiex jimplementaw ir-Riżoluzzjoni. Konsegwentement, fit-28 ta' Ottubru 2004 il-Presidenza ppreżentat, f'isem l-UE, ir-Rapport ta' l-Unjoni Ewropea dwar l-implementazzjoni tar-Riżoluzzjoni 1540 (2004) tal-KSNU, waqt li l-Istati Membri ta' l-UE ppreżentaw ir-rapporti tagħhom individwalment. |
(5) |
L-UE wettqet manuvri diplomatiċi fi Stati terzi sabiex tippromwovi l-preżentazzjoni ta' rapporti nazzjonali taħt ir-Riżoluzzjoni 1540 (2004) tal-KSNU. It-tħejjija tar-rapporti nazzjonali teħtieġ sforz konsiderevoli u tagħrif tekniku f'isem dawn l-Istati. Għalhekk l-għajnuna teknika u l-iskambju ta' l-esperjenza miksuba mill-proċess ta' l-abbozzar ta' rapporti nazzjonali u mill-adozzjoni ta' miżuri sabiex tiġi implementata r-Riżoluzzjoni 1540 (2004) tal-KSNU jistgħu jikkontribwixxu direttament għal konformità ikbar ma' l-obbligu ta' rapportar skond ir-Riżoluzzjoni u għall-implementazzjoni effettiva tagħha. |
(6) |
Fis-27 ta' April 2006, il-Kunsill tas-Sigurtà tan-NU unanimament adotta r-Riżoluzzjoni 1673 (2006), li estendiet il-mandat tal-Kumitat 1540 għal perjodu ta' sentejn u ddeċidiet li l-Kumitat għandu jintensifika l-isforzi tiegħu sabiex jippromwovi l-implementazzjoni sħiħa tar-Riżoluzzjoni 1540 (2004) tal-KSNU permezz ta' programm ta' ħidma, komunikazzjoni, għajnuna u koperazzjoni. Il-Kumitat 1540 ġie mistieden ukoll mill-Kunsill tas-Sigurtà sabiex jistudja ma' l-Istati u ma' organizzazzjonijiet internazzjonali, reġjonali u sub-reġjonali l-possibbiltà ta' l-iskambju ta' l-esperjenzi miksuba, inklużi dawk li kienu istruttivi, u d-disponibbiltà tal-programmi li jistgħu jiffaċilitaw l-implementazzjoni tar-Riżoluzzjoni 1540 (2004) tal-KSNU. |
(7) |
Ir-Rapport tal-Kumitat 1540 rrakkomanda li l-attivitajiet ta' komunikazzjoni reġjonali u sub-reġjonali jitwessgħu u jiġu intensifikati bil-ħsieb li tingħata lill-Istati, b'manjiera strutturata, gwida għall-implementazzjoni ta' l-obbligi skond ir-Riżoluzzjoni 1540 (2004) tal-Kunsill tas-Sigurtà tan-NU, b'kont meħud tal-fatt li tnejn u sittin Stat għadhom meħtieġa jippreżentaw l-ewwel rapport nazzjonali tiegħu u ħamsa u ħamsin Stat li ppreżentaw l-ewwel rapport nazzjonali tagħhom għadhom meħtieġa jippreżentaw aktar informazzjoni u kjarifika mitluba mill-Kumitat 1540. |
(8) |
Ir-Rapport tal-Kumitat 1540 ikkonkluda wkoll li barra l-Istati li ma ppreżentawx, tnejn u tletin Stat fir-rapporti nazzjonali tagħhom talbu l-għajnuna għall-implementazzjoni tar-Riżoluzzjoni 1540 (2004) tal-KSNU. |
(9) |
Fid-9 ta' Ġunju 2004, il-Kunsill tas-Sigurtà inkariga lid-Dipartiment għall-Affarijiet tad-Diżarm tan-NU (Segretarjat tan-NU) bil-kompitu li jipprovdi sostenn sostantiv u loġistiku lill-Kumitat 1540 u lill-esperti tiegħu. |
(10) |
Il-Ftehim Kwadru Finanzjarju u Amministrattiv, konkluż bejn il-Komunità Ewropea, minn naħa waħda, u n-NU, min-naħa l-oħra, jistabbilixxi qafas għan-NU u l-Komunità Ewropea sabiex isaħħu l-koperazzjoni bejniethom, inkluża sħubija programmatika. Dan il-Ftehim Kwadru għandu jiġi implementat mill-ftehim speċifiku għall-kontributi, kif speċifikat f'din l-Azzjoni Konġunta. |
(11) |
Il-Kummissjoni hija fdata bis-superviżjoni ta' l-implementazzjoni korretta tal-kontribut finanzjarju ta' l-UE, |
ADOTTA DIN L-AZZJONI KONĠUNTA:
Artikolu 1
1. Konformement ma' l-Istrateġija ta' l-UE kontra l-Proliferazzjoni ta' Armi ta' Distruzzjoni Massiva, li tistabbilixxi l-objettiv tal-promozzjoni tar-rwol tal-Kunsill tas-Sigurtà tan-NU u tat-tisħiħ tal-kompetenzi tagħha sabiex tiffaċċja l-isfidi tal-proliferazzjoni, l-UE għandha ssostni l-implementazzjoni tar-Riżoluzzjoni 1540 (2004) tal-KSNU.
