(1)

Le blianta beaga anuas, bhí sé mar threoir ag an Aontas iomaíochas agus athléimneacht an gheilleagair Eorpaigh a neartú tríd an gclaochlú glas agus tríd an gclaochlú digiteach. Leis an aistriú glas agus leis an aistriú digiteach, atá fréamhaithe sa Chomhaontú Glas don Eoraip, a leagtar amach i dteachtaireacht ón gCoimisiún an 11 Nollaig 2019 dar teideal The European Green Deal [An Comhaontú Glas don Eoraip], agus Clár Beartais 2030 don Deacáid Dhigiteach a bunaíodh le Cinneadh (AE) 2022/2481 ó Pharlaimint na hEorpa agus ón gComhairle (4), spreagtar fás agus nuachóiriú gheilleagar an Aontais, rud a chuireann deiseanna nua gnó ar fáil agus a chuidíonn leis an Aontas buntáiste iomaíoch a fháil ar na margaí domhanda. Sa Chomhaontú Glas don Eoraip, leagtar amach an treochlár chun geilleagar an Aontais a dhéanamh aeráidneodrach agus inbhuanaithe ar bhealach cothrom agus cuimsitheach, agus aghaidh á tabhairt ar na dúshláin a bhaineann leis an aeráid agus leis an gcomhshaol. Leagtar amach i gClár Beartais 2030 don Deacáid Dhigiteach treo soiléir maidir le claochlú digiteach an Aontais agus maidir le spriocanna digiteacha a bhaint amach ar leibhéal an Aontais faoi 2030, go háirithe maidir le scileanna digiteacha, bonneagair dhigiteacha, agus claochlú digiteach gnóthaí agus seirbhísí poiblí.

(2)

Tá sé cruthaithe ag tionscal an Aontais go bhfuil athléimneacht ionsuite aige ach ní mór a iomaíochas a áirithiú amach anseo freisin. Tá boilsciú ard, ganntanas saothair, suaitheadh sa slabhra soláthair tar éis COVID, cogadh foghach na Rúise i gcoinne na hÚcráine, ardú rátaí úis, agus méaduithe ar chostais fuinnimh agus ar phraghsanna ionchuir ag cur isteach go mór ar iomaíochas thionscal an Aontais agus thug siad chun suntais a thábhachtaí atá sé don Aontas a uathriail straitéiseach oscailte a dhaingniú agus a spleáchas straitéiseach ar thríú tíortha in earnálacha éagsúla a laghdú. Anuas ar na brúnna sin ar thionscal an Aontais, bíonn an iomaíocht ar an margadh domhanda ilroinnte láidir, ach ní bhíonn sí cothrom i gcónaí. Tá roinnt tionscnamh seolta ag an Aontas cheana féin chun tacú lena thionscal, amhail Plean Tionsclaíoch an Chomhaontaithe Ghlais, a leagtar amach i dteachtaireacht ón gCoimisiún an 1 Feabhra 2023 dar teideal ‘Plean Tionsclaíoch an Chomhaontaithe Ghlais don Ré Ghlan-Nialasach’, Rialachán ó Pharlaimint na hEorpa agus ón gComhairle lena mbunaítear creat chun soláthar slán inbhuanaithe amhábhar criticiúil a áirithiú (‘an Gníomh um Amhábhair Chriticiúla’), Rialachán ó Pharlaimint na hEorpa agus ón gComhairle maidir le creat beart a bhunú chun éiceachóras monaraíochta teicneolaíochta glan-nialasachta na hEorpa a neartú (‘an Gníomh um an Tionscal Glan-nialasachta’), an Creat nua Sealadach Géarchéime agus Aistrithe le haghaidh bearta státchabhrach, a leagtar amach i dteachtaireacht ón gCoimisiún an 17 Márta 2023 dar teideal ‘Creat Sealadach Géarchéime agus Aistrithe le haghaidh bearta státchabhrach chun tacú leis an ngeilleagar tar éis ionsaí na Rúise in aghaidh na hÚcráine’, Ionstraim Théarnaimh an Aontais Eorpaigh a bunaíodh le Rialachán (AE) 2020/2094 ón gComhairle (5) agus Rialachán (AE) 2023/435 ó Pharlaimint na hEorpa agus ón gComhairle (6). Cé go soláthraítear leis na réitigh sin tacaíocht thapa spriocdhírithe agus, i gcásanna áirithe, tacaíocht shealadach, teastaíonn ón Aontas freagairt níos struchtúrtha a thabhairt ar riachtanais infheistíochta a chuid tionscal, comhtháthú a choimirciú, poist ardcháilíochta a chruthú, agus cothrom na Féinne a chaomhnú sa mhargadh inmheánach, agus rochtain ar chistiú á héascú ag an am céanna. Ba cheart don Aontas oibriú chun athlonnú a chosc, chun saoráidí táirgthe teicneolaíochtaí criticiúla a aistriú ar ais ó thríú tíortha, agus chun saoráidí nua a mhealladh chun spleáchais straitéiseacha a chosc.

(3)

Thug an margadh inmheánach buntáistí suntasacha eacnamaíocha, sóisialta agus polaitiúla don Aontas ina iomláine, lena n-áirítear dá shaoránaigh agus dá ghnóthaí. Cé go n-aithnítear go forleathan na tairbhí sin, tá sé ríthábhachtach leanúint de réitigh a fháil chun leas breise a bhaint as a acmhainneacht shochaíoch neamhshaothraithe. Ní mór don mhargadh inmheánach leanúint de bheith inoiriúnaithe i bhfianaise dinimic gheopholaitiúil atá ag teacht chun cinn, dul chun cinn teicneolaíoch, agus an aistrithe ghlais agus dhigitigh, agus ag an am céanna athléimneacht na gcóras sláinte a chothú i bhfianaise daonra atá ag dul in aois agus rannchuidiú le hiomaíochas agus táirgiúlacht fhadtéarmach an Aontais a fheabhsú.

