(1)

An 16 Nollaig 2016, thíolaic an Ghníomhaireacht Eorpach Ceimiceán (“an Ghníomhaireacht”), ar iarraidh ón gCoimisiún, sainchomhad (2) de bhun Airteagal 69(1) de Rialachán (CE) Uimh. 1907/2006 (“sainchomhad Iarscríbhinn XV”), lena léirítear go gcuireann scaoileadh luaidhe ó earraí a táirgeadh ó pholaiméirí nó ó chomhpholaiméirí de chlóiríd vinile (“PVC”), ina bhfuil cobhsaitheoirí luaidhe, le linn a saolré, go díreach nó go hindíreach le nochtadh an duine don luaidhe. Mhol an Ghníomhaireacht i sainchomhad Iarscríbhinn XV go ndéanfar cur ar an margadh nó úsáid luaidhe in earraí a táirgeadh ó PVC a shrianadh más amhlaidh go mbeidh tiúchan luaidhe 0.1 % de réir mheáchan an ábhar PVC nó níos mó ná sin. Os rud é nach bhfuil comhdhúile luaidhe in ann PVC a chobhsú ar bhealach éifeachtach i dtiúchan faoi bhun 0.5 % de réir meáchain, ba cheart go n-áiritheofar leis an teorainn tiúchana molta nach féidir comhdhúile luaidhe a chur isteach d’aon ghnó mar chobhsaitheoirí le linn cumaisc PVC a thuilleadh san Aontas. Chuir an Ghníomhaireacht roinnt maoluithe ar an srian beartaithe seo isteach i sainchomhad Iarscríbhinn XV, go háirithe maidir le hearraí PVC ina bhfuil PVC athshlánaithe. Tá “athshlánaithe” á úsáid i gcomhréir leis na sainmhíniú ar “athshlánú ábhar” in Airteagal 3, pointe 15a, de Threoir 2008/98/CE ó Pharlaimint na hEorpa agus ón gComhairle (3).

(2)

Is substaint thocsaineach í luaidhe a bhfuil tionchar aici ar fhorbairt an néarchórais, a ghineann galar duáin ainsealach agus a bhfuil éifeachtaí díobhálacha aici ar an mbrú fola. Cé nár bunaíodh tairseach le haghaidh éifeachtaí néarfhorbartha i leanaí ná le haghaidh éifeachtaí duánacha, de réir na Gníomhaireachta Eorpaí um Shábháilteacht Bia sáraíonn nochtadh reatha an duine do luaidhe i mbia agus ó fhoinsí eile fós na leibhéil nochta inghlactha, agus as sin tagann éifeachtaí díobhálacha néarfhorbartha i leanaí (4).

(3)

Le cobhsaitheoirí luaidhe, méadaítear teirmeachobhsaíocht PVC le linn cumaisc agus táirgeadh earraí. Déantar PVC a chosaint in aghaidh fótai-dhíghrádaithe leo, freisin. Chuir tionscal san Aontas deireadh go deonach le cobhsaitheoirí luaidhe a úsáid i gcumasc agus in earraí PVC agus thuairiscigh siad gur cuireadh críoch rathúil leis an bpróiseas in 2015 (5). Earraí PVC ina bhfuil luaidhe, go háirithe táirgí tógála, tá ré fada seirbhíse acu, agus leantar lena n-úsáid ar feadh tréimhsí níos faide ná roinnt dacáidí. Ina dhiaidh sin, déantar dramhaíl díobh tráth a ndiúscartha agus féadfar athchúrsáil a dhéanamh orthu, agus an fhéidearthacht ann sa chás sin go dtabharfaí luaidhe isteach arís i dtáirgí tríd an PVC athshlánaithe. Léirigh sainchomhad Iarscríbhinn XV go raibh 90 % de na hastaíochtaí luaidhe iomlána ó earraí PVC san Aontas sa bhliain 2016 mar thoradh ar earraí allmhairithe PVC, de bharr deireadh a bheith curtha le húsáid cobhsaitheoirí luaidhe san Aontas.

(4)

Chun forfheidhmiú an tsriain atá beartaithe a éascú, is iomchuí aon luaidhe atá in PVC a shrianadh, gan beann ar an bhfeidhm a bhí beartaithe leis.

(5)

An 5 Nollaig 2017, ghlac Coiste um Measúnú Riosca na Gníomhaireachta (“RAC”) a thuairim dheiridh (6) lenar chinn sé gurb é an srian a mhol an Ghníomhaireacht an beart uile-Aontais ab iomchuí chun aghaidh a thabhairt ar na rioscaí a sainaithníodh atá ann de bharr comhdhúile luaidhe a bheith ann mar chobhsaitheoirí in earraí PVC, is é sin gurb é an beart ab iomchuí é ó thaobh éifeachtachta i laghdú an riosca de, ó thaobh praiticiúlachta de agus ó thaobh inmhonatóireachta de.

(6)

Mhol RAC go gcuirfí toirmeasc ar aon tiúchan luaidhe a úsáid in earraí PVC. D’aontaigh RAC leis an nGníomhaireacht freisin gur ceart maolú a leagan síos maidir le hearraí PVC ina bhfuil PVC athshlánaithe. Mhol RAC áfach gur ceart teorainneacha níos airde a bhunú maidir le cion luaidhe i gcás earraí áirithe PVC ina bhfuil PVC athshlánaithe atá docht agus solúbtha, agus an teorainn sin a bhunú ag 2 % agus 1 % de réir meáchain, faoi seach. Maidir leis an rogha malartach ar earraí den sórt sin a athchúrsáil, i.e. dramhaíl PVC a dhiúscairt trí líonadh talún agus loscadh, thug an moladh sin san áireamh an meastachán go méadódh sí na hastaíochtaí sa chomhshaol agus nach laghdódh sí an riosca. Chuir na teorainneacha éagsúla a moladh san áireamh an meán-ábhar luaidhe measta de dhramhaíl PVC docht agus solúbtha in 2013, an tionchar a bhfuiltear ag súil leis ar mhéideanna athchúrsála agus gur eol go bhfuil scaoileadh luaidhe ó PVC solúbtha níos airde i gcomparáid leis an gceann ó PVC docht. Tugadh aird chuí go bhfuil cion ard de PVC athshlánaithe i roinnt earraí a d’fhéadfadh 100 % den PVC de réir meáchain a bhaint amach san earra deiridh.

