Opinjoni tal-Kumitat Ekonomiku u Soċjali Ewropew dwar “Proposta għal Regolament tal-Parlament Ewropew u tal-Kunsill dwar it-titoli koperti minn bonds sovrani”

(COM(2018) 339 final — 2018/0171 (COD))

(2019/C 62/18)

Relatur:

Daniel MAREELS

Konsultazzjoni	Parlament Ewropew, 5.7.2018 Kunsill tal-Unjoni Ewropea, 6.7.2018
Bażi legali	Artikoli 114 u 304 tat-Trattat dwar il-Funzjonament tal-Unjoni Ewropea
Sezzjoni kompetenti	Sezzjoni Speċjalizzata għall-Unjoni Ekonomika u Monetarja u l-Koeżjoni Ekonomika u Soċjali
Adottata fis-sezzjoni	3.10.2018
Adottata fil-plenarja	17.10.2018
Sessjoni plenarja Nru	538
Riżultat tal-votazzjoni (favur/kontra/astensjonijiet)	201/3/8

1.   Konklużjonijiet u rakkomandazzjonijiet

1.1.

Il-KESE jilqa’ dawn il-proposti dwar it-Titoli Koperti minn Bonds Sovrani (Sovereign Bond-Backed Securities, SBBSs), li jidħlu fil-kuntest iktar wiesa’ tat-tlestija tal-Unjoni Bankarja u l-bini ta’ Unjoni tas-Swieq Kapitali. Fil-passat, il-Kumitat kien sostenitur kbir ta’ dawn iż-żewġ unjonijiet u appoġġjahom bil-qawwi. Barra minn hekk, il-proposti għandhom ukoll il-potenzjal li jagħtu kontribut pożittiv għall-istabbiltà finanzjarja u r-reżiljenza.

1.2.

Mill-perspettiva kunċettwali, l-SBBSs għandhom l-għan li jindirizzaw ir-rabta tradizzjonalment mill-qrib bejn il-banek u l-pajjiżi ta’ oriġini tagħhom (“sovrani”). Minn wara l-kriżi finanzjarja, il-KESE ilu jitlob biex isir xi ħaġa dwar dan, fejn jappoġġja bil-qawwi l-fatt li din ir-rabta tiddgħajjef. Minkejja l-isforzi li diġà saru f’dan ir-rigward, il-KESE għalhekk jilqa’ l-fatt li qiegħda tittieħed azzjoni permezz tal-proposti attwali.

1.3.

Fil-fatt, l-SBBSs jistgħu jwasslu għal sitwazzjoni fejn il-banek ikunu jistgħu jnaqqsu l-esponiment tagħhom għad-dejn pubbliku tal-pajjiż ta’ oriġini tagħhom u jiddiversifikaw aħjar il-portafolji tagħhom tad-dejn sovran. Barra minn hekk, l-istrument il-ġdid ma jinvolvix il-kondiviżjoni tar-riskju u tat-telf bejn l-Istati Membri fiż-żona tal-euro. Jekk ikun hemm bżonn, dawn jiġġarrbu bis-sħiħ mill-investituri tal-SBBSs.

1.4.

Bħalissa, l-SBBSs jiġu identifikati bħala “titolizzazzjonijiet” bil-għan li jiġu applikati r-regolamenti, li fir-realtà ma jagħmluhomx attraenti biex il-banek jinvestu fihom. Il-Kumitat iqis li huwa għalkollox xieraq li din is-sitwazzjoni tiġi rettifikata. L-allinjament tal-SBBSs mal-bonds sovrani nazzjonali denominati fil-euro miż-żona tal-euro (esponimenti sovrani) se jkollu jippermetti lill-investituri mis-settur finanzjarju jinvestu f’SBBSs taħt l-istess kundizzjonijiet li bħalissa jinvestu fihom fil-bonds sovrani sottostanti miż-żona tal-euro.

1.5.

Dawn il-proposti jinvolvu sempliċement qafas ta’ abilitazzjoni li jippermetti l-iżvilupp ta’ SBBSs mis-suq. Għall-Kumitat, huwa importanti ħafna li jiġu żgurati ċ-ċarezza, l-effikaċja u l-effettività ta’ dan il-qafas fiċ-ċirkostanzi kollha. Barra minn hekk, ma għandu jkun hemm l-ebda impatt negattiv jew ta’ ħsara.

1.6.

