13.8.2008

GA

Iris Oifigiúil an Aontais Eorpaigh

L NaN/1

---

RIALACHÁN (CE) Uimh. 762/2008 Ó PHARLAIMINT NA hEORPA AGUS ÓN gCOMHAIRLE

an 9 Iúil 2008

maidir le tíolacadh staidrimh i ndáil le dobharshaothrú ag Ballstáit agus lena n-aisghairtear Rialachán (CE) 788/96 ón gComhairle.

(Téacs atá ábhartha maidir leis an LEE)

TÁ PARLAIMINT NA hEORPA AGUS COMHAIRLE AN AONTAIS EORPAIGH,

Ag féachaint don Chonradh ag bunú an Chomhphobail Eorpaigh, agus go háirithe Airteagal 285(1) de,

Ag féachaint don togra ón gCoimisiún,

Ag gníomhú dóibh i gcomhréir leis an nós imeachta a leagtar síos in Airteagal 251 den Chonradh (1),

De bharr an méid seo a leanas:

(1)	Ceanglaítear ar na Ballstáit le Rialachán (CE) Uimh. 788/96 ón gComhairle an 22 Aibreán 1996 maidir le tíolacadh staidrimh i ndáil le táirgeacht dobharshaothraithe ag Ballstáit (2) sonraí bliantúla maidir le toirt na táirgeachta a thíolacadh.

(2)	Éilíonn cion méadaithe an dobharshaothraithe i dtáirgeacht iomlán iascaigh an Chomhphobail go mbeadh raon níos leithne sonraí ar fáil chun forbairt agus bainistiú réasúnach a dhéanamh ar an earnáil seo laistigh den Chomhbheartas Iascaigh.

(3)	Éilíonn tábhacht mhéadaitheach gorlann agus plandlann don ghníomhaíocht dobharshaothraithe sonraí mionsonraithe le haghaidh monatóireacht agus bainistiú oiriúnach a dhéanamh ar an earnáil seo laistigh den Chomhbheartas Iascaigh.

(4)	Tá gá le faisnéis maidir le toirt agus le luach na táirgeachta araon chun athbhreithniú agus measúnú a dhéanamh ar an margadh do tháirgí dobharshaothraithe.

(5)	Tá gá le faisnéis maidir le struchtúr na hearnála agus leis na teicneolaíochtaí a bhíonn in úsáid chun tionscal atá slán ó thaobh an chomhshaoil de a áirithiú.

(6)	Ba cheart Rialachán (CE) Uimh. 788/96 a aisghairm.

(7)

Chun trasdul réidh ón gcóras is infheidhme faoi Rialachán (CE) Uimh. 788/96 a áirithiú, ba cheart go gceadófaí leis an Rialachán seo idirthréimhse nach faide ná trí bliana a dheonú do Bhallstáit i gcás ina n-éileofaí móroiriúnuithe lena chur i bhfeidhm ar a gcórais náisiúnta staidrimh agus i gcás inar dócha go gcúiseofaí leis fadhbanna suntasacha praiticiúla.

(8)

Ó tharla nach féidir leis na Ballstáit cuspóir an Rialacháin seo, eadhon creat dlíthiúil comhchoiteann i gcomhair soláthar córasach staidreamh Comhphobail maidir leis an earnáil dobharshaothraithe a bhunú, a bhaint amach go leordhóthanach agus gur fearr is féidir é sin a bhaint amach ar leibhéal an Chomhphobail, féadfaidh an Comhphobal bearta a ghlacadh, i gcomhréir le prionsabal na coimhdeachta, a leagtar amach in Airteagal 5 den Chonradh. I gcomhréir le prionsabal na comhréireachta, a leagtar amach san Airteagal céanna sin, ní théann an Rialachán seo thar a bhfuil riachtanach chun an cuspóir sin a bhaint amach.

(9)

Foráiltear do chreat tagartha do staidreamh i réimse an iascaigh le Rialachán (CE) Uimh. 322/97 ón gComhairle an 17 Feabhra 1997 maidir le Staidreamh Comhphobail (3). Ceanglaíonn sé, go háirithe, go gcomhlíonfar prionsabail na neamhchlaontachta, na hiontaofachta, na hábharthachta, na cost-éifeachtúlachta, na rúndachta staidrimh agus na trédhearcachta.

(10)	Is uirlis fíor-riachtanach é bailiú agus tíolacadh sonraí staidrimh le haghaidh bainistíocht shlán an Chomhbheartais Iascaigh.

