(1)

L-attivitajiet kriminali transnazzjonali jikkostitwixxu theddida sinifikanti għas-sigurtà interna tal-Unjoni u jitolbu rispons ikkoordinat, immirat u adattat. Filwaqt li l-awtoritajiet nazzjonali li joperaw fil-prattika jinsabu fuq quddiem nett fil-ġlieda kontra l-kriminalità u t-terroriżmu, l-azzjoni fil-livell tal-Unjoni hija kruċjali biex tiġi żgurata kooperazzjoni effiċjenti u effettiva fir-rigward tal-iskambju ta’ informazzjoni. Barra minn hekk, il-kriminalità organizzata u t-terroriżmu, b’mod partikolari, huma emblematiċi tar-rabta bejn is-sigurtà interna u esterna. L-attivitajiet kriminali transnazzjonali huma mifruxa bejn il-fruntieri u jimmanifestaw rwieħhom fi gruppi kriminali organizzati u terroristiċi li jinvolvu ruħhom f’firxa wiesgħa ta’ attivitajiet kriminali dejjem aktar dinamiċi u kumplessi. Għalhekk, hemm bżonn ta’ qafas legali mtejjeb biex jiġi żgurat li l-awtoritajiet kompetenti tal-infurzar tal-liġi jkunu jistgħu jipprevjenu, jindividwaw u jinvestigaw reati kriminali b’mod aktar effiċjenti.

(2)

Għall-iżvilupp ta’ spazju ta’ libertà, sigurtà u ġustizzja, ikkaratterizzat min-nuqqas ta’ kontrolli fil-fruntieri interni, huwa essenzjali li l-awtoritajiet kompetenti tal-infurzar tal-liġi fi Stat Membru wieħed ikollhom, fil-qafas tal-liġi tal-Unjoni u tal-liġi nazzjonali applikabbli, il-possibbiltà li jiksbu aċċess ekwivalenti għall-informazzjoni disponibbli għall-kollegi tagħhom fi Stat Membru ieħor. F’dak ir-rigward, l-awtoritajiet kompetenti tal-infurzar tal-liġi jenħtieġ li jikkooperaw b’mod effettiv u madwar l-Unjoni. Għalhekk, il-kooperazzjoni tal-pulizija dwar l-iskambju ta’ informazzjoni rilevanti għall-fini tal-prevenzjoni, l-individwazzjoni jew l-investigazzjoni ta’ reati kriminali hija komponent essenzjali tal-miżuri li jirfdu s-sigurtà pubblika f’żona interdipendenti mingħajr kontrolli fil-fruntieri interni. L-iskambju ta’ informazzjoni dwar il-kriminalità u l-attivitajiet kriminali, inkluż it-terroriżmu, iservi l-objettiv ġenerali li tiġi protetta s-sigurtà ta’ persuni fiżiċi u li jiġu ssalvagwardjati l-interessi importanti ta’ persuni ġuridiċi protetti mil-liġi.

(3)

Il-maġġoranza tal-gruppi tal-kriminalità organizzata huma preżenti f’aktar minn tliet pajjiżi u huma magħmula minn membri b’nazzjonalitajiet multipli li jinvolvu ruħhom f’diversi attivitajiet kriminali. L-istruttura ta’ gruppi kriminali organizzati hija dejjem aktar sofistikata, b’sistemi ta’ komunikazzjoni u kooperazzjoni b’saħħithom u effiċjenti bejn il-membri tagħhom bejn il-fruntieri.

(4)

Biex il-kriminalità transfruntiera tiġi miġġielda b’mod effettiv, huwa ta’ importanza kbira li l-awtoritajiet kompetenti tal-infurzar tal-liġi jiskambjaw malajr l-informazzjoni u jikkooperaw b’mod operattiv ma’ xulxin. Minkejja li l-kooperazzjoni transfruntiera bejn l-awtoritajiet kompetenti tal-infurzar tal-liġi tjiebet f’dawn l-aħħar snin, għadhom jeżistu ostakli prattiċi u legali. F’dak ir-rigward, ir-Rakkomandazzjoni tal-Kunsill (UE) 2022/915 (2) se tassisti lill-Istati Membri biex ikomplu jtejbu l-kooperazzjoni operazzjonali transfruntiera.

(5)

Xi Stati Membri żviluppaw proġetti pilota biex isaħħu l-kooperazzjoni transfruntiera, li jiffukaw, pereżempju, fuq viġilanzi konġunti minn uffiċjali tal-pulizija minn Stati Membri ġirien fir-reġjuni tal-fruntiera. Għadd ta’ Stati Membri kkonkludew ukoll ftehimiet bilaterali jew saħansitra multilaterali biex isaħħu l-kooperazzjoni transfruntiera, inkluż l-iskambju ta’ informazzjoni. Din id-Direttiva ma tillimitax tali possibbiltajiet, dment li r-regoli dwar l-iskambju ta’ informazzjoni stabbiliti f’tali ftehimiet ikunu kompatibbli ma’ din id-Direttiva meta tapplika. Għall-kuntrarju, l-Istati Membri huma mħeġġa jagħmlu skambju tal-aħjar prattika u t-tagħlimiet meħuda minn tali proġetti pilota u ftehimiet u jagħmlu użu mill-fondi disponibbli tal-Unjoni f’dak ir-rigward, b’mod partikolari mill-Fond għas-Sigurtà Interna, stabbilit mir-Regolament (UE) 2021/1149 tal-Parlament Ewropew u tal-Kunsill (3).

(6)

L-iskambju ta’ informazzjoni bejn l-Istati Membri għall-fini tal-prevenzjoni u l-individwazzjoni ta’ reati kriminali huwa regolat mill-Konvenzjoni li timplimenta l-Ftehim ta’ Schengen tal-14 ta’ Ġunju 1985 (4), adottata fid-19 ta’ Ġunju 1990, b’mod partikolari l-Artikoli 39 u 46 tagħha. Id-Deċiżjoni Kwadru tal-Kunsill 2006/960/ĠAI (5) issostitwiet parzjalment dawk id-dispożizzjonijiet u introduċiet regoli ġodda għall-iskambju ta’ informazzjoni u intelligence bejn l-awtoritajiet kompetenti tal-infurzar tal-liġi.

(7)

L-evalwazzjonijiet, inklużi dawk imwettqa skont ir-Regolament tal-Kunsill (UE) Nru 1053/2013 (6), indikaw li d-Deċiżjoni Kwadru 2006/960/ĠAI ma hijiex ċara biżżejjed u ma tiżgurax l-iskambju adegwat u rapidu ta’ informazzjoni rilevanti bejn l-Istati Membri. L-evalwazzjonijiet indikaw ukoll li dik id-Deċiżjoni Kwadru ftit li xejn tintuża fil-prattika, parzjalment minħabba n-nuqqas ta’ ċarezza ffaċċjata fil-prattika bejn il-kamp ta’ applikazzjoni tal-Konvenzjoni li timplimenta l-Ftehim ta’ Schengen u l-kamp ta’ applikazzjoni tad-Deċiżjoni Kwadru.

(8)

Għalhekk, il-qafas legali eżistenti jenħtieġ li jiġi aġġornat bil-għan li jiġu eliminati d-diskrepanzi u li jiġu stabbiliti regoli ċari u armonizzati biex jiġi ffaċilitat u żgurat l-iskambju adegwat u rapidu ta’ informazzjoni bejn l-awtoritajiet kompetenti tal-infurzar tal-liġi ta’ Stati Membri differenti u biex l-awtoritajiet kompetenti tal-infurzar tal-liġi jitħallew jadattaw għas-sitwazzjoni ta’ kriminalità organizzata li qed tinbidel u tespandi b’ħeffa, inkluż fil-kuntest tal-globalizzazzjoni u d-diġitalizzazzjoni tas-soċjetà.

