(1)

Rinneadh Rialachán (CE) Uimh 1393/2007 ó Pharlaimint na hEorpa agus ón gComhairle (3) a leasú roimhe seo. Os rud é go bhfuil tuilleadh leasuithe suntasacha le déanamh, ba cheart an Rialachán sin a athmhúnlú ar mhaithe le soiléireacht.

(2)

Tá sé leagtha amach ag an Aontas mar chuspóir dó féin an tAontas a chothabháil agus a fhorbairt mar limistéar saoirse, slándála agus ceartais ina n-áirithítear saorghluaiseacht daoine. Chun limistéar den sórt sin a bhunú, glacfaidh an tAontas, i measc bearta eile, bearta a bhaineann leis an gcomhar breithiúnach in ábhair shibhialta a bhfuil gá leo chun go bhfeidhmeoidh an margadh inmheánach mar is cuí.

(3)

Chun críocha fheidhmiú cuí an mhargaidh inmheánaigh, agus chun críocha limistéar um cheartas sibhialta san Aontas a fhorbairt, is gá tuilleadh feabhais a chur ar tharchur agus ar sheirbheáil doiciméad breithiúnach agus doiciméad seachbhreithiúnach in ábhair shibhialta nó thráchtála idir na Ballstáit agus an tarchur agus an tseirbheáil sin a bhrostú tuilleadh, agus, ag an am céanna, ardleibhéal slándála agus cosanta á n-áirithiú i dtarchur na ndoiciméad sin, cearta na seolaithe á gcoimirciú agus príobháideachas agus sonraí pearsanta á gcosaint. Leis an Rialachán seo, féachtar le héifeachtacht agus luas na nósanna imeachta breithiúnacha a fheabhsú trí shimpliú agus cuíchóiriú a dhéanamh ar na nósanna imeachta sin maidir le doiciméid bhreithiúnacha agus doiciméid sheachbhreithiúnacha a sheirbheáil san Aontas, agus, ag an am céanna, cuidiú le laghdú a dhéanamh ar mhoilleanna agus costais do dhaoine aonair agus do ghnólachtaí. Trí níos mó deimhneachta dlíthiúla agus nósanna imeachta atá níos simplí, agus atá cuíchóirithe agus digitithe a sholáthar, déanfar daoine aonair agus gnólachtaí a spreagadh chun dul i mbun idirbhearta trasteorann agus, sa chaoi sin, cuirfear borradh faoin trádáil laistigh den Aontas agus, dá bhrí sin, faoi fheidhmiú an mhargaidh inmheánaigh.

(4)

Leis an Rialachán seo, leagtar síos rialacha maidir le doiciméid bhreithiúnacha agus doiciméid sheachbhreithiúnacha a sheirbheáil sna Ballstáit in ábhair shibhialta nó thráchtála. Níor cheart feidhm a bheith aige maidir le seirbheáil doiciméad breithiúnach agus doiciméad seachbhreithiúnach in ábhair eile amhail ábhair ioncaim, ábhair chustaim ná ábhair riaracháin.

(5)

Ba cheart seirbheáil trasteorann a fhorléiriú mar sheirbheáil ó Bhallstát amháin go Ballstát eile.

(6)

Níor cheart feidhm a bheith ag an Rialachán seo maidir le seirbheáil doiciméad ar ionadaí údaraithe ó pháirtí i mBallstát an fhóraim ina bhfuil na himeachtaí ag tarlú, ach ba cheart feidhm a bheith aige maidir le seirbheáil aon doiciméid ar pháirtí i mBallstát eile más gá an tseirbheáil sin a dhéanamh faoi dhlí Bhallstát an fhóraim, gan beann ar seirbheáilíodh an doiciméad ar ionadaí an pháirtí.

(7)

I gcás nach bhfuil seoladh aitheanta le haghaidh seirbheála ag seolaí i mBallstát an fhóraim, ach go bhfuil ceann amháin nó níos mó de sheoltaí aitheanta le haghaidh seirbheála aige i gceann amháin nó níos mó de na Ballstáit eile, ba cheart an doiciméad a tharchur chuig an mBallstát eile sin lena sheirbheáil faoin Rialachán seo. Níor cheart an cás sin a fhorléiriú mar sheirbhís intíre laistigh de Bhallstát an fhóraim. Go háirithe, níor cheart an doiciméad a sheirbheáil ar an seolaí trí mhodh samhailteach seirbheála, amhail seirbheáil trí fhógra a chur ar bhord fógra na cúirte nó tríd an doiciméad a thaisceadh i gcomhad na cúirte.