(4)

Beidh imscaradh agus méadú san Aontas ar theicneolaíochtaí digiteacha agus nuálaíocht domhainteicneolaíochta, teicneolaíochtaí atá glan agus tíosach ar acmhainní, agus bith-theicneolaíochtaí bunriachtanach chun spleáchais straitéiseacha an Aontais a laghdú, agus chun na deiseanna a bhaineann leis an aistriú glas agus leis an aistriú digiteach a thapú agus chun cuspóirí an aistrithe ghlais agus an aistrithe dhigitigh a bhaint amach, lena n-áiritheofar ceannasacht agus uathriail straitéiseach an Aontais agus lena ndéanfar iomaíochas agus inbhuanaitheacht thionscal an Aontais a chur chun cinn. Dá bhrí sin, is gá gníomhú láithreach chun tacú le teicneolaíochtaí criticiúla a fhorbairt agus a mhonarú san Aontas, teicneolaíochtaí arb iad na príomheasnaimh straitéiseacha atá ar an Aontas iad. Trí theicneolaíochtaí criticiúla a fhorbairt agus a mhonarú, cuirtear le slabhraí luacha na ngníomhaithe eacnamaíocha idirnasctha, atá ag feidhmiú ar fud gnólachtaí de mhéideanna éagsúla, lena n-áirítear fiontair bheaga agus mheánmhéide (FBManna), earnálacha agus teorainneacha. Dá bhrí sin, ba cheart don Aontas slabhraí luacha na dteicneolaíochtaí criticiúla sin agus a seirbhísí gaolmhara atá criticiúil agus sonrach do ghníomhaíochtaí forbartha nó monaraíochta na dteicneolaíochtaí criticiúla sin a choimirciú agus a neartú, agus ar an gcaoi sin spleáchais straitéiseacha an Aontais a laghdú, agus sláine an mhargaidh inmheánaigh a chaomhnú, agus ba cheart dó aghaidh a thabhairt ar ghanntanais saothair agus scileanna atá ann cheana sna hearnálacha sin trí thionscadail foghlama ar feadh an tsaoil, oideachais agus oiliúna agus trí phrintíseachtaí agus trí phoist tharraingteacha ardcháilíochta atá inrochtana do chách a chruthú.

(5)

Chun cáiliú mar theicneolaíochtaí criticiúla, ba cheart a cheangal ar theicneolaíochtaí gné nuálach a bhfuil acmhainneacht shuntasach aici a thabhairt chuig an margadh inmheánach, nó rannchuidiú le spleáchais straitéiseacha an Aontais a laghdú nó a chosc. Agus measúnú á dhéanamh ar acmhainneacht eacnamaíoch na dteicneolaíochtaí criticiúla sa mhargadh inmheánach, ba cheart a chur i gcuntas go bhféadfadh éifeachtaí iarmharta a bheith ag bearta a dhéantar i mBallstát aonair. Agus measúnú á dhéanamh i dtaobh an rannchuidíonn teicneolaíocht le spleáchais straitéiseacha an Aontais a laghdú nó a chosc, ba cheart an anailís a dhéantar ar leibhéal an Aontais a chur i gcuntas chun na rioscaí a shainaithint a bhféadfadh éifeachtaí a bheith acu ar an Aontas ar fad. Ba cheart don Choimisiún treoir a eisiúint maidir leis an gcaoi a bhféadfaí a mheas gur teicneolaíochtaí criticiúla iad na teicneolaíochtaí sna trí earnáil faoi raon feidhme an Rialacháin seo, agus maidir leis na coinníollacha ar a mbonn is féidir leis na teicneolaíochtaí sin cáiliú mar theicneolaíochtaí criticiúla, chun léirmhíniú coiteann a chur chun cinn ar na tionscadail, na cuideachtaí agus na hearnálacha a bhfuil tacaíocht le tabhairt dóibh faoi na cláir ábhartha i bhfianaise chomhchuspóirí straitéiseacha na gclár ábhartha agus an Rialacháin seo. Sa treoir sin, ba cheart don Choimisiún soiléiriú a thabhairt chomh maith ar choincheap an tslabhra luacha agus na seirbhísí gaolmhara atá criticiúil le haghaidh fhorbairt nó mhonarú na dtáirgí deiridh agus a bhaineann go sonrach leo. Ba cheart an treoir sin a bheith gan dochar do threoracha eile maidir le cláir shonracha.

(6)

Is gá tacú le teicneolaíochtaí criticiúla sna hearnálacha seo a leanas: teicneolaíochtaí digiteacha agus nuálaíocht domhainteicneolaíochta, teicneolaíochtaí atá glan agus tíosach ar acmhainní, agus bith-theicneolaíochtaí. Ba cheart nuálaíocht domhainteicneolaíochta a thuiscint mar nuálaíochtaí a bhfuil sé d’acmhainn acu réitigh chlaochlaitheacha a sholáthar, atá fréamhaithe san eolaíocht cheannródaíoch, sa teicneolaíocht cheannródaíoch agus san innealtóireacht cheannródaíoch, lena n-áirítear nuálaíocht lena gcomhcheanglaítear dul chun cinn sna réimsí fisiceacha, bitheolaíocha agus digiteacha. Ba cheart a áireamh sna teicneolaíochtaí digiteacha, go háirithe, iad siúd a rannchuidíonn le spriocanna agus cuspóirí Chlár Beartais 2030 don Deacáid Dhigiteach, chomh maith le tionscadail ilnáisiúnta mar a shainmhínítear i gCinneadh (AE) 2022/2481. Ba cheart a áireamh le teicneolaíochtaí atá glan agus tíosach ar acmhainní, go háirithe, teicneolaíochtaí glan-nialasacha mar a shainmhínítear sa Ghníomh um an Tionscal Glan-nialasachta. Ba cheart bith-theicneolaíochtaí a thuiscint mar chur i bhfeidhm na heolaíochta agus na teicneolaíochta ar orgánaigh bheo, chomh maith le codanna, táirgí agus samhlacha díobh, chun ábhair bheo nó ábhair neamhbheo a athrú chun eolas, earraí agus seirbhísí a tháirgeadh, lena n-áirítear na teicneolaíochtaí dá dtagraítear sa sainmhíniú staidrimh ar bhith-theicneolaíocht atá ag an Eagraíocht um Chomhar agus Forbairt Eacnamaíochta, chomh maith le Liosta an Aontais de Chógais Leighis Chriticiúla dá dtagraítear i dteachtaireacht ón gCoimisiún an 24 Deireadh Fómhair 2023 dar teideal Addressing medicine shortages in the EU [Aghaidh a thabhairt ar ghanntanais cógas leighis san Aontas] agus a gcomhpháirteanna. Maidir le tionscadail a aithnítear mar thionscadail straitéiseacha faoin nGníomh um an Tionscal Glan-nialasachta, i gcás ina gcomhlíonann na tionscadail sin na critéir maidir le hathléimneacht agus iomaíochas a shainmhínítear sa Ghníomh um an Tionscal Glan-nialasachta, agus faoin nGníomh um Amhábhair Chriticiúla, ba cheart a mheas go rannchuidíonn siad go huathoibríoch le cuspóirí an Rialacháin seo. Maidir le teicneolaíochtaí digiteacha agus nuálaíocht domhainteicneolaíochta, teicneolaíochtaí atá glan agus tíosach ar acmhainní agus bith-theicneolaíochtaí ar ábhar iad do thionscadal tábhachtach ar mhaithe le leas na hEorpa i gcoitinne (IPCEI) arna fhormheas ag an gCoimisiún de bhun Airteagal 107(3), pointe (b), den Chonradh ar Fheidhmiú an Aontais Eorpaigh (CFAE), ba cheart a mheas go bhfuil siad criticiúil, agus ba cheart tionscadail aonair faoi raon feidhme IPCEI den sórt sin a bheith incháilithe do chistiú, i gcomhréir le rialacha an chláir ábhartha, a mhéid nár cumhdaíodh go hiomlán fós an bhearna cistiúcháin a sainaithníodh agus na costais incháilithe.