(9)

B’mod partikolari, din id-Direttiva jenħtieġ li tkopri l-iskambju ta’ informazzjoni għall-fini tal-prevenzjoni, l-individwazzjoni jew l-investigazzjoni ta’ reati kriminali, u b’hekk tissostitwixxi bis-sħiħ, sa fejn ikunu kkonċernati tali skambji, l-Artikoli 39 u 46 tal-Konvenzjoni li timplimenta l-Ftehim ta’ Schengen u tipprovdi ċ-ċertezza legali meħtieġa. Barra minn hekk, jenħtieġ li r-regoli rilevanti jiġu ssimplifikati u ċċarati, sabiex tiġi ffaċilitata l-applikazzjoni effettiva tagħhom fil-prattika.

(10)

Jeħtieġ li jiġu stabbiliti regoli armonizzati li jirregolaw l-aspetti trażversali ta’ tali skambju ta’ informazzjoni bejn l-Istati Membri skont din id-Direttiva fi stadji differenti ta’ investigazzjoni, mill-fażi ta’ ġbir ta’ intelligence dwar reati kriminali għall-fażi ta’ investigazzjoni kriminali. Dawk ir-regoli jenħtieġ li jinkludi l-iskambju ta’ informazzjoni permezz taċ-Ċentri ta’ Kooperazzjoni tal-Pulizija u tad-Dwana stabbiliti bejn żewġ Stati Membri jew aktar abbażi ta’ arranġamenti bilaterali jew multilaterali għall-fini tal-prevenzjoni, l-individwazzjoni jew l-investigazzjoni ta’ reati kriminali. Madankollu, jenħtieġ li dawk ir-regoli ma jinkludux l-iskambju bilaterali ta’ informazzjoni ma’ pajjiżi terzi. Jenħtieġ li r-regoli stabbiliti f’din id-Direttiva ma jaffettwawx l-applikazzjoni tar-regoli tal-liġi tal-Unjoni dwar sistemi jew oqfsa speċifiċi għal tali skambji, bħal ma huma r-Regolamenti (UE) 2016/794 (7), (UE) 2018/1860 (8), (UE) 2018/1861 (9) u (UE) 2018/1862 (10) tal-Parlament Ewropew u tal-Kunsill, id-Direttivi (UE) 2016/681 (11) u (UE) 2019/1153 (12) tal-Parlament Ewropew u tal-Kunsill, u d-Deċiżjonijiet tal-Kunsill 2008/615/ĠAI (13) u 2008/616/ĠAI (14).

(11)

‘Reat kriminali’ huwa kunċett awtonomu tal-liġi tal-Unjoni kif interpretat mill-Qorti tal-Ġustizzja tal-Unjoni Ewropea. Għall-finijiet ta’ din id-Direttiva, fl-interess tal-ġlieda effettiva kontra l-kriminalità, “reat kriminali” jenħtieġ li jinftiehem bħala li jirreferi għal kwalunkwe mġiba punibbli skont il-liġi kriminali tal-Istat Membru li jirċievi informazzjoni, jew skont talba jew skont għoti ta’ informazzjoni fuq inizjattiva proprja f’konformità ma’ din id-Direttiva, irrispettivament mill-piena li tista’ tiġi imposta f’dak l-Istat Membru u irrispettivament minn jekk l-imġiba hijiex punibbli wkoll skont il-liġi kriminali tal-Istat Membru li jipprovdi informazzjoni, mingħajr preġudizzju għar-raġunijiet għar-rifjut ta’ talbiet għal informazzjoni stabbiliti f’din id-Direttiva.

(12)

Din id-Direttiva hija mingħajr preġudizzju għall-Konvenzjoni mfassla abbażi tal-Artikolu K.3 tat-Trattat dwar l-Unjoni Ewropea, dwar l-assistenza reċiproka u l-kooperazzjoni bejn l-amministrazzjonijiet doganali (15) (Napli II).

(13)

Peress li din id-Direttiva ma tapplikax għall-ipproċessar ta’ informazzjoni matul attività li taqa’ barra mill-kamp ta’ applikazzjoni tal-liġi tal-Unjoni, attivitajiet li jikkonċernaw is-sigurtà nazzjonali ma jaqgħux fil-kamp ta’ applikazzjoni ta’ din id-Direttiva.

(14)

Din id-Direttiva ma tirregolax l-għoti u l-użu ta’ informazzjoni bħala evidenza fi proċedimenti ġudizzjarji. B’mod partikolari, hija ma għandhiex tinftiehem bħala li tistabbilixxi dritt għall-użu tal-informazzjoni pprovduta f’konformità ma’ din id-Direttiva bħala evidenza u, konsegwentement, ma taffettwa l-ebda rekwiżit previst fil-liġi applikabbli biex jinkiseb il-kunsens tal-Istat Membru li jipprovdi l-informazzjoni għal tali użu. Din id-Direttiva ma taffettwax l-atti legali tal-Unjoni dwar l-evidenza, bħal Regolament tal-Parlament Ewropew u tal-Kunsill dwar l-Ordnijiet Ewropej ta’ Produzzjoni u Preservazzjoni għall-evidenza elettronika fi proċedimenti kriminali u għall-eżekuzzjoni ta’ sentenzi ta’ kustodja wara proċedimenti kriminali, id-Direttiva 2014/41/UE tal-Parlament Ewropew u tal-Kunsill (16) u Direttiva tal-Parlament Ewropew u tal-Kunsill li tistabbilixxi regoli armonizzati dwar id-deżinjazzjoni ta’ stabbilimenti ddeżinjati u l-ħatra ta’ rappreżentanti legali għall-fini tal-ġbir ta’ evidenza elettronika fi proċedimenti kriminali. Konsegwentement, saħansitra jekk ma humiex meħtieġa jagħmlu dan skont din id-Direttiva, l-Istati Membri li jipprovdu informazzjoni skont din id-Direttiva jenħtieġ li jitħallew jagħtu l-kunsens tagħhom, meta jipprovdu l-informazzjoni jew wara, għall-użu ta’ dik l-informazzjoni bħala evidenza fi proċedimenti ġudizzjarji, inkluż, meta meħtieġ skont il-liġi nazzjonali, permezz tal-użu ta’ strumenti relatati mal-kooperazzjoni ġudizzjarja fis-seħħ bejn l-Istati Membri.

(15)

Jenħtieġ li l-iskambji kollha ta’ informazzjoni skont din id-Direttiva jkunu soġġetti għal ħames prinċipji ġenerali, jiġifieri dawk tad-disponibbiltà, l-aċċess ekwivalenti, il-kunfidenzjalità, is-sjieda tad-data u l-affidabbiltà tad-data. Filwaqt li dawk il-prinċipji huma mingħajr preġudizzju għad-dispożizzjonijiet aktar speċifiċi ta’ din id-Direttiva, jenħtieġ li huma jiggwidaw l-interpretazzjoni u l-applikazzjoni tagħha meta rilevanti. L-ewwel nett, il-prinċipju tad-disponibbiltà jenħtieġ li jinftiehem bħala li jindika li l-informazzjoni rilevanti disponibbli għall-Punt Uniku ta’ Kuntatt jew għall-awtoritajiet kompetenti tal-infurzar tal-liġi ta’ Stat Membru wieħed jenħtieġ li tkun disponibbli wkoll, kemm jista’ jkun, għall-Punt Uniku ta’ Kuntatt jew tal-awtoritajiet kompetenti tal-infurzar tal-liġi ta’ Stati Membri oħrajn. Madankollu, jenħtieġ li dak il-prinċipju ma jaffettwax l-applikazzjoni, meta jkun ġustifikat, ta’ dispożizzjonijiet speċifiċi ta’ din id-Direttiva li jirrestrinġu d-disponibbiltà tal-informazzjoni, bħal dawk għar-raġunijiet ta’ rifjut ta’ talbiet għal informazzjoni u awtorizzazzjoni ġudizzjarja, jew tal-obbligu li jinkiseb il-kunsens tal-Istat Membru jew tal-pajjiż terz li inizjalment ipprovda l-informazzjoni biex din tiġi kondiviża. It-tieni, skont il-prinċipju tal-aċċess ekwivalenti u soġġett għad-dispożizzjonijiet aktar speċifiċi ta’ din id-Direttiva, l-Istati Membri jenħtieġ li jiżguraw li l-aċċess li l-Punt Uniku ta’ Kuntatt u l-awtoritajiet kompetenti tal-infurzar tal-liġi ta’ Stati Membri oħrajn ikollhom għal informazzjoni rilevanti jkun sostanzjalment l-istess bħall-aċċess li l-Punt Uniku ta’ Kuntatt u l-awtoritajiet kompetenti tal-infurzar tal-liġi tagħhom stess jkollhom għal dik l-informazzjoni u b’hekk dan l-aċċess la jkun aktar strett u lanqas inqas strett. It-tielet, il-prinċipju tal-kunfidenzjalità jirrikjedi li l-Istati Membri jirrispettaw ir-regoli nazzjonali ta’ xulxin dwar il-kunfidenzjalità meta jittrattaw informazzjoni mmarkata bħala kunfidenzjali li tiġi pprovduta lill-Punt Uniku ta’ Kuntatt tagħhom jew lill-awtoritajiet kompetenti tal-infurzar tal-liġi tagħhom, billi jiżguraw livell simili ta’ kunfidenzjalità f’konformità mar-regoli dwar il-kunfidenzjalità stabbiliti fil-liġi nazzjonali. Ir-raba’, skont il-prinċipju tas-sjieda tad-data, l-informazzjoni inizjalment miksuba minn Stat Membru ieħor jew minn pajjiż terz jenħtieġ li tiġi pprovduta biss bil-kunsens tal-Istat Membru jew tal-pajjiż terz u f’konformità mal-kondizzjonijiet imposti minnhom. Il-ħames, skont il-prinċipju tal-affidabbiltà tad-data, id-data personali li tinstab li ma hijiex preċiża, mhux kompluta jew li ma għadhiex aġġornata jenħtieġ li titħassar jew tiġi rettifikata jew l-ipproċessar ta’ dik id-data jenħtieġ li jiġi ristrett, kif xieraq, u kwalunkwe riċevitur ta’ dik id-data jenħtieġ li jiġi nnotifikat mingħajr dewmien.