(7)

An 15 Márta 2018, ghlac Coiste um Anailís Shocheacnamaíoch (“SEAC”) na Gníomhaireachta a thuairim dheiridh (7), inar chinn sé gurb é an srian atá beartaithe ag an nGníomhaireacht, arna mhodhnú ag RAC agus SEAC araon, an beart uile-Aontais is iomchuí chun aghaidh a thabhairt ar an riosca sainaitheanta, ó thaobh na sochar socheacnamaíoch agus na gcostas socheacnamaíoch a bhaineann leis de. Tháinig SEAC ar an gconclúid sin bunaithe ar an bhfianaise is fearr atá ar fáil, ag cur san áireamh airíonna luaidhe mar shubstaint thocsaineach neamhthairseach agus an tionchar atá aici ar shláinte an duine, agus inacmhainneacht na gcostas a bhaineann leis an srian atá beartaithe. Mheas SEAC go bhfuil roghanna oiriúnacha eile ar fáil go forleathan agus in úsáid cheana féin san Aontas. Rinne sé cost-éifeachtúlacht an tsriain a mheas freisin. Ar deireadh, tháinig sé ar an gconclúid gur leor fiú na tionchair theoranta ar shláinte an duine maidir le caillteanas a bhaineann leis an sainuimhir intleachta chun teacht cothrom le costais an tsriain.

(8)

Ag féachaint don éabhlóid réamh-mheasta ar an tiúchan luaidhe in PVC athshlánaithe, d’aontaigh SEAC leis an moladh i sainchomhad Iarscríbhinn XV go laghdódh an tiúchan sin faoi 2035 - 2040 a dhóthain chun ligean d’earraí PVC ina bhfuil PVC athshlánaithe an teorainn ghinearálta tiúchana luaidhe 0.1 % atá beartaithe a chomhlíonadh. Dá bhrí sin, ba cheart go mbeadh feidhm ag an maolú ar earraí PVC áirithe ina bhfuil PVC athshlánaithe ar feadh 15 bliana ó theacht i bhfeidhm an tsriain. D’aontaigh SEAC freisin, chun an éiginnteacht maidir leis na treochtaí amach anseo a chur san áireamh maidir le méid na dramhaíola PVC a bheidh á athchúrsáil agus an t-ábhar luaidhe a bheidh ag baint leis, gur cheart an tréimhse chur i bhfeidhm sin a athmheasúnú laistigh de 10 mbliana ó theacht i bhfeidhm an tsriain. I gcomhréir le haidhm Phlean Gníomhaíochta 2015 an Aontais Eorpaigh don Gheilleagar Ciorclach (8) chun timthriallta ábhar neamhthocsaineach a chur chun cinn agus an t-ardleibhéal cosanta do shláinte an duine agus don chomhshaol a chaomhnú, mheas an Coimisiún gur cheart an tréimhse chur i bhfeidhm sin a athmheasúnú laistigh de 7.5 bliana ó theacht i bhfeidhm an tsriain.

(9)

Chuathas i gcomhairle le Fóram um Malartú Faisnéise maidir le Forfheidhmiú na Gníomhaireachta maidir leis an srian a bheartaítear agus cuireadh a thuairim san áireamh, rud a d’fhág go ndearnadh cur síos modhnaithe ar an raon feidhme agus ar na maoluithe ón srian a bheartaítear.

(10)

An 26 Aibreán 2018, chuir an Ghníomhaireacht tuairimí deiridh RAC agus SEAC faoi bhráid an Choimisiúin.

(11)

Agus sainchomhad Iarscríbhinn XV agus tuairimí RAC agus SEAC á gcur san áireamh, agus os rud é go bhfuil riosca doghlactha do shláinte an duine ó luaidhe in earraí PVC, mhol an Coimisiún dréacht-rialachán ón gCoimisiún lena gcuirtear srian ar úsáid aon tiúchan luaidhe agus a chomhdhúile in earraí PVC agus ar chur ar an margadh luaidhe agus comhdhúile luaidhe in earraí PVC i dtiúchan atá cothrom le 0.1 % nó níos mó ná 0.1 % de réir meáchain den ábhar PVC (“an dréacht-rialachán”). An 20 Samhain 2019, fuair an dréacht-rialachán tuairim fhabhrach ón gCoiste a bunaíodh faoi Airteagal 133 de Rialachán (CE) Uimh. 1907/2006.

(12)

I gcomhréir leis an nós imeachta rialúcháin lena ngabhann grinnscrúdú agus dá dtagraítear in Airteagal 133(4) de Rialachán (CE) Uimh. 1907/2006, ghlac Parlaimint na hEorpa rún lena ndearnadh an dréachtrialachán a agóid an 12 Feabhra 2020 (9). Dá bhrí sin, níor ghlac an Coimisiún an dréachtrialachán.

(13)

Ina rún, d’iarr an Pharlaimint ar an gCoimisiún deireadh a chur leis na maoluithe maidir le PVC athshlánaithe, toisc go mbeadh tuliompar luaidhe go táirgí nua de thoradh air. D’iarr an Pharlaimint freisin go gcuirfí deireadh leis an maolú don dá lí luaidhe atá faoi réir an chórais údaraithe faoi REACH. Ina theannta sin, na ceanglais mharcála atá beartaithe le haghaidh earraí PVC ina bhfuil PVC athshlánaithe, iarradh ar an gCoimisiún na ceanglais sin a scriosadh toisc gur mheas sí go raibh sé míthreorach agus nach léiríonn sé go bhfuil méideanna níos airde luaidhe in PVC athshlánaithe ná mar atá in PVC nuatháirgthe. Ar deireadh, maidir leis an idirthréimhse a bheartaítear ina mbeidh feidhm ag forálacha an rialacháin, d’iarr an Pharlaimint ar an gCoimisiún an idirthréimhse sin a laghdú.

(14)

Tá measúnú cúramach déanta ag an gCoimisiún ar rún na Parlaiminte agus admhaíonn sé gur gá aghaidh a thabhairt ar ábhair imní áirithe. Ina theannta sin, measann sé go bhfuil riosca doghlactha fós ann do shláinte an duine ó luaidhe in earraí PVC, rud nach mór aghaidh a thabhairt air ar bhonn uile-Aontais. I bhfianaise an chúlra sin, chinn an Coimisiún roinnt d’fhorálacha an dréachtrialacháin a leasú chun na hargóintí a rinne an Pharlaimint a léiriú agus chun sonraí ábhartha nua a fuarthas ón nGníomhaireacht agus ó pháirtithe leasmhara a chur san áireamh.

