(1)

Skont id-Deċiżjoni tal-Kunsill (UE) 2019/1580 (2), il-Ftehim dwar ir-Rispett għal-Limitazzjonijiet ta’ Żmien għall-Arranġamenti għall-Provvista ta’ Inġenji tal-Ajru bl-Ekwipaġġ bejn l-Unjoni Ewropea, l-Istati Uniti tal-Amerka, l-Iżlanda u r-Renju tan-Norveġja ("il-Ftehim") (3) ġie ffirmat fis-27 ta’ Awwissu 2019, soġġett għall-konklużjoni tiegħu f’data iktar tard. Il-Ftehim, li huwa mehmuż għad-Deċiżjoni (UE) 2019/1580 flimkien mal-Memorandum ta’ Konsultazzjonijiet (4) ġie applikat b’mod proviżorju mid-data tal-iffirmar tiegħu.

(2)

Kif previst mid-Dikjarazzjoni Konġunta li tagħmel parti integrali tal-Ftehim u mid-Deċiżjoni (UE) 2019/1580, il-Ftehim, li ġie ffirmat bl-Ingliż, ġie mfassal ukoll b’lingwi uffiċjali oħra tal-Unjoni u dawk il-verżjonijiet lingwistiċi addizzjonali għandhom jiġu awtentikati permezz ta’ skambju ta’ ittri bejn il-Partijiet.

(3)

Il-Ftehim jenħtieġ li jiġi approvat,

(1)

Ir-Regolament (UE) 2021/695 tal-Parlament Ewropew u tal-Kunsill (3) jistabbilixxi l-Orizzont Ewropa – il-Programm Qafas għar-Riċerka u l-Innovazzjoni (“Orizzont Ewropa”). Partijiet mill-Orizzont Ewropa jistgħu jiġu implimentati permezz ta’ Sħubijiet Ewropej, ma’ sħab mis-settur privat u/jew pubbliku, biex jinkiseb l-akbar impatt possibbli tal-finanzjament tal-Unjoni u l-aktar kontribut effettiv għall-objettivi ta’ politika tal-Unjoni.

(2)

F’konformità mar-Regolament (UE) 2021/695 jista’ jingħata appoġġ lill-Impriżi Konġunti stabbiliti fil-qafas tal-Orizzont Ewropa. Jenħtieġ li dawn is-sħubijiet jiġu implimentati biss meta partijiet oħra tal-Orizzont Ewropa, inkluż forom oħra ta’ Sħubijiet Ewropej, ma jkunux jilħqu l-objettivi tiegħu jew ma jkunux jiġġeneraw l-impatti mistennija meħtieġa, u jekk ikunu ġustifikati b’perspettiva fit-tul u bi grad għoli ta’ integrazzjoni. Il-kondizzjonijiet li fihom jinħolqu dawn is-sħubijiet huma speċifikati f’dak ir-Regolament.

(3)

Ir-Regolament (UE) 2021/694 tal-Parlament Ewropew u tal-Kunsill (4) jistabbilixxi l-Programm Ewropa Diġitali. Il-Programm Ewropa Diġitali jappoġġa l-implimentazzjoni ta’ proġetti ta’ interess komuni mmirati lejn l-akkwist, l-installazzjoni u t-tħaddim ta’ infrastruttura tas-supercomputing, kwantistika u tad-data tal-ogħla klassi, lejn il-federazzjoni u l-interkonnessjoni, u lejn it-twessigħ tal-użu tas-servizzi tas-supercomputing u l-iżvilupp tal-ħiliet ewlenin.

(4)

Ir-Regolament (UE) 2021/1153 tal-Parlament Ewropew u tal-Kunsill (5) jistabbilixxi l-Faċilità Nikkollegaw l-Ewropa. Il-Faċilità Nikkollegaw l-Ewropa tiffaċilita t-tħejjija u l-implimentazzjoni ta’ proġetti ta’ interess komuni fi ħdan il-qafas tal-politika tan-networks trans-Ewropej fis-setturi tat-trasport, it-telekomunikazzjoni u l-enerġija. B’mod partikolari, il-Faċilità Nikkollegaw l-Ewropa tappoġġa l-implimentazzjoni ta’ dawk il-proġetti ta’ interess komuni mmirati lejn l-iżvilupp u l-kostruzzjoni ta’ infrastrutturi u ta’ servizzi ġodda, jew lejn l-upgrade ta’ infrastrutturi u ta’ servizzi eżistenti, fis-setturi tat-trasport, it-telekomunikazzjoni u l-enerġija. Il-Faċilità Nikkollegaw l-Ewropa tikkontribwixxi għall-appoġġ tal-infrastrutturi tal-konnettività diġitali ta’ interess komuni li jġibu magħhom benefiċċji sinifikanti li jinfirxu għas-soċjetà.

(5)

Il-Komunikazzjoni tal-Kummissjoni tad-19 ta’ Frar 2020 intitolata “Strateġija Ewropea għad-Data” tiddeskrivi l-istrateġija tal-Ewropa għall-miżuri ta’ politika u għall-investimenti li jabilitaw l-ekonomija tad-data għall-ħames snin li ġejjin. Tenfasizza l-ħolqien ta’ spazji pubbliċi komuni Ewropej tad-data li jagħtu spinta lit-tkabbir u joħolqu l-valur. L-appoġġ għall-ħolqien ta’ dawn l-ispazji komuni Ewropej tad-data u ta’ infrastrutturi federati u siguri tal-cloud ikun jiżgura li aktar data ssir disponibbli għall-użu fl-ekonomija u fis-soċjetà, waqt li l-kontroll jibqa’ għand il-kumpanniji u l-individwi li jiġġeneraw id-data. Il-Computing ta’ Prestazzjoni Għolja u l-computing kwantistiku huma komponenti essenzjali tal-provvista bla xkiel ta’ riżorsi tal-computing b’karatteristiċi ta’ prestazzjoni differenti li huma meħtieġa biex jiġu massimizzati t-tkabbir u l-isfruttar tal-ispazji pubbliċi komuni Ewropej tad-data u tal-infrastrutturi federati u siguri tal-cloud għal applikazzjonijiet pubbliċi, industrijali u xjentifiċi.

(6)

Il-Komunikazzjoni tal-Kummissjoni tad-19 ta’ Frar 2020 intitolata “Insawru l-Futur Diġitali tal-Ewropa” tippreżenta l-istrateġija diġitali tal-Ewropa u tiffoka fuq objettivi ewlenin biex tiżgura li s-soluzzjonijiet diġitali jgħinu lill-Ewropa tkompli fi triqitha lejn trasformazzjoni diġitali li taħdem għall-benefiċċju tan-nies. Fost l-azzjonijiet ewlenin li tipproponi hemm l-investiment fil-bini u l-implimentazzjoni ta’ kapaċitajiet diġitali konġunti mill-aktar avvanzati, inkluż fit-teknoloġiji tas-supercomputing u kwantistiċi, u l-espansjoni tal-kapaċità tas-supercomputing tal-Ewropa biex tiżviluppa soluzzjonijiet innovattivi għall-mediċina, it-trasport u l-ambjent.

(7)

Il-Komunikazzjoni tal-Kummissjoni tal-10 ta’ Marzu 2020 intitolata “Strateġija Industrijali Ġdida għall-Ewropa” tirrifletti strateġija industrijali ambizzjuża għall-Ewropa biex tmexxi ż-żewġ tranżizzjonijiet lejn in-newtralità klimatika u t-tmexxija diġitali. Il-Komunikazzjoni tenfasizza l-appoġġ, fost l-oħrajn, għall-iżvilupp ta’ teknoloġiji abilitanti essenzjali li huma strateġikament importanti għall-futur industrijali tal-Ewropa, inkluż teknoloġiji tal-Computing ta’ Prestazzjoni Għolja u kwantistiċi.

(8)

Il-Komunikazzjoni tal-Kummissjoni tas-27 ta’ Mejju 2020 intitolata “Il-mument tal-Ewropa: Tiswija u Tħejjija għall-Ġenerazzjoni li Jmiss” identifikat għadd ta’ kapaċitajiet u ta’ ħiliet diġitali strateġiċi li kienu jinkludu Kompjuters ta’ Prestazzjoni Għolja u teknoloġiji kwantistiċi bħala prijorità fil-Faċilità għall-Irkupru u r-Reżiljenza, f’InvestEU u fil-Faċilità għall-Investiment Strateġiku.

(9)

Ir-rwol ewlieni tal-Ewropa fl-ekonomija tad-data, l-eċċellenza xjentifika tagħha, u s-saħħa industrijali tagħha jiddependu dejjem aktar fuq il-kapaċità tagħha li tiżviluppa teknoloġiji ewlenin tal-Computing ta’ Prestazzjoni Għolja, li tipprovdi aċċess għal infrastrutturi tas-supercomputing u tad-data tal-ogħla klassi, u li żżomm it-tmexxija attwali tagħha f’applikazzjonijiet tal-Computing ta’ Prestazzjoni Għolja. Il-Computing ta’ Prestazzjoni Għolja hu teknoloġija integrata għat-trasformazzjoni diġitali tal-ekonomija Ewropea, li tippermetti lil ħafna setturi industrijali tradizzjonali jinnovaw bi prodotti u servizzi ta’ valur ogħla. Flimkien ma’ teknoloġiji diġitali avvanzati oħra bħall-intelliġenza artifiċjali, it-teknoloġiji tal-big data u tal-cloud, il-Computing ta’ Prestazzjoni Għolja qed iwitti t-triq lejn applikazzjonijiet soċjetali u industrijali innovattivi f’oqsma kritiċi għall-Ewropa bħall-mediċina personalizzata, it-tbassir tat-temp u t-tibdil fil-klima, l-iżvilupp u t-trasport intelliġenti u ekoloġiċi, materjali ġodda għall-enerġija nadifa, id-disinn tal-mediċina u l-ittestjar virtwali, l-agrikoltura sostenibbli, jew l-inġinerija u l-manifattura.

(10)

Il-Computing ta’ Prestazzjoni Għolja hu riżorsa strateġika għat-tfassil ta’ politika li abbażi tagħha jitħaddmu applikazzjonijiet li jipprovdu l-mezzi biex jinftiehmu u jitfasslu soluzzjonijiet effiċjenti bil-għan li jiġu indirizzati ħafna sfidi dinjin kumplessi u għall-ġestjoni tal-kriżijiet. Il-Computing ta’ Prestazzjoni Għolja jikkontribwixxi għal politiki ewlenin bħall-Patt Ekoloġiku Ewropew b’mudelli u għodod biex isarraf għadd dejjem akbar ta’ sfidi ambjentali kumplessi f’opportunitajiet għal innovazzjoni soċjali u tkabbir ekonomiku. Eżempju hu l-inizjattiva Destinazzjoni d-Dinja mħabbra fil-Komunikazzjonijiet tal-Kummissjoni, dik tal-11 ta’ Diċembru 2019 intitolata “Il-Patt Ekoloġiku Ewropew” u dik tad-19 ta’ Frar 2020 intitolata “Strateġija Ewropea għad-Data” u “Insawru l-Futur Diġitali tal-Ewropa”.

(11)

Avvenimenti dinjin bħall-pandemija tal-COVID-19 ħarġu fid-dieher l-importanza ta’ investiment fil-Computing ta’ Prestazzjoni Għolja u fi pjattaformi u għodod tal-immudellar relatati mas-saħħa, għax dawn qed jaqdu rwol ewlieni fil-ġlieda kontra l-pandemija, ħafna drabi flimkien ma’ teknoloġiji diġitali oħra bħall-big data u l-intelliġenza artifiċjali. Il-Computing ta’ Prestazzjoni Għolja qed jintuża biex iħaffef l-identifikazzjoni u l-produzzjoni ta’ trattamenti, inkluż il-vaċċini, ibassar l-imxija tal-virus, jgħin fl-ippjanar tad-distribuzzjoni tal-provvisti u r-riżorsi mediċi, u jissimula miżuri ta’ ħruġ mill-epidemija biex jiġu evalwati xenarji differenti meta din tgħaddi. Il-pjattaformi u l-għodod tal-immudellar tal-Computing ta’ Prestazzjoni Għolja huma għodod kritiċi għall-pandemiji attwali u futuri, u ser jaqdu rwol ewlieni fis-saħħa u l-mediċina personalizzata.

(12)

Ir-Regolament tal-Kunsill (UE) 2018/1488 (6) stabbilixxa stabbilixxa l-Impriża Konġunta għall-Computing ta’ Prestazzjoni Għolja Ewropew (l-“Impriża Konġunta EuroHPC”) b’missjoni li tiżviluppa, timplimenta, testendi u żżomm operattiva fl-Unjoni infrastruttura integrata tas-supercomputing u tad-data tal-ogħla klassi u li tiżviluppa u tappoġġa ekosistema ferm kompetittiva u innovattiva tal-Computing ta’ Prestazzjoni Għolja.

(13)

Fid-dawl tal-iżviluppi fil-Computing ta’ Prestazzjoni Għolja, wasal iż-żmien għal reviżjoni tar-Regolament (UE) 2018/1488 biex tkun żgurata li l-kontinwazzjoni tal-inizjattiva hi meħtieġa biex jiġu definiti missjoni u objettivi ġodda għall-Impriża Konġunta EuroHPC, filwaqt li titqies l-analiżi tal-ixpruni soċjoekonomiċi u teknoloġiċi ewlenin li jaffettwaw l-evoluzzjoni futura tal-Computing ta’ Prestazzjoni Għolja u l-infrastrutturi tad-data, it-teknoloġiji u l-applikazzjonijiet fl-Unjoni u madwar id-dinja, u t-tagħlimiet miksuba mill-attivitajiet attwali tal-Impriża Konġunta EuroHPC. Ir-reviżjoni tippermetti wkoll l-allinjament tar-regoli tal-Impriża Konġunta EuroHPC mal-qafas ġuridiku l-ġdid, b’mod partikolari r-Regolament (UE) 2021/695, kif ukoll ir-Regolamenti (UE) 2021/694 u (UE) 2021/1153..

