Proposta għal DIRETTIVA TAL-PARLAMENT EWROPEW U TAL-KUNSILL li temenda d-Direttivi tal-Kunsill 78/660/KEE u 83/349/KEE fir-rigward tad-divulgazzjoni ta’ informazzjoni mhux finanzjarja u dwar id-diversità minn ċertu kumpaniji u gruppi kbar /* COM/2013/0207 final - 2013/0110 (COD) */
MEMORANDUM TA’ SPJEGAZZJONI 1. KUNTEST TAL-PROPOSTA Id-Direttivi dwar il-Kontabilità[1] (minn
hawn ’il quddiem id-"Direttivi") jittrattaw it-tħejjija
tar-rapporti finanzjarji annwali u konsolidati u rapporti relatati
magħhom. B'mod partikolari, l-Artikolu 46(1)(b) tar-Raba' Direttiva
jipprovdi li, fejn xieraq u safejn meħtieġ għal fehim
tal-iżvilupp, il-prestazzjoni jew il-pożizzjoni tal-kumpanija,
ir-rapport annwali għandu jkun fih ukoll informazzjoni mhux finanzjarja,
li tinkludi informazzjoni dwar kwistjonijiet ambjentali u tal-ħaddiema. Barra minn hekk, l-Artikolu 46a ta’ din
id-Direttiva jistabbilixxi regoli għal kontenut tar-rapport dwar
il-governanza korporattiva li għandha titħejja minn kumpaniji
elenkati. L-opportunità li ttejjeb it-trasparenza tal-informazzjoni
soċjali u ambjentali pprovduti minn kumpaniji fis-setturi kollha, sabiex
jiġi żgurat ambjent ekwu, ġie rikonoxxut mill-Kummissjoni fl-Att
dwar is-Suq Uniku[2]
u kien imtenni fil-Komunikazzjoni "Strateġija rinnovata tal-UE
2011-14 għar-Responsabbiltà Soċjali Korporattiva”[3]. Din
il-proposta twassal għal waħda mill-impenji prinċipali
tal-istrateġija mġedda. Il-Komunikazzjoni tiddefinixxi s-CSR
bħala “ir-responsabbiltà tal-intrapriżi għall-impatt
tagħhom fuq is-soċjetà”. Hija tirrikonoxxi li l-iżvilupp
tagħha għandu jitmexxa mill-impriżi stess, u li l-kumpaniji
għandhom ikollhom fis-seħħ proċess sabiex jintegraw
il-preokkupazzjonijiet soċjali u ambjentali fl-operazzjoni
kummerċjali u l-istrateġija tagħhom. It-trasparenza mhux
finanzjarja hija għalhekk element kruċjali ta’ kwalunkwe politika
tas-CSR. Trasparenza mtejba tista’ tgħin
lill-kumpaniji biex jiġġestixxu aħjar ir-riskji u
l-opportunitajiet mhux finanzjarji, u b’hekk itejbu l-prestazzjoni mhux
finanzjarja tagħhom. Fl-istess ħin, informazzjoni mhux finanzjarja
tintuża minn organizzazzjonijiet tas-soċjetà ċivili u
komunitajiet lokali biex jivvalutaw l-impatt u r-riskji marbutin
mal-operazzjonijiet ta’ kumpanija. Barra minn hekk, hija tippermetti li
l-investituri jqisu aħjar il-kunsiderazzjonijiet tas-sostenibilità u
l-prestazzjoni fit-tul. Madanakollu, il-konsultazzjonijiet urew li
għadd limitat biss ta' kumpaniji kbar tal-UE regolarment jiddivulgaw
informazzjoni mhux finanzjarja, u l-kwalità tal-informazzjoni divulgata tvarja
ħafna, li jagħmilha diffiċli għall-investituri u
l-partijiet interessati biex jifhmu u jqabblu l-pożizzjoni u
l-prestazzjoni tal-kumpaniji. Din il-proposta tistabbilixxi
għaldaqstant rekwiżit għal ċerti kumpaniji kbar li
jiddivulgaw informazzjoni relevanti mhux finanzjarja u dwar id-diversità, biex
jiżguraw ambjent ekwu madwar l-UE. Madankollu, hemm bżonn ta’
approċċ flessibbli u mhux intrusiv. Il-kumpaniji jistgħu
jużaw oqfsa tar-rapportar eżistenti nazzjonali jew internazzjonali u
jżommu marġini ta' manuvrar biex jiddefinixxu l-kontenut tal-politiki
tagħhom, u l-flessibbiltà biex jiddivulgaw l-informazzjoni f’mod utli u
rilevanti. Meta l-kumpaniji jqisu li xi oqsma ta’ politika mhumiex rilevanti
għalihom, se jitħallew jispjegaw għaliex dan huwa l-każ,
aktar milli jkunu mġiegħla jipproduċu politika. Il-Parlament Ewropew, fiż-żewġ
riżoluzzjonijiet tiegħu dwar "Ir-Responsabilità Soċjali
Korporattiva: imġiba kummerċjali responsabbli u trasparenti u tkabbir
sostenibbli[4]
u “Ir-Responsabilità Soċjali Korporattiva: il-promozzjoni tal-interessi
tas-soċjetà u triq lejn l-irkupru sostenibbli u inklużiv”[5]
rispettivament, għaraf il-ħtieġa ta’ żieda fit-trasparenza
f’dan il-qasam u talab lill-Kummissjoni biex tressaq proposta
leġiżlattiva. Fuq dan l-isfond, din il-proposta ssegwi
l-għanijiet ewlenin li ġejjin: (1)
Li tiżdied it-trasparenza ta' ċerti
kumpaniji, u li jiżdiedu r-rilevanza, il-konsistenza, u l-kumparabbiltà
ta’ informazzjoni mhux finanzjarja attwalment divulgata, billi
jissaħħu u jkunu ċċarati r-rekwiżiti eżistenti. (2)
Li tiżdied id-diversità fil-bordijiet ta’
kumpaniji permezz ta’ trasparenza msaħħa sabiex tiffaċilita
s-sorveljanza effettiva tal-maniġment u l-governanza robusta
tal-kumpanija. (3)
Li jiżdiedu r-responsabbiltà u l-prestazzjoni
tal-kumpanija , u l-effiċjenza tas-Suq Uniku L-approċċ attwali li tiġi
divulgata informazzjoni mhux finanzjarja fid-Direttivi tal-Kontabbiltà ma kienx
effikaċi biżżejjed. Il-biċċa l-kbira tal-partijiet
ikkonċernati kkonsultati kkunsidraw li l-obbligu stabbilit mid-Direttiva
dwar il-Kontabilità, mhuwiex ċar biżżejjed u jista’
jippreġudika l-inċertezza legali. Rekwiżiti iktar ċari u fokus iktar
b’saħħtu fuq kwistjonijiet topiċi importanti huma
għaldaqstant meħtieġa għas-suċċess fit-tul
tal-kumpanija. Xi Stati Membri żviluppaw leġiżlazzjoni nazzjonali
li tmur lil hinn mir-rekwiżiti tad-Direttivi tal-Kontabilità. Madanakollu,
ir-rekwiżiti nazzjonali huma pjuttost diversi, u dan iżid fin-nuqqas
ta’ ċarezza għal kumpaniji u investituri li joperaw madwar is-Suq
Intern Xi Stati Membri għandhom mudelli “ta’
rappurtar jew spjegazzjoni” privileġġati, fejn kumpaniji jistgħu
jagħżlu bejn ir-rappurtar reali jew inkella, jiddivulgaw
ir-raġunijiet sabiex ma jagħmlux dan. Oħrajn jistabbilixxu
rekwiżit ġuridiku ċar, li jista’ jkun preskrittiv sew. Xi Stati
Membri jimmiraw lejn kumpaniji kbar, filwaqt li oħrajn jiffukaw fuq
ċerti kumpaniji elenkati jew kumpaniji tal-gvern biss. Xi Stati Membri
jirreferu għal linji gwida internazzjonali (għalkemm ta’ spiss
differenti), filwaqt li oħrajn qed jiżviluppaw linji gwida nazzjonali
proprji ta’ rappurtar. Dan il-mudell varjat wassal għal frammentazzjoni
tal-oqfsa leġiżlattivi madwar l-UE. Huwa għalhekk li din
il-proposta timmira li tiżgura kundizzjonijiet ekwi, li tillimita
l-ispejjeż għal intrapriżi li joperaw f’aktar minn Stat Membru
wieħed, u li tiżgura lill-invistituri aċċess eħfef u
aktar mifrux għal informazzjoni kruċjali u utli. Barra minn hekk, diversità insuffiċjenti
fil-bordijiet tista’ twassal għal ċertu similarita fl-opinjonijiet
tal-membri tal-bord tad-diretturi (il-fenomenu msejjaħ
"konfluwenza") u iktar reżistenza għal ideat innovattivi.