(8)

Chun críocha an Rialacháin seo, ba cheart a thuiscint go n-áirítear leis an téarma “doiciméid sheachbhreithiúnacha” doiciméid arna dtarraingt suas nó arna ndeimhniú ag údarás poiblí nó oifigeach, agus doiciméid eile ar gá iad a tharchur go foirmiúil chuig seolaí a bhfuil cónaí air nó uirthi i mBallstát eile chun ceart nó éileamh sa dlí sibhialta nó tráchtála a fheidhmiú, a chruthú nó a choimirciú. Níor cheart a thuiscint go n-áirítear leis an téarma “doiciméid sheachbhreithiúnacha” doiciméid arna n-eisiúint ag údaráis riaracháin chun críoch imeachtaí riaracháin.

(9)

Leis an éifeachtúlacht agus an luas a bhaineann le himeachtaí in ábhair shibhialta, éilítear go ndéanfar doiciméid bhreithiúnacha agus doiciméid sheachbhreithiúnacha a tharchur go díreach agus faoi luas idir comhlachtaí áitiúla arna n-ainmniú ag na Ballstáit. Ba cheart na Ballstáit a bheith in ann gníomhaireachtaí tarchuir agus gníomhaireacht fála ar leithligh a ainmniú nó gníomhaireacht amháin nó níos mó a ainmniú chun an dá fheidhm a chomhlíonadh, ar feadh tréimhse cúig bliana. Ba cheart, áfach, é a bheith indéanta an t‐ainmniú sin a athnuachan gach 5 bliana.

(10)

Chun a áirithiú go dtarchuirfear doiciméid go gasta idir Ballstáit chun críocha a seirbheála, ba cheart aon nuatheicneolaíocht chumarsáide a úsáid, ar choinníoll go gcomhlíonfar coinníollacha áirithe maidir le sláine agus iontaofacht an doiciméid arna fháil. Dá bhrí sin, mar riail, ba cheart gach cumarsáid agus malartú doiciméad idir gníomhaireachtaí agus comhlachtaí arna n-ainmniú ag na Ballstáit a dhéanamh trí chóras TF díláraithe slán agus iontaofa atá comhdhéanta de chórais TF náisiúnta agus atá idirnasctha agus idir‐inoibritheach go teicniúil, mar shampla, agus gan dochar d’fhorbairt bhreise na teicneolaíochta, bunaithe ar e-CODEX. Dá réir sin, ba cheart córas TF díláraithe a bhunú le haghaidh malartuithe sonraí faoin Rialachán seo. De bhrí gur córas díláraithe é an córas TF sin, ní chumasófaí leis ach malartuithe sonraí idir Ballstát amháin agus Ballstát eile, gan aon cheann d’institiúidí an Aontais a bheith rannpháirteach sna malartuithe sin.

(11)

Gan dochar do dhul chun cinn teicneolaíoch a d’fhéadfadh a bheith ann amach anseo, ní gá gur cheart a thuiscint gur seirbhís seachadta cláraithe leictreonach cáilithe é an córas TF díláraithe slán agus a chomhpháirteanna mar a shainmhínítear le Rialachán (AE) Uimh. 910/2014 ó Pharlaimint na hEorpa agus ón gComhairle (4).

(12)

Ba cheart don Choimisiún a bheith freagrach as bogearraí cur chun feidhme tagartha a chruthú, a chothabháil agus a fhorbairt amach anseo, agus ba cheart é a bheith de rogha ag na Ballstáit na bogearraí sin, seachas córas náisiúnta TF, a úsáid, i gcomhréir le prionsabail na cosanta sonraí trí dhearadh agus mar réamhshocrú. Ba cheart don Choimisiún na bogearraí cur chun feidhme tagartha a dhearadh, a fhorbairt agus a chothabháil i gcomhréir le riachtanais agus prionsabail na cosanta sonraí a leagtar síos i Rialacháin (AE) 2018/1725 (5) agus (AE) 2016/679 (6) ó Pharlaimint na hEorpa agus ón gComhairle, go háirithe prionsabail na cosanta sonraí trí dhearadh agus mar réamhshocrú. Ba cheart bearta teicniúla iomchuí a áireamh leis na bogearraí cur chun feidhme tagartha freisin, agus ba cheart na bearta eagrúcháin is gá a chumasú chun an leibhéal slándála agus idir‐inoibritheachta a áirithiú, ar leibhéal é atá iomchuí do mhalartú faisnéise i gcomhthéacs doiciméid a sheirbheáil.

(13)

Maidir leis na comhpháirteanna den chórais TF dhíláraithe atá faoi fhreagracht an Aontais, ba cheart acmhainní leordhóthanacha a bheith ag an eintiteas bainistíochta chun feidhmiú cuí an chórais sin a áirithiú.