(14)

Biex l-Unjoni tkun mgħammra bil-prestazzjoni tal-computing meħtieġa biex tibqa’ fuq quddiem nett fil-kapaċitajiet tar-riċerka u industrijali tagħha, jenħtieġ jiġi kkoordinat l-investiment tal-Istati Membri fil-Computing ta’ Prestazzjoni Għolja u fil-computing kwantistiku u tissaħħaħ l-adozzjoni mill-industrija u mis-suq ta’ teknoloġiji tal-Computing ta’ Prestazzjoni Għolja u tal-computing kwantistiku kemm fis-settur pubbliku kif ukoll fis-settur privat. Jenħtieġ li l-Unjoni ssir aktar effettiva fit-tisrif tal-iżviluppi tat-teknoloġija f’sistemi tal-Computing ta’ Prestazzjoni Għolja Ewropew u tal-computing kwantistiku orjentati lejn id-domanda u xprunati mill-applikazzjoni u li jkunu tal-aqwa kwalità, fl-istabbiliment ta’ rabta effettiva bejn il-provvista tat-teknoloġija, il-kodisinn mal-utenti, u akkwist konġunt ta’ sistemi tal-ogħla klassi, u fil-ħolqien ta’ ekosistema tal-ogħla klassi fit-teknoloġiji u fl-applikazzjonijiet tal-Computing ta’ Prestazzjoni Għolja u tal-computing kwantistiku madwar l-Ewropa. Fl-istess ħin, jenħtieġ li l-Unjoni tiftaħ opportunità għall-industrija tal-provvista tagħha biex tingrana investimenti bħal dawn, li twassal għall-adozzjoni tagħhom fuq skala kbira u f’oqsma ta’ applikazzjonijiet emerġenti bħall-mediċina personalizzata, it-tibdil fil-klima, is-sewqan konness u awtomatizzat jew swieq ewlenin oħra li huma bbażati fuq l-intelliġenza artifiċjali, fuq it-teknoloġiji tal-blockchain, fuq l-edge computing jew b’mod aktar wiesa’ fuq id-diġitalizzazzjoni tal-industrija tal-Unjoni.

(15)

Biex l-Unjoni u l-Istati Membri tagħha jiksbu rwol ta’ tmexxija f’teknoloġiji diġitali ewlenin bħall-Computing ta’ Prestazzjoni Għolja u l-computing kwantistiku, jenħtieġ jinvestu f’teknoloġiji tas-supercomputing tal-ġenerazzjoni li jmiss b’konsum baxx tal-enerġija u effiċjenti fl-użu tal-enerġija, f’software innovattiv u f’sistemi avvanzati tas-supercomputing għal computing fuq skala ‘eksa’ u fuq skala posteksa u għal computing kwantistiku, u għal applikazzjonijiet innovattivi tas-supercomputing u tad-data. Dan għandu jippermetti lill-industrija tal-provvista Ewropea tiffjorixxi f’firxa wiesgħa ta’ oqsma ewlenin tat-teknoloġija u l-applikazzjonijiet li jilħqu lil hinn mill-Computing ta’ Prestazzjoni Għolja u mill-computing kwantistiku u, fuq medda twila taż-żmien, jikkontribwixxi għal swieq usa’ tal-ICT b’teknoloġiji bħal dawn. Dan ikun jappoġġa wkoll l-industrija tax-xjenza u tal-utenti tal-Computing ta’ Prestazzjoni Għolja u tal-computing kwantistiku biex tgħaddi minn trasformazzjoni diġitali u jissaħħaħ il-potenzjal tal-innovazzjoni tagħha.

(16)

Huwa essenzjali li jkun hemm viżjoni strateġika komuni tal-Unjoni fil-Computing ta’ Prestazzjoni Għolja u fil-computing kwantistiku biex tinkiseb l-ambizzjoni tal-Unjoni u tal-Istati Membri tagħha li jiżguraw rwol ewlieni fl-ekonomija diġitali. L-objettiv ikun li fl-Ewropa tiġi stabbilita ekosistema tal-infrastruttura fost l-aqwa fid-dinja, iperkonnessa, federata u sigura tas-servizzi tal-Computing ta’ Prestazzjoni Għolja u tal-computing kwantistiku u tad-data, u li l-Ewropa tkun f’pożizzjoni li tipproduċi sistemi innovattivi u kompetittivi tal-Computing ta’ Prestazzjoni Għolja u tal-computing kwantistiku bbażati fuq katina tal-provvista aktar reżiljenti u tiżgura d-disponibbiltà ta’ komponenti, teknoloġiji u għarfien li jillimitaw ir-riskju ta’ tfixkil.

(17)

Impriża Konġunta tirrappreżenta l-aqwa strument li kapaċi jimplimenta l-viżjoni strateġika tal-UE fil-Computing ta’ Prestazzjoni Għolja u fil-computing kwantistiku, u dan jiżgura li l-Unjoni tgawdi minn kapaċitajiet tal-ogħla klassi fis-supercomputing, fil-computing kwantistiku u fid-data skont il-potenzjal ekonomiku tagħha u li jaqbel mal-ħtiġijiet tal-utenti Ewropej. L-Impriża Konġunta hi l-aqwa strument biex jingħelbu l-limitazzjonijiet attwali, filwaqt li toffri l-akbar impatt ekonomiku, soċjetali u ambjentali u l-aħjar salvagwardja tal-interessi tal-Unjoni fil-Computing ta’ Prestazzjoni Għolja u fil-computing kwantistiku. Tista’ tiġbor flimkien riżorsi mill-Unjoni, mill-Istati Membri u minn pajjiżi terzi assoċjati mal-Orizzont Ewropa, mal-Programm Ewropa Diġitali jew mal-Faċilità Nikkollegaw l-Ewropa u mis-settur privat. Tista’ timplimenta qafas ta’ akkwist u topera sistemi tal-Computing ta’ Prestazzjoni Għolja u tal-computing kwantistiku tal-ogħla klassi. Tista’ tniedi programmi tar-riċerka u l-innovazzjoni għall-iżvilupp ta’ teknoloġiji Ewropej u għall-integrazzjoni sussegwenti tagħhom f’sistemi tas-supercomputing tal-ogħla klassi.

(18)

L-Impriża Konġunta ser tkun parti mill-portafoll ta’ Sħubijiet Istituzzjonalizzati taħt l-Orizzont Ewropa li jenħtieġ tirsisti biex issaħħaħ il-kapaċitajiet xjentifiċi tal-Unjoni biex tindirizza t-theddidiet emerġenti u tal-isfidi futuri f’Żona Ewropea tar-Riċerka msaħħa, tiżgura ktajjen tal-valur tal-Unjoni mmexxija mis-sostenibbiltà u l-awtonomija strateġika tal-Unjoni, u ttejjeb l-adozzjoni ta’ soluzzjonijiet innovattivi li jindirizzaw l-isfidi klimatiċi, ambjentali, tas-saħħa u sfidi soċjetali globali oħrajn bi qbil mal-prijoritajiet strateġiċi tal-Unjoni, inkluż il-kisba tan-newtralità klimatika fl-Unjoni sal-2050.

(19)

L-Impriża Konġunta jenħtieġ li tiġi ffinanzjata mill-programmi tal-Unjoni taħt il-qafas finanzjarju pluriennali għas-snin 2021-2027 (il-“QFP 2021-2027”). Jenħtieġ li titwaqqaf fl-2021 u topera sal-31 ta’ Diċembru 2033 biex tforni lill-Unjoni b’infrastruttura tas-supercomputing tal-ogħla klassi, federata, sigura u iperkonnessa, u biex tiżviluppa t-teknoloġiji, l-applikazzjonijiet u l-ħiliet meħtieġa biex jinkisbu l-kapaċitajiet fuq skala ‘eksa’ bejn l-2022 u l-2024, u fuq skala posteksa bejn l-2025 u l-2027, filwaqt li tippromwovi ekosistema ta’ innovazzjoni fil-Computing ta’ Prestazzjoni Għolja Ewropew u fil-computing kwantistiku tal-ogħla klassi. F’konformità mal-Artikolu 10(2)(c) tar-Regolament (UE) 2021/695, l-Impriżi Konġunti jrid ikollhom approċċ ċar taċ-ċiklu tal-ħajja. Sabiex jiġu protetti b’mod adegwat l-interessi finanzjarji tal-Unjoni, l-Impriża Konġunta jenħtieġ li tiġi stabbilita għal perijodu li jintemm fil-31 ta’ Diċembru 2033 biex tkun tista’ teżerċita r-responsabbiltajiet tagħha fir-rigward tal-implimentazzjoni tal-għotjiet sakemm jitlestew l-aħħar azzjonijiet indiretti mnedija u fir-rigward tal-finalizzazzjoni tal-attivitajiet relatati mat-tħaddim tas-supercomputers tal-EuroHPC.

(20)

Is-sħubija pubblika privata fil-forma ta’ Impriża Konġunta jenħtieġ tgħaqqad il-mezzi tekniċi u finanzjarji li huma essenzjali biex tingħaraf il-kumplessità tar-ritmu dejjem aktar mgħaġġel tal-innovazzjoni f’dan il-qasam. Għalhekk, jenħtieġ li l-membri tal-Impriża Konġunta jkunu l-Unjoni, l-Istati Membri u l-pajjiżi terzi assoċjati mal-Orizzont Ewropa, mal-Programm Ewropa Diġitali jew mal-Faċilità Nikkollegaw l-Ewropa li jaqblu fuq inizjattiva Ewropea konġunta fil-Computing ta’ Prestazzjoni Għolja u fil-computing kwantistiku, u l-assoċjazzjonijiet li jirrappreżentaw lill-entitajiet kostitwenti tagħhom u lil organizzazzjonijiet oħra b’impenn espliċitu u attiv biex jipproduċu riżultati tar-riċerka u l-innovazzjoni, jiżviluppaw u jimplimentaw kapaċitajiet tal-computing ta’ prestazzjoni għolja jew tal-computing kwantistiku, jew jikkontribwixxu għall-indirizzar tad-diskrepanza fil-ħiliet u għaż-żamma tal-għarfien espert fil-qasam tal-Computing ta’ Prestazzjoni Għolja u tal-computing kwantistiku fl-Ewropa. Jenħtieġ li l-Impriża Konġunta tkun miftuħa għal membri ġodda.

(21)

Skont l-Anness III tar-Regolament (UE) 2021/695, il-kontribuzzjonijiet finanzjarji minn membri għajr l-Unjoni huma mistennija li jkunu mill-inqas ugwali għal 50 % u mistennija li jistgħu jilħqu sa 75 % tal-impenji baġitarji aggregati tal-Impriża Konġunta. Min-naħa l-oħra, il-kontribuzzjoni tal-Unjoni, inkluż kwalunkwe fond addizzjonali minn pajjiżi terzi assoċjati mal-Orizzont Ewropa, mal-Programm Ewropa Diġitali jew mal-Faċilità Nikkollegaw l-Ewropa, ma għandhiex taqbeż il-50 % tal-impenji baġitarji aggregati tal-Impriża Konġunta.

(22)

Jenħtieġ li l-kontribuzzjoni tal-Unjoni tkopri l-ispejjeż amministrattivi tal-Impriża Konġunta.

(23)

F’konformità mal-punt (c) tal-Artikolu 10(1) tar-Regolament (UE) 2021/695, l-Impriża Konġunta trid timplimenta ġestjoni ċentrali tal-kontribuzzjonijiet finanzjarji kollha permezz ta’ approċċ koordinad. Għaldaqstant, kull Stat Parteċipanti għandu jikkonkludi ftehim amministrattiv wieħed jew aktar mal-Impriża Konġunta li jistabbilixxi l-mekkaniżmu ta’ koordinazzjoni għall-pagament ta’ kontribuzzjonijiet, u r-rappurtar dwarhom, lill-applikanti stabbiliti f’dak l-Istat Parteċipanti. Sabiex tiġi żgurata l-koerenza mal-prijoritajiet strateġiċi nazzjonali tagħhom, jenħtieġ li l-Istati Parteċipanti jingħataw id-dritt ta’ veto fuq l-użu tal-kontribuzzjonijiet finanzjarji nazzjonali tagħhom għall-applikanti stabbiliti f’dawk l-Istati Parteċipanti. Sabiex jiġi minimizzat il-piż amministrattiv għall-benefiċjarji, tinkiseb simplifikazzjoni u tiġi żgurata implimentazzjoni aktar effiċjenti, kull Stat Parteċipanti jenħtieġ li jistinka biex jissinkronizza l-iskeda tal-pagamenti tiegħu, ir-rappurtar u l-awditi ma’ dawk tal-Impriża Konġunta u biex jikkonverġi l-eliġibbiltà tiegħu tal-kostijiet mar-regoli tal-Orizzont Ewropa. Il-benefiċjarji stabbiliti fl-Istati Parteċipanti li fdaw l-attivitajiet ta’ pagament lill-Impriża Konġunta jenħtieġ li jiffirmaw ftehim ta’ għotja uniku mal-Impriża Konġunta skont ir-regoli tal-Orizzont Ewropa.

(24)

Bil-ħsieb li terġa’ tinkiseb pożizzjoni fuq quddiem nett fit-teknoloġiji tal-Computing ta’ Prestazzjoni Għolja, u li tiġi żviluppata ekosistema sħiħa tal-Computing ta’ Prestazzjoni Għolja u tal-computing kwantistiku għall-Unjoni, fl-2014 il-partijiet ikkonċernati industrijali u tar-riċerka fl-Assoċjazzjoni tal-Pjattaforma Ewropea tat-Teknoloġija għall-Computing ta’ Prestazzjoni Għolja (ETP4HPC) stabbilixxew sħubija pubblika privata kuntrattwali mal-Unjoni. Il-missjoni tagħha hi li tibni katina tal-valur tat-teknoloġija Ewropea tal-ogħla klassi tal-Computing ta’ Prestazzjoni Għolja, li tkun kompetittiva globalment, filwaqt li trawwem sinerġiji bejn it-tliet komponenti ewlenin tal-ekosistema tal-Computing ta’ Prestazzjoni Għolja, jiġifieri l-iżvilupp tat-teknoloġija, l-applikazzjonijiet u l-infrastruttura tas-supercomputing. Meta jitqies l-għarfien espert tagħha u r-rwol tagħha fil-ġbir flimkien tal-partijiet ikkonċernati privati rilevanti tal-Computing ta’ Prestazzjoni Għolja, jenħtieġ li l-ETP4HPC tkun eliġibbli għal sħubija fl-Impriża Konġunta.

