Breoslaí níos glaine le haghaidh iompair ar bóthar

Cuireann breoslaí iompair go mór le hastaíochtaí gáis cheaptha teasa san Aontas Eorpach (AE). Leagtar amach sa treoir seo creat chun monatóireacht a dhéanamh ar astaíochtaí gáis cheaptha teasa a eascraíonn as saolré bhreoslaí* agus chun iad a laghdú, rud a chabhraíonn le spriocanna a bhaint amach i ndáil le hastaíochtaí gáis cheaptha teasa a laghdú.

GNÍOMH

Treoir 2009/30/CE ó Pharlaimint na hEorpa agus ón gComhairle an 23 Aibreán 2009 lena leasaítear Treoir 98/70/CE maidir le sonraíochtaí peitril, díosail agus gáis-ola agus lena leagtar amach sásra chun monatóireacht a dhéanamh ar astaíochtaí gáis cheaptha teasa agus chun iad a laghdú agus lena leasaítear Treoir 1999/32/EC ón gComhairle maidir le sonraíocht an bhreosla a úsáidtear ag soithí uiscebhealaí intíre agus lena n-aisghairtear Treoir 93/12/CEE.

ACHOIMRE

Cuireann breoslaí iompair go mór le hastaíochtaí gáis cheaptha teasa san Aontas Eorpach (AE). Leagtar amach sa treoir seo creat chun monatóireacht a dhéanamh ar astaíochtaí gáis cheaptha teasa a eascraíonn as saolré bhreoslaí* agus chun iad a laghdú, rud a chabhraíonn le spriocanna a bhaint amach i ndáil le hastaíochtaí gáis cheaptha teasa a laghdú.

CÉARD A DHÉANANN AN TREOIR SEO?

Athbhreithnítear an treoir maidir le cáilíocht an bhreosla (Treoir 98/70/CE). Leasaítear raon eilimintí léi, sonraíochtaí breosla san áireamh, agus cuirtear sásra i bhfeidhm chun monatóireacht a dhéanamh ar astaíochtaí gáis cheaptha teasa agus chun iad a laghdú agus chun inbhuanaitheacht na mbithbhreoslaí a chinntiú.

PRÍOMHPHOINTÍ

• Éilítear faoin dlí seo ar sholáthróirí breosla tuairisc a thabhairt ar astaíochtaí gáis cheaptha teasa a eascraíonn as saolré fuinnimh agus iad a laghdú, fuinneamh a chuirtear ar fáil le haghaidh iompair ar bóthar. Is í an sprioc ná laghdú de 6 % ar astaíochtaí gáis cheaptha teasa saolré (nó suas go dtí 10 % má roghnaítear sin ag an mBallstát AE) i ngach aonad fuinnimh a eascraíonn as breosla a chuirfear ar fáil faoi mhí na Nollag 2020.
• Ní mór bithbhreoslaí a tháirgeadh go hinbhuanaitheach. Chun bithbhreosla a chur san áireamh maidir le hastaíochtaí gáis cheaptha teasa a laghdú de réir na treorach seo, ní mór critéir inbhuanaitheachta a chomhlíonadh, sé sin ní ceadmhach bithbhreoslaí a tháirgeadh ar thalamh le luach ard bithéagsúlachta ann, ná ní ceadmhach ábhair le stoc carbóin ard iontu a úsáid chun bithbhreoslaí a tháirgeadh.
• Comhchuibhiú na rialacha le haghaidh breoslaí, sonraíochtaí teicniúla maidir le sláinte agus le cúrsaí comhshaoil a leagadh síos, go háirithe i ndáil leis an cion sulfair díosail agus peitril a laghdú go dtí 10 mg/kg nó níos lú.
• Éascaítear faoin treoir bithchomhábhair breosla a chumasc (mar shampla, suas go dtí 10 % eatánól sa pheitreal). Ní mór do thíortha AE a chinntiú go gcomhlíontar na ceanglais atá leagtha amach in Iarscríbhinn I agus in Iarscríbhinn II den treoir seo faoi seach, maidir le peitreal agus díosal a chuirtear ar an margadh.
• Éilítear faoin dlí go gcuirtear eolas cuí ar fáil do thomhaltóirí maidir le cion bithbhreosla peitril agus díosail.

CÚLRA

De bharr an dul chun cinn an-mhór i dteicneolaíocht feithicle agus forbairt agus infhaighteacht mhéadaitheach bithbhreoslaí, mhol an Coimisiún Eorpach, sa bhliain 2007, sa Treoir 98/70/CE, athbhreithniú a dhéanamh ar shonraíochtaí maidir le cáilíocht an bhreosla.

Féach leathanaigh ghréasáin an Choimisiúin Eorpaigh chun tuilleadh faisnéise a fháil:

• reachtaíocht maidir le cáilíocht an bhreosla;
• monatóireacht ar cháilíocht an bhreosla.

EOCHAIRTHÉARMAÍ

Baineann astaíochtaí gáis cheaptha teasa a eascraíonn ó shaolré bhreosla le glan-astaíochtaí go léir an bhreosla. I bhfocail eile, ní bhaineann na téarmaí le hastaíochtaí dócháin amháin, ach freisin le hastaíochtaí saothraithe, aistarraingthe, iompair, próiseála agus dáilte breosla.

Nuashonraithe 30.04.2015