(14)

Ba cheart don údarás inniúil nó do na húdaráis inniúla faoin dlí náisiúnta a bheith freagrach mar rialaitheoirí de réir bhrí Rialachán (AE) 2016/679 maidir leis an bpróiseáil a dhéanann siad ar shonraí pearsanta faoin Rialachán seo chun doiciméid a tharchur idir Ballstáit.

(15)

D’fhéadfadh sé nach mbeadh sé indéanta an tarchur tríd an gcóras TF díláraithe a dhéanamh mar gheall ar chur isteach ar an gcóras. D’fhéadfadh modhanna eile cumarsáide a bheith níos iomchuí in imthosca eisceachtúla freisin, a bhféadfadh cásanna a bheith san áireamh leo ina leagfaí ualach díréireach riaracháin ar an ngníomhaireacht tarchuir i gcás ina mbeadh lear mór doiciméad á gcomhshó go foirm leictreonach nó ina dteastódh an doiciméad bunaidh i bhfoirm pháipéir chun barántúlacht an doiciméid sin a mheas. I gcás nach n-úsáidtear an córas TF díláraithe, ba cheart an tarchur a dhéanamh trí na modhanna malartacha is iomchuí. Ba cheart a bheith i gceist leis na modhanna malartacha den sórt sin, inter alia, an tarchur a bheith á dhéanamh chomh tapa agus is féidir agus ar bhealach slán trí mhodhanna leictreonacha slána eile nó tríd an tseirbhís phoist.

(16)

Chun feabhas a chur ar tharchur leictreonach trasteorann na ndoiciméad tríd an gcóras TF díláraithe, níor cheart éifeacht dhlíthiúil a shéanadh ar dhoiciméid den sórt sin agus níor cheart a mheas go bhfuil siad neamh-inghlactha mar fhianaise sna himeachtaí ar an bhforas, agus ar an bhforas sin amháin, gur i bhformáid leictreonach atá siad. Mar sin féin, ba cheart an prionsabal sin a bheith gan dochar do mheasúnú a dhéanamh ar na héifeachtaí dlíthiúla ná d’inghlacthacht doiciméad den sórt sin mar fhianaise i gcomhréir leis an dlí náisiúnta. Ba cheart é freisin a bheith gan dochar don dlí náisiúnta maidir le doiciméid a chomhshó.

(17)

Chun tarchur agus seirbheáil doiciméad idir Ballstáit a éascú, ba cheart na foirmeacha a leagtar amach in Iarscríbhinn I a úsáid. Ba cheart an doiciméad a bheidh le tarchur a bheith ag gabháil le hiarraidh a dhréachtófar trí fhoirm A in Iarscríbhinn I a úsáid. Ba cheart an fhoirm a chomhlánú i dteanga oifigiúil an Bhallstáit a bhfuiltear ag díriú air nó, má tá teangacha oifigiúla éagsúla sa Bhallstát sin, i dteanga oifigiúil nó i gceann de theangacha oifigiúla na háite ina ndéanfar an tseirbheáil, nó i dteanga eile ar chuir an Ballstát sin in iúl go bhféadfadh sé glacadh léi. Ba cheart do gach Ballstát a chur in iúl an teanga oifigiúil nó na teangacha oifigiúla de chuid an Aontais seachas a theanga féin lena bhfuil glacadh aige.

(18)

Le húsáid a bhaint as foirm D in Iarscríbhinn I, ba cheart admháil fála a chur chuig an ngníomhaireacht tarchuir go huathoibríoch, tríd an gcóras TF díláraithe nó ar mhodhanna eile, a luaithe is féidir agus i ngach cás laistigh de 7 lá tar éis an doiciméad a fháil.

(19)

Ar dheimhniú neamhsheirbheála na ndoiciméad a fháil, tá sé tábhachtach go mbeidh a fhios ag an ngníomhaireacht tarchuir cibé a chuir nó nár chuir údaráis an Bhallstáit a bhfuiltear ag díriú air iarrataí chuig cláir shainchónaithe nó chuig bunachair sonraí eile, i gcás inarb ann do na cláir nó na bunachair sonraí sin, chun cuardach a dhéanamh ar sheoladh nua don duine atá le seirbheáil. Dá bhrí sin, ba cheart do na Ballstáit a chur in iúl don Choimisiún má dhéanann a n-údaráis na hiarrataí sin ar a dtionscnamh féin i gcásanna nach mbíonn an seoladh a léirítear san iarraidh ar sheirbheáil ceart. Mar sin féin, níor cheart oibleagáid a fhorchur leis an Rialachán seo ar údaráis na mBallstát na hiarrataí sin a dhéanamh.