(25)

Bil-ħsieb li jsaħħu l-katina tal-valur tad-data, isaħħu l-bini tal-komunitajiet madwar id-data u jqiegħdu l-pedamenti għal ekonomija b’saħħitha mmexxija mid-data fl-Unjoni, fl-2014 il-partijiet ikkonċernati industrijali u tar-riċerka fil-Big Data Value Association (BDVA) stabbilixxew sħubija pubblika privata kuntrattwali mal-Unjoni. Fl-2020, il-BDVA biddlet isimha għal ‘Data, AI and Robotics’ (DAIRO). Meta jitqiesu l-għarfien espert tagħha u r-rwol tagħha li tiġbor flimkien lill-partijiet ikkonċernati privati rilevanti tal-big data, huwa mistenni li d-DAIRO tkun eliġibbli li ssir membru tal-Impriża Konġunta.

(26)

L-assoċjazzjonijiet privati ETP4HPC u DAIRO esprimew bil-miktub ir-rieda tagħhom li jikkontribwixxu għall-programm strateġiku pluriennali tal-Impriża Konġunta u li jipprovdu l-għarfien espert tagħhom biex jintlaħqu l-objettivi tal-Impriża Konġunta. Jixraq li dawk l-assoċjazzjonijiet privati jaċċettaw l-Istatuti stipulati fl-Anness ta’ dan ir-Regolament b’ittra ta’ approvazzjoni.

(27)

Jenħtieġ li l-Impriża Konġunta tindirizza suġġetti ddefiniti b’mod ċar li jippermettu lill-industriji Ewropej u lill-akkademiċi inġenerali jfasslu, jiżviluppaw u jużaw l-aktar teknoloġiji innovattivi fil-Computing ta’ Prestazzjoni Għolja u fil-computing kwantistiku, u jistabbilixxu infrastruttura integrata u federata, sigura u msawra f’network mal-Unjoni kollha b’kapaċità tal-Computing ta’ Prestazzjoni Għolja u tal-computing kwantistiku tal-ogħla klassi, konnettività b’veloċità għolja, applikazzjonijiet mill-aktar avvanzati u servizzi tad-data u tas-software għax-xjenzati tagħha u għal utenti ewlenin oħra mill-industrija, inkluż l-impriżi żgħar u ta’ daqs medju (SMEs) u s-settur pubbliku. Jenħtieġ li l-Impriża Konġunta timmira lejn l-iżvilupp u l-użu ta’ teknoloġiji u ta’ infrastrutturi tal-ogħla klassi, li jindirizzaw ir-rekwiżiti eżiġenti tal-utenti tas-setturi xjentifiċi, industrijali u pubbliċi Ewropej.

(28)

Jenħtieġ li l-missjoni tal-Impriża Konġunta tkun strutturata f’pilastru amministrattiv wieħed u f’sitt pilastri tekniċi li jindirizzaw rispettivament l-attivitajiet tal-infrastruttura, l-attivitajiet ta’ federazzjoni tas-servizzi tas-supercomputing, l-attivitajiet relatati mat-teknoloġija, l-attivitajiet relatati mal-applikazzjonijiet tas-supercomputing, l-attivitajiet biex jitwessgħu l-użu u l-ħiliet, u l-attivitajiet ta’ kooperazzjoni internazzjonali. Il-Programm Ewropa Diġitali jenħtieġ li jintuża biex jiffinanzja l-pilastru tal-infrastruttura, parti mill-pilastru tal-federazzjoni tas-servizzi tas-supercomputing u l-pilastru tal-użu u l-ħiliet li qed jitwessa’. Jenħtieġ li l-Faċilità Nikkollegaw l-Ewropa tintuża biex tiffinanzja l-bqija tal-attivitajiet tal-federazzjoni tal-pilastru tas-servizzi tas-supercomputing, jiġifieri l-interkonnessjoni tal-Computing ta’ Prestazzjoni Għolja, il-computing kwantistiku u r-riżorsi tad-data, kif ukoll l-interkonnessjoni mal-spazji pubbliċi komuni tad-data tal-Unjoni u l-infrastrutturi siguri tal-cloud. L-Orizzont Ewropa jenħtieġ li jintuża biex jiffinanzja l-pilastru tat-teknoloġija, il-pilastru tal-applikazzjoni u l-pilastru tal-kooperazzjoni internazzjonali.

(29)

Jenħtieġ li l-Impriża Konġunta tkun tista’ tikkoopera mas-“Sħubija għall-Computing Avvanzat fl-Ewropa” (PRACE) għall-għoti u l-ġestjoni tal-aċċess għal supercomputing federat u interkonness u l-infrastruttura tad-data u s-servizzi tagħha, kif ukoll għal faċilitajiet ta’ taħriġ u opportunitajiet għall-iżvilupp tal-ħiliet. Jenħtieġ li hi tkun tista’ tikkoopera man-netwerk GÉANT għall-konnettività bejn is-supercomputers tal-Impriża Konġunta, kif ukoll ma’ infrastrutturi tad-data u s-supercomputing Ewropej oħra.

(30)

Jenħtieġ li l-Impriża Konġunta tikkontribwixxi biex tnaqqas id-diskrepanza fil-ħiliet speċifika madwar l-Unjoni billi tieħu miżuri ta’ sensibilizzazzjoni u tassisti fil-bini ta’ għarfien ġdid u tal-kapital uman. Dan jinkludi t-tfassil u l-appoġġ ta’ attivitajiet edukattivi u ta’ taħriġ speċifiċi f’kooperazzjoni mill-qrib mal-atturi pubbliċi u privati rilevanti.

(31)

F’konformità mal-objettivi tal-politika esterna u tal-impenji internazzjonali tal-Unjoni, jenħtieġ li l-Impriża Konġunta tiffaċilita l-kooperazzjoni bejn l-Unjoni u l-atturi internazzjonali billi tiddefinixxi strateġija ta’ kooperazzjoni, li tinkludi l-identifikazzjoni u l-promozzjoni ta’ oqsma għall-kooperazzjoni fir-riċerka u l-iżvilupp fl-iżvilupp tal-ħiliet u fl-implimentazzjoni ta’ azzjonijiet meta jkun hemm benefiċċju reċiproku, kif ukoll tiżgura politika ta’ aċċess tal-kapaċitajiet u tal-applikazzjonijiet rispettivi tal-Computing ta’ Prestazzjoni Għolja u tal-computing kwantistiku primarjament ibbażati fuq ir-reċiproċità.

(32)

Jenħtieġ li l-Impriża Konġunta jkollha l-għan li tippromwovi l-isfruttar ta’ kwalunkwe teknoloġija tal-Computing ta’ Prestazzjoni Għolja fl-Unjoni li tirriżulta. Jenħtieġ li timmira wkoll li tissalvagwardja l-investimenti fis-supercomputers li takkwista. B’dan il-mod, jenħtieġ tieħu l-miżuri xierqa biex tiżgura s-sigurtà tal-katina tal-provvista tat-teknoloġiji akkwistati li jenħtieġ ikopru l-ħajja sħiħa ta’ dawn is-supercomputers.

(33)

Jenħtieġ li l-Impriża Konġunta twitti t-triq għal viżjoni aktar fit-tul u tibni l-ewwel infrastruttura ibrida tal-Computing ta’ Prestazzjoni Għolja fl-Ewropa, filwaqt li tintegra arkitetturi klassiċi tal-computing ma’ tagħmir tal-computing kwantistiku. Hemm bżonn appoġġ finanzjarju strutturat u kkoordinat fil-livell Ewropew biex jgħin lit-timijiet tar-riċerka u lill-industriji Ewropej jipproduċu riżultati tal-ogħla klassi biex jiżguraw l-isfruttar industrijali veloċi u mifrux tar-riċerka u t-teknoloġija Ewropej madwar l-Unjoni, filwaqt li jiġu ġġenerati effetti kollaterali importanti għas-soċjetà, fil-kondiviżjoni tar-riskji meħuda u fit-tgħaqqid tar-riżorsi billi jiġu allinjati l-istrateġiji u l-investimenti favur interess Ewropew komuni.

(34)

Biex tilħaq l-objettivi tagħha li jitfasslu, jiġu żviluppati u jintużaw l-aktar teknoloġiji innovattivi fil-Computing ta’ Prestazzjoni Għolja u fil-computing kwantistiku, jenħtieġ li l-Impriża Konġunta tipprovdi appoġġ finanzjarju, b’mod partikolari fl-għamla ta’ għotjiet u ta’ akkwist, wara sejħiet miftuħa u kompetittivi għal proposti u sejħiet għal offerti bbażati fuq programmi ta’ ħidma annwali. Jenħtieġ li dan l-appoġġ finanzjarju jkun mmirat b’mod partikolari lejn fallimenti pprovati tas-suq li jipprevjenu l-iżvilupp tal-programm ikkonċernat, jenħtieġ li ma jkunx jeskludi investimenti privati, u jenħtieġ li ma jkollux effett ta’ inċentiv b’mod li jbiddel l-imġiba tal-benefiċjarju.

(35)

Biex tilħaq l-objettivi tagħha li żżid il-potenzjal ta’ innovazzjoni tal-industrija, u b’mod partikolari tal-SMEs, li tikkontribwixxi għat-tnaqqis tad-diskrepanza fil-ħiliet speċifika, tappoġġa ż-żieda tal-għarfien u tal-kapital uman u li ttejjeb il-kapaċitajiet tal-Computing ta’ Prestazzjoni Għolja u tal-computing kwantistiku, jenħtieġ li l-Impriża Konġunta tappoġġa l-ħolqien, u b’mod partikolari n-networking u l-koordinazzjoni, ta’ Ċentri nazzjonali ta’ Kompetenza fil-Computing ta’ Prestazzjoni Għolja fl-Istati Parteċipanti kollha. Jenħtieġ li dawk iċ-ċentri ta’ kompetenza jipprovdu servizzi tal-Computing ta’ Prestazzjoni Għolja u tal-computing kwantistiku lill-industrija, lill-akkademiċi u lill-amministrazzjonijiet pubbliċi, meta jintalbu. Jenħtieġ li primarjament jippromwovu u jippermettu aċċess għall-ekosistema tal-innovazzjoni tal-Computing ta’ Prestazzjoni Għolja, jiffaċilitaw l-aċċess għas-supercomputers u għall-kompjuters kwantistiċi, jindirizzaw l-iskarsezza sinifikanti ta’ esperti tekniċi ta’ ħiliet permezz ta’ attivitajiet ta’ sensibilizzazzjoni, taħriġ u komunikazzjoni, u jibdew attivitajiet ta’ networking mal-partijiet ikkonċernati u ma’ Ċentri nazzjonali ta’ Kompetenza oħrajn fil-Computing ta’ Prestazzjoni Għolja biex jitrawmu innovazzjonijiet usa’, pereżempju bl-iskambju u l-promozzjoni tal-aqwa prattika ta’ każijiet ta’ użu jew ta’ esperjenzi ta’ applikazzjonijiet, billi jaqsmu l-faċilitajiet tat-taħriġ u l-esperjenzi tagħhom, billi jiffaċilitaw l-iżvilupp konġunt u l-iskambju ta’ kodiċijiet paralleli, jew billi jappoġġaw il-qsim ta’ applikazzjonijiet u ta’ għodod innovattivi għall-utenti pubbliċi u privati, b’mod partikolari għall-SMEs.

(36)

Jenħtieġ li l-Impriża Konġunta tipprovdi qafas orjentat lejn id-domanda u xprunat mill-utent u tippermetti approċċ ta’ kodisinn għall-akkwist ta’ infrastruttura integrata, tal-ogħla klassi, federata, sigura u iperkonnessa tas-servizzi ta’ supercomputing u tal-computing kwantistiku u tad-data fl-Unjoni, biex l-utenti jingħatawlhom ir-riżorsi strateġiċi tal-komputazzjoni li jeħtieġu ħalli jiżviluppaw soluzzjonijiet ġodda u innovattivi u jegħlbu l-isfidi soċjetali, ambjentali, ekonomiċi u tas-sigurtà. Għal dak il-għan, l-Impriża Konġunta jenħtieġ tikkontribwixxi għall-akkwist ta’ supercomputers tal-ogħla klassi. Jenħtieġ li s-supercomputers tal-Impriża Konġunta, inkluż il-kompjuters kwantistiċi, ikunu installati fi Stat Parteċipanti li jkun Stat Membru.

(37)

Għal implimentazzjoni kosteffettiva tal-missjoni tal-Impriża Konġunta li tiżviluppa, timplimenta, testendi u żżomm fl-Unjoni ekosistema tas-supercomputing fost l-aqwa fid-dinja, jenħtieġ li l-Impriża Konġunta taħtaf l-opportunità li, fejn xieraq, tagħmel upgrade tas-supercomputers proprjetà tagħha. Għalhekk, l-upgrades jenħtieġ li jwasslu għal estensjoni tal-ħajja tas-supercomputers, iżidu l-prestazzjoni operazzjonali, u jipprovdu funzjonalitajiet ġodda biex jindirizzaw l-evoluzzjoni tal-ħtiġijiet tal-utenti. Għall-għan ta’ upgrade tas-supercomputers tagħha, jenħtieġ li l-Impriża Konġunta tkun tista’ tniedi sejħa għal espressjonijiet ta’ interess bħala parti mill-pilastru tal-infrastruttura. Is-sejħiet għal espressjoni ta’ interess jenħtieġ li jiddefinixxu l-kondizzjonijiet speċifiċi ta’ eliġibbiltà li għandhom japplikaw għal entità ospitanti, li diġà qed tospita supercomputer tal-EuroHPC.

(38)

Jenħtieġ li l-Impriża Konġunta toħloq iperkonnessjoni bejn is-supercomputers u l-infrastrutturi tad-data kollha li jkunu proprjetà jew koproprjetà tagħha u teknoloġiji ta’ networking tal-ogħla livell ta’ żvilupp tekniku, b’tali mod li tagħmilhom aċċessibbli b’mod wiesa’ madwar l-Unjoni, u jenħtieġ toħloq interkonnessjoni u federazzjoni bejn l-infrastruttura tad-data tas-supercomputing u tal-computing kwantistiku tagħha, kif ukoll bejn infrastrutturi nazzjonali, reġjonali u oħrajn tal-computing ma’ pjattaforma komuni. Jenħtieġ li l-Impriża Konġunta tiżgura wkoll l-interkonnessjoni tal-infrastrutturi federati u siguri tas-servizzi u tad-data tas-supercomputing u tal-computing kwantistiku ma’ spazji komuni Ewropej tad-data, inkluż il-Cloud Ewropew tax-Xjenza Miftuħa, u mal-infrastrutturi federati u siguri tal-cloud imħabbra fil-Komunikazzjoni tal-Kummissjoni tad-19 ta’ Frar 2020 intitolata “Strateġija Ewropea għad-Data”, għall-provvista bla xkiel tas-servizzi għal firxa wiesgħa ta’ utenti pubbliċi u privati madwar l-Ewropa.

(39)

Jenħtieġ li l-Orizzont Ewropa u l-Programm Ewropa Diġitali jikkontribwixxu rispettivament biex titneħħa l-qasma fir-rigward tar-riċerka u l-innovazzjoni fl-Unjoni u biex jiġu implimentati kapaċitajiet ta’ supercomputing mifruxa ferm billi jippromwovu sinerġiji mal-Fond Ewropew għall-Iżvilupp Reġjonali (FEŻR), il-Fond Soċjali Ewropew+ (FSE+), il-Fond Ewropew għall-Affarijiet Marittimi, is-Sajd u l-Akkwakultura (FEMSA) u l-Fond Agrikolu Ewropew għall-Iżvilupp Rurali (FAEŻR), kif ukoll il-Faċilità għall-Irkupru u r-Reżiljenza (RRF, Recovery and Resilience Facility). Għaldaqstant, jenħtieġ li l-Impriża Konġunta tfittex li tiżviluppa interazzjonijiet mill-qrib ma’ dawk il-fondi, li speċifikament jistgħu jgħinu biex isaħħu l-kapaċitajiet lokali, reġjonali u nazzjonali tar-riċerka u l-innovazzjoni.

(40)

Jenħtieġ li l-Impriża Konġunta tipprovdi qafas favorevoli għall-Istati Parteċipanti li huma Stati Membri biex jużaw il-kontribuzzjonijiet finanzjarji fl-ambitu tal-programmi kofinanzjati permezz tal-FEŻR, il-FSE+, il-FEMS u l-FAEŻR għall-akkwist ta’ infrastrutturi tal-Computing ta’ Prestazzjoni Għolja u tal-computing kwantistiku u tad-data u għall-interkonnessjoni tagħhom. L-użu ta’ dawk il-kontribuzzjonijiet finanzjarji fl-attivitajiet tal-Impriża Konġunta hu essenzjali għall-iżvilupp fl-Unjoni ta’ infrastruttura integrata, federata, sigura u iperkonnessa tas-servizzi u tad-data tal-Computing ta’ Prestazzjoni Għolja u tal-computing kwantistiku ta’ klassi dinjija, għax il-benefiċċji għal din l-infrastruttura jmorru ferm lil hinn mill-utenti tal-Istati Membri. Jekk l-Istati Membri jiddeċiedu li jużaw dawk il-kontribuzzjonijiet finanzjarji għall-attivitajiet tal-Impriża Konġunta, dawk il-kontribuzzjonijiet jenħtieġ li jitqiesu bħala kontribuzzjonijiet nazzjonali tal-Istati Parteċipanti li huma Stati Membri għall-baġit tal-Impriża Konġunta, dment li jkun hemm konformità mal-Artikolu 106 u ma’ dispożizzjonijiet applikabbli oħra tar-Regolament (UE) 2021/1060 tal-Parlament Ewropew u tal-Kunsill (7) u r-regolamenti speċifiċi għall-fond.

(41)

L-Impriża Konġunta tista’ tiffaċilita l-użu tal-fondi RRF mill-Istati Parteċipanti li huma Stati Membri. Il-fondi RRF jistgħu jikkomplementaw l-azzjonijiet iffinanzjati mill-Impriża Konġunta, dment li l-appoġġ taħt l-RRF ikun addizzjonali għall-appoġġ ipprovdut mill-fondi tal-Unjoni tal-Impriża Konġunta u li ma jkoprix l-istess kost. L-użu tal-RRF jenħtieġ li ma jitqiesx bħala kontribuzzjoni nazzjonali għall-baġit tal-Impriża Konġunta, b’mod partikolari fir-rigward tal-Computing ta’ Prestazzjoni Għolja u tas-servizzi tal-computing kwantistiku u tal-infrastrutturi tad-data, kif ukoll tal-proġetti tal-iżvilupp tat-teknoloġija, tal-applikazzjonijiet u tal-ħiliet.

(42)

Jenħtieġ li l-kontribuzzjoni tal-Unjoni mill-fondi tal-Programm Ewropa Diġitali tkopri parzjalment il-kostijiet tal-akkwist ta’ supercomputers ta’ livell għoli, ta’ kompjuters kwantistiċi, ta’ supercomputers ta’ grad industrijali u ta’ supercomputers ta’ livell medju għal allinjament mal-objettiv tal-Impriża Konġunta li tikkontribwixxi għall-ġbir flimkien tar-riżorsi biex l-Unjoni tiġi mgħammra b’supercomputers u kompjuters kwantistiċi tal-ogħla klassi. Il-kostijiet kumplimentari ta’ dawn is-supercomputers u l-kompjuters kwantistiċi jenħtieġ ikunu koperti mill-Istati Parteċipanti, jew mill-Membri Privati jew mill-konsorzji ta’ sħab privati. Is-sehem mill-ħin tal-aċċess tal-Unjoni għal dawn is-supercomputers jew il-kompjuters kwantistiċi jenħtieġ ikun proporzjonat direttament għall-kontribuzzjoni finanzjarja tal-Unjoni għall-akkwist ta’ dawn is-supercomputers u l-kompjuters kwantistiċi u jenħtieġ li ma jkunx jaqbeż il-50 % tal-ħin totali tal-aċċess ta’ dawn is-supercomputers jew il-kompjuters kwantistiċi.

(43)

Jenħtieġ li l-Impriża Konġunta tkun il-proprjetarju tas-supercomputers u tal-kompjuters kwantistiċi ta’ livell għoli li tkun akkwistat. Jenħtieġ li t-tħaddim ta’ kull supercomputer jew kompjuter kwantistiku jiġi fdat f’idejn entità tal-hosting. Jenħtieġ li l-entità tal-hosting tkun tista’ tirrappreżenta lil Stat Parteċipanti wieħed li jkun Stat Membru jew konsorzju ta’ Stati Parteċipanti tal-hosting. L-entità tal-hosting jenħtieġ tkun tista’ tipprovdi stima preċiża u li tivverifika l-kostijiet tal-operazzjoni tas-supercomputer, billi tiżgura, pereżempju, is-separazzjoni funzjonali u, sa fejn tkun possibbli, is-separazzjoni fiżika tas-supercomputers jew tal-kompjuters kwantistiċi ta’ livell għoli tal-Impriża Konġunta u ta’ kull sistema tal-computing nazzjonali jew reġjonali li tħaddem. Jenħtieġ li l-entità tal-hosting tintgħażel mill-Bord tat-Tmexxija tal-Impriża Konġunta (il-“Bord tat-Tmexxija”) wara sejħa għal espressjoni ta’ interess evalwata minn esperti indipendenti. Ladarba tintgħażel entità tal-hosting, jenħtieġ li l-Istat Parteċipanti fejn tkun stabbilita l-entità tal-hosting jew il-konsorzju tal-hosting, ikunu jistgħu jiddeċiedu li jistiednu lil Stati Parteċipanti oħra biex jissieħbu u jikkontribwixxu għall-finanzjament tas-supercomputer jew tal-kompjuter kwantistiku ta’ livell għoli li jkun ser jiġi installat fl-entità tal-hosting magħżula. Jekk mal-konsorzju tal-hosting magħżul jissieħbu Stati Parteċipanti addizzjonali, jenħtieġ li dan isir mingħajr preġudizzju għall-ħin tal-aċċess tal-Unjoni għas-supercomputers. Il-kontribuzzjonijiet tal-Istati Parteċipanti f’konsorzju tal-hosting għas-supercomputer jew għall-kompjuter kwantistiku jenħtieġ jissarrfu f’ishma tal-ħin tal-aċċess għal dak is-supercomputer jew il-kompjuter kwantistiku. Jenħtieġ li l-Istati Parteċipanti jaqblu bejniethom dwar it-tqassim tas-sehem tagħhom tal-ħin tal-aċċess għas-supercomputer jew għall-kompjuter kwantistiku.

(44)

L-Impriża Konġunta jenħtieġ li tibqa’ l-proprjetarju tas-supercomputers jew tal-kompjuters kwantistiċi li takkwista sakemm jiġu deprezzati. Jenħtieġ li l-Impriża Konġunta tkun tista’ tittrasferixxi din is-sjieda lill-entità tal-hosting għad-dekummissjonar, għar-rimi jew għal xi użu ieħor. Meta s-sjieda tiġi trasferita lill-entità tal-hosting jew meta l-Impriża Konġunta tkun qed tiġi stralċjata, jenħtieġ li l-entità tal-hosting tirrimborża lill-Impriża Konġunta l-valur residwu tas-supercomputer jew tal-kompjuter kwantistiku.

(45)

Jenħtieġ li l-Impriża Konġunta takkwista b’mod konġunt mal-Istati Parteċipanti s-supercomputers ta’ livell medju. Jenħtieġ li t-tħaddim ta’ kull supercomputer ta’ livell medju jiġi fdat f’idejn entità tal-hosting. Jenħtieġ li l-entità tal-hosting tkun tista’ tirrappreżenta lil Stat Parteċipanti wieħed li jkun Stat Membru jew konsorzju ta’ Stati Parteċipanti tal-hosting. Jenħtieġ li l-Impriża Konġunta tkun proprjetarju tal-parti li tikkorrispondi għas-sehem tal-kontribuzzjoni finanzjarja tal-Unjoni mill-kostijiet tal-akkwist mill-fondi tal-Programm Ewropa Diġitali. Jenħtieġ li l-entità tal-hosting tintgħażel mill-Bord ta’ Tmexxija wara sejħa għal espressjoni ta’ interess evalwata minn esperti indipendenti. Jenħtieġ li s-sehem tal-ħin ta’ aċċess tal-Unjoni għal kull supercomputer ta’ livell medju jkun proporzjonat direttament għall-kontribuzzjoni finanzjarja tal-Unjoni mill-fondi tal-Programm Ewropa Diġitali għall-kostijiet tal-akkwist ta’ dak is-supercomputer ta’ livell medju. Jenħtieġ li l-Impriża Konġunta tkun tista’ tittrasferixxi s-sjieda tagħha lill-entità tal-hosting mhux qabel ħames snin wara t-twettiq b’suċċess tat-test ta’ aċċettazzjoni mill-Impriża Konġunta jew meta din tkun qed tiġi stralċjata. Jenħtieġ li l-entità tal-hosting tirrimborża lill-Impriża Konġunta l-valur residwu tas-supercomputer.

(46)

Biex tiġi promossa distribuzzjoni ekwitabbli u bbilanċjata madwar l-Unjoni ta’ supercomputers tal-EuroHPC u l-emerġenza ta’ approċċ ta’ ekosistema infrastrutturali federata, is-sejħiet għal espressjoni ta’ interess ta’ supercomputer tal-EuroHPC jenħtieġ li jiddefinixxu l-kondizzjonijiet ta’ eliġibbiltà li għandhom japplikaw għal Stat Parteċipanti li diġà qed jospita supercomputer tal-EuroHPC.

(47)

Jenħtieġ li l-Impriża Konġunta tkun tista’ takkwista supercomputers ta’ grad industrijali, flimkien ma’ konsorzju ta’ sħab privati. Jenħtieġ li t-tħaddim ta’ kull supercomputer bħal dan jiġi fdat f’idejn entità tal-hosting eżistenti. Jenħtieġ li l-entità tal-hosting tkun tista’ tassoċja ruħha mal-konsorzju ta’ sħab privati għall-akkwist u għat-tħaddim ta’ tali supercomputer. Jenħtieġ li l-Impriża Konġunta tkun proprjetarju tal-parti li tikkorrispondi għas-sehem tal-kontribuzzjoni finanzjarja tal-Unjoni mill-kostijiet tal-akkwist mill-fondi tal-Programm Ewropa Diġitali. Jenħtieġ li l-entità tal-hosting u l-konsorzju ta’ sħab privati jintgħażlu mill-Bord tat-Tmexxija wara sejħa għal espressjoni ta’ interess evalwata minn esperti indipendenti. Jenħtieġ li s-sehem tal-ħin tal-aċċess tal-Unjoni għal kull supercomputer bħal dan ikun proporzjonat direttament għall-kontribuzzjoni finanzjarja tal-Unjoni mill-fondi tal-Programm Ewropa Diġitali għall-kostijiet tal-akkwist ta’ dak is-supercomputer ta’ grad industrijali. Jenħtieġ li l-Impriża Konġunta tkun tista’ tilħaq ftehim mal-konsorzju ta’ sħab privati biex tbigħ dan is-supercomputer lil entità oħra jew tiddekummissjonah. Inkella, jenħtieġ li l-Impriża Konġunta tkun tista’ tittrasferixxi s-sjieda ta’ dan is-supercomputer lill-konsorzju ta’ sħab privati. F’dak il-każ jew meta l-Impriża Konġunta tkun qed tiġi stralċjata, jenħtieġ li l-konsorzju ta’ sħab privati jirrimborża lill-Impriża Konġunta l-valur residwu tas-sehem tal-Unjoni tas-supercomputer. Fil-każ li l-Impriża Konġunta u l-konsorzju ta’ sħab privati jiddeċiedu li jipproċedu bid-dekummissjonar tas-supercomputer wara d-deprezzament sħiħ tal-operazzjoni tiegħu, jenħtieġ li dawn il-kostijiet ikunu koperti mill-konsorzju ta’ sħab privati.

(48)

Għas-supercomputers ta’ grad industrijali, jenħtieġ li l-Impriża Konġunta tikkunsidra l-ħtiġijiet speċifiċi tal-utenti industrijali, pereżempju l-proċeduri tal-aċċess, il-kwalità u t-tip ta’ servizzi, il-protezzjoni tad-data, il-protezzjoni tal-innovazzjoni industrijali, u l-proprjetà intellettwali, l-utilizzabbiltà, il-fiduċja, u rekwiżiti oħra relatati mal-kunfidenzjalità u mas-sigurtà.

(49)

Jenħtieġ li d-disinn u t-tħaddim tas-supercomputers appoġġati mill-Impriża Konġunta jqisu l-effiċjenza enerġetika u s-sostenibbiltà ambjentali, pereżempju bl-użu ta’ teknoloġija b’konsum baxx tal-enerġija, iffrankar dinamiku tal-enerġija u tekniki ta’ użu mill-ġdid bħal tkessiħ avvanzat u riċiklaġġ tas-sħana.

(50)

Jenħtieġ li l-użu tas-supercomputers tal-Impriża Konġunta jiffoka fuq applikazzjonijiet ċivili għal utenti pubbliċi u privati residenti, stabbiliti jew li jinsabu fi Stat Membru jew f’pajjiż terz assoċjat mal-Programm Ewropa Diġitali jew mal-Orizzont Ewropa, inkluż applikazzjonijiet fiċ-ċibersigurtà li jistgħu jkunu ta’ użu doppju. Jenħtieġ li l-utenti jingħataw sehem tal-Unjoni tal-ħin tal-aċċess skont ir-regoli tal-politika ta’ aċċess definiti mill-Bord tat-Tmexxija. Jenħtieġ li l-użu ta’ dawn is-supercomputers jirrispetta wkoll il-ftehimiet internazzjonali konklużi mill-Unjoni.

(51)

Jenħtieġ li l-allokazzjoni tal-ħin tal-aċċess għas-supercomputers tal-Impriża Konġunta tkun mingħajr ħlas għall-utenti pubbliċi. Jenħtieġ tkun mingħajr ħlas ukoll għall-utenti privati għall-applikazzjonijiet tagħhom relatati mal-attivitajiet tar-riċerka u l-innovazzjoni ffinanzjati mill-Orizzont Ewropa jew mill-Programm Ewropa Diġitali, kif ukoll għall-attivitajiet privati tal-innovazzjoni tal-SMEs, fejn xieraq. Jenħtieġ li din l-allokazzjoni tal-ħin tal-aċċess tkun ibbażata primarjament fuq sejħiet miftuħa għal espressjoni ta’ interess imnedija mill-Impriża Konġunta u evalwati minn esperti indipendenti. Għajr għall-utenti SMEs li jwettqu attivitajiet privati tal-innovazzjoni, jenħtieġ li l-utenti kollha li jibbenefikaw minn ħin tal-aċċess mingħajr ħlas għas-supercomputers tal-Impriża Konġunta jadottaw approċċ tax-xjenza miftuħa u jqassmu l-għarfien miksub minn dak l-aċċess, f’konformità mar-Regolament (UE) 2021/695. L-allokazzjoni tal-ħin tal-aċċess tal-utenti għall-attivitajiet ekonomiċi għajr l-attivitajiet privati tal-innovazzjoni tal-SMEs, li jaffaċċjaw fallimenti partikolari tas-suq, jenħtieġ li tingħata fuq bażi ta’ ħlas skont l-użu, skont il-prezzijiet tas-suq. L-allokazzjoni tal-ħin tal-aċċess għal dawn l-attivitajiet ekonomiċi jenħtieġ tkun permessa iżda limitata u l-livell tat-tariffa li trid titħallas jenħtieġ jiġi stabbilit mill-Bord tat-Tmexxija. Jenħtieġ li d-drittijiet tal-aċċess jiġu allokati b’mod trasparenti. Jenħtieġ li l-Bord tat-Tmexxija jiddefinixxi regoli speċifiċi biex il-ħin tal-aċċess jingħata mingħajr ħlas, fejn xieraq, u mingħajr sejħa għal espressjoni ta’ interess għal inizjattivi li jitqiesu strateġiċi għall-Unjoni. Fost l-eżempji rappreżentattivi tal-inizjattivi strateġiċi tal-Unjoni hemm: Destinazzjoni d-Dinja, il-Proġett Emblematiku Human Brain, l-inizjattiva “1+ Million Genomes”, l-ispazji komuni Ewropej tad-data li joperaw f’dominji ta’ interess pubbliku, u b’mod partikolari l-ispazju tad-data dwar is-saħħa, iċ-Ċentri ta’ Eċċellenza tal-Computing ta’ Prestazzjoni Għolja u ċ-Ċentri nazzjonali ta’ Kompetenza tal-Computing ta’ Prestazzjoni Għolja u ċ-Ċentri ta’ Innovazzjoni Diġitali.

Meta tintalab mill-Unjoni, l-Impriża Konġunta jenħtieġ tagħti ħin tal-aċċess dirett fuq bażi temporanja jew permanenti għal inizjattivi strateġiċi u għal pjattaformi ta’ applikazzjonijiet eżistenti jew futuri li tqis essenzjali għall-provvista ta’ servizzi ta’ appoġġ għal emerġenzi relatati mas-saħħa jew oħrajn kruċjali għall-ġid pubbliku, għal sitwazzjonijiet ta’ emerġenza u ta’ ġestjoni tal-kriżijiet jew għal każijiet li l-Unjoni tqis essenzjali għas-sigurtà u għad-difiża tagħha. L-Impriża Konġunta jenħtieġ titħalla twettaq ftit attivitajiet ekonomiċi limitati għal finijiet kummerċjali. Jenħtieġ jingħata aċċess lill-utenti residenti, stabbiliti jew li jinsabu fi Stat Membru jew f’pajjiż terz assoċjat mal-Programm Ewropa Diġitali jew mal-Orizzont Ewropa. Jenħtieġ li d-drittijiet tal-aċċess ikunu ekwitabbli għal kull utent u jiġu allokati b’mod trasparenti. Jenħtieġ li l-Bord tat-Tmexxija jiddefinixxi u jissorvelja d-drittijiet tal-aċċess għas-sehem tal-ħin tal-aċċess tal-Unjoni għal kull supercomputer.

(52)

Jenħtieġ li l-aċċess għas-sehem tal-Unjoni tal-ħin tal-aċċess tal-prekursuri għas-supercomputers fuq skala ‘eksa’ u fuq skala ‘peta’ akkwistati mill-Impriża Konġunta EuroHPC stabbilita taħt ir-Regolament (UE) 2018/1488 jibqa’ jingħata lill-utenti stabbiliti fl-Unjoni jew f’pajjiż terz assoċjat mal-Orizzont 2020.

(53)

Jenħtieġ li s-supercomputers tal-Impriża Konġunta jitħaddmu u jintużaw f’konformità mar-Regolament (UE) 2016/679 tal-Parlament Ewropew u tal-Kunsill (8) u mad-Direttivi 2002/58/KE (9) u (UE) 2016/943 (10) tal-Parlament Ewropew u tal-Kunsill.

(54)

Il-governanza tal-Impriża Konġunta jenħtieġ tkun żgurata minn żewġ korpi: Bord tat-Tmexxija u Bord Konsultattiv Industrijali u Xjentifiku. Jenħtieġ li l-Bord tat-Tmexxija jkun magħmul minn rappreżentanti tal-Unjoni u tal-Istati Parteċipanti. Jenħtieġ li l-Bord tat-Tmexxija jkun responsabbli għat-tfassil tal-politika strateġika u għad-deċiżjonijiet ta’ finanzjament relatati mal-attivitajiet tal-Impriża Konġunta, inkluż l-attivitajiet kollha tal-akkwist pubbliku. Il-Bord Konsultattiv Industrijali u Xjentifiku jenħtieġ li jkun jinkludi rappreżentanti mid-dinja akkademika u mill-industrija bħal utenti u fornituri tat-teknoloġija. Jenħtieġ li jagħti pariri indipendenti lill-Bord tat-Tmexxija fuq l-Aġenda Strateġika ta’ Riċerka u ta’ Innovazzjoni, fuq l-akkwist u t-tħaddim tas-supercomputers li jkunu proprjetà tal-Impriża Konġunta, fuq il-programm tal-attivitajiet tal-iżvilupp u t-twessigħ tal-kapaċità u fuq il-programm tal-attivitajiet ta’ federazzjoni, ta’ konnettività u ta’ kooperazzjoni internazzjonali.

(55)

Għall-kompiti amministrattivi ġenerali tal-Impriża Konġunta, jenħtieġ li d-drittijiet tal-vot tal-Istati Parteċipanti jkunu mqassmin ugwalment bejniethom. Għall-kompiti li jikkorrispondu għall-istabbiliment tal-parti tal-programm ta’ ħidma relatat mal-akkwist tas-supercomputers u tal-kompjuters kwantistiċi, mal-għażla tal-entità tal-hosting u mal-attivitajiet ta’ federazzjoni u ta’ konnettività tal-Impriża Konġunta, id-drittijiet tal-vot tal-Istati Parteċipanti li jkunu Stati Membri jenħtieġ ikunu bbażati fuq il-prinċipju ta’ maġġoranza kwalifikata. Jenħtieġ li anki l-Istati Parteċipanti li jkunu pajjiżi terzi assoċjati mal-Orizzont Ewropa, mal-Programm Ewropa Diġitali jew mal-Faċilità Nikkollegaw l-Ewropa jkollhom drittijiet tal-vot għall-attivitajiet rispettivi li jkunu appoġġati b’pakketti baġitarji minn kull wieħed minn dawk il-programmi. Jenħtieġ li għall-kompiti li jikkorrispondu għall-akkwist u għat-tħaddim tas-supercomputers u tal-kompjuters kwantistiċi, ikunu biss dawk l-Istati Parteċipanti u l-Unjoni li jikkontribwixxu riżorsi għal dawk il-kompiti li jkollhom id-drittijiet tal-vot.

(56)

Jenħtieġ li l-kontribuzzjoni finanzjarja tal-Unjoni tiġi ġestita f’konformità mal-prinċipju tal-ġestjoni finanzjarja tajba u mar-regoli rilevanti dwar il-ġestjoni indiretta stipulati fir-Regolament (UE, Euratom) 2018/1046 tal-Parlament Ewropew u tal-Kunsill (11). Jenħtieġ li r-regoli applikabbli għall-Impriża Konġunta biex tidħol fi proċeduri tal-akkwist pubbliku jkunu stabbiliti fir-regoli finanzjarji tagħha.

(57)

Biex trawwem ekosistema innovattiva u kompetittiva tal-Computing ta’ Prestazzjoni Għolja Ewropew u tal-computing kwantistiku ta’ eċċellenza rikonoxxuta madwar l-Ewropa, jenħtieġ li l-Impriża Konġunta tħaddem kif xieraq l-istrumenti tal-akkwist u tal-għoti, inkluż l-akkwist konġunt, l-akkwist prekummerċjali u l-akkwist pubbliku ta’ soluzzjonijiet innovattivi. Dan għandu l-għan li joħloq rabtiet bejn teknoloġiji primarjament żviluppati fl-Unjoni, kodisinn mal-utenti u l-akkwist ta’ sistemi ta’ supercomputing u computing kwantistiku ta’ klassi dinjija għalihom.

(58)

Fil-valutazzjoni tal-impatt ġenerali tal-Impriża Konġunta jenħtieġ jitqiesu l-investimenti f’azzjonijiet indiretti mill-Membri Privati, bħala kontribuzzjonijiet in natura li jikkonsistu fil-kostijiet eliġibbli li ġarrbu fl-implimentazzjoni ta’ azzjonijiet li minnhom jitnaqqsu l-kontribuzzjonijiet tal-Impriża Konġunta, tal-Istati Parteċipanti jew kull kontribuzzjoni oħra tal-Unjoni għal dawn il-kostijiet. Fil-valutazzjoni tal-impatt ġenerali tal-Impriża Konġunta jenħtieġ li l-investimenti f’azzjonijiet oħra mill-Membri Privati jitqiesu bħala kontribuzzjonijiet in natura li jikkonsistu fil-kostijiet eliġibbli li ġarrbu fl-implimentazzjoni tal-azzjonijiet li minnhom jitnaqqsu l-kontribuzzjonijiet tal-Impriża Konġunta, tal-Istati Parteċipanti jew kull kontribuzzjoni oħra tal-Unjoni għal dawn il-kostijiet.

(59)

Biex jinżammu kondizzjonijiet ekwivalenti ta’ kompetizzjoni għall-impriżi kollha attivi fis-suq intern, jenħtieġ li l-finanzjament mill-programmi tal-Unjoni jkun konsistenti mal-prinċipji tal-għajnuna mill-Istat b’tali mod li tkun żgurata l-effettività tal-infiq pubbliku u jkunu evitati distorsjonijiet tas-suq bħall-esklużjoni tal-finanzjament privat, il-ħolqien ta’ strutturi tas-suq mhux effettivi, il-preservazzjoni ta’ ditti mhux effiċjenti jew il-ħolqien ta’ kultura ta’ dipendenza fuq is-sussidji.

(60)

Jenħtieġ li l-parteċipazzjoni fl-azzjonijiet indiretti ffinanzjati mill-Impriża Konġunta tkun konformi mar-Regolament (UE) 2021/695. Minbarra dan, jenħtieġ li l-Impriża Konġunta tiżgura l-applikazzjoni konsistenti ta’ dawk ir-regoli abbażi ta’ miżuri rilevanti adottati mill-Kummissjoni. Biex jiġi żgurat kofinanzjament xieraq tal-azzjonijiet indiretti mill-Istati Parteċipanti, f’konformità mar-Regolament (UE) 2021/695, jenħtieġ li l-Istati Parteċipanti jikkontribwixxu ammont tal-anqas ugwali għar-rimborż ipprovdut mill-Impriża Konġunta għall-kostijiet eliġibbli mġarrba mill-benefiċjarji fl-implimentazzjoni tal-azzjonijiet. Għal dan il-għan, jenħtieġ li r-rati massimi ta’ finanzjament stipulati fil-pjan ta’ ħidma annwali tal-Impriża Konġunta jiġu stabbiliti mill-Bord ta’ Tmexxija f’konformità mal-Artikolu 34 tar-Regolament (UE) 2021/695.

(61)

Sabiex jiġi żgurat il-bilanċ ġust tal-parteċipazzjoni tal-partijiet ikkonċernati fl-azzjonijiet iffinanzjati mill-Impriża Konġunta EuroHPC, hija meħtieġa deroga mill-Artikolu 34 tar-Regolament (UE) 2021/695 biex tippermetti differenzjazzjoni tar-rati ta’ rimborż skont it-tip ta’ parteċipant, jiġifieri l-SMEs, u t-tip ta’ azzjoni, li għandhom jiġu applikati b’mod invarjabbli fost il-benefiċjarji mill-Istati Parteċipanti kollha. Għall-attivitajiet iffinanzjati taħt il-Programm Ewropa Diġitali, l-Impriża Konġunta jenħtieġ li tippermetti li r-rati ta’ rimborż skont it-tip ta’ parteċipant, jiġifieri l-SMEs, u t-tip ta’ azzjoni, jiġu applikati b’mod invarjabbli fost il-benefiċjarji mill-Istati Parteċipanti kollha.

(62)

L-għoti tal-appoġġ finanzjarju għall-attivitajiet mill-Programm Ewropa Diġitali jenħtieġ jikkonforma mar-regoli tar-Regolament (UE) 2021/694. B’mod partikolari, fir-rigward ta’ informazzjoni klassifikata, l-azzjonijiet iffinanzjati taħt il-Programm Ewropa Diġitali jenħtieġ li jikkonformaw mal-Artikolu 12(1) ta’ dak ir-Regolament.

(63)

L-għoti tal-appoġġ finanzjarju għal attivitajiet mill-Faċilità Nikkollegaw l-Ewropa jenħtieġ jikkonforma mar-Regolament (UE) 2021/1153.

(64)

Il-benefiċjarji mill-pajjiżi terzi assoċjati mal-Orizzont Ewropa, mal-Programm Ewropa Diġitali jew mal-Faċilità Nikkollegaw l-Ewropa li huma Stati Parteċipanti għandhom ikunu eliġibbli għall-parteċipazzjoni f’azzjonijiet biss meta Stat Parteċipanti jkun pajjiż terz assoċjat ma’ programm wieħed jew aktar relatati ma’ dik l-azzjoni.

(65)

Jenħtieġ li l-interessi finanzjarji tal-Unjoni u tal-membri l-oħra tal-Impriża Konġunta jkunu protetti b’miżuri proporzjonati matul iċ-ċiklu tan-nefqa kollu, inkluż il-prevenzjoni, l-iskoperta u l-investigazzjoni ta’ irregolaritajiet, l-irkupru ta’ fondi mitlufa, imħallsa ħażin jew użati b’mod żbaljat u, fejn xieraq, l-applikazzjoni ta’ pieni amministrattivi u finanzjarji f’konformità mar-Regolament (UE, Euratom) 2018/1046.

(66)

Jenħtieġ li l-Impriża Konġunta topera b’mod miftuħ u trasparenti u tipprovdi kull informazzjoni rilevanti fil-ħin u tippromwovi l-attivitajiet tagħha, fosthom attivitajiet tal-informazzjoni u tad-disseminazzjoni, lill-pubbliku ġenerali. Ir-regoli tal-proċedura tal-korpi tal-Impriża Konġunta jenħtieġ li jkunu disponibbli għall-pubbliku.

(67)

Għall-finijiet ta’ simplifikazzjoni, jenħtieġ li l-piż amministrattiv jitnaqqas għall-partijiet kollha. Jenħtieġ li jiġu evitati awditi doppji u ammonti sproporzjonati ta’ dokumentazzjoni u ta’ rappurtar.

(68)

L-awditur intern tal-Kummissjoni jenħtieġ jeżerċita l-istess setgħat fuq l-Impriża Konġunta bħal dawk eżerċitati fir-rigward tal-Kummissjoni.

(69)

Jenħtieġ li l-Kummissjoni, l-Impriża Konġunta, il-Qorti tal-Awdituri, l-Uffiċċju Ewropew ta’ Kontra l-Frodi (OLAF) u l-Uffiċċju tal-Prosekutur Pubbliku Ewropew (UPPE) ikollhom aċċess għal kull informazzjoni meħtieġa u għall-bini biex iwettqu awditi u investigazzjonijiet fuq l-għotjiet, fuq il-kuntratti u fuq il-ftehimiet iffirmati mill-Impriża Konġunta.

(70)

Jenħtieġ li s-sejħiet kollha għal proposti u s-sejħiet kollha għal offerti skont dan ir-Regolament iqisu t-tul taż-żmien tal-Orizzont Ewropa, tal-Programm Ewropa Diġitali u tal-Faċilità Nikkollegaw l-Ewropa, kif xieraq, għajr f’każijiet debitament ġustifikati. Jenħtieġ li l-proċeduri kollha tal-akkwist għall-akkwist tas-supercomputers u tal-kompjuters kwantistiċi tal-Impriża Konġunta jsiru skont id-dispożizzjonijiet applikabbli tal-Programm Ewropa Diġitali. Jenħtieġ li f’każijiet debitament ġustifikati relatati mad-disponibbiltà tal-baġit li jifdal li jirriżulta mill-QFP 2021-2027, l-Impriża Konġunta tkun tista’ tniedi sejħiet għal proposti jew sejħiet għal offerti sal-31 ta’ Diċembru 2028.

(71)

Jenħtieġ li ssir evalwazzjoni interim u finali tal-Impriża Konġunta mill-Kummissjoni bl-għajnuna ta’ esperti indipendenti. Jenħtieġ li fl-ispirtu ta’ trasparenza, ir-rapport rilevanti tal-esperti indipendenti isir disponibbli għall-pubbliku, f’konformità mar-regoli applikabbli.

(72)

Billi l-objettivi ta’ dan ir-Regolament, jiġifieri t-tisħiħ tal-kapaċitajiet tar-riċerka u l-innovazzjoni, l-iżvilupp ta’ attivitajiet tal-iżvilupp u t-twessigħ tal-kapaċità tas-supercomputing, il-federazzjoni, il-konnettività u l-kooperazzjoni internazzjonali u l-akkwist ta’ supercomputers tal-ogħla klassi, u l-aċċess għal infrastruttura tas-servizzi u tad-data tal-Computing ta’ Prestazzjoni Għolja u tal-computing kwantistiku madwar l-Unjoni permezz ta’ Impriża Konġunta, ma jistgħux jintlaħqu b’mod suffiċjenti mill-Istati Membri, iżda pjuttost, billi tkun evitata d-duplikazzjoni bla bżonn, tinżamm il-massa kritika u jkun żgurat li l-finanzjament pubbliku qed jintuża b’mod ottimali, jistgħu jintlaħqu aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stipulat fl-Artikolu 5 tat-Trattat dwar l-Unjoni Ewropea (TUE). F’konformità mal-prinċipju tal-proporzjonalità, kif stipulat f’dak l-Artikolu, dan ir-Regolament ma jmurx lil hinn minn dak meħtieġ biex jintlaħqu dawk l-objettivi.

(1)

F’konformità mal-ewwel subparagrafu tal-Artikolu 53(1) tar-Regolament (UE) Nru 1151/2012, il-Kummissjoni eżaminat l-applikazzjoni tal-Italja għall-approvazzjoni ta’ emenda fl-ispeċifikazzjoni tal-prodott tal-indikazzjoni ġeografika protetta “Asparago di Badoere”, irreġistrata skont ir-Regolament tal-Kummissjoni (UE) Nru 923/2010 (2).

(2)

Billi l-emenda kkonċernata mhijiex minuri skont it-tifsira tal-Artikolu 53(2) tar-Regolament (UE) Nru 1151/2012, il-Kummissjoni ppubblikat l-applikazzjoni għal emenda, kif meħtieġ skont l-Artikolu 50(2)(a) tal-istess Regolament, f’Il-Ġurnal Uffiċjali tal-Unjoni Ewropea (3).

(3)

Billi l-Kummissjoni ma rċeviet ebda dikjarazzjoni ta’ oppożizzjoni f’konformità mal-Artikolu 51 tar-Regolament (UE) Nru 1151/2012, jenħtieġ li l-emenda fl-ispeċifikazzjoni tal-prodott tiġi approvata,

(1)

L-Anness II tar-Regolament (KE) Nru 1333/2008 jistabbilixxi lista tal-Unjoni ta’ addittivi tal-ikel approvati għall-użu fl-ikel u l-kundizzjonijiet tal-użu tagħhom.

(2)

Dik il-lista tista’ tiġi aġġornata f’konformità mal-proċedura komuni msemmija fl-Artikolu 3(1) tar-Regolament (KE) Nru 1331/2008 tal-Parlament Ewropew u tal-Kunsill (2), fuq inizjattiva tal-Kummissjoni jew wara li ssir applikazzjoni.

(3)

Fit-18 ta’ Diċembru 2018 ġiet imressqa applikazzjoni għall-awtorizzazzjoni tal-użu tal-polijoli bħala sustanza li tagħti l-ħlewwa f’ħelu iebes (ħelu u lollies), f’ħelu artab (ħelu li togħmodu, gums tal-frott u prodotti taz-zokkor tar-ragħwa/marshmallows), f’għud is-sus, f’qubbajt u f’marżipan; f’mustardini b’togħma qawwija li jiffriskaw il-griżmejn u f’ħelu żgħir li jiffriska n-nifs li huma b’enerġija mnaqqsa. Sussegwentement, din l-applikazzjoni saret disponibbli għall-Istati Membri skont l-Artikolu 4 tar-Regolament (KE) Nru 1331/2008.

(4)

Il-polijoli huma sustanzi li jagħtu l-ħlewwa b’ammont baxx ta’ kaloriji u jistgħu jintużaw biex jissostitwixxu parzjalment jew kompletament iz-zokkor kaloriku f’ċerti prodotti tal-ħelu. Dan iwassal għal tnaqqis fil-kontenut kaloriku tagħhom u fl-offerta ta’ prodotti b’enerġija mnaqqsa lill-konsumaturi f’konformità mal-Artikolu 7 tar-Regolament (KE) Nru 1333/2008. L-użu kombinat ta’ polijoli u ta’ zokkor f’ħelu b’enerġija mnaqqsa jipprovdi ħlewwa lill-prodotti u l-funzjonalitajiet u l-proprjetajiet organolettiċi mixtieqa li ma jistgħux jinkisbu b’ingredjenti oħrajn jew bl-użu tal-polijoli biss.

(5)

Użu limitat ta’ polijoli bħala sustanzi li jagħtu l-ħlewwa jitqies aċċettabbli fl-ikel diment li tiġi kkunsidrata l-azzjoni lassattiva tagħhom (3). Ġeneralment, ir-Regolament (KE) Nru 1333/2008 ma jippermettix l-użu tal-polijoli fix-xorb minħabba l-potenzjal lassattiv tagħhom. Madankollu, meta jintużaw fl-ikel solidu, bħall-prodotti tal-ħelu kkonċernati mill-applikazzjoni, x’aktarx il-polijoli ma jikkawżaw l-ebda sintomu lassattiv mhux mixtieq meta jiġu kkonsmati inqas minn 20 g ta’ polijoli kuljum mis-sorsi kollha (4). Għalhekk, ir-Regolament (KE) Nru 1333/2008 diġà jippermetti l-użu tagħhom fi quantum satis fil-kategorija tal-ikel 05.2 “Ħlewwiet oħra inkluż ħelu żgħir li jiffriska n-nifs”, għas-sosituzzjoni totali taz-zokkor fi prodotti mingħajr zokkor miżjud, fost skopijiet oħrajn. L-estensjoni proposta tal-użu tikkonċerna biss is-sostituzzjoni parzjali taz-zokkor fl-istess tipi ta’ prodotti, u għalhekk, il-polijoli jintużaw f’livell mhux assoċjat ma’ sintomi lassattivi mhux mixtieqa.

(6)

Skont l-Artikolu 3(2) tar-Regolament (KE) Nru 1331/2008, il-Kummissjoni għandha titlob l-opinjoni tal-Awtorità biex taġġorna l-lista tal-Unjoni ta’ addittivi tal-ikel stabbilita fl-Anness II tar-Regolament (KE) Nru 1333/2008, għajr meta t-tali aġġornament mhuwiex mistenni li jkollu effett fuq is-saħħa tal-bniedem. L-awtorizzazzjoni tal-użu tal-polijoli bħala sustanzi li jagħtu l-ħlewwa fi ħlewwiet b’enerġija mnaqqsa, flimkien mal-użu diġà awtorizzat tagħhom fil-ħelu mingħajr zokkor miżjud, tikkostitwixxi aġġornament ta’ din il-lista li mhuwiex mistenni li jkollu effett fuq is-saħħa tal-bniedem. Għalhekk, m’hemmx bżonn tintalab l-opinjoni tal-Awtorità. Sabiex jiġi żgurat li l-konsumaturi jirċievu informazzjoni adegwata, it-tikkettar tal-ikel li fih aktar minn 10 % ta’ polijoli miżjuda awtorizzati skont l-Anness II tar-Regolament (KE) Nru 1333/2008 jrid jinkludi d-dikjarazzjoni obbligatorja “konsum eċċessiv jista’ jipproduċi effetti lassattivi” f’konformità mal-Anness III tar-Regolament (UE) Nru 1169/2011 tal-Parlament Ewropew u tal-Kunsill (5).

(7)

B’riżultat ta’ dan, jixraq li jiġi awtorizzat l-użu tal-polijoli bħala sustanzi li jagħtu l-ħlewwa f’ċerti prodotti b’enerġija mnaqqsa msemmija fl-ewwel sentenza tal-premessa (3) fis-subkategorija tal-ikel 05.2 “Ħlewwiet oħra inkluż ħelu żgħir li jiffriska n-nifs” fi quantum satis.

(8)

Jenħtieġ li l-Anness II tar-Regolament (KE) Nru 1333/2008 jiġi emendat skont dan.

(9)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Ir-Regolament (KE) Nru 999/2001 jistabbilixxi regoli għall-prevenzjoni, kontroll u eradikazzjoni ta’ ċertu enċefalopatija sponġiformi li tinxtered (transmissible spongiform encephalopathies, TSEs) fl-annimali. Dan jikkategorizza l-Istati Membri, il-pajjiżi terzi jew ir-reġjuni tagħhom, skont ir-riskju ta’ enċefalopatija sponġiformi tal-ifrat (bovine spongiform encephalopathy, BSE) tagħhom, f’kategoriji b’riskju tal-BSE negliġibbli, b’riskju tal-BSE kkontrollat jew b’riskju tal-BSE indeterminat.

(2)

L-Anness III tar-Regolament (KE) Nru 999/2001 jistabbilixxi regoli dwar is-sistema ta’ monitoraġġ għall-prevenzjoni tat-TSEs, inkluż il-monitoraġġ tal-annimali ovini u kaprini. Il-punt 8 tal-Parti II tal-Kapitolu A tal-Anness III tar-Regolament (KE) Nru 999/2001 jipprevedi l-ġenotipar obbligatorju ta’ każijiet pożittivi ta’ TSE fin-nagħaġ, u l-obbligu li kwalunkwe każ ta’ TSE li jinstab f’nagħġa tal-ġenotip ARR/ARR jiġi rrappurtat minnufih lill-Kummissjoni. In-nagħaġ tal-ġenotip ARR/ARR huma kkunsidrati bħala reżistenti għall-iscrapie klassika, u għalhekk kwalunkwe każ ta’ din il-marda f’nagħaġ bħal dawn huwa sejba mhux mistennija li tirrikjedi l-attenzjoni. Għal din ir-raġuni, jenħtieġ li dan jiġi nnotifikat minnufih sabiex ikun jista’ jiġi soġġett għal investigazzjoni ulterjuri.

(3)

Ir-Regolament (KE) Nru 999/2001 kien emendat bir-Regolament tal-Kummissjoni (UE) 2020/772 (2), f’konformità mar-rakkomandazzjonijiet tal-Opinjoni Xjentifika tal-Awtorità Ewropea dwar is-Sigurtà tal-ikel (EFSA) tal-5 ta’ Lulju 2017 dwar ir-reżistenza Ġenetika għall-enċefalopatiji sponġiformi li jinxterdu (TSE) fil-mogħoż (3), sabiex jiġi rikonoxxut li l-mogħoż jistgħu jkunu wkoll reżistenti ġenetikament għar-razez tal-iscrapie klassika, magħrufa li jseħħu b’mod naturali fil-popolazzjoni tal-mogħoż tal-Unjoni, meta jkollhom wieħed mill-alleli K222, D146 jew S146. Ir-Regolament (UE) 2020/772 emenda l-Anness VII tar-Regolament (KE) Nru 999/2001 billi introduċa regoli li jillimitaw il-qtil u l-qerda ta’ annimali kaprini, f’merħla fejn ġie kkonfermat każ ta’ scrapie klassika, għal dawk biss li jkunu suxxettibbli għal din il-marda. Madankollu, l-emendi li saru fl-Anness VII tar-Regolament (KE) Nru 999/2001 bir-Regolament (UE) 2020/772 ma koprewx il-ġenotipar ta’ każijiet pożittivi ta’ TSE fil-mogħoż. Għalhekk jenħtieġ li l-punt 8 tal-Parti II tal-Kapitolu A tal-Anness III u l-punt 8 tal-Parti I.A tal-Kapitolu B tal-Anness III jiġu emendati biex jipprevedu għall-monitoraġġ u għar-rapportar xieraq tal-ġenotip ta’ każijiet pożittivi fil-mogħoż.

(4)

Barra minn hekk, ir-Regolament (KE) Nru 999/2001 jistabbilixxi regoli dwar materjal speċifikat riskjuż, u jipprevedi, fost l-oħrajn, li materjal speċifikat riskjuż irid jitneħħa u jintrema f’konformità mal-Anness V tiegħu u mar-Regolament (KE) Nru 1069/2009 tal-Parlament Ewropew u tal-Kunsill (4). B’mod aktar partikolari, il-punt 1(b) tal-Anness V tar-Regolament (KE) Nru 999/2001 jiddefinixxi materjal speċifikat riskjuż, fl-annimali ovini u kaprini tal-età ta’ ’l fuq minn 12-il xahar, li jrid jitneħħa u jintrema f’konformità mal-Anness V tiegħu u mar-Regolament (KE) Nru 1069/2009.

(5)

Minħabba n-natura speċifika tat-trobbija tal-annimali ovini u kaprini, rari jkun possibbli li d-data tat-twelid eżatta ta’ dawn l-annimali ovini u kaprini tiġi ddeterminata u għalhekk din id-data mhix inkluża fir-reġistru tal-istabbiliment meħtieġ f’konformità mar-Regolament tal-Kunsill (KE) Nru 21/2004 (5). Għalhekk, qabel l-emenda tal-Anness V tar-Regolament (KE) Nru 999/2001 bir-Regolament tal-Kummissjoni (UE) 2018/969 (6), kien hemm il-ħtieġa għat-tneħħija tal-materjal speċifikat riskjuż f’annimali ovini u kaprini li għandhom aktar minn 12-il xahar jew f’annimali ovini u kaprini b’sinna inċiżiva permanenti li spuntat fil-ħanek.

(6)

Ir-Regolament (UE) 2018/969 emenda l-Anness V tar-Regolament (KE) Nru 999/2001 billi żied il-possibbiltà li jintuża metodu approvat mill-awtorità kompetenti tal-Istat Membru li jwettaq it-tbiċċir biex jiġu identifikati l-annimali ovini u kaprini li għandhom aktar minn 12-il xahar. Din il-possibilità ġiet miżjuda fl-2018 iżda minn meta saret din l-emenda, l-ebda Stat Membru ma għamel użu minnha. Barra minn hekk, din il-possibbiltà kienet maħsuba biex tiġi applikata biss fl-Istati Membri u mhux biex tiġi estiża għall-pajjiżi terzi. Għaldaqstant, fl-interess taċ-ċarezza u ċ-ċertezza tad-dritt, issa huwa xieraq li titħassar. Għalhekk jenħtieġ li l-possibbiltà li jintuża metodu approvat mill-awtorità kompetenti tal-Istat Membru li jwettaq it-tbiċċir biex jiġu identifikati l-annimali ovini u kaprini li għandhom aktar minn 12-il xahar, titħassar mill-punt 1(b) tal-Anness V tar-Regolament (KE) Nru 999/2001.

(7)

L-Anness VII tar-Regolament (KE) Nru 999/2001 jistabbilixxi l-miżuri għall-kontroll u għall-eradikazzjoni tat-TSEs, inkluż l-iscrapie atipika. B’mod partikolari, il-Kapitolu B ta’ dak l-Anness jistabbilixxi l-miżuri li jridu japplikaw wara li tiġi kkonfermata l-preżenza ta’ TSE f’annimali bovini, ovini u kaprini. Ir-Regolament tal-Kummissjoni (UE) Nru 630/2013 (7) emenda l-Anness VII tar-Regolament (KE) Nru 999/2001 sabiex jitneħħew il-miżuri kollha ta’ restrizzjoni fuq il-moviment ta’ annimali ovini u kaprini fejn ikun ġie kkonfermat każ ta’ scrapie atipika, iżda żamm sorveljanza ikbar għal sentejn f’dawk il-qatgħat jew merħliet sabiex tinġabar aktar data xjentifika dwar l-iscrapie atipika. Mid-data tal-adozzjoni tar-Regolament (UE) Nru 630/2013 inġabar ammont sinifikanti ta’ data. Għalhekk jenħtieġ li l-miżura stabbilita fil-punt 2.2.3 tal-Kapitolu B tal-Anness VII tar-Regolament (KE) Nru 999/2001, li mhijiex relatata mat-tħassib dwar is-saħħa pubblika, issa titħassar.

(8)

Il-Kapitolu C tal-Anness IX tar-Regolament (KE) Nru 999/2001 jistabbilixxi r-rekwiżiti għall-importazzjoni fl-Unjoni ta’ prodotti bovini, ovini u kaprini. Dawn ir-rekwiżiti jvarjaw skont l-istatus tal-BSE tal-pajjiż jew tar-reġjun ta’ oriġini tal-prodotti, kif ukoll skont l-istatus tal-BSE tal-pajjiż jew tar-reġjun tal-oriġini tal-annimali li minnhom ġew il-prodotti. L-istatus tal-BSE ta’ pajjiżi jew ta’ reġjuni skont ir-riskju tal-BSE tagħhom huwa stabbilit fid-Deċiżjoni tal-Kummissjoni 2007/453/KE (8), li telenka l-pajjiżi jew ir-reġjuni b’riskju tal-BSE negliġibbli u b’riskju tal-BSE kkontrollat u tipprevedi li l-pajjiżi jew ir-reġjuni l-oħra kollha jridu jitqiesu li għandhom riskju tal-BSE indeterminat.

(9)

Rekwiżiti speċifiċi huma stabbiliti fil-punti (g) u (h) tat-Taqsima B tal-Kapitolu C tal-Anness IX tar-Regolament (KE) Nru 999/2001, biex jiġi indirizzat il-każ tal-importazzjoni tal-prodotti minn pajjiż jew reġjun b’riskju negliġibbli tal-BSE li ġej minn annimali li joriġinaw minn pajjiż jew reġjun b’riskju tal-BSE indeterminat: il-punt (g) jistabbilixxi li l-annimali ma jridux ikunu rċevew alimentazzjoni bid-dqiq mil-laħam u l-għadam mitħun u bil-qrieqeċ derivati mir-ruminanti; u l-punt (h) jistabbilixxi li l-prodotti jridu jkunu ġew prodotti u ġestiti f’manjiera li tiżgura li ma kienx fihom u ma kinux kontaminati b’tessut nervuż u limfatiku espost matul il-proċess ta’ dissussar.

(10)

Ir-rekwiżiti speċifiċi stabbiliti fil-punti (g) u (h) tat-Taqsima B tal-Kapitolu C tal-Anness IX tar-Regolament (KE) Nru 999/2001 huma konsistenti mar-rekwiżiti stabbiliti fil-punti 1(a) u 1(c)(ii) tat-Taqsima D ta’ dak il-Kapitolu, għall-importazzjoni diretta fl-Unjoni minn pajjiż jew reġjun b’riskju tal-BSE indeterminat. Madankollu, dawn ir-rekwiżiti speċifiċi mhumiex stabbiliti fit-Taqsima C tal-Kapitolu C tal-Anness IX tar-Regolament (KE) Nru 999/2001, li tistabbilixxi r-rekwiżiti għall-importazzjonijiet minn pajjiż jew reġjun b’riskju tal-BSE kkontrollat. Għaldaqstant, bħalissa huwa permess, minħabba dik l-omissjoni mhux intenzjonata, li jiġu importati fl-Unjoni u minn pajjiż jew reġjun b’riskju tal-BSE kkontrollat, prodotti li ġejjin minn annimali li joriġinaw minn pajjiż jew reġjun b’riskju tal-BSE indeterminat li ma jikkonformawx ma’ dawk ir-rekwiżiti speċifiċi. Għalhekk jenħtieġ li r-rekwiżiti speċifiċi stabbiliti fil-punti (g) u (h) tat-Taqsima B tal-Kapitolu C tal-Anness IX tar-Regolament (KE) Nru 999/2001 jiddaħħlu fit-Taqsima C tal-Kapitolu C ta’ dan l-Anness.

(11)

Għalhekk jenħtieġ li l-Annessi III, V, VII u IX tar-Regolament (KE) Nru 999/2001 jiġu emendati skont dan.

(12)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Ir-Regolament ta’ Implimentazzjoni tal-Kummissjoni (UE) 2015/408 (2) jistabbilixxi lista ta’ sustanzi attivi li jissodisfaw il-kriterji stipulati fil-punt 4 tal-Anness II tar-Regolament (KE) Nru 1107/2009 biex jitqiesu bħala kandidati għas-sostituzzjoni. Il-propossikarbażon ġie inkluż f’dik il-lista għaliex tqies li jissodisfa tnejn mit-tliet kriterji biex jitqies bħala sustanza persistenti, bijoakkumulattiva u tossika (“PBT”), f’konformità mal-punt 4, it-tieni inċiż tal-Anness II tar-Regolament (KE) Nru 1107/2009.

(2)

Ir-Regolament ta’ Implimentazzjoni tal-Kummissjoni (UE) 2017/1115 (3)ġedded l-approvazzjoni tal-propossikarbażon bħala sustanza attiva, iżda, mhux bħala kandidat għas-sostituzzjoni. Fil-fatt, il-valutazzjoni l-ġdida ma kkonfermatx il-persistenza tas-sustanza, u dan wassal biex dik is-sustanza ma baqgħetx tissodisfa tnejn mill-kriterji biex titqies bħala sustanza PBT. Għalhekk iddaħħlet fil-parti B tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4).

(3)

Billi l-propossikarbażon ma għandux jibqa’ jitqies bħala kandidat għas-sostituzzjoni, sabiex tiġi evitata l-konfużjoni jenħtieġ li jitneħħa wkoll mill-Anness tar-Regolament ta’ Implimentazzjoni (UE) 2015/408, li jelenka s-sustanzi attivi li għandhom jitqiesu bħala kandidati għas-sostituzzjoni.

(4)

Għalhekk, jenħtieġ li ir-Regolament ta’ Implimentazzjoni (UE) 2015/408 jiġi emendat skont dan.

(5)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

(1)

Ir-Regolament (UE) 2016/429 jistabbilixxi, fost l-oħrajn, ir-rekwiżiti tas-saħħa tal-annimali għad-dħul fl-Unjoni ta’ konsenji ta’ annimali, ta’ prodotti ġerminali u ta’ prodotti li joriġinaw mill-annimali, u japplika mill-21 ta’ April 2021. Wieħed minn dawk ir-rekwiżiti tas-saħħa tal-annimali huwa li dawk il-konsenji jridu jkunu ġejjin minn pajjiż terz, jew territorju, żona jew kompartiment tiegħu, elenkat f’konformità mal-Artikolu 230(1) ta’ dak ir-Regolament.

(2)

Ir-Regolament Delegat tal-Kummissjoni (UE) 2020/692 (2) jissupplimenta r-Regolament (UE) 2016/429 fir-rigward tar-rekwiżiti tas-saħħa tal-annimali għad-dħul fl-Unjoni ta’ konsenji ta’ ċerti speċijiet u kategoriji ta’ annimali, ta’ prodotti ġerminali u ta’ prodotti li joriġinaw mill-annimali minn pajjiżi terzi jew territorji jew żoni tagħhom, jew kompartimenti tagħhom fil-każ ta’ annimali tal-akkwakultura, u dan japplika wkoll mill-21 ta’ April 2021. Il-punt (a) tal-Artikolu 3, tar-Regolament Delegat (UE) 2020/692 jipprevedi li konsenji ta’ annimali, prodotti ġerminali u ta’ prodotti li joriġinaw mill-annimali li jaqgħu fil-kamp ta’ applikazzjoni tiegħu jistgħu jitħallew jidħlu fl-Unjoni biss jekk ikunu ġejjin minn pajjiż terz elenkat jew territorju jew żona jew kompartiment tiegħu elenkat għall-ispeċijiet partikolari ta’ annimali, ta’ prodotti ġerminali u ta’ prodotti li joriġinaw mill-annimali f’konformità mar-rekwiżiti tas-saħħa tal-annimali stabbiliti f’dak ir-Regolament Delegat.