Fir-rigward tal-qafas regolatorju propost, il-pożizzjoni tal-KESE xi ftit jew wisq hija kwalifikata. Huwa jaqbel ma’ għadd ta’ aspetti, bħall-prinċipju li l-SBBSs jinħarġu minn Entità bi Skop Speċjali (Special Purpose Entity, SPE). Aspetti oħra, bħall-awtoċertifikazzjoni tal-kompożizzjoni tal-portafolji sottostanti minn SPEs, iridu jissaħħu. Fid-dawl tal-importanza ta’ dan, jidher li jkun xieraq monitoraġġ iktar strett u saħansitra minn qabel mill-Awtorità Ewropea tat-Titoli u s-Swieq (ESMA).

1.7.

Għadha ma ngħatatx tweġiba wkoll għal għadd ta’ mistoqsijiet. Għalhekk, tirriżulta l-mistoqsija dwar jekk l-SBBSs hux se jaħdmu b’mod effettiv fiċ-ċirkostanzi kollha. Barra minn hekk, kif se jmorru fi żminijiet ta’ kriżi ġenerali, jew ta’ kriżi fi Stat Membru wieħed jew iktar? X’inhuma l-konsegwenzi li l-ħruġ jinqasmu f’segmenti, meta jidher li s-segmenti superjuri (li jinvolvu inqas riskju) jistgħu jitqiegħdu biss fis-suq jekk jinstabu biżżejjed investituri għas-segmenti minuri (li jinvolvu riskju ikbar)? Għalhekk, jidher li l-ħruġ għandu aspett riskjuż u prekarju, u dan in-nuqqas tal-inqas ixekkel is-suċċess potenzjali tal-SBBSs.

1.8.

Bl-istess mod, huwa importanti ħafna li jittieħed approċċ pożittiv lejn is-“swieq” u partijiet ikkonċernati ewlenin oħra fir-rigward tal-SBBSs. Huma jridu jaqblu li jagħmlu sforzi biex dan l-istrument isir realtà. Is-swieq u r-rappreżentanti tal-Istati Membri kienu pjuttost fundamentali matul il-konsultazzjonijiet ta’ tħejjija tal-partijiet ikkonċernati. Il-Kumitat jikkunsidra li huwa indispensabbli li jkun hemm djalogu u li ssir konsultazzjoni mal-partijiet ikkonċernati kollha sabiex b’mod konġunt jiġu żviluppati soluzzjonijiet kostruttivi.

1.9.

F’termini ġenerali u filwaqt li jitqiesu l-punti kollha msemmija hawn fuq, il-KESE jħoss li l-uniku mod kif jiġi skopert a) jekk il-banek humiex se jeqilbu minn bonds mill-pajjiżi ta’ domiċilju tagħhom għal SBBSs għall-investimenti tagħhom u b) jekk l-investituri humiex se jkunu lesti jixtru segmenti “minuri” fi kwantitajiet suffiċjenti biex jiġi ġġustifikat il-ħolqien ta’ SBBSs, huwa billi dan l-istrument finanzjarju l-ġdid – l-SBBS – jiġi ttestjat fis-suq.

1.10.

Fl-aħħar nett, il-Kumitat iħoss li għandu jkun hemm iktar ħsieb dwar il-kwistjoni ta’ jekk l-SBBSs jistgħux jinkisbu minn faddala u konsumaturi privati. Filwaqt li minn naħa waħda jitqies il-fatt li dan huwa prodott partikolarment kumpless u, min-naħa l-oħra, jitqies il-fatt li dan huwa maqsum f’segmenti, il-Kumitat huwa inklinat biex jaħseb li l-akkwiżizzjoni għandha titqies biss għal segmenti “superjuri”, u mhux għal segmenti “minuri”. Ir-riskji limitati preżenti preċedenti biss jistgħu jitqabblu mas-sjieda diretta ta’ bonds sovrani mill-istess faddala u konsumaturi.

2.   Sfond

2.1.

Fl-24 ta’ Mejju 2018, il-Kummissjoni ppubblikat il-proposta (1) tagħha għal żvilupp ta’ suq immexxi mid-domanda ta’ titoli koperti minn bonds sovrani (SBBSs).

2.2.