Dan jista’ jwassal għal impatt negattiv fuq l-isfida u s-sorveljanza
tal-maniġment mill-bord tad-diretturi u għalhekk fuq il-prestazzjoni
tal-kumpaniji Iktar trasparenza tal-politiki dwar id-diversità jistgħu
wkoll jagħtu kontribut konsiderevoli għall-promozzjoni ta' trattament
ugwali u għall-ġlieda kontra kwalunkwe diskriminazzjoni fil-korpi
fejn jittieħdu d-deċiżjonijiet tal-kumpaniji kkonċernati u
lil hinn. Diskriminazzjoni abbażi ta’ reliġjon jew twemmin,
diżabilità, età jew orjentazzjoni sesswali fir-rigward tal-impjieg jew
professjoni hija pprojbita mid-Direttiva 2000/78/KE. Diskriminazzjoni
abbażi ta' ġeneru hija projbita fl-impjieg u fil-professjoni skont
id-Direttiva 2006/54/KE. Diskriminazzjoni abbażi ta' razza jew
oriġini etnika fl-impjieg hija pprojbita mid-Direttiva 2000/43/KE. Il-problemi identifikati jistgħu
jaffettwaw il-prestazzjoni kumplessiva tal-kumpaniji, ir-responsabbiltà
tagħhom, il-kapaċità tal-investituri biex jivvalutaw u jqisu b'mod
xieraq u f'waqtu l-informazzjoni kollha rilevanti, u l-effiċjenza
tas-swieq finanzjarji tal-UE. B’konsegwenza ta’ dan, il-potenzjal tas-Suq Uniku
għat-tkabbir sostenibbli u l-impjiegi jistgħu mhuc dejjem ikunu sfruttati
bis-sħiħ. 2. RIŻULTATI
TAL-KONSULTAZZJONIJIET MAL-PARTIJIET INTERESSATI U VALUTAZZJONIJIET TAL-IMPATT Konsultazzjoni mal-partijiet
konċernati u interessati Is-servizzi tal-Kummissjoni żammew
djalogi regolari u wiesa' mal-partijiet interessati matul il-proċedura li
wasslet għal din il-proposta għal emenda. L-għan kien li
jinġabru l-opinjonijiet mill-partijiet interessati kollha, fosthom
mill-preparaturi, l-utenti, l-organizzazzjonijiet mhux governattivi,
eċċ. Id-djalogu seħħ permezz ta’: –
Żewġ konsultazzjonijiet pubbliċi,
rispettivament dwar "Divulgazzjoni ta’ informazzjoni mhux finanzjarja
mill-kumpaniji" u dwar "Qafas ta' governanza korporattiva tal-UE.
Dwar informazzjoni mhux finanzjarja, maġġoranza kumplessiva
tal-partijiet interessati sostnew il-bżonn li jitjieb il-qafas
leġiżlattiv attwali, minħabba li dan jista' jkun ta'
benefiċċju kemm għal dawk li jħejju l-informazzjoni kif
ukoll għall-utenti tagħha. Dwar id-diversità, il-biċċa
l-kbira ta' dawk li wieġbu għall-konsultazzjoni dwar “Qafas ta’
governanza korporattiva tal-UE" urew appoġġ ċar
għad-divulgazzjoni tal-politiki dwar id-diversità tal-kumpaniji. Huma
qiesu li aktar trasparenza għandha tippermetti lill-investituri
jieħdu deċiżjonijiet aktar infurmati u għandha tgħin
biex jonqos il-fenomenu ta' "konfluwenza". –
Grupp ta' esperti ad hoc magħmul minn 16-il
membru b’esperjenza u sfond differenti, u –
Bosta laqgħat mal-partijiet interessati u
r-rappreżentanti tal-Istati Membri Valutazzjoni tal-impatt Il-valutazzjoni tal-impatt li saret
mis-servizzi tal-Kummissjoni identifikat żewġ kwistjonijiet ewlenin
dwar (1) it-trasparenza mhux adegwata ta' informazzjoni mhux finanzjarja u (2)
in-nuqqas ta' diversità fil-bordijiet tad-diretturi. Trasparenza Inadegwata ta’ Informazzjoni
mhux Finanzjarja Ċerti kumpaniji naqsu milli jissodisfaw
b’mod adegwat id-domanda dejjem tikber mill-partijiet interessati (inklużi
l-investituri, l-azzjonisti, l-impjegati u organizzazzjonijiet tas-soċjetà
ċivili) għal trasparenza mhux finanzjarja. Ġew enfasizzati
kwistjonijiet speċifiċi rigward kemm il-kwantità u l-kwalità
tal-informazzjoni. –
Il-kwantità tal-informazzjoni: Huwa stmat li ~ 2500 biss mit-total ~
42 000 kumpanija kbira tal-UE jiddivulgaw formalment informazzjoni mhux
finanzjarja fuq bażi annwali –
Il-kwalità tal-informazzjoni: kumplessivament, l-informazzjoni divulgata
minn kumpaniji ma tissodisfax il-bżonnijiet tal-utenti. L-analiżi mwettqa mis-servizzi
tal-Kummissjoni, identifikat falliment tas-suq kif ukoll falliment regolatorju
bħala kawżi sottostanti tal-problema. L-ewwel nett, inċentivi
tas-suq jidhru insuffiċjenti jew irregolari. Minkejja ż-żieda
fid-domanda għal informazzjoni mhux finanzjarja, il-benefiċċji
relatati mad-divulgazzjoni mhux finanzjarja huma perċepiti minn xi
partijiet interessati bħala fit-tul u diffiċli li jiġu kkwantifikati
b’mod preċiż, filwaqt li l-kosti fit-terminu qasir huma aktar
ċari u faċilment jitkejlu. Xi kumpaniji, għalkemm
konċettwalment jirrikonoxxu l-benefiċċji ta’ rappurtar mhux
finanzjarju, jistgħu jkunu inqas inklinati li jsegwu b’mod attiv politiki
f’dan il-qasam minħabba din il-perċezzjoni. It-tieni nett, ir-reazzjonijiet regolatorji,
kemm fuq livell tal-UE kif ukoll fuq livell tal-Istati Membri, ma kinux
effettivi biżżejjed fit-trattament ta’ din il-problema. Kienu kkunsidrati għadd ta’
għażliet biex itejbu s-sitwazzjoni attwali, inkluż
it-tisħiħ tar-rekwiżit eżistenti, l-introduzzjoni ta’
rekwiżiti ġodda għal rappurtar dettaljat, jew it-twaqqif ta’
standard tal-UE. Fid-dawl tal-valutazzjoni ta' dawn l-għażliet ta'
politika, deher li l-aħjar għażla tkun it-tisħiħ
tal-obbligu eżistenti, billi tintalab dikjarazzjoni mhux finanzjarja
fir-Rapport Annwali. Diversità insuffiċjenti tal-Bord Il-bordijiet tal-kumpaniji b’membri li
għandhom l-istess sfond edukattiv u professjonali, oriġini
ġeografika, età jew ġeneru, jistgħu jkunu ddominati minn