(7)

Ní bheifear in ann acmhainneacht forbartha agus monaraíochta teicneolaíochtaí san Aontas a neartú gan lucht saothair oilte measartha mór. Mar sin féin, maidir le ganntanais saothair agus scileanna, a bhfuil méadú tagtha orthu i ngach earnáil, lena n-áirítear na hearnálacha sin a mheastar a bheith ríthábhachtach don aistriú glas agus don aistriú digiteach, meastar go dtiocfaidh méadú breise orthu i bhfianaise an athraithe dhéimeagrafaigh agus go gcuirfear ardú na dteicneolaíochtaí i mbaol sna hearnálacha a shainaithnítear sa Rialachán seo. Dá bhrí sin, is gá dlús a chur le rannpháirtíocht níos mó daoine i margadh saothair na n-earnálacha ábhartha, go háirithe trí infheistíochtaí san fhoghlaim agus san fhoghlaim ar feadh an tsaoil, trí scileanna ábhartha a fheabhsú agus trí phoist ardcháilíochta agus printíseachtaí ardcháilíochta a chruthú do dhaoine óga agus do dhaoine faoi mhíbhuntáiste nach bhfuil i mbun fostaíochta, oideachais ná oiliúna. Le tacaíocht den sórt sin, comhlánófar roinnt gníomhaíochtaí eile arb é is aidhm dóibh freastal ar na scileanna a eascraíonn as an aistriú glas agus an aistriú digiteach a leagtar amach i gClár Oibre Scileanna an Aontais a leagtar amach i dteachtaireacht ón gCoimisiún an 1 Iúil 2020 dar teideal European Skills Agenda for sustainable competitiveness, social fairness and resilience [Clár Oibre Scileanna don Eoraip don iomaíochas inbhuanaithe, don chothroime shóisialta agus don athléimneacht]. Tá ról tábhachtach ag na gníomhaíochtaí sin a mhéid a bhaineann le meon athscilithe agus uas-scilithe a chur chun cinn, borradh a chur faoi iomaíochas ghnóthais an Aontais, go háirithe FBManna, agus rannchuidiú le poist ardcháilíochta a chruthú d’fhonn acmhainneacht iomlán an aistrithe ghlais agus an aistrithe dhigitigh a bhaint amach ar bhealach atá cothrom, cuimsitheach agus cóir go sóisialta.

(8)

Mar gheall ar scála na hinfheistíochta is gá le haghaidh an aistrithe ghlais agus an aistrithe dhigitigh, is gá an cistiú atá ar fáil faoi chláir an Aontais atá ann cheana a shlógadh go hiomlán, lena n-áirítear na cinn sin lena ndeonaítear ráthaíocht bhuiséadach le haghaidh oibríochtaí maoiniúcháin agus infheistíochta agus cur chun feidhme ionstraimí airgeadais agus oibríochtaí measctha. Ba cheart cistiú den sórt sin a shlógadh ar bhealach níos solúbtha, chun tacaíocht thráthúil agus spriocdhírithe a thabhairt do theicneolaíochtaí criticiúla in earnálacha straitéiseacha. Dá bhrí sin, ba cheart Ardán Teicneolaíochtaí Straitéiseacha don Eoraip (STEP) a chur ar bun chun rannchuidiú le freagra a thabhairt ar riachtanais infheistíochta an Aontais trí chuidiú le cistí an Aontais atá ann cheana a dhíriú níos fearr i dtreo infheistíocht chriticiúil, lena n-áirítear i dtionscadail trasteorann agus uile-Aontais, arb é is aidhm di tacú le teicneolaíochtaí criticiúla a fhorbairt nó a mhonarú in earnálacha straitéiseacha, agus, ag an am céanna, cothrom na Féinne á chaomhnú sa mhargadh inmheánach, an comhtháthú á chaomhnú agus arb é is aidhm di dáileadh atá cothrom ó thaobh na geografaíochta de ar thionscadail arna maoiniú faoi STEP a bhaint amach i gcomhréir le sainorduithe na gclár faoi seach.

(9)

Agus cláir agus gníomhaíochtaí faoin Rialachán seo á gcur chun feidhme acu, moltar don Choimisiún agus do na Ballstáit tionscadail a chur chun cinn agus a chur in ord tosaíochta ar tionscadail iad i nGleannta Luasghéaraithe Glan-nialasacha mar a shainmhínítear sa Ghníomh um an Tionscal Glan-nialasachta, nó tionscadail i gcríocha a áirítear sa Phlean críochach um Aistriú Cóir dá dtagraítear i Rialachán (AE) 2021/1056 ó Pharlaimint na hEorpa agus ón gComhairle (7), agus i réigiúin bheagfhorbartha agus réigiúin trasdula, chomh maith le réigiúin níos forbartha i mBallstáit ar lú a meán-OTI per capita ná meán-OTI AE-27 arna thomhas de réir na gcaighdeán um chumhacht chun ceannaithe agus arna ríomh ar bhonn fhigiúirí an Aontais le haghaidh na tréimhse 2015 go 2017.

(10)

Le STEP, ba cheart acmhainní a shlógadh laistigh de chláir an Aontais atá ann cheana, lena n-áirítear InvestEU a bunaíodh le Rialachán (AE) 2021/523 ó Pharlaimint na hEorpa agus ón gComhairle (8), Fís Eorpach a bunaíodh le Rialachán (AE) 2021/695 ó Pharlaimint na hEorpa agus ón gComhairle (9), an Ciste Eorpach Cosanta a bunaíodh le Rialachán (AE) 2021/697 ó Pharlaimint na hEorpa agus ón gComhairle (10) agus an Ciste don Nuálaíocht a bunaíodh le Treoir 2003/87/CE ó Pharlaimint na hEorpa agus ón gComhairle (11), Ciste Forbraíochta Réigiúnaí na hEorpa (CFRE) agus an Ciste Comhtháthaithe a bunaíodh le Rialachán (AE) 2021/1058 ó Pharlaimint na hEorpa agus ón gComhairle (12), Ciste Sóisialta na hEorpa Plus (CSE+) a bunaíodh le Rialachán (AE) 2021/1057 ó Pharlaimint na hEorpa agus ón gComhairle (13),

an Ciste um Aistriú Cóir (CUAC) a bunaíodh le Rialachán (AE) 2021/1056 ó Pharlaimint na hEorpa agus ón gComhairle (14), an tSaoráid Téarnaimh agus Athléimneachta a bunaíodh le Rialachán (AE) 2021/241 ó Pharlaimint na hEorpa agus ón gComhairle (15), Clár EU4Health a bunaíodh le Rialachán (AE) 2021/522 ó Pharlaimint na hEorpa agus ón gComhairle (16), agus an Clár don Eoraip Dhigiteach a bunaíodh le Rialachán (AE) 2021/694 ó Pharlaimint na hEorpa agus ón gComhairle (17). Ba cheart cur leis na hacmhainní arna slógadh leis na cláir sin de chuid an Aontais trí chistiú breise EUR 1,5 billiún don Chiste Eorpach Cosanta le haghaidh tionscadail lena rannchuidítear le cuspóirí STEP.