(16)

Sabiex jintlaħaq l-objettiv tal-iffaċilitar u tal-iżgurar tal-iskambju adegwat u rapidu ta’ informazzjoni bejn l-Istati Membri, din id-Direttiva jenħtieġ li tipprevedi l-possibbiltà li l-Istati Membri jiksbu informazzjoni billi jindirizzaw talba għal informazzjoni lill-Punt Uniku ta’ Kuntatt tal-Istat Membru l-ieħor ikkonċernat, f’konformità ma’ ċerti rekwiżiti ċari, simplifikati u armonizzati. Fir-rigward tal-kontenut ta’ talbiet għal informazzjoni, din id-Direttiva jenħtieġ li tispeċifika, b’mod partikolari, b’mod eżawrjenti u dettaljat biżżejjed u mingħajr preġudizzju għall-ħtieġa ta’ valutazzjoni każ b’każ, is-sitwazzjonijiet meta t-talbiet għal informazzjoni għandhom jitqiesu bħala urġenti, id-dettalji li għandhom jinkludu bħala minimu u b’liema lingwa għandhom jiġu ppreżentati.

(17)

Filwaqt li jenħtieġ li l-Punti Uniċi ta’ Kuntatt ta’ kull Stat Membru fi kwalunkwe każ ikunu kapaċi jissottomettu talbiet għal informazzjoni lill-Punt Uniku ta’ Kuntatt ta’ Stat Membru ieħor, fl-interess tal-flessibbiltà, jenħtieġ li l-Istati Membri jitħallew jiddeżinjaw, barra minn hekk, xi wħud mill-awtoritajiet kompetenti tal-infurzar tal-liġi tagħhom, li jistgħu ikunu involuti fil-kooperazzjoni Ewropea, bħala awtoritajiet tal-infurzar tal-liġi deżinjati għal fini li jissottomettu tali talbiet lill-Punti Uniċi ta’ Kuntatt ta’ Stati Membri oħra. Kull Stat Membru jenħtieġ li jissottometti lill-Kummissjoni lista tal-awtoritajiet deżinjati tal-infurzar tal-liġi tiegħu. L-Istati Membri jenħtieġ li jinformaw lill-Kummissjoni kull meta jkun hemm bidliet għal dik il-lista. Il-Kummissjoni jenħtieġ li tippubblika l-listi online. Madankollu, sabiex il-Punti Uniċi ta’ Kuntatt ikunu jistgħu jwettqu l-funzjonijiet ta’ koordinazzjoni tagħhom skont din id-Direttiva, huwa meħtieġ li, meta Stat Membru jiddeċiedi li jippermetti lil xi wħud mill-awtoritajiet kompetenti tiegħu tal-infurzar tal-liġi jissottomettu talbiet għal informazzjoni lill-Punti Uniċi ta’ Kuntatt ta’ Stati Membri oħra, dak l-Istat Membru jagħmel lill-Punt Uniku ta’ Kuntatt tiegħu konxju tat-talbiet kollha li joħorġu għall-informazzjoni u ta’ kwalunkwe komunikazzjoni relatata magħhom, billi dejjem jikkopja l-Punt Uniku ta’ Kuntatt tiegħu. L-Istati Membri jenħtieġ li jfittxu li jnaqqsu d-duplikazzjoni mhux ġustifikata tad-data personali għal minimu strett.

(18)

Huma meħtieġa limiti ta’ żmien biex jiġi żgurat l-ipproċessar rapidu tat-talbiet għal informazzjoni ppreżentati lil Punt Uniku ta’ Kuntatt. Jenħtieġ li tali limiti ta’ żmien ikunu ċari u proporzjonati u jqisu jekk it-talba għall-informazzjoni hijiex urġenti u jekk it-talba hijiex relatata ma’ informazzjoni direttament aċċessibbli jew ma’ informazzjoni indirettament aċċessibbli. Sabiex tiġi żgurata l-konformità mal-limiti ta’ żmien applikabbli, filwaqt li madankollu jkun permess grad ta’ flessibbiltà meta jkun oġġettivament ġustifikat, jenħtieġ li, fuq bażi eċċezzjonali, devjazzjoni minn dawk il-limiti ta’ żmien tkun possibbli biss meta, u sa fejn, l-awtorità ġudizzjarja kompetenti tal-Istat Membru rikjest ikollha bżonn żmien addizzjonali biex tiddeċiedi dwar l-għoti tal-awtorizzazzjoni ġudizzjarja meħtieġa. Tali ħtieġa tista’ tinħoloq, pereżempju, minħabba l-kamp ta’ applikazzjoni wiesa’ jew il-kumplessità tal-kwistjonijiet imqajma mit-talba għal informazzjoni. Sabiex jiġi żgurat, kemm jista’ jkun, li l-opportunitajiet kritiċi taż-żmien biex tittieħed azzjoni f’każijiet speċifiċi ma jintilfux, l-Istat Membru rikjest jenħtieġ li jipprovdi kwalunkwe informazzjoni mitluba hekk kif din tinżamm mill-Punt Uniku ta’ Kuntatt, anki meta dik l-informazzjoni ma tkunx l-unika informazzjoni disponibbli li tkun rilevanti għat-talba. Il-bqija tal-informazzjoni mitluba jenħtieġ li tiġi pprovduta wara, hekk kif din tinżamm mill-Punt Uniku ta’ Kuntatt.

(19)

Jenħtieġ li l-Punti Uniċi ta’ Kuntatt jivvalutaw jekk l-informazzjoni mitluba hijiex meħtieġa u proporzjonata biex jinkisbu l-għanijiet ta’ din id-Direttiva u jekk l-ispjegazzjoni tar-raġunijiet oġġettivi li jiġġustifikaw it-talba hijiex ċara u dettaljata biżżejjed, sabiex jiġi evitat l-għoti mhux ġustifikat ta’ informazzjoni jew l-għoti ta’ ammonti sproporzjonati ta’ informazzjoni.