“konfluwenza” ristretta. Dan jista’ jikkontribwixxi għan-nuqqas ta' sfida
effettiva tad-deċiżjonijiet tal-maniġment, peress li n-nuqqas
ta’ opinjonijiet, valuri, u kompetenzi diversi jista’ jwassal għal inqas
dibattitu, ideat u sfida fit-tmexxija tal-kumpanija. Jista' jwassal ukoll biex
ikun aktar diffiċli li jiġu aċċettati ideat innovattivi
proposti mill-maniġment. Id-diversità insuffiċjenti tal-bord hija
marbuta fuq kollox ma’ inċentivi insuffiċjenti tas-suq għall-kumpaniji
biex ibiddlu s-sitwazzjoni. F'dan ir-rigward, prattiki ta’ reklutaġġ
inadegwati għal membri tal-bord ħafna drabi magħżul minn
grupp żgħir ta’ nies, jikkontribwixxu sabiex tissokta
l-għażla ta' membri li għandhom profili simili. Element
ieħor li jsaħħaħ il-problema huwa trasparenza inadegwata
rigward id-diversità tal-bord, peress li l-livell ta' informazzjoni u l-limitu
safejn din l-informazzjoni hija disponibbli għal pubbliku ġenerali
ta’ spiss ikunu insuffiċjenti. Din id-diversità insuffiċjenti tal-bord u
nuqqas ta' trasparenza jistgħu għalhekk jirriżultaw f'kumpaniji
li jkunu mmaniġġjati inqas tajjeb, inqas inklussivi u inqas
innovattivi, u għalhekk jikkontribwixxu inqas għat-tkabbir. Fid-dawl
tal-miri tal-UE 2020 għat-tkabbir inklużiv u sostenibbli,
il-Kummissjoni kkunsidrat għadd ta’ alternattivinaħseb hawn
importanti l-konsitenza - jew għażliet jew alternattivi. ġieli
użajt opzjoni wkoll! biex tindirizza dawn il-problemi. Fid-dawl
tal-valutazzjoni ta' dawn l-alternattivi ta' linja politika, deher li
l-alternattiva l-aktar xierqa f’dan l-istadju tkun id-divulgazzjoni
tal-politika tad-diversità. Din hija wkoll l-alternattiva ppreferuta
mill-maġġoranza tal-partijiet interessati meta mqabbla ma’
alternattivi oħra bħal politika obbligatorja dwar id-diversità jew
ma’ azzjoni li tiffoka biss fuq il-politika tar-reklutaġġ. Komplimentari għal dawn
id-dispożizzjonijiet, fl-14 ta’ Novembru 2012
il-Kummissjoni diġà pproponiet leġiżlazzjoni bil-għan li
jintlaħaq l-għan ta’ 40% għas-sess inqas rappreżentat f’pożizzjonijiet
mhux eżekuttivi ta’ membru tal-bord fil-kumpaniji kkwotati fil-Borża,
bl-eċċezzjoni ta’ intrapriżi żgħar u ta’ daqs medju[6]. 3. L-ELEMENTI LEGALI
TAL-PROPOSTA Emenda proposta tad-Direttivi Il-proposta tieħu l-forma ta' emenda
għall-Artikolu 46 tar-Raba' Direttiva u għall-Artikolu 36
tas-Seba' Direttiva li tittratta d-divulgazzjoni ta' informazzjoni mhux
finanzjarja. Fir-rigward tar-rekwiżit ġdid dwar id-diversità
fil-bordijiet, huwa propost li jiġi emendat l-Artikolu 46a tar-Raba'
Direttiva. Id-Direttivi dwar il-Kontabbiltà jirregolaw
l-informazzjoni pprovduta fir-rapporti finanzjarji tal-kumpaniji kollha
b'responsabbiltà limitata li huma inkorporati fil-liġi ta' Stat Membru jew
fiż-żona Ekonomika Ewropea (ŻEE). Peress li l-Artikolu 4(5)
tad-Direttiva dwar it-Trasparenza jirreferi għall-Artikolu 46
tar-Raba’ Direttiva u għall-Artikolu 36 tas-Seba’ Direttiva, l-emendi
proposti għal dawn id-dispożizzjonijiet se jkopru wkoll
lill-kumpaniji elenkati fis-swieq regolati tal-UE anke jekk ikunu rreġistrati
f'pajjiż terz. Bażi ġuridika, sussidjarjetà u
proporzjonalità Il-proposta hija bbażata fuq
l-Artikolu 50(1) tat-Trattat, li huwa l-bażi ġuridika
għall-adozzjoni ta’ miżuri tal-UE mmirati għall-kisba ta’ Suq
Intern fil-liġi tal-kumpaniji. Il-proposta tipprevedi li kumpaniji kbar
għandhom jiddivulgaw informazzjoni mhux finanzjarja taħt sett ta'
rekwiżiti imfassla biex tiżdied it-trasparenza bl-għan li
jsaħħu t-trasparenza u r-responsabbiltà tal-kumpanija filwaqt li jillimitaw
kwalunkwe piż amministrttiv eċċessiv. Skont il-prinċipju tas-sussidjarjetà l-UE
għandha taġixxi biss fejn tkun tista' twassal għal
riżultati aħjar minn intervent fil-livell tal-Istati Membri u
l-azzjoni għandha tkun limitata għal dak neċessarju u proporzjonat
sabiex jinkisbu l-objettivi tal-politika segwita. Diversi Stati Membri
riċentement adottaw leġiżlazzjoni li tirrikjedi żvelar
addizzjonali f’dan il-qasam. Madankollu, ir-rekwiżiti nazzjonali jidhru
differenti b’mod sinifikanti, li jwasslu għal diffikultajiet biex
il-kumpaniji jiġu benchmarked madwar is-Suq Intern. L-objettivi ta’ din
l-emenda huma tali li ma jistgħux jiġu ssodisfati b'azzjoni
unilaterali fil-livell tal-Istati Membri. Iktar trasparenza m’għandhiex
tirriżulta f’piż amministrattiv mhux meħtieġ. Kumpaniji
iżgħar jiffaċċjaw iktar diffikultajiet biex jiġbru u
janalizzaw l-informazzjoni. Skont il-prinċipju “l-ewwel aħseb
fiċ-ċokon”, ir-rekwiżiti ta’ żvelar skont din id-Direttiva
ma għandhomx japplikaw għal kumpaniji li d-daqs tagħhom huwa
taħt livell definit. F’dak li jirrigwarda l-kumpaniji l-kbar,
id-divulgazzjoni ta' informazzjoni mhux finanzjarja jeħtieġ li ssir
iktar disponibbli, utli, u konsistenti fil-livell tal-UE, peress li
l-attivitajiet ta' dawn il-kumpaniji spiss huma mifruxa mal-UE kollha u rilevanti
għall-investituri u partijiet interessati oħra fis-suq intern kollu.
Madankollu, minbarra r-rekwiżit armonizzat ta’ informazzjoni konsistenti
komuni għas-Suq Uniku, l-Istati Membri għandu jkollhom grad ta’
flessibilità fir-rigward tar-rekwiżiti ta’ rappurtar addizzjonali.