Din il-proposta taqa’ fil-kuntest iktar wiesa’ tat-tlestija tal-Unjoni Bankarja u l-bini ta’ Unjoni tas-Swieq Kapitali. Hija tiffoka b’mod partikolari fuq il-fatt li din ir-rabta bejn il-banek u l-gvernijiet nazzjonali tagħhom (“sovrani”) tiddgħajjef aktar, u għalhekk tenfasizza tnaqqis tar-riskji u kondiviżjoni tar-riskji tas-settur privat. In-natura transkonfinali tagħha tfisser li hija maħsuba wkoll biex tikkontribwixxi għall-integrazzjoni u d-diversifikazzjoni ulterjuri tas-swieq finanzjarji għat-titoli tal-gvern fis-suq intern.

2.3.

Fil-passat, il-banek kellhom it-tendenza li jkollhom parteċipazzjonijiet estensivi ta’ bonds sovrani mill-gvernijiet nazzjonali (pajjiżi ta’ oriġini) tagħhom stess, li, kif irriżulta matul il-kriżi finanzjarja, jistgħu jippreżentaw ċerti riskji. Għalhekk, minn dakinhar kien hemm talbiet biex din ir-rabta tiddgħajjef.

2.4.

Bħala risposta, ġie propost l-SBBS, li l-għan tiegħu huwa li jippermetti lill-banek itejbu d-distribuzzjoni ġeografika tal-portafolji tal-bonds sovrani tagħhom. Dan iqis ukoll kemm il-provvista baxxa ta’ dawn il-bonds kif ukoll id-domanda tal-istituzzjonijiet finanzjarji għal dawn l-assi, inkluż minħabba rekwiżiti regolatorji ġodda sabiex jinżammu biżżejjed buffers ta’ assi likwidi ħafna.

2.5.

L-SBBSs huma strument finanzjarju ġdid, u l-proposta attwali għandha l-għan li tneħħi l-ostakoli li s’issa xekklu l-iżvilupp tagħhom. F’termini konkreti, il-qafas ta’ abilitazzjoni propost essenzjalment għandu żewġ objettivi:

2.5.1.

l-istabbiliment ta’ qafas ġenerali mfassal apposta għall-SBBSs, li “jistandardizza” dan l-istrument il-ġdid u li għalhekk għandu wkoll ikun ta’ benefiċċju għal-likwidità tiegħu;

2.5.2.

f’dan ir-rigward, it-tneħħija ta’ ostakoli regolatorji għall-użu u għall-akkwiżizzjoni ta’ SBBSs. Essenzjalment, dan jinvolvi l-applikazzjoni ta’ tip ta’ approċċ “ta’ trasparenza” għall-investituri f’dan it-tip ta’ SBBS, li jfisser li se japplikaw l-istess regoli regolatorji daqslikieku żammew l-istess bonds sovrani sottostanti huma stess.

2.6.

Karatteristika speċifika waħda – u karatteristika ewlenija – tal-SBBSs tikkonċerna l-portafoll sottostanti tagħhom. Sabiex tinkiseb id-diversifikazzjoni ġeografika tar-riskji msemmija qabel fi ħdan l-Unjoni Bankarja u s-suq intern, din għandha tkun magħmula esklussivament minn bonds sovrani tal-Istati Membri kollha fiż-żona tal-euro. Restrizzjoni addizzjonali hija li huma biss il-ħruġ denominati fl-euro li għandhom ikunu eliġibbli. Dawn se jiġu inklużi fl-SBBSs b’mod proporzjonat għall-piż ekonomiku tal-Istat Membru rispettiv.

2.7.

Element ieħor speċifiku ħafna huwa l-fatt li huma l-investituri li jġarrbu r-riskji u t-telf. L-SBBSs se jkunu magħmula minn segmenti, u l-investituri jistgħu jagħżlu bejn segmenti superjuri li jkollhom riskju iktar baxx u segmenti minuri li jkollhom riskju ogħla. Barra minn hekk, il-profili sottostanti jipprovdu l-unika garanzija tagħhom, peress li l-proposta tirrikjedi li l-emittenti ta’ SBBSs ikunu entitajiet bi skop speċjali li ma għandhom iwettqu l-ebda attività oħra u li fil-konfront tagħha ma tkun possibbli l-ebda pretensjoni (2).

2.8.

