IL-KUMMISSJONI EWROPEA
Brussell, 20.4.2016
COM(2016) 236 final
2016/0125(COD)
Proposta għal
REGOLAMENT TAL-PARLAMENT EWROPEW U TAL-KUNSILL
li jemenda r-Regolament tal-Kunsill (KE) Nru 539/2001 li jelenka l-pajjiżi terzi li ċ-ċittadini tagħhom għandu jkollhom viża fil-pussess tagħhom meta jaqsmu l-fruntieri esterni u dawk iċ-ċittadini li huma eżentati minn dik il-ħtieġa
(l-Ukrajna)
MEMORANDUM TA’ SPJEGAZZJONI
1.IL-KUNTEST TAL-PROPOSTA
•Ir-raġunijiet għall-proposta u l-għanijiet tagħha
Id-Djalogu ta' Liberalizzazzjoni tal-Viża UE-Ukrajna ġie varat f'Ottubru 2008. F'Novembru 2010, il-Kummissjoni Ewropea ppreżentat pjan ta’ azzjoni dwar il-liberalizzazzjoni tal-viża (PALV) lill-Gvern Ukren. Il-Kummissjoni kkommettiet ruħha li tipproponi vjaġġar mingħajr viża għal soġġorni qosra fl-Unjoni Ewropea għal ċittadini Ukreni li jkollhom passaporti bijometriċi, hekk kif il-punti referenzjarji kollha stipulati fil-PALV jintlaħqu mill-Gvern Ukren.
Minn qabel il-bidu tad-Djalogu ta' Liberalizzazzjoni tal-Viża, l-UE u l-Ukrajna kienu kkonkludew b'mod parallel Ftehim ta' Faċilitazzjoni tal-Viża u Ftehim ta' Riammissjoni, li daħlu fis-seħħ fl-1 ta' Jannar 2008. Il-Ftehim ta' Faċilitazzjoni tal-Viża emendat daħal fis-seħħ fl-1 ta’ Lulju 2013. L-implimentazzjoni sħiħa u effettiva ta' dawk il-ftehimiet kienet prerekwiżit għat-tnedija tad-djalogu dwar il-viża u kundizzjoni għat-tkomplija tiegħu.
Il-PALV huwa mibni fuq erba’ "blokok": sigurtà tad-dokumenti, inklużi l-bijometriċi (blokka I), migrazzjoni u ġestjoni integrata tal-fruntieri, inkluż l-ażil (blokka II), ordni u sigurtà pubblika (blokka III), u relazzjonijiet esterni u drittijiet fundamentali (blokka IV). Il-PALV jistipula sensiela ta’ punti referenzjarji preċiżi għal kull wieħed minn dawn l-erba’ “blokok” ta’ kwistjonijiet teknikament rilevanti, bil-għan li jiġi adottat qafas leġiżlattiv, politiku u istituzzjonali (fażi 1) u li tiġi żgurata l-implimentazzjoni effettiva u sostenibbli tiegħu (fażi 2).
Sa mit-tnedija tad-Djalogu dwar il-Liberalizzazzjoni tal-Viżi bejn l-UE u l-Ukrajna, il-Kummissjoni rrapportat regolarment lill-Parlament Ewropew u l-Kunsill dwar il-progress li għamlet l-Ukrajna biex tissodisfa l-punti referenzjarji identifikati fl-erba' blokok skont l-ewwel u tat-tieni fażi tal-PALV. Il-progress li sar ġie vvalutat abbażi ta' evalwazzjonijiet fuq il-post minn esperti minn Stati Membri madwar l-UE u informazzjoni dettaljata li pprovdiet l-Ukrajna.
