Sentenza tal-Qorti tal-Ġustizzja (It-Tielet Awla) tat-22 ta’ Diċembru 2010 (talba għal deċiżjoni preliminari tal-Cour de cassation tal-Gran Dukat tal-Lussemburgu — il-Lussemburgu) — L-Istat tal-Gran Dukat tal-Lussemburgu, Administration de l’enregistrement et des domaines vs Pierre Feltgen (kuratur tal-proċedura ta’ falliment ta’ Bacino Charter Company SA), Bacino Charter Company SA

(Kawża C-116/10) (1)

(Sitt Direttiva tal-VAT - Eżenzjonijiet - Artikolu 15, punti 4(a) u 5 - Eżenzjoni tal-operazzjonijiet ta’ kiri ta’ vapuri - Portata)

2011/C 63/20

Lingwa tal-kawża: il-Franċiż

Qorti tar-rinviju

Cour de cassation tal-Gran Dukat tal-Lussemburgu

Partijiet fil-kawża prinċipali

Rikorrenti: L-Istat tal-Gran Dukat tal-Lussemburgu, Administration de l'enregistrement et des domaines

Konvenuti: Pierre Feltgen (kuratur tal-proċedura ta’ falliment ta’ Bacino Charter Company SA), Bacino Charter Company SA

Suġġett

Talba għal deċiżjoni preliminari — Cour de cassation tal-Gran Dukat tal-Lussemburgu — Interpretazzjoni tal-punti 4(a) u 5 tal-Artikolu 15 tas-Sitt Direttiva tal-Kunsill 77/388/KEE, tas-17 ta’ Mejju 1977, fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ — Sistema komuni ta’ taxxa fuq il-valur miżjud: bażi uniformi ta’ stima (ĠU Edizzjoni Speċjali bil-Malti, Kapitolu 9, Vol. 1, p. 23) — Eżenzjoni ta’ tranżazzjonijiet ta’ kiri ta’ bastimenti — Eżenzjoni suġġetta għall-kundizzjoni li tali bastimenti jintużaw għan-navigazzjoni fl-ibħra miftuħa u jiżguraw trasport bi ħlas ta’ vjaġġaturi jew l-eżerċizzju ta’ attività kummerċjali, industrijali jew ta’ sajd

Dispożittiv

Il-punt 5 tal-Artikolu 15 tas-Sitt Direttiva tal-Kunsill 77/388/KEE, tas-17 ta’ Mejju 1977, dwar l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ — Sistema komuni ta’ taxxa fuq il-valur miżjud: bażi uniformi ta’ stima, kif emendata bid-Direttiva tal-Kunsill 91/680/KE, tas-16 ta’ Diċembru 1991, għandha tiġi interpretata fis-sens li l-eżenzjoni mit-taxxa fuq il-valur miżjud prevista f’din id-dispożizzjoni ma tapplikax għal servizzi li jikkonsistu fit-tqegħid ta’ vapur, bi ħlas, flimkien ma’ ekwipaġġ, għad-dispożizzjoni ta’ individwi għall-finijiet ta’ vjaġġi ta’ divertiment f’ibħra miftuħa.

(1)  ĠU C 113, 01.05.2010.