(20)

I gcás nach féidir iarraidh ar sheirbheáil a chomhlíonadh ar bhonn na faisnéise nó na ndoiciméad a tarchuireadh, i gcás nach dtagann an iarraidh faoi raon feidhme an Rialacháin, i gcás ina bhfuil an tseirbheáil dodhéanta toisc nár comhlíonadh na coinníollacha foirmiúla, i gcás inar seoladh é chuig gníomhaireacht fála nach bhfuil dlínse chríche aici, ba cheart don ghníomhaireacht fála na bearta dá bhforáiltear sa Rialachán seo a dhéanamh gan moill mhíréasúnta, nach bhfuil bonn cirt ná gá léi i bhfianaise na n‐imthosca sonracha, lena n-áirítear na modhanna cumarsáide atá ar fáil don ghníomhaireacht fála.

(21)

Ar mhaithe le luas an tarchuir, caitear doiciméid a sheirbheáil laistigh de chúpla lá ón doiciméad a fháil. Ba cheart doiciméid a sheirbheáil a luaithe is féidir, agus i ngach cás laistigh d’aon mhí amháin ón tráth a bhfaighidh an ghníomhaireacht fála é.

(22)

Ba cheart don ghníomhaireacht fála leanúint de gach beart is gá a dhéanamh chun an doiciméad a sheirbheáil i gcásanna nárbh fhéidir an tseirbheáil a dhéanamh laistigh d’aon mhí ón doiciméad a fháil toisc go raibh an cosantóir ar saoire, as baile nó as láthair ón oifig ar chúrsaí gnó, mar shampla. Mar sin féin, chun nach mbeidh oibleagáid shíoraí ar an ngníomhaireacht fála bearta a dhéanamh chun go seirbheálfar an doiciméad, ba cheart don ghníomhaireacht fála a bheith in ann teorainn ama nach gá an tseirbheáil a thuilleadh ina dhiaidh a shonrú, ag baint úsáid as foirm A in Iarscríbhinn I.

(23)

Chun a áirithiú go bhfuil an Rialacháin seo éifeachtach, ba cheart na himthosca ina bhfuil sé indéanta an doiciméad atá le seirbheáil a dhiúltú a theorannú do chásanna eisceachtúla.

(24)

I ngach cás nach bhfuil an doiciméad atá le seirbheáil i dteanga oifigiúil nó i gceann amháin de theangacha oifigiúla áit na seirbheála, ba cheart don ghníomhaireacht fála a chur in iúl don seolaí i scríbhinn agus ag baint úsáid as foirm L`in Iarscríbhinn I gur féidir leis an seolaí an doiciméad atá le seirbheáil a dhiúltú mura bhfuil sé i dteanga a thuigeann an seolaí ná i dteanga oifigiúil nó ceann de theangacha oifigiúla áit na seirbheála. Ba cheart feidhm a bheith ag an riail sin freisin maidir le haon seirbheáil a dhéanfar ina dhiaidh sin nuair a bheidh an ceart diúltaithe atá curtha chun feidhme ag an seolaí. Ba cheart freisin feidhm a bheith ag ceart an diúltaithe maidir le seirbheáil a dhéanann gníomhairí taidhleoireachta nó oifigigh chonsalacha, seirbheáil trí sheirbhísí poist, seirbheáil leictreonach agus seirbheáil dhíreach. Ba cheart go bhféadfaí seirbheáil an doiciméid a diúltaíodh a leigheas trí aistriúchán ar an doiciméad sin a sheirbheáil ar an seolaí.

(25)

Má tá aistriúchán i gceangal leis an doiciméad atá le seirbheáil, ba cheart é a bheith deimhnithe nó go measfar é a bheith oiriúnach le haghaidh imeachtaí i gcomhréir le dlí an Bhallstáit iarrthaigh. Ba cheart an t-aistriúchán sin a chur ar fáil don Bhallstát ina ndéanfar an tseirbheáil. Beidh aistriú doiciméad go teanga eile chun críoch chomhlíonadh an Rialacháin seo a áirithiú gan dochar do chumas an fhaighteora agóid a dhéanamh i gcoinne chruinneas an aistriúcháin i gcomhréir le dlí Bhallstáit an fhóraim.