2. Il-proġetti li jsostnu r-Riżoluzzjoni 1540 (2004) tal-KSNU, korrispondenti għall-miżuri ta' l-Istrateġija ta' l-UE, għandhom l-għan li:
— |
tiġi sensibilizzata l-opinjoni pubblika dwar il-ħtiġijiet relatati mar-Riżoluzzjoni 1540 (2004) tal-KSNU u l-importanza ta' dan l-istrument internazzjonali ta' non-proliferazzjoni, |
— |
jingħata kontribut għat-tisħiħ tal-kapaċitajiet ta' l-amministrazzjonijiet nazzjonali ta' Stati terzi fi tliet reġjuni (l-Asja-Paċifiku, l-Afrika u l-Amerika Latina-Karibew) fl-abbozzar ta' rapporti nazzjonali dwar l-implementazzjoni tar-Riżoluzzjoni 1540 (2004) tal-KSNU. |
Fl-Anness tinsab deskrizzjoni dettaljata tal-proġetti.
Artikolu 2
1. Il-Presidenza, megħjuna mis-Segretarju-Ġenerali tal-Kunsill/Rappreżentant Għoli għall-PESK, għandha tkun responsabbli għall-implementazzjoni ta' din l-Azzjoni Konġunta. Il-Kummissjoni għandha tkun assoċjata b'mod sħiħ.
2. Il-Kummissjoni għandha tissorvelja l-implementazzjoni korretta tal-kontribut finanzjarju msemmi fl-Artikolu 3.
3. L-implementazzjoni teknika tal-proġetti msemmija fl-Artikolu 1(2) għandha tkun fdata f'idejn is-Segretarjat tan-NU (Dipartiment għall-Affarijiet tad-Diżarm) (minn hawn 'il quddiem is-Segretarjat tan-NU (DAD)). F'din il-kapaċità, dan għandu jwettaq dan l-inkarigu taħt ir-responsabbiltà tal-Presidenza u taħt il-kontroll tas-SĠ/RGħ. Għal dan l-iskop, is-SĠ/RGħ għandu jidħol fl-arranġamenti meħtieġa mas-Segretarjat tan-NU (DAD).
Artikolu 3
1. L-ammont finanzjarju ta' referenza għall-implementazzjoni tal-proġetti msemmija fl-Artikolu 1(2) għandu jkun ta' EUR 195 000.
2. L-amministrazzjoni tan-nefqa ffinanzjata mill-budget ġenerali ta' l-Unjoni Ewropea speċifikata fil-paragrafu 1 għandha tkun suġġetta għall-proċeduri u r-regoli tal-Komunità li japplikaw għall-affarijiet tal-budget bil-kondizzjoni li kwalunkwe pre-finanzjament m'għandux jibqa' l-proprjetà tal-Komunità.
3. Għall-fini ta' l-implementazzjoni tan-nefqa msemmija fil-paragrafu 1, il-Kummissjoni għandha tikkonkludi ftehim speċifiku għall-kontributi mas-Segretarjat tan-NU (DAD) skond ir-Regolamenti u r-Regoli ta' l-Organizzazzjoni. Dan għandu jistipula li s-Segretarjat tan-NU (DAD) għandu jiżgura l-viżibbiltà tal-kontribut ta' l-UE, b'mod adatt għad-daqs tiegħu.