(11)

Ba cheart Séala Ceannasachta a bhronnadh ar thionscadail lena rannchuidítear le cuspóirí STEP, ar choinníoll go ndearnadh measúnú ar an tionscadal agus go gcomhlíonann sé na híoscheanglais cháilíochta, go háirithe critéir incháilitheachta, eisiaimh agus dhámhachtana, dá bhforáiltear i nglaonna ar thograí faoin gclár Fís Eorpach, faoin gCiste Eorpach Cosanta, faoin gCiste don Nuálaíocht, faoi Chlár EU4Health nó faoin gClár don Eoraip Dhigiteach, gan beann ar cé acu atá nó nach bhfuil cistiú faighte ag an tionscadal faoi cheann de na hionstraimí sin. Bunaítear na híoscheanglais cháilíochta sin d’fhonn tionscadail ardcháilíochta a shainaithint. Ba cheart an Séala Ceannasachta a bhronnadh i gcomhréir leis na coinníollacha incháilitheachta sonracha a shainítear sna glaonna ar thograí faoi na cláir lena mbaineann, a bhféadfadh teorainneacha geografacha a bheith san áireamh iontu, más iomchuí agus má fhoráiltear dó sin sna gníomhartha reachtacha faoi seach lena rialaítear na cláir sin. Agus é ag ullmhú raon feidhme na nglaonna ar thograí a bhféadfaí Séala Ceannasachta a bhronnadh orthu, ba cheart don Choimisiún an ceanglas maidir le tograí tionscadail a áireamh, i gcás inarb iomchuí, chun a léiriú conas a mheastar go rannchuideoidh siad le líonraí áitiúla de ghníomhaithe tionsclaíocha a neartú agus a struchtúrú agus le cruthú post. Ba cheart na glaonna sin, i gcás inar féidir agus inarb iomchuí, a bheith oscailte go leanúnach. Ba cheart an Séala Ceannasachta a úsáid mar lipéad cáilíochta, chun cuidiú le tionscadail infheistíochtaí poiblí agus príobháideacha a mhealladh trína dheimhniú go rannchuidíonn siad le cuspóirí STEP. Ina theannta sin, ba cheart don Séala Ceannasachta rochtain níos fearr ar chistiú ón Aontas a chur chun cinn, go háirithe trí chistiú carnach nó comhcheangailte ó roinnt ionstraimí de chuid an Aontais a éascú. Ba cheart na Ballstáit a spreagadh freisin an Séala Ceannasachta a chur i gcuntas agus tacaíocht airgeadais á tabhairt acu trína gcláir féin.

(12)

Chuige sin, ba cheart a bheith in ann brath ar mheasúnuithe arna ndéanamh chun críoch clár eile de chuid an Aontais i gcomhréir le Rialachán (AE, Euratom) 2018/1046 ó Pharlaimint na hEorpa agus ón gComhairle (18), chun an t-ualach riaracháin ar thairbhithe chistí an Aontais a laghdú agus infheistíocht i dteicneolaíochtaí tosaíochta a spreagadh. Ar choinníoll go gcomhlíonann siad forálacha Rialachán (AE) 2021/241, ba cheart do na Ballstáit breithniú a dhéanamh ar thionscadail ar bronnadh an Séala Ceannasachta orthu a áireamh agus athbhreithniú á dhéanamh ar a bpleananna téarnaimh agus athléimneachta agus ba cheart é a bheith ar a gcumas bhreithniú a dhéanamh ar thionscadail a áireamh agus cinneadh á dhéanamh acu maidir le tionscadail infheistíochta atá le maoiniú as a sciar den Chiste don Nuachóiriú a bunaíodh de bhun Threoir 2003/87/CE. Ba cheart don Choimisiún an Séala Ceannasachta a chur i gcuntas freisin i gcomhthéacs an nós imeachta dá bhforáiltear in Airteagal 19 de Phrótacal Uimh. 5 ar Reacht an Bhainc Eorpaigh Infheistíochta atá i gceangal leis an gConradh ar an Aontas Eorpach (CAE) agus le CFAE (‘Reacht BEI’) agus i gcomhthéacs na seiceála beartais a leagtar síos i Rialachán (AE) 2021/523. Ina theannta sin, ba cheart a cheangal ar na comhpháirtithe cur chun feidhme scrúdú a dhéanamh ar thionscadail ar bronnadh an Séala Ceannasachta orthu i gcás ina dtagann siad faoina raon feidhme geografach agus gníomhaíochta i gcomhréir leis an Rialachán sin. Ba cheart d’údaráis atá i gceannas ar na cláir a thagann faoi raon feidhme an Rialacháin seo breithniú a dhéanamh ar thacaíocht a thabhairt do thionscadail straitéiseacha a aithnítear i gcomhréir leis an nGníomh um an Tionscal Glan-nialasachta agus leis an nGníomh Eorpach um Amhábhair Chriticiúla a thagann faoi raon feidhme an Rialacháin seo agus a bhféadfaí feidhm a bheith ag rialacha maidir le cistiú carnach ina leith.

(13)

Ba cheart STEP a chur chun feidhme ar bhealach éifeachtach, éifeachtúil, cothrom agus trédhearcach. Chuige sin, ba cheart é a chur de chúram ar an gCoimisiún an Séala Ceannasachta a bhronnadh agus a chur chun cinn, bainistiú a dhéanamh ar an suíomh gréasáin nua atá ar fáil go poiblí (‘an Tairseach Cheannasachta’) agus idirchaidreamh a dhéanamh le húdaráis inniúla náisiúnta agus le geallsealbhóirí atá ábhartha chun cuspóirí STEP a bhaint amach. Ba cheart don Choimisiún comhsheasmhacht, comhleanúnachas, sineirge agus comhlántacht a chur chun cinn freisin i measc chláir de chuid an Aontais chun tacú le tionscadail lena rannchuidítear le cuspóirí STEP.