(26)

Má dhiúltaigh an seolaí glacadh leis an doiciméad agus má chinneann an chúirt nó an t-údarás a bhfuil na himeachtaí dlí os a comhair, tar éis di nó dó fíorú a dhéanamh, nach raibh údar cuí leis an diúltú sin, ba chóir don chúirt sin nó don údarás sin breathnú ar shlí iomchuí chun an seolaí a chur ar an eolas maidir leis an gcinneadh sin i gcomhréir leis an dlí náisiúnta. Chun a fhíorú an raibh údar cuí leis an diúltú sin, ba cheart don chúirt sin nó don údarás sin an fhaisnéis ábhartha uile atá sa chomhad a chur san áireamh chun a dhéanamh amach go cruinn cé na scileanna teanga atá ag an seolaí. I gcás inarb ábhartha, agus scileanna teanga an tseolaí á meas, ba cheart don chúirt eilimintí fíorasacha a chur san áireamh, mar shampla doiciméid a scríobh an seolaí sa teanga lena mbaineann, an mbaineann scileanna teanga sonracha le ceird an tseolaí, an saoránach é an seolaí de Bhallstát an fhóraim, nó an raibh cónaí ar an seolaí ar feadh tréimhse fhada sa Bhallstát sin roimhe sin.

(27)

I bhfianaise na ndifríochtaí idir na Ballstáit i ndáil lena rialacha nós imeachta, bíonn an dáta éifeachtach chun seirbheáil a dhéanamh éagsúil ó Bhallstát go Ballstát. I bhfianaise cásanna den chineál sin agus do na deacrachtaí a d’fhéadfadh teacht chun cinn, ba cheart don Rialachán seo foráil a dhéanamh do chóras inarb é dlí an Bhallstáit a bhfuiltear ag díriú air a chinneann dáta na seirbheála. I gcás ina gcaithfear doiciméad a sheirbheáil laistigh de thréimhse áirithe faoi dhlí Ballstáit, áfach, ba cheart gurb é an dáta arna chinneadh le dlí an Bhallstáit sin an dáta a chuirfear san áireamh maidir leis an iarratasóir. Ní ann do chóras an dáta dhúbailte sin ach i líon teoranta Ballstát. Má chuireann Ballstáit an córas sin i bhfeidhm, ba cheart dóibh an fhaisnéis sin a chur in iúl don Choimisiún agus ba cheart don Choimisiún an fhaisnéis sin a chur ar fáil go leictreonach tríd an Líonra Breithiúnach Eorpach in Ábhair Shibhialta agus Tráchtála arna bhunú le Cinneadh 2001/270/CE ón gComhairle (7) agus ar an Tairseach Eorpach don r-Cheartas.

(28)

D’fhonn an rochtain ar cheartas a éascú, ba cheart do Bhallstáit táille shocraithe aonair a leagan síos le haghaidh costais a bhaineann le dul i muinín oifigigh bhreithiúnaigh nó dul i muinín duine atá inniúil faoi dhlí an Bhallstáit a bhfuiltear ag díriú air. Ba cheart prionsabail na comhréireachta agus an neamh-idirdhealaithe a urramú leis an táille sin. Níor cheart go gcoiscfeadh an ceanglas maidir le táille shocraithe aonair, an fhéidearthacht do na Ballstáit táillí éagsúla a shocrú do chineálacha éagsúla seirbheála ar choinníoll go n‐urramóidh siad na prionsabail sin.

(29)

Ba cheart do gach Ballstát a bheith saor le seirbheáil doiciméad a dhéanamh trí sheirbhísí poist chuig daoine a bhfuil cónaí orthu i mBallstát eile go díreach trí litir chláraithe lena ngabhann admháil fála nó a coibhéis. Ba cheart go mbeadh sé indéanta seirbhís poist a úsáid, bíodh sé príobháideach nó poiblí, chun doiciméid a sheirbheáil i gcineálacha éagsúla litreacha, lena n-áirítear bearta litreacha.

(30)

I gcomhréir le cásdlí bunaithe Chúirt Bhreithiúnais an Aontais Eorpaigh (8), ba cheart a mheas gur seirbheáil bhailí í seirbheáil arna déanamh go díreach trí sheirbhísí poist faoin Rialachán seo, fiú mura ndearnadh an doiciméad a sheachadadh chuig an seolaí go pearsanta, i gcás inar seirbheáladh é ag seoladh baile an tseolaí ar dhuine fásta atá ina chónaí sa teaghlach céanna leis an seolaí nó atá fostaithe ann ag an seolaí agus atá in ann agus toilteanach glacadh leis an doiciméad ach amháin mura gceadaítear faoi dhlí Bhallstát an fhóraim ach an doiciméad sin a sheirbheáil ar an seolaí go pearsanta.