Għal dan il-għan, emenda għad-Direttivi dwar il-Kontabbiltà huwa
l-iktar strument legali xieraq peress li jippermetti ċerta flessibbiltà
għall-Istati Membri. L-emendar tad-Direttivi jiżgura wkoll li
l-kontenut u l-forma tal-azzjoni proposta tal-UE ma tmurx lil hinn minn dak
meħtieġ u proporzjonat sabiex jinkiseb l-objettiv regolatorju. Spjegazzjoni Dettaljata tal-Proposta Informazzjoni
mhux finanzjarja L-obbligu attwali
stabbilit mill-Artikolu 46(1)(b) jipprovdi li kumpaniji kbar jiddivulgaw
informazzjoni mhux finanzjarja, inkluż dwar kwistjonijiet ambjentali u
tal-ħaddiema. Din il-miżura hija maħsuba biex tagħti
benefiċċji sinifikanti lill-kumpaniji, l-investituri u partijiet
interessati oħra li joperaw fis-Suq Uniku, u, għalhekk, tagħti
kontribut għal tkabbir u impjiegi li huma inklussivi u sostenibbli
fit-tul. L-Artikolu 1(a)
tal-proposta se jirrikjedi li ċerti kumpaniji kbar jiddivulgaw
dikjarazzjoni fir-Rapport Annwali tagħhom inkluża informazzjoni
materjali relatata talanqas ma’ kwistjonijiet ambjentali, soċjali, u
relatati mal-ħaddiema, ir-rispett tad-drittijiet tal-bniedem, aspetti
kontra l-korruzzjoni u t-tixħim. F’dawn l-oqsma, id-dikjarazzjoni se
tinkludi (i) deskrizzjoni tal-politiki tagħha, (ii) ir-riżultati u
(iii) aspetti marbutin mar-riskji. Biex tipprovdi din
l-informazzjoni, mingħajr ħsara għal rekwiżiti iktar
ambizzjużi stabbiliti fil-livell tal-Istati Membri, il-kumpanija tista’
sserraħ fuq oqfsa internazzjonali nazzjonali, jew ibbażati fl-UE,
bħall-Patt Globali tan-Nazzjonijiet Uniti, il-Prinċipji Gwida dwar
in-Negozju u d-Drittijiet tal-Bniedem li jimplimentaw il-Qafas tan-NU
“Ipproteġi, Irrispetta u Rrimedja,” il-Linji Gwida tal-OECD
għall-Intrapriżi Multinazzjonali, ISO 26000, id-Dikjarazzjoni Tripartitika
tal-ILO dwar il-prinċipji li jikkonċernaw intrapriżi
multinazzjonali u l-politika soċjali, u l-Inizjattiva Globali ta’
Rappurtar, u tiddivulga fuq liema qafas tkun imxiet. Kumpanija li ma tapplikax
xi politika speċifika f’wieħed jew aktar minn dawn l-oqsma se tkunu
meħtieġa tispjega għaliex dan huwa l-każ. Bħala tali,
il-miżura timmira lejn informazzjoni kummerċjalment rilevanti, utli
għall-finijiet ta' teħid ta’ deċiżjonijiet fil-kumpanija
kif ukoll għall-investituri u partijiet interessati oħra.
Il-miżura tippermetti aktar flessibbiltà u tevita piżijiet
amministrattivi mhux neċessarji fuq il-kumpaniji, b'mod partikolari fuq
l-iżgħar fosthom, li mhumiex suġġetti
għar-rekwiżiti l-ġodda ta’ divulgazzjoni. Il-kostijiet assoċjati
mad-divulgazzjoni neċessarja għal kumpaniji kbar huma proporzjonati
mal-valur u l-utilità tal-informazzjoni u d-daqs, l-impatt u l-kumplessità
tal-intrapriżi. B’mod partikolari, kif
speċifikat fl-Artikolu 1(a), l-obbligu japplika biss għal dawk
il-kumpaniji li l-għadd medju ta’ impjegati tagħhom jaqbeż
il-500, u jaqbżu jew total tal-karta tal-bilanċ ta' EUR 20
miljun jew fatturat nett ta’ EUR 40 miljun. Dan il-limitu, ogħla minn
dak attwalment applikat fid-Direttivi tal-Kontabbiltà (jiġifieri 250
impjegat) huwa bbilanċjat peress li jillimita kwalunkwe piż
amministrattiv u jiżgura ambitu xieraq għall-obbligi ta’ rrappurtar
mhux finanzjarju. Huwa kkalkulat li, abbażi ta’ dan, ir-rekwiżit
il-ġdid ikun ikopri madwar 18 000 kumpanija fl-UE. Barra minn hekk, kif
speċifikat fl-Artikolu 1(b), dawk il-kumpaniji li jippreparaw rapport
li jikkorrispondi għall-istess sena finanzjarja, għandhom jiġu
eżentati mill-obbligu li jipprovdu dikjarazzjoni mhux finanzjarja, sakemm
ir-rapport: (i) ikopri l-istess suġġetti u l-kontenut rikjesti mill-Artikolu 1(a),
(ii) jiddependi fuq oqfsa, nazzjonali, ibbażati fl-UE jew internazzjonali,
u (iii) jiġi anness mar-Rapport Annwali. Fl-aħħar
nett, l-Artikolu 1(c) se jeżenta lill-kumpaniji sussidjarji
mill-obbligu stabbilit mill-paragrafu 1(a), sakemm il-kumpanija
eżentata u s-sussidjarji tagħha huma kkonsolidati fir-rapport annwali
ta’ kumpanija oħra, u li r-rapport annwali konsolidat jissodisfa
r-rekwiżiti stipulati fl-Artikolu 1(a). Diversità Il-paragrafu 1(g) ġdid se
jesiġi minn kumpaniji elenkati kbar biex jipprovdu informazzjoni dwar
il-politika tad-diversità tagħhom, inklużi aspetti li
jikkonċernaw l-età, is-sess, id-diversità ġeografika, u l-isfond
edukattiv u professjonali. L-informazzjoni se tiġi inkluża
fid-dikjarazzjoni ta' governanza korporattiva u tkun trid tinkludi l-għanijiet
ta' din il-politika, l-implimentazzjoni tagħha u r-riżultati miksuba.