Barra minn hekk, fir-rigward tal-investituri, se jiġi applikat tip ta’ approċċ “ta’ trasparenza” għat-trattament regolatorju tal-SBBSs, kif imsemmi hawn fuq. Dan ifisser li l-“imballaġġ” legali tal-istrument mhux se jitqies iktar bħala “titolizzazzjoni” (3), iżda minflok se jitqiesu t-titoli sottostanti tal-gvern li jinstabu fl-SBBS. Fejn ikun xieraq, l-investituri se jirċievu l-istess trattament regolatorju għall-SBBSs li jissodisfaw il-kundizzjonijiet kollha applikabbli għat-titoli tal-gvern li jipposjedu direttament, f’termini ta’ rekwiżiti kapitali, limiti ta’ konċentrazzjoni, u limiti ta’ likwidità.

2.9.

Dawn il-proposti joħolqu t-termini u l-kundizzjonijiet għall-SBBSs u jistabbilixxu t-trattament prudenzjali tagħhom, iżda fl-aħħar mill-aħħar se jiddependi mis-“suq” biex jużahom. Fl-aħħar mill-aħħar l-emittenti u l-investituri se jiddeċiedu jekk dan l-istrument finanzjarju ġdid isirx realtà u, jekk isir, kif u sa fejn se jintuża.

3.   Kummenti

3.1.

Il-KESE jilqa’ din il-proposta dwar l-SBBSs, li taqa’ fil-kuntest iktar wiesa’ tat-tlestija tal-Unjoni Bankarja u l-bini ta’ Unjoni tas-Swieq Kapitali. Fil-passat, il-Kumitat kien sostenitur kbir ta’ dawn iż-żewġ unjonijiet u appoġġjahom bil-qawwi (4).

3.2.

B’mod iktar speċifiku, dawn il-proposti għandhom l-għan li jkomplu jdgħajfu r-rabta bejn il-banek u l-pajjiżi ta’ domiċilju tagħhom. Minn wara l-kriżi finanzjarja, il-Kumitat appoġġja bil-qawwi l-fatt li din ir-rabta tiddgħajjef, u għalhekk huwa sodisfatt li l-proposta tindirizza dan, billi tqis il-kuntest tal-provvista ta’ bonds sovrani li qed tonqos simultanjament maż-żieda fid-domanda għalihom.

3.3.

L-SBBSs, bħala strument finanzjarju ġdid, għandhom il-potenzjal li jtejbu u jwessgħu d-diversifikazzjoni fl-esponiment tal-banek u ta’ istituzzjonijiet finanzjarji oħra għall-bonds sovrani (“parteċipazzjonijiet ta’ bonds sovrani”). Mingħajr dubju dan se jgħin inaqqas ir-riskji fis-settur finanzjarju.

3.4.

Il-proposta hija sempliċement qafas ta’ abilitazzjoni li jippermetti l-iżvilupp ta’ SBBS mis-suq, mingħajr ma hi nfisha tidħol daqshekk fid-dettall. Meta jibda jsir żvilupp reali mis-suq, dan se jwassal għall-ħolqien ta’ strument finanzjarju ġdid u suq għal dan tal-aħħar. Il-Kummissjoni tagħmel stima tal-impatt ta’ dan f’żewġ xenarji (5). Jekk jinħoloq volum limitat biss ta’ SBBSs, l-impatt jiġi stmat f’madwar EUR 100 biljun; jekk jiġi adottat approċċ iktar wiesa’, b’impatt stmat ta’ EUR 1 500 biljun, dan se jħalli impatt makroekonomiku.

3.5.

It-tixrid wiesa’ tal-SBBSs għandu wkoll il-potenzjal li jtejjeb l-integrazzjoni tas-suq finanzjarju, u għalhekk jgħin itejjeb l-istabbiltà finanzjarja u r-reżiljenza tas-sistema finanzjarja.

3.6.

Fil-fehma tal-Kumitat, huwa importanti li l-qafas ta’ abilitazzjoni propost ikun ċar, funzjonali u effettiv fiċ-ċirkostanzi kollha, u li ma jkollu l-ebda effett negattiv. Barra minn hekk, u sabiex tiżdied il-possibbiltà li jirnexxi, huwa importanti ħafna li jiġi adottat approċċ pożittiv lejn is-“swieq” u partijiet ikkonċernati ewlenin oħra – huma jridu jaqblu li jaħdmu biex l-SBBSs isiru realtà.

3.7.