(31)

Chun go mbeidh imeachtaí breithiúnacha éifeachtúil agus tapa, ní mór cainéil dhíreacha mheara shlána a bheith ann le haghaidh doiciméid a sheirbheáil ar dhaoine i mBallstát eile. Dá bharr sin, ba cheart an deis a bheith ann an tseirbheáil doiciméad a dhéanamh go díreach trí mhodhanna leictreonacha ar sheolaí arb i mBallstát eile a bhfuil an seoladh aige nó aici atá aitheanta don tseirbheáil. Leis na coinníollacha maidir leis an úsáid a bhaintear as an tseirbheáil dhíreach leictreonach sin, ba cheart a áirithiú nach ndéantar seirbheáil leictreonach ach amháin trí mhodhanna leictreonacha atá ar fáil faoi dhlí Bhallstát an fhóraim chun doiciméid a sheirbheáil go hintíre ba cheart a áirithiú go bhfuil coimircí iomchuí ann chun leasanna an tseolaí a chosaint, lena n-áirítear ardchaighdeáin theicniúla agus ceanglas maidir le toiliú sainráite arna thabhairt ag an seolaí.

(32)

Ba cheart go mbeadh sé indéanta an seolaí a sheirbheáil go leictreonach ag baint úsáid as seirbhísí seachadta cláraithe leictreonacha cáilithe de réir bhrí Rialachán (AE) Uimh. 910/2014, ar choinníoll gur thug an seolaí toiliú sainráite roimh ré modhanna leictreonacha a úsáid chun críoch doiciméid a sheirbheáil i gcaitheamh na n-imeachtaí dlíthiúla. I gcásanna den sórt sin, d’fhéadfaí toiliú sainráite a thabhairt le haghaidh imeachtaí sonracha nó mar thoiliú ginearálta le doiciméid a sheirbheáil i gcaitheamh na n-imeachtaí dlíthiúla tríd an modh seirbheála sin. D’fhéadfaí an toiliú sin a thabhairt i gcás ina bhféadfaí, faoi dhlí Bhallstát an fhóraim, doiciméid nós imeachta a sheirbheáil trí chóras leictreonach agus inar thug an seolaí toiliú go n-úsáidfí an córas sin i ndáil le doiciméid a sheirbheáil roimh aon doiciméid a sheirbheáil ar an seolaí tríd an gcóras sin.

(33)

D’fhéadfaí an seolaí a sheirbheáil go leictreonach gan úsáid a bhaint as na seirbhísí seachadta cláraithe leictreonacha cáilithe de réir bhrí Rialachán (AE) Uimh. 910/2014, ar choinníoll gur thug an seolaí réamhthoiliú sainráite don chúirt nó don údarás a bhfuil na himeachtaí dlí os a comhair nó os a chomhair nó don pháirtí atá freagrach as an tseirbheáil sna himeachtaí sin leas a bhaint as ríomhphost chuig seoladh ríomhphoist sonraithe i gcaitheamh na n-imeachtaí sin agus ar choinníoll go bhfaightear cruthúnas go bhfuair an seolaí an doiciméad. Ba cheart don seolaí a dheimhniú go bhfuarthas an doiciméad trí admháil fála a shíniú agus a sheoladh ar ais nó trí ríomhphost a sheoladh ar ais ar ríomhphost é a fuarthas ón seoladh ríomhphoist a chuir an seolaí ar fáil le haghaidh seirbheála. D’fhéadfaí an admháil fála a shíniú go leictreonach freisin. D’fhonn slándáil an tarchuir a ráthú, d’fhéadfadh Ballstáit na coinníollacha breise a shonrú faoina nglacfaidh siad le seirbheáil leictreonach trí ríomhphost i gcás ina leagtar síos ina ndlí coinníollacha níos déine i ndáil le seirbheáil trí ríomhphost nó i gcás nach gceadaíonn a dhlí an tseirbheáil sin trí ríomhphost. Leis na coinníollacha sin, d’fhéadfaí aghaidh a thabhairt ar shaincheisteanna amhail sainaithint an tseoltóra agus an fhaighteora, sláine na ndoiciméad a sheoltar agus an tarchur a chosaint ar chur isteach seachtrach.

(34)

Aon duine a bhfuil leas ar leith aige nó aici in imeachtaí breithiúnacha, ba cheart go bhféadfadh sé seirbheáil doiciméad a dhéanamh go díreach trí oifigigh bhreithiúnacha, oifigigh nó daoine inniúla eile an Bhallstáit ina bhféachtar an tseirbheáil, ar choinníoll go gceadófar an tseirbheáil dhíreach sin faoi dhlí an Bhallstáit sin.