Fis-16 ta’ Settembru 2011 il-Kummissjoni adottat l-ewwel rapport ta’ progress tagħha 1 dwar l-implimentazzjoni tal-PALV mill-Ukrajna u għamlet bosta rakkomandazzjonijiet għat-tlestija tal-ewwel fażi (aspett leġiżlattiv u ppjanar). Il-Kummissjoni ppubblikat it-tieni rapport ta’ progress 2 tagħha fid-9 ta’ Frar 2012, u t-tielet wieħed 3 fil-15 ta’ Novembru 2013. Wara r-raba’ rapport 4 tal-Kummissjoni fis-27 ta’ Mejju 2014 u l-approvazzjoni tiegħu mill-Kunsill fit-23 ta’ Ġunju 2014, l-Ukrajna uffiċjalment daħlet fit-tieni fażi tal-PALV li matula saret valutazzjoni rigward l-implimentazzjoni sostenibbli tal-qafas leġiżlattiv u ta’ politika.
Il-Kummissjoni ppubblikat il-ħames rapport ta’ progress 5 dwar l-implimentazzjoni tal-PALV mill-Ukrajna fit-8 ta’ Mejju 2015. Ir-rapport jgħid li l-progress miksub mill-awtoritajiet Ukreni fl-implimentazzjoni tat-tieni fażi tal-PALV mill-Ukrajna kien notevoli. Skont il-metodoloġija spjegata fil-PALV, il-Kummissjoni organizzat evalwazzjonijiet fuq il-post bl-involviment ta’ esperti mill-Istati Membri tal-UE. Ir-rapport kien akkumpanjat minn valutazzjoni tal-impatti migratorji u tas-sigurtà ta' liberalizzazzjoni tal-viża futura għaċ-ċittadini Ukreni li jkunu qed jivvjaġġaw lejn l-UE.
Fis-sitt u l-aħħar rapport ta’ progress 6 , li ġie adottat fit-18 ta’ Diċembru 2015, il-Kummissjoni qieset li l-Ukrajna għamlet il-progress meħtieġ u wettqet ir-riformi meħtieġa kollha biex tiżgura l-kisba effettiva u sostenibbli tal-punti referenzjali li fadal.
Abbażi ta' din il-valutazzjoni u sforz l-eżitu tal-monitoraġġ u rapportar kontinwi li kien hemm mit-tnedija tad-Djalogu tal-Liberalizzazzjoni tal-Viża UE-Ukrajna, il-Kummissjoni kkonfermat li l-Ukrajna laħqet il-punti referenzjarji kollha għal kull waħda mill-erba' blokok tat-tieni fażi tal-PALV u li fil-bidu tal-2016 se tippreżenta proposta leġiżlattiva sabiex temenda r-Regolament (KE) Nru 539/2001, li tittrasferixxi l-Ukrajna għal-lista ta' pajjiżi mingħajr viża (Anness II).
Barra minn hekk, sa mill-adozzjoni tas-sitt rapport, il-Kummissjoni ħadet nota tal-progress li sar mill-awtoritajiet Ukreni sabiex jimplimentaw ir-riformi meħtieġa skont il-PALV. L-Uffiċċju Nazzjonali Kontra l-Korruzzjoni huwa operazzjonali u beda jaħdem flimkien mal-prosekuzzjoni speċjalizzata kontra l-korruzzjoni. Wara l-adozzjoni b'suċċess tal-liġijiet ta' rkupru tal-assi u l-emendi fil-Liġi dwar l-Uffiċċju tal-Prosekuzzjoni fir-rigward tal-Uffiċċju tal-Prosekutur Speċjalizzat Kontra l-Korruzzjoni (18 ta' Frar 2016), kif ukoll tal-Liġi dwar dikjarazzjonijiet elettroniċi ta' assi (15 ta' Marzu 2016), ġie nnotat progress ulterjuri f'nofs Marzu 2016 bl-appuntament ta' żewġ membri oħra għall-Bord tal-Aġenzija Nazzjonali għall-Prevenzjoni tal-Korruzzjoni, biex b'hekk il-Bord jista' jilħaq il-kworum. Fit-28 ta' Marzu il-Kap tal-Aġenzija ġie elett u fit-30 ta' Marzu l-Aġenzija ġiet reġistrata bħala entità legali. L-awtoritajiet Ukreni fil-Baġit tal-Istat għall-2016 allokaw ukoll riżorsi finanzjarji sabiex jassiguraw qafas istituzzjonali jiffunzjona sew għal kontra l-korruzzjoni, inkluż l-Uffiċċju Nazzjonali Kontra l-Korruzzjoni.