Kumpaniji li ma jkollhomx politika ta' diversità, se jkunu obbligati biss li
jispjegaw għalfejn dan hu l-każ. 4. IMPLIKAZZJONI BAĠITARJA
Il-proposta ma għandhiex implikazzjonijiet
għall-baġit tal-Komunità. 2013/0110 (COD) Proposal for a DIRETTIVA TAL-PARLAMENT EWROPEW U
TAL-KUNSILL li temenda d-Direttivi
tal-Kunsill 78/660/KEE u 83/349/KEE fir-rigward tad-divulgazzjoni ta’
informazzjoni mhux finanzjarja u dwar id-diversità minn ċertu kumpaniji u
gruppi kbar (Test b'rilevanza għaż-ŻEE) IL-PARLAMENT EWROPEW U L-KUNSILL
TAL-UNJONI EWROPEA, Wara li kkunsidrat it-Trattat dwar
il-Funzjonament tal-Unjoni Ewropea, u b’mod partikolari l-Artikolu 50(1)
tiegħu, Wara li kkunsidraw il-proposta tal-Kummissjoni
Ewropea, Wara t-trażmissjoni tal-abbozz tal-att
leġiżlattiv lill-Parlamenti nazzjonali, Wara li kkunsidraw l-opinjoni tal-Kumitat
Ekonomiku u Soċjali Ewropew[7],
Wara li kkunsidraw l-opinjoni tal-Kumitat
Ekonomiku u Soċjali Ewropew[8]
Filwaqt li jaġixxu skont
il-proċedura leġiżlattiva ordinarja, Billi: (1) Fil-Komunikazzjoni
tagħha lill-Parlament Ewropew, lill-Kunsill, lill-Kumitat Ekonomiku u
Soċjali Ewropew u lill-Kumitat tar-Reġjuni bit-titolu ‘l-Att dwar
is-Suq Uniku Tnax-il xprun sabiex jiġi stimulat it-tkabbir u r-rinfurzar
tal-fiduċja, “Flimkien għal tkabbir ġdid'",[9] adottata
fit-13 ta’ April 2011, il-Kummissjoni tidentifika l-bżonn
li tittejjeb it-trasparenza tal-informazzjoni soċjali u ambjentali
pprovduta minn kumpaniji fis-setturi kollha, sabiex jiġi żġurat
ambjent ekwu. (2) Il-ħtieġa li
titjieb id-divulgazzjoni tal-kumpanija tal-informazzjoni ambjentali u
soċjali, billi tiġi ppreżenta proposta leġiżlattiva
f'dan il-qasam, kienet imtennija fil-Komunikazzjoni mill-Kummissjoni
lill-Parlament Ewropew, lill-Kunsill, lill-Kumitat Ekonomiku u Soċjali Ewropew
u lill-Kumitat tar-Reġjuni bit-titolu “Strateġija rinnovata tal-UE
għall-2011-14 għar-Responsabilità Soċjali Korporattiva”[10] adottata
fil-25 ta' Ottubru 2011. (3) Il-Parlament Ewropew,
fir-riżoluzzjoni tiegħu tas-6 ta' Frar 2013 dwar
rispettivament, "ir-Responsabilità Soċjali Korporattiva: imġiba
kummerċjali responsabbli u trasparenti u tkabbir sostenibbli[11] u
“Ir-Responsabilità Soċjali Korporattiva: il-promozzjoni tal-interessi
tas-soċjetà u triq lejn l-irkupru sostenibbli u inklużiv[12],
għaraf l-importanza li n-negozji jiddivulgaw informazzjoni dwar
is-sostenibblità bħal fatturi soċjali u ambjentali, bil-għan li
jiġu identifikati r-riskji għas-sostenibbiltà u tiżdied
il-fiduċja bejn l-investitur u l-konsumatur, u talab lill-Kummissjoni biex
tressaq proposta dwar id-divulgazzjoni mhux finanzjarja mill-kumpaniji. (4) Il-koordinazzjoni ta’
dispożizzjonijiet nazzjonali dwar id-divulgazzjoni ta' informazzjoni mhux
finanzjarja fir-rigward ta' intrapriżi kbar b’responsabbiltà limitata hija
ta' importanza għall-interessi tal-kumpaniji, azzjonisti u partijiet
interessati oħra lkoll. Il-koordinazzjoni hija meħtieġa f'dawk
l-oqsma peress li l-biċċa l-kbira ta' dawn l-intrapriżi joperaw
f'aktar minn Stat Membru wieħed. (5) Huwa wkoll meħtieġ
li jiġi stabbilit ċertu rekwiżit ġuridiku minimu
fir-rigward tal-ammont ta' informazzjoni li għandha tkun disponibbli
għall-pubbliku mill-intrapriżi madwar l-Unjoni. Ir-rapporti annwali
għandhom jagħtu stampa ġusta u komprensiva tal-politiki,
ir-riżultati, u r-riskji tal-impriża. (6) Sabiex jissaħħu
l-konsistenza u l-komparabbiltà ta' informazzjoni mhux finanzjarja divulgata
madwar l-Unjoni, il-kumpaniji għandhom ikunu obbligati jinkludu
fir-rapport annwali tagħhom dikjarazzjoni mhux finanzjarja li jkun fiha
informazzjoni relatata talanqas ma’ kwistjonijiet ambjentali, soċjali u
kwistjonijiet relatati mal-ħaddiema, ir-rispett tad-drittijiet
tal-bniedem, u kwistjonijiet kontra l-korruzzjoni u t-tixħim. Din
id-dikjarazzjoni għandha tinkludi deskrizzjoni tal-politiki,
ir-riżultati, u r-riskji relatati ma’ dawk il-kwistjonijiet. (7) Biex jipprovdu din
l-informazzjoni, il-kumpaniji jistgħu jiddependu fuq oqfsa nazzjonali,
oqfsa bbażati fl-UE bħall-Iskema ta’ Ġestjoni u Awditjar
Ekoloġiċi (EMAS), u oqfsa internazzjonali bħall-Impatt Globali
tan-Nazzjonijiet Uniti (NU), il-Prinċipji Gwida dwar in-Negozju u
d-Drittijiet tal-Bniedem li jimplimentaw il-Qafas tan-NU “Ipproteġi,
Irrispetta u Rrimedja,” l-Organizzazzjoni għall-Kooperazzjoni u
l-Iżvilupp Ekonomiku (OECD), il-Linji Gwida għal Intrapriżi
Multinazzjonali, l-Organizzazzjoni Internazzjonali
għall-Istandardizzazzjoni (ISO) 26000, id-Dikjarazzjoni Tripartitika
tal-Organizzazzjoni Internazzjonali tax-Xogħol (ILO) dwar
il-prinċipji li jikkonċernaw l-intrapriżi multinazzjonali u
l-politika soċjali, u l-Inizjattiva Globali ta’ Rappurtar. (8) Il-Paragrafu 47
tad-dikjarazzjoni finali tal-Konferenza tan-Nazzjonijiet Uniti Rio +20,
"Il-Futur li Rridu"[13],
jirrikonoxxi l-importanza ta’ rappurtar korporattiv dwar is-sostenibbiltà u
jinkorġġixxi lill-kumpaniji, fejn xieraq, biex jikkunsidraw
l-integrazzjoni ta’ informazzjoni sostenibbli fiċ-ċiklu ta’ rappurtar
tagħhom. Jinkoraġġixxi wkoll lill-industrija, lill-gvernijiet
interessati u lill-partijiet interessati rilevanti, bl-appoġġ
tas-sistema tan-Nazzjonijiet Uniti, kif xieraq, biex jiżviluppaw mudelli
tal-aħjar prattika u jiffaċilitaw l-azzjoni għall-integrazzjoni
tal-informazzjoni finanzjarja u mhux finanzjarja billi jitqiesu l-esperjenzi
minn oqfsa diġà eżistenti. (9) L-aċċess
tal-investituri għall-informazzjoni mhux finanzjarja huwa pass
fid-direzzjoni tad-dħul fis-seħħ sal-2020 ta' inċentivi
tas-suq u tal-politika li jippremjaw l-investimenti tan-negozji
fl-effiċjenza, skont il-Pjan Direzzjonali għal Ewropa Effiċjenti
fir-Riżorsi[14]. (10) Il-Kunsill Ewropew tal-24 u
l-25 ta’ Marzu 2011 talab li jitnaqqas il-piż regolatorju
kumplessiv, partikolarment għall-intrapriżi ż-żgħar u
ta' daqs medju ("SMEs"), fuq livell Ewropew u nazzjonali u ssuġġerixxa
miżuri biex tiżdied il-produttività filwaqt li l-Istrateġija
Ewropa 2020 għal tkabbir intelliġenti, sostenibbli u
inklużiv għandha l-għan li ttejjeb l-ambjent tan-negozju
għall-SMEs u li tippromwovi l-internazzjonalizzazzjoni tagħhom.