(15)

Go háirithe, measann an Coimisiún, maidir le teicneolaíochtaí athchúrsála glaine lena gceadaítear substaintí leagáide ar údar imní iad, lena n-áirítear luaidhe, a bhaint ó dhramhaíl PVC, gur cheart na teicneolaíochtaí sin a mholadh. Teicneolaíochtaí athchúrsála atá ann faoi láthair, áfach, féadfaidh siad substaintí leagáide a laghdú ach gan iad a dhíothú go hiomlán. Is gá, dá bhrí sin, teorainn tiúchana 0.1 % luaidhe de réir meáchain a shocrú, ní hamháin chun luaidhe agus a chomhdhúile in PVC a chur ar an margadh, ach chun go bhféadfar earraí ina bhfuil níos lú ná 0.1 % luaidhe de réir meáchain d’ábhar PVC a chur ar an margadh agus leanúint d’ábhar PVC ina bhfuil luaidhe faoi bhun na teorann sin a úsáid in earraí, amhail ábhar PVC a athshlánaítear trí athchúrsáil cheimiceach nó trí thuaslagadh tuaslagóra agus ina bhfuil méideanna an-bheag luaidhe.

(16)

Mar mhodh chun teorainn a chur le tuliompar luaidhe i dtáirgí nua, ba cheart an maolú d’earraí PVC ina bhfuil PVC solúbtha athshlánaithe a bhaint as an dréachtrialachán. Ba cheart tréimhse 24 mhí a dheonú d’oibreoirí eacnamaíocha chun go mbeidís in ann oiriúnú do na ceanglais nua.

(17)

Mar sin féin, ba cheart maolú a leagan síos maidir le hearraí PVC áirithe ina bhfuil PVC docht athshlánaithe chun cothromaíocht chuí a bhaint amach idir na buntáistí fadtéarmacha foriomlána ó úsáid chiorclach na n-ábhar sin agus na hábhair imní sláinte fadtéarmacha foriomlána a bhaineann leis an ábhar athshlánaithe sin. Tar éis tuairiscí ón tionscal go bhfuil an meántiúchan luaidhe in PVC docht athshlánaithe faoi bhun 1.5 % mar gheall ar ghnáth-mheascadh dramhaíola réamh-thomhaltóra agus iar-thomhaltóra, ba cheart an teorainn tiúchana luaidhe atá ceadaithe in PVC docht athshlánaithe a laghdú ó 2 % go 1.5 % de réir meáchain. Chun cosc a chur ar láisteadh luaidhe agus ar fhoirmiú deannaigh ina bhfuil luaidhe, ba cheart PVC docht athshlánaithe in earraí atá maolaithe a iniamh go hiomlán laistigh de shraith de PVC nuatháirgthe, de PVC athshlánaithe nó d’ábhar oiriúnach eile ina bhfuil níos lú ná 0.1 % luaidhe de réir meáchain, mura bhfuil an t-earra atá maolaithe dorochtana le linn gnáthúsáide. Ina theannta sin, aontaíonn an Coimisiún leis an bParlaimint gur cheart na tairbhí do chosaint sláinte a bhaintear amach leis an srian a shaothrú níos tapúla. Dá bhrí sin, ba cheart fad an mhaolaithe a laghdú ó 15 go 10 mbliana. Ba cheart go ndéanfaí athbhreithniú ar an maolú 5 bliana ar a dhéanaí tar éis theacht i bhfeidhm an tsriain. Ba cheart go n-áireofar san athbhreithniú fíorú treochtaí maidir le tiúchan luaidhe in PVC athshlánaithe, infhaighteacht teicnící dí-éilliúcháin leordhóthanacha agus an tionchar socheacnamaíoch a bhaineann le deireadh a chur leis an maolú, ag cur san áireamh an riosca do shláinte an duine agus don chomhshaol.

(18)

Chun an méid luaidhe ó PVC docht athshlánaithe a theorannú chuig earraí aitheanta áirithe, maidir le PVC docht a athshlánaíodh ó phróifílí agus ó leatháin i bhfoirgnimh agus in oibreacha innealtóireachta sibhialta agus ina bhfuil níos mó ná 0.1 % de luaidhe de réir meáchain den PVC, níor cheart an PVC docht sin a úsáid ach amháin chun próifílí agus leatháin PVC a tháirgeadh le haghaidh na bhfeidhmeanna céanna. In éineacht le hoibleagáidí marcála iomchuí, ba cheart go n-áiritheofaí leis seo freisin sainaithint táirgí a bhfuil luaidhe iontu agus go n-éascófaí gníomhaíochtaí dí-éilliúcháin amach anseo. Ba cheart freisin bailiú agus athchúrsáil ar leithligh píopaí PVC a chur chun cinn (is annamh a athchúrsáiltear iad faoi láthair), mar go mbeidh ar tháirgeoirí píopaí a bhaineann úsáid as PVC a athshlánaíodh ó phróifílí agus ó leatháin chun píopaí nua a tháirgeadh faoi láthair foinse eile PVC a chur ina ionad. Mar sin féin, chun dóthain ama a thabhairt d’oibreoirí eacnamaíocha bailiú agus athchúrsáil dramhaíola PVC tiomnaithe a chur i bhfeidhm, a slabhraí soláthair a atheagrú agus, i gcás inar gá, PVC athshlánaithe a fháil ó fhoinsí eile seachas próifílí agus leatháin, ba cheart feidhm a bheith ag an oibleagáid sin tar éis 36 mhí ó theacht i bhfeidhm an Rialacháin seo.

(19)

Chun críoch forfheidhmithe agus chun a áirithiú go gcuirtear gairmithe agus tomhaltóirí ar an eolas go cuí faoi na rioscaí a d’fhéadfadh a bheith ann, ba cheart earraí PVC ina bhfuil PVC docht athshlánaithe a mharcáil má tá luaidhe iontu i dtiúchan atá cothrom le 0.1 % nó níos mó ná 0.1 % de réir meáchain den ábhar PVC. Ba cheart go n-éascódh sé seo freisin bailiú ar leithligh de dhramhaíl ina bhfuil luaidhe.

