(1)

Ir-Regolament (UE) 2019/1009 jistabbilixxi regoli dwar it-tpoġġija għad-dispożizzjoni fis-suq ta’ prodotti fertilizzanti tal-UE. Il-prodotti fertilizzanti tal-UE fihom materjali komponenti ta’ kategorija waħda jew aktar minn dawk elenkati fl-Anness II ta’ dak ir-Regolament.

(2)

F’konformità mal-Artikolu 42(1) tar-Regolament (UE) 2019/1009, il-Kummissjoni għandha s-setgħa li tadotta atti delegati f’konformità mal-Artikolu 44 bl-iskop tal-adattament tal-Anness II għall-progress tekniku. Skont l-Artikolu 42(3) tar-Regolament (UE) 2019/1009 meħud flimkien mal-Artikolu 6 tad-Direttiva 2008/98/KE tal-Parlament Ewropew u tal-Kunsill (2), il-Kummissjoni tista’ tinkludi fil-kategoriji tal-materjali komponenti, materjali li ma jibqgħux jitqiesu bħala skart wara operazzjoni ta’ rkupru jekk tali materjali jkunu se jintużaw għal skopijiet speċifiċi, ikollhom suq jew domanda eżistenti u l-użu tagħhom ma jwassalx għal impatti negattivi ġenerali fuq l-ambjent jew fuq is-saħħa tal-bniedem.

(3)

Iċ-Ċentru Konġunt tar-Riċerka (“JRC”) tal-Kummissjoni identifika ċerti materjali ta’ purità għolja li jistgħu jiġu rkuprati mill-iskart u jintużaw bħala materjali komponenti fi prodotti fertilizzanti tal-UE (3).

(4)

Il-materjali ta’ purità għolja identifikati mill-JRC huma l-imlieħ tal-ammonju, l-imlieħ tas-sulfat, l-imlieħ tal-fosfat, il-kubrit elementali, il-karbonat tal-kalċju u l-ossidu tal-kalċju. Dawk il-materjali kollha huma koperti mir-Regolament (KE) Nru 2003/2003 tal-Parlament Ewropew u tal-Kunsill (4), għandhom domanda sinifikanti fis-suq u wrew il-valur agronomiku għoli tagħhom matul l-istorja twila ta’ użu fil-qasam.

(5)

Bħala l-ewwel miżura sabiex tiġi żgurata kemm is-sikurezza kif ukoll l-effiċjenza agronomika, jenħtieġ li jiġi stabbilit rekwiżit minimu ta’ purità tal-materjali ta’ purità għolja. Skont l-informazzjoni disponibbli fir-rapport ta’ valutazzjoni tal-JRC, purità ta’ 95 %, espressa f’termini tal-materja niexfa tal-materjal, se tiżgura effiċjenza agronomika għolja b’riskji baxxi għall-ambjent, għas-saħħa u għas-sikurezza. Filwaqt li, għal xi materjali, din il-purità għolja hija stabbilita f’livelli aktar ambizzjużi minn dawk meħtieġa mir-Regolament (KE) Nru 2003/2003, huwa stmat li tali purità ogħla tista’ tinkiseb abbażi tal-prattiki eżistenti.

(6)

Barra minn hekk, huwa xieraq li jiġi speċifikat li l-materjali ta’ purità għolja jiġu rkuprati mill-iskart wara żewġ tipi ta’ proċessi: proċessi li jiżolaw l-imlieħ jew elementi oħra permezz ta’ (taħlita ta’) metodi ta’ purifikazzjoni avvanzati, bħall-kristallizzazzjoni, iċ-ċentrifugazzjoni jew l-estrazzjoni likwidu-likwidu, li spiss jiġu applikati fl-industriji (petro)kimiċi; u proċessi ta’ purifikazzjoni tal-gassijiet jew ta’ kontroll tal-emissjonijiet imfassla sabiex ineħħu n-nutrijenti mill-ffluwenti gassużi.

(7)

Għalhekk, il-kontenut ta’ ċerti impuritajiet, patoġeni jew kontaminanti li huma speċifiċi għal dawk il-materjali, jew il-kontenut tal-karbonju organiku jenħtieġ li jkun limitat, abbażi tar-rapport ta’ valutazzjoni tal-JRC. Tali kriterji jenħtieġ li japplikaw flimkien mal-kriterji ta’ sikurezza stabbiliti fl-Anness I tar-Regolament (UE) 2019/1009 għall-kategorija funzjonali tal-prodotti korrispondenti u mingħajr preġudizzju għar-Regolament (UE) 2019/1021 tal-Parlament Ewropew u tal-Kunsill (5).

(8)

Konsegwentement, jenħtieġ li jiġu stabbiliti valuri ta’ limitu addizzjonali għall-kontaminanti l-kromu totali u t-tallju. Uħud mill-materjali ta’ purità għolja jista’ jkun fihom kontaminanti bħal dawn bħala riżultat tal-materjali ta’ input u tal-proċessi li jinkisbu minnhom. Il-valuri ta’ limitu proposti għal dawk il-kontaminanti jenħtieġ li jiżguraw li l-użu tal-prodotti fertilizzanti tal-UE li jkun fihom materjali ta’ purità għolja b’tali kontaminanti ma jwassalx għall-akkumulazzjoni tagħhom fil-ħamrija. Barra minn hekk, jenħtieġ li jiġu introdotti rekwiżiti dwar il-kontenut tal-patoġeni għall-prodotti fertilizzanti kollha tal-UE li fihom jew li jikkonsistu minn materjali ta’ purità għolja minħabba l-varjetà wiesgħa ta’ proċessi li jistgħu jinkisbu minnhom u l-flussi tal-iskart permessi bħala materjali ta’ input. Il-valuri ta’ limitu kemm għall-kontaminanti kif ukoll għall-patoġeni jenħtieġ li jiġu ddeterminati bħala konċentrazzjoni fil-prodott finali, simili għar-rekwiżiti stabbiliti fl-Anness I tar-Regolament (UE) 2019/1009. Dan huwa ġġustifikat mill-fatt li l-kriterji ta’ sikurezza introdotti bi tweġiba għal kwalunkwe riskju partikolari identifikat jikkonċernaw, bħala regola, il-prodott finali u mhux materjal komponenti. Dan jiffaċilita wkoll is-sorveljanza tas-suq ta’ tali prodotti, peress li t-testijiet iridu jitwettqu biss fuq il-prodott finali.

(9)

Barra minn hekk, jenħtieġ li jiġu stabbiliti kriterji ta’ sikurezza addizzjonali sabiex jiġi limitat il-kontenut ta’ 16-il idrokarbur aromatiku poliċikliku (PAH16) (6) u ta’ dibenżo-p-diossini u poliklorodibenżofuran poliklorurati (PCDD/PCDF) (7). Ir-Regolament (UE) 2019/1021 jistabbilixxi tnaqqis fir-rilaxx għall-PAH16 u għall-PCDD/PCDF bħala sustanzi prodotti b’mod mhux intenzjonat matul il-proċessi tal-manifattura, iżda ma jintroduċix valur ta’ limitu f’tali każijiet. Minħabba r-riskji għoljin iġġenerati mill-preżenza ta’ tali sustanzi niġġiesa fil-prodotti fertilizzanti, huwa meqjus xieraq li jiġu introdotti rekwiżiti aktar stretti minn dawk stipulati f’dak ir-Regolament. Tali valuri ta’ limitu jenħtieġ li jiġu stabbiliti fil-livell tal-materjal komponenti u mhux bħala konċentrazzjoni fil-prodott finali, sabiex tiġi żgurata l-koerenza mar-Regolament (UE) 2019/1021.

(10)

Dawn il-valuri ta’ limitu jistgħu ma jkunux rilevanti għall-materjali kollha ta’ purità għolja li għandhom jiġu inklużi bħala kategorija ġdida ta’ materjali komponenti. Għalhekk, il-manifatturi jenħtieġ li jkollhom il-possibbiltà li jippreżumu l-konformità tal-prodott fertilizzanti ma’ rekwiżit partikolari mingħajr verifika, bħall-ittestjar, kull meta l-konformità ma’ dan ir-rekwiżit issegwi ċertament u b’mod mhux kontestabbli min-natura jew mill-proċess ta’ rkupru tal-materjal ta’ purità għolja rispettiv jew tal-proċess ta’ manifattura tal-prodott fertilizzanti tal-UE.

(11)

Bħala miżura ta’ sikurezza addizzjonali, il-materjali ta’ purità għolja jenħtieġ li jiġu rreġistrati abbażi tar-Regolament (KE) Nru 1907/2006 tal-Parlament Ewropew u tal-Kunsill (8), fil-kundizzjonijiet estensivi diġà stabbiliti fir-Regolament (UE) 2019/1009 għas-sustanzi kimiċi f’kategoriji oħrajn ta’ materjali komponenti. Dan jiżgura li l-manifatturi jqisu l-użu bħala prodott fertilizzanti huma u jwettqu l-valutazzjoni tar-riskju skont dak ir-Regolament u li r-reġistrazzjoni ssir ukoll għall-materjali b’tunnellaġġ baxx.

(12)

Barra minn hekk, uħud mill-materjali ta’ purità għolja jistgħu jkunu disponibbli fis-swieq lokali fi kwantitajiet li jaqbżu d-domanda. Sabiex jiġi żgurat li d-domanda tas-suq għall-materjali ta’ purità għolja teżisti u li l-ħżin fit-tul tagħhom f’kundizzjonijiet subottimali ma jwassalx għal impatti ambjentali negattivi, huwa xieraq li jiġi limitat il-perjodu ta’ żmien li matulu jistgħu jintużaw bħala materjali komponenti għall-prodotti fertilizzanti tal-UE wara li jkunu ġew iġġenerati. Il-manifatturi jenħtieġ li jkunu meħtieġa jiffirmaw id-dikjarazzjoni ta’ konformità tal-UE għall-prodott fertilizzanti tal-UE li jkun fih il-materjal imsemmi f’dak il-perjodu.