Għalhekk, skont il-prinċipju “Aħseb l-Ewwel
fiż-Żgħir”, ir-rekwiżiti ta’ divulgazzjoni skont
id-Direttiva 78/660/KEE u d-Direttiva 83/349/KEE għandhom
japplikaw biss għal ċerti intrapriżi kbar u gruppi. (11) L-ambitu ta’ dawn
ir-rekwiżiti ta’ divulgazzjoni mhux finanzjarji għandu jkun definit
b'referenza għall-medja tal-għadd ta' impjegati, tal-assi totali u
tal-fatturat. L-SMEs għandhom ikunu eżentati minn rekwiżiti
addizzjonali, u l-obbligu li jiddivulgaw dikjarazzjoni mhux finanzjarja
fir-rapport annwali għandu japplika biss għal dawk il-kumpaniji li
l-għadd medju ta’ impjegati tagħhom jaqbeż il-500, u li
jaqbżu jew total ta’ EUR 20 miljun fil-karta tal-bilanċ jew
b'fatturat nett ta' EUR 40 miljun. (12) Xi kumpaniji u gruppi li
jaqgħu taħt l-ambitu tad-Direttiva 78/660/KEE u
d-Direttiva 83/349/KEE diġà qed iħejju rapporti mhux finanzjarji
fuq bażi volontarja. Dawk il-kumpaniji m'għandhomx ikunu
soġġetti għall-obbligu li jipprovdu dikjarazzjoni mhux
finanzjarja fir-rapport annwali, bil-kondizzjoni li r-rapport jikkorrispondi
għall-istess sena finanzjarja, ikopri mill-inqas l-istess kontenut
meħtieġ minn din id-Direttiva, u huwa anness mar-rapport annwali. (13) Bosta intrapriżi li
jaqgħu taħt l-ambitu tad-Direttiva 78/660/KEE huma membri ta’
gruppi ta' intrapriżi. Għandhom jitħejjew rapporti annwali
konsolidati sabiex l-informazzjoni dwar dawn il-gruppi ta’ intrapriżi tkun
tista' tingħata lil membri u lil partijiet terzi. Id-dritt nazzjonali li
jirregola r-rapporti annwali konsolidati għandu għalhekk jiġi
kkoordinat sabiex jintlaħqu l-għanijiet ta’ komparabbiltà u
konsistenza tal-informazzjoni li l-intrapriżi għandhom jippubblikaw
fl-Unjoni. (14) Kif rikjest
mill-Artikolu 51a(e) tad-Direttiva 78/660/KEE, ir-rapport
tal-awdituri statutorji għandu jkun fih ukoll opinjoni li tikkonċerna
l-konsistenza jew xort’oħra tar-rapport annwali, inkluża
informazzjoni mhux finanzjarja li tinsab fir-rapport annwali, mal-kontijiet
annwali għall-istess sena finanzjarja. (15) Id-diversità tal-kompetenzi u
l-fehmiet tal-membri tal-korpi amministrattivi, maniġerjali u
superviżorji ta' kumpaniji tiffaċilita fehim tajjeb
tal-organizzazzjoni u l-kwistjonijiet tan-negozju. Tippermetti lil membri ta'
dawn il-korpi biex jeżeċitaw sfida kostruttiva
tad-deċiżjonijiet tal-maniġment u biex ikunu aktar miftuħa
għal ideat innovattivi, li jindirizzaw is-similarità tal-fehmiet
tal-membri, il-fenomenu "raġunar gregarju". Tikkontribwixxi
għalhekk għas-sorveljanza effettiva tal-immaniġġjar u
l-governanza b’suċċess tal-kumpanija. Għalhekk, ikun importanti
li tittejjeb it-trasparenza rigward il-politika tad-diversità li l-kumpaniji
għandhom fis-seħħ. Din għandha tinforma lis-suq dwar
prattiki ta' governanza korporattiva u għalhekk tpoġġi pressjoni
indiretta fuq il-kumpaniji biex ikollhom bordijiet aktar diversifikati. (16) L-obbligu ta’ divulgazzjoni
tal-politiki tagħhom dwar id-diversità għal korpi amministrattivi,
maniġerjali u superviżorji tagħhom fir-rigward ta’ aspetti
bħalma huma l-età, is-sess, id-diversità ġeografika, l-isfond
edukattiv u professjonali għandhom japplikaw biss għal kumpaniji
elenkati kbar. Għalhekk kumpaniji żgħar u ta’ daqs medju li
jistgħu jiġu eżentati minn ċerti obbligi tal-kontabbiltà
skont l-Artikolu 27 tad-Direttiva 78/660/KEE ma għandhomx ikunu
koperti minn dan l-obbligu. Id-divulgazzjoni tal-politika dwar id-diversità
għandha tkun parti mid-dikjarazzjoni ta' governanza korporattiva, kif
stipulat fl-Artikolu 46a tad-Direttiva 78/660/KEE. Kumpaniji li ma
għandhomx tali politika dwar id-diversità, ma għandhomx ikunu
obbligati li jdaħħlu waħda fis-seħħ, iżda
għandhom jispjegaw b’mod ċar għalfejn dan hu l-każ. (17) Peress li l-objettiv ta’ din
id-Direttiva, jiġifieri li żżid ir-rilevanza, il-konsistenza u
l-komparabbiltà ta' informazzjoni divulgata minn kumpaniji fl-Unjoni, ma jistax
jintlaħaq b'mod suffiċjenti mill-Istati Membri, u jista’ għaldaqstant
minħabba l-impatt tiegħu jintlaħaq aħjar fil-livell
tal-Unjoni, l-Unjoni tista’ tadotta miżuri, skont il-prinċipju ta’
sussidjarjetà kif stipulat fl-Artikolu 5 tat-Trattat dwar l-Unjoni
Ewropea. Skont il-prinċipju tal-proporzjonalità, kif stipulat f’dak l-Artikolu,
din id-Direttiva ma tmurx lil hinn minn dak li huwa meħtieġ biex
jintlaħaq dak l-objettiv. (18) Din id-Direttiva tirrispetta
d-drittijiet fundamentali u tosserva l-prinċipji rikonoxxuti b'mod
partikolari mill-Karta tad-Drittijiet Fundamentali tal-Unjoni Ewropea,
inkluż il-libertà li wieħed ikollu negozju, ir-rispett
għall-ħajja privata u l-protezzjoni tad-dejta personali. Din
id-Direttiva għandha tiġi implimentata f’konformità ma’ dawn
id-drittijiet u prinċipji. (19) Id-Direttivi 78/660/KEE u 83/349/KEE
għandhom għalhekk jiġu emendati kif meħtieġ, ADOTTAW DIN ID-DIRETTIVA: Artikolu 1 Emendi lid-Direttiva 78/660/KEE Id-Direttiva 78/660/KEE hija emendata kif
ġej: (1)
L-Artikolu 46 huwa emendat kif ġej: (a)
Il-paragrafu 1 huwa sostitwit b’dan li
ġej: '1. (a) Ir-rapport annwali għandu jinkludi
analiżi ġusta tal-iżvilupp u l-prestazzjoni tan-negozju
tal-kumpanija u tal-pożizzjoni tagħha, kif ukoll deskrizzjoni
tar-riskji prinċipali u l-inċertezzi li taffaċċja. L-analiżi għandha tkun analiżi
bbilanċjata u komprensiva tal-iżvilupp u l-prestazzjoni tan-negozju
tal-kumpanija u l-pożizzjoni tagħha, bi proporzjon mad-daqs u
l-kumplessità tan-negozju; Għal kumpaniji li l-għadd medju ta'
impjegati matul is-sena finanzjarja jaqbeż il-500 u, fid-dati tal-karta
tal-bilanċ tagħhom, jaqbżu jew it-total tal-karta
tal-bilanċ ta’ EUR 20 miljun jew il-fatturat nett ta' EUR 40 miljun,
l-analiżi għandha tinkludi wkoll dikjarazzjoni mhux finanzjarja li
jkun fiha informazzjoni relatata talanqas ma’ kwistjonijiet ambjentali,
soċjali u tal-impjegati, ir-rispett tad-drittijiet tal-bniedem,
kwistjonijiet kontra l-korruzzjoni u t-tixħim, inklużi: (i) deskrizzjoni tal-politika segwita
mill-kumpanija fir-rigward ta' dawn il-kwistjonijiet; (ii) ir-riżultati ta’ dawn il-politiki; (iii) ir-riskji relatati ma' dawn il-kwistjonijiet