(20)

F’każijiet eċċezzjonali, jista’ jkun oġġettivament ġustifikat li Stat Membru jirrifjuta talba għal informazzjoni sottomessa lil Punt Uniku ta’ Kuntatt tiegħu. Sabiex jiġi żgurat il-funzjonament effettiv tas-sistema maħluqa minn din id-Direttiva f’konformità sħiħa mal-istat tad-dritt, jenħtieġ li dawk il-każijiet jiġu speċifikati u interpretati b’mod restrittiv. Madankollu, ir-regoli stabbiliti f’din id-Direttiva jagħmlu enfasi qawwija fuq il-prinċipji tan-neċessità u tal-proporzjonalità, u b’hekk jipprovdu salvagwardji kontra kwalunkwe użu ħażin ta’ talbiet għal informazzjoni, inkluż meta dan ikun jinvolvi ksur manifest tad-drittijiet fundamentali. L-Istati Membri, bħala espressjoni tad-diliġenza dovuta ġenerali tagħhom, jenħtieġ li għalhekk dejjem jivverifikaw il-konformità tat-talbiet ippreżentati lilhom skont din id-Direttiva mal-prinċipji tan-neċessità u tal-proporzjonalità u jenħtieġ li jirrifjutaw dawk it-talbiet li jsibu li ma humiex konformi. Meta r-raġunijiet għar-rifjut tat-talba jkunu relatati biss ma’ partijiet tal-informazzjoni mitluba, jenħtieġ li l-informazzjoni li jifdal tingħata fil-limiti ta’ żmien stabbiliti f’din id-Direttiva. Sabiex jiġu evitati rifjuti bla bżonn ta’ talbiet għal informazzjoni, jenħtieġ li l-Punt Uniku ta’ Kuntatt jew l-awtorità deżinjata tal-infurzar tal-liġi tal-Istat Membru rikjedenti, kif applikabbli, fuq talba, jagħtu l-kjarifiki jew l-ispeċifikazzjonijiet li huma meħtieġa biex tiġi pproċessata t-talba għal informazzjoni. Il-limiti ta’ żmien applikabbli jenħtieġ li jiġu sospiżi mill-mument li l-Punt Uniku ta’ Kuntatt jew, meta applikabbli, l-awtorità deżinjata tal-infurzar tal-liġi tal-Istat Membru rikjedenti jirċievu t-talba għal kjarifiki jew għall-ispeċifikazzjonijiet. Madankollu, jenħtieġ li jkun possibbli li jintalbu kjarifika jew speċifikazzjonijiet biss meta l-kjarifika jew l-ispeċifikazzjonijiet ikunu oġġettivament meħtieġa u proporzjonati b’tali mod li mingħajrhom it-talba għal informazzjoni jkollha tiġi rrifjutata għal waħda mir-raġunijiet elenkati f’din id-Direttiva. Fl-interess ta’ kooperazzjoni effettiva, jenħtieġ li tibqa’ wkoll il-possibilità li jintalbu l-kjarifiki jew l-ispeċifikazzjonijiet meħtieġa f’sitwazzjonijiet oħrajn, mingħajr ma dan iwassal għal sospensjoni tal-limiti ta’ żmien.

(21)

Sabiex tkun permessa l-flessibbiltà meħtieġa fid-dawl tal-ħtiġijiet operattivi li jistgħu jvarjaw fil-prattika, jenħtieġ li din id-Direttiva tipprevedi żewġ mezzi oħrajn ta’ skambju ta’ informazzjoni, minbarra t-talbiet għal informazzjoni ppreżentati lill-Punti Uniċi ta’ Kuntatt. L-ewwel wieħed huwa l-għoti ta’ informazzjoni mhux mitluba minn Punt Uniku ta’ Kuntatt jew minn awtorità kompetenti tal-infurzar tal-liġi lill-Punt Uniku ta’ Kuntatt jew lill-awtorità kompetenti tal-infurzar tal-liġi ta’ Stat Membru ieħor mingħajr talba minn qabel, jiġifieri l-għoti ta’ informazzjoni fuq inizjattiva proprja. It-tieni wieħed huwa l-għoti ta’ informazzjoni fuq talba għal informazzjoni ppreżentati jew minn Punt Uniku ta’ Kuntatt jew inkella mill-awtorità kompetenti tal-infurzar tal-liġi direttament lill-awtorità kompetenti tal-infurzar tal-liġi ta’ Stat Membru ieħor. Fir-rigward taż-żewġ mezzi ta’ skambju ta’ informazzjoni, din id-Direttiva tistabbilixxi għadd limitat biss ta’ rekwiżiti minimi, b’mod partikolari dwar iż-żamma tal-Punti Uniċi ta’ Kuntatt rilevanti informati u, fir-rigward tal-għoti ta’ informazzjoni fuq inizjattiva proprja, is-sitwazzjonijiet li fihom għandha tiġi pprovduta l-informazzjoni u l-lingwa li għandha tintuża. Jenħtieġ li dawk ir-rekwiżiti japplikaw ukoll għal sitwazzjonijiet li fihom awtorità kompetenti tal-infurzar tal-liġi tagħti informazzjoni lill-Punt Uniku ta’ Kuntatt tal-Istat Membru tagħha stess biex tipprovdi dik l-informazzjoni lil Stat Membru ieħor, bħal meta jkun meħtieġ li tikkonforma mar-regoli stabbiliti f’din id-Direttiva dwar il-lingwa li għandha tintuża meta tingħata l-informazzjoni.

(22)

Ir-rekwiżit ta’ awtorizzazzjoni ġudizzjarja minn qabel għall-għoti ta’ informazzjoni, meta jkun previst mil-liġi nazzjonali, jikkostitwixxi salvagwardja importanti li jenħtieġ li tiġi rrispettata. Madankollu, is-sistemi legali tal-Istati Membri huma differenti f’dan ir-rigward u jenħtieġ li din id-Direttiva ma tinftihemx bħala li taffettwa r-regoli u l-kondizzjonijiet li jikkonċernaw l-awtorizzazzjonijiet ġudizzjarji minn qabel stabbiliti fil-liġi nazzjonali, għajr li teħtieġ li l-iskambji domestiċi u l-iskambji bejn l-Istati Membri jiġu ttrattati b’mod ekwivalenti, kemm fis-sustanza kif ukoll proċeduralment. Barra minn hekk, sabiex kwalunkwe dewmien u kumplikazzjonijiet relatati mal-applikazzjoni ta’ tali rekwiżit jinżammu f’livell minimu, il-Punt Uniku ta’ Kuntatt jew l-awtoritajiet kompetenti tal-infurzar tal-liġi, kif applikabbli, tal-Istat Membru tal-awtorità ġudizzjarja kompetenti jenħtieġ li jieħdu l-passi prattiċi u legali kollha, meta rilevanti f’kooperazzjoni mal-Punt Uniku ta’ Kuntatt jew mal-awtorità deżinjata tal-infurzar tal-liġi tal-Istat Membru rikjedenti, biex l-awtorizzazzjoni ġudizzjarja tinkiseb kemm jista’ jkun malajr. Għalkemm il-bażi legali ta’ din id-Direttiva hija limitata għall-kooperazzjoni fl-infurzar tal-liġi skont l-Artikolu 87(2), il-punt (a), tat-Trattat dwar il-Funzjonament tal-Unjoni Ewropea (TFUE), din id-Direttiva tista’ tkun ta’ rilevanza għall-awtoritajiet ġudizzjarji.