(14)

Ba cheart don Choimisiún an Tairseach Cheannasachta a chur ar bun chun faisnéis maidir leis an tacaíocht atá ar fáil a thabhairt do thionscadail lena rannchuidítear le cuspóirí STEP. Chun aghaidh a thabhairt ar riachtanais na gcuideachtaí agus na dtionscnóirí tionscadail a bhfuil cistí á lorg acu do thionscadail STEP faoi chláir chistiúcháin an Aontais, ba cheart a thaispeáint ar an Tairseach Cheannasachta na deiseanna cistiúcháin le haghaidh infheistíochtaí STEP atá ar fáil faoi bhuiséad an Aontais ar bhealach inrochtana agus soláimhsithe don úsáideoir. Ba cheart a áireamh leis sin faisnéis faoi chláir de chuid an Aontais a bhainistítear go díreach, amhail Fís Eorpach, an Ciste Eorpach Cosanta, an Ciste don Nuálaíocht, Clár EU4Health, an Clár don Eoraip Dhigiteach agus foinsí cistiúcháin eile de chuid an Aontais, amhail InvestEU, an tSaoráid Téarnaimh agus Athléimneachta, CFRE, an Ciste Comhtháthaithe, CSE+ agus CUAC. Thairis sin, leis an Tairseach Cheannasachta, ba cheart infheictheacht infheistíochtaí STEP i leith infheisteoirí a mhéadú, trí na tionscadail ar bronnadh Séala Ceannasachta orthu a liostú. Ba cheart a liostú ar an Tairseach Cheannasachta freisin na húdaráis inniúla náisiúnta atá freagrach as gníomhú mar phointí teagmhála chun STEP a chur chun feidhme ar an leibhéal náisiúnta. Ba cheart don Choimisiún comhlántacht na Tairsí Ceannasachta le hardáin chomhchosúla a áirithiú agus ró-rialáil agus ualach riaracháin a sheachaint.

(15)

Ba cheart don Choimisiún faireachán a dhéanamh ar chur chun feidhme chuspóirí STEP chun an dul chun cinn i dtreo chuspóirí beartais an Aontais a rianú. Ba cheart an faireachán sin a dhéanamh ar bhealach atá spriocdhírithe agus comhréireach leis na gníomhaíochtaí a dhéantar faoi STEP chun ró-rialáil agus ualach riaracháin a sheachaint, go háirithe i gcás tairbhithe cistiúcháin. Chun cuntasacht a áirithiú do shaoránaigh an Aontais, ba cheart don Choimisiún tuarascáil bhliantúil a chur faoi bhráid Pharlaimint na hEorpa agus na Comhairle maidir leis an dul chun cinn i dtaobh chur chun feidhme chuspóirí STEP faoi na cláir faoi seach, maidir le caiteachas foriomlán STEP arna mhiondealú de réir an chláir, agus maidir le feidhmíocht STEP bunaithe ar na táscairí feidhmíochta dá bhforáiltear leis na cláir sin. I gcás ina bhfuil sí ar fáil, ba cheart faisnéis a sholáthar maidir le rannchuidiú cáilíochtúil agus cainníochtúil STEP le tionscadail trasteorann agus le tionscadail in aghaidh an Bhallstáit.

(16)

Cé go mbraitheann STEP ar ath-chlársceidealú agus atreisiú na gclár atá ann cheana chun tacú le hinfheistíochtaí straitéiseacha, agus chun spleáchais straitéiseacha an Aontais a laghdú, is gné thábhachtach é freisin chun indéantacht agus ullmhú idirghabhálacha féideartha nua a thástáil chun tacú le ceannasacht agus iomaíochas in earnálacha straitéiseacha agus chun beartas tionsclaíoch an Aontais a neartú. Ba cheart STEP a úsáid, go háirithe, mar bhonn chun gníomhaíochtaí comhchosúla a d’fhéadfadh a bheith ann a mheas, amhail Ciste Eorpach Ceannasachta.

(17)

Ba cheart don Choimisiún meastóireacht eatramhach a dhéanamh ar an Rialachán seo, inar cheart dó measúnú a dhéanamh ar ábharthacht na ngníomhaíochtaí a dhéantar faoin Rialachán seo maidir le spleáchais straitéiseacha an Aontais a laghdú agus maidir lena uathriail a neartú. Ba cheart dó measúnú a dhéanamh freisin ar a indéanta atá sé an Tairseach Cheannasachta a leathnú chun na suíomhanna gréasáin uile atá ar fáil go poiblí a chomhcheangal agus faisnéis a sholáthar maidir le cláir de chuid an Aontais atá faoi bhainistíocht dhíreach, roinnte agus indíreach i dtairseach aonair chomh maith lena indéanta atá sé ionsamhlóir a chur ar bun chun treoir a thabhairt do thionscnóirí tionscadail maidir le cláir nó cistí an Aontais a bhféadfadh a dtionscadal ar leith a bheith incháilithe ina leith.

(18)

Leis an gCiste don Nuálaíocht, tacaítear le hinfheistíochtaí i dteicneolaíochtaí nuálacha ísealcharbóin, rudaí a thagann faoi raon feidhme an Rialachán seo. Beidh ról lárnach, dá bhrí sin, ag an gCiste don Nuálaíocht maidir le tacú le teicneolaíochtaí criticiúla atá glan agus tíosach ar acmhainní a fhorbairt nó a mhonarú san Aontas. Agus glaonna ar thograí nó imthairiscint iomaíoch á gceapadh agus á gcur chun feidhme nó á ceapadh agus á cur chun feidhme aige faoin gCiste don Nuálaíocht, ba cheart don Choimisiún breithniú a dhéanamh ar thionscadail a aithnítear mar thionscadail straitéiseacha faoin nGníomh um an Tionscal Glan-nialasachta, a mheastar a rannchuidíonn le cuspóirí STEP.

(19)

Chun leathnú a dhéanamh ar dheiseanna chun tacú le hinfheistíochtaí arb é is aidhm dóibh forbairt thionsclaíoch agus atreisiú slabhraí luacha in earnálacha straitéiseacha a neartú, ba cheart raon feidhme na tacaíochta ó CFRE a leathnú trí fhoráil a dhéanamh maidir le cuspóirí sonracha nua faoi CFRE, gan dochar do na rialacha maidir le hincháilitheacht caiteachais agus caiteachas aeráide a leagtar síos i Rialachán (AE) 2021/1058 agus i Rialachán (AE) 2021/1060 ó Pharlaimint na hEorpa agus ón gComhairle (19). In earnálacha straitéiseacha, ba cheart a bheith in ann tacú le hinfheistíochtaí táirgiúla i bhfiontair nach FBManna iad, béim á coinneáil ar FBManna ag an am céanna, a d’fhéadfadh rannchuidiú go mór le forbairt na réigiún beagfhorbartha agus na réigiún trasdula, agus i réigiúin níos forbartha sna Ballstáit ag a bhfuil OTI per capita atá faoi bhun mheán AE-27. Moltar d’údaráis bhainistíochta an comhoibriú idir fiontair mhóra agus FBManna áitiúla, slabhraí soláthair áitiúla agus éiceachórais áitiúla nuálaíochta agus teicneolaíochta a chur chun cinn. D’fhágfadh sé sin go bhféadfaí acmhainneacht fhoriomlán an Aontais a athneartú chun a sheasamh sna hearnálacha sin a neartú trí rochtain a thabhairt do na Ballstáit uile le haghaidh infheistíochtaí den sórt sin, agus ar an gcaoi sin ghníomhófaí in aghaidh an riosca go dtiocfadh méadú ar éagothromaíochtaí. Ba cheart na hacmhainní atá clársceidealaithe do na cuspóirí sonracha nua sin a theorannú d’uasmhéid 20 % de leithdháileadh tosaigh náisiúnta CFRE i gcomhréir le Rialachán (AE) 2021/1060.