Artikolu 4
Il-Presidenza, megħjuna mis-Segretarjat-Ġenerali tal-Kunsill/Rappreżentant Għoli għall-PESK, għandha tirrapporta lill-Kunsill dwar l-implementazzjoni ta' din l-Azzjoni Konġunta abbażi ta' rapporti regolari mħejjija mis-Segretarjat tan-NU (DAD). Il-Kummissjoni għandha tkun assoċjata b'mod sħiħ u għandha tipprovdi informazzjoni dwar l-aspetti finanzjarji ta' l-implementazzjoni tal-proġett imsemmi fl-Artikolu 1(2).
Artikolu 5
Din l-Azzjoni Konġunta għandha tidħol fis-seħħ fil-jum ta' l-adozzjoni tagħha.
Hija għandha tiskadi fit-12 ta’ Ġunju 2008.
Artikolu 6
Din l-Azzjoni Konġunta għandha tiġi pubblikata fil-Ġurnal Uffiċjali ta' l-Unjoni Ewropea.
Magħmul fil-Lussemburgu, nhar it-12 ta’ Ġunju 2006.
Għall-Kunsill
Il-President
U. PLASSNIK
ANNESS
SOSTENN MILL-UE GĦALL-IMPLEMENTAZZJONI TAR-RIŻOLUZZJONI 1540 (2004) TAL-KUNSILL TAS-SIGURTÀ TAN-NAZZJONIJIET UNITI
1. Deskrizzjoni
Fit-28 ta' April 2004, il-Kunsill tas-Sigurtà tan-Nazzjonijiet Uniti unanimament adotta r-Riżoluzzjoni 1540 bħala l-ewwel strument internazzjonali li jindirizza b'manjiera integrata u komprensiva l-armi ta' distruzzjoni massiva, il-mezzi kif jitwasslu u l-materjali relatati. L-Istati Membri kollha ta' l-UE kienu jaqblu bil-qawwa ma' dan l-istrument ta' non-proliferazzjoni. Ir-Riżoluzzjoni pprevediet l-istabbiliment tal-Kumitat tal-Kunsill tas-Sigurtà li ġie fdat sabiex jirrapporta lill-Kunsill tas-Sigurtà dwar l-implementazzjoni tar-Riżoluzzjoni billi jieħu minn rapporti nazzjonali. Ir-rapporti nazzjonali għandhom ikopru l-passi li l-Istati ħadu jew bi ħsiebhom jieħdu sabiex jimplementaw ir-Riżoluzzjoni.
L-UE wettqet manuvri diplomatiċi fi Stati terzi sabiex tippromwovi l-preżentazzjoni ta' rapporti nazzjonali skond ir-Riżoluzzjoni 1540 (2004) tal-KSNU. Dik ir-Riżoluzzjoni tirrikonoxxi li xi Stati jistgħu jeħtieġu l-għajnuna fl-implementazzjoni tad-dispożizzjonijiet tagħha. Għalhekk l-għajnuna teknika u l-iskambju ta' l-esperjenza miksuba mill-proċess ta' l-abbozzar ta' rapporti nazzjonali u mill-adozzjoni ta' miżuri sabiex tiġi implementata r-Riżoluzzjoni 1540 (2004) tal-KSNU jistgħu jikkontribwixxu direttament għal konformità ikbar ma' l-obbligu ta' rapportar skond ir-Riżoluzzjoni 1540 (2004) tal-KSNU u ma' l-implementazzjoni effettiva tagħha.