(13)

Abbażi ta’ dan ta’ hawn fuq, il-Kummissjoni tikkonkludi li l-materjali ta’ purità għolja, jekk jiġu rkuprati skont ir-regoli ta’ rkupru ssuġġeriti mir-rapport ta’ valutazzjoni tal-JRC, jiżguraw l-effiċjenza agronomika skont it-tifsira tal-punt (b)(ii) tal-ewwel subparagrafu tal-Artikolu 42(1) tar-Regolament (UE) 2019/1009. Barra minn hekk, dawn jikkonformaw mal-kriterji stabbiliti fl-Artikolu 6 tad-Direttiva 2008/98/KE. Fl-aħħar nett, jekk ikunu konformi mar-rekwiżiti l-oħrajn stabbiliti fir-Regolament (UE) 2019/1009 b’mod ġenerali u fl-Anness I ta’ dak ir-Regolament b’mod partikolari, ma jkunux jippreżentaw riskju għas-saħħa tal-bniedem, tal-annimali jew tal-pjanti, għas-sikurezza jew għall-ambjent skont it-tifsira tal-punt (b)(i) tal-ewwel subparagrafu tal-Artikolu 42(1) tar-Regolament (UE) 2019/1009. Tali materjali jkollhom ukoll skop utli peress li jissostitwixxu materja prima oħra użata fil-produzzjoni ta’ prodotti fertilizzanti tal-UE. Għalhekk, il-materjali ta’ purità għolja rkuprati jenħtieġ li jiġu inklużi fl-Anness II tar-Regolament (UE) 2019/1009.

(14)

Barra minn hekk, minħabba l-fatt li l-materjali ta’ purità għolja huma skart irkuprat skont it-tifsira tad-Direttiva 2008/98/KE, jenħtieġ li jiġu esklużi mill-Kategoriji 1 u 11 tal-materjali komponenti tal-Anness II tar-Regolament (UE) 2019/1009 skont it-tielet subparagrafu tal-Artikolu 42(1) ta’ dak ir-Regolament.

(15)

Uħud mill-materjali ta’ purità għolja jista’ jkun fihom is-selenju li jista’ jkun tossiku jekk ikun preżenti f’konċentrazzjoni għolja. Xi wħud jista’ jkun fihom ukoll il-klorur, li jista’ jqajjem tħassib dwar is-salinità fil-ħamrija. Kull meta dawk is-sustanzi jkunu preżenti f’konċentrazzjonijiet li jaqbżu ċertu limitu, il-kontenut tagħhom jenħtieġ li jiġi indikat fuq it-tikketta sabiex l-utenti tal-prodott fertilizzanti jkunu informati kif xieraq. L-Anness III tar-Regolament (UE) 2019/1009 jenħtieġ li jiġi emendat skont dan.

(16)

Huwa importanti li jiġi żgurat li meta l-prodotti fertilizzanti jkun fihom materjali ta’ purità għolja, dawn ikunu soġġetti għal proċedura ta’ valutazzjoni tal-konformità xierqa li tinkludi sistema ta’ kwalità vvalutata u approvata minn korp notifikat. Għalhekk, huwa neċessarju li l-Anness IV tar-Regolament (UE) 2019/1009 jiġi emendat sabiex tiġi prevista valutazzjoni tal-konformità xierqa għal tali prodotti fertilizzanti.

(17)

Minħabba li r-rekwiżiti stabbiliti fl-Anness II u III tar-Regolament (UE) 2019/1009 u l-proċeduri tal-valutazzjoni tal-konformità stabbiliti fl-Anness IV ta’ dak ir-Regolament iridu japplikaw mis-16 ta’ Lulju 2022, huwa neċessarju li l-applikazzjoni ta’ dan ir-Regolament tiġi differita għall-istess data,

(1)

Ir-Regolament (UE) 2021/2116 jistabbilixxi r-regoli bażiċi li jikkonċernaw, fost l-oħrajn, is-sistema integrata ta’ amministrazzjoni u kontroll (“sistema integrata”) u l-applikazzjoni u l-kalkolu ta’ penali amministrattivi għall-kundizzjonalità. Biex jiġi żgurat il-funzjonament bla xkiel tal-qafas ġuridiku l-ġdid, iridu jiġu adottati ċerti regoli biex jissupplimentaw id-dispożizzjonijiet stipulati minn dak ir-Regolament fl-oqsma kkonċernati.

(2)

Ir-regoli dwar is-sistema integrata u l-applikazzjoni u l-kalkolu tal-penali amministrattivi għall-kundizzjonalità jenħtieġ li jiżguraw sistema ta’ kontroll effiċjenti tar-regoli li għandhom jiġu applikati mill-Istati Membri u mill-benefiċjarji fil-qafas tal-Politika Agrikola Komuni (PAK) u għalhekk jenħtieġ li jiġu stabbiliti f’att delegat wieħed. Dawn ir-regoli l-ġodda jenħtieġ li jissostitwixxu d-dispożizzjonijiet rilevanti tar-Regolament Delegat tal-Kummissjoni (UE) Nru 640/2014 (2).

(3)

B’mod partikolari, jenħtieġ li jiġu stabbiliti regoli biex jissupplimentaw ċerti elementi mhux essenzjali tar-Regolament (UE) 2021/2116 fir-rigward tal-funzjonament tas-sistema integrata msemmija fl-Artikolu 65 ta’ dak ir-Regolament, regoli dwar il-valutazzjonijiet tal-kwalità msemmija fl-Artikoli 68(3), 69(6) u 70(2) ta’ dak ir-Regolament, regoli dwar is-sistema ta’ identifikazzjoni għall-bċejjeċ tar-raba’ msemmija fl-Artikolu 68 ta’ dak ir-Regolament u regoli dettaljati dwar l-applikazzjoni u l-kalkolu ta’ penali amministrattivi għall-kundizzjonalità msemmija fl-Artikolu 85 ta’ dak ir-Regolament.

(4)

Is-sistema ta’ identifikazzjoni għall-bċejjeċ tar-raba’ għandha tipprovdi informazzjoni siewja, komprensiva u affidabbli rilevanti għar-rapportar dwar il-prestazzjoni tal-politika, li tikkontribwixxi għall-implimentazzjoni effiċjenti tal-interventi bbażati fuq l-erja kif ukoll li tappoġġa lill-benefiċjarji fis-sottomissjoni ta’ applikazzjonijiet korretti għall-għajnuna. Sabiex jiġi żgurat li jintlaħqu dawn l-objettivi, huma meħtieġa regoli biex jiġu ċċarati r-rekwiżiti tekniċi li l-Istati Membri jeħtieġ li jsegwu u kif għandha tiġi strutturata u aġġornata l-informazzjoni disponibbli.

(5)

Sabiex l-Istati Membri jkunu jistgħu jidentifikaw b’mod proattiv id-dgħufijiet possibbli fis-sistema integrata u jieħdu azzjoni ta’ rimedju xierqa meta jkun meħtieġ, jenħtieġ li jiġu pprovduti regoli dwar il-valutazzjoni annwali tal-kwalità tas-sistema ta’ identifikazzjoni għall-bċejjeċ tar-raba’, tas-sistema tal-applikazzjoni ġeospazjali u tas-sistema ta’ monitoraġġ tal-erja. L-esperjenza rigward il-valutazzjoni tal-kwalità tas-sistema ta’ identifikazzjoni għall-bċejjeċ tar-raba’ skont ir-Regolament Delegat (UE) Nru 640/2014 uriet li l-iżvilupp ta’ gwida teknika mill-Kummissjoni huwa partikolarment utli. Tali gwida teknika tgħin lill-Istati Membri japplikaw metodoloġija adattata biex iwettqu l-valutazzjonijiet tagħhom. Minħabba l-importanza tal-valutazzjonijiet tal-kwalità għal sistema integrata li taħdem kif suppost li tipprovdi data affidabbli u verifikabbli fir-rapportar annwali tal-prestazzjoni, il-Kummissjoni jenħtieġ li tgħin lill-Istati Membri b’mod simili biex iwettqu l-valutazzjonijiet tal-kwalità previsti skont ir-Regolament (UE) 2021/2116.

(6)

Il-valutazzjonijiet tal-kwalità għandhom jivvalutaw jekk is-sistema integrata tissodisfax l-għan tagħha li tipprovdi informazzjoni affidabbli u komprensiva rilevanti għar-rapportar annwali tal-prestazzjoni, kif meħtieġ mill-Artikolu 66(2) tar-Regolament (UE) 2021/2116, b’mod partikolari, in-numru korrett ta’ ettari għall-output u s-sehem korrett ta’ erjas għall-indikaturi tar-riżultati ta’ interventi bbażati fuq l-erja. Dan se jirrikjedi li jingħaqdu riżultati rilevanti mill-valutazzjoni tal-kwalità tas-sistema ta’ monitoraġġ tal-erja u s-sistema tal-applikazzjoni ġeospazjali fi sforz biex jiġi evitat li dan l-impatt jiġi stmat iżżejjed minħabba erjas fejn seħħew kemm żbalji fil-kejl kif ukoll deċiżjonijiet żbaljati dwar il-kundizzjonijiet tal-eliġibbiltà. Għal dan il-għan, il-verifika tal-erja ddikjarata fil-valutazzjoni tal-kwalità tas-sistema tal-applikazzjoni ġeospazjali jenħtieġ li tkun ibbażata fuq l-istess kampjun ta’ bċejjeċ tar-raba’ bħal dawk fil-valutazzjoni tal-kwalità tas-sistema ta’ monitoraġġ tal-erja.

(7)

Barra minn hekk, il-valutazzjoni tal-kwalità relatata mas-sistema ta’ monitoraġġ tal-erja għandha tiżgura li r-riżultati jkunu komparabbli bejn l-Istati Membri, irrispettivament mill-possibbiltà li jiġi differit l-użu ta’ implimentazzjoni kompletament operattiva tas-sistema ta’ monitoraġġ tal-erja. Għalhekk, din il-valutazzjoni tal-kwalità jenħtieġ li tkopri l-interventi kollha bbażati fuq l-erja u l-kundizzjonijiet rilevanti ta’ eliġibbiltà irrispettivament mid-deċiżjoni tal-Istat Membru li jkollu sistema ta’ monitoraġġ tal-erja kompletament operattiva biss mill-1 ta’ Jannar 2024, kif imsemmi fl-Artikolu 70(1) tar-Regolament (UE) 2021/2116. Il-valutazzjoni tal-kwalità tas-sistema ta’ monitoraġġ tal-erja jenħtieġ li tipprovdi informazzjoni dijanjostika kemm fil-livell tal-interventi kif ukoll fil-livell tal-kundizzjonijiet ta’ eliġibbiltà, li abbażi tagħha l-Istati Membri jenħtieġ li jieħdu azzjonijiet ta’ rimedju xierqa, fejn meħtieġ.