(20)

Ag cur san áireamh na deacrachtaí maidir le fáil amach an de bhunadh athshlánaithe é PVC in earraí, ba cheart go mbeadh soláthraithe earraí PVC a bhaineann leas as maoluithe a bhaineann lena n-ábhar in PVC athshlánaithe in ann tionscnamh athshlánaithe an ábhair a chruthú trí fhianaise dhoiciméadach a chur i láthair. San Aontas, tá roinnt scéimeanna deimhniúcháin, agus iad ar fad bunaithe ar shonraíochtaí teicniúla in EN 15343:2007 (10), ar fáil d’athchúrsálaithe chun tacú le héilimh ar inrianaitheacht PVC athshlánaithe. I bhfianaise an easpa modhanna praiticiúla oiriúnacha le go bhféadfaidh údaráis forfheidhmithe éilimh um athshlánú a bhaineann le PVC athshlánaithe in earraí allmhairithe a fhíorú, ba cheart bunús a thabhairt d’éilimh den sórt sin trí dheimhniú neamhspleách tríú páirtí.

(21)

An maolú sonrach a moladh roimhe seo do na líocha luaidhe “sulfa-crómáit luaidhe - buí” agus “crómáit luaidhe, molabdáit luaidhe agus sulfáit luaidhe - dearg”, ba cheart an maolú sin a bhaint as an dréachtrialachán. I bhfianaise cásdlí le déanaí (11) agus rún na Gníomhaireachta sainchomhad srianta a thíolacadh de bhun Airteagal 69(2) de Rialachán (CE) Uimh. 1907/2006 a bhaineann leis na rioscaí a eascraíonn as úsáid an dá lí luaidhe sin, measann an Coimisiún nach bhfuil gá leis an maolú sin anois.

(22)

I bhfianaise na rioscaí ísle agus an easpa roghanna oiriúnacha eile, ba cheart go leagfaí amach maolú le haghaidh deighilteoirí PVC-silice i gceallraí luaidhe ar feadh tréimhse 10 mbliana ó theacht i bhfeidhm an Rialacháin seo, agus meastar go mbeidh roghanna malartacha oiriúnacha ar fáil ina dhiaidh sin.

(23)

Chun rialáil dhúbailte a sheachaint, ba cheart maolú a leagan síos maidir le hearraí a chumhdaítear cheana le Rialachán (CE) Uimh. 1907/2006 nó le reachtaíocht eile de chuid an Aontais a rialaíonn ábhar luaidhe in PVC.

(24)

Ós rud é nach bhfuil tionscal san Aontas ag baint úsáid as cobhsaitheoirí luaidhe in PVC ó 2015, meastar gur leor tréimhse 18 mí chun go mbeidh formhór na n-oibreoirí eacnamaíocha in ann oiriúnú do na ceanglais nua, a stoc a dhiúscairt agus faisnéis ábhartha maidir leis an srian a chur in iúl laistigh dá slabhraí soláthair. Ina theannta sin, níor cheart go mbeadh feidhm ag an srian maidir le hearraí PVC a cuireadh ar an margadh cheana roimh dheireadh na tréimhse sin, mar go mbeadh deacrachtaí forfheidhmithe suntasacha mar thoradh air sin.

(25)

Ba cheart, dá bhrí sin, Rialachán (CE) Uimh. 1907/2006 a leasú dá réir sin.

(26)

Na bearta dá bhforáiltear sa Rialachán seo, tá siad i gcomhréir leis an tuairim ón gCoiste arna bunú faoi Airteagal 133 de Rialachán (CE) Uimh. 1907/2006,

(1)

Tháinig an Comhaontú ar an Limistéar Eorpach Eacnamaíoch (2) (“Comhaontú LEE”) i bhfeidhm an 1 Eanáir 1994.

(2)

De bhun Airteagal 98 de Chomhaontú LEE, is féidir le Comhchoiste LEE arna bhunú le Comhaontú LEE (“Comhchoiste LEE”) a chinneadh, inter alia, Iarscríbhinn I (Ábhair thréidliachta agus fíteasláintíochta) agus Iarscríbhinn II (Rialacháin theicniúla, caighdeáin, tástáil agus deimhniú) a ghabhann le Comhaontú LEE a leasú.

(3)

Tá Rialachán (AE) 2019/1009 ó Pharlaimint na hEorpa agus ón gComhairle (3) le hionchorprú i gComhaontú LEE.

(4)

Ba cheart, dá bhrí sin, Iarscríbhinní I agus II a ghabhann le Comhaontú LEE a leasú dá réir sin.

(5)

Ba cheart, dá bhrí sin, seasamh an Aontais i gComhchoiste LEE a bheith bunaithe ar an dréachtchinneadh atá i gceangal leis seo,

(1)

Tháinig an Comhaontú ar an Limistéar Eorpach Eacnamaíoch (2) (“Comhaontú LEE”) i bhfeidhm an 1 Eanáir 1994.

(2)

De bhun Airteagal 98 de Chomhaontú LEE, féadfaidh Comhchoiste LEE a chinneadh Iarscríbhinn II (Rialacháin theicniúla, caighdeáin, tástáil agus deimhniú) agus Iarscríbhinn XIII (Iompar) a ghabhann le Comhaontú LEE, inter alia, a leasú.

(3)

Ba cheart Rialachán (AE) 2018/1139 ó Pharlaimint na hEorpa agus ón gComhairle (3) a ionchorprú i gComhaontú LEE.

(4)

Ba cheart, dá bhrí sin, Iarscríbhinn II (Rialacháin theicniúla, caighdeáin, tástáil agus deimhniú) agus Iarscríbhinn XIII (Iompar) a ghabhann le Comhaontú LEE a leasú dá réir sin.

(5)

Ba cheart, dá bhrí sin, seasamh an Aontais i gComhchoiste LEE a bheith bunaithe ar an dréachtchinneadh atá i gceangal,

(1)

Tháinig an Comhaontú maidir leis an Limistéar Eorpach Eacnamaíoch (2) (“Comhaontú LEE”) i bhfeidhm an 1 Eanáir 1994.

(2)

De bhun Airteagal 98 de Chomhaontú LEE, féadfaidh Comhchoiste LEE a chinneadh Prótacal 31 a ghabhann le Comhaontú LEE, maidir le comhar i réimsí ar leith lasmuigh de na ceithre shaoirse, inter alia, a leasú.

(3)

Is iomchuí comhar na bPáirtithe Conarthacha i gComhaontú LEE a leathnú chun Rialachán (AE) 2019/126 ó Pharlaimint na hEorpa agus ón gComhairle (3) a chumhdach.

(4)

Ba cheart, dá bhrí sin, Prótacal 31 a ghabhann le Comhaontú LEE a leasú ionas go bhféadfaidh an comhar leathnaithe sin a bheith ann ón 1 Eanáir 2023.