Fis-27 ta' April 2006, il-Kunsill tas-Sigurtà tan-NU unanimament adotta r-Riżoluzzjoni 1673 (2006) tal-KSNU, li ddeċidiet li l-Kumitat 1540 għandu jintensifika l-isforzi tiegħu sabiex jippromwovi l-implementazzjoni sħiħa tar-Riżoluzzjoni 1540 (2004) tal-KSNU anke permezz ta' komunikazzjoni, għajnuna u koperazzjoni. Fir-Rapport tiegħu ta' April 2006, il-Kumitat 1540 ikkonkluda li billi tnejn u sittin Stat li għadhom meħtieġa jippreżentaw l-ewwel rapport nazzjonali tagħhom u ħamsa u ħamsin Stat li, minkejja li għamlu dan, għadhom meħtieġa jippreżentaw aktar informazzjoni u kjarifika huma kkonċentrati fi tliet żoni ġeografiċi (l-Afrika, il-Karibew u n-Nofsinhar tal-Paċifiku), u billi n-nuqqasijiet fir-rapporti nazzjonali jsegwu ċerti karatteristiċi reġjonali, l-attivitajiet ta' għajnuna lill-Istati sabiex jissodisfaw il-ħtiġijiet ta' l-implementazzjoni tar-Riżoluzzjoni 1540 (2004) tal-KSNU għandhom jikkonċentraw fuq ir-reġjuni u ż-żoni fejn ġew identifikati bżonnijiet speċifiċi.
2. Deskrizzjoni tal-Proġetti
Il-proġetti b'appoġġ ta' l-implementazzjoni tar-Riżoluzzjoni 1540 (2004) tal-KSNU jimmiraw li jindirizzaw tlitt aspetti ta' l-implementazzjoni - li tiġi sensibilizzata l-opinjoni pubblika dwar il-ħtiġijiet u l-obbligi taħt ir-Riżoluzzjoni, li jingħata kontribut għat-tisħiħ tal-kapaċitajiet nazzjonali fit-tliet reġjuni indikati (l-Afrika, l-Amerika Latina u l-Karibew, l-Asja-Paċifiku) fl-abbozzar ta' rapporti nazzjonali dwar l-implementazzjoni tar-Riżoluzzjoni 1540 (2004) tal-KSNU u fl-iskambju ta' l-esperjenza mill-adozzjoni tal-miżuri nazzjonali meħtieġa għall-implementazzjoni tar-Riżoluzzjoni.
Il-proġetti għandhom jieħdu kont tal-konklużjonijiet u r-rakkomandazzjonijiet tar-Rapport tal-Kumitat tal-Kunsill tas-Sigurtà stabbilit skond ir-Riżoluzzjoni 1540 (2004) tal-KSNU, partikolarment fir-rigward tal-bżonnijiet reġjonali u n-nuqqasijiet fl-implementazzjoni tar-Riżoluzzjoni kif ukoll il-ħtieġa ta' xi Stati għall-għajnuna teknika, kif ikun applikabbli. Id-dikjarazzjoni uffiċjali ta' interess li tiġi ospitata l-attività ta' komunikazzjoni f'wieħed mir-reġjuni mmirati fil-Kumitat tal-Kunsill tas-Sigurtà għandha titqies bħala l-pre-kondizzjoni għas-sostenn mill-UE.
Il-proġett li jkopri l-Asja - Paċifiku
Il-Proġett jikkonsisti primarjament fl-organizzazzjoni ta' attività ta' komunikazzjoni, fil-forma ta' seminar, li jissensibilizza l-opinjoni pubblika dwar l-obbligi taħt ir-Riżoluzzjoni 1540 (2004) tal-KSNU u li jikkontribwixxi għat-tisħiħ tal-kapaċitajiet nazzjonali sabiex tiġi implementata r-Riżoluzzjoni fl-Istati mmirati. Is-seminar jista' jirriżulta fl-identifikazzjoni tal-bżonnijiet ta' għajnuna, li jistgħu jkomplu jiġu indirizzati minn inizjattivi futuri ta' l-UE fil-qasam ta' l-għajnuna teknika. Fl-Istati benefiċjarji, għandha tingħata l-aktar attenzjoni għall-parteċipanti fil-livell tat-tfassil tal-politika. L-aġenda ta' l-attività ta' komunikazzjoni għandha tirrifletti l-partikolaritajiet reġjonali fl-implementazzjoni tar-Riżoluzzjoni 1540 (2004) tal-KSNU u għandha tirrispetta l-objettivi ġenerali ta' l-Azzjoni Konġunta.
Fil-Kumitat tal-Kunsill tas-Sigurtà, iċ-Ċina indikat interess li tospita, dejjem fl-ewwel nofs ta' l-2006, seminar reġjonali dwar l-implementazzjoni tar-Riżoluzzjoni 1540 (2004) tal-KSNU b'attenzjoni speċjali fuq kontrolli fuq l-esportazzjoni.