(23)

Huwa partikolarment importanti li tiġi żgurata l-protezzjoni tad-data personali, f’konformità mal-liġi tal-Unjoni, b’rabta mal-iskambji kollha ta’ informazzjoni skont din id-Direttiva. Għal dak l-għan, jenħtieġ li kwalunkwe pproċessar ta’ data personali minn Punt Uniku ta’ Kuntatt jew awtorità kompetenti tal-infurzar tal-liġi skont din id-Direttiva jitwettaq f’konformità sħiħa mad-Direttiva (UE) 2016/680 tal-Parlament Ewropew u tal-Kunsill (17). Skont ir-Regolament (UE) 2016/794, l-Aġenzija tal-Unjoni Ewropea għall-Kooperazzjoni fl-Infurzar tal-Liġi (Europol) għandha tipproċessa d-data f’konformità mar-regoli stabbiliti fih. Dik id-Direttiva u dak ir-Regolament ma humiex affettwati minn din id-Direttiva. B’mod partikolari, jenħtieġ li jiġi speċifikat li kwalunkwe data personali skambjata minn Punti Uniċi ta’ Kuntatt u mill-awtoritajiet kompetenti tal-infurzar tal-liġi tibqa’ limitata għall-kategoriji ta’ data skont il-kategorija tas-suġġett tad-data elenkati fl-Anness II, it-Taqsima B, tar-Regolament (UE) 2016/794. Għaldaqstant, jenħtieġ li ssir distinzjoni ċara bejn id-data li tikkonċerna l-persuni suspettati u d-data li tikkonċerna x-xhieda, il-vittmi, jew il-persuni li jappartjenu għal gruppi oħra, li għalihom japplikaw limitazzjonijiet aktar stretti. Barra minn hekk, sa fejn ikun possibbli, kwalunkwe data personali bħal din jenħtieġ li tiġi distinta skont il-grad ta’ akkuratezza u affidabbiltà tagħha. Sabiex jiġu żgurati l-preċiżjoni u l-affidabbiltà, jenħtieġ li ssir distinzjoni bejn il-fatti u l-valutazzjonijiet personali. Il-Punti Uniċi ta’ Kuntatt jew, meta applikabbli, l-awtoritajiet kompetenti tal-infurzar tal-liġi jenħtieġ li jipproċessaw it-talbiet għal informazzjoni skont din id-Direttiva malajr kemm jista’ jkun sabiex jiġu żgurati l-preċiżjoni u l-affidabbiltà tad-data personali, biex jiġi evitat il-ħżin doppju bla bżonn tad-data u biex jitnaqqas ir-riskju li d-data tiskadi jew ma tibqax disponibbli għalihom. Meta jidher li d-data personali hija skorretta, jenħtieġ li din tiġi kkoreġuta jew imħassra jew jenħtieġ li l-ipproċessar tagħha jkun ristrett mingħajr dewmien.

(24)

Sabiex ikun hemm għoti adegwat u rapidu ta’ informazzjoni mill-Punti Uniċi ta’ Kuntatt, fuq talba jew fuq inizjattiva proprja tagħhom, huwa importanti li l-awtoritajiet kompetenti tal-infurzar tal-liġi jifhmu lil xulxin. L-iskambji kollha ta’ informazzjoni, inkluż l-għoti ta’ informazzjoni mitluba, ir-rifjuti ta’ talbiet għal informazzjoni, inklużi r-raġunijiet għal tali rifjuti, u, meta applikabbli, talbiet għal kjarifika jew speċifikazzjonijiet u kjarifika jew speċifikazzjonijiet ipprovduti li huma relatati ma’ talba speċifika jenħtieġ li jiġu trażmessi fil-lingwa li fiha tkun ġiet sottomessa dik it-talba. Għalhekk, sabiex jiġi evitat dewmien fl-għoti tal-informazzjoni mitluba kkawżat minn ostakli lingwistiċi u biex jiġu limitati l-ispejjeż tat-traduzzjoni, jenħtieġ li l-Istati Membri jistabbilixxu lista ta’ lingwa waħda jew aktar li biha jew bihom il-Punt Uniku ta’ Kuntatt tagħhom jista’ jiġi indirizzat u jista’ jikkomunika. Peress li l-Ingliż huwa lingwa li tinftiehem u tintuża b’mod wiesa’ fil-prattika fir-rigward tal-kooperazzjoni fl-infurzar tal-liġi fl-Unjoni, jenħtieġ li jiġi inkluż f’dik il-lista. L-Istati Membri jenħtieġ li jipprovdu dik il-listi u kwalunkwe aġġornament tagħha lill-Kummissjoni. Il-Kummissjoni jenħtieġ li tippubblika online ġabra ta’ dawk il-listi.

(25)

Sabiex jiġu żgurati s-sikurezza u s-sigurtà taċ-ċittadini Ewropej, huwa essenzjali li l-Europol ikollha l-informazzjoni meħtieġa biex taqdi r-rwol tagħha bħala ċ-ċentru ta’ informazzjoni kriminali tal-Unjoni li jappoġġja lill-awtoritajiet kompetenti tal-infurzar tal-liġi. Għalhekk, meta jsir skambu ta’ informazzjoni bejn l-Istati Membri, irrispettivament minn jekk l-iskambju jsirx skont talba għal informazzjoni sottomessa lil Punt Uniku ta’ Kuntatt jew awtorità kompetenti tal-infurzar tal-liġi jew jekk tiġix ipprovduta minn Punt Uniku ta’ Kuntatt jew awtorità kompetenti tal-infurzar tal-liġi fuq inizjattiva proprja, jenħtieġ li ssir valutazzjoni, fuq bażi ta’ każ b’każ, dwar jekk kopja tat-talba għal informazzjoni sottomessa skont din id-Direttiva jew tal-informazzjoni skambjata skont din id-Direttiva jenħtieġx li tintbagħat lill-Europol f’konformità mal-Artikolu 7(6) tar-Regolament (UE) 2016/794 meta tkun tikkonċerna reat kriminali li jaqa’ fil-kamp ta’ applikazzjoni tal-objettivi tal-Europol. Tali valutazzjonijiet jenħtieġ li jkunu bbażati fuq l-objettivi tal-Europol kif stabbiliti fir-Regolament (UE) 2016/794 sa fejn huwa kkonċernat il-kamp ta’ applikazzjoni tar-reat kriminali. Jenħtieġ li l-Istati Membri ma jkunux obbligati jibgħatu kopja tat-talba għal informazzjoni jew tal-informazzjoni skambjata lill-Europol meta dan imur kontra l-interessi essenzjali tas-sigurtà tal-Istat Membru kkonċernat, meta dan jipperikola s-suċċess ta’ investigazzjoni attwali jew is-sikurezza ta’ individwu jew meta jiżvela informazzjoni relatata ma’ organizzazzjonijiet jew attivitajiet speċifiċi ta’ intelligence fil-qasam tas-sigurtà nazzjonali. Barra minn hekk, f’konformità mal-prinċipju tas-sjieda tad-data u mingħajr preġudizzju għall-obbligu stabbilit fir-Regolament (UE) 2016/794 dwar id-determinazzjoni tal-fini tal-ipproċessar tal-informazzjoni mill-Europol u r-restrizzjonijiet fuqu, l-informazzjoni inizjalment miksuba minn Stat Membru ieħor jew pajjiż terz jenħtieġ li tiġi pprovduta lill-Europol biss meta dak l-Istat Membru jew il-pajjiż terz ikun ta l-kunsens tiegħu. Jenħtieġ li l-Istati Membri jiżguraw li l-persunal tal-Punt Uniku ta’ Kuntatt u tal-awtorità kompetenti tal-infurzar tal-liġi jkun appoġġjat u mħarreġ b’mod adegwat sabiex jidentifika malajr u b’mod preċiż liema informazzjoni skambjata skont din id-Direttiva taqa’ fil-mandat tal-Europol u hija meħtieġa biex l-Aġenzija tissodisfa l-objettivi tagħha.