(20)

Chun ardleibhéal uaillmhéine a choinneáil maidir le cuspóirí aeráide i mbeartas comhtháthaithe a bhaint amach, agus ag an am céanna ligean do sholúbthacht idir an Ciste Comhtháthaithe agus CFRE, ba cheart a bheith in ann méid ranníocaíocht aeráide an Chiste Comhtháthaithe a sháraíonn 37 % dá leithdháileadh iomlán a chur i gcuntas agus ranníocaíocht aeráide CFRE á ríomh, ar thaobh amháin, agus ba cheart a bheith in ann méid ranníocaíocht aeráide CFRE a sháraíonn 30 % dá leithdháileadh iomlán a chur i gcuntas agus ranníocaíocht aeráide an Chiste Comhtháthaithe á ríomh, ar an taobh eile.

(21)

Ba cheart raon feidhme tacaíochta CUAC a leathnú freisin chun go gcumhdófaí infheistíochtaí i dteicneolaíochtaí a chumhdaítear leis an Rialachán seo agus chun aghaidh a thabhairt ar ghanntanas saothair agus scileanna atá riachtanach chun na hinfheistíochtaí sin a réadú, lena rannchuidítear le cuspóirí STEP ag fiontair mhóra agus béim á caomhnú ar FBManna, ar choinníoll go bhfuil infheistíochtaí den sórt sin comhoiriúnach leis an méid a mheastar a rannchuideofar leis an aistriú chuig aeráidneodracht mar a leagtar amach sna pleananna críochacha um aistriú cóir i gcomhréir le Rialachán (AE) 2021/1056. Leis an tacaíocht a thugtar do na hinfheistíochtaí sin, níor cheart gá a bheith ann athbhreithniú a dhéanamh ar an bplean críochach um aistriú cóir i gcás ina mbeadh an t-athbhreithniú sin nasctha go heisiach leis an anailís ar bhearnaí lena dtugtar údar leis an infheistíocht ó thaobh cruthú post de. I gcomhthéacs na tacaíochta d’fhiontair nach FBManna iad, ba cheart breithniú freisin ar infheistíochtaí lena rannchuidítear le printíseachtaí agus poist a chruthú nó lena gcuirtear oideachas nó oiliúint ar fáil do scileanna nua.

(22)

Le CSE+, arb é príomhchiste an Aontais chun infheistíocht a dhéanamh i ndaoine, cuirtear go mór le forbairt scileanna a chur chun cinn. Chun úsáid CSE+ a éascú le haghaidh chuspóirí STEP, ba cheart a bheith in ann CSE+ a úsáid chun infheistíochtaí a chumhdach arb é is aidhm dóibh lucht saothair oilte athléimneach a bheidh réidh don saol oibre amach anseo a bhaint amach.

(23)

Chun cuidiú le dlús a chur le hinfheistíochtaí agus leachtacht láithreach a sholáthar le haghaidh infheistíochtaí lena dtacaítear le cuspóirí STEP faoi CFRE, CSE+ agus CUAC, ba cheart méid breise réamh-mhaoinithe eisceachtúil a sholáthar i bhfoirm íocaíocht aonuaire i ndáil leis na tosaíochtaí atá tiomnaithe d’infheistíochtaí lena dtacaítear le cuspóirí STEP. Ba cheart feidhm a bheith ag an réamh-mhaoiniú breise maidir le leithdháileadh CUAC ina iomláine i bhfianaise an ghá atá le dlús a chur lena chur chun feidhme agus i bhfianaise naisc láidre CUAC chun tacú leis na Ballstáit i dtreo chuspóirí STEP. Ba cheart na rialacha is infheidhme maidir leis na méideanna sin de réamh-mhaoiniú eisceachtúil a bheith comhsheasmhach leis na rialacha is infheidhme maidir le réamh-mhaoiniú dá bhforáiltear i Rialachán (AE) 2021/1060. Thairis sin, chun glacadh na n-infheistíochtaí sin a dhreasú tuilleadh agus chun a áirithiú go gcuirfear chun feidhme níos tapúla iad, ba cheart uasráta cómhaoinithe de chuid an Aontais de 100 % a bheith ar fáil i gcás thosaíochtaí STEP. Agus cuspóirí STEP á gcur chun feidhme, ba cheart údaráis bhainistíochta a spreagadh chun critéir shóisialta áirithe a chur i bhfeidhm agus torthaí dearfacha sóisialta a chur chun cinn, amhail printíseachtaí agus poist den scoth a chruthú do dhaoine óga faoi mhíbhuntáiste, go háirithe daoine óga nach bhfuil i mbun fostaíochta, oideachais ná oiliúna, na critéir dhámhachtana shóisialta a leagtar amach i dTreoracha 2014/23/AE (20), 2014/24/AE (21) agus 2014/25/AE (22) ó Pharlaimint na hEorpa agus ón gComhairle a chur i bhfeidhm, i gcás ina gcuireann comhlacht atá faoi réir na dTreoracha sin tionscadal chun feidhme, agus an pá is infheidhme a íoc mar a comhaontaíodh trí chómhargáil.

(24)

Ba cheart Rialachán (AE) 2021/1060 a leasú chun gur féidir le tionscadail ar bronnadh Séala Ceannasachta orthu tairbhiú de rochtain níos fearr ar chistiú ón Aontas, go háirithe trí chistiú carnach nó comhcheangailte ó roinnt ionstraimí de chuid an Aontais a éascú. Chuige sin, ba cheart d’údaráis bhainistíochta a bheith in ann tacaíocht ó CFRE nó ó CSE+ a dheonú go díreach, i gcás oibríochtaí ar bronnadh Séala Ceannasachta orthu.