(8)

Għal raġunijiet ta’ ċarezza u sabiex tiġi stabbilita bażi armonizzata għall-kalkolu u l-applikazzjoni tal-penali amministrattivi għall-kundizzjonalità, huwa meħtieġ li jiġu stabbiliti definizzjonijiet komuni u prinċipji ġenerali dwar in-nuqqas ta’ konformità.

(9)

Ir-Regolament (UE) 2021/2116 jipprevedi li għandhom jiġu stabbiliti penali amministrattivi għall-kundizzjonalità filwaqt li jitqies il-prinċipju tal-proporzjonalità. Għalhekk, it-tnaqqis u l-esklużjonijiet jenħtieġ li jiġu kklassifikati skont is-serjetà tan-nuqqas ta’ konformità u jenħtieġ li jaslu sal-esklużjoni totali tal-benefiċjarju minn kull pagament u appoġġ imsemmi fl-Artikolu 83(1), il-punti (a), (b) u (c), ta’ dak ir-Regolament f’każ ta’ nuqqas ta’ konformità intenzjonali. Sabiex tingħata ċertezza legali lill-benefiċjarji, jenħtieġ li jiġi stabbilit limitu ta’ żmien għall-applikazzjoni ta’ penali amministrattivi.

(10)

L-Artikolu 85(1) tar-Regolament (UE) 2021/2116 jipprevedi li l-kalkolu tal-penali amministrattiva għall-kundizzjonalità jrid isir abbażi tal-pagamenti li jkunu ngħataw jew li jkunu se jingħataw lill-benefiċjarju kkonċernat fir-rigward tal-applikazzjonijiet għall-għajnuna jew tat-talbiet għall-pagamenti li jkunu ġew ippreżentati jew li jkunu se jiġu ppreżentati matul is-sena kalendarja li fiha jkun seħħ in-nuqqas ta’ konformità. Għalhekk, sabiex tiġi żgurata r-rabta bejn l-imġiba tal-bidwi u l-penali u biex jiġi ggarantit it-trattament indaqs fost il-bdiewa, huwa xieraq li jiġi previst li fejn l-istess nuqqas ta’ konformità jkun qed iseħħ kontinwament f’diversi snin kalendarji, trid tiġi applikata penali amministrattiva u din trid tiġi kkalkulata għal kull sena kalendarja li fiha jista’ jiġi ddeterminat li jkun seħħ in-nuqqas ta’ konformità.

(11)

Sabiex jiġi ggarantit li l-penali amministrattivi jkunu jistgħu jiġu applikati u attribwiti b’mod effettiv, huwa xieraq li jiġi previst li fejn, fis-sena kalendarja tas-sejba, il-penali taqbeż l-ammont totali tal-pagamenti mogħtija jew li għandhom jingħataw lill-benefiċjarju jew il-benefiċjarju ma jissottomettix applikazzjoni għall-għajnuna, il-penali għandha tiġi applikata jew imputata permezz ta’ rkupru.

(12)

Skont l-Artikolu 85(3) tar-Regolament (UE) 2021/2116, irrispettivament minn jekk jiġix identifikat nuqqas ta’ konformità permezz ta’ sistema ta’ monitoraġġ tal-erja jew mezzi oħra, ma għandha tiġi imposta l-ebda penali amministrattivi meta n-nuqqas ta’ konformità mhux intenzjonali ma jkollu l-ebda konsegwenza jew ikollu biss konsegwenzi insinifikanti għall-ilħuq tal-objettiv tal-istandard jew tar-rekwiżit ikkonċernat. Minħabba n-natura minuri tan-nuqqasijiet ta’ konformità li ma għandhom l-ebda konsegwenza jew li għandhom biss konsegwenzi insinifikanti għall-ilħuq tal-objettiv tal-istandard jew tar-rekwiżit ikkonċernat u sabiex jitnaqqas il-piż amministrattiv, tali nuqqasijiet ta’ konformità jenħtieġ li ma jitqisux għall-fini tad-determinazzjoni tal-okkorrenza mill-ġdid jew tal-persistenza ta’ nuqqas ta’ konformità.

(13)

Skont l-Artikolu 85(4) tar-Regolament (UE) 2021/2116, jekk Stat Membru juża s-sistema ta’ monitoraġġ tal-erja biex jidentifika każijiet ta’ nuqqas ta’ konformità, jista’ jiddeċiedi li japplika perċentwal aktar baxx ta’ tnaqqis. Huwa xieraq li jiġi stabbilit perċentwal minimu ta’ tnaqqis.

(14)

Jenħtieġ li jiġu stabbiliti regoli dwar il-kalkolu tal-penali amministrattivi għal diversi nuqqasijiet ta’ konformità fl-istess sena kalendarja tal-okkorrenza.

(15)

Sabiex tiġi żgurata t-tranżizzjoni bla xkiel mill-arranġamenti previsti fir-Regolament (UE) Nru 1306/2013 tal-Parlament Ewropew u tal-Kunsill (3), huwa meqjus xieraq li jiġu stabbiliti regoli tranżizzjonali rigward l-applikazzjoni tat-tieni subparagrafu tal-Artikolu 104(1), il-punt (a)(iv), tar-Regolament (UE) 2021/2116, sabiex jiġu evitati spejjeż u piżijiet amministrattivi eċċessivi relatati mal-kundizzjonalità u mal-kontrolli tal-kundizzjonalità applikati għall-benefiċjarji li jirċievu pagamenti bbażati fuq l-erja kemm taħt Pjan Strateġiku tal-PAK skont ir-Regolament (UE) 2021/2115 tal-Parlament Ewropew u tal-Kunsill (4) kif ukoll taħt programm ta’ żvilupp rurali implimentat skont ir-Regolament (UE) Nru 1305/2013 tal-Parlament Ewropew u tal-Kunsill (5) sal-31 ta’ Diċembru 2025. Għal dak il-għan, jenħtieġ li l-kontrolli fuq il-kundizzjonalità relatati mal-erja jitqiesu li jkopru wkoll il-kontrolli fuq is-sistema tal-kundizzjonalità msemmija fl-Artikolu 96 tar-Regolament (UE) Nru 1306/2013. Dan huwa ġġustifikat mill-fatt li, għall-pagamenti bbażati fuq l-erja, ir-regoli ta’ kundizzjonalità huma ġeneralment aktar stretti mir-regoli dwar is-sistema ta’ kundizzjonalità fir-rigward kemm tal-obbligi kif ukoll tal-penali. Għalhekk jista’ jiġi preżunt li r-regoli tas-sistema tal-kundizzjonalità huma rrispettati, jekk il-benefiċjarju jikkonforma mal-obbligi stabbiliti fir-regoli dwar il-kundizzjonalità. Madankollu, jekk il-kontrolli fuq il-kundizzjonalità jiżvelaw nuqqasijiet ta’ konformità, l-Istat Membru ma jkunx jista’ jassumi aktar li l-kundizzjonalità qiegħda tiġi osservata u konsegwentement jenħtieġ li jwettaq il-kontrolli msemmija fl-Artikolu 96 tar-Regolament (UE) Nru 1306/2013 u, f’dak il-kuntest, japplika r-regoli dwar il-kalkolu u l-applikazzjoni ta’ penali amministrattivi f’konformità mad-dispożizzjonijiet stabbiliti f’dak ir-Regolament.

(16)

Fl-interess taċ-ċarezza u taċ-ċertezza legali, jenħtieġ li r-Regolament Delegat (UE) Nru 640/2014 jitħassar. Madankollu, dak ir-Regolament jenħtieġ li jkompli japplika għall-applikazzjonijiet għall-għajnuna għall-pagamenti diretti ppreżentati qabel l-1 ta’ Jannar 2023, għat-talbiet għall-pagamenti magħmula fir-rigward tal-miżuri ta’ appoġġ implimentati skont ir-Regolament (UE) Nru 1305/2013 u għas-sistema ta’ kontroll u l-penali amministrattivi fir-rigward tar-regoli dwar is-sistema ta’ kundizzjonalità.

(17)

B’kunsiderazzjoni tat-tieni subparagrafu tal-Artikolu 104(1) u tal-Artikolu 106 tar-Regolament (UE) 2021/2116, dan ir-Regolament jenħtieġ li japplika għal interventi li jibdew mill-1 ta’ Jannar 2023 u implimentati skont ir-Regolament (UE) 2021/2115.

(18)

Fl-aħħar nett, fid-dawl tal-punt 31 tal-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet, il-Kummissjoni tqis li hemm rabta sostantiva bejn is-setgħat fir-Regolament (UE) 2021/2116 rigward ir-regoli dwar is-sistema integrata u l-applikazzjoni u l-kalkolu tal-penali amministrattivi għall-kundizzjonalità, u hemm interkonnessjoni bejniethom. Għalhekk, huwa xieraq li jiġu stabbiliti dawk ir-regoli fl-istess Att Delegat,

(1)

Ir-Regolament (UE) 2021/2116 jistabbilixxi r-regoli bażiċi dwar, inter alia, l-obbligi tal-Istati Membri li jipproteġu l-interessi finanzjarji tal-Unjoni u li jirrapportaw dwar il-prestazzjoni tal-politika. Sabiex jiġi żgurat il-funzjonament bla xkiel tal-qafas legali l-ġdid, iridu jiġu adottati ċerti regoli fir-rigward tar-rapporti ta’ valutazzjoni dwar il-kwalità ta’ tliet elementi (is-sistema għall-identifikazzjoni tal-bċejjeċ tar-raba’, is-sistema għall-applikazzjonijiet ġeospazjali u s-sistema ta’ monitoraġġ tal-erja) tas-sistema integrata ta’ amministrazzjoni u kontroll (“sistema integrata”) u l-azzjonijiet ta’ rimedju relatati, ir-rekwiżiti għall-applikazzjonijiet għall-għajnuna u s-sistema ta’ monitoraġġ tal-erja, il-qafas li jirregola l-akkwist tad-data satellitari għall-finijiet tas-sistema ta’ monitoraġġ tal-erja u dwar il-verifiki tal-organizzazzjonijiet interprofessjonali approvati fir-rigward tal-pagament speċifiku għall-għelejjel għall-qoton. Ir-regoli l-ġodda jenħtieġ li jissostitwixxu d-dispożizzjonijiet rilevanti tar-Regolament ta’ Implimentazzjoni tal-Kummissjoni (UE) Nru 809/2014 (2).