(35)

I gcás ina dtugtar cead don bhreitheamh breithiúnas a thabhairt, faoin dlí náisiúnta agus an Rialachán seo, fiú mura mbeidh deimhniú seirbheála nó seachadta an doiciméid lena dtionscnaítear na himeachtaí nó a choibhéis faighte, ba cheart gach iarracht réasúnta a dhéanamh chun an deimhniú a fháil trí údaráis inniúla nó comhlachtaí an Bhallstáit a bhfuiltear ag díriú air sula dtabharfar breithiúnas, i gcomhréir le haon cheanglais eile lena gcosnaítear leasanna an chosantóra. Seachas mura mbeidh sé ag luí leis an dlí náisiúnta, ba cheart gach iarracht réasúnta a dhéanamh an cosantóir a chur ar an eolas gur tionscnaíodh imeachtaí cúirte ag baint úsáid as aon bhealaí cumarsáide atá ar fáil, lena n-áirítear nuatheicneolaíocht na cumarsáide, a bhfuil seoladh nó cuntas ina leith ar eolas ag an gcúirt a bhfuiltear na himeachtaí os a comhair.

(36)

Ba cheart don Choimisiún lámhleabhar a dhréachtú ina mbeidh faisnéis atá ábhartha maidir le cur i bhfeidhm cuí an Rialacháin seo. Ba cheart an lámhleabhar a chur ar fáil tríd an Líonra Breithiúnach Eorpach in Ábhair Shibhialta agus Tráchtála. Ba cheart don Choimisiún agus do na Ballstáit a ndícheall a dhéanamh chun a áirithiú go bhfuil an fhaisnéis sa lámhleabhar cothrom le dáta agus iomlán, go háirithe maidir le sonraí teagmhála na ngníomhaireachtaí fála agus tarchuir.

(37)

Agus na tréimhsí agus na teorainneacha ama dá bhforáiltear sa Rialachán seo á ríomh, ba cheart feidhm a bheith ag Rialachán (CEE, Euratom) Uimh. 1182/71 (9) ón gComhairle.

(38)

Chun na foirmeacha atá in Iarscríbhinn I a ghabhann leis an Rialachán seo a thabhairt cothrom le dáta, nó chun athruithe teicniúla a dhéanamh ar na foirmeacha sin, ba cheart an chumhacht chun gníomhartha a ghlacadh i gcomhréir le hAirteagal 290 den Chonradh ar Fheidhmiú an Aontais Eorpaigh a tharmligean chuig an gCoimisiún i dtaca le leasuithe ar an Iarscríbhinn sin. Tá sé tábhachtach, go háirithe, go rachadh an Coimisiún i mbun comhairliúcháin iomchuí le linn a chuid oibre ullmhúcháin, lena n-áirítear ar leibhéal na saineolaithe, agus go ndéanfar na comhairliúcháin sin i gcomhréir leis na prionsabail a leagtar síos i gComhaontú Idirinstitiúideach an 13 Aibreán 2016 maidir le Reachtóireacht Níos Fearr (10). Go sonrach, chun rannpháirtíocht chomhionann in ullmhú na ngníomhartha tarmligthe a áirithiú, faigheann Parlaimint na hEorpa agus an Chomhairle na doiciméid uile ag an am céanna le saineolaithe na mBallstát, agus bíonn rochtain chórasach ag a gcuid saineolaithe ar chruinnithe ghrúpaí saineolaithe an Choimisiúin a bhíonn ag déileáil le hullmhú na ngníomhartha tarmligthe.

(39)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (11).

(40)

Ba cheart forlámhas a bheith ag an Rialachán seo ar na forálacha atá i gcomhaontuithe déthaobhacha nó iltaobhacha nó i socraithe déthaobhacha nó iltaobhacha, arna dtabhairt i gcríoch ag na Ballstáit, a bhfuil an raon feidhme céanna acu leis an Rialachán seo, go háirithe Coinbhinsiún na Háige an 15 Samhain 1965 ar Sheirbheáil Doiciméad Breithiúnach agus Seachbhreithiúnach in Ábhair Shibhialta nó Tráchtála ar an gCoigríoch sa chaidreamh idir na Ballstáit is páirtí dó. Leis an Rialachán seo ní chuirtear bac ar Bhallstáit comhaontuithe nó socruithe a chothabháil nó a thabhairt i gcrích chun tarchur doiciméad a bhrostú nó a shimpliú, ar choinníoll go bhfuil na comhaontuithe nó na socruithe sin ag luí leis an Rialachán seo.