(25)

Chun an t-ualach riaracháin a laghdú agus chun imscaradh tráthúil STEP a áirithiú, ba cheart a bheith in ann, de mhaolú ar na rialacha is infheidhme, tosaíochtaí a áiríodh chun aghaidh a thabhairt ar infheistíochtaí lena rannchuidítear le cuspóirí STEP a eisiamh ó athbhreithniú meántéarma CFRE, an Chiste Comhtháthaithe, CSE+ agus CUAC dá bhforáiltear i Rialachán (AE) 2021/1060. Le leasuithe den sórt sin ar chláir, Ba cheart a bheith in ann iomlán an mhéid solúbthachta nó cuid de a leithdháileadh go cinntitheach do na blianta 2026 agus 2027. Leasuithe ar chláir a bhaineann go heisiach le tabhairt isteach tosaíochtaí lena rannchuidítear le cuspóirí STEP agus a thíolactar faoin 31 Lúnasa 2024, ba cheart don Choimisiún iad a fhormheas laistigh de 2 mhí tar éis do Bhallstát iad a thíolacadh. Thairis sin, ba cheart a bheith in ann aon leasuithe comhfhreagracha ar na Comhaontuithe Comhpháirtíochta dá dtagraítear i Rialachán (AE) 2021/1060 a thabhairt isteach agus a chur faoi deara ag an gCoimisiún iad a fhormheas ar shlí bhrostaithe.

(26)

Rinneadh an creat rialála le haghaidh chur chun feidhme chláir 2014-2020 a oiriúnú le blianta beaga anuas chun solúbthacht bhreise a thabhairt do na Ballstáit agus do na réigiúin i dtéarmaí cur chun feidhme agus níos mó leachtachta ann chun dul i ngleic le héifeachtaí phaindéim COVID-19 agus le cogadh foghach na Rúise in aghaidh na hÚcráine. Tá dóthain ama agus acmhainní riaracháin de dhíth chun na bearta sin, a tugadh isteach ag deireadh na clárthréimhse, a shaothrú agus a chur chun feidhme go hiomlán, go háirithe tráth a dhíríonn na Ballstáit acmhainní ar athbhreithniú a dhéanamh ar chláir oibríochtúla 2021-2027 atá nasctha le cuspóirí STEP. D’fhonn an t-ualach riaracháin ar údaráis na gclár a laghdú agus d’fhonn caillteanas féideartha cistí ag tráth an dúnta ar chúiseanna riaracháin amháin a chosc, ba cheart síneadh a chur leis na sprioc-amanna maidir le dúnadh riaracháin na gclár faoin tréimhse 2014-2020 i Rialacháin (AE) Uimh. 1303/2013 (23) agus (AE) Uimh. 223/2014 (24) ó Pharlaimint na hEorpa agus ón gComhairle. Go sonrach, ba cheart síneadh 12 mhí a chur leis an sprioc-am chun an t-iarratas deiridh ar íocaíocht a thíolacadh. Thairis sin, ba cheart síneadh 12 mhí a chur leis an sprioc-am chun na doiciméid um dhúnadh a thíolacadh freisin. I gcomhthéacs na leasuithe sin, is iomchuí a shoiléiriú gur cheart a bheith in ann leanúint de dháileadh an bhia agus an ábhair a cheannaítear go dtí deireadh na tréimhse incháilitheachta (deireadh 2023) tar éis an dáta sin.

Chun cur chun feidhme fónta bhuiséad an Aontais agus urraim a thabhairt do na huasteorainneacha íocaíochta a áirithiú, ba cheart uasteorainn 1 % in aghaidh an chláir de na leithreasuithe airgeadais ó acmhainní faoin gcreat airgeadais ilbhliantúil do na blianta 2021 go 2027, a leagtar síos i Rialachán (AE, Euratom) 2020/2093 ón gComhairle (25), a chur leis na híocaíochtaí atá le déanamh in 2025. Níor cheart méideanna atá dlite is mó ná an uasteorainn 1 % de leithreasuithe cláir in aghaidh an chiste do 2025 a íoc in 2025 ná sna blianta dá éis sin agus níor cheart iad a úsáid ach chun réamh-mhaoiniú a imréiteach. Ba cheart méideanna nár úsáideadh a shaoradh i gcomhréir le Rialachán (AE) Uimh. 1303/2013 maidir le saoradh tráth an dúnta. Chun a áirithiú gur féidir leis na réigiúin is forimeallaí tacaíocht ó na cistí a chumhdaítear leis an Rialachán seo a úsáid go hiomlán, ba cheart a shoiléiriú, chun críocha na solúbthachta dá bhforáiltear i Rialachán (AE) Uimh. 1303/2013, gur cheart na leithdháiltí speisialta breise do na réigiúin is forimeallaí a mheas mar chuid de leithdháileadh CFRE ar an gcatagóir chéanna réigiúin leis an réigiún is forimeallaí lena mbaineann. D’ainneoin rialacha incháilitheachta éagsúla is infheidhme maidir leis an leithdháileadh speisialta breise, ba cheart a bheith in ann an tsolúbthacht sin a chur i bhfeidhm freisin idir an leithdháileadh speisialta breise agus leithdháiltí eile CFRE ar an gcatagóir chéanna réigiún laistigh de chlár.

(27)

Leis na solúbthachtaí dá bhforáiltear i gcás chlárthréimhse 2014-2020, cabhraíodh leis na Ballstáit ina n-iarrachtaí freagartha ar ghéarchéimeanna agus téarnaimh, agus cabhraíodh leo chun aghaidh a thabhairt ar an mbrú breise ar bhuiséid phoiblí arb é chogadh foghach na Rúise i gcoinne na hÚcráine is cúis leis. Chun gur féidir leis na Ballstáit déileáil leis an mbrú leanúnach buiséid, i gcomhréir leis an bhféidearthacht dá bhforáiltear i Rialachán (AE) Uimh. 1303/2013, ba cheart a fhoráil go cúlghabhálach do shíneadh a chur leis an bhféidearthacht ráta cómhaoinithe 100 % ón Aontas a chur i bhfeidhm ar chláir chomhtháthaithe don bhliain chuntasaíochta deiridh ón 1 Iúil 2023 go dtí an 30 Meitheamh 2024, i gcás ina dtugann Ballstát fógra don Choimisiún sula dtíolacfar an t-iarratas deiridh ar íocaíocht eatramhach don bhliain chuntasaíochta deiridh, i gcomhréir le leithreasuithe buiséid agus faoi réir an chistiúcháin atá ar fáil.