(2)

Ir-rapporti ta’ valutazzjoni tal-kwalità tas-sistema għall-identifikazzjoni tal-bċejjeċ tar-raba’, tas-sistema għall-applikazzjonijiet ġeospazjali u tas-sistema ta’ monitoraġġ tal-erja jenħtieġ li jkunu komprensivi sabiex jagħmlu possibbli valutazzjoni tal-affidabbiltà tal-informazzjoni ġġenerata minn dawn l-elementi tas-sistema integrata. Il-kontenut ta’ dawn ir-rapporti jenħtieġ li jippermetti wkoll li jiġi konkluż jekk hijiex ipprovduta assigurazzjoni suffiċjenti tal-kwalità tal-informazzjoni użata b’rabta mal-obbligu tal-Istat Membru tar-rappurtar dwar il-prestazzjoni fir-rigward tal-indikaturi tal-output u tar-riżultati tal-interventi bbażati fuq l-erja ġestiti skont is-sistema integrata. Għalhekk, dawn ir-rapporti jenħtieġ li b’mod partikolari jinkludu informazzjoni dwar il-ħidma mwettqa skont il-valutazzjoni tal-kwalità, in-nuqqasijiet identifikati kif ukoll informazzjoni dijanjostika dwar il-kawżi ewlenin potenzjali ta’ dawn in-nuqqasijiet. B’mod aktar speċifiku, ir-rapporti jenħtieġ li jinkludu informazzjoni dwar id-data u x-xbihat użati għall-valutazzjonijiet tal-kwalità kif ukoll ir-riżultati tal-ittestjar tagħhom. L-esperjenza rigward l-iskambji ta’ informazzjoni bejn l-Istati Membri u l-Kummissjoni fir-rigward tal-valutazzjoni tal-kwalità tas-sistema għall-identifikazzjoni tal-bċejjeċ tar-raba’ wriet li l-użu ta’ sistemi ta’ informazzjoni elettroniċi dedikati huwa partikolarment utli. Sabiex tiġi ffaċilitata l-ħidma tal-Istati Membri u l-komunikazzjoni tagħhom mal-Kummissjoni, jenħtieġ li tali sistemi ta’ informazzjoni jkomplu jintużaw u jiġu żviluppati aktar, fejn meħtieġ, għar-rapporti tat-tliet valutazzjonijiet tal-kwalità previsti fir-Regolament (UE) 2021/2116.

(3)

Sabiex jilħqu l-għan tagħhom li jipprovdu data affidabbli għar-rapport annwali dwar il-prestazzjoni, ir-riżultati tat-tliet valutazzjonijiet tal-kwalità, u b’mod partikolari dawk tas-sistema tal-applikazzjoni ġeospazjali u tas-sistema ta’ monitoraġġ tal-erja, jenħtieġ li jingħaqdu biex jiġi stmat l-iżball tal-erja tad-data rrappurtata dwar l-indikaturi tal-output u tar-riżultati li jirriżulta minn nuqqasijiet fis-sistemi. Jenħtieġ li jiġu stabbiliti regoli dwar l-azzjonijiet ta’ rimedju li jistgħu jkunu meħtieġa biex in-nuqqasijiet jiġu indirizzati f’perjodu ta’ żmien definit. Barra minn hekk, ir-rapporti mħejjija fir-rigward tas-snin 2024 u 2026 jenħtieġ li jippermettu li jiġi vverifikat li s-sistema ta’ monitoraġġ tal-erja ġiet stabbilita kif xieraq fl-Istati Membri kollha u li l-implimentazzjoni gradwali tas-sistema ta’ monitoraġġ tal-erja rnexxiet u kopriet il-kundizzjonijiet tal-eliġibbiltà u l-interventi kollha li jistgħu jiġu mmonitorjati. Għal dan il-għan, ir-rapporti jenħtieġ li jkun fihom lista tal-kriterji kollha ta’ eliġibbiltà għall-interventi kollha bbażati fuq l-erja skont is-sistema integrata flimkien ma’ informazzjoni dwar is-sorsi tad-data użati għall-analiżi.

(4)

L-Istati Membri jenħtieġ li jistabbilixxu sistema affidabbli u moderna għall-ġestjoni tal-applikazzjonijiet għall-għajnuna, li tippermetti l-komunikazzjoni permezz ta’ mezzi elettroniċi u li topera f’ċiklu annwali. L-Istati Membri jenħtieġ li jqisu s-simplifikazzjoni għall-benefiċjarji u għall-amministrazzjoni nazzjonali, pereżempju billi jipprevedu li applikazzjoni waħda tista’ tkopri diversi interventi jew diversi benefiċjarji li japplikaw b’mod konġunt jew li tiġi kkunsidrata applikazzjoni waħda għal kull azjenda f’sena partikolari f’każ ta’ trasferiment ta’ dik l-azjenda. L-Istati Membri jenħtieġ li jieħdu l-miżuri meħtieġa biex jiżguraw il-ġestjoni xierqa tal-interventi fejn ikun hemm aktar minn aġenzija tal-pagamenti waħda responsabbli għall-istess benefiċjarju.

(5)

L-Istati Membri jenħtieġ li jisfruttaw il-benefiċċji tad-diġitalizzazzjoni billi jużaw, bħala regola, il-mezzi elettroniċi għal kull komunikazzjoni mal-benefiċjarji. Barra minn hekk, biex tingħata spinta lis-simplifikazzjoni, l-Istati Membri jenħtieġ li, sa fejn ikun possibbli, jirkupraw l-informazzjoni meħtieġa għall-ġestjoni tal-interventi minn sorsi tad-data għad-dispożizzjoni tal-amministrazzjoni pubblika.

(6)

Sabiex jiġi ffaċilitat il-proċess tas-sottomissjoni ta’ applikazzjonijiet għall-għajnuna, l-Istati Membri jenħtieġ li jipprovdu formoli mimlija bil-lest, li jkun fihom l-informazzjoni kollha u dik l-aktar aġġornata rilevanti għall-benefiċjarji. L-Istati Membri jenħtieġ li jipprevjenu l-irregolaritajiet billi jippermettu emendi għall-formoli mimlija minn qabel u jipprovdu twissijiet ta’ gwida li jgħinu lill-benefiċjarju jidentifika nuqqasijiet ta’ konformità potenzjali u japplika b’mod korrett. L-Istati Membri jenħtieġ li jqisu l-modifiki introdotti mill-benefiċjarji għall-aġġornament tal-informazzjoni fil-bażijiet tad-data tal-amministrazzjoni nazzjonali. Għall-finijiet tat-trattament indaqs tal-benefiċjarji, jekk Stat Membru jiddeċiedi li japplika s-sistema awtomatika ta’ talbiet, tali sistema jenħtieġ li tiżgura l-istess livell ta’ dettall kif meħtieġ għall-applikazzjoni għall-għajnuna skont dan ir-Regolament.

(7)

L-applikazzjonijiet għall-għajnuna skont is-sistema integrata jenħtieġ li jipprovdu, sa fejn ikun possibbli, l-informazzjoni kollha meħtieġa għall-ġestjoni xierqa u affidabbli tal-interventi koperti u għar-rappurtar korrett dwar l-indikaturi tal-output u tar-riżultati. Għall-ġestjoni xierqa tal-interventi, il-benefiċjarji jenħtieġ li jibqgħu responsabbli għall-applikazzjoni għall-għajnuna sottomessa, sabiex id-drittijiet u r-responsabbiltajiet relatati kollha jkunu jistgħu jiġu preżunti b’mod ċar.

(8)

Il-prevenzjoni tal-irregolaritajiet jenħtieġ li tiġi stabbilita billi tkun permessa l-possibbiltà li l-applikazzjonijiet għall-għajnuna jiġu emendati jew irtirati sa ċerta skadenza. Meta l-benefiċjarji kollha għal intervent partikolari jkunu koperti minn verifiki amministrattivi u/jew mill-użu tas-sistema ta’ monitoraġġ tal-erja, l-effett ta’ deterrent tas-sanzjonijiet ma jkunx meħtieġ. Għalhekk, l-emendi jew l-irtirar jenħtieġ li jkunu permessi fi kwalunkwe mument qabel skadenza, li hija meħtieġa għall-amministrazzjoni xierqa tal-interventi. Madankollu, jenħtieġ li ma jkunux permessi emendi jew irtirar fir-rigward ta’ nuqqasijiet ta’ konformità relatati ma’ kundizzjonijiet ta’ eliġibbiltà li ma jistgħux jiġu immonitorjati li jkunu żvelati minn sorsi għajr is-sistema ta’ monitoraġġ tal-erja u l-verifiki amministrattivi. F’sitwazzjonijiet oħrajn, jenħtieġ li l-possibbiltà ta’ emendi jew irtirar ma tkunx permessa meta l-benefiċjarju jkun ġie infurmat b’verifika fuq il-post ippjanata jew jekk tali verifika, meta ma tkunx tħabbret, tkun diġà sabet irregolaritajiet. Barra minn hekk, sabiex tiġi appoġġata l-affidabbiltà tal-informazzjoni meħtieġa għall-interventi skont l-Artikolu 34(2) tar-Regolament (UE) 2021/2115 tal-Parlament Ewropew u tal-Kunsill (3) għall-annimali bovini, in-nagħaġ u l-mogħoż, jenħtieġ li l-iskadenza biex isiru emendi tiġi stabbilita b’tali mod li jkunu jistgħu jsiru bidliet fl-applikazzjoni għall-għajnuna u aġġornamenti fil-bażi tad-data kompjuterizzata għall-annimali qabel id-data stabbilita mill-Istat Membru sa meta għandu jiġi sodisfatt ir-rekwiżit ta’ identifikazzjoni u reġistrazzjoni.