(5)

Ba cheart, dá bhrí sin, seasamh an Aontais i gComhchoiste LEE a bheith bunaithe ar an dréachtchinneadh atá i gceangal,

(1)

Le Cinneadh (CBES) 2021/509 ón gComhairle (1), bunaítear an tSaoráid Eorpach Síochána chun go maoineodh na Ballstáit gníomhaíochtaí an Aontais faoin gcomhbheartas eachtrach agus slándála chun an tsíocháin a chaomhnú, coinbhleachtaí a chosc agus an tslándáil idirnáisiúnta a neartú de bhun Airteagal 21(2), pointe (c), den Chonradh. Go háirithe, de bhun Airteagal 1(2) de Chinneadh (CBES) 2021/509, tá an tSaoráid Eorpach Síochána le húsáid chun bearta cúnaimh a mhaoiniú amhail gníomhaíochtaí chun acmhainneachtaí a bhaineann le cúrsaí míleata agus cosanta atá ag tríú Stáit agus eagraíochtaí réigiúnacha agus idirnáisiúnta a neartú.

(2)

Tá Fórsaí Armtha na hÚcráine ag cur i gcoinne an fhogha arna thabhairt ag an Rúis, agus tá taismigh mhíleata agus shibhialtacha leanúnacha ann dá bharr sin, le roinnt blianta anuas. Ghéaraigh fogha na Rúise go mór i mí Feabhra 2022 de bharr an ionraidh iomláin gan chúis a rinne fórsaí armtha Chónaidhm na Rúise ar an Úcráin.

(3)

An 25 Feabhra 2022, rinne Rialtas na hÚcráine iarraidh phráinneach ar an Aontas cúnamh a thabhairt trí threalamh míleata a sholáthar. Mar fhreagairt air sin, cuireadh tacaíocht ar fáil faoi SES ón 28 Feabhra 2022 de bhun Chinntí (CBES) 2022/338 (2) agus (CBES) 2022/339 (3) ón gComhairle.

(4)

Le linn an 24ú cruinniú mullaigh idir an tAontas Eorpach agus an Úcráin an 3 Feabhra 2023, d’athdhearbhaigh an tAontas agus a Bhallstáit go dtacóidh siad i gcónaí leis an Úcráin agus le muintir na hÚcráine sa chogadh foghach atá fós ar bun ag an Rúis a fhad is gá. Ag an gcruinniú urghnách den Chomhairle Eorpach a bhí ar siúl an 9 agus an 10 Feabhra 2023, leag Uachtarán na hÚcráine béim ar an ngéarghá atá le tuilleadh tacaíochta míleata don Úcráin.

(5)

An 2 Márta 2023, fuair Ardionadaí an Aontais do Ghnóthaí Eachtracha agus don Bheartas Slándála (“an tArdionadaí”) iarraidh ón Úcráin ar chúnamh ón Aontas i ndáil le hurchair airtléire dar calabra 155-mm a sholáthar d’Fhórsaí Armtha na hÚcráine.

(6)

An 20 Márta 2023, tháinig an Chomhairle ar chomhaontú maidir le cur chuige trí rian d’fhonn, go háirithe, dlús a chur le seachadadh agus le soláthar comhpháirteach, agus é mar aidhm leis milliún urchar armlóin airtléire a sholáthar don Úcráin mar iarracht chomhpháirteach laistigh den 12 mhí seo romhainn, agus d’iarr sí go gcuirfí na trí rian sin chun feidhme go pras, ar rianta iad atá idirnasctha agus ar gá iad a shaothrú go comhthreomhar agus ar bhealach comhordaithe. D’iarr an Chomhairle ar na Ballstáit armlón talamh go talamh agus airtléire a sheachadadh go práinneach chuig an Úcráin agus, arna iarraidh sin, diúracáin. A mhéid a bhaineann leis an tríú rian, d’iarr an Chomhairle ar an gCoimisiún freisin tograí nithiúla a thíolacadh chun tacú go práinneach le hacmhainneachtaí monaraíochta thionscal cosanta na hEorpa a mhéadú, slabhraí soláthair a dhaingniú, nósanna imeachta éifeachtúla soláthair a éascú, aghaidh a thabhairt ar easnaimh in acmhainneachtaí táirgeachta, agus infheistíochtaí a chur chun cinn, lena n-áirítear, i gcás inarb iomchuí, trí bhuiséad an Aontais a shlógadh.

(7)

Ina theannta sin, d’iarr an Chomhairle ar na Ballstáit urchar airtléire dar calabra 155-mm, agus, arna iarraidh sin, diúracáin, a sholáthar go comhpháirteach don Úcráin ar an mbealach is tapúla is féidir roimh an 30 Meán Fómhair 2023 ó thionscal cosanta na hEorpa (agus ón Iorua) laistigh de na paraiméadair arna sainiú i gcomhthéacs tionscadal de chuid na Gníomhaireachta Eorpaí um Chosaint (GEC) atá ann cheana nó trí thionscadail chomhlántacha fála comhpháirtí arna stiúradh ag Ballstát.

(8)

Níl na téarmaí agus na coinníollacha a leagtar síos sa Chinneadh seo ábhartha ach amháin do sholáthairtí comhpháirteacha dá dtagraítear i mír 3 den nóta dar teideal “Speeding up delivery and joint procurement of ammunition for Ukraine” [dlús a chur le seachadadh agus soláthar comhpháirteach armlóin don Úcráin] a d’fhormheas an Chomhairle an 20 Márta 2023 agus tá siad gan dochar d’aon téarmaí agus coinníollacha a bhaineann le cinntí nó rialacháin a bhaineann le tionscal cosanta na hEorpa amach anseo.