(11)	Ba cheart na bearta is gá do chur chun feidhme an Rialacháin seo a ghlacadh i gcomhréir le Cinneadh 1999/468/CE ón gComhairle an 28 Meitheamh 1999 ag leagan síos na nósanna imeachta maidir le feidhmiú na gcumhachtaí cur chun feidhme arna dtabhairt don Choimisiún (4).

(12)

Ba cheart, go háirithe, go dtabharfaí de chumhacht don Choimisiún athruithe teicniúla ar na hIarscríbhinní atá ag gabháil leis an Rialachán seo a ghlacadh. Ó tharla go bhfuil raon feidhme ginearálta ag na bearta sin agus go gceapfar iad le haghaidh eilimintí neamhriachtanacha den Rialachán seo a leasú, inter alia trína fhorlíonadh le heilimintí nua neamhriachtanacha, caithfear iad a ghlacadh i gcomhréir leis an nós imeachta rialúcháin lena ngabhann grinnscrúdú agus dá bhforáiltear in Airteagal 5a de Chinneadh 1999/468/CE.

(13)	Ba cheart go dtabharfadh an Buanchoiste um Staidreamh Talmhaíochta arna chur ar bun le Cinneadh 72/279/CEE ón gComhairle (5) cúnamh don Choimisiún,

TAR ÉIS AN RIALACHÁN SEO A GHLACADH:

Airteagal 1

Oibleagáidí na mBallstát

Tíolacfaidh na Ballstáit staidreamh don Choimisiún maidir leis na gníomhaíochtaí dobharshaothraithe go léir a dhéantar ina gcríoch i bhfionnuisce agus in uisce sáile.

Airteagal 2

Sainmhínithe

1.   Chun críche an Rialacháin seo, beidh feidhm ag na sainmhínithe seo a leanas:

(a)	‘staidreamh Comhphobail’ mar a shainmhínítear é in Airteagal 2 de Rialachán (CE) Uimh. 322/97;

(b)	‘dobharshaothrú’ mar a shainmhínítear é in Airteagal 3(d) de Rialachán (CE) Uimh. 1198/2006 ón gComhairle an 27 Iúil 2006 maidir leis an gCiste Iascaigh Eorpach (6);

(c)	ciallaíonn ‘dobharshaothrú gabháil-bhunaithe’ an cleachtas eiseamail a bhailiú as an bhfiadhúlra agus iad a úsáid ina dhiaidh sin sa dobharshaothrú;

(d)	ciallaíonn ‘táirgeacht’ aschur ón dobharshaothrú ag an gcéad díolachán, lena n-áirítear táirgeacht ó ghorlanna agus ó phlandlanna arna tairiscint lena díol.

2.   Leagtar amach in Iarscríbhinn I na sainmhínithe eile go léir chun críche an Rialacháin seo.

Airteagal 3

Tiomsú staidrimh

1.   Úsáidfidh na Ballstáit suirbhéanna nó modhanna eile deimhnithe staidrimh a chlúdaíonn 90 % ar a laghad den táirgeacht iomlán de réir toirte, nó de réir lín i gcás táirgeacht ghorlann agus phlandlann, gan dochar do mhír 4. Féadfar meastachán a dhéanamh ar na sonraí a chlúdaíonn an chuid eile den táirgeacht iomlán. Chun meastachán a dhéanamh ar níos mó ná 10 % den táirgeacht iomlán, féadfar iarratas ar mhaolú a dhéanamh faoi na coinníollacha dá bhforáiltear in Airteagal 8.

2.   Beidh úsáid foinsí eile seachas suirbhéanna faoi réir ag measúnacht ex-post ar cháilíocht staidrimh na bhfoinsí sin a sholáthar.

3.   Féadfaidh Ballstát a bhfuil táirgeacht iomlán bhliantúil de níos lú ná 1 000 tonna aige sonraí achoimre a thíolacadh ina ndéantar meastachán ar an táirgeacht iomlán.

4.   Sainaithneoidh na Ballstáit táirgeacht de réir speicis. Féadfar, áfach, meastachán a dhéanamh ar tháirgeacht na speiceas sin nach sáraíonn 500 tonna go haonarach, agus nach mó ná 5 % de réir meáchain de tháirgeacht de réir toirte i mBallstát í, agus féadfar í a chomhbhailiú. Féadfar meastachán a dhéanamh ar tháirgeacht na ngorlann agus na bplandlann i gcás líon na speiceas sin.