Il-proġett li jkopri l-Afrika
Il-Proġett jikkonsisti primarjament fl-organizzazzjoni ta' attività ta' komunikazzjoni, fil-forma ta' seminar, li jissensibilizza l-opinjoni pubblika dwar l-obbligi taħt ir-Riżoluzzjoni 1540 (2004) tal-KSNU u jikkontribwixxi għat-tisħiħ tal-kapaċitajiet nazzjonali sabiex tiġi implementata r-Riżoluzzjoni fl-Istati indikati. Is-seminar jista' jirriżulta fl-identifikazzjoni tal-bżonnijiet ta' għajnuna, li jistgħu jkomplu jiġu indirizzati minn inizjattivi futuri ta' l-UE fil-qasam ta' l-għajnuna teknika. Fl-Istati benefiċjarji, għandha tingħata l-aktar attenzjoni għall-parteċipanti fil-livell tat-tfassil tal-politika. L-aġenda ta' l-attività ta' komunikazzjoni għandha tirrifletti l-partikolaritajiet reġjonali fl-implementazzjoni tar-Riżoluzzjoni 1540 (2004) tal-KSNU u għandha tirrispetta l-objettivi ġenerali ta' l-Azzjoni Konġunta.
Il-Ghana qieset b'mod pożittiv talba mill-Kumitat tal-Kunsill tas-Sigurtà sabiex tospita seminar reġjonali dwar l-implementazzjoni tar-Riżoluzzjoni 1540 (2004) tal-KSNU, l-aktar kmieni sa tmiem is-sena 2006.
Il-proġett li jkopri l-Amerika Latina u l-Karibew
Il-Proġett jikkonsisti l-aktar fl-organizzazzjoni ta' attività ta' komunikazzjoni, fil-forma ta' seminar, li jissensibilizza l-opinjoni pubblika dwar l-obbligi taħt ir-Riżoluzzjoni 1540 (2004) tal-KSNU u jikkontribwixxi għat-tisħiħ tal-kapaċitajiet nazzjonali sabiex tiġi implementata r-Riżoluzzjoni 1540 (2004) tal-KSNU fl-Istati mmirati. Is-seminar jista' jirriżulta fl-identifikazzjoni tal-bżonnijiet ta' għajnuna, li jistgħu jkomplu jiġu ttrattati minn inizjattiva futura ta' l-UE fil-qasam ta' l-għajnuna teknika. Fl-Istati benefiċjarji, għandha tingħata l-aktar attenzjoni għall-parteċipanti fil-livell tat-tfassil tal-politika. L-aġenda ta' l-attività ta' komunikazzjoni għandha tirrifletti l-partikolaritajiet reġjonali fl-implementazzjoni tar-Riżoluzzjoni 1540 (2004) tal-KSNU u għandha tirrispetta l-objettivi ġenerali ta' l-Azzjoni Konġunta.
Il-Perù stqarr li huwa lest li jorganizza seminar reġjonali dwar l-implementazzjoni tar-Riżoluzzjoni 1540 (2004) tal-KSNU sa tmiem l-2006.
Ir-riżultati tal-proġetti:
— |
aktar sensibilizzazzjoni ta' l-opinjoni pubblika fost l-Istati u r-reġjuni indikati dwar l-obbligi tagħhom skond ir-Riżoluzzjoni 1540 (2004) tal-KSNU u dwar il-possibbiltajiet għal għajnuna teknika; |
— |
kontribut għat-tisħiħ tal-kapaċitajiet amministrattivi nazzjonali fl-Istati u r-reġjuni mmirati li jirrapportaw dwar l-implementazzjoni tar-Riżoluzzjoni 1540 (2004) tal-KSNU; |
— |
rapport dwar sommarju tal-proċedimenti ta' l-attivitajiet ta' komunikazzjoni, eż. seminars u dokument ta' valutazzjoni dwar il-bżonnijiet ta' għajnuna teknika. |
3. Tul ta' żmien
It-tul ta' żmien totali tal-proġetti hu stmat li jkun ta' 24 xahar.