Is-swieq u r-rappreżentanti tal-Istati Membri kienu pjuttost fundamentali matul il-konsultazzjonijiet ta’ tħejjija tal-partijiet ikkonċernati. Pereżempju, il-parteċipanti tas-swieq kellhom fehmiet differenti dwar il-vijabbiltà tal-SBBSs. Imbagħad, l-“Uffiċjali għall-Ġestjoni tad-Dejn” adottaw il-fehma li l-SBBSs la jkissru r-rabta bejn il-banek u s-sovrani u lanqas joħolqu ass b’riskju baxx. U r-rappreżentanti tal-Istati Membri dan l-aħħar indikaw li, fil-fehma tagħhom, il-ħtieġa għall-SBBSs ma tidhirx ċara mill-ewwel (6). Il-Kumitat jikkunsidra li huwa indispensabbli li jkun hemm djalogu u li ssir konsultazzjoni mal-partijiet ikkonċernati kollha sabiex b’mod konġunt jiġu żviluppati soluzzjonijiet kostruttivi.

3.8.

Mingħajr preġudizzju għall-kummenti li saru hawn fuq u hawn taħt, il-qafas regolatorju propost għall-SBBSs b’mod ġenerali jista’ jiddependi fuq l-appoġġ tal-Kumitat, b’mod partikolari għaliex huwa jwaqqaf il-penalizzazzjoni attwali ta’ strumenti simili u fl-istess waqt jadotta approċċ ta’ “analiżi komparattiva”.

3.9.

Fost affarijiet oħra, il-Kumitat jappoġġja wkoll il-fatt li l-SBBSs jinħolqu u jinħarġu minn entitajiet tas-settur privat. Jidher li tkun xi ħaġa tajba li l-emittent għandu jkun entità bi skop speċjali (SPE) li ma jwettaq l-ebda attività oħra, peress li dan jagħmel l-affarijiet iktar ċari għal kulħadd. Dan jagħmillek ħajtek aktar ċara għal kulħadd.

3.10.

L-inklużjoni obbligatorja ta’ bonds sovrani denominati fil-euro mill-Istati Membri kollha fiż-żona tal-euro, b’mod proporzjonat għall-piż ekonomiku tagħhom (7), tikseb id-distribuzzjoni u d-diversifikazzjoni msemmija fil-punt 3.3. Barra minn hekk, l-inklużjoni ta’ ċerti bonds sovrani tagħmilhom iktar attraenti għal investituri internazzjonali. Dan japplika b’mod partikolari għal bonds sovrani minn ċerti pajjiżi li kieku jinħarġu fi swieq iżgħar u inqas likwidi.

3.11.

Fid-dawl tal-importanza tal-inklużjoni obbligatorja tal-bonds sovrani mill-Istati Membri kollha b’mod proporzjonat għall-piż ekonomiku tagħhom imsemmija hawn fuq, il-Kumitat kieku jinvestiga s-sistema attwali tal-awtoċertifikazzjoni minn korpi emittenti. Tirriżulta l-mistoqsija dwar jekk għandux ikun hemm monitoraġġ iktar strett u minn qabel mill-ESMA.

3.12.

Huwa importanti wkoll li l-istrument il-ġdid ma jinvolvix il-kondiviżjoni tar-riskji u tat-telf bejn l-Istati Membri fiż-żona tal-euro: ir-riskji u t-telf jiġġarrbu bis-sħiħ mill-investituri fl-SBBSs.

3.13.

Bħala l-istituzzjoni emittenti, l-SPE toħroġ serje ta’ titoli li tirrappreżenta pretensjonijiet dwar ir-rikavati mill-portafoll sottostanti. Dawn it-titoli jġorru riskji differenti, fejn is-“segmenti superjuri” (8) jġorru l-inqas riskju u s-“segmenti minuri” jġorru l-ogħla riskju. Fil-prattika, jidher li s-segmenti superjuri jistgħu jitqiegħdu biss fis-suq jekk jinstabu biżżejjed investituri għas-segmenti minuri (9). Dan jagħmel kwalunkwe ħruġ arbitrarju u prekarju, u huwa nuqqas li jxekkel is-suċċess potenzjali tal-SBBSs.

3.14.

Barra minn hekk, tirriżulta wkoll il-mistoqsija dwar jekk l-SBBSs hux se jaħdmu b’mod effettiv fiċ-ċirkostanzi kollha. Kif se tkun il-prestazzjoni tagħhom fi żminijiet ta’ kriżi ġenerali, jew ta’ kriżi fi Stat Membru wieħed jew iktar? Din hija mistoqsija importanti, meta jitqies li avvenimenti riċenti għal darb’oħra juru li s-swieq finanzjarji jirreaġixxu malajr għal sitwazzjonijiet bħal din.