(9)

Táthar chun bearta cúnaimh a chur chun feidhme agus aird á tabhairt ar na prionsabail agus ar na ceanglais a leagtar amach i gCinneadh (CBES) 2021/509, go háirithe ar chomhlíonadh Chomhsheasamh 2008/944/CBES ón gComhairle (4), agus i gcomhréir leis na rialacha maidir le cur chun feidhme an ioncaim agus an chaiteachais arna mhaoiniú faoin tSaoráid Eorpach Síochána (“rialacha cur chun feidhme SES”), lena n-áirítear na rialacha maidir le tionscnamh an trealaimh mhíleata. De mhaolú ar Airteagal 50 de Leabhar 3 de rialacha cur chun feidhme SES, agus de bharr na n-imthosca sonracha, níl rannpháirtíocht i nósanna imeachta soláthair chomhpháirtigh le haghaidh armlóin agus diúracáin atá le maoiniú tríd an mbeart cúnaimh sin ar oscailt ach d’oibreoirí eacnamaíocha atá bunaithe san Aontas nó san Iorua agus a tháirgeann an t-armlón agus na diúracáin seo san Aontas agus san Iorua, gan dochar d’aon chinntí a dhéanfar amach anseo. Ba cheart feidhm a bheith ag na rialacha tionscnaimh a leagtar síos in Airteagal 60 de Rialachán (AE) Uimh. 952/2013 ó Pharlaimint na hEorpa agus ón gComhairle (5). Ba cheart a mheas go bhfuil armlón agus diúracáin a bhfuil céim thábhachtach sa mhonarú curtha i gcrích acu san Aontas nó san Iorua, arb é atá ann cóimeáil deiridh, incháilithe freisin. Féadfar oibreoirí atá bunaithe lasmuigh den Aontas nó den Iorua, nó a bhfuil a dtáirgeadh lasmuigh díobh sin, a áireamh i slabhraí soláthair na n-oibreoirí sin. Ba cheart leasanna slándála agus cosanta na mBallstát a chur san áireamh ina leith sin.

(10)

Athdhearbhaíonn an Chomhairle go bhfuil rún daingean aici cearta an duine, saoirsí bunúsacha agus prionsabail dhaonlathacha a chosaint, a chur chun cinn agus a chomhlíonadh, an smacht reachta agus an dea-rialachas a neartú i gcomhréir le Cairt na Náisiún Aontaithe, le Dearbhú Uilechoiteann Chearta an Duine agus leis an dlí idirnáisiúnta, go háirithe an dlí idirnáisiúnta um chearta an duine agus an dlí daonnúil idirnáisiúnta.

(11)

Gheobhaidh an Chomhairle tuairisc rialta mhíosúla maidir le cur chun feidhme an bhirt cúnaimh faoin gCinneadh seo chun faireachán a dhéanamh ar an dul chun cinn a bheidh déanta maidir leis an aidhm milliún urchar armlóin airtléire a chur ar fáil don Úcráin. Eagrófar freisin cruinnithe rialta ar leibhéal na Stiúrthóirí Armála Náisiúnta leis an Tascfhórsa um Sholáthar Comhpháirteach Cosanta (an Coimisiún, an tSeirbhís Eorpach Gníomhaíochta Seachtraí, GEC) chun measúnú a dhéanamh ar na riachtanais agus ar na cumais thionsclaíocha agus chun an dlúthchomhar riachtanach a áirithiú, go háirithe maidir le soláthar ó stoic, athbheartú tosaíochtaí i leith orduithe atá ann cheana agus na tionscadail éagsúla fála comhpháirtí, chun cur chun feidhme leordhóthanach na dtrí rian éagsúla a áirithiú.

(12)

Déanfaidh Coiste na mBuanionadaithe faireachán ar chur chun feidhme comhordaithe comhthreomhar an chur chuige trí rian.

(13)

Thug an Chomhairle dá haire freisin go bhfuil sí tiomanta i gcónaí tacaíocht pholaitiúil agus mhíleata a thabhairt don Úcráin, go háirithe trí SES agus trí Mhisean um Chúnamh Míleata an Aontais Eorpaigh mar thaca leis an Úcráin, gan dochar do cháilíocht shonrach na mbeartas slándála agus cosanta atá ag Ballstáit áirithe agus é á áirithiú aici go dtugtar an aird chuí ar leasanna slándála agus cosanta na mBallstát uile,

(1)

Le Cinneadh 1/2023 uaidh an 16 Márta 2023, ghlac an Comhchoiste a Rialacha Nós Imeachta.

(2)

Mar a leagtar amach in Airteagal 6(1) den Chomhaontú maidir le hiompar lasta de bhóthar idir an tAontas Eorpach agus an Úcráin (“an Comhaontú”), tá an Comhaontú le feidhm a bheith aige go dtí an 30 Meitheamh 2023.

(3)

Mar a leagtar amach in Airteagal 7(2) den Chomhaontú, tá an Comhchoiste le tionól 3 mhí ar a dhéanaí roimh dhul in éag an Chomhaontaithe chun measúnú a dhéanamh ar an ngá leanúint leis an gComhaontú agus cinneadh a dhéanamh ina leith sin, lena n-áirítear fad na leanúna.

(4)

Léiríodh leis an bhfaireachán ar an gComhaontú go bhfuil sé tagtha chun a bheith fíor-riachtanach le haghaidh dhea-fheidhmiú Lánaí Dlúthpháirtíochta an Aontais-na hÚcráine.

(5)

Dá bharr, is freagra é fadú an Chomhaontaithe ar an nglaoch ó Chinn Stáit agus Rialtais an Aontais ar an Aontas Eorpach “leanúint d’fheabhas a chur ar éifeachtúileacht na Lánaí Dlúthpháirtíochta uile” mar leis na Lánaí seo, “bhíothas in ann líon suntasach de bharra, de tháirgí talmhaíochta agus de leasacháin na hÚcráine a onnmhairiú chuig na tíortha is mó atá i ngátar” (2).

(6)

Tá tionchar dearfach tar éis a bheith ag an gComhaontú ar an Aontas Eorpach freisin ós rud é go rabhthas in ann onnmhairí a mhéadú chun na hÚcráine. Ar an taobh eile, ní raibh ina thoradh ar an gComhaontú ach méadú teoranta maidir le hoibríochtaí ar chríoch an Aontais Eorpaigh a dhéanann oibreoirí iompair de bhóthar de chuid na hÚcráine, agus níor tháinig méadú ar leibhéal na hiomaíochta ar bhealach neamh-inghlactha le haghaidh oibreoirí iompair de bhóthar an Aontais.

(7)

Tá an comhaontú tar éis tacú freisin leis an ngníomhaíocht ó údaráis na mBallstát atá inniúil chun doiciméid tiománaí a rialú maidir leis an gcomhrac i gcoinne na calaoise agus an bhrionnaithe.

(8)

Ba cheart féachaint ar fhadú an Chomhaontaithe mar bheart a rannchuidíonn freisin le hatógáil na hÚcráine tar éis chogadh foghach na Rúise i gcoinne na hÚcráine.

