(1)

Le Treoir 2011/65/AE ceanglaítear ar na Ballstáit a áirithiú nach mbeidh na substaintí guaiseacha a liostaítear in Iarscríbhinn II a ghabhann leis an Treoir sin i dtrealamh leictreach agus leictreonach a chuirtear ar an margadh. Níl feidhm ag an srian sin maidir le feidhmeanna díolmhaithe áirithe a liostaítear in Iarscríbhinn IV a ghabhann leis an Treoir sin.

(2)

Liostaítear catagóirí an trealaimh leictrigh agus leictreonaigh a bhfuil feidhm ag Treoir 2011/65/AE ina leith in Iarscríbhinn I a ghabhann leis an Treoir sin.

(3)

Is substaint é mearcair a bhfuil srian air agus a liostaítear in Iarscríbhinn II a ghabhann le Treoir 2011/65/AE.

(4)

An 26 Aibreán 2021, fuair an Coimisiún iarratas a rinneadh i gcomhréir le hAirteagal 5(3) de Threoir 2011/65/AE maidir le díolúine a liostú in Iarscríbhinn IV a ghabhann leis an Treoir sin, i dtaca le mearcair i dtrasduchtóirí brú leáite le haghaidh réiméadair ribeacha ag teochtaí os cionn 300 °C agus ag brúnna os cionn 1 000 bar (“an díolúine a iarradh”).

(5)

Comhpháirteanna leictreacha atá sa trasduchtóir brú a úsáidtear, atá ionchorpraithe i réiméadair ribeacha, agus is gaireas tomhais leictreach faoi raon feidhme Threoir 2011/65/AE é. Tagann na réiméadair ribeacha a dtugtar tuairisc orthu sa díolúine a iarradh faoi chatagóir 9 “ionstraimí rialúcháin agus monatóireachta” d’Iarscríbhinn I a ghabhann le Treoir 2011/65/AE.

(6)

Sa mheastóireacht a rinneadh ar an iarratas ar dhíolúine, a raibh staidéar measúnaithe teicniúil agus eolaíoch mar chuid di (2), thángthas ar an gconclúid gur dodhéanta go heolaíoch agus go teicniúil mearcair i dtrasduchtóirí brú leáite le haghaidh réiméadair ribeacha ag teochtaí os cionn 300 °C agus ag brúnna os cionn 1 000 bar a ionadú. Mar chuid den mheastóireacht, rinneadh comhairliúcháin le páirtithe leasmhara mar a cheanglaítear le hAirteagal 5(7) de Threoir 2011/65/AE.

(7)

Comhlíontar ceann de na coinníollacha ábhartha a shonraítear in Airteagal 5(1), pointe (a), de Threoir 2011/65/AE, is é sin gur dodhéanta go heolaíoch nó go teicniúil an díothú agus an t-ionadú a dhéanamh.

(8)

Is iomchuí, dá bhrí sin, an díolúine a iarradh a dheonú trí na feidhmeanna a gcumhdaítear léi in Iarscríbhinn IV a ghabhann le Treoir 2011/65/AE a áireamh i dtaca le trealamh leictreach agus leictreonach i gcatagóir 9.

(9)

Chun srianta ar tháirgí ar cuireadh mearcair leo amach anseo a chomhlíonadh faoi Rialachán (AE) 2017/852 ó Pharlaimint na hEorpa agus ón gComhairle (3), is gá tréimhse bhailíochta na díolúine a theorannú go dtí an 31 Nollaig 2025. Socraítear an tréimhse i gcomhréir le hAirteagal 5(2), an chéad fhomhír de Threoir 2011/65/AE.

(10)

Ba cheart, dá bhrí sin, Treoir 2011/65/AE a leasú dá réir sin,