Minbarra r-rapportar dwar il-PALV, il-Kummissjoni ssorveljat kontinwament l-implimentazzjoni tal-Ftehimiet ta' Faċilitazzjoni tal-Viża u ta' Riammissjoni, b’mod partikolari permezz tal-Kumitati Konġunti stabbiliti skont dawn il-ftehimiet. Sal-lum il-Kumitat għall-Faċilitazzjoni Konġunta tal-Viża ltaqa' l-aħħar fit-23 ta' April 2015, u l-Kumitat għar-Riammissjoni Konġunta ltaqa' l-aħħar fis-6 ta' Mejju 2014. F’dan il-kuntest, il-Kummissjoni nnutat li l-implimentazzjoni tal-ftehimiet kienet globalment sodisfaċenti ħafna.
•Il-konsistenza ma’ dispożizzjonijiet ta’ politika eżistenti fil-qasam tal-politika u politiki oħra tal-Unjoni
Ir-Regolament tal-Kunsill (KE) Nru 539/2001 7 jelenka l-pajjiżi terzi li ċ-ċittadini tagħhom għandu jkollhom viża fil-pussess tagħhom meta jaqsmu l-fruntieri esterni tal-Istati Membri u dawk li ċ-ċittadini tagħhom huma eżentati minn dik il-ħtieġa. Ir-Regolament (KE) Nru 539/2001 huwa applikat mill-Istati Membri kollha, bl-eċċezzjoni tal-Irlanda u tar-Renju Unit – u wkoll mill-Iżlanda, mill-Liechtenstein, min-Norveġja u mill-Iżvizzera. Dan ir-Regolament huwa parti mill-politika komuni tal-viża tal-UE għal soġġorni qosra ta' 90 jum fi kwalunkwe perjodu ta' 180 jum.
Bħalissa l-Ukrajna hija elenkata fl-Anness I għar-Regolament (KE) Nru 539/2001, jiġifieri fost dawk il-pajjiżi li ċ-ċittadini tagħhom huma meħtieġa li jkollhom viża meta jivvjaġġaw lejn it-territorju tal-Istati Membri tal-UE.
Ir-Regolament (KE) Nru 539/2001 kien emendat l-aħħar mir-Regolament (UE) Nru 259/2014 8 meta l-Moldova ġiet trasferita għal-lista ta' mingħajr viża wara li implimentat b'suċċess il-PALV tagħha; u mir-Regolament (UE) Nru 509/2014 9 meta ħames pajjiżi tal-Karibew 10 u ħdax-il pajjiż tal-Paċifiku 11 , kif ukoll il-Kolumbja, il-Perù u l-Emirati Għarab Magħquda ġew eżenti mill-ħtieġa tal-viża – soġġetti għall-konklużjoni tal-ftehimiet ta' eżenzjoni mill-viża bejn l-UE u l-pajjiżi terzi rispettivi – wara rieżami perjodiku tal-listi tal-viża.
Il-kriterji li għandhom jitqiesu meta jkunu qed jiġu ddeterminati, abbażi ta' valutazzjoni każ b'każ, il-pajjiżi terzi li ċ-ċittadini tagħhom huma soġġetti, jew eżenti, mill-ħtieġa tal-viża huma stipulati fl-Artikolu -1 tar-Regolament (KE) Nru 539/2001 (kif introdott mir-Regolament (UE) Nru 509/2014). Jinkludu "l-immigrazzjoni irregolari, il-politika pubblika u s-sigurtà, il-benefiċċji ekonomiċi, partikolarment f’termini ta’ turiżmu u ta’ kummerċ barrani u r-relazzjonijiet esterni tal-Unjoni mal-pajjiżi terzi rilevanti, inklużi, partikolarment, konsiderazzjonijiet dwar id-drittijiet tal-bniedem u l-libertajiet fundamentali, kif ukoll l-implikazzjonijiet ta’ koerenza u reċiproċità reġjonali" 12 . Għandha tingħata attenzjoni partikolari lis-sigurtà ta’ dokumenti tal-ivvjaġġar maħruġin mill-pajjiżi terzi kkonċernati.