(9)

Is iomchuí, dá bhrí sin, síneadh a chur leis an gComhaontú go dtí an 30 Meitheamh 2024,

(1)

Thánig an Comhaontú Comhlachais idir an tAontas Eorpach agus an Comhphobal Eorpach do Fhuinneamh Adamhach agus a mBallstáit, de pháirt amháin, agus an Úcráin, den pháirt eile (“an Comhaontú”) i bhfeidhm an 1 Meán Fómhair 2017.

(2)

Le hAirteagal 1(2), pointe (d), den Chomhaontú foráiltear gurb é is aidhm don Chomhaontú, inter alia, tacú le hiarrachtaí na hÚcráine an t-aistriú go geilleagar margaidh feidhmiúil a thabhairt chun críche trí bhíthin, inter alia, a reachtaíocht a chomhfhogasú de réir a chéile do reachtaíocht an Aontais.

(3)

In Airteagal 124 den Chomhaontú, aithníonn na Páirtithe a thábhachtaí atá sé reachtaíocht na hÚcráine atá ann cheana a chomhfhogasú do reachtaíocht an Aontais in earnáil na seirbhísí teileachumarsáide. Tá gealltanas tugtha ag an Úcráin go n-áiritheoidh sí go ndéanfar na dlíthe atá aici faoi láthair agus an reachtaíocht a bheidh aici amach anseo a chomhoiriúnú le acquis an Aontais de réir a chéile. Foráiltear leis an gcomhfhogasú sin go leathnófar de réir a chéile gníomhaíochtaí uile acquis an Aontais dá dtagraítear i bhFoscríbhinní XVII-2 go XVII-5 d’Iarscríbhinn XVII a ghabhann leis an gComhaontú agus ba cheart, a luaithe agus a chomhlíonfar na coinníollacha ina leith, go ndéanfaí an Úcráin a chomhtháthú de réir a chéile i margadh inmheánach an Aontais, go háirithe trí chóir margaidh inmheánaigh a dheonú go cómhalartach i gcomhréir le hAirteagal 4(3) d’Iarscríbhinn XVII a ghabhann leis an gComhaontú.

(4)

D’iarr an Úcráin tuilleadh comhtháthaithe maidir le fánaíocht a dhéanamh ar líonraí poiblí cumarsáide soghluaiste laistigh den Aontas, go háirithe trí chóir margaidh inmheánaigh chun críche fánaíocht a dhéanamh ar líonraí poiblí cumarsáide soghluaiste.

(5)

Is cuid d’acquis teileachumarsáide an Aontais iad na rialacha maidir le fánaíocht, ach níor áiríodh iad i bhFoscríbhinn XVII-3 (Rialacha is infheidhme maidir le seirbhísí teileachumarsáide) d’Iarscríbhinn XVII a ghabhann leis an gComhaontú. Dá bhrí sin, ba cheart Foscríbhinn XVII-3 a chomhlánú le gníomhartha ábhartha an Aontais a bhaineann le fánaíocht a dhéanamh ar líonraí poiblí cumarsáide soghluaiste.

(6)

Ag an gcéim reatha d’fhorbairt eacnamaíoch agus dhlíthiúil mhargadh inmheánach an Aontais a bhaineann le seirbhísí teileachumarsáide, is iad seo a leanas gníomhartha ábhartha an Aontais a bhaineann le fánaíocht: Treoir (AE) 2018/1972 ó Pharlaimint na hEorpa agus ón gComhairle (1), Rialachán (AE) 2022/612 ó Pharlaimint na hEorpa agus ón gComhairle (2), Rialachán Cur Chun Feidhme (AE) 2016/2286 ón gCoimisiún (3), agus Rialachán Tarmligthe (AE) 2021/654 ón gCoimisiún (4).

(7)

Tá Treoir (AE) 2018/1972 san áireamh cheana féin i bhFoscríbhinn XVII-3 d’Iarscríbhinn XVII a ghabhann leis an gComhaontú. Is gá na gníomhartha eile is ábhartha maidir le fánaíocht a dhéanamh ar líonraí poiblí cumarsáide soghluaiste a áireamh san Fhoscríbhinn sin chun go bhféadfar an Úcráin a aistriú de réir a chéile chuig achtú iomlán agus chuig cur chun feidhme iomlán na bhforálacha uile is infheidhme maidir le hearnáil na teileachumarsáide, go háirithe na forálacha maidir le fánaíocht a dhéanamh ar líonraí poiblí cumarsáide soghluaiste.

(8)

Measúnú dearfach ar reachtaíocht na hÚcráine, ar chur chun feidhme agus ar fhorfheidhmiú na reachtaíochta sin, arna ndéanamh i gcomhréir leis na prionsabail a leagtar amach in Iarscríbhinn XVII a ghabhann leis an gComhaontú, is réamhchoinníoll riachtanach é sin le haghaidh aon chinneadh ón gCoiste Trádála i dtaca le cóir margaidh inmheánaigh a dheonú de bhun Airteagal 4(3) d’Iarscríbhinn XVII i ndáil le hearnáil ar leith. I gcomhthéacs acquis an Aontais maidir le fánaíocht a dhéanamh ar líonraí poiblí cumarsáide soghluaiste, maidir leis an gceanglas i dtaca le hachtachán iomlán agus cur chun feidhme iomlán a bhaint amach sula nglacfar an cinneadh maidir le cóir margaidh inmheánaigh faoi Airteagal 4(3) d’Iarscríbhinn XVII, níor cheart a thuiscint gurb é atá i gceist leis an gceanglas sin go gcuirfí teorainneacha coimirce i bhfeidhm idir na Páirtithe sa Chomhaontú maidir le meánmhuirir mhórdhíola chun seirbhísí rialáilte a sholáthar a bhaineann le fánaíocht a dhéanamh ar líonraí poiblí cumarsáide soghluaiste. Is amhlaidh atá maidir leis na huasrátaí foirceanta rialáilte do ghuthghlaonna i dtaca leis an tseirbhís chun glao a fhoirceannadh le húsáideoir deiridh ar a líonra. Deonófar iad sin go cómhalartach idir Páirtithe sa Chomhaontú amhail ón dáta a shonrófar i gcinneadh a dhéanfaidh an Coiste Trádála faoi dheireadh chun cóir margaidh inmheánaigh a dheonú le haghaidh fánaíocht a dhéanamh ar líonraí poiblí cumarsáide soghluaiste de bhun Airteagal 4(3) d’Iarscríbhinn XVII.