Airteagal 4

Sonraí

Bainfidh na sonraí leis an mbliain féilire thagartha agus cumhdóidh siad:

(a)	an táirgeacht bhliantúil (toirt agus luach aonaid) dobharshaothraithe;

(b)	an t-ionchur bliantúil (toirt agus luach aonaid) sa dobharshaothrú gabháil-bhunaithe;

(c)	táirgeacht bhliantúil ghorlann agus phlandann;

(d)	struchtúr na hearnála dobharshaothraithe.

Airteagal 5

Tíolacadh sonraí

1.   Tíolacfaidh na Ballstáit na sonraí dá dtagraítear in Iarscríbhinní II, III agus IV don Choimisiún (Eurostat) laistigh de dhá mhí dhéag ó dheireadh na bliana féilire tagartha. Is í an bhliain 2008 an chéad bhliain féilire thagartha.

2.   Ag tosú leis na sonraí don bhliain 2008, agus go tráthrialta gach trí bliana ina dhiaidh sin, déanfar na sonraí maidir le struchtúr na hearnála dobharshaothraithe dá dtagraítear in Iarscríbhinn V a thíolacadh don Choimisiún (Eurostat) laistigh de dhá mhí dhéag ó dheireadh na bliana féilire tagartha.

Airteagal 6

Measúnú cáilíochta

1.   Soláthróidh gach Ballstát tuarascáil bhliantúil maidir le cáilíocht na sonraí arna dtíolacadh don Choimisiún (Eurostat).

2.   Tráth tíolactha na sonraí, cuirfidh gach Ballstát tuarascáil mhodheolaíochta mhionsonraithe faoi bhráid an Choimisiúin. Sa tuarascáil sin, déanfaidh gach Ballstát tuairisc ar an tslí ar bailíodh agus ar tiomsaíodh na sonraí. Beidh mionsonraí sa tuarascáil sin maidir le teicnící samplála, le modhanna meastacháin agus le foinsí seachas suirbhéanna a úsáideadh, mar aon le meastóireacht ar cháilíocht na meastachán comhthoraidh. Tugtar formáid mholta don tuarascáil mhodheolaíochta in Iarscríbhinn VI.

3.   Scrúdóidh an Coimisiún na tuarascálacha agus cuirfidh sé a chuid conclúidí faoi bhráid an ghrúpa oibre iomchuí den Bhuanchoiste um Staidreamh Talmhaíochta arna chur ar bun le Cinneadh 72/279/CEE.

Airteagal 7

Idirthréimhse

1.   Féadfar idirthréimhsí bliana iomláin féilire do chur chun feidhme an Rialacháin seo, ar idirthréimhsí iad nach mairfidh níos faide ná trí bliana ón 1 Eanáir 2009, a dheonú do Bhallstáit i gcomhréir leis an nós imeachta bainistithe dá dtagraítear in Airteagal 10(2), a mhéid a mbeidh gá le móroiriúnaithe mar gheall ar an Rialachán seo a chur i bhfeidhm ar a gcórais náisiúnta staidrimh, agus a mhéid ar dócha go gcúiseofar fadhbanna praiticiúla leis sin.

2.   Chuige sin, cuirfidh Ballstát iarratas cuí-réasúnaithe faoi bhráid an Choimisiúin faoin 31 Nollaig 2008.

Airteagal 8

Maoluithe

1.   I gcásanna ina ndéanfadh earnáil ar leith gníomhaíochtaí dobharshaothraithe a chur san áireamh sa staidreamh deacrachtaí a chruthú do na húdaráis náisiúnta, ar deacrachtaí iad nach mbeadh comhchuimseach le tábhacht na hearnála sin, féadfar maolú a dheonú i gcomhréir leis an nós imeachta bainistithe dá dtagraítear in Airteagal 10(2).

Ceadóidh maolú den sórt sin do Bhallstát sonraí a chumhdaíonn an earnáil sin a eisiamh as na sonraí náisiúnta a thíolacfar nó úsáid a bhaint as modhanna meastacháin a úsáidtear chun sonraí a sholáthar do níos mó ná 10 % den táirgeacht iomlán.

2.   Tabharfaidh na Ballstáit tacaíocht d'aon iarraidh ar mhaoluithe, a chaithfear a dhéanamh roimh an spriocdháta do chéad tíolacadh na sonraí, trí thuarascáil ar na fadhbanna a ghabhann le cur i bhfeidhm an Rialacháin seo a chur chuig an gCoimisiún.