(26)

Il-problema tal-proliferazzjoni tal-mezzi ta’ komunikazzjoni użati għat-trażmissjoni ta’ informazzjoni dwar l-infurzar tal-liġi bejn l-Istati Membri jenħtieġ li tiġi rrimedjata, minħabba li xxekkel l-iskambju adegwat u rapidu ta’ tali informazzjoni u żżid ir-riskji li jikkonċernaw is-sigurtà tad-data personali. Għalhekk, jenħtieġ li l-użu tal-applikazzjoni ta’ Network għall-Iskambju Sikur ta’ Informazzjoni (SIENA), ġestita u żviluppata mill-Europol f’konformità mar-Regolament (UE) 2016/794, jsir obbligatorju għal dawn it-trażmissjonijiet u l-komunikazzjonijiet kollha skont din id-Direttiva, inklużi t-trażmissjoni tat-talbiet għal informazzjoni lill-Punti Uniċi ta’ Kuntatt u direttament lill-awtoritajiet kompetenti tal-infurzar tal-liġi, l-għoti ta’ informazzjoni skont tali talbiet u l-għoti ta’ informazzjoni mill-Punti Uniċi ta’ kuntatt u mill-awtorità kompetenti tal-infurzar tal-liġi fuq inizjattiva proprja, il-kjarifiki, l-ispeċifikazzjonijiet u il-komunikazzjonijiet dwar ir-rifjuti tat-talbiet għal informazzjoni, u t-trażmissjoni tal-kopji tat-talbiet għall-informazzjoni jew l-informazzjoni lill-Punti Uniċi ta’ Kuntatt u lill-Europol. Għal dak l-għan, il-Punti Uniċi ta’ Kuntatt kollha, kif ukoll l-awtoritajiet kompetenti kollha tal-infurzar tal-liġi li jistgħu jkunu involuti fi skambji ta’ informazzjoni, jenħtieġ li jkunu konnessi direttament mas-SIENA. Sabiex l-uffiċjali tal-ewwel linja, bħall-uffiċjali tal-pulizija involuti f’operazzjonijiet ta’ tfittxija sistematika, ikunu jistgħu jużaw is-SIENA, jenħtieġ li din tkun taħdem fuq apparati mobbli, meta jkun xieraq. F’dan ir-rigward, jenħtieġ li jiġi previst perjodu ta’ tranżizzjoni qasir sabiex tkun tista’ ssir l-introduzzjoni sħiħa tas-SIENA, peress li din tinvolvi bidla fil-prattiki attwali f’xi Stati Membri u tirrikjedi li l-persunal jitħarreġ. Sabiex titqies ir-realtà operazzjonali u biex ma tiġix imfixkla l-kooperazzjoni tajba bejn l-awtoritajiet kompetenti tal-infurzar tal-liġi, jenħtieġ li l-Istati Membri jkunu jistgħu jippermettu lill-Punt Uniku ta’ Kuntatt tagħhom jew lill-awtoritajiet kompetenti tal-infurzar tal-liġi tagħhom jużaw mezz ta’ komunikazzjoni sigur ieħor f’għadd limitat ta’ sitwazzjonijiet ġustifikati. Meta l-Istati Membri jippermettu lill-Punt Uniku ta’ Kuntatt tagħhom jew lill-awtoritajiet kompetenti tal-infurzar tal-liġi tagħhom jużaw mezz ta’ komunikazzjoni ieħor minħabba l-urġenza tat-talba għal informazzjoni, jenħtieġ li, meta jkun prattikabbli u konsistenti mal-ħtiġijiet operazzjonali, jerġgħu lura għall-użu ta’ SIENA wara li s-sitwazzjoni ma tibqax urġenti. Jenħtieġ li l-użu ta’ SIENA ma jkunx obbligatorju għal skambji interni ta’ informazzjoni fi Stat Membru.

(27)

Sabiex jissimplifikaw, jiffaċilitaw u jimmaniġġjaw aħjar il-flussi tal-informazzjoni, jenħtieġ li kull Stat Membru jistabbilixxi jew jaħtar Punt Uniku ta’ Kuntatt. Jenħtieġ li l-Punti Uniċi ta’ Kuntatt ikunu kompetenti biex jikkoordinaw u jiffaċilitaw l-iskambju ta’ informazzjoni skont din id-Direttiva. Jenħtieġ li kull Stat Membru jinnotifika lill-Kummissjoni dwar l-istabbiliment jew id-deżinjazzjoni tal-Punt Uniku ta’ Kuntatt tiegħu u dwar kwalunkwe tibdil għal dan. Jenħtieġ li l-Kummissjoni tippubblika dawk in-notifiki u kwalunkwe aġġornament tagħhom. Jenħtieġ li l-Punti Uniċi ta’ Kuntatt jikkontribwixxu b’mod partikolari għall-mitigazzjoni tal-ostakli għall-flussi tal-informazzjoni li jirriżultaw mill-frammentazzjoni tal-mod li bih l-awtoritajiet kompetenti tal-infurzar tal-liġi jikkomunikaw ma’ xulxin, b’reazzjoni għall-ħtieġa dejjem tikber li tiġi indirizzata b’mod konġunt il-kriminalità transfruntiera, bħat-traffikar tad-droga, iċ-ċiberkriminalità, it-traffikar tal-bnedmin, u t-terroriżmu. Jenħtieġ li l-Punti Uniċi ta’ Kuntatt jiġu assenjati għadd ta’ kompiti speċifiċi u minimi u jkollhom ċerti kapaċitajiet minimi sabiex ikunu jistgħu jissodisfaw b’mod effettiv il-funzjonijiet ta’ koordinazzjoni tagħhom fir-rigward tal-iskambju transfruntier ta’ informazzjoni għall-finijiet tal-infurzar tal-liġi skont din id-Direttiva.

(28)

Il-Punti Uniċi ta’ Kuntatt jenħtieġ li jkollhom aċċess għall-informazzjoni kollha disponibbli fl-Istat Membru tagħhom, inkluż billi jkollhom aċċess faċli għall-utenti għall-bażijiet tad-data u l-pjattaformi rilevanti kollha tal-Unjoni u internazzjonali, f’konformità mal-arranġamenti speċifikati fil-liġi tal-Unjoni u fil-liġi nazzjonali applikabbli. Sabiex ikunu jistgħu jissodisfaw ir-rekwiżiti ta’ din id-Direttiva, b’mod partikolari dawk li huma limitati biż-żmien, jenħtieġ li l-Punti Uniċi ta’ Kuntatt jingħataw riżorsi adegwati f’termini ta’ baġit u persunal, inklużi kapaċitajiet adegwati ta’ traduzzjoni, u jiffunzjonaw il-ħin kollu. F’dak ir-rigward, il-fatt li jkun hemm front desk li jkun jista’ jiskrinja, jipproċessa u jidderieġi t-talbiet għal informazzjoni li jidħlu jista’ jżid l-effiċjenza u l-effettività tagħhom. Il-Punti Uniċi ta’ Kuntatt jenħtieġ li jkollhom ukoll għad-dispożizzjoni tagħhom, il-ħin kollu, awtoritajiet ġudizzjarji kompetenti biex jagħtu l-awtorizzazzjonijiet ġudizzjarji meħtieġa. Fil-prattika, dak jista’ jsir, pereżempju, billi tiġi żgurata l-preżenza fiżika ta’ tali awtoritajiet ġudizzjarju fil-bini tal-Punt Uniku ta’ Kuntatt jew id-disponibbiltà funzjonali ta’ tali awtoritajiet ġudizzjarji, jew fil-bini tal-Punt Uniku ta’ Kuntatt jew inkella direttament disponibbli fuq sejħa.

(29)

Sabiex ikunu jistgħu jwettqu b’mod effettiv il-funzjonijiet ta’ koordinazzjoni tagħhom skont din id-Direttiva, jenħtieġ li l-Punti Uniċi ta’ Kuntatt ikunu magħmula minn persunal ta’ dawk l-awtoritajiet kompetenti tal-infurzar tal-liġi, li l-involviment tagħhom ikun meħtieġ għall-iskambju adegwat u rapidu ta’ informazzjoni skont din id-Direttiva. Filwaqt li huwa f’idejn kull Stat Membru li jiddeċiedi dwar l-organizzazzjoni u l-kompożizzjoni preċiżi meħtieġa biex jiġi ssodisfat dak ir-rekwiżit, il-pulizija, id-dwana u awtoritajiet kompetenti oħrajn tal-infurzar tal-liġi responsabbli għall-prevenzjoni, l-individwazzjoni jew l-investigazzjoni ta’ reati kriminali u punti ta’ kuntatt possibbli għall-uffiċċji reġjonali u bilaterali, bħall-uffiċjali ta’ kollegament u l-attachés issekondati jew stazzjonati fi Stati Membri oħrajn u aġenziji rilevanti tal-Unjoni għall-infurzar tal-liġi, bħall-Europol, ikunu jistgħu jiġu rrappreżentati fil-Punti Uniċi ta’ Kuntatt. Madankollu, fl-interess ta’ koordinazzjoni effettiva, bħala minimu, jenħtieġ li l-Punti Uniċi ta’ Kuntatt ikunu magħmula minn rappreżentanti tal-unità nazzjonali tal-Europol, tal-Uffiċċju SIRENE u tal-Uffiċċju Ċentrali Nazzjonali tal-Interpol, kif stabbiliti bl-att legali rilevanti tal-Unjoni jew ftehim internazzjonali u minkejja li din id-Direttiva ma tkunx applikabbli għall-iskambji ta’ informazzjoni speċifikament regolati minn dawk l-atti legali tal-Unjoni.