(9)

Chun an Úcráin a chomhtháthú de réir a chéile i margadh inmheánach an Aontais, go háirithe maidir le seirbhísí teileachumarsáide, beidh gá, inter alia, le Rialachán Tarmligthe (AE) 2021/654 a chur chun feidhme go huile agus go hiomlán, i gcomhréir le cuspóirí an Rialacháin sin. Faoi láthair, níl an Úcráin in ann na huasrátaí foirceanta aonair uile-Aontais a thrasuí agus a chur chun feidhme go hiomlán chun críche seirbhísí foirceanta náisiúnta san Úcráin. Maidir le cur chun feidhme na n-uasrátaí foirceanta aonair uile-Aontais freisin chun críche seirbhísí foirceanta náisiúnta guthghlaonna san Úcráin, níl sé fíor-riachtanach, áfach, chun tuilleadh comhtháthaithe a dhéanamh i ndáil le fánaíocht a dhéanamh ar líonraí poiblí cumarsáide soghluaiste. Dá bhrí sin, déantar foráil maidir le hamlíne dhifriúil don chur chun feidhme i dtaca leis an ngné sin de Rialachán Tarmligthe (AE) 2021/654, rialachán a ngeallann an Úcráin ina leith go gcuirfidh sí chun feidhme go hiomlán laistigh de thrí bliana ó chinneadh a dhéanfaidh an Coiste Trádála faoi dheireadh maidir le cóir margaidh inmheánaigh a dheonú le haghaidh fánaíocht a dhéanamh ar líonraí poiblí cumarsáide soghluaiste de bhun Airteagal 4(3) d’Iarscríbhinn XVII a ghabhann leis an gComhaontú.

(10)

Tá feidhm ag Rialachán Tarmligthe (AE) 2021/654 freisin faoi choinníollacha áirithe maidir le glaonna a thionscnaítear ó uimhreacha tríú tír, agus é mar aidhm na huasrátaí foirceanta aonair uile-Aontais do ghuthghlaonna a chur i bhfeidhm ar bhealach oscailte, trédhearcach agus neamh-idirdhealaitheach, agus eisiamh glaonna a thionscnaítear ó uimhreacha tríú tír a theorannú don mhéid atá fíor-riachtanach chun a áirithiú go mbainfear amach cuspóirí margaidh inmheánaigh agus chun comhréireacht a áirithiú. Faoi láthair, níl an Úcráin in ann na huasrátaí foirceanta aonair uile-Aontais a thrasuí agus a chur chun feidhme go hiomlán chun críche glaonna de thionscnamh uimhreacha tríú tír. Maidir le cur chun feidhme na n-uasrátaí foirceanta aonair uile-Aontais freisin chun críoch foirceanta ó uimhreacha tríú tír, cé nach bhfuil sé fíor-riachtanach chun tuilleadh comhtháthaithe a dhéanamh i ndáil le fánaíocht a dhéanamh ar líonraí poiblí cumarsáide soghluaiste, bheadh gá le hachtachán iomlán agus le cur chun feidhme iomlán Rialachán Tarmligthe (AE) 2021/654 ag an Úcráin chun ailíniú leis na rialacha is infheidhme i margadh inmheánach an Aontais do sheirbhísí teileachumarsáide a áirithiú. Dá bhrí sin, déantar foráil maidir le hamlíne dhifriúil don chur chun feidhme i dtaca leis an ngné sin de Rialachán Tarmligthe (AE) 2021/654, rialachán a ngeallann an Úcráin ina leith go gcuirfidh sí chun feidhme go hiomlán roimh aon chinneadh a dhéanfaidh an Coiste Trádála faoi dheireadh maidir le cóir margaidh inmheánaigh a dheonú le haghaidh sheirbhísí teileachumarsáide de bhun Airteagal 4(3) d’Iarscríbhinn XVII a ghabhann leis an gComhaontú.

(11)

Le hAirteagal 1(4) de Rialachán (AE) 2022/612 agus Airteagal 3(2) agus (3) de Rialachán Tarmligthe (AE) 2021/654, déantar tagairt do rátaí malairte tagartha arna bhfoilsiú ag an mBanc Ceannais Eorpach in Iris Oifigiúil an Aontais Eorpaigh. Ní fhoilsíonn an Banc Ceannais Eorpach rátaí malairte do hryvnia na hÚcráine faoi láthair. Dá bhrí sin, tá gá le hoiriúnú i ndáil leis na forálacha sin chun foráil a dhéanamh maidir le húsáid na rátaí malairte idir an euro agus hryvnia na hÚcráine arna bhfoilsiú ag Banc Náisiúnta na hÚcráine fad is nach bhfoilseoidh an Banc Ceannais Eorpach rátaí malairte do hryvnia na hÚcráine.

(12)

Le hAirteagal 11 d’Iarscríbhinn XVII a ghabhann leis an gComhaontú, tugtar de chumhacht don Choiste Trádála na ceithre ghníomh eile de chuid an Aontais a chur le hIarscríbhinn XVII a ghabhann leis an gComhaontú trí mhodhnú a dhéanamh air.

(13)

A luaithe a mheasfaidh an Úcráin go ndearnadh gníomh dlí áirithe de chuid an Aontais a achtú agus a chur chun feidhme i gceart, déanfaidh an Úcráin na táblaí trasuímh ábhartha, mar aon le haistriúchán oifigiúil Béarla ar ghníomh dlí chur chun feidhme na hÚcráine, a chur faoi bhráid chomhrúnaí an Aontais ar an gCoiste Trádála chun go bhféadfaidh an Coimisiún Eorpach dul ar aghaidh leis an measúnú cuimsitheach dá bhforáiltear i bhFoscríbhinn XVII-6 d’Iarscríbhinn XVII a ghabhann leis an gComhaontú.

(14)

I bhfianaise cogadh foghach leanúnach na Rúise i gcoinne na hÚcráine, d’fhéadfadh cur chun feidhme na n-oibleagáidí a leagtar síos sa Chinneadh seo a bheith dodhéanta go hoibiachtúil nó thar a bheith deacair le baint amach laistigh de na hamlínte a chuirtear ar fáil. Sa chás sin, ba cheart don Úcráin an t-ábhar a chur faoi bhráid an Choiste Trádála i gcomhréir le hAirteagal 11 d’Iarscríbhinn XVII a ghabhann leis an gComhaontú, a dhéanfaidh an tsaincheist a mheas i gcomhréir le hAirteagail 3(4) agus (5) d’Iarscríbhinn XVII a ghabhann leis an gComhaontú,