(9)

L-Istati Membri jenħtieġ li jiżguraw li l-applikazzjoni ġeospazjali tinkludi l-informazzjoni meħtieġa għall-ġestjoni tal-interventi bbażati fuq l-erja skont is-sistema integrata u, sa fejn ikun meħtieġ, l-interventi bbażati fuq l-erja fis-settur tal-inbid u għar-rekwiżiti skont il-kundizzjonalità. Jenħtieġ li tiġi pprovduta lista mhux eżawrjenti tal-elementi tal-applikazzjoni ġeospazjali biex toffri gwida utli lill-Istati Membri. Fir-rigward tal-informazzjoni dwar l-użu ta’ prodotti għall-protezzjoni tal-pjanti li għandha tiġi pprovduta mill-benefiċjarju meta tkun rilevanti għal intervent skont is-sistema integrata li għalih issir applikazzjoni għall-appoġġ tal-Politika Agrikola Komuni (PAK), l-Istati Membri jistgħu jiddeċiedu li jużaw din l-informazzjoni fir-rigward tal-obbligu tar-reġistrazzjoni tal-użu ta’ dawn il-prodotti kif imsemmi fir-Regolament (KE) Nru 1107/2009 tal-Parlament Ewropew u tal-Kunsill (4).

(10)

Għall-ġestjoni xierqa tal-interventi bbażati fuq l-annimali, jenħtieġ li jiġu stabbiliti ċerti regoli dwar il-kontenut tal-applikazzjonijiet għall-għajnuna rilevanti. Sabiex jiġu żgurati t-trasparenza u t-trattament indaqs tal-benefiċjarji, jenħtieġ li jiġi ċċarat ukoll li meta tintuża sistema awtomatika ta’ talbiet, l-annimali kollha tal-benefiċjarju li huma potenzjalment eliġibbli li jirċievu l-għajnuna taħt intervent partikolari għandhom jiġu kkunsidrati li ġew iddikjarati għal dak l-intervent.

(11)

Ir-Regolament (UE) 2021/2116 introduċa s-sistema ta’ monitoraġġ tal-erja bħala element obbligatorju tas-sistema integrata. Sabiex jiġi żgurat li dan l-obbligu jiġi implimentat kif suppost b’mod uniformi, is-sistema ta’ monitoraġġ tal-erja jenħtieġ li jkollha l-istess kamp ta’ applikazzjoni fl-Istati Membri kollha, u b’hekk tkopri l-benefiċjarji kollha u l-interventi kollha bbażati fuq l-erja ġestiti skont is-sistema integrata u l-kundizzjonijiet kollha li jistgħu jiġu mmonitorjati. L-awtomatizzazzjoni tal-analiżi tad-data skont is-sistema ta’ monitoraġġ tal-erja jenħtieġ li tingħata prijorità sabiex tappoġġa l-objettiv trasversali tal-modernizzazzjoni tal-PAK. Għal dawn ir-raġunijiet, l-għadd ta’ kundizzjonijiet ta’ eliġibbiltà li jistgħu jitqiesu li jistgħu jiġu mmonitorjati permezz tad-data tas-satelliti Sentinels ta’ Copernicus jew ta’ data li għandha tal-inqas valur ekwivalenti jenħtieġ li jiżdied gradwalment. Għal dan il-għan, l-Istati Membri jenħtieġ li jiżguraw li fl-2023 u fl-2024, il-kundizzjonijiet kollha ta’ eliġibbiltà li jistgħu jitqiesu li jistgħu jiġu mmonitorjati permezz tal-ipproċessar awtomatiku tad-data tas-satelliti Sentinel ta’ Copernicus ikunu suġġetti għas-sistema ta’ monitoraġġ tal-erja. Madankollu, l-Istati Membri jistgħu jiddeċiedu jekk dawn il-kundizzjonijiet ta’ eliġibbiltà li jistgħu jiġu mmonitorjati humiex fil-fatt indirizzati permezz tal-ipproċessar tad-data tas-satelliti Sentinels ta’ Copernicus jew ta’ data li għandha tal-inqas valur ekwivalenti. Fejn il-kundizzjonijiet ta’ eliġibbiltà ma jkunux jistgħu jitqiesu li jistgħu jiġu mmonitorjati permezz tad-data tas-satelliti Sentinels ta’ Copernicus, l-Istati Membri jistgħu jiddeċiedu li jindirizzawhom permezz tal-ipproċessar ta’ data li għandha tal-inqas valur ekwivalenti jew inkella jqisuhom li ma jistgħux jiġu mmonitorjati. Mill-2025 ’il quddiem, l-Istati Membri jenħtieġ li jiżguraw li l-kundizzjonijiet kollha ta’ eliġibbiltà li jistgħu jitqiesu li jistgħu jiġu mmonitorjati permezz tal-ipproċessar awtomatiku jew tad-data tas-satelliti Sentinels ta’ Copernicus jew inkella ta’ ritratti ġeottaggjati jkunu suġġetti għas-sistema ta’ monitoraġġ tal-erja. Madankollu, meta jitqiesu l-isforz u l-investimenti meħtieġa biex jiġu inklużi r-ritratti ġeottaggjati bħala data li għandha tal-inqas valur ekwivalenti għas-sistema ta’ monitoraġġ tal-erja, l-Istati Membri jenħtieġ li jingħataw perjodu ta’ żmien biex iwettqu l-ħidma preparatorja meħtieġa. Għal din ir-raġuni, l-Istati Membri jeħtieġ li jiżguraw li l-kundizzjonijiet ta’ eliġibbiltà li jistgħu jitqiesu li jistgħu jiġu mmonitorjati permezz ta’ ritratti ġeottaggjati jenħtieġ li jiġu koperti b’mod gradwali matul il-perjodu ta’ programmazzjoni. Dawn l-isforzi jenħtieġ li jiżguraw rata ta’ progress kostanti mill-2025 ’il quddiem. L-Istati Membri jenħtieġ li jiddeċiedu liema kundizzjonijiet ta’ eliġibbiltà li jistgħu jitqiesu li jistgħu jiġu mmonitorjati permezz ta’ ritratti ġeottaggjati jsiru suġġetti għas-sistema ta’ monitoraġġ tal-erja kull sena. Barra minn hekk, sabiex l-Istati Membri jiġu megħjuna aktar fl-integrazzjoni ta’ din it-teknoloġija l-ġdida fis-sistema ta’ monitoraġġ tal-erja, jenħtieġ li l-Istati Membri bħala minimu, jissuġġettaw għas-sistema ta’ monitoraġġ tal-erja perċentwal ta’ interventi li għalihom il-kundizzjonijiet ta’ eliġibbiltà jistgħu jitqiesu li jistgħu jiġu mmonitorjati biss bir-ritratti ġeottaggjati qabel l-1 ta’ Jannar 2027. L-Istati Membri jenħtieġ li jkollhom il-flessibbiltà li jiddeċiedu liema interventi, b’mill-inqas kundizzjoni waħda ta’ eliġibbiltà li se tiġi mmonitorjata bir-ritratti ġeottaggjati skont is-sistema ta’ monitoraġġ tal-erja, huma inklużi fil-perċentwal. Madankollu, fid-deċiżjoni tagħhom, l-Istati Membri jenħtieġ li jiżguraw li l-interventi kollha bbażati fuq l-erja jkunu suġġetti għal sistema ta’ monitoraġġ tal-erja kif meħtieġ mill-Artikolu 70 tar-Regolament (UE) 2021/2116.

(12)

Barra minn hekk, jenħtieġ li jiġi stabbilit ukoll sett komuni ta’ rekwiżiti biex jiġi żgurat li ż-żoni li ssir talba għalihom skont intervent ma jkunx fihom art ineliġibbli, użu ineliġibbli tal-art u bidliet fil-kategorija taż-żona agrikola li jistgħu jħallu impatt fuq l-analiżi tal-kundizzjonijiet ta’ eliġibbiltà speċifiċi għall-intervent bl-użu tas-sistema ta’ monitoraġġ tal-erja. Matul is-sena tat-talba, dawn ir-rekwiżiti jenħtieġ li jiġu vvalutati fir-rigward tal-kundizzjonijiet ta’ eliġibbiltà tal-interventi inklużi f’applikazzjoni għall-għajnuna partikolari sabiex tkun tista’ ssir analiżi sussegwenti sinifikanti mis-sistema ta’ monitoraġġ tal-erja. L-użu tal-art jenħtieġ li jiġi vvalutat f’żona delineata sabiex jiġi konkluż jekk fuq il-bażi ta’ applikazzjoni għal għajnuna partikolari u l-intervent ikkonċernat, tkunx seħħet l-imġiba spazjali jew temporali mistennija. Fl-iżvilupp tas-sistema ta’ monitoraġġ tal-erja, l-Istati Membri jenħtieġ li jibbenefikaw bis-sħiħ mill-potenzjal tagħha billi jużaw l-informazzjoni disponibbli għall-aġġornament tas-sistema għall-identifikazzjoni tal-bċejjeċ tar-raba’ u jikkomunikaw mal-benefiċjarji bil-ħsieb li jippermettu emendi għall-applikazzjonijiet għall-għajnuna. Meta l-Istat Membru jkun jeħtieġ li jinforma lill-benefiċjarju dwar nuqqasijiet ta’ konformità wara r-riżultati tas-sistema ta’ monitoraġġ tal-erja f’każijiet ta’ preżenza ta’ żoni ineliġibbli jew ta’ użu ineliġibbli tal-art, l-informazzjoni dwar in-nuqqas ta’ konformità jenħtieġ li tiġi kkomunikata hekk kif tiġi identifikata sabiex il-benefiċjarju jingħata l-possibbiltà li jemenda l-applikazzjoni għall-għajnuna mill-aktar fis possibbli u l-analiżi tas-sistema ta’ monitoraġġ tal-erja terġa’ ssir f’waqtha u b’mod sinifikanti. Jenħtieġ li jiġi ċċarat ukoll kif tapplika fil-prattika l-possibbiltà ta’ implimentazzjoni gradwali tas-sistema, billi jiġu speċifikati l-interventi li għandhom jiġu koperti fl-2023.