M’hemm l-ebda raġuni għala tiġi kkundizzjonata l-implimentazzjoni tal-eżenzjoni tal-viża għal ċittadini Ukreni dwar il-konklużjoni ta’ ftehim ta’ eżenzjoni mill-viża mal-UE, peress li l-Ukrajna diġà eżentat liċ-ċittadini kollha tal-UE mir-rekwiżit tal-viża għal soġġorni ta’ inqas minn sena. Jekk din id-deċiżjoni tiġi rrevokata jew jekk is-sistema ta' vjaġġar mingħajr viża tiġi abbużata, il-mekkaniżmi eżistenti ta’ reċiproċità u sospensjoni tar-Regolament (KE) Nru 539/2001 għandhom ikunu rimedji suffiċjenti.
2.IL-BAŻI ĠURIDIKA, IS-SUSSIDJARJETÀ U L-PROPORZJONALITÀ
•Il-bażi legali
Peress li l-proposta se temenda il-politika komuni dwar il-viża tal-UE, il-bażi ġuridika għal din il-proposta hija l-punt (a) tal-Artikolu 77(2) tat-Trattat dwar il-Funzjonament tal-Unjoni Ewropea (TFUE). Ir-regolament propost jikkostitwixxi żvilupp tal-acquis ta’ Schengen.
•Sussidjarjetà
Billi r-Regolament (KE) Nru 539/2001 huwa att legali tal-Unjoni, jista’ biss jiġi emendat permezz ta’ att legali ekwivalenti. L-Istati Membri ma jistgħux jaġixxu individwalment.
•Proporzjonalità
Ara aktar’ il fuq – ebda għażla oħra biex jintlaħaq l-objettiv tal-politika mhi disponibbli.
•L-għażla tal-istrument
Ara aktar ’il fuq.
3.IR-RIŻULTATI TAL-EVALWAZZJONIJIET EX POST, TAL-KONSULTAZZJONIJIET MAL-PARTIJIET KONĊERNATI U TAL-VALUTAZZJONIJIET TAL-IMPATT
•Evalwazzjonijiet ex post/kontrolli tal-idoneità tal-leġiżlazzjoni eżistenti
mhux applikabbli
•Il-konsultazzjonijiet mal-partijiet konċernati
Kien hemm diskussjonijiet regolari mal-Istati Membri fil-Grupp ta’ Ħidma tal-Kunsill dwar l-Ewropa tal-Lvant u l-Asja Ċentrali (COEST) u diversi preżentazzjonijiet tal-proċess tal-liberalizzazzjoni tal-viża lill-Parlament Ewropew.
•Il-ġbir u l-użu tal-għarfien espert
Il-Kummissjoni ġabret dejta komprensiva dwar l-implimentazzjoni mill-Ukrajna tal-punti referenzjarji tal-PALV kollha. Ir-rapport finali tagħha dwar l-Ukrajna huwa akkumpanjat minn Dokument ta' Ħidma tal-Persunal tal-Kummissjoni 13 li pprovda informazzjoni ġenerali iktar dettaljata dwar l-iżviluppi f'kull punt referenzjali.
•Valutazzjoni tal-impatt
Fl-anness mad-Dokument ta' Ħidma tal-Persunal, il-Kummissjoni pprovdiet analiżi fattwali aġġornata u informazzjoni bbażata fuq l-istatistika dwar l-impatti migratorji u ta' sigurtà possibbli tal-liberalizzazzjoni tal-viża għaċ-ċittadini Ukreni li jkunu qed jivvjaġġaw lejn l-UE, abbażi tal-informazzjoni mogħtija mill-aġenziji u l-partijiet ikkonċernati tal-UE. Mhemmx bżonn ta' valutazzjoni tal-impatt oħra.
•L-idoneità regolatorja u s-simplifikazzjoni
mhux applikabbli
•Drittijiet fondamentali
Il-proposta ma għandhiex konsegwenzi negattivi għall-ħarsien tad-drittijiet fundamentali.