4. Benefiċjarji
Il-benefiċjarji tas-seminar ikunu primarjament l-Istati tat-tliet reġjuni mmirati li ma jkunux ippreżentaw ir-rapporti nazzjonali tagħhom dwar l-implementazzjoni tar-Riżoluzzjoni 1540 (2004) tal-KSNU. L-Istati li jkunu diġà ssodisfaw l-obbligu tagħhom tar-rapportar taħt ir-Riżoluzzjoni iżda ma ppreżentawx aktar informazzjoni jew kjarifiki kif mitluba mill-Kumitat tal-Kunsill tas-Sigurtà għandhom ukoll ikunu mmirati.
L-għażla finali tal-benefiċjarji ser issir mill-Presidenza megħjuna mis-Segretarju Ġenerali/Rappreżentant Għoli permezz tar-Rappreżentant Personali tiegħu għan-non-proliferazzjoni ta' Armi ta' Distruzzjoni Massiva, li jaġixxi fuq proposti mill-entità ta' l-implementazzjoni skond l-Artikolu 2(3) ta' din l-Azzjoni Konġunta.
Id-donaturi potenzjali, kemm reġjonali kif ukoll mhux reġjonali, ta' għajnuna teknika kif ukoll l-organizzazzjonijiet relevanti internazzjonali, reġjonali u sub-reġjonali ser ikunu wkoll mistiedna jattendu.
5. L-entità ta' implementazzjoni
Is-Segretarjat tan-NU (Dipartiment għall-Affarijiet tad-Diżarm) ser ikun fdat bl-implementazzjoni teknika tal-proġetti, fil-qafas tal-koordinazzjoni politika mis-Segretarju Ġenerali/Rappreżentant Għoli permezz tar-Rappreżentant Personali tiegħu għan-non-proliferazzjoni ta' Armi ta' Distruzzjoni Massiva. Is-Segretarjat tan-NU (DAD) ser jiffirma ftehim ta' Sostenn tan-Nazzjon Ospitanti ma' l-Istati li jiġu identifikati bħala Stati ospitanti. L-Istat ospitanti jipparteċipa fl-implementazzjoni tal-proġett. L-akkwist ta' kwalunkwe prodotti, xogħlijiet jew servizzi mis-Segretarjat tan-NU (DAD) mill-Istati ospitanti fil-kuntest ta' din l-Azzjoni Konġunta jitwettaq skond ir-regoli u l-proċeduri applikabbli tan-NU, kif spjegat fid-dettall fil-ftehim speċifiku għall-kontributi ta' l-UE mas-Segretarjat tan-NU (DAD).
6. Stima tal-kontribut finanzjarju ta' l-UE
Il-proġetti huma ko-finanzjati mill-UE u donaturi oħrajn. L-UE għandha tiffoka fuq infiq relatat mal-parteċipazzjoni ta' Stati mmirati fis-seminars, ma' l-ispejjeż tal-konferenzi u ma' l-ispejjeż għall-esperti. L-infiq mill-organizzazzjonijiet relevanti reġjonali u sub-reġjonali jista' wkoll ikun kopert, sa fejn dan ikun relatat direttament mal-parteċipazzjoni fi, u l-organizzazzjoni ta', attivitajiet taħt il-proġetti. Is-Segretarjat tan-NU (DAD) ser ikun responsabbli għall-koordinazzjoni ġenerali tal-kontributi minn donaturi oħrajn, li ser jiffinanzjaw l-ispejjeż li jifdal tal-proġetti. Xi donaturi jistgħu jikkontribwixxu għall-implementazzjoni tal-proġett direttament lill-pajjiż ospitanti. L-ispiża totali tal-kontribut ta' l-UE għall-implementazzjoni tal-proġetti fl-Asja-Paċifiku, fl-Afrika u fl-Amerika Latina u l-Karibew hija stmata għal EUR 195 000. Jistgħu jsiru trasferimenti ta' kontributi bejn proġetti jekk ikunu ġustifikati minn ħtiġijiet speċifiċi fir-reġjuni magħżula.
Barra minn dan, hija inkluża riżerva ta' kontinġenza ta' madwar 3 % ta' l-ispejjeż eliġibbli (għal ammont totali ta' EUR 3 395) għal spejjez mhux previsti.
7. L-ammont finanzjarju ta' referenza sabiex tiġi koperta l-ispiża tal-proġetti
L-ispiża totali tal-proġetti hija ta' EUR 195 000.