(13)

Sabiex is-sistema ta’ monitoraġġ tal-erja tkun tista’ tkopri l-kundizzjonijiet kollha ta’ eliġibbiltà tal-interventi kollha bbażati fuq l-erja ġestiti skont is-sistema integrata li jistgħu jiġu mmonitorjati permezz tad-data tas-satelliti Sentinels ta’ Copernicus jew ta’ data oħra li għandha tal-inqas valur ekwivalenti, huwa meħtieġ li jiġu estiżi t-tipi ta’ data u li jiġu pprovduti l-istandards li jiżguraw l-ekwivalenza tagħhom għad-data satellitari. Sabiex jiġu evitati lakuni fl-isforzi ta' modernizzazzjoni tal-Istati Membri, ir-ritratti ġeottaggjati jenħtieġ li jitqiesu bħala data li għandha tal-inqas valur ekwivalenti għall-finijiet tas-sistema ta’ monitoraġġ tal-erja.

(14)

Jeħtieġ li jiġu stabbiliti regoli speċifiċi għal proċedura oġġettiva u effiċjenti li skontha għandu jitwettaq l-akkwist tad-data satellitari għall-finijiet tas-sistema ta’ monitoraġġ tal-erja.

(15)

Għall-ġestjoni xierqa tal-interventi fir-rigward tal-qoton, jenħtieġ li jiġu previsti ċerti regoli dwar il-kontenut tal-verifiki li jwettqu l-Istati Membri fuq l-organizzazzjonijiet interprofessjonali approvati.

(16)

Fl-interess taċ-ċarezza u ċ-ċertezza legali, ir-Regolament ta’ Implimentazzjoni (UE) Nru 809/2014 jenħtieġ li jitħassar. Madankollu, dak ir-Regolament jenħtieġ li jkompli japplika għal applikazzjonijiet għall-għajnuna għal pagamenti diretti ppreżentati qabel l-1 ta’ Jannar 2023 u għal talbiet għal pagamenti magħmula fir-rigward ta’ miżuri ta’ appoġġ implimentati skont ir-Regolament (UE) Nru 1305/2013 tal-Parlament Ewropew u tal-Kunsill (5).

(17)

Il-miżuri previsti f’dan ir-Regolament huma skont l-opinjoni tal-Kumitat dwar il-Fondi Agrikoli, il-Kumitat dwar il-Politika Agrikola Komuni u l-Kumitat għall-Organizzazzjoni Komuni tas-Swieq Agrikoli,

(1)

L-esperjenza miksuba bl-implimentazzjoni tar-Regolament ta’ Implimentazzjoni tal-Kummissjoni (UE) 2015/1998 (2) uriet il-ħtieġa għal emendi żgħar għall-modalitajiet ta’ implimentazzjoni ta’ ċerti standards bażiċi komuni.

(2)

Ċerti miżuri dettaljati tas-sigurtà tal-avjazzjoni jenħtieġ li jiġu kkjarifikati, armonizzati jew issimplifikati sabiex titjieb iċ-ċarezza legali, sabiex ikun hemm standardizzazzjoni tal-interpretazzjoni komuni tal-leġiżlazzjoni u sabiex tkompli tiġi żgurata l-aħjar implimentazzjoni tal-istandards bażiċi komuni għas-sigurtà tal-avjazzjoni. Barra minn hekk, ċerti emendi saru meħtieġa minħabba l-evoluzzjoni tas-sitwazzjoni ta’ theddid u ta’ riskju, u l-iżviluppi reċenti f’termini ta’ operazzjonijiet tal-ajruporti u tal-linji tal-ajru, it-teknoloġija u l-politika internazzjonali. Dawk l-emendi jirrigwardaw is-sigurtà tal-ajruporti, il-ġarr sikur u sigur tal-armi tan-nar abbord, it-taħriġ tal-persunal, is-sigurtà tal-merkanzija u tal-posta bl-ajru, il-fornituri magħrufa tal-provvisti tal-ajruporti, il-verifika tal-preċedenti personali, il-klieb għall-individwazzjoni tal-isplussivi, u l-istandards tal-individwazzjoni għat-tagħmir bokka għall-individwazzjoni tal-metall.

(3)

Għalhekk, jenħtieġ li r-Regolament ta’ Implimentazzjoni (UE) 2015/1998 jiġi emendat skont dan.

(4)

Peress li huwa meħtieġ żmien raġonevoli biex il-membri tal-ekwipaġġ tat-titjira u tal-kabina li jimplimentaw il-miżuri tas-sigurtà waqt it-titjiriet ikunu jistgħu jagħmlu t-taħriġ stabbilit fil-punt (38) tal-Anness ta’ dan ir-Regolament, l-applikazzjoni ta’ dan il-punt jenħtieġ li tiġi differita għall-1 ta’ Jannar 2023.

(5)

Il-miżuri previsti f’dan ir-Regolament huma skont l-opinjoni tal-Kumitat stabbilit bl-Artikolu 19 tar-Regolament (KE) Nru 300/2008,

(1)

Fl-4 ta’ Mejju 2018, il-Kummissjoni (“il-Kummissjoni”) adottat ir-Regolament ta’ Implimentazzjoni (UE) 2018/683 (3) li jimponi dazju antidumping proviżorju fuq l-importazzjonijiet ta’ ċerti tajers pnewmatiċi, ġodda jew b’wiċċ ġdid, tal-lastiku, tat-tip użat għall-karozzi tal-linja jew għat-trakkijiet, b’indiċi tat-tagħbija li jaqbeż il-121, li joriġinaw mir-Repubblika tal-Poplu taċ-Ċina (ir-Regolament proviżorju’).

(2)

Fit-18 ta’ Ottubru 2018, il-Kummissjoni adottat ir-Regolament ta’ Implimentazzjoni (UE) 2018/1579 (4) li jimponi dazju anti-dumping definittiv u li jiġbor b’mod definittiv id-dazju proviżorju impost fuq l-importazzjonijiet ta’ ċerti tajers pnewmatiċi, ġodda jew b’wiċċ ġdid, tal-lastiku, tat-tip użat għall-karozzi tal-linja jew għat-trakkijiet, b’indiċi tat-tagħbija li jaqbeż il-121, li joriġinaw mir-Repubblika tal-Poplu taċ-Ċina.

(3)

Fit-9 ta’ Novembru 2018, il-Kummissjoni adottat ir-Regolament ta’ Implimentazzjoni (UE) 2018/1690 (5) li jimponi dazji kumpensatorji definittivi fuq l-importazzjonijiet ta’ ċerti tajers pnewmatiċi ġodda jew b’wiċċ ġdid, ta’ tip użat għall-karozzi tal-linja jew għat-trakkijiet u b’indiċi tat-tagħbija li jaqbeż il-121 li joriġinaw mir-Repubblika tal-Poplu taċ-Ċina u li jemenda r-Regolament ta’ Implimentazzjoni (UE) 2018/1579.

(4)

Iċ-China Rubber Industry Association (CRIA) u ċ-China Chamber of Commerce of Metals, Minerals & Chemicals Importers & Exporters (CCCMC) ippreżentaw rikorsi għal annullament quddiem il-Qorti Ġenerali fejn ikkontestaw il-legalità tar-regolamenti kontenzjużi.

(5)

Is-CRIA u s-CCCMC qajmu diversi lmenti kontra r-regolamenti inkwistjoni u l-Qorti Ġenerali ddeċidiet fuq tnejn minnhom: (i) in-nuqqas tal-Kummissjoni li twettaq tqabbil ġust tal-prezzijiet fil-kalkolu tat-twaqqigħ tal-prezz u tal-marġnijiet tad-dannu, u (ii) ċerti lmenti li jallegaw, essenzjalment, inkonsistenzi u ksur tad-drittijiet tad-difiża fir-rigward tal-indikaturi tad-dannu u l-ponderazzjoni tad-data mill-kampjun tal-produtturi tal-Unjoni.

(6)

Fl-4 ta’ Mejju 2022, il-Qorti Ġenerali tat is-sentenza tagħha fil-kawżi T-30/19 u T-72/19, fejn annullat kemm ir-Regolament ta’ Implimentazzjoni (UE) 2018/1579 (anti-dumping) kif ukoll ir-Regolament ta’ Implimentazzjoni (UE) 2018/1690 (antisussidji).

(7)

Rigward il-kalkolu tat-twaqqigħ tal-prezz, il-Qorti Ġenerali sabet li l-Kummissjoni wettqet tqabbil inġust meta għamlet aġġustament fil-prezz tal-esportazzjoni - it-tnaqqis tal-SG&A tal-importatur relatat u profitt nozzjonali - meta l-bejgħ sar permezz ta’ negozjant relatat fl-Unjoni. Il-Qorti nnutat li l-produtturi tal-Unjoni għamlu wkoll xi bejgħ permezz ta’ entitajiet relatati, u l-prezzijiet tal-bejgħ tagħhom ma ġewx aġġustati. Il-Qorti Ġenerali kkonkludiet li l-kalkolu tal-marġni tat-twaqqigħ tal-prezzijiet imwettaq mill-Kummissjoni fir-regolamenti kkontestati kien ivvizzjat bi żball ta’ liġi u bi żball manifest ta’ evalwazzjoni u li, konsegwentement, dan il-kalkolu kiser l-Artikolu 3(2) u (3) tar-Regolament anti-dumping bażiku u l-Artikolu 8(1) u (2) tar-Regolament bażiku anti-sussidji. Barra minn hekk, il-Qorti Ġenerali sabet li l-iżbalji kellhom impatt fuq is-sejbiet globali tad-dannu u tal-kawżalità kif ukoll fuq il-marġnijiet tad-dannu, u li ma kienx possibbli li jiġi ddeterminat preċiżament sa liema punt id-dazji antidumping u kumpensatorji definittivi inkwistjoni baqgħu parzjalment fondati. Għaldaqstant, ir-regolamenti li jimponu dawn id-dazji fuq ir-rikorrenti ġew annullati.

