(1)

Le Treoir 2011/65/AE ceanglaítear ar na Ballstáit a áirithiú nach mbeidh na substaintí guaiseacha a liostaítear in Iarscríbhinn II a ghabhann leis an Treoir sin i dtrealamh leictreach agus leictreonach a chuirtear ar an margadh. Níl feidhm ag an srian sin maidir le feidhmeanna díolmhaithe áirithe a liostaítear in Iarscríbhinn III a ghabhann leis an Treoir sin.

(2)

Liostaítear catagóirí an trealaimh leictrigh agus leictreonaigh a bhfuil feidhm ag Treoir 2011/65/AE ina leith in Iarscríbhinn I a ghabhann leis an Treoir sin.

(3)

Is substaint é mearcair a bhfuil srian air agus a liostaítear in Iarscríbhinn II a ghabhann le Treoir 2011/65/AE.

(4)

Le Cinneadh 2010/571/AE (2), dheonaigh an Coimisiún, i measc nithe eile, díolúine chun mearcair a úsáid i ngal-lampaí sóidiam ardbhrú eile chun críocha soilsithe ghinearálta (“an díolúine”), a liostaítear anois mar dhíolúintí 4(c)-I, 4(c)-II agus 4(c)-III in Iarscríbhinn III a ghabhann le Treoir 2011/65/AE. Bhí an díolúine le dul in éag an 21 Iúil 2016, i gcomhréir le hAirteagal 5(2), an dara fomhír, pointe (a), den Treoir sin.

(5)

Úsáidtear mearcair i ngal-lampaí sóidiam ardbhrú le haghaidh dath solais agus airíonna dathscáthaithe.

(6)

An 15 Eanáir 2015, fuair an Coimisiún iarratas chun an díolúine a athnuachan (“an iarraidh ar athnuachan”), atá laistigh den teorainn ama a leagtar amach in Airteagal 5(5) de Threoir 2011/65/AE, a nuashonraíodh le faisnéis bhreise an 20 Eanáir 2020. I gcomhréir le hAirteagal 5(5) de Threoir 2011/65/AE, beidh an díolúine bailí go dtí go mbeidh cinneadh glactha ar an iarraidh ar athnuachan.

(7)

Léiríodh sa mheasúnú ar an iarraidh ar athnuachan, inar cuireadh san áireamh infhaighteacht na n-ionadach agus tionchar socheacnamaíoch an ionadaithe, go bhfuil ionadú nó díothú mearcair sna feidhmeanna lena mbaineann dodhéanta go teicniúil faoi láthair. Ba é ba chonclúid don mheastóireacht freisin gur cheart an cion mearcair a cheadaítear sna feidhmeanna sonracha sin a laghdú chun go gcomhfhreagródh sé d’athruithe sa mhargadh le haghaidh cineálacha lampaí sonracha. Áiríodh comhairliúcháin le páirtithe leasmhara sa mheastóireacht i gcomhréir le hAirteagal 5(7) de Threoir 2011/65/AE. Cuireadh na barúlacha a fuarthas le linn na gcomhairliúchán sin ar fáil go poiblí ar shuíomh gréasáin tiomnaithe.

(8)

Tá an díolúine i gcomhréir le Rialachán (CE) Uimh. 1907/2006 ó Pharlaimint na hEorpa agus ón gComhairle (3), agus ar an gcaoi sin ní lagaítear an chosaint don chomhshaol agus don tsláinte a thugtar léi.

(9)

Dá bhrí sin, is iomchuí an athnuachan ar an díolúine a dheonú maidir le hiontrálacha 4(c)-I, 4(c)-II agus 4(c)-III in Iarscríbhinn III a ghabhann le Treoir 2011/65/AE ar feadh uastréimhse de 5 bliana, ar an ábhar nach bhfuil aon ionadaí iontaofa ar fáil faoi láthair, i gcomhréir le hAirteagal 5(2), an chéad fhomhír, den Treoir sin. I bhfianaise thorthaí na n-iarrachtaí leanúnacha chun teacht ar ionadú iontaofa, ní dócha go mbeidh drochthionchair ag tréimhse na díolúine ar an nuálaíocht.

(10)

Ba cheart, dá bhrí sin, Treoir 2011/65/AE a leasú dá réir sin,