3.15.

Huwa importanti wkoll li jiġi ċċarat x’se jkun l-impatt jekk jinħoloq suq tal-SBBS flimkien ma’ suq eżistenti għall-bonds sovrani tal-Istati Membri individwali. Jirriżultaw diversi mistoqsijiet f’dan ir-rigward: pereżempju, se jkun hemm volumi suffiċjenti disponibbli fiċ-ċirkostanzi kollha? U jekk ma jkunx hemm? Il-ħolqien ta’ suq addizzjonali mhux se jwassal għal frammentazzjoni?

3.16.

Il-qafas regolatorju jippermetti wkoll lill-faddala u lill-konsumaturi jakkwistaw u jżommu SBBSs (10). Peress li dawn huma prodotti partikolarment kumplessi, dak li jkun jista’ jkollu t-tentazzjoni li ma jippermettix dan, iżda jaf ikun meħtieġ approċċ iktar sfumat, li permezz tiegħu dawn għandhom jiġu pprojbiti biss milli jakkwistaw “segmenti minuri”, proprju għaliex jistgħu jinvolvu wkoll riskji maġġuri. Jista’ jkun każ differenti għal “segmenti superjuri”, li jippreżentaw riskju baxx u li żgur għandhom xi elementi komuni mal-parteċipazzjonijiet diretti tal-bonds sovrani mill-istess faddala u konsumaturi. Il-Kumitat jitlob li jingħata iktar ħsieb dwar din il-kwistjoni.

3.17.

Fl-aħħar nett, il-Kumitat iqis li tkun xi ħaġa għalkollox tajba li, għall-finijiet tal-applikazzjoni tar-regolament, l-SBBSs jiġu ttrattati bħala ekwivalenti għal bonds sovrani nazzjonali denominati fil-euro miż-żona tal-euro (esponimenti sovrani). Dan għandu jippermetti lill-investituri mis-settur finanzjarju jinvestu fl-SBBSs taħt l-istess kundizzjonijiet għall-bonds sovrani sottostanti taż-żona tal-euro.

3.18.

B’mod ġenerali, filwaqt li jikkunsidra l-kummenti kollha ta’ hawn fuq, il-Kumitat jemmen li, f’termini kunċettwali, l-idea ta’ SBBSs hija waħda attraenti, iżda l-mod kif din tiġi żviluppata fil-proposti tippreżenta stampa iktar imħallta u tqajjem għadd ta’ kwistjonijiet. Barra minn hekk, il-kummenti u r-risposti kritiċi li saru mill-parteċipanti tas-suq u minn partijiet ikkonċernati ewlenin oħra għandhom jingħataw tweġiba. Madankollu, b’mod ġenerali l-Kumitat jaqbel mal-Kummissjoni li tweġiba “xierqa” fil-prattika tista’ tinstab biss billi l-kunċett jiġi ttestjat fis-swieq “reali”.

---

(1)  COM(2018) 339 final

(2)  Ħlief f’każijiet eċċezzjonali bħall-abbuż tad-deżinjazzjoni “SBBS”.

(3)  F’dak il-każ, ir-rekwiżiti regolatorji jkunu iktar stretti.

(4)  ĠU C 81, 2.3.2018, p. 117; ĠU C 237, 6.7.2018, p. 46, u ĠU C 177, 18.5.2016, p. 21.

(5)  SWD(2018) 252 final, p. 70 (mhux disponibbli bil-Malti).

(6)  Għal iktar dettalji dwar dan it-tħassib u dawn il-kummenti, ara l-punt 3 tal-memorandum ta’ spjegazzjoni tal-abbozz tar-Regolament (p. 6).

(7)  Ara l-Artikolu 4(2) tal-proposta għal regolament u, għal figuri li jikkonċernaw il-piż ekonomiku tal-Istat Membru kkonċernat, https://www.ecb.europa.eu/ecb/orga/capital/html/index.mt.html

(8)  Is-segmenti superjuri jiffurmaw l-ikbar parti tal-ħruġ, u s-segmenti minuri l-iżgħar parti.

(9)  Is-segmenti minuri normalment jiksbu redditu ogħla għal dan ir-riskju ogħla.

(10)  Ara l-Artikolu 3(6) tal-abbozz tar-Regolament.