(28)

Is é InvestEU clár suaitheanta an Aontais chun borradh a chur faoin infheistíocht, go háirithe an t-aistriú glas agus an t-aistriú digiteach, trí mhaoiniú faoi thionchar an éilimh a sholáthar, lena n-áirítear trí shásraí measctha, agus trí chúnamh teicniúil. Leis an gcur chuige sin, rannchuidítear le plódú isteach caipitil phoiblí agus phríobháidigh bhreise faoi na réimsí beartais reatha. Chun a áirithiú go n-ionsúfar go hiomlán na cistí atá ar fáil agus ar choinníoll nach bhfuil acmhainneacht leordhóthanach ag comhpháirtithe cur chun feidhme an 25 % de ráthaíocht AE a bunaíodh le Rialachán (AE) 2021/523 atá curtha in áirithe dóibh a ionsú, ba cheart don Choimisiún a bheith in ann níos mó ná 75 % de ráthaíocht AE a dheonú do Ghrúpa BEI. Sa chomhthéacs sin, ba cheart don Choimisiún spreagadh agus cúnamh a thabhairt do na comhpháirtithe cur chun feidhme seachas Grúpa BEI an cistiú atá ar fáil dóibh a ionsú ina iomláine. Moltar do na Ballstáit rannchuidiú le hurrann InvestEU an Bhallstáit chun tacú le táirgí airgeadais i gcomhréir le cuspóirí STEP faoi na réimsí beartais reatha, gan dochar do na rialacha is infheidhme maidir leis an Státchabhair. Ba cheart do na Ballstáit a bheith in ann ranníocaíocht in airgead tirim a áireamh mar bheart ina bpleananna téarnaimh agus athléimneachta chun críocha urrann InvestEU an Bhallstáit chun tacú le cuspóirí STEP faoi na réimsí beartais reatha. Leis an ranníocaíocht bhreise sin chun tacú le cuspóirí STEP, ba cheart a bheith in ann suas le 6 % de leithdháileadh airgeadais iomlán a bplean téarnaimh agus athléimneachta ar urrann InvestEU an Bhallstáit a bhaint amach. Ba cheart solúbthacht bhreise agus soiléiriú breise a thabhairt isteach freisin chun cuspóirí STEP a shaothrú ar shlí níos fearr. I gcás tionscadail lena rannchuidítear le cuspóirí STEP, ba cheart sáriarrachtaí a dhéanamh chun a áirithiú, ag deireadh na tréimhse infheistíochta, go ndéanfar raon leathan earnálacha agus réigiún a chumhdach agus comhchruinniú earnála nó geografach iomarcach a sheachaint.

(29)

Is é an clár Fís Eorpach príomhchlár cistiúcháin an Aontais don taighde agus don nuálaíocht, agus cuireann an Chomhairle Nuálaíochta Eorpach (CNE) tacaíocht ar fáil, go háirithe do nuálaíochtaí ag a bhfuil an acmhainneacht a bheith ceannródaíoch, ar de chineál suaiteach iad agus ag a bhfuil acmhainneacht fáis a bhféadfadh riosca ró-ard a bheith ag baint leo d’infheisteoirí príobháideacha. Ba cheart foráil a dhéanamh maidir le solúbthacht bhreise faoin gclár Fís Eorpach, ionas gur féidir le Luasaire CNE tacaíocht de chineál cothromais amháin a thabhairt do FBManna neamhiontaofa ó thaobh brabúis de, lena n-áirítear gnólachtaí nuathionscanta, agus cuideachtaí meánchaipitlithe beaga neamhiontaofa ó thaobh brabúis de, atá i mbun nuálaíochta, go háirithe dóibh siúd atá ag obair ar na teicneolaíochtaí a fhaigheann tacaíocht ó STEP, gan beann ar cé acu a fuair nó nach bhfuair siad cineálacha eile tacaíochta roimhe sin ó Luasaire CNE. Tá cur chun feidhme na hionstraime airgeadais atá mar chuid de Luasaire CNE lena soláthraítear infheistíocht trí chothromas nó trí fhoirm inaisíoctha eile (‘Ciste CNE’) teoranta d’uasmhéid infheistíochta EUR 15 mhilliún faoi láthair cé is moite de chásanna eisceachtúla agus ní féidir leis freastal ar bhabhtaí maoinithe leantaigh ná ar mhéideanna infheistíochta níos mó. Dá gceadófaí tacaíocht de chineál cothromais amháin i gcás FBManna neamhiontaofa ó thaobh brabúis de agus cuideachtaí meánchaipitlithe beaga neamhiontaofa ó thaobh brabúis de, thabharfaí aghaidh ar an mbearna atá ann faoi láthair sa mhargadh, go háirithe i gcás riachtanais infheistíochta idir EUR 15 mhilliún agus EUR 50 milliún. Thairis sin, is léir ón taithí a fuarthas nach n-úsáidtear ina n-iomláine na méideanna a gealladh do Threoirthionscadal CNE faoi chlár Fís2020 a bunaíodh le Rialachán (AE) Uimh. 1291/2013 ó Pharlaimint na hEorpa agus ón gComhairle (26). Ba cheart Rialachán (AE) 2021/695 a leasú freisin chun an t-imchlúdach méadaithe don Chiste Eorpach Cosanta a léiriú.

(30)

Tá ról lárnach ag CNE maidir le cistiú tosaigh a thairiscint do ghnólachtaí nuathionscanta atá ag fás go tapa agus do chuideachtaí meánchaipitlithe beaga. Leis an saineolas atá aige, tá CNE in ann, go hidéalach, feabhas a chur ar na deiseanna cistiúcháin atá ann do chuideachtaí atá ag iarraidh caipitil chun uas-scálú i ndiaidh chéim thosaigh na nuálaíochta. I bhfianaise ról lárnach Chiste CNE ó thaobh rath STEP, ba cheart na forálacha reachtacha maidir le feidhmiú CNE a shoiléiriú.

(31)

Is é an Ciste Eorpach Cosanta an príomhchlár chun iomaíochas, nuálaíocht, éifeachtúlacht agus uathriail theicneolaíoch thionscal cosanta an Aontais a fheabhsú, rud a chuireann le huathriail straitéiseach oscailte an Aontais. Tá forbairt cumas cosanta ríthábhachtach, toisc go gcuirtear taca léi faoi acmhainneacht agus uathriail earnáil tionsclaíochta an Aontais chun táirgí cosanta a fhorbairt agus faoi neamhspleáchas na mBallstát mar úsáideoirí deiridh táirgí den sórt sin. Ba cheart, dá bhrí sin, imchlúdach breise a chur ar fáil chun tacú le tionscadail lena rannchuidítear le forbairt feidhmeanna cosanta faoi raon feidhme an Rialacháin seo.

(32)

Ós rud é nach féidir leis na Ballstáit cuspóirí an Rialacháin seo, eadhon ceannasacht agus slándáil an Aontais a neartú, dlús a chur le haistriú glas agus aistriú digiteach an Aontais, iomaíochas an Aontais a fheabhsú agus spleáchais straitéiseacha an Aontais a laghdú, a ghnóthú go leordhóthanach agus gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh i gcomhréir le prionsabal na coimhdeachta a leagtar amach in Airteagal 5 CAE. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú,