L_2011328MT.01004901.xml

li temenda d-Direttiva 1999/31/KE fir-rigward ta’ kriterji speċifiċi għall-ħżin ta’ merkurju metalliku meqjus bħala skart

Wara li kkunsidra r-Regolament (KE) Nru 1102/2008 tal-Parlament Ewropew u tal-Kunsill tat-22 ta’ Ottubru 2008 dwar il-projbizzjoni tal-merkurju metalliku u ta’ ċerti komposti u taħlitiet tal-merkurju u l-ħżin sikur tal-merkurju metalliku (1), u b’mod partikolari l-Artikolu 4 (3) tiegħu, kif ukoll id-Direttiva tal-Kunsill 1999/31/KE tas-26 ta’ April 1999 dwar ir-rimi ta’ skart f’terraferma (2), u b’mod partikolari l-Artikolu 16 tagħha,

L-Annessi I, II u III tad-Direttiva 1999/31/KE huma b’dan emendati kif stabbilit fl-Anness ta’ din id-Direttiva.

1. L-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa sabiex jikkonformaw ma’ din id-Direttiva sal-15 ta’ Marzu 2013. Huma għandhom jikkomunikaw minnufih it-test ta’ dawk id-dispożizzjonijiet lill-Kummissjoni.

Meta l-Istati Membri jadottaw dawk id-dispożizzjonijiet, dawn għandhom jinkludu referenza għal din id-Direttiva jew tali referenza għandha takkumpanjahom meta jiġu pubblikati uffiċjalment. Il-metodi kif issir tali referenza għandhom jiġu stabbiliti mill-Istati Membri.

2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li jadottaw fil-qasam kopert minn din id-Direttiva.

Din id-Direttiva għandha tidħol fis-seħħ fit-tielet jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.

ANNESS

L-Annessi I, II u III tad-Direttiva 1999/31/KE huma emendati kif ġej:

(1)

It-taqsima li ġejja għandha tiżdied mal-Anness I:

“8. Ħżin temporanju ta’ merkurju metalliku

Għall-finijiet ta’ ħżin temporanju ta’ merkurju metalliku għal aktar minn sena, għandhom japplikaw ir-rekwiżiti li ġejjin:

—	Il-merkurju metalliku għandu jiġi maħżun separatament minn skart ieħor;

—	Il-kontenituri għandhom jiġu maħżuna f’baċiri għall-ġbir miksija b’mod xieraq sabiex ma jkollhomx xquq u fetħiet, u li jkunu impermeabbli għall-merkurju metalliku b’volum xieraq li jkun jista’ jżomm il-kwantità ta’ merkurju maħżun;

—	Is-sit tal-ħżin għandu jiġi pprovdut permezz ta’ barrieri naturali jew mibnija apposta li jkunu xierqa biex l-ambjent jiġi protett minn emissjonijiet tal-merkurju u b’volum xieraq li jkun jista’ jżomm il-kwantità totali ta’ merkurju maħżun;

—	L-art tas-siti tal-ħżin għandha tkun koperta b’materjal li jissiġilla li huwa reżistenti għall-merkurju. Għandha tiġi pprovduta żerżieqa b’fossa għall-ġbir;

—	Is-sit tal-ħżin għandu jkun mgħammar b’sistema ta’ protezzjoni kontra n-nirien;

—	Il-ħżin għandu jsir b’tali mod li jiġi żgurat li l-kontenituri kollha jistgħu jiġu rkuprati faċilment.”;

(2)

It-taqsima li ġejja għandha tiżdied mal-Anness II:

“6. Rekwiżiti speċifiċi għall-merkurju metalliku

Għall-finijiet ta’ ħżin temporanju ta’ merkurju metalliku għal aktar minn sena, għandhom japplikaw ir-rekwiżiti li ġejjin:

Kompożizzjoni tal-merkurju

Il-merkurju metalliku għandu jkun konformi mal-ispeċifikazzjonijiet li ġejjin:

—	kontenut ta’ merkurju ogħla minn 99,9 % skont il-piż;

—	mingħajr impuritajiet li jistgħu jikkorrodu l-karbonju jew l-azzar li ma jissaddadx (eż. soluzzjoni ta’ aċidu nitriku, soluzzjonijiet ta’ mlieħ tal-klorur).

Żamma

Il-kontenituri li jintużaw għall-ħżin tal-merkurju metalliku għandhom ikunu reżistenti għall-korrużjoni u għandhom ikunu reżistenti għax-xokkijiet. Għalhekk, is-saldaturi għandhom jiġu evitati. B’mod partikolari, il-kontenituri għandhom ikunu konformi mal-ispeċifikazzjonijiet li ġejjin:

—	materjal tal-kontenitur: azzar bil-karbonju (minimu ASTM A36) jew azzar li ma jissaddadx (AISI 304, 316L);

—	il-kontenituri għandhom ikunu tat-tip li minnhom la joħorġu gassijiet u lanqas likwidi;

—	in-naħa ta’ barra tal-kontenitur għandha tkun reżistenti għall-kondizzjonijiet tal-ħżin;

—

it-tip tad-disinn tal-kontenitur għandu jgħaddi b’suċċess mit-test tat-twaqqigħ (drop test) u mit-test li jikkonferma nuqqas ta’ tnixxija (leakproofness test) kif deskritti fil-Kapitoli 6.1.5.3 u 6.1.5.4 tar-Rakkomandazzjonijiet tan-NU dwar it-Trasport ta’ Oġġetti Perikolużi, il-Manwal tat-Testijiet u l-Kriterji.

Il-proporzjon massimu tal-mili tal-kontenitur għandu jkun ta’ 80 % skont il-volum biex jiġi żgurat li jkun hemm spazju vojt biżżejjed biex la jkun hemm tnixxija u lanqas tgħawwiġ permanenti tal-kontenitur bħala riżultat tal-espansjoni tal-likwidu minħabba temperatura għolja.

Proċeduri ta’ aċċettazzjoni

Għandhom jiġu aċċettati biss kontenituri b’ċertifikat konformi mar-rekwiżiti mniżżlin f’din it-taqsima.

Il-proċeduri ta’ aċċettazzjoni għandhom ikunu konformi ma’ dan li ġej:

—	jiġi aċċettat biss merkurju metalliku li jissodisfa l-kriterji minimi ta’ aċċettazzjoni stabbiliti hawn fuq;

—	il-kontenituri għandhom jiġu spezzjonati viżwalment qabel il-ħżin. Kontenituri li jkollhom ħsara, li jnixxu jew li għandhom korrużjoni ma għandhomx jiġu aċċettati;

—	il-kontenituri għandu jkollhom fuqhom timbru li jservi għal ħafna żmien (magħmul b’sistema ta’ ppanċjar) li juri n-numru ta’ identifikazzjoni tal-kontenitur, il-materjal tal-kostruzzjoni, il-piż tiegħu vojt, ir-referenza tal-manifattur u d-data tal-kostruzzjoni;

—	il-kontenituri għandu jkollhom mwaħħla magħhom b’mod permanenti pjanċa li turi n-numru ta’ identifikazzjoni taċ-ċertifikat.

Ċertifikat

Iċ-ċertifikat indikat fis-subtaqsima C għandu jinkludi l-elementi li ġejjin:

—	l-isem u l-indirizz tal-produttur tal-iskart;

—	l-isem u l-indirizz tal-persuna responsabbli għall-mili;

—	il-post fejn seħħ il-mili, u d-data meta seħħ;

—	il-kwantità tal-merkurju;

—	il-purità tal-merkurju u, jekk rilevanti, deskrizzjoni tal-impuritajiet, inkluż ir-rapport analitiku;

—	konferma li l-kontenituri ntużaw esklussivament għat-trasport/il-ħżin tal-merkurju;

—	in-numri ta’ identifikazzjoni tal-kontenituri;

—	kwalunkwe kumment speċifiku.

Iċ-ċertifikati għandhom jinħarġu mill-produttur tal-iskart jew, fin-nuqqas ta’ dan, mill-persuna responsabbli għall-ġestjoni tiegħu.”

(3)

It-taqsima li ġejja għandha tiżdied mal-Anness III:

“6. Rekwiżiti speċifiċi għall-merkurju metalliku

Għall-finijiet ta’ ħżin temporanju ta’ merkurju metalliku għal aktar minn sena, għandhom japplikaw ir-rekwiżiti li ġejjin:

Rekwiżiti ta’ monitoraġġ, spezzjoni u emerġenza

Fis-sit tal-ħżin għandha tiġi installata sistema ta’ monitoraġġ kontinwu tal-fwar tal-merkurju b’sensittività ta’ mill-inqas 0,02 mg ta’ merkurju/m3. Is-sensuri għandhom jiġu ppożizzjonati fil-livell tal-art u fil-livell ta’ tul ta’ bniedem. Din għandha tinkludi sistema ta’ twissija viżwali u akustika. Darba fis-sena għandu jsir xogħol ta’ manutenzjoni fuq is-sistema.

Is-sit tal-ħżin u l-kontenituri għandhom jiġu spezzjonati viżwalment minn persuna awtorizzata, tal-inqas darba fix-xahar. Meta jiġu individwati tnixxijiet, l-operatur għandu minnufih jieħu kull azzjoni meħtieġa biex tiġi evitata kwalunkwe emissjoni ta’ merkurju fl-ambjent u biex terġa’ tiġi stabbilita s-sikurezza tal-ħżin tal-merkurju. Kwalunkwe tnixxija għandha titqies li għandha effetti ambjentali negattivi sinifikanti kif imsemmi fl-Artikolu 12(b).

Fis-sit għandu jkun hemm disponibbli pjani ta’ emerġenza u tagħmir protettiv adattat għall-ġestjoni tal-merkurju metalliku.

Żamma tar-reġistri

Id-dokumenti kollha li fihom l-informazzjoni msemmija fit-Taqsima 6 tal-Anness II u fil-punt A ta’ din it-Taqsima, inkluż iċ-ċertifikat li jkun hemm mal-kontenitur, kif ukoll reġistri rigward it-tneħħija mill-ħżin u l-kunsinna tal-merkurju metalliku wara l-ħżin temporanju tiegħu, u d-destinazzjoni u t-trattament maħsub għalih għandhom jinżammu għal mill-inqas tliet snin wara t-tmiem tal-ħżin.”.