u kif il-kumpanija timmaniġġja dawk ir-riskji. Meta kumpanija ma ssegwix politiki fir-rigward ta’
waħda jew aktar minn dawn il-kwistjonijiet, għandha tipprovdi
spjegazzjoni għaliex ma tagħmilx dan. Meta tipprovdi informazzjoni bħal din
il-kumpanija, tista’ sserraħ fuq oqfsa nazzjonali, ibbażati fl-UE jew
internazzjonali u, jekk tagħmel hekk għandha tispeċifika fuq
liema oqfsa mxiet. (c) Rigward il-limitu meħtieġ
għall-fehim tal-iżvilupp, il-prestazzjoni jew il-pożizzjoni
tal-kumpanija, l-analiżi għandha tinkludi kemm l-indikaturi
prinċipali tal-prestazzjoni finanzjarji kif ukoll dawk mhux finanzjarji
relevanti għal dak in-negozju partikolari. (d) Meta tipprovdi l-analiżi
tagħha, ir-rapport annwali għandu, fejn xieraq, jinkludi referenzi
għal spjegazzjonijiet u spjegazzjonijiet addizzjonali tal-ammonti
rapportati fil-kontijiet annwali. (b)
Il-paragrafu 4 huwa sostitwit b’dan li
ġej: '4. Meta kumpanija tħejji rapport komprensiv
li jikkorrispondi għall-istess sena finanzjarja billi tuża oqfsa
nazzjonali, ibbażati fl-UE jew internazzjonali u li jkopri l-informazzjoni
prevista fil-paragrafu 1(b), għandha tkun eżentata mill-obbligu
li tħejji d-dikjarazzjoni mhux finanzjarja stipulata fil-paragrafu 1(b),
sakemm dan ir-rapport ikun parti mir-rapport annwali.’ (c)
Jiżdied il-paragrafu 5 li ġej: '5. Kumpanija li hija kumpanija sussidjarja
għandha tiġi eżentata mill-obbligi stabbiliti
fil-paragrafu 1(b), jekk il-kumpanija u s-sussidjarji tagħha huma
kkonsolidati fir-rapporti finanzjarji u rapport annwali ta’ kumpanija oħra
u dak ir-rapport annwali konsolidat jitfassal skont l-Artikolu 36(1)
tad-Direttiva 83/349/KEE.' (2)
L-Artikolu 46a huwa emendat kif ġej: (a)
Fil-paragrafu 1, jiżdied il-punt(g) li
ġej: '(g) deskrizzjoni tal-politika dwar id-diversità
tal-kumpanija għall-korpi amministrattivi, maniġerjali u
superviżorji tagħha fir-rigward ta’ aspetti bħalma huma l-età,
is-sess, id-diversità ġeografika, l-isfond edukattiv u professjonali,
l-għanijiet ta' din il-politika dwar id-diversità, kif ġiet
implimentata u r-riżultati fil-perjodu tar-rappurtar. Jekk il-kumpanija ma
għandhiex tali politika, id-dikjarazzjoni għandha tinkludi
spjegazzjoni ċara u mmotivata dwar għalfejn dan hu l-każ. ' (b)
Jiżdied il-paragrafu 4 li ġej: '4. Il-punt (g) tal-paragrafu 1 ma
japplikax għal kumpaniji skont it-tifsira tal-Artikolu 27. ' (3)
L-Artikolu 53a huwa sostitwit b'dan li
ġej: "Artikolu 53a L-Istati Membri ma għandhomx jagħmlu
disponibbli l-eżenzjonijiet stipulati fl-Artikolu 1a, 11,
l-Artikolu 27, il-punti (7a) u (7b) tal-Artikolu 43(1),
l-Artikolu 46(3), l-Artikolu 47 u l-Artikolu 51 ta’ din
id-Direttiva fil-każ ta' kumpaniji li t-titoli tagħhom huma ammessi
għan-negozjar f'suq regolat skont is-sens tal-punt (14) tal-Artikolu 4(1)
tad-Direttiva 2004/39/KE." Artikolu 2
Emendi lid-Direttiva 83/349/KEE Id-Direttiva 83/349/KEE għandha
tiġi emendata kif ġej: (4)
L-Artikolu 36 huwa emendat kif ġej: (a)
Il-paragrafu 1 huwa sostitwit b’dan li
ġej: '1. Ir-rapport annwali konsolidat
għandu jinkludi tal-anqas analiżi ġusta tal-iżvilupp u
l-prestazzjoni tan-negozju u tal-pożizzjoni tal-intrapriżi
inkluża fil-konsolidazzjoni meqjusa kollha kemm hi, flimkien
mad-deskrizzjoni tar-riskji u l-inċertezzi prinċipali li
jaffaċċjaw. L-eżami janalizza b’mod bilanċjat
l-iżvilupp u l-prestazzjoni tal-kummerċ u tal-pożizzjoni
tal-impriżi inklużi fil-konsolidazzjoni meqjusa kollha kemm hi,
konsistenti mad-daqs u l-kumplessità tan-negozju. Għal kumpaniji ewlenin ta’ intrapriżi li
għandhom jiġu kkonsolidati li flimkien jaqbżu għadd medju
ta' 500 impjegat matul is-sena finanzjarja, u fid-dati tal-karta
tal-bilanċ tagħhom, jaqbżu jew it-total tal-karta
tal-bilanċ ta’ EUR 20 miljun jew il-fatturat nett ta' EUR 40
miljun, l-analiżi għandha tinkludi wkoll dikjarazzjoni mhux
finanzjarja li jkun fiha informazzjoni relatata talanqas ma’ kwistjonijiet
ambjentali, soċjali u tal-impjegati, ir-rispett tad-drittijiet
tal-bniedem, kwistjonijiet kontra l-korruzzjoni u t-tixħim, inklużi: –
(i) deskrizzjoni tal-politika segwita
mill-kumpanija fir-rigward ta' dawn il-kwistjonijiet; –
(ii) ir-riżultati ta’ dawn il-politiki; –
(iii) ir-riskji relatati ma' dawn il-kwistjonijiet
u kif il-kumpanija timmaniġġja dawk ir-riskji. Fejn l-intrapriżi inklużi
fil-konsolidazzjoni meqjusa kollha kemm hi, ma jsegwux politiki fir-rigward ta’
kwistjoni waħda jew aktar minn dawn, il-kumpanija għandha tipprovdi
spjegazzjoni għaliex ma tagħmilx dan. Meta jipprovdi din l-informazzjoni, ir-rapport
annwali kkonsolidat jista’ juża oqfsa nazzjonali, ibbażati fl-UE jew
internazzjonali, u jekk jagħmel hekk, għandu jispeċifika fuq
liema oqfsa mexa. Sa fejn huwa neċessarju sabiex wieħed
jifhem dan l-iżvilupp, prestazzjoni jew pożizzjoni,
l-analiżi tkun tinkludi kemm l-indikaturi prinċipali tal-prestazzjoni
finanzjarji u mhux indikaturi prinċipali tal-prestazzjoni finanzjarji
rilevanti għan-negozju partikolari. Billi jipprovdi l-analiżi tiegħu,
ir-rapport annwali kkonsolidat għandu, fejn xieraq, jipprovdi referenzi
għal spjegazzjonijiet u spjegazzjonijiet addizzjonali ta’ ammonti
rappurtati fil-kontijiet ikkonsolidati. ' (b)
Il-paragrafi 4 u 5 li ġejjin huma
miżjuda: '4. Meta impriża prinċipali tħejji
rapport komprensiv li jikkorrispondi għall-istess sena finanzjarja, li
jirreferi għall-grupp kollu tal-intrapriżi kkonsolidati, billi
tuża oqfsa nazzjonali, ibbażati fl-UE jew internazzjonali u tkopri
l-informazzjoni prevista fit-tielet subparagrafu tal-paragrafu 1,
l-intrapriża prinċipali tkun eżentata mill-obbligu li
tħejji d-dikjarazzjoni mhux finanzjarja stabbilita fit-tielet subparagrafu
tal-paragrafu 1, sakemm tali rapport komprensiv huwa parti minn rapport
annwali kkonsolidat. 5. Intrapriża prinċipali li hija wkoll
intrapriża sussidjarja tkun eżentata mill-obbligi stabbiliti
fit-tielet subparagrafu tal-paragrafu 1, jekk l-impriża
eżentata u s-sussidjarji tagħha huma kkonsolidati fir-rapporti
finanzjarji u r-rapport annwali ta’ intrapriża oħra, u dak ir-rapport
annwali konsolidat jitfassal skont it-tielet subparagrafu tal-paragrafu 1.