(8)

Fir-rigward tat-tieni punt, il-Qorti Ġenerali kkonstatat li l-Kummissjoni ma wettqitx eżami oġġettiv (kif meħtieġ mill-Artikolu 3(2) tar-Regolament anti-dumping bażiku u mill-Artikolu 8(1) tar-Regolament anti-sussidji bażiku) peress li, billi ma rrevedietx il-kalkoli tal-indikaturi mikroekonomiċi kollha minbarra l-profittabbiltà, u billi ma indikatx iċ-ċifri riveduti fir-regolament ikkontestat, il-Kummissjoni ma użatx id-data rilevanti kollha li kellha għad-dispożizzjoni tagħha. Barra minn hekk, il-Qorti Ġenerali sabet ksur tad-drittijiet tad-difiża tar-rikorrenti. B’mod partikolari, il-Qorti Ġenerali ma qablitx li xi informazzjoni li ma ġietx żvelata lill-partijiet setgħet titqies kunfidenzjali, u sabet li d-data kollha inkwistjoni kienet “marbuta ma’ sejbiet ta’ fatt fir-regolament ikkontestat”. Għalhekk, kienu “fatti u kunsiderazzjonijiet essenzjali” li kellhom jiġu żvelati lill-partijiet.

(9)

Fid-dawl ta’ dak li ntqal hawn fuq, il-Qorti Ġenerali annullat ir-regolament anti-dumping inkwistjoni sa fejn kienu kkonċernati l-kumpaniji rrappreżentati minn CRIA u CCCMC (elenkati fl-Anness I).

(10)

Barra minn hekk, il-Qorti Ġenerali annullat ir-regolament anti-sussidju inkwistjoni sa fejn kienu kkonċernati l-kumpaniji rrappreżentati minn CRIA u CCCMC (elenkati fl-Anness II).

(11)

Il-Kummissjoni analizzat jekk huwiex xieraq li l-importazzjonijiet tal-prodott ikkonċernat isiru soġġetti għal reġistrazzjoni. F’dan il-kuntest, il-Kummissjoni kkunsidrat il-kunsiderazzjonijiet li ġejjin.

(12)

L-Artikolu 266 tat-TFUE jistipula li l-istituzzjonijiet iridu jieħdu l-miżuri neċessarji biex jikkonformaw mas-sentenzi tal-Qrati. Fil-każ ta’ annullament ta’ att adottat mill-Istituzzjonijiet fil-kuntest ta’ proċedura amministrattiva, bħall-investigazzjonijiet anti-dumping jew antisussidji, il-konformità mas-sentenza tal-Qorti Ġenerali tikkonsisti fis-sostituzzjoni tal-att annullat b’att ġdid, li fih l-illegalità identifikata mill-Qorti tiġi eliminata (6).

(13)

Skont il-ġurisprudenza tal-Qorti tal-Ġustizzja, il-proċedura għas-sostituzzjoni tal-att annullat tista’ tissokta fil-punt eżatt li fih saret l-illegalità (7). Dan jimplika b’mod partikolari li, f’sitwazzjoni fejn att li jikkonkludi proċedura amministrattiva jiġi annullat, l-annullament mhux neċessarjament jaffettwa l-atti preparatorji, bħall-ftuħ tal-proċedura anti-dumping. F’sitwazzjoni fejn, pereżempju, Regolament li jimponi miżuri anti-dumping definittivi jiġi annullat, dan ifisser li wara l-annullament, il-proċediment anti-dumping ikun għadu miftuħ, minħabba li l-att li jikkonkludi l-proċediment anti-dumping ikun sparixxa mill-ordni legali tal-Unjoni (8), ħlief jekk l-illegalità tkun saret fl-istadju tal-bidu.

(14)

Kif spjegat fl-Avviż ta’ ftuħ mill-ġdid, u peress li l-illegalità ma seħħitx fl-istadju tal-bidu iżda fl-istadju tal-investigazzjoni, il-Kummissjoni ddeċidiet li terġa’ tiftaħ l-investigazzjonijiet anti-dumping u antisussidji sa fejn dawn jikkonċernaw il-kumpaniji elenkati fit-Taqsima 1.2 hawn fuq, u reġgħet bdiethom fil-punt li fih seħħet l-irregolarità.

(15)

Skont il-ġurisprudenza tal-Qorti tal-Ġustizzja, it-tkomplija tal-proċedura amministrattiva u l-impożizzjoni mill-ġdid eventwali tad-dazji ma jistgħux jitqiesu bħala kuntrarji għar-regola ta’ nonretroattività (9). L-Avviż ta’ ftuħ mill-ġdid informa lill-partijiet interessati, inklużi l-importaturi, li kull responsabbiltà fil-ġejjieni, jekk tkun meħtieġa, tkun ġejja mis-sejbiet tal-eżami mill-ġdid.

(16)

Abbażi tas-sejbiet il-ġodda tagħha u tal-eżitu tal-investigazzjonijiet li reġgħu nfetħu, li f’dan l-istadju mhuwiex magħruf, il-Kummissjoni tista’ tadotta regolamenti li jirrevedu, fejn meħtieġ, ir-rati tad-dazju applikabbli. Dawn ir-rati ġodda riveduti, jekk ikun hemm, jidħlu fis-seħħ mid-data li fiha r-regolamenti inkwistjoni jidħlu fis-seħħ.

(17)

Għal dan il-għan, il-Kummissjoni talbet lill-awtoritajiet doganali nazzjonali biex jistennew l-eżitu tar-rieżami qabel ma jiddeċiedu dwar kwalunkwe talba għal ħlas lura li tikkonċerna d-dazji anti-dumping u/jew kumpensatorji annullati mill-Qorti Ġenerali. B’hekk l-awtoritajiet doganali huma ordnati li jissospendu kwalunkwe pretensjoni għar-rimborż tad-dazji annullati sakemm l-eżitu tar-rieżami jiġi ppubblikat f’Il-Ġurnal Uffiċjali tal-Unjoni Ewropea.

(18)

Barra minn hekk, jekk l-investigazzjonijiet tal-ftuħ mill-ġdid iwasslu għall-impożizzjoni mill-ġdid tal-miżuri, id-dazji jenħtieġ li jinġabru wkoll għall-perjodu li matulu jitwettqu l-investigazzjonijiet tal-ftuħ mill-ġdid.

(19)

F’dan ir-rigward, il-Kummissjoni tinnota li r-reġistrazzjoni hija għodda pprovduta fl-Artikoli 14(5) tar-Regolament antidumping bażiku u l-Artikolu 24(5) tar-Regolament anti-sussidji bażiku sabiex sussegwentement il-miżuri jkunu jistgħu jiġu applikati kontra l-importazzjonijiet mid-data tar-reġistrazzjoni (10). F’dan il-każ, il-Kummissjoni tqis li huwa xieraq li jiġu rreġistrati l-importazzjonijiet li jikkonċernaw il-kumpaniji elenkati fit-Taqsima 1.2 hawn fuq bil-ħsieb li jiġi ffaċilitat il-ġbir tad-dazji anti-dumping u kumpensatorji ladarba l-livelli tagħhom jiġu riveduti f’konformità mas-sentenza tal-Qorti Ġenerali (11).

(20)

F’konformità mal-ġurisprudenza tal-Qorti tal-Ġustizzja (12), għall-kuntrarju tar-reġistrazzjoni li sseħħ matul il-perjodu qabel l-adozzjoni tal-miżuri provviżorji, il-kundizzjonijiet tal-Artikolu 10(4) tar-Regolament anti-dumping bażiku u l-Artikolu 16(4) tar-Regolament antisussidji bażiku mhumiex applikabbli għal dan il-każ. Tabilħaqq, l-għan tar-reġistrazzjoni fil-kuntest ta’ implimentazzjoni tal-Qorti mhuwiex li jippermetti l-ġbir retroattiv possibbli ta’ miżuri ta’ difiża tal-kummerċ kif previst f’dawk id-dispożizzjonijiet. L-għan huwa pjuttost li tiġi ssalvagwardjata l-effettività tal-miżuri fis-seħħ, mingħajr interruzzjoni żejda mid-data tad-dħul fis-seħħ tar-regolamenti inkwistjoni sal-impożizzjoni mill-ġdid tad-dazji kkoreġuti, billi jiġi żgurat li l-ġbir ta’ miżuri fl-ammont korrett ikun possibbli fil-futur.

(21)

Fid-dawl tal-kunsiderazzjonijiet ta’ hawn fuq, il-Kummissjoni kkunsidrat li kien hemm raġunijiet għar-reġistrazzjoni skont l-Artikolu 14(5) tar-Regolament anti-dumping bażiku u l-Artikolu 24(5) tar-Regolament antisussidji bażiku.

(22)

Fuq il-bażi ta’ dan ta’ hawn fuq, l-importazzjonijiet tal-prodott ikkonċernat immanifatturat mill-kumpaniji elenkati fit-Taqsima 1.2 hawn fuq iridu jkunu soġġetti għal reġistrazzjoni (13).

(23)

Kif indikat fl-Avviż ta’ ftuħ mill-ġdid, l-obbligazzjoni finali għall-ħlas ta’ dazji anti-dumping u kompensatorji, jekk ikun hemm, mid-data tad-dħul fis-seħħ tar-regolamenti anti-dumping u antisussidji inkwistjoni toħroġ mis-sejbiet tar-rieżaminazzjoni.

(24)

L-ebda dazji ogħla mid-dazji stabbiliti fir-regolamenti inkwistjoni ma jistgħu jinġabru għall-perjodu bejn il-pubblikazzjoni tal-avviż tal-ftuħ mill-ġdid u d-data tad-dħul fis-seħħ tar-riżultati tal-ftuħ mill-ġdid tal-investigazzjonijiet.