(3)

Barra minn hekk, ir-Regolament ta’ Implimentazzjoni tal-Kummissjoni (UE) 2021/404 (3) jistabbilixxi l-listi ta’ pajjiżi terzi, territorji jew żoni tagħhom, fil-każ ta’ annimali tal-akkwakultura, li minnhom huwa permess id-dħul fl-Unjoni ta’ dawk l-ispeċijiet u l-kategoriji ta’ annimali u ta’ dawk il-kategoriji ta’ prodotti ġerminali u prodotti li joriġinaw mill-annimali li jaqgħu fil-kamp ta’ applikazzjoni tar-Regolament Delegat (UE) 2020/692.

(4)

Ir-Regolament ta’ Implimentazzjoni (UE) 2021/404 japplika wkoll mill-21 ta’ April 2021, u l-listi tal-pajjiżi terzi, territorji jew żoni stabbiliti fl-Annessi tiegħu għandhom l-istess skop bħal listi simili li qabel kienu stabbiliti f’diversi atti tal-Kummissjoni li tħassru u ġew sostitwiti b’dak ir-Regolament ta’ Implimentazzjoni b’effett minn dik id-data. Madankollu, għadd ta’ emendi għal-listi f’dawk l-atti preċedenti tal-Kummissjoni mhumiex riflessi fil-listi stabbiliti issa fir-Regolament ta’ Implimentazzjoni (UE) 2021/404. Dan huwa prinċipalment għaliex f’pajjiżi jew f’territorji terzi, hemm it-tendenza li listi bħal dawn jiġu emendati ta’ spiss sabiex jitqiesu kwistjonijiet, bħal sitwazzjonijiet epidemjoloġiċi li jinbidlu fir-rigward ta’ mard tal-annimali, jew ta’ kundizzjonijiet sanitarji jew ta’ garanziji tas-saħħa tal-annimali jew tas-saħħa pubblika.

(5)

Ir-Regolament tal-Kummissjoni (KE) Nru 798/2008 (4) jistabbilixxi lista ta’ pajjiżi terzi, territorji, żoni jew kumpartimenti li minnhom setgħu jiġu impurtati u jsir tranżitu ta’ tjur u prodotti tat-tjur fl-Unjoni. Dak ir-Regolament tħassar u ġie sostitwit bir-Regolament ta’ Implimentazzjoni (UE) 2021/404, u l-Annessi V u XIV tiegħu issa jistabbilixxu l-listi ta’ pajjiżi terzi, territorji jew żoni tagħhom li minnhom hu awtorizzat id-dħul fl-Unjoni ta’ konsenji ta’ tjur, ta’ prodotti ġerminali tat-tjur, ta’ laħam frisk tat-tjur u ta’ għasafar tal-kaċċa. Madankollu, għadd ta’ emendi għal-lista fir-Regolament (KE) Nru 798/2008 ma ġewx inklużi fil-listi stabbiliti fl-Annessi V u XIV tar-Regolament ta’ Implimentazzjoni (UE) 2021/404. B’mod partikolari, ir-Regolament (KE) Nru 798/2008 ġie emendat bir-Regolament ta’ Implimentazzjoni (UE) 2020/626 (5) fir-rigward tal-entrata tar-Repubblika tal-Maċedonja ta’ Fuq, bir-Regolament ta’ Implimentazzjoni (UE) 2020/1166 (6) fir-rigward tal-entrata għall-Istati Uniti, bir-Regolament ta’ Implimentazzjoni (UE) 2020/1752 (7) fir-rigward tal-entrata għall-Awstralja, bir-Regolament ta’ Implimentazzjoni (UE) 2020/2083 (8) fir-rigward tal-entrata għall-Ġappun, bir-Regolament ta’ Implimentazzjoni (UE) 2021/460 (9) fir-rigward tal-entrata għall-Ukrajna, u bir-Regolament ta’ Implimentazzjoni (UE) 2021/568 (10) fir-rigward tal-entrata għar-Renju Unit. Għaldaqstant, jenħtieġ li r-Regolament ta’ Implimentazzjoni (UE) 2021/404 jiġi emendat sabiex jitqiesu dawk il-bidliet fil-lista stabbilita fir-Regolament (KE) Nru 798/2008.

(6)

Barra minn hekk, l-Awstralja ppreżentat informazzjoni aġġornata dwar is-sitwazzjoni epidemjoloġika fit-territorju tagħha wara tifqigħa tal-influwenza avjarja b’patoġeniċità għolja (HPAI) ikkonfermata f’azjenda tat-tjur fit-territorju tagħha fil-31 ta’ Lulju 2020 u dwar il-miżuri li ħadet biex tipprevjeni aktar tixrid ta’ dik il-marda. B’mod partikolari, wara dik it-tifqigħa tal-HPAI, l-Awstralja implimentat politika ta’ qerda sabiex tikkontrolla u tillimita t-tixrid ta’ dik il-marda. Minbarra dan, l-Awstralja temmet il-miżuri meħtieġa ta’ tindif u diżinfezzjoni wara l-implimentazzjoni tal-politika ta’ qerda fl-azjenda tat-tjur fit-territorju tagħha li qabel kienet infettata.

(7)

Il-Kummissjoni evalwat l-informazzjoni mressqa mill-Awstralja u kkonkludiet li t-tifqigħa tal-HPAI ġiet ikklerjata u li ma għadx hemm riskju assoċjat mad-dħul fl-Unjoni ta’ komoditajiet tat-tjur minn dak il-pajjiż terz.

(8)

Barra minn hekk, ir-Renju Unit ippreżenta informazzjoni aġġornata dwar is-sitwazzjoni epidemjoloġika fit-territorju tiegħu fir-rigward tat-tifqigħat tal-HPAI kkonfermati fl-azjendi tat-tjur fis-27 ta’ Jannar 2021 fl-Isle of Anglesey f’Wales, fit-8 ta’ Frar 2021 f’Redcar u Cleveland, fl-Ingilterra, fit-12 ta’ Frar 2021 f’Glenrothes, Fife, fl-Iskozja u fid-29 ta’ Marzu 2021 fil-kontea ta’ Staffordshire, fl-Ingilterra u l-miżuri li ħa biex jipprevjeni aktar tixrid ta’ dik il-marda. B’mod partikolari, wara dawk it-tifqigħat tal-HPAI, ir-Renju Unit implimenta politika ta’ qerda biex jikkontrolla u jillimita t-tixrid ta’ dik il-marda. Barra minn hekk, ir-Renju Unit temm il-miżuri meħtieġa ta’ tindif u diżinfezzjoni wara l-implimentazzjoni tal-politika ta’ qerda fl-azjendi tat-tjur infettati fit-territorju tiegħu.

(9)

Il-Kummissjoni evalwat l-informazzjoni mressqa mir-Renju Unit u kkonkludiet li t-tifqigħat tal-HPAI fl-azjendi tat-tjur fl-Isle of Anglesey f’Wales, f’Redcar u fi Cleveland, fl-Ingilterra, f’Glenrothes, Fife, fl-Iskozja u fil-kontea ta’ Staffordshire, fl-Ingilterra ġew ikklerjati u li ma għadx hemm riskju assoċjat mad-dħul fl-Unjoni ta’ komoditajiet tat-tjur miż-żoni tar-Renju Unit li minnu d-dħul fl-Unjoni ta’ komoditajiet tat-tjur ġie sospiż minħabba dawk it-tifqigħat.

(10)

Għalhekk jenħtieġ li l-entrati għall-Awstralja u għar-Renju Unit fit-tabella fil-Parti 1 tal-Annessi V u XIV tar-Regolament ta’ Implimentazzjoni (UE) 2021/404 jqisu wkoll is-sitwazzjoni epidemjoloġika attwali f’dawk il-pajjiżi terzi.

(11)

Barra minn hekk, l-Anness VI tar-Regolament ta’ Implimentazzjoni (UE) 2021/404 jistabbilixxi l-lista ta’ pajjiżi terzi, territorji jew żoni tagħhom li minnhom hu awtorizzat id-dħul fl-Unjoni ta’ konsenji ta’ għasafar miżmuma fil-magħluq u l-prodotti ġerminali ta’ għasafar miżmuma fil-magħluq. Jenħtieġ li dik il-lista tqis il-lista ta’ pajjiżi terzi li minnhom huma awtorizzati l-importazzjonijiet fl-Unjoni ta’ għasafar imrobbija fil-magħluq stabbilita fl-Anness I tar-Regolament ta’ Implimentazzjoni tal-Kummissjoni (UE) Nru 139/2013 (11), imħassar biir-Regolament Delegat (UE) 2020/692. Għalhekk jenħtieġ li l-Anness VI tar-Regolament ta’ Implimentazzjoni (UE) 2021/404 jiġi emendat biex jinkludi l-Arġentina u l-Filippini.

(12)

Ċerti pajjiżi terzi ppreżentaw ukoll it-tweġibiet tagħhom lill-Kummissjoni għal kwestjonarju dwar id-dħul fl-Unjoni ta’ budellati f’termini tas-saħħa tal-annimali u tas-saħħa pubblika. Dawn il-pajjiżi terzi pprovdew biżżejjed evidenza u garanziji lill-Kummissjoni biex jiġu inklużi fil-lista ta’ pajjiżi terzi jew żoni tagħhom awtorizzati għad-dħul fl-Unjoni ta’ konsenji ta’ budellati. Għalhekk jenħtieġ li dawn jiġu inklużi fil-lista ta’ pajjiżi terzi, territorji jew żoni tagħhom awtorizzati għad-dħul fl-Unjoni ta’ konsenji ta’ budellati stabbiliti fl-Anness XVI tar-Regolament ta’ Implimentazzjoni (UE) 2021/404 u dak l-Anness jenħtieġ li jiġi emendat skont dan.

(13)

L-Anness XVIII tar-Regolament ta’ Implimentazzjoni (UE) 2021/404 jistabbilixxi l-lista ta’ pajjiżi terzi, territorji jew żoni tagħhom li minnhom hu awtorizzat id-dħul fl-Unjoni ta’ ħalib mhux ipproċessat, ta’ kolostru, ta’ prodotti li fihom il-kolostru ta’ prodotti tal-ħalib derivati minn ħalib mhux ipproċessat u ta’ prodotti tal-ħalib li mhumiex soġġetti għal trattament speċifiku għall-mitigazzjoni tar-riskju kontra l-marda tal-ilsien u d-dwiefer. Jenħtieġ li dik il-lista tqis il-lista ta’ pajjiżi terzi jew partijiet minnhom awtorizzati għall-introduzzjoni fl-Unjoni Ewropea ta’ konsenji ta’ ħalib mhux ipproċessat, ta’ prodotti tal-ħalib, ta’ kolostru u ta’ prodotti li fihom il-kolostru u tindika t-tip ta’ trattament ta’ tisħin meħtieġ għal tali komoditajiet stabbiliti fl-Anness I tar-Regolament (UE) Nru 605/2010 (12), peress li r-Regolament ta’ Implimentazzjoni (UE) Nru 605/2010 tħassar u ġie sostitwit bir-Regolament ta’ Implimentazzjoni (UE) 2021/404. Għalhekk, jenħtieġ li l-Anness XVII tar-Regolament ta’ Implimentazzjoni (UE) 2021/404 jiġi emendat biex jinkludi l-Bożnija-Ħerzegovina.

(14)

L-Anness XVIII tar-Regolament ta’ Implimentazzjoni (UE) 2021/404 jistabbilixxi l-lista ta’ pajjiżi terzi, territorji jew żoni tagħhom li minnhom hu awtorizzat id-dħul fl-Unjoni ta’ prodotti tal-ħalib soġġetti għal trattament speċifiku għall-mitigazzjoni tar-riskju kontra l-marda tal-ilsien u d-dwiefer. Il-lista prevista fl-Anness XVIII tar-Regolament ta’ Implimentazzjoni (UE) 2021/404 jenħtieġ li tirrifletti l-lista fil-kolonna C tal-Anness I tar-Regolament (UE) Nru 605/2010, li kien japplika sal-20 ta’ April 2021. Il-Moldova ġiet inkluża fil-kolonna C tal-Anness I tar-Regolament ta’ Implimentazzjoni (UE) Nru 605/2010, kif emendat bir-Regolament ta’ Implimentazzjoni (UE) 2021/645 (13). Għalhekk jenħtieġ li l-Anness XVIII tar-Regolament ta’ Implimentazzjoni tal-Kummissjoni (UE) 2021/404 jiġi emendat biex il-Moldova tiġi inkluża.

(15)

L-Anness XXII jistabbilixxi l-lista ta’ pajjiżi terzi, territorji jew żoni tagħhom awtorizzati għat-tranżitu mill-Unjoni skont kundizzjonijiet speċifiċi. Sabiex jiġi evitat kull tfixkil bla bżonn fil-kummerċ, jenħtieġ li dawk il-kundizzjonijiet speċifiċi jirriflettu dawk previsti fir-regoli tal-Unjoni applikabbli qabel id-data tal-applikazzjoni tar-Regolament ta’ Implimentazzjoni (UE) 2021/404. Għalhekk jenħtieġ li l-Anness XXII tar-Regolament ta’ Implimentazzjoni (UE) 2021/404 jiġi emendat biex jiġu adattati ċerti kundizzjonijiet speċifiċi għat-tranżitu mill-Unjoni ta’ konsenji ta’ ċerti prodotti tal-laħam mill-Bożnija-Ħerzegovina.

(16)

Għalhekk, jenħtieġ li l-Annessi V, VI, XIV, XVI, XVII, XVIII u XXII tar-Regolament ta’ Implimentazzjoni (UE) 2021/404 jiġu emendati skont dan.

(17)

Billi r-Regolament ta’ Implimentazzjoni (UE) 2021/404 japplika mill-21 ta’ April 2021, fl-interess taċ-ċertezza legali, jenħtieġ li dan ir-Regolament jidħol fis-seħħ b’urġenza.

(18)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,