3.   Más rud é go gcruthódh athrú sa staid maidir le bailiú na sonraí deacrachtaí gan choinne do na húdaráis náisiúnta, féadfaidh na Ballstáit iarraidh cuí-réasúnaithe ar mhaolú a thíolacadh tar éis an spriocdháta do chéad thíolacadh na sonraí.

Airteagal 9

Fórálacha teicniúla

1.   Na bearta a cheapfar chun eilimintí neamhriachtanacha den Rialachán seo a leasú, inter alia trína fhorlíonadh, agus a bhaineann le hathruithe teicniúla ar na hIarscríbhinní, glacfar iad i gcomhréir leis an nós imeachta rialúcháin lena ngabhann grinnscrúdú agus dá dtagraítear in Airteagal 10(3).

2.   Glacfar an fhormáid ina dtíolacfar an staidreamh i gcomhréir leis an nós imeachta bainistithe dá dtagraítear in Airteagal 10(2).

Airteagal 10

An nós imeachta coiste

1.   Tabharfaidh an Buanchoiste um Staidreamh Talmhaíochta cúnamh don Choimisiún.

2.   I gcás ina ndéanfar tagairt don mhír seo, beidh feidhm ag Airteagal 4 agus ag Airteagal 7 de Chinneadh 1999/468/CE, ag féachaint d'fhorálacha Airteagal 8 de.

Trí mhí a shocrófar don tréimhse a leagtar síos in Airteagal 4(3) de Chinneadh 1999/468/CE.

3.   I gcás ina ndéanfar tagairt don mhír seo, beidh feidhm ag Airteagal 5a(1) go (4) agus ag Airteagal 7 de Chinneadh 1999/468/CE, ag féachaint d'fhorálacha Airteagal 8 de.

Airteagal 11

Tuarascáil meastóireachta

Faoin 31 Nollaig 2011 agus gach trí bliana ina dhiaidh sin, cuirfidh an Coimisiún tuarascáil meastóireachta faoi bhráid Pharlaimint na hEorpa agus faoi bhráid na Comhairle maidir leis an staidreamh arna thiomsú de bhun an Rialacháin seo agus, go háirithe, maidir lena ábharthacht agus lena cháilíocht.

Déanfar freisin sa tuarascáil anailís ar chost-éifeachtúlacht an chórais a tugadh isteach chun an staidreamh a bhailiú agus a tharraingt suas agus léireoidh sí sár-chleachtais chun an t-ualach a laghdú ar na Ballstáit agus chun tairbhe agus cáilíocht na sonraí a mhéadú.

Airteagal 12

Aisghairm

1.   Gan dochar do mhír 3, aisghairtear leis seo Rialachán (CE) Uimh. 788/96.

2.   Forléireofar tagairtí arna ndéanamh don Rialachán aisghairthe mar thagairtí don Rialachán seo.

3.   De mhaolú ar an dara mír d'Airteagal 13 den Rialachán seo, leanfaidh Ballstát ar deonaíodh idirthréimhse dó i gcomhréir le hAirteagal 7 den Rialachán seo d'fhorálacha Rialachán (CE) Uimh. 788/96 a chur i bhfeidhm le linn na hidirthréimhse a deonaíodh.

Airteagal 13

Teacht i bhfeidhm

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh feidhm aige ón 1 Eanair 2009 ar aghaidh.

---

(1)  Tuairim ó Pharlaimint na hEorpa an 31 Eanáir 2008 (nár foilsíodh go fóill san Iris Oifigiúil) agus Cinneadh ón gComhairle an 23 Meitheamh 2008.

(2)  IO L 108, 1.5.1996, lch. 1. Rialachán arna leasú le Rialachán (CE) Uimh 1882/2003 ó Pharlaimint na hEorpa agus ón gComhairle (IO L 284, 31.10.2003, lch. 1).

(3)  IO L 52, 22.2.1997, lch. 1. Rialachán arna leasú le Rialachán (CE) Uimh. 1882/2003 ó Pharlaimint na hEorpa agus ón gComhairle.

(4)  IO L 184, 17.7.1999, lch. 23. Cinneadh arna leasú le Cinneadh 2006/512/CE (IO L 200, 22.7.2006, lch. 11).

(5)  IO L 179, 7.8.1972, lch. 1.

(6)  IO L 223, 15.8.2006, lch. 1.

---

---

---

---

---

---

---