(1)

Is-sustanzi 2-Idrossi-4-metossibenżofenon/Ossibenżon (Nru tal-CAS 131-57-7) li ġew assenjati l-isem Benżofenon-3 skont in-Nomenklatura Internazzjonali tal-Ingredjenti Kożmetiċi (INCI), u l-aċidu akriliku 2-Ċjano-3,3-difenil, 2-etileżil ester/Ottokrilen (Nru tal-CAS 6197-30-4), li ġie assenjat l-isem Ottokrilen fil-qafas tal-INCI, bħalissa huma permessi bħala filtri tal-UV fil-prodotti kożmetiċi u huma elenkati fl-entrati 4 u 10 rispettivament, fl-Anness VI tar-Regolament (KE) Nru 1223/2009.

(2)

Fid-dawl tat-tħassib relatat mal-proprjetajiet potenzjali ta’ li jfixklu s-sistema endokrinali tal-Benżofenon-3 u tal-Ottokrilen, meta jintużaw bħala filtri tal-UV fil-prodotti kożmetiċi, tnediet sejħa għad-data fl-2019. Il-partijiet ikkonċernati ppreżentaw evidenza xjentifika li turi s-sikurezza tal-Benżofenon-3 u tal-Ottokrilen bħala filtri tal-UV fil-prodotti kożmetiċi. Il-Kummissjoni talbet lill-Kumitat Xjentifiku dwar is-Sikurezza tal-Konsumatur (SCCS) biex iwettaq valutazzjoni tas-sikurezza taż-żewġ sustanzi fid-dawl tal-informazzjoni pprovduta.

(3)

Abbażi tal-valutazzjoni tas-sikurezza u b’kunsiderazzjoni tat-tħassib relatat mal-proprjetajiet potenzjali li jfixklu s-sistema endokrinali tal-Benżofenon-3, l-SCCS ikkonkluda fl-opinjoni tiegħu tat-30-31 ta’ Marzu 2021 (2) li l-Benżofenon-3 mhuwiex sikur għall-konsumatur meta jintuża bħala filtru tal-UV sal-konċentrazzjoni massima kurrenti ta’ 6 % fi prodotti għall-protezzjoni mix-xemx, fil-forma ta’ krema tal-ġisem, sprej propellant għall-protezzjoni mix-xemx jew sprej bil-pompa.

(4)

L-SCCS ikkonkluda wkoll li l-Benżofenon-3 huwa sikur għall-konsumatur meta jintuża bħala filtru UV sa konċentrazzjoni massima ta’ 6 % fil-krema tal-wiċċ, fil-krema tal-idejn u fil-lipsticks, u li l-użu tal-Benżofenon-3 sa 0,5 % fil-prodotti kożmetiċi biex tiġi protetta l-formulazzjoni kożmetika huwa sikur għall-konsumatur.

(5)

L-SCCS sab ukoll li l-użu tal-Benżofenon-3 bħala filtru tal-UV huwa sikur għall-konsumatur sa konċentrazzjoni massima ta’ 2,2 % fil-kremi tal-ġisem, fl-isprejs propellanti u fl-isprejs bil-pompa, jekk ma jkun hemm l-ebda użu addizzjonali tal-Benżofenon-3 sa 0,5 % fl-istess formulazzjoni għall-protezzjoni tal-formulazzjoni kożmetika. Ikkonkluda wkoll li, fejn il-Benżofenon-3 jintuża wkoll sa 0,5 % fl-istess formulazzjoni, il-livelli ta’ Benżofenon-3 użati bħala filtru tal-UV jenħtieġ li ma jaqbżux il-1,7 % fil-kremi tal-ġisem, fl-isprejs propellanti u fl-isprejs bil-pompa.

(6)

Fir-rigward tas-sustanza Ottokrilen, abbażi tal-valutazzjoni tas-sikurezza u b’kunsiderazzjoni tat-tħassib marbut mal-proprjetajiet potenzjali tagħha li jfixklu s-sistema endokrinali, fl-opinjoni tiegħu tat-30-31 ta’ Marzu 2021 (3), l-SCCS ikkonkluda li l-Ottokrilen huwa sikur bħala filtru tal-UV f’konċentrazzjonijiet sa 10 % fil-prodotti kożmetiċi meta jintuża individwalment.

(7)

L-SCCS sab ukoll li l-użu tal-Ottokrilen huwa sikur għal użu kkombinat ta’ krema jew lozjoni għall-protezzjoni mix-xemx, sprej bil-pompa għall-protezzjoni mix-xemx, krema tal-wiċċ, krema tal-idejn u lipstick f’konċentrazzjonijiet sa 10 %, iżda li l-użu tal-Ottokrilen f’konċentrazzjonijiet ta’ 10 % jew aktar fl-isprej propellant għall-protezzjoni mix-xemx mhuwiex sikur għall-użu kkombinat. L-SCCS ikkunsidra l-użu tal-Ottokrilen fi prodotti bħal dawn sikur meta l-konċentrazzjoni tiegħu ma taqbiżx id-9 %, meta jintuża flimkien ma’ krema tal-wiċċ, krema tal-idejn, jew lipstick li fih(a) 10 % Ottokrilen.

(8)

Fid-dawl tal-opinjonijiet tal-SCCS, jista’ jiġi konkluż li hemm riskju potenzjali għas-saħħa tal-bniedem mill-użu tal-Benżofenon-3 u tal-Ottokrilen bħala filtri tal-UV fil-prodotti kożmetiċi fil-konċentrazzjonijiet permessi bħalissa. Għalhekk, l-użu tal-Benżofenon-3 u tal-Ottokrilen jenħtieġ li jiġi ristrett għall-konċentrazzjonijiet proposti mill-SCCS.

(9)

Għalhekk, jenħtieġ li r-Regolament (KE) Nru 1223/2009 jiġi emendat skont dan.

(10)

Jenħtieġ li l-industrija tingħata perjodi ta’ żmien raġonevoli biex tadatta għar-rekwiżiti l-ġodda, inkluż billi tagħmel l-aġġustamenti meħtieġa fil-formulazzjonijiet tal-prodotti sabiex tiżgura li jitqiegħdu fis-suq biss il-prodotti kożmetiċi li jikkonformaw mar-rekwiżiti l-ġodda. Jenħtieġ li l-industrija tingħata wkoll perjodu raġonevoli ta’ żmien biex tirtira dawk il-prodotti kożmetiċi li ma jikkonformawx ma’ dawk ir-rekwiżiti.

(11)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Prodotti Kożmetiċi,

(1)

Ir-Regolament ta’ Implimentazzjoni tal-Kummissjoni (UE) 2020/683 (2) jipprevedi format standardizzat tad-dokumenti użati għall-approvazzjoni tat-tip ta’ vetturi bil-mutur u t-trejlers tagħhom, u ta’ sistemi, komponenti u unitajiet tekniċi separati maħsuba għal tali vetturi billi jistabbilixxi l-mudelli għad-dokument ta’ informazzjoni, iċ-ċertifikati ta’ approvazzjoni ta’ vetturi individwali tal-UE u ċ-ċertifikati ta’ konformità f’format stampat.

(2)

Il-mudelli għad-dokumenti ta’ informazzjoni, li jinsabu fl-Annessi I u II tar-Regolament ta’ Implimentazzjoni (UE) 2020/683, jenħtieġ li jiġu mmodifikati biex jitqiesu r-rekwiżiti l-ġodda introdotti bir-Regolament (UE) 2019/2144 tal-Parlament Ewropew u tal-Kunsill (3) u l-atti regolatorji adottati skontu.

(3)

Sabiex ikun hemm approċċ konsistenti fir-rigward tan-numerazzjoni taċ-ċertifikati ta’ approvazzjoni, huwa meħtieġ ukoll li tiġi emendata s-sistema ta’ numerazzjoni stabbilita fl-Anness IV tar-Regolament ta’ Implimentazzjoni (UE) 2020/683 biex tirrifletti l-iżvilupp regolatorju skont ir-Regolament (UE) 2019/2144.

(4)

Huwa xieraq ukoll li jiġi emendat l-Anness V tar-Regolament ta’ Implimentazzjoni (UE) 2020/683, li jistabbilixxi l-mudell għall-marka tal-approvazzjoni tat-tip tal-UE għall-komponenti u l-unitajiet tekniċi separati, billi tiġi aġġornata r-referenza għar-Regolament (UE) 2019/2144.

(5)

Ir-Regolament (UE) 2019/2144 jirrikjedi li vetturi ġodda jkunu mgħammra b’sistemi avvanzati ta’ sikurezza, inklużi l-assistenza ta’ emerġenza kontra l-ħruġ mill-karreġġata, l-assistenza intelliġenti tal-veloċità, is-sistemi ta’ twissija tal-ħedla u tal-attenzjoni tas-sewwieq, u r-reġistratur tad-data f’każ ta’ avveniment. Huwa xieraq li jkun meħtieġ li ċ-ċertifikat ta’ konformità jindika liema sistemi huma installati fil-vettura. Għalhekk jeħtieġ li jiżdiedu l-entrati rilevanti fil-mudelli għaċ-ċertifikat ta’ konformità f’format stampat stabbiliti fl-Anness VIII tar-Regolament ta’ Implimentazzjoni (UE) 2020/683.

(6)

Għaldaqstant, jenħtieġ li r-Regolament ta’ Implimentazzjoni (UE) 2020/683 jiġi emendat skont dan.

(7)

Sabiex l-awtoritajiet tal-approvazzjoni, l-awtoritajiet tas-sorveljanza tas-suq u l-awtoritajiet tar-reġistrazzjoni tal-Istati Membri, u l-manifatturi jingħataw biżżejjed żmien biex jimplimentaw l-emendi għaċ-ċertifikat ta’ konformità f’format stampat fis-sistemi rispettivi tagħhom, id-data tal-applikazzjoni tal-Anness V jenħtieġ li tiġi differita.

(8)

Il-miżuri previsti f’dan ir-Regolament huma skont l-opinjoni tal-Kumitat Tekniku – Vetturi bil-Mutur,