4.L-IMPLIKAZZJONIJIET BAĠITARJI
mhux applikabbli
5.ASPETTI OĦRA
•Il-pjanijiet għall-implimentazzjoni u l-arranġamenti ta’ monitoraġġ, ta’ evalwazzjoni u ta’ rappurtar
Ir-Regolament emendat se jkun applikabbli direttament mid-dħul fis-seħħ tiegħu u se jiġi implimentat immedjatament mill-Istati Membri. Ebda pjan ta’ implimentazzjoni mhuwa neċessarju.
Il-Kummissjoni se tkompli timmonitorizza attivament l-implimentazzjoni kontinwa tal-Ukrajna tal-punti referenzjarji kollha skont l-erba' blokok tal-PALV permezz tal-istrutturi u d-djalogi ta' assoċjazzjoni eżistenti u, jekk ikun meħtieġ, permezz ta' mekkaniżmi ta' segwitu ad hoc.
•Id-dokumenti ta’ spjega (għad-direttivi)
mhux applikabbli
•Spjegazzjoni dettaljata tad-dispożizzjonijiet speċifiċi tal-proposta
Ir-Regolament (KE) Nru 539/2001 se jiġi emendat, sabiex l-Ukrajna tiġi trasferita mill-Anness I (lista ta’ pajjiżi fejn il-viża hija meħtieġa) għall-Anness II (lista ta’ pajjiżi mingħajr viża). Nota f'qiegħ il-paġna se tkun miżjuda li l-eżenzjoni tal-viża ser tkun limitata għad-detenturi ta’ passaporti bijometriċi maħruġa f’konformità mal-istandards tal-Organizzazzjoni Internazzjonali tal-Avjazzjoni Ċivili (ICAO).”.
2016/0125 (COD)
Proposta għal
REGOLAMENT TAL-PARLAMENT EWROPEW U TAL-KUNSILL
li jemenda r-Regolament tal-Kunsill (KE) Nru 539/2001 li jelenka l-pajjiżi terzi li ċ-ċittadini tagħhom għandu jkollhom viża fil-pussess tagħhom meta jaqsmu l-fruntieri esterni u dawk iċ-ċittadini li huma eżentati minn dik il-ħtieġa
(l-Ukrajna)
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b’mod partikolari l-punt (a) tal-Artikolu 77(2) tiegħu,
Wara li kkunsidraw il-proposta mill-Kummissjoni Ewropea,
Wara li l-abbozz tal-att leġislattiv intbagħat lill-parlamenti nazzjonali,
Filwaqt li jaġixxu skont il-proċedura leġiżlattiva ordinarja,
Billi:
(1)Ir-Regolament tal-Kunsill (KE) Nru 539/2001 14 jelenka l-pajjiżi terzi li ċ-ċittadini tagħhom għandu jkollhom viża fil-pussess tagħhom meta jaqsmu l-fruntieri esterni tal-Istati Membri u dawk li ċ-ċittadini tagħhom huma eżentati minn dik il-ħtieġa. Il-kompożizzjoni tal-listi ta’ pajjiżi terzi fl-Annessi I u II għandha tkun, u għandha tibqa’, konsistenti mal-kriterji stipulati fih. Ir-referenzi għal pajjiżi terzi li fir-rigward tagħhom inbidlet is-sitwazzjoni fir-rigward ta’ dawn il-kriterji, għandhom ikunu trasferiti minn anness għall-ieħor, kif xieraq.
(2)Huwa meqjus li l-Ukrajna laħqet il-punti referenzjarji kollha stipulati fil-Pjan ta' Azzjoni għal-Liberalizzazzjoni tal-Viża ppreżentat lill-Gvern tal-Ukrajna f'Novembru 2010, u għaldaqstant tissodisfa l-kriterji sabiex iċ-ċittadini tagħha jkunu eżenti mill-ħtieġa għall-viża meta jivvjaġġaw fit-territorji tal-Istati Membri tal-UE.
(3)Għaldaqstant l-Ukrajna għandha tiġi trasferita mill-Anness I tar-Regolament (KE) Nru 539/2001 għall-Anness II tiegħu. Din l-eżenzjoni tal-viża għandha tapplika biss għad-detenturi ta’ passaporti bijometriċi maħruġa f’konformità mal-istandards tal-Organizzazzjoni Internazzjonali tal-Avjazzjoni Ċivili (ICAO).”.
(4)Dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen li fihom ir-Renju Unit ma jipparteċipax, skont id-Deċiżjoni tal-Kunsill 2000/365/KE 15 . Għaldaqstant ir-Renju Unit mhuwiex qiegħed jieħu sehem fl-adozzjoni ta’ dan ir-Regolament u mhuwiex marbut bih jew soġġett għall-applikazzjoni tiegħu.
(5)Dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen li fihom l-Irlanda ma tipparteċipax, skont id-Deċiżjoni tal-Kunsill 2002/192/KE 16 . Għaldaqstant l-Irlanda mhix qegħda tieħu sehem fl-adozzjoni ta’ dan ir-Regolament u mhijiex marbuta bih jew soġġetta għall-applikazzjoni tiegħu.
(6)Fir-rigward tal-Iżlanda u n-Norveġja, dan ir-Regolament jikkostitwixxi żvilupp tad-dispożizzjonijiet tal-acquis ta' Schengen skont it-tifsira tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta' dawn iż-żewġ Stati mal-implimentazzjoni, l-applikazzjoni u l-iżvilupp tal-acquis ta' Schengen, li jaqgħu fl-ambitu msemmi fil-Punt B tal-Artikolu 1 tad-Deċiżjoni tal-Kunsill 1999/437/KE 17 .
(7)Fir-rigward tal-Iżvizzera, dan ir-Regolament jikkostitwixxi żvilupp tad-dispożizzjonijiet tal-acquis ta' Schengen fis-sens tal-Ftehim bejn l-Unjoni Ewropea, il-Komunità Ewropea, u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta' Schengen li jaqgħu fl-ambitu msemmi fil-punt B tal-Artikolu 1, tad-Deċiżjoni 1999/437/KE li jinqraw flimkien mal-Artikolu 3 tad-Deċiżjoni tal-Kunsill 2008/146/KE 18 .
(8)Fir-rigward ta’ Liechtenstein, dan ir-Regolament jikkostitwixxi żvilupp tad-dispożizzjonijiet tal-acquis ta’ Schengen fit-tifsira tal-Protokoll ffirmat bejn l-Unjoni Ewropea, il-Komunità Ewropea, il-Konfederazzjoni Svizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein għall-Ftehim bejn l-Unjoni Ewropea, il-Komunità Ewropea u l-Konfederazzjoni Svizzera dwar l-assoċjazzjoni tal-Konfederazzjoni Svizzera mal-implimentazzjoni, l-applikazzjoni u l-iżvilupp tal-acquis ta' Schengen, li jaqa’ fil-qasam imsemmi fil-punt B tal-Artikolu 1 tad-Deċiżjoni 1999/437/KE li jinqraw flimkien mal-Artikolu 3 tad-Deċiżjoni tal-Kunsill 2011/350/UE 19 .
ADOTTAW DAN IR-REGOLAMENT:
Artikolu 1
Ir-Regolament (KE) Nru 539/2001 huwa emendat kif ġej:
(a)fl-Anness I, Parti 1 ("STATI"), ir-referenza għall-Ukrajna titħassar.
(b)fl-Anness II, Parti 1 ("STATI"), tiddaħħal ir-referenza li ġejja:
(l-Ukrajna)
______________
* L-eżenzjoni tal-viża hija limitata għad-detenturi ta’ passaporti bijometriċi maħruġa f’konformità mal-istandards tal-Organizzazzjoni Internazzjonali tal-Avjazzjoni Ċivili (ICAO).
Artikolu 2
Dan ir-Regolament jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament jorbot fl-intier tiegħu u jkun direttament applikabbli fl-Istati Membri skont it-Trattati.
Magħmul fi Brussell,
Għall-Parlament Ewropew Għall-Kunsill
Il-President Il-President