(41)

Ba cheart lánaird agus urraim i gcomhréir le dlí an Aontais a thabhairt ar chearta agus saoirsí bunúsacha na ndaoine ar fad lena mbaineann, go háirithe na cearta chun rochtain chomhionann ar an gceartas, chun neamh-idirdhealú agus chun cosaint sonraí pearsanta agus príobháideachais.

(42)

Ba cheart an fhaisnéis a tharchuirtear de bhun an Rialacháin seo a chosaint go hoiriúnach. Tagann cosaint den sórt sin faoi raon feidhme Rialachán (AE) 2016/679 agus Threoir 2002/58/CE ó Pharlaimint na hEorpa agus ón gComhairle (12). Ba cheart a scriosadh láithreach sonraí pearsanta nach bhfuil ábhartha maidir le cás sonracha láimhseáil.

(43)

I gcomhréir le míreanna 22 agus 23 de Chomhaontú Idirinstitiúideach an 13 Aibreán 2016 maidir le Reachtóireacht Níos Fearr, ba cheart don Choimisiún meastóireacht a dhéanamh ar an Rialachán seo ar bhonn faisnéis a bhailítear trí shocruithe sonracha faireacháin chun measúnú a dhéanamh ar éifeachtaí iarbhír an Rialacháin seo agus ar an ngá atá le haon ghníomhaíocht bhreise. I gcás ina mbailíonn Ballstáit sonraí maidir le doiciméid a sheirbheáil faoin Rialachán seo, go háirithe faisnéis faoi líon na n-iarrataí a tharchuirtear agus líon na n-iarrataí a fhaightear, líon na gcásanna ina ndearnadh tarchur trí bhealaí eile seachas tríd an gcóras TF díláraithe, líon na ndeimhnithe a fuarthas maidir le neamhsheirbheáil doiciméad a fhaightear agus líon na bhfógraí maidir le diúltú ar chúiseanna teanga a fuair na gníomhaireachtaí tarchuir, ba cheart dóibh sonraí den sórt sin a chur ar fáil don Choimisiún chun críocha faireacháin. Maidir leis na bogearraí cur chun feidhme tagartha a d’fhorbair an Coimisiún mar chóras cúil, ba cheart iad a bhailiú ar bhonn cláir na sonraí is gá a chlársceidealú chun críocha faireacháin a bhailiú agus ba cheart sonraí den sórt sin a tharchur chuig an gCoimisiún. I gcás ina roghnaíonn na Ballstáit córas náisiúnta TF a úsáid in ionad na mbogearraí cur chun feidhme tagartha a d’fhorbair an Coimisiún, féadfaidh na córais sin a bheith in ann na sonraí sin a bhailiú ar bhonn cláir agus, sa chás sin, ba cheart na sonraí sin a tharchur chuig an gCoimisiún.

(44)

Ós rud é nach féidir leis na Ballstáit cuspóirí an Rialacháin seo a ghnóthú go leordhóthanach mar gheall ar na difríochtaí idir rialacha náisiúnta lena rialaítear dlínse agus aithint agus forfheidhmiú cinntí ach, mar gheall ar infheidhmeacht dhíreach agus cineál ceangailteach an Rialacháin seo, gur fearr is féidir iad a ghnóthú ar leibhéal an Aontais, féadfaidh an tAontas bearta a ghlacadh, i gcomhréir le prionsabal na coimhdeachta a leagtar amach in Airteagal 5 den Chonradh ar an Aontas Eorpach. I gcomhréir le prionsabal na comhréireachta a leagtar amach san Airteagal sin, ní théann an Rialachán seo thar a bhfuil riachtanach chun na cuspóirí sin a ghnóthú.

(45)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug sé tuairim uaidh an 13 Meán Fómhair 2019 (13).

(46)

D’fhonn a fhorálacha a dhéanamh níos sorochtana agus níos inléite, ba cheart Rialachán (CE) Uimh. 1393/2007 a aisghairm agus an Rialachán seo a chur ina ionad.

(47)

I gcomhréir le hAirteagal 3 agus Airteagal 4a(1) de Phrótacal Uimh. 21 maidir le seasamh na Ríochta Aontaithe agus na hÉireann i dtaca leis an limistéar saoirse, slándála agus ceartais, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, tá fógra tugtha ag an Ríocht Aontaithe agus ag Éirinn gur mian leo a bheith rannpháirteach i nglacadh agus i gcur i bhfeidhm an Rialacháin seo.

(48)

I gcomhréir le hAirteagal 1 agus le hAirteagal 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, níl an Danmhairg rannpháirteach i nglacadh an Rialacháin seo agus níl sí faoi cheangal aige ná faoi réir a chur i bhfeidhm,