' Artikolu 3
Traspożizzjoni 1. L-Istati Membri għandhom
idaħħlu fis-seħħ il-liġijiet, regolamenti u
dispożizzjonijiet amministrattivi neċessarji biex jikkonformaw ma’
din id-Direttiva sa mhux aktar tard mill-[…][15]. Għandhom jikkomunikaw minnufih
lill-Kummissjoni t-test ta' dawk id-dispożizzjonijiet. L-Istati Membri jistgħu
jipprovdu li d-dispożizzjonijiet li hemm referenza għalihom fl-ewwel
subparagrafu jkunu l-ewwel japplikaw għal impriżi li jaqgħu
taħt il-liġi ta' Stat Membru li t-titoli trasferibbli tiegħu
huma ammessi għan-negozjar f'suq regolat ta' kwalunkwe Stat Membru skont
it-tifsira tal-punt 14 tal-Artikolu 4(1)
tad-Direttiva 2004/39/KE tal-Parlament Ewropew u tal-Kunsill tal-21
ta' April 2004 dwar is-swieq fl-istrumenti finanzjarji għas-sena
finanzjarja li tibda fl-1 ta' Jannar 201_[16], u
għall-impriżi l-oħra kollha li jaqgħu fl-ambitu
tal-Artikoli 1 u 2 għas-sena finanzjarja li tibda
fl-1 ta' Jannar 201_[17].
Meta l-Istati Membri
jadottaw dawk id-dispożizzjonijiet, dawn għandhom jirreferu għal
din id-Direttiva jew ikunu akkumpanjati mit-tali referenza
fl-okkażżjoni tal-pubblikazzjoni uffiċjali tagħhom.
L-Istati Membri għandhom jiddeċiedu kif għandha ssir it-tali
referenza. 2. L-Istati Membri għandhom
jikkomunikaw lill-Kummissjoni t-test tad-dispożizzjonijiet ewlenin
tal-liġi nazzjonali li huma jadottaw fil-qasam kopert minn din
id-Direttiva. Artikolu 4 Dħul
fis-seħħ Din id-Direttiva tidħol
fis-seħħ fl-għoxrin jum wara l-pubblikazzjoni tagħha f'Il-Ġurnal
Uffiċjali tal-Unjoni Ewropea. Artikolu 5 Id-destinatarji Din
id-Direttiva hija indirizzata lill-Istati Membri. Magħmul fi Strasburgu, Għall-Parlament
Ewropew Għall-Kunsill Il-President Il-President [1] Ir-raba
'Direttiva tal-Kunsill tal-25 ta' Lulju 1978 dwar il-kontijiet
annwali ta' ċerti tipi ta' kumpanniji (78/660/KEE); Is-Seba' Direttiva
tal-Kunsill tat-13 ta' Ġunju 1983 dwar il-kontijiet
konsolidati (83/349/KEE). [2] "L-Att
dwar is-Suq Uniku - Tnax-il xprun sabiex jiġi stimulat it-tkabbir u
r-rinfurzar tal-fiduċja COM (2011) 206 http://eur-lex.europa.eu/LexUriServ/LexUriServ.do?uri=COM:2011:0206:FIN:MT:PDF,
p 15. [3] COM(2011)
681 finali tal-20 ta' Ottubru 2011 [4] Rapport
dwar ir-responsabilità soċjali korporattiva: imāiba kummerëjali
responsabbli u trasparenti u tkabbir sostenibbli (2012/2098 (INI)); Kumitat
għall-Affarijiet Legali. http://www.europarl.europa.eu/sides/getDoc.do?pubRef=-//EP//NONSGML+REPORT+A7-2013-0017+0+DOC+PDF+V0//MT&language=MT [5] Rapport
dwar ir-Responsabilità Soċjali Korporattiva: Il-promozzjoni tal-interessi
tas-soċjetà u triq lejn l-irkupru sostenibbli u inklużiv (2012/2097
(INI)); Kumitat għall-Impjiegi u l-Affarijiet Soċjali http://www.europarl.europa.eu/sides/getDoc.do?pubRef=-//EP//NONSGML+REPORT+A7-2013-0023+0+DOC+PDF+V0//MT&language=MT [6] Proposta
għal Direttiva tal-Parlament Ewropew u tal-Kunsill dwar it-titjib
tal-bilanċ bejn is-sessi fost diretturi mhux eżekuttivi ta' kumpaniji
kkwotati fil-Borża u miżuri relatati COM (2012) 614 finali. [7] ĠU C , , p. . [8] ĠU C , , p. . [9] COM
(2011) 206 finali tas-13 ta’ April 2011. [10] COM(2011) 681
finali tat-25 ta’ Ottubru 2011. [11] Rapport
dwar ir-responsabilità soċjali korporattiva: imāiba kummerëjali
responsabbli u trasparenti u tkabbir sostenibbli (2012/2098 (INI)); Kumitat
għall-Affarijiet Legali. http://www.europarl.europa.eu/sides/getDoc.do?pubRef=-//EP//NONSGML+REPORT+A7-2013-0017+0+DOC+PDF+V0//MT&language=MT [12] Rapport
dwar ir-Responsabilità Soċjali Korporattiva: Il-promozzjoni tal-interessi
tas-soċjetà u triq lejn l-irkupru sostenibbli u inklużiv (2012/2097
(INI)); Kumitat għall-Impjiegi u l-Affarijiet Soċjali http://www.europarl.europa.eu/sides/getDoc.do?pubRef=-//EP//NONSGML+REPORT+A7-2013-0023+0+DOC+PDF+V0//MT&language=MT [13] Id-dokument
tal-eżitu tan-Nazzjonijiet Uniti, “The Future WE want”, tal-Konferenza
tan-Nazzjonijiet Uniti dwar l-Iżvilupp Sostenibbli Rio + 20,
A/CONF.216/l.1 [14] KOM(2011) 571 finali tal-20 ta' Settembru 2011 [15] Sentejn
wara d-dħul fis-seħħ [16] L-ewwel
sena wara l-iskadenza tat-traspożizzjoni [17] It-tieni
sena wara l-iskadenza tat-traspożizzjoni