Il-moviment liberu ta’ data mhux personali fl-Unjoni Ewropea
SOMMARJU TA’:
Ir-Regolament (UE) 2018/1807 — dwar qafas għall-moviment liberu ta’ data mhux personali fl-Unjoni Ewropa
X’INHU L-GĦAN TAR-REGOLAMENT?
- Dan għandu l-għan li jiżgura li d-data elettronika, ħlief id-data personali, tkun tista’ tiġi pproċessata liberament madwar l-UE kollha.
- Jipprojbixxi restrizzjonijiet fuq fejn tista’ tinħażen jew tiġi pproċessata d-data.
PUNTI EWLENIN
Ir-regolament japplika għall-ipproċessar ta’ data mhux personali* li:
- huwa pprovdut bħala servizz għall-utenti li jgħixu fl-UE;
- jitwettaq minn individwu, minn kumpanija jew minn organizzazzjoni fl-UE għall-ħtiġijiet tagħhom stess.
Ir-regolament jipprojbixxi miżuri magħrufa bħala rekwiżiti ta’ lokalizzazzjoni*, li jirrestrinġu l-ipproċessar ta’ data għal territorju speċifiku fl-UE, ħlief għal raġunijiet relatati mas-sigurtà pubblika.
Il-pajjiżi tal-UE iridu:
- jinformaw lill-Kummissjoni Ewropea minnufih dwar kwlaunkwe rekwiżit potenzjali ġdid ta’ lokalizzazzjoni tad-data;
- sat-30 ta’ Mejju 2021, iħassru kwalunkwe rekwiżit ta’ lokalizzazzjoni mhux iġġustifikat jew jinnotifikaw lill-Kummissjoni dwar kwalunkwe wieħed li jemmnu li jkun iġġustifikat;
- jistabbilixxu punt online uniku nazzjonali ta’ informazzjoni li jkun fih ir-rekwiżiti aġġornati kollha ta’ lokalizzazzjoni;
- jinkarigaw punt uniku ta’ kuntatt biex jidħol f’kuntatt u jikkoopera mal-kontropartijiet f’pajjiżi oħra tal-UE u mal-Kummissjoni, b’mod partikolari rigward talbiet ta’ assistenza.
L-awtoritajiet pubbliċi jistgħu jitolbu aċċess għad-data li tkun tinsab f’pajjiż ieħor tal-UE, jew li tkun maħżuna jew ipproċessata fil-cloud, u li tkun meħtieġa biex iwettqu d-dmirijiet uffiċjali tagħhom.
Il-Kummissjoni trid:
- tippubblika l-links għall-punti online uniċi nazzjonali ta’ informazzjoni fuq is-sit web tagħha u taġġorna b’mod regolari lista konsolidata ta’ rekwiżiti ta’ lokalizzazzjoni;
- sad-29 ta’ Mejju 2019, tipprovdi gwida dwar l-interazzjoni bejn ir-regolament u r-Regolament (UE) 2016/679 dwar l-ipproċessar u t-trasferiment ta’ data personali, speċjalment data kemm b’informazzjoni personali kif ukoll b’informazzjoni mhux personali;
- sad-29 ta’ Novembru 2022, tirrapporta lill-Parlament Ewropew, il-Kunsill u l-Kumitat Ekonomiku u Soċjali Ewropew dwar kif qed jiġi applikat ir-regolament.
Il-Kummissjoni tħeġġeġ il-ħolqien ta’ kodiċijiet awtoregolatorji ta’ kondotta fil-livell tal-UE. Dawn għandhom:
- jiġu żviluppati f’kooperazzjoni msaħħa mal-partijiet interessati, bħal assoċjazzjonijiet ta’ intrapriżi żgħar u medji, start-ups, utenti u fornituri tas-servizzi tal-cloud;
- jitlestew sad-29 ta’ Novembru 2019 biex ikunu jistgħu jiġu implimentati sad-29 ta’ Mejju 2020;
- qoxra
- l-aħjar prattiki meta tiġi biex tbiddel fornituri ta’ servizzi jew tittrasferixxi d-data*
- rekwiżiti minimi ta’ informazzjoni għall-utenti professjonali qabel ma jiffirmaw kuntratt għall-ipproċessar ta’ data
- skemi ta’ ċertifikazzjoni biex ikunu jistgħu jsiru paraguni bejn il-prodotti u s-servizzi ta’ proċessar ta’ data għall-professjonisti
- komunikazzjoni biex jiżdied l-għarfien dwar il-kodiċijiet ta’ kondotta.
MINN META JIBDA JAPPLIKA R-REGOLAMENT?
Dan jidħol fis-seħħ fit-28 ta’ Mejju 2019. Kif intqal fis-sommarju, hemm skadenzi speċifiċi fir-regolament li jridu jiġu rrispettati bħar-revoka, sat-30 ta’ Mejju 2021, ta’ kwalunkwe rekwiżit mhux iġġustifikat ta’ lokalizzazzjoni.
SFOND
Ir-regoli l-ġodda huma mfassla biex iħaffu l-kummerċ transfruntier fl-UE u biex jinħoloq suq uniku għas-servizzi ta’ ħżin u ta’ pproċessar ta’ data, bħall-cloud computing.
Il-ħila li wieħed jagħżel fornitur ta’ servizz tad-data minn kwalunkwe pajjiż fl-UE għandha ġġib magħha servizzi aktar innovattivi msejsa fuq id-data u prezzijiet aktar kompetittivi għan-negozji, għall-konsumaturi u għall-amministrazzjonijiet pubbliċi.
B’ambjent regolatorju favorevoli, huwa stmat li l-ekonomija tad-data tista’ tiġi tiswa 4 % mill-PDG (prodott domestiku gross) tal-UE sal-2020.
Għal aktar informazzjoni, ara:
TERMINI EWLENIN
Data mhux personali: kwalunkwe informazzjoni mhux marbuta ma’ individwu identifikat jew li jista’ jiġi identifikat, jiġifieri kwalunkwe data għajr data personali kif definita fil-punt (1) tal-Artikolu 4 tar-Regolament Ġenerali dwar il-Protezzjoni tad-Data (GDPR).
Rekwiżiti ta’ lokalizzazzjoni: kwalunkwe miżura legali jew amministrattiva li tiddikjara li l-ipproċessar ta’ data jrid iseħħ f’territorju speċifiku tal-UE.
Trasferiment tad-data: trasferiment tad-data minn fornitur wieħed ta’ servizz għal ieħor, jew lura għas-servers tal-istess kumpanija.
DOKUMENT EWLIENI
Ir-Regolament (UE) 2018/1807 tal-Parlament Ewropew u tal-Kunsill tal-14 ta’ Novembru 2018 dwar qafas għall-moviment liberu ta’ data mhux personali fl-Unjoni Ewropa (ĠU L 303, 28.11.2018, pp. 59-68)
DOKUMENT RELATAT
Ir-Regolament (UE) 2016/679 tal-Parlament Ewropew u tal-Kunsill tas-27 ta’ April 2016 dwar il-protezzjoni tal-persuni fiżiċi fir-rigward tal-ipproċessar ta’ data personali u dwar il-moviment liberu ta’ tali data, u li jħassar id-Direttiva 95/46/KE (Regolament Ġenerali dwar il-Protezzjoni tad-Data) (ĠU L 119, 4.5.2016, pp. 1-88)
Ara l-verżjoni konsolidata.
l-aħħar aġġornament 15.02.2019