(30)

Minħabba d-domandi speċifiċi tal-kooperazzjoni transfruntiera fl-infurzar tal-liġi, inkluż it-trattament ta’ informazzjoni sensittiva f’dak il-kuntest, huwa essenzjali li l-persunal tal-Punti Uniċi ta’ Kuntatt u tal-awtoritajiet kompetenti tal-infurzar tal-liġi jkollhom l-għarfien u l-ħiliet meħtieġa biex iwettqu l-funzjonijiet tagħhom skont din id-Direttiva b’mod legali, effiċjenti u effettiv. B’mod partikolari, il-membri tal-persunal tal-Punti Uniċi ta’ Kuntatt jenħtieġ li ssirilhom offerta ta’ korsijiet ta’ taħriġ adegwati u regolari mogħti kemm fil-livell tal-Unjoni kif ukoll f’dak nazzjonali, li jikkorrispondu għall-ħtiġijiet professjonali u l-isfondi speċifiċi tagħhom u li jiffaċilitaw il-kuntatt tagħhom ma’ Punti Uniċi ta’ Kuntatt u ma’ awtoritajiet kompetenti tal-infurzar tal-liġi minn Stati Membri oħrajn, liema kuntatt huwa meħtieġ għal-applikazzjoni tar-regoli stabbilit f’din id-Direttiva, u jenħtieġ li jiġu mħeġġa jibbenefikaw minn tali offerta ta’ taħriġ. F’dak ir-rigward, jenħtieġ li tingħata attenzjoni partikolari għall-użu xieraq tal-għodod tal-ipproċessar tad-data u tas-sistemi tal-IT, għall-għoti ta’ għarfien dwar l-oqfsa legali rilevanti tal-Unjoni u nazzjonali fil-qasam tal-Ġustizzja u l-Affarijiet Interni, b’enfasi partikolari fuq il-protezzjoni tad-data personali, il-kooperazzjoni fl-infurzar tal-liġi u t-trattament ta’ informazzjoni kunfidenzjali, u għal-lingwi li bihom l-Istat Membru kkonċernat indika li l-Punt Uniku ta’ Kuntatt tiegħu jista’ jiskambja informazzjoni, bil-ħsieb li jgħin biex jingħelbu l-ostakli lingwistiċi. Għall-fini li jipprovdu t-taħriġ, jenħtieġ li, meta jkun xieraq, l-Istati Membri jużaw ukoll il-korsijiet ta’ taħriġ u l-għodod rilevanti offruti mill-Aġenzija tal-Unjoni Ewropea għat-Taħriġ fl-Infurzar tal-Liġi (CEPOL), stabbilita bir-Regolament (UE) 2015/2219 tal-Parlament Ewropew u tal-Kunsill (18), jikkunsidraw il-possibbiltà li l-persunal iqatta’ ġimgħa fl-Europol, u jagħmlu użu mill-offerti rilevanti magħmula skont dawn il-programmi u proġetti ffinanzjati mill-baġit tal-Unjoni, bħall-programm ta’ skambju tas-CEPOL.

(31)

Minbarra l-ħiliet tekniċi u l-għarfien legali, il-fiduċja reċiproka u l-fehim komuni huma prerekwiżiti għal kooperazzjoni transfruntiera effiċjenti u effettiva fl-infurzar tal-liġi skont din id-Direttiva. Il-kuntatti personali miksuba permezz ta’ operazzjonijiet konġunti u l-kondiviżjoni tal-għarfien espert jiffaċilitaw il-bini tal-fiduċja u l-iżvilupp ta’ kultura komuni tal-Unjoni fil-qasam tal-pulizija. L-Istati Membri jenħtieġ li jikkunsidraw ukoll korsijiet ta’ taħriġ konġunt u skambji tal-persunal li jiffukaw fuq it-trasferiment tal-għarfien dwar il-metodi ta’ ħidma, l-approċċi investigattivi u l-istrutturi organizzattivi tal-awtoritajiet kompetenti tal-infurzar tal-liġi fi Stati Membri oħrajn.

(32)

Biex tiżdied il-parteċipazzjoni f’korsijiet ta’ taħriġ għall-persunal tal-Punti Uniċi ta’ Kuntatt u l-awtoritajiet kompetenti tal-infurzar tal-liġi, l-Istati Membri jistgħu jikkunsidraw ukoll inċentivi speċifiċi għal tali persunal.

(33)

Huwa meħtieġ li l-Punti Uniċi ta’ Kuntatt jvaraw u joperaw sistema elettronika unika ta’ ġestjoni tal-każijiet li jkollha ċerti funzjonijiet u kapaċitajiet minimi sabiex ikunu jistgħu jwettqu kull wieħed mill-kompiti tagħhom skont din id-Direttiva b’mod effettiv u effiċjenti, b’mod partikolari fir-rigward tal-iskambju ta’ informazzjoni. Is-sistema ta’ ġestjoni tal-każijiet hija sistema ta’ fluss tax-xogħol li tippermetti lill-Punti Uniċi ta’ Kuntatt jimmaniġġjaw l-iskambju ta’ informazzjoni. Ikun tajjeb li l-istandard tal-format universali tal-messaġġ stabbilit bir-Regolament (UE) 2019/818 tal-Parlament Ewropew u tal-Kunsill (19) jintuża fl-iżvilupp tas-sistema ta’ ġestjoni tal-każijiet.

(34)

Ir-regoli stabbiliti fid-Direttiva (UE) 2016/680 japplikaw għall-ipproċessar ta’ data personali fis-sistema ta’ ġestjoni tal-każijiet. L-ipproċessar jinkludi l-ħżin. Fl-interess taċ-ċarezza u l-protezzjoni effettiva tad-data personali, ir-regoli stabbiliti f’dik id-Direttiva jenħtieġ li jiġu speċifikati aktar f’din id-Direttiva. B’mod partikolari, fir-rigward tar-rekwiżit stabbilit fid-Direttiva (UE) 2016/680 li d-data personali tinżamm f’forma li tippermetti l-identifikazzjoni tas-suġġetti tad-data għal mhux aktar milli jkun meħtieġ għall-finijiet li għalihom tiġi pproċessata, jenħtieġ li din id-Direttiva tispeċifika li, meta Punt Uniku ta’ Kuntatt jirċievi informazzjoni skambjata skont din id-Direttiva li jkun fiha data personali, jenħtieġ li l-Punt Uniku ta’ Kuntatt iżomm id-data personali fis-sistema ta’ ġestjoni tal-każijiet biss sa fejn tkun meħtieġa u proporzjonata għat-twettiq tal-kompiti tiegħu skont din id-Direttiva. Meta dan ma jibqax il-każ, jenħtieġ li l-Punt Uniku ta’ Kuntatt iħassar b’mod irrevokabbli d-data personali mis-sistema ta’ ġestjoni tal-każijiet. Sabiex jiġi żgurat li d-data personali tinżamm biss sakemm tkun meħtieġa u b’mod proporzjonat, f’konformità mar-regoli dwar il-limiti ta’ żmien għall-ħżin u r-rieżami stabbiliti fid-Direttiva (UE) 2016/680, jenħtieġ li l-Punt Uniku ta’ Kuntatt jirrieżamina regolarment jekk dawk ir-rekwiżiti għadhomx jiġu ssodisfati. Għal dak l-għan, jenħtieġ li l-ewwel rieżami ma jsirx aktar tard minn sitt xhur wara li jkun ġie konkluż skambju ta’ informazzjoni skont din id-Direttiva, jiġifieri, il-mument li fih ikun ġie mogħti l-aħħar punt ta’ informazzjoni jew tkun ġiet skambjata l-aħħar komunikazzjoni relatata miegħu. Madankollu, jenħtieġ li r-rekwiżiti ta’ din id-Direttiva fir-rigward ta’ tali rieżami u tħassir ma jaffettwawx il-possibbiltà għall-awtoritajiet nazzjonali kompetenti għall-prevenzjoni, l-individwazzjoni u l-investigazzjoni ta’ reati kriminali li jżommu d-data personali fil-fajls kriminali nazzjonali tagħhom skont il-liġi nazzjonali, f’konformità mal-liġi tal-Unjoni, b’mod partikolari d-Direttiva (UE) 2016/680.

(35)

Sabiex jassistu lill-Punti Uniċi ta’ Kuntatt u lill-awtoritajiet kompetenti tal-infurzar tal-liġi fl-iskambju ta’ informazzjoni skont din id-Direttiva u biex irawmu kultura Ewropea komuni tal-pulizija bejn l-Istati Membri, l-Istati Membri jenħtieġ li jinkoraġġixxu kooperazzjoni prattika fost il-Punti Uniċi ta’ Kuntatt tagħhom u l-awtoritajiet kompetenti tal-infurzar tal-liġi. B’mod partikolari, jenħtieġ li l-Kunsill jorganizza laqgħat tal-Kapijiet tal-Punti Uniċi ta’ Kuntatt mill-inqas fuq bażi annwali biex jiġu kondiviżi l-esperjenza u l-aħjar prattika rigward l-iskambju ta’ informazzjoni għall-finijiet ta’ din id-Direttiva. Forom oħra ta’ kooperazzjoni jenħtieġ li jinkludu l-abbozzar ta’ manwali dwar l-iskambju ta’ informazzjoni b’rabta mal-infurzar tal-liġi, il-kompilazzjoni ta’ skedi informattivi nazzjonali dwar l-informazzjoni direttament u indirettament aċċessibbli, il-Punti Uniċi ta’ Kuntatt, l-awtoritajiet deżinjati tal-infurzar tal-liġi u r-reġimi lingwistiċi, jew dokumenti oħra dwar proċeduri komuni, l-indirizzar tad-diffikultajiet rigward il-flussi tax-xogħol, is-sensibilizzazzjoni dwar l-ispeċifiċitajiet tal-oqfsa legali rilevanti u l-organizzazzjoni, kif xieraq, ta’ laqgħat bejn il-Punti Uniċi ta’ Kuntatt rilevanti.

(36)

Sabiex ikunu jistgħu jsiru l-monitoraġġ u l-evalwazzjoni meħtieġa tal-applikazzjoni ta’ din id-Direttiva, jenħtieġ li l-Istati Membri jkunu obbligati jiġbru u jipprovdu kull sena ċerta data lill-Kummissjoni dwar l-implimentazzjoni ta’ din id-Direttiva. Dak ir-rekwiżit huwa meħtieġ, b’mod partikolari, biex jirrimedja n-nuqqas ta’ data komparabbli li tikkwantifika l-iskambji ta’ informazzjoni transfruntiera rilevanti bejn l-awtoritajiet kompetenti tal-infurzar tal-liġi u jiffaċilita wkoll l-obbligu ta’ rapportar tal-Kummissjoni rigward l-implimentazzjoni ta’ din id-Direttiva. Id-data meħtieġa għal dik il-fini jenħtieġ li tiġi ġġenerata awtomatikament mis-sistema ta’ ġestjoni tal-każijiet u mis-SIENA.

(37)

In-natura transfruntiera tal-kriminalità transnazzjonali u t-terroriżmu tirrikjedi li l-Istati Membri jiddependu fuq xulxin biex jipprevjenu, jindividwaw jew jinvestigaw tali reati kriminali. Minħabba li l-objettivi ta’ din id-Direttiva, jiġifieri l-iżgurar ta’ flussi ta’ informazzjoni adegwati u rapidi bejn l-awtoritajiet kompetenti tal-infurzar tal-liġi u lejn l-Europol, ma jistgħux jinkisbu b’mod suffiċjenti mill-Istati Membri iżda jistgħu pjuttost, minħabba l-iskala u l-effetti tal-azzjoni, jinkisbu aħjar fil-livell tal-Unjoni permezz tal-istabbiliment ta’ regoli komuni u kultura komuni dwar l-iskambju ta’ informazzjoni u permezz ta’ għodod u mezzi ta’ komunikazzjoni moderni, l-Unjoni tista’ tadotta miżuri f’konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea (TUE). Skont il-prinċipju ta’ proporzjonalità kif stabbilit f’dak l-Artikolu, din id-Direttiva ma tmurx lil hinn minn dak li hu meħtieġ biex jintlaħqu dak l-objettiv.

(38)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (20) u ta opinjoni fis-7 ta’ Marzu 2022.

(39)

Din id-Direttiva tibni fuq il-valuri li fuqhom hija msejsa l-Unjoni, kif stabbilit fl-Artikolu 2 tat-TUE, inkluż l-istat tad-dritt, il-libertà u d-demokrazija. Jirrispetta wkoll id-drittijiet fundamentali u s-salvagwardji u josserva l-prinċipji rikonoxxuti mill-Karta tad-Drittijiet Fundamentali tal-Unjoni Ewropea (“il-Karta”), b’mod partikolari d-dritt għal-libertà u s-sigurtà, ir-rispett għall-ħajja privata u tal-familja u d-dritt għall-protezzjoni ta’ data personali kif previsti fl-Artikoli 6, 7 u 8 tal-Karta rispettivament, kif ukoll fl-Artikolu 16 TFUE. Jenħtieġ li kwalunkwe pproċessar ta’ data personali skont din id-Direttiva ikun limitat għal dak li huwa strettament meħtieġ u proporzjonat u soġġett għal kondizzjonijiet ċari, rekwiżiti stretti u superviżjoni effettiva mill-awtoritajiet superviżorji nazzjonali stabbiliti bid-Direttiva (UE) 2016/680 u l-Kontrollur Ewropew għall-Protezzjoni tad-Data, meta jkun xieraq, f’konformità mal-mandati rispettivi tagħhom.

(40)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-TUE u mat-TFUE, id-Danimarka mhijiex qed tieħu sehem fl-adozzjoni ta’ din id-Direttiva u mhijiex marbuta biha jew suġġetta għall-applikazzjoni tagħha. Ladarba din id-Direttiva tibni fuq l-acquis ta’ Schengen, id-Danimarka għandha, f’konformità mal-Artikolu 4 ta’ dak il-Protokoll, tiddeċiedi, fi żmien sitt xhur wara li l-Kunsill ikun iddeċieda dwar din id-Direttiva jekk hijiex se timplimentaha fil-liġi nazzjonali tagħha.

(41)

L-Irlanda qed tieħu sehem f’din id-Direttiva, f’konformità mal-Artikolu 5(1) tal-Protokoll Nru 19 dwar l-acquis ta’ Schengen integrat fil-qafas tal-Unjoni Ewropea, anness mat-TUE u mat-TFUE, u l-Artikolu 6(2) tad-Deċiżjoni tal-Kunsill 2002/192/KE (21).

(42)

Fir-rigward tal-Iżlanda u n-Norveġja, din id-Direttiva tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim konkluż mill-Kunsill tal-Unjoni Ewropea u r-Repubblika tal-Iżlanda u r-Renju tan-Norveġja dwar l-assoċjazzjoni ta’ dawk iż-żewġ Stati mal-implimentazzjoni, l-applikazzjoni u l-iżvilupp tal-acquis ta’ Schengen (22), li jaqgħu fil-qasam imsemmi fl-Artikolu 1, il-punt H, tad-Deċiżjoni tal-Kunsill 1999/437/KE (23).

(43)

Fir-rigward tal-Iżvizzera, din id-Direttiva tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (24), li jaqgħu fil-qasam imsemmi fl-Artikolu 1, il-punt H, tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2008/149/ĠAI (25).

(44)

Fir-rigward tal-Liechtenstein, din id-Direttiva tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis ta’ Schengen (26), li jaqgħu fil-qasam imsemmi fl-Artikolu 1, il-punt